အခန်း ၄၉၆

လော့ချန်နှင့် သူ၏စွန့်စားခန်းများ

အခန်း (၄၉၆) - ကုသမှုအစီအစဉ်နှင့် လော့ထျန်းအဖွဲ့၏ လက်ရှိဖွံ့ဖြိုးမှုအခြေအနေ

"သခင်.... နောက်ဆုံးတော့ ပြန်ရောက်လာပြီပဲ...."

အစီအရင်ကို ဖွင့်လိုက်သည်နှင့် အရိပ်တစ်ခုက လျင်မြန်စွာ ပြေးဝင်လာသည်။ သို့သော် လော့ချန်၏ရင်ခွင်ထဲမှ အမျိုးသမီးကို မြင်သောအခါ ရုတ်တရက် ခြေလှမ်းများ တန့်သွားသည်။

"ဟင်…. ချိုင်ယီလား"

ပိုင်မေလင်းက ထိတ်လန့်တကြား ရေရွတ်လိုက်ရင်း

"နင်.... နင် ဘာဖြစ်တာလဲ"

ကူချိုင်ယီက အနိုင်နိုင် ပြုံးပြလိုက်သည်။

"ဘာမှမဖြစ်ပါဘူး၊ ငါ ဒဏ်ရာနည်းနည်း ရထားတာပါ"

ပိုင်မေလင်း စကားဆက်ပြောရန် ပြင်လိုက်စဉ် လော့ချန်က ကြားဖြတ်ပြောလိုက်သည်။

"ရှောင်လင်း အခန်းရော ပြင်ဆင်ပြီးပြီလား"

"ပြီးပါပြီ၊ စီမံခန့်ခွဲရေးမှူးဆီကရတဲ့ ညွှန်ကြားချက်အတိုင်း အခန်းကို သန့်ရှင်းရေး လုပ်ထားပြီးပါပြီ"

လော့ချန် ခေါင်းညိတ်လိုက်ရင်း ကူချိုင်ယီကို ပွေ့ချီကာ အခန်းထဲ ဝင်သွားခဲ့သည်။ သူမအား အောက်သို့ ချပေးလိုက်သောအခါ သူမ မျက်မှောင်ကြုတ်သွားသည်။

"နာနေရင် အော်လိုက်၊ ဘာမှမဖြစ်ဘူး"

သူ စိုးရိမ်ပူပန်စွာ ဆိုလိုက်သည်။

ကူချိုင်ယီ ချက်ချင်းပင် ကုတင်ပေါ် လဲလျောင်းလိုက်သည်။

လော့ချန် သက်ပြင်းချလိုက်ရင်း ရင်ထဲသို့ လေးလံမှုအချို့ ဝင်ရောက်လာခဲ့သည်။ သမားတော်စွန်း၏ ဆုံးဖြတ်ချက်မှာ မှန်ကန်သည်။ ကူချိုင်ယီ၏ ခန္ဓာကိုယ်ထဲသို့ ပြင်ပ ချီစွမ်းအင်များ ဝင်ရောက်ခြင်းမှာ သူမအတွက် အန္တရာယ် ရှိသည်။ ဒန်ရှားတောင်တွင်မူ မင်လုံယွီ၏ ပညာက အကာအကွယ်ပေးထားသဖြင့် နာကျင်မှုမှာ သိသာထင်ရှားလှသည် မဟုတ်ပေ။ သို့သော် ထျန်းလန်တောင်တွင်မူ ချီစွမ်းအင်များက အလွန်ထူပြောလှသဖြင့် သူမ၏ ဒဏ်ရာကို ပိုမိုဆိုးရွားစေနိုင်သည်။ သို့သော် အရာအားလုံးကို ထာဝရ ပိတ်ဆို့ထား၍ မရနိုင်ပေ။ ထိုသို့ ပိတ်ဆို့ထားခြင်းက အခြေအနေကို ပိုမိုဆိုးဝါးသွားစေရန် အချိန်ဆွဲထားရုံမျှသာ ဖြစ်လိမ့်မည်။

လော့ချန် ကုသခြင်းမှော်အတတ်ကို အသုံးပြု၍ သူမ၏ သွေးကြောများကို သေချာစွာ ကုသပေးခဲ့သည်။

သူမ အိပ်ပျော်သွားမှသာ သူ အခန်းအပြင် ထွက်လာခဲ့သည်။

အပြင်တွင် အသင့်စောင့်နေသော ပိုင်မေလင်းကို ကြည့်ရင်း သူ မေးလိုက်သည်။

“ပြောဗျာ.... ဘာပြောချင်တာလဲ၊ ဟွေ့နန်နဲ့ တစ်နှစ်လောက် အတူတူ နေပြီးတာတောင် အခုထိ တခြားတစ်ယောက်နဲ့ နေရတာကို အသားမကျသေးဘူးလား”

"မဟုတ်ပါဘူး.... သခင့်ကို အရမ်းလွမ်းနေလို့ပါ"

သူမ၏ စကားကြောင့် လော့ချန် ခပ်တိုးတိုး ရယ်မောလိုက်ရင်း သူမ၏ ဆံနွယ်များကို ဖွဖွလေး ပွတ်သပ်ပေးလိုက်သည်။ သို့သော် သူ၏ လက်ချောင်းများ သူမ၏ ခေါင်းကို ထိမိသွားသည့် အခိုက်အတန့်တွင်မူ သူ အံ့အားသင့်စွာဖြင့် ရပ်တန့်သွားခဲ့ရသည်။

"ရှောင်လင်း.... မင်းရဲ့ ခန္ဓာကိုယ်က အခြေအနေ သိပ်ကောင်းမွန်နေပါလား”

သူမ တောက်ပစွာ ပြုံးလိုက်ရင်း သူ၏ လက်ထဲမှ ရုန်းထွက်ကာ ဂူဗိမာန်၏ ကျယ်ဝန်းလှသော ကျောက်သားခန်းမအတွင်း၌ လှည့်ပတ်ကခုန်လိုက်သည်။

"သခင် သတိထားမိသွားပြီပဲ…. ကျွန်မ နတ်ဘုရားတစ္ဆေလျှို့ဝှက်မှတ်တမ်းကို လေ့လာနေပြီးတော့ အဲဒါနဲ့ ကျင့်ကြံနေတာ၊ ဒီတစ်ကြိမ်မှာတော့ တကယ့်ကို တိုးတက်မှုတွေ ရရှိခဲ့တာ"

လော့ချန် မျက်မှောင်ကြုတ်လိုက်သည်နှင့် သူမ အလျင်အမြန် ရှင်းပြလာသည်။

"ကျွန်မ အဲ့ထဲက နည်းလမ်းတွေကို လိုက်နာပြီးတော့ အရင်တုန်းက စုပ်ယူခဲ့ဖူးတဲ့ ယင်ချီတွေကို အဓိကအနှစ်သာရအဖြစ် သုံးခဲ့တာ၊ ကျွန်မရဲ့ တစ္ဆေခန္ဓာကိုယ်က အခုဆိုရင် အပြည့်အဝနီးပါး ခိုင်မာသွားခဲ့ပြီ၊ နောက်ထပ် ဆယ်နှစ်လောက် အချိန်ပေးရင် ကျွန်မ ခန္ဓာကိုယ် အပြည့်အဝ ကောင်းမွန်လာပြီး တစ္ဆေစစ်သူကြီးအဆင့်ကိုတောင် တက်လှမ်းနိုင်တော့မှာ"

ရှောင်လင်းသည် သူမ၏ ကျင့်ကြံခြင်း တိုးတက်မှုများကို ပျော်ရွှင်စွာဖြင့် ကြွားဝါပြောဆိုနေခဲ့သည်။ လော့ချန် သူမကို အပြုံးဖြင့် လှမ်းခေါ်လိုက်သဖြင့် သူမ သူ့ ဘေးနားသို့ ပြန်လည်ရောက်ရှိလာခဲ့သည်။ သူသည် သူမ၏ နူးညံ့ချောမွေ့လှသော ဆံနွယ်များကို ညင်သာစွာ ပွတ်သပ်ပေးလိုက်ရင်း နွေးထွေးစွာ ဆိုလိုက်သည်။

"ရှောင်လင်းလေး ကြိုးစားခဲ့တာပဲ.... သိပ်တော်တယ်"

၎င်းမှာ ရှားရှားပါးပါး ချီးကျူးစကားတစ်ခွန်း ဖြစ်ပေသည်။ သူမသည် သူ၏ လက်ဖဝါးထဲသို့ ပါးကို အပ်လိုက်ရင်း အလွန်အမင်း ပျော်ရွှင်သွားခဲ့ရသည်။ လော့ချန်သည် သူမအပေါ် အမြဲတင်းကြပ်လွန်းလှပြီး ကျင့်ကြံခြင်းတွင် ပျင်းရိနေလျှင် အမြဲ ဆူပူတတ်သူ ဖြစ်သည်။ တစ်နှစ်ကျော်ခန့် ခွဲခွာနေခဲ့ရပြီးနောက်တွင်မှ သူမ၏ တိုးတက်မှုက သူ၏ ချီးကျူးမှုကို ရရှိခဲ့ခြင်း ဖြစ်သည်။

သူမအား အကြိမ်အနည်းငယ်မျှ ထပ်မံချီးကျူးပြီးနောက် လော့ချန် သမ်းဝေလိုက်ရင်း အနားယူရန် ထွက်ခွာခဲ့တော့သည်။ သူ နောက်တစ်နေ့ မနက်ခင်းအထိ အပြည့်အဝ အိပ်ပျော်သွားခဲ့သည်။

သူ နိုးထလာချိန်တွင် စိတ်ကြည်လင်လန်းဆန်းနေခဲ့သည်။

ရှေ့ခန်းအတွင်းသို့ လှမ်းဝင်လိုက်ချိန်၌ ထူထဲလှသော ဝတ်ရုံကြီးကို ခြုံထားလျက် ဘီးတပ်ကုလားထိုင်ပေါ်တွင် ထိုင်နေသော ကူချိုင်ယီကို တွေ့လိုက်ရပြီး၊ ပိုင်မေလင်းက ဝရန်တာဘက်သို့ ညင်သာစွာ တွန်းပေးနေခဲ့သည်။ သူမသည် ဆီးနှင်းများ ကျဆင်းနေသည်ကို တိတ်ဆိတ်စွာ ငေးကြည့်နေခဲ့သည်။

သူငယ်ချင်းမ နှစ်ဦးအား အနှောင့်အယှက် မပေးရန် လော့ချန် ဆုံးဖြတ်လိုက်သည်။

ပိုင်မေလင်း ပြင်ဆင်ထားခဲ့သော စားပွဲပေါ်မှ အစားအစာများကို ကြည့်ရင်း လော့ချန် ပြုံးလိုက်မိသည်။ ထို့နောက် သိုလှောင်အိတ်အတွင်းမှ ဆေးညွှန်းအချို့ကို ထုတ်ယူလိုက်သည်။ ၎င်းတို့မှာ သမားတော်စွန်းက ကူချိုင်ယီအတွက် ရေးပေးခဲ့သော ဆေးညွှန်းများ ဖြစ်ကြသည်။ ထိုဆေးစာများမှာ သွေးကြောများကို တည်ငြိမ်စေပြီး သွေးလည်ပတ်မှု ကောင်းမွန်စေရန် ဖြစ်သည်။ သို့သော် ကူချိုင်ယီ၏ အခြေအနေမှာ ပို၍ ဆိုးရွားသည်။ ပုံမှန်အတိုင်း ကုသပါက သူမ၏ နှစ်ပေါင်းများစွာ ကျင့်ကြံခဲ့သည့် စွမ်းအားများ ဆုံးရှုံးသွားနိုင်သည်။ လော့ချန် ထိုသို့ အဖြစ်မခံနိုင်ပေ။

ကူချိုင်ယီကိုယ်တိုင်က လက်ခံနိုင်လျှင်ပင် သူကမူ သူမအား ထိုသို့ မဖြစ်စေလိုပေ။ သို့သော် သူ့တွင် အဖြေတစ်ခု ရှိနေခဲ့သည်။ ၎င်းမှာ ဆေးလုံးစိမ်းချိုင့်ဝှမ်း၏ စျေးကွက်မှ သူ ဝယ်ယူခဲ့သော အသက်ကယ်ဆေးလုံးကို အသုံးပြုရန် ဖြစ်သည်။

သူ ထိုဆေးညွှန်းများကို စိုက်ကြည့်ရင်း အတွေးထဲသို့ နစ်မြုပ်သွားခဲ့ရသည်။ အသက်ကယ်ဆေးလုံးမှာ ရွှေအမြုတေ ကျင့်ကြံသူများအတွက် ရည်ရွယ်ထားသည့် တတိယအဆင့် ဆေးလုံးတစ်လုံး ဖြစ်သည်။ ၎င်းတွင် ဆေးအာနိသင်၏ သုံးဆယ်ရာခိုင်နှုန်းခန့်သာ ကျန်ရှိတော့သော်လည်း အခြေတည် ကျင့်ကြံသူတစ်ဦးအဖို့ လုံလောက်သည်။ သို့သော် ကူချိုင်ယီမှာမူ လက်ရှိတွင် ထိုအဆင့်နှင့် အလွန်အမင်း ကွာဝေးနေသေးသည်။ အကယ်၍ သူသာ သူမ၏ အသက်အန္တရာယ်ကို မထိခိုက်စေဘဲ ထိုဆေးလုံးကို အသုံးပြုလိုလျှင် သေသေချာချာ ပြင်ဆင်မှုများ ပြုလုပ်ရန် လိုအပ်လိမ့်မည်။

"အသက်ကယ်ဆေးလုံးက တတိယအဆင့် ဆေးဖြစ်လို့ တိုက်ရိုက် သောက်ရင် အန္တရာယ် ရှိတယ်…. အရင်ဆုံး ခန္ဓာကိုယ်ကို အဆင်သင့် ဖြစ်အောင် ပြင်ဆင်ပေးရမယ်"

လော့ချန် ကုသမှုအစီအစဉ်သစ်ကို ချမှတ်လိုက်သည်။ သမားတော်စွန်း၏ သွေးကြောများကို တည်ငြိမ်စေမည့် ဆေးညွှန်းမှာ ထပ်မံ၍ ထိခိုက်မှုများ မဖြစ်ပေါ်စေရန်အတွက် အကောင်းဆုံးသော အခြေခံတစ်ခု ဖြစ်ကြောင်း သူ ဝန်ခံလိုက်သည်။ ထို့အပြင် သူသည် သူမ၏ ပျက်စီးနေသော သွေးကြောများကို ပြန်လည်ပြုပြင်ပေးရန်အတွက် ထာဝရနုပျိုစိမ်းလန်းကျင့်စဉ်မှတစ်ဆင့် သန့်စင်ထားသော သစ်သားဓာတ် ချီစွမ်းအားများကို အသုံးပြုလျက် ကုသခြင်းမှော်အတတ်ကို ဆက်တိုက် အသုံးပြုရန် စီစဉ်လိုက်သည်။ ထို့အပြင် အတိတ်ကာလက သူကိုယ်တိုင် ဖော်စပ်ခဲ့ဖူးသည့် ကူချိုင်ယီ၏ အခြေအနေနှင့် ကိုက်ညီလှသော ဝိညာဉ်ဆေးရည်တစ်မျိုးကိုပါ တွဲဖက်အသုံးပြုရန် ရည်ရွယ်ထားခဲ့သည်။

သူသည် အနှစ်သာရမွေးမြူရည်၏ အဆင့်မြှင့်တင်ထားသော ဆေးနည်းကို အသုံးပြုလိုက်ပြီး တာဟဲဈေးမြို့တော် ခန်းမျိုးနွယ်စု၏ အကောင်းဆုံး အရည်အသွေးရှိလှသော ရွှေကျောက်စိမ်းဆေးရည်နှင့် သူ၏ ကိုယ်ပိုင် သစ်သားဓာတ် ချီစွမ်းအားတို့ကိုပါ ပေါင်းစပ်လိုက်သည်။ ရလဒ်အနေဖြင့် ထူးခြားလှသော ဆေးစိမ်ဝိညာဉ်ဆေးရည်တစ်မျိုးကို ရရှိခဲ့ပြီး၊ ၎င်းကို ရွှေကျောက်စိမ်းအနှစ်သာရမွေးမြူရည် ဟူ၍ အမည်ပေးလိုက်သည်။ ၎င်းမှာ မည်သည့်အရာနှင့်မျှ နှိုင်းယှဉ်၍မရနိုင်လောက်အောင် ထူးခြားလှပေသည်။

၎င်း၏ အာနိသင်မှာ အတိတ်ကာလကတည်းက ထင်ရှားခဲ့ဖူးပြီးသား ဖြစ်သည်။ အတိတ်က လော့ချန် သွေးကြောအားလုံးကို အတင်းအကျပ် ဖွင့်လှစ်ခဲ့ဖူးစဉ်က သူ့ကိုယ်သူ ပြန်လည်ပျောက်ကင်းအောင် ကုသပေးခဲ့ဖူးသည်မှာ ဤဆေးရည်ပင် ဖြစ်သည်။ ကျင့်ကြံခြင်းအခြေခံ ပိုမိုတည်ငြိမ်လှသော ကူချိုင်ယီအပေါ်တွင် အသုံးပြုမည်ဆိုလျှင် ၎င်း၏ အာနိသင်မှာ ပိုမိုကြီးမားလာလိမ့်မည် ဖြစ်သည်။

ကုသမှု အစီအစဉ်ကို အပြည့်အဝ ဆုံးဖြတ်ပြီးသွားသည့် အခါမှသာ လော့ချန် စိတ်သက်သာရာရသွားခဲ့တော့သည်။ ယခုအခါ သူ့အတွက် လိုအပ်နေသည်မှာ အချိန်သာ ဖြစ်သည်။

သူ အတွေးထဲမှ ပြန်လည်နိုးထလာချိန်တွင် အမျိုးသမီးနှစ်ဦးလုံးက တံခါးဝတွင် ရပ်နေခဲ့ကြပြီး သူ့အား တိတ်ဆိတ်စွာ စိုက်ကြည့်နေကြသည်။

ကူချိုင်ယီက နောက်ပြောင်လိုက်သည်။

"လော့ချန်.... ရှင် နောက်ဆုံးအချိန်မှ အစီအစဉ် ဆွဲနေတာလား…. ကြည့်ရတာ ကျွန်မကို ကုပေးနိုင်ဖို့အတွက် သိပ်ပြီး ယုံကြည်ချက် မရှိတဲ့ ပုံစံမျိုးပဲ"

လော့ချန် ရယ်မောလိုက်ရင်း

"မင်း ငါ့ကို အထင်သေးနေတာပဲ…. ငါ အဖြေကို ရှာတွေ့ပြီးသွားပြီ…. ဒါပေမဲ့ ငါ မနေ့ညက ပြောခဲ့သလိုမျိုးပဲ အချိန် တစ်နှစ်လောက်တော့ ပေးရလိမ့်မယ်"

ကူချိုင်ယီ ခဏတာ မှင်တက်သွားခဲ့ရသည်။

‘သူ တကယ်ပဲ နည်းလမ်းကို ရှာတွေ့သွားခဲ့တာလား....’

အချိန်အတော်ကြာ တိတ်ဆိတ်နေပြီးမှ သူမ တိုးတိုးလေး ရေရွတ်လိုက်မိသည်။

"နောက်ထပ် တစ်နှစ်လောက် ထပ်စောင့်ရတာက ဘာမှ မဟုတ်ပါဘူး"

ကျင့်ကြံသူတစ်ဦးအတွက်မူ တစ်နှစ်ဟူသော အချိန်ကာလမှာ အလွန်အမင်း တိုတောင်းလှပေသည်။

....

နှစ်ရက်အကြာတွင် လော့ထျန်းခန်းမဆောင်အတွင်း အစည်းအဝေး ကျင်းပလျက်ရှိသည်။

လော့ချန်သည် ထိပ်ဆုံးတွင် ထိုင်နေပြီး ဘေးတွင် စီမာဟွေ့နန် ထိုင်နေသည်။ အောက်တွင်မူ ဂိုဏ်း၏ အဓိက နန်းဆောင် (၉) ခုမှ နန်းဆောင်သခင်များ ရှိနေကြသည်။ ကျင့်စဉ်သင်ကြားရေးနန်းဆောင်မှ ဝမ်ယွမ်၊ သားရဲနန်းဆောင်မှ ရွှီဟွမ်ကျန်း၊ လက်နက်နန်းဆောင်မှ တွမ်ဖုန်း၊ ကုသိုလ်တော်နန်းဆောင်မှ မုရုံချင်းလျန်၊ တိုက်ခိုက်ရေးနန်းဆောင်မှ စီမာရှန့်၊ ဆေးဖော်နန်းဆောင်မှ ချွီလင်ကျွင်း၊ ဆေးဝါးနန်းဆောင်မှ ဘီယန်ကျန်း၊ စိုက်ပျိုးရေးနန်းဆောင်မှ ယွမ်တုန်းရှန်းနှင့် ရွှေနန်းဆောင်မှ ယွမ်ရှောင်ယွဲ့တို့ ဖြစ်ကြသည်။

ထိုမျှသာမက ရောင်နီနန်းဆောင် (အပြင်စည်းအဖွဲ့) သခင် ချင်လျန်ချန်းနှင့် အခြေတည် အကြီးအကဲ နှစ်ဦးဖြစ်ကြသော မင်လုံယွီ၊ လီယင်ကျန်း တို့လည်း ရှိနေခဲ့ကြသည်။ မင်လုံယွီသည် အဆင့်တက်လှမ်းပြီးကတည်းက မည်သည့်တရားဝင် ရာထူးကိုမျှ ရယူထားခြင်း မရှိသော်လည်း သူ၏ တက်တက်ကြွကြွ ကူညီပေးမှုများကြောင့် လူချစ်လူခင်များလှသည်။ အစီအရင်တစ်ခုခု လိုအပ်သည့် အခါတိုင်း နန်းဆောင်အသီးသီးသို့ တိတ်တဆိတ် သွားရောက်ကူညီပေးလေ့ရှိသည်။ လီယင်ကျန်းမှာမူ ချင်းဟွာမြစ် လီမျိုးနွယ်စု၏ မျိုးနွယ်စုခေါင်းဆောင် ဖြစ်ပြီး၊ လွန်ခဲ့သောနှစ်ကမှ အခြေတည်အဆင့်သို့ အောင်မြင်စွာ တက်လှမ်းနိုင်ခဲ့ခြင်း ဖြစ်သည်။ သူသည် နှစ်ပေါင်းများစွာအတွင်း ခက်ခဲစွာ ကျင့်ကြံခဲ့ပြီးနောက် ကိုးဆင့်ဝိညာဉ်ပြန်လည်စုစည်းခြင်းကျင့်စဉ်ကိုလည်း အပြည့်အဝ တတ်မြောက်သွားခဲ့ပြီဖြစ်သည်။ လော့ချန်နှင့် ကွယ်လွန်သူ လီကျင်ဟွမ်တို့အကြား လွန်ခဲ့သော အချိန်ကာလများစွာကတည်းက ပြုလုပ်ခဲ့ဖူးသော ကတိကဝတ်များအရ သူ အဆင့်တက်လှမ်းနိုင်ခဲ့သည့် အခိုက်အတန့်မှာပင်၊ လော့ထျန်းအဖွဲ့၏ အကြီးအကဲတစ်ဦး အဖြစ် သတ်မှတ်ပေးခဲ့သည်။ ယနေ့ သူ့အား ဖိတ်ကြားခဲ့ခြင်းမှာ ထိုအသိအမှတ်ပြုမှုကို တရားဝင် ဖြစ်စေရန် ဖြစ်သည်။ လွန်ခဲ့သော နှစ်အနည်းငယ်အတွင်း၌ သူသည် လော့ထျန်းအဖွဲ့အတွင်းသို့ အမှန်ပင် ပေါင်းစပ်ဝင်ရောက်သွားခဲ့ပြီး လူတိုင်း၏ ယုံကြည်မှုကို ရရှိခဲ့သည်။

လော့ချန် စုဝေးနေကြသော လူအုပ်ကြီးကို ငုံ့ကြည့်လိုက်ချိန်တွင် ရင်ထဲ၌ ဂုဏ်ယူစိတ်များ ပေါ်ပေါက်လာခဲ့ရသည်။ နှစ်ပေါင်းများစွာ ခက်ခဲစွာ ရုန်းကန်ခဲ့ရပြီးနောက် သူ တည်ဆောက်ခဲ့သော အဖွဲ့အစည်းမှာ ယခုအခါ ကြီးမားလှသော အဆင့်တစ်ခုသို့ ရောက်ရှိနေခဲ့ပြီ ဖြစ်သည်။ ကြီးမားလှသော နန်းဆောင် ကိုးခု၊ အခြေတည် ကျင့်ကြံသူ ရှစ်ဦးနှင့် အဖွဲ့ဝင်ပေါင်း တစ်ထောင်ကျော်ခန့် ရှိနေခဲ့ပြီ ဖြစ်သည်။ ထို့အပြင် လက်အောက်တွင် တိုးတက်နေသော စီးပွားရေးလုပ်ငန်းများလည်း ရှိနေခဲ့သည်။ ပြင်ပတွင်လည်း မိတ်ဖက်များစွာ ရှိနေခဲ့သလို၊ အားကောင်းလှသော ဂိုဏ်းကြီး နှစ်ခုဖြစ်သည့် ရေခဲခံတပ်နှင့် ဆေးလုံးစိမ်းချိုင့်ဝှမ်းတို့၏ ကျောထောက်နောက်ခံကိုပါ ရရှိထားခဲ့သည်။

လော့ထျန်းအဖွဲ့အနေဖြင့် လက်ရှိတွင် ရွှေအမြုတေကျင့်ကြံသူတစ်ဦး မရှိသေးသဖြင့် ပထမတန်းစား အဖွဲ့အစည်းတစ်ခုကို မယှဉ်နိုင်သေးသော်လည်း ဒုတိယတန်းစား အဖွဲ့အစည်းများထဲတွင်မူ ထိပ်ဆုံးအဆင့်သို့ ရောက်ရှိနေခဲ့ပြီ ဖြစ်သည်။ သူသာ အခြေတည် နှောင်းပိုင်းအဆင့် ရောက်ရှိသွားခဲ့လျှင် ထျန်းလန်နတ်ဘုရားမြို့တော်ရှိ သံဓားဂိုဏ်းနှင့် လျန်ယွန်းကုန်သွယ်ရေးမဟာမိတ်ကဲ့သို့သော နာမည်ကြီး အင်အားစုဟောင်းများကိုပင် စိန်ခေါ်နိုင်လိမ့်မည် ဖြစ်သည်။ လက်ရှိတွင်လည်း ထိုအင်အားစုဟောင်းများသည် လော့ထျန်းအဖွဲ့အား ရိုရိုသေသေ ဆက်ဆံနေကြရပြီ ဖြစ်သည်။

‘ဂိုဏ်းချုပ်မီသာ အသက်ရှိနေသေးမယ်ဆိုရင် လော့ထျန်းအဖွဲ့ ဒီလောက်အထိ ကြီးမားလာတာကို မြင်ပြီး အံ့ဩသွားမှာပဲ’

လော့ချန် ဂုဏ်ယူစွာ တွေးမိသည်။

အစည်းအဝေးတွင် နန်းဆောင်သခင်များက လုပ်ငန်းခွင် အခြေအနေကို အစီရင်ခံကြသည်။ လော့ထျန်းအဖွဲ့အား နန်းဆောင် ကိုးခုအဖြစ် ခွဲခြားထားသော်လည်း တစ်ခုချင်းစီတွင် ကွဲပြားလှသော တာဝန်ဝတ္တရားများ ရှိကြသည်။ အများစုမှာ အတွင်းပိုင်း တိုးတက်မှုများကိုသာ အဓိကထားကြပြီး တိုက်ခိုက်ရေးနန်းဆောင်၊ ရွှေနန်းဆောင်နှင့် ရောင်နီနန်းဆောင်တို့ကမူ ပြင်ပကိစ္စရပ်များကို စီမံခန့်ခွဲကြသည်။ ထို့ကြောင့် အစီရင်ခံစာ တင်ပြမှုများကို အတွင်းပိုင်းကိစ္စရပ်များမှတစ်ဆင့် ပြင်ပကိစ္စရပ်များဆီသို့ အစဉ်လိုက် တင်ပြစေခဲ့သည်။

သားရဲနန်းဆောင်မှ ဝိညာဉ်သားရဲများကို ယဉ်ပါးအောင် ပြုလုပ်ခြင်းနှင့် မွေးမြူခြင်းတို့အကြောင်း၊ ၎င်းတို့၏ အစာရေစာ ထောက်ပံ့မှုများကို ထိန်းသိမ်းရန်အတွက် လုပ်ဆောင်ထားသော နည်းလမ်းများအကြောင်း တင်ပြခဲ့သည်။

လက်နက်နန်းဆောင်ကမူ မိမိတို့ ထုတ်လုပ်နိုင်သော မှော်ရတနာများ၏ အဆင့်အတန်းများအကြောင်း၊ နှစ်စဉ် ထုတ်လုပ်မှုနှုန်းနှင့် လက်ရှိ အရောင်းအဝယ် အခြေအနေများကို ဆက်လက် တင်ပြခဲ့သည်။

ဆေးဖော်နန်းဆောင်အလှည့်သို့ ရောက်ရှိလာချိန်တွင် ချွီလင်ကျွင်း ရှေ့သို့ တက်လှမ်းလာခဲ့သည်။ သူ၏ အစီရင်ခံစာက စိတ်လှုပ်ရှားစရာကောင်းလှသည်။ လွန်ခဲ့သော တစ်နှစ်တာအတွင်း လော့ထျန်းအဖွဲ့သည် ကျောက်စိမ်းအမြုတေဆေးလုံးများ ဖော်စပ်ရန် လော့ချန်အပေါ်တွင်သာ မှီခိုမနေတော့ဘဲ ဆက်လက်လည်ပတ်နိုင်ခဲ့သည်။ ထိုအချိန်ကာလကို ဆေးဖော်ဆရာ ခြောက်ဦး ဖြစ်ကြသော ချွီလင်ကျွင်း၊ မီလီ၊ မာရှို့ဖူ၊ ချိုးရင်း နှင့် ပျက်စီးသွားခဲ့ရသော တန်ယွမ်ဂိုဏ်းမှ အသစ်ဝင်ရောက်လာခဲ့ကြသည့် ချီရိနှင့် ရွှီကျဲတို့၏ တည်ငြိမ်လှသော တိုးတက်မှုများဖြင့် ထိန်းသိမ်းထားနိုင်ခဲ့ခြင်း ဖြစ်ကာ၊ အားလုံးက အရေအတွက်နှင့် အရည်အသွေး ပြည့်ဝနေစေရန်အတွက် အတူတူ ကြိုးစားခဲ့ကြသည်။ ထောင်ရိရှန်း၏ စာတွေ့ပိုင်း သင်ကြားပေးခဲ့မှုများကြောင့် အခက်ခဲဆုံး ဖြစ်လှသော ပထမအဆင့် ဆေးလုံးများကိုပင် တည်ငြိမ်စွာဖြင့် အရေအတွက် အမြောက်အမြား ထုတ်လုပ်နိုင်ခဲ့ကြသည်။

ပို၍ကောင်းသည်မှာ လော့ထျန်းအဖွဲ့အစည်းသည် ဆက်လက်လည်ပတ်ရန် ဆေးလုံးများအပေါ်၌သာ လုံးဝ မှီခိုမနေတော့ခြင်း ဖြစ်သည်။ ယွမ်တုန်းရှန်း၏ စိုက်ပျိုးရေးနန်းဆောင်သည် ဒန်ရှားတောင်ထိပ်ပေါ်ရှိ ဝိညာဉ်လယ်ကွင်းများစွာမှ တန်ဖိုးများ စတင်ထုတ်ယူနိုင်ခဲ့ပြီ ဖြစ်သည်။

ဆေးဝါးနန်းဆောင်သည်လည်း ချင်းဟွာမြစ် လီမျိုးနွယ်စုနှင့် အပြည့်အဝ ပူးပေါင်းဆောင်ရွက်ခဲ့ပြီး သူတို့၏ လမ်းကြောင်းများမှတစ်ဆင့် ထျန်းလန်နတ်ဘုရားမြို့တော်၏ ဆေးဝါးစျေးကွက်အတွင်းသို့ တဖြည်းဖြည်းနှင့် ခြေကုပ်ယူနိုင်ခဲ့ပြီ ဖြစ်သည်။

တစ်ဦးပြီးတစ်ဦး မိမိတို့၏ နန်းဆောင်ဆိုင်ရာ အစီရင်ခံစာများကို အသီးသီး နိဂုံးချုပ်ခဲ့ကြသည်။ နောက်ဆုံးတွင် ရွှေနန်းဆောင်၏ အလှည့်သို့ ရောက်ရှိလာခဲ့တော့သည်။

လူတိုင်း၏ အကြည့်များမှာ ထိုနေရာတွင် တိတ်ဆိတ်စွာ ရပ်နေခဲ့ပြီး ကျင့်ကြံခြင်းအဆင့်မှာ ချီသန့်စင်အဆင့် (၈) တွင်သာ ရှိနေသေးသည့် အမျိုးသမီးလေးတစ်ဦးပေါ်သို့ ကျရောက်သွားခဲ့တော့သည်။

သူမမှာ ယွမ်ရှောင်ယွဲ့ ဖြစ်သည်။ အတိတ်ကာလက တာဟဲဈေးမြို့တော်တွင် လော့ချန်၏ စီးပွားဖက် ဖြစ်ခဲ့သော မိန်းမငယ်လေးမှာ ယခုအခါ ဆယ်စုနှစ်နှစ်ခုနီးပါးခန့် ကြိုးစားအားထုတ်ခဲ့ပြီးနောက် တည်ငြိမ်ရင့်ကျက်သော အမျိုးသမီးလေး အဖြစ် ရှိနေခဲ့ပြီ ဖြစ်သည်။ သူမသည် ဤနှစ်များတစ်လျှောက် ကူချိုင်ယီထံမှ ပညာရပ်များ အနီးကပ် သင်ယူထားသူ ဖြစ်သည်။

အမှန်စင််စစ် ရွှေနန်းဆောင်၏ နန်းဆောင်သခင်မှာ ကူချိုင်ယီ ဖြစ်သော်လည်း သူမ အခြေတည်အဆင့်တက်လှမ်းရန် စတင်ပြင်ဆင်ကတည်းက တာဝန်ဝတ္တရားများကို ယွမ်ရှောင်ယွဲ့ထံသို့ ယာယီ လွှဲပြောင်းပေးခဲ့သည်။ သူမ ကျရှုံးသွားခဲ့ပြီးနောက်တွင်လည်း ရွှေနန်းဆောင်အနေဖြင့် ခေါင်းဆောင်မရှိဘဲ မနေနိုင်သဖြင့် စီမာဟွေ့နန်မှ ယွမ်ရှောင်ယွဲ့အား ဒုတိယနန်းဆောင်သခင်အဖြစ် ရာထူးတိုးမြှင့်ပေးခဲ့သည်။ လွန်ခဲ့သော တစ်နှစ်တာအတွင်း၌ သူမသည် ရွှေနန်းဆောင်၏ ကိစ္စရပ်များအားလုံးကို စီမံခန့်ခွဲနေခဲ့ရသည်။

ယခု လော့ထျန်းအဖွဲ့၏ ထိပ်သီးခေါင်းဆောင်များနှင့် မျက်နှာချင်းဆိုင်လိုက်ရချိန်တွင် ထိုအခိုက်အတန့်၏ လေးလံမှုက သူမအပေါ်သို့ ပြင်းထန်စွာ ကျရောက်လာတော့သည်။ ခန်းမအတွင်းရှိ အခြားသူများအားလုံးမှာ အခြေတည် ကျင့်ကြံသူများ ဖြစ်ကြသလို အချို့မှာလည်း ဆယ်စုနှစ်များစွာ အတွေ့အကြုံရှိလှသော ကျင့်ကြံသူများ ဖြစ်ကြသည်။ ထိုသူတို့နှင့်ယှဉ်လျှင် သူမ၏ ကျင့်ကြံခြင်းမှာ အလွန် နိမ့်ကျလွန်းနေသေးသကဲ့သို့ ခံစားရပြီး ထိုအတွေးက သူမအား နာကျင်စေခဲ့သည်။

ချက်ချင်းပင် လော့ချန်၏ ညင်သာလှသော လှုပ်ရှားမှုတစ်ခုနှင့်အတူ နွေးထွေးလှသော ချီစွမ်းအား လှိုင်းတစ်ခုသည် သူမ၏ ခန္ဓာကိုယ်အပေါ်သို့ ဖြတ်သန်းစီးဆင်းသွားခဲ့သည်။ ပြင်းထန်လှသော ဖိအားများမှာ ရုတ်ချည်း ပျောက်ကွယ်သွားခဲ့ရပြီး သူမ၏ စိတ်မှာ တည်ငြိမ်သွားခဲ့ရတော့သည်။ သူမ လော့ချန်ကို ကျေးဇူးတင်သော မျက်လုံးများဖြင့် စိုက်ကြည့်လိုက်ပြီးမှ အတွေးများကို ပြန်လည်စုစည်းကာ ကြည်လင်ပြီး ယုံကြည်ချက်ရှိလှသော အသံဖြင့် စတင်ပြောဆိုခဲ့တော့သည်။

"ကျွန်မတို့ရဲ့ ဒန်ရှားမေနန်းဆောင်ဟာ အခုဆိုရင် ထျန်းလန်နတ်ဘုရားမြို့တော်တစ်ခုတည်းမှာတင် ကန့်သတ်မနေတော့ပါဘူး.... ကျွန်မတို့အနေနဲ့ ပိယိုတောင်ကြား၊ ထျန်းယီစျေးမြို့တော်နဲ့ လော့ရှားဈေးမြို့တော်တွေမှာလည်း ဆိုင်ခွဲတွေ ဖွင့်နိုင်ခဲ့ပါပြီ…. ရှန်ကုန်းဂိုဏ်း ပျက်စီးသွားပြီးတဲ့နောက်မှာ မြို့တော်အပြင်ဘက်မှာ တစ်ကိုယ်တော်ကျင့်ကြံသူ စျေးကွက်တစ်ခုကို ဖွင့်လှစ်ခဲ့ပါတယ်…. ကျွန်မတို့အနေနဲ့ အဲဒီမှာလည်း ဆိုင်ခန်းတစ်ခု ဖွင့်ထားပြီးထားပါပြီ…. လက်ရှိမှာ ကျွန်မတို့ရဲ့ အဓိက ရောင်းကုန်တွေကတော့ လော့ထျန်းအဖွဲ့က ထွက်ရှိတဲ့ ဆေးဝါး၊ လက်နက်၊ ဆေးမြစ်၊ သစ်သီးနဲ့ ဆန်တွေပါ…."

"ဒါ့အပြင်.... ခန်းမျိုးနွယ်စုဆီကနေ ခန္ဓာကိုယ်သန်မာစေတဲ့ ဆေးဝါးတွေကိုလည်း ပြန်ယူရောင်းချပေးနေသလို၊ အကြီးအကဲလီရဲ့ မျိုးနွယ်စုဆီကနေလည်း ဝိညာဉ်ငါးတွေနဲ့ ဆေးပင်တွေကို ယူရောင်းပေးနေပါတယ်…. ပြီးတော့ အခြေတည်အဆင့် တစ်ကိုယ်တော်ကျင့်ကြံသူ သုံးဦးဆီကနေလည်း မှော်စာရွက်တွေနဲ့ ဆေးဝါးတွေကို ယူထားပါတယ်၊ အခြေတည်အဆင့် တစ်ကိုယ်တော်ကျင့်ကြံသူ အနည်းငယ်ကတော့ ရေရှည် ပူးပေါင်းဆောင်ရွက်ဖို့အတွက် စိတ်ဝင်စားကြောင်း ထုတ်ဖော်ထားကြပြီး.... သူတို့တွေက ကျွန်မတို့ ရောင်းချနိုင်ဖို့အတွက် ကုန်ပစ္စည်းတွေကို ပုံမှန် ထောက်ပံ့ပေးနေကြပါတယ်"

"မမခန်းရှန်းချုံး ပြောတာကတော့.... ထိုက်ရှန်းစျေးမြို့တော်က ဟော်မျိုးနွယ်စု လုံးဝ ပျက်စီးသွားပြီးတဲ့နောက်မှာ စျေးကွက်ရဲ့ အစိတ်အပိုင်းအချို့က နေရာလပ်သွားခဲ့ပြီ၊ တကယ်လို့ ကျွန်မတို့အနေနဲ့ အဲဒီဘက်ကို တိုးချဲ့ချင်တယ်ဆိုရင် သူမအနေနဲ့ အစွမ်းကုန် ကူညီပေးပါမယ်တဲ့၊ ဒါပေမဲ့.... ခရီးလမ်းက အရမ်းကို ဝေးလံလှသလို၊ ကြားထဲမှာရှိတဲ့ တောက်ပစမ်းရေဈေးမြို့တော်ကလည်း အခုထိ မတည်မငြိမ် ဖြစ်နေပါသေးတယ်…. အဲဒီလိုမျိုး ဖြစ်နေရတဲ့အတွက်ကြောင့်ပဲ ကျွန်မအနေနဲ့ ဆုံးဖြတ်ရခက်နေခဲ့တာပါ…. အခု အဖွဲ့ချုပ်ခေါင်းဆောင် ပြန်ရောက်လာပြီဆိုတော့ ဒီကိစ္စနဲ့ ပတ်သက်ပြီးတော့ ကိုယ်တိုင် ဆုံးဖြတ်ပေးဖို့ ကျွန်မ တောင်းဆိုချင်ပါတယ်"

ယွမ်ရှောင်ယွဲ့က အသေးစိတ် အချက်အလက်အားလုံးကို ရှင်းလင်းစွာ တင်ပြခဲ့သည်။ သူမ စကားပြောပြီးသွားချိန်တွင် သူမ၏ အကြည့်များက လော့ချန်ထံသို့ ကျရောက်သွားခဲ့တော့သည်။ လော့ချန် ပြုံးလိုက်ရင်း ချက်ချင်း ပြန်ဖြေမည့်အစား စီမာဟွေ့နန်ဘက်သို့ လှည့်လိုက်သည်။

"ဒီကိစ္စနဲ့ ပတ်သက်ပြီးတော့.... စီမံခန့်ခွဲရေးမှူးဟွေ့နန်ရဲ့ သဘောထားက ဘယ်လိုမျိုး ရှိလဲ"

စီမာဟွေ့နန်က ကြိုတင်စဉ်းစားထားသည်အလား တည်ငြိမ်စွာ ဆိုသည်။

"တစ်ကိုယ်တော်ကျင့်ကြံသူတွေနဲ့ ပူးပေါင်းဆောင်ရွက်တဲ့ ကိစ္စနဲ့ ပတ်သက်ရင်တော့ သူတို့ရဲ့ နောက်ကြောင်းက ရှင်းနေသရွေ့ ရှောင်ယွဲ့ကိုယ်တိုင် ဆုံးဖြတ်ချက် ချနိုင်ပါတယ်၊ ဒါက ဝိညာဉ်ကျောက်တုံးတွေ ရဖို့အတွက်တင် မဟုတ်ဘဲ အခြေတည်အဆင့် တစ်ကိုယ်တော်ကျင့်ကြံသူတွေနဲ့ ဆက်ဆံရေးကောင်းကို ထိန်းသိမ်းထားနိုင်ဖို့အတွက်လည်း ဖြစ်ပါတယ်….. ကျွန်မတို့မှာ မဟာမိတ်တွေ ပိုပြီးတော့ များလာလေလေ ကျွန်မတို့ လျှောက်လှမ်းနိုင်မယ့် လမ်းကြောင်းတွေက ပိုပြီးတော့ များလာလေလေပါပဲ…. ထိုက်ရှန်းဈေးမြို့တော်မှာ ဆိုင်ခွဲတစ်ခု ဖွင့်လှစ်မယ့် ကိစ္စနဲ့ ပတ်သက်ပြီးတော့တော့ သေသေချာချာ စဉ်းစားရမယ်.... ဘာလို့လဲဆိုတော့ တောက်ပစမ်းရေဈေးမြို့တော်က ပိုင်မျိုးနွယ်စုက ကျွန်မတို့နဲ့ ရန်ငြိုးရှိတယ်.... ကောင်းလင်လွင်ပြင် တိုက်ပွဲတုန်းက သူတို့တွေက ဟော်ဟူနဲ့ ပူးပေါင်းခဲ့ကြတာ၊ သူတို့တွေ ကျွန်မတို့ကို တိုက်ရိုက် မတိုက်ခိုက်ခဲ့ကြပေမဲ့ နန်ကုန်းမျိုးနွယ်စုကိုတော့ ပိတ်ဆို့ထားခဲ့ကြသေးတယ်၊ ပြီးတော့...."

ထိုသို့ပြောဆိုရင်း သူမ တွမ်ဖုန်းဘက်သို့ လှည့်လိုက်သည်။

"နန်းဆောင်သခင်တွမ်.... ပိုင်မျိုးနွယ်စုက ရှင့်အဖေကို သတ်ခဲ့တဲ့အတွက်လည်း တာဝန်ရှိတယ် မဟုတ်လား"

စီမာဟွေ့နန်၏ စကားကြောင့် တွမ်ဖုန်းက ခေါင်းညိတ်သည်။ ပိုင်မျိုးနွယ်စုမှာ သူ့ဖခင်ကို သတ်ခဲ့သူများ ဖြစ်သည်။

"ဒါဆိုရင် ပိုင်မျိုးနွယ်စုကို ဖျက်ဆီးလိုက်ဖို့ပဲ ရှိတော့တာပေါ့…. သူတို့မှာ အခြေတည်ကျင့်ကြံသူ တစ်ဦးပဲ ရှိတာလေ"

စီမာဟွေ့နန် ထိုသို့ ပြောလိုက်သောအခါ အားလုံးမှာ အံ့ဩသွားကြသည်။ စီမာဟွေ့နန်၏ သဘောထားမှာ ပိုမို ပြတ်သားလာခဲ့ပြီ ဖြစ်သည်။ မကြာသေးမီ နှစ်အနည်းငယ်အတွင်း၌ ပိုမိုတင်းကြပ်လာခဲ့ရုံသာမက ပိုမိုရက်စက်လာခဲ့ကြောင်း ထင်ရှားလှပေသည်။

"အသေးစိတ် အစီအစဉ်ကို နောက်မှ သေချာ ဆွေးနွေးကြတာပေါ့…. ဒါပေမဲ့ တစ်နှစ် ဒါမှမဟုတ် အလွန်ဆုံး သုံးနှစ်အတွင်းမှာ ထိုက်ရှန်းဈေးမြို့တော်ကို လမ်းကြောင်း ပွင့်အောင် လုပ်ရမယ်…. အဲ့ဒါက အကျိုးအမြတ်တစ်ခုတည်းအတွက် တင်မဟုတ်ဘူး…. အဲ့နေရာက ဝမ်တောင်တန်းကြီးနဲ့ နီးတော့ မိစ္ဆာသားရဲတွေ၊ ဆေးဖက်ဝင်အပင်တွေနဲ့ အဖိုးတန် သတ္တုရိုင်းတွေ၊ အဖိုးတန်တဲ့ အရင်းအမြစ်တွေကို ရရှိနိုင်ဖို့လွယ်တယ်"

လော့ချန် အတည်ပြုလိုက်သည်။ သူသည် စီမာဟွေ့နန်၏ စီမံခန့်ခွဲမှု စွမ်းရည်ကို အလွန် ကျေနပ်မိသည်။ သူမသည် အသေးစိတ် အချက်အလက်များမှအစ ကြီးမားသော မဟာဗျူဟာများအထိ အရာရာကို ကောင်းမွန်စွာ တွက်ချက်ထားသည်။ ဤမျှလောက်အထိ စနစ်တကျရှိပြီး တည်ငြိမ်နိုင်ရန်ဆိုသည်မှာ တစ်ရက်နှစ်ရက်အတွင်း ရရှိလာနိုင်သော အရာမျိုး မဟုတ်ပေ။

အစည်းအဝေးတစ်ခုလုံးကို နားထောင်ပြီးနောက်တွင် လော့ချန် ရင်ထဲ၌ သက်ပြင်းမချဘဲ မနေနိုင်ခဲ့ပေ။

‘ငါ တကယ့်ကို အဖိုးတန် ရတနာတစ်ခု ရှာတွေ့ခဲ့တာပဲ....’

သူသည် အတိတ်ကာလက လော့ထျန်းအဖွဲ့အား စီမံခန့်ခွဲရန်အတွက် အသင့်တော်ဆုံးလူမှာ မီကျွင်းဖျင် ဖြစ်လိမ့်မည်ဟု ထင်မှတ်ခဲ့ဖူးသော်လည်း စီမာဟွေ့နန်နှင့် ယှဉ်လိုက်လျှင်မူ သူမမှာ ဘာမှမဟုတ်တော့သကဲ့သို့ ဖြစ်သွားခဲ့ရသည်။ အကယ်၍ ဤကိစ္စရပ်များအားလုံးကို မိမိကိုယ်တိုင် စီမံခန့်ခွဲနေရမည်ဆိုပါက သူ၏ ဆံပင်များမှာ စိုးရိမ်ပူပန်မှုများကြောင့် ဖြူသွားခဲ့ရလောက်ပြီ ဖြစ်သည်။ ကျင့်ကြံခြင်းနှင့် ပတ်သက်၍ဆိုလျှင်မူ သူ လုံးဝကို မေ့ထားလိုက်ရလောက်ပြီ ဖြစ်သည်။ စီမာဟွေ့နန်၏ ကူညီပေးမှုများကြောင့်သာလျှင် သူ ကျင့်ကြံခြင်းအပေါ်၌သာ အပြည့်အဝ အာရုံစိုက်ထားနိုင်ခဲ့ခြင်း ဖြစ်ပြီး၊ ဆေးလုံးစိမ်းချိုင့်ဝှမ်း ဂိုဏ်းမျိုးဆက်ပြိုင်ပွဲ ကဲ့သို့သော အရာများတွင်လည်း မည်သည့်စိုးရိမ်ပူပန်မှုမျှမရှိဘဲ ပါဝင်နိုင်ခဲ့ခြင်း ဖြစ်သည်။

နောက်ဆုံးတွင် စီမာဟွေ့နန် လော့ချန်ဘက်သို့ လှည့်ကြည့်လိုက်ရင်း

"အဖွဲ့ချုပ်ခေါင်းဆောင်.... အဖွဲ့ချုပ်ခေါင်းဆောင်ရဲ့ သဘောထားက ဘယ်လိုမျိုး ရှိလဲ"

လော့ချန် လက်ခုပ်တီးလိုက်မိရင်း ချီးကျူးစကား ဆိုလိုက်သည်။

"မင်းက စီမံခန့်ခွဲရေးမှုးလေ၊ ဒီဆုံးဖြတ်ချက်တွေကို ကိုယ်တိုင် ချပိုင်ခွင့် ရှိပါတယ်၊ အရာအားလုံး လမ်းကြောင်းမှန်ပေါ်ရှိနေတာပဲ၊ ငါ့မှာ ဘာကန့်ကွက်စရာမှ မရှိပါဘူး"

သူမ ခေါင်းညိတ်ပြလိုက်ရင်း တပည့်ဖြစ်သူ ယောင်မင်ယွဲ့အား အစည်းအဝေးမှတ်တမ်းအားလုံးကို သေသေချာချာ ရေးမှတ်ထားရန် ညွှန်ကြားလိုက်သည်။

အစည်းအဝေး ပြီးဆုံးသွားသည့် အခါတွင်မူ ထိပ်သီးအဖွဲ့ဝင်များသည် တစ်ဦးပြီးတစ်ဦး ထွက်ခွာသွားခဲ့ကြတော့သည်။ ယောင်မင်ယွဲ့သည်လည်း သူမ၏ ဆရာဖြစ်သူ လက်ဟန်ပြလိုက်သည်နှင့် ခန်းမအတွင်းမှ ထွက်ခွာသွားခဲ့သည်။

အစည်းအဝေးခန်းထဲတွင် လော့ချန်နှင့် စီမာဟွေ့နန်တို့သာ ကျန်ခဲ့သည်။ စီမာဟွေ့နန်က လော့ချန်ဘေးတွင် လာထိုင်ပြီး အိတ်တစ်လုံးကို ပေးလိုက်သည်။

"နှစ်နှစ်တာအတွက် အကျိုးအမြတ်တွေပါ"

လော့ချန်သည် သူမ၏ ခါးကို ဖက်လိုက်ပြီး ဝိညာဉ်ကျောက်တုံးများ ပြည့်နေသည့် အိတ်ကို လက်ခံလိုက်သည်။ အာဏာ၊ အလှတရားနှင့် စည်းစိမ်ဥစ္စာတို့ကို ပိုင်ဆိုင်ထားရသည့်အတွက် သူ အကျေနပ်ကြီး ကျေနပ်နေတော့သည်။