အခန်း (၈၀၁-၈၀၂)

အပိုင်း (၈၀၁)

“အရှင်... အရှင် ဘယ်လို တွေးနေလဲ ဆိုတာ ကျုပ် သိပါတယ်။ အရှင် ကိုယ်တိုင် သွားပြီး ဆွေးနွေးချင်နေတာ မလား။”

ကျီးကျန်းက ပြောသည်။ “ဒါပေမဲ့ ဒါက လုံးဝ မဖြစ်နိုင်ပါဘူး။ အရှင်က တစ်နိုင်ငံလုံးရဲ့ အရှင်သခင် ဖြစ်ပြီး အင်ပါယာရဲ့ ကံကြမ္မာနဲ့ သက်ဆိုင်နေပါတယ်။ အင်ပါယာအတွက် အရှင် တာဝန်ယူရပါမယ်။ လွယ်လွယ်နဲ့ သွားပြီး စွန့်စားလို့ မရပါဘူး။ ပြီးတော့... အခု အရှင်က အရင်ကနဲ့ မတူတော့ဘူး။ အရင်က အရှင်က တာ့ကျိုး အင်ပါယာမှာ သူလျှို တစ်ယောက်ပဲ ဖြစ်ခဲ့ပေမယ့် အခုတော့ အရှင်က တစ်နိုင်ငံလုံးရဲ့ အရှင်သခင် ဖြစ်နေပါပြီ။”

ကျီးကျန်း၏ စကားသည် အလွန် ရှင်းလင်းလှသည်။ တစ်နိုင်ငံလုံး၏ အရှင်သခင်သည် စိတ်လိုက်မာန်ပါ မလုပ်နိုင်သလို သွားရောက် စွန့်စား၍လည်း မရပေ။

“ပထမဆုံး အနေနဲ့ အခု ရထားတာက ပထမဆုံး အစီရင်ခံစာ သက်သက်ပဲ ရှိပါသေးတယ်။ အခြေအနေ အများအပြားက မရှင်းလင်းသေးပါဘူး။ ကျင်းကျုံးယွဲ့ ဦးဆောင်တဲ့ လျှို့ဝှက်ဆန်းကြယ်တဲ့ သိုင်းသမား စစ်တပ်က ဘယ်လို ရပ်တည်ချက် ရှိလဲ ဆိုတာ၊ ကျုပ်တို့နဲ့ တကယ်ပဲ လုံးဝ ရန်သူ ဖြစ်သွားပြီလား ဆိုတာ ကျုပ်တို့ မဆုံးဖြတ်နိုင်သေးပါဘူး။”

ကျီးကျန်းက ပြောလိုက်သည်။ “ကျုပ်တို့ သတင်းအချက်အလက်တွေ ပိုလိုပါသေးတယ်။ ပြီးတော့ အရေးကြီးတဲ့ အရာရှိ တစ်ယောက်ကို စေလွှတ်ပြီး ဆွေးနွေးမှုတွေ ပြုလုပ်ကာ သူတို့ တကယ်တမ်း ဘာလုပ်ချင်နေလဲ ဆိုတာကို စုံစမ်းရပါမယ်။”

ထို့နောက် ဒုတိယ အစီရင်ခံစာ၊ တတိယ အစီရင်ခံစာများ အဆက်မပြတ် ရောက်ရှိလာ၏။

ပထမဦးစွာ ကျီးယန် သည် တကယ်ပဲ စစ်ရှုံးသွားခဲ့ပြီး အင်ပါယာ၏ အထူးချွန်ဆုံး စစ်သည် နှစ်သောင်းစလုံး ရှုံးနိမ့်သွားခဲ့ကာ ယခုအခါ သတင်းအစအန ပျောက်ဆုံးနေပြီး အသက်ရှင်သလား၊ သေဆုံးသွားသလား မသိရပေ။

ဒုတိယ အနေဖြင့် ကျင်းကျုံးယွဲ့ ဦးဆောင်သော လျှို့ဝှက်ဆန်းကြယ်သည့် သိုင်းသမား စစ်တပ်သည်လည်း အလွန် ဝေးကွာသော နေရာမှ လာရောက်ခဲ့ခြင်း ဖြစ်ပြီး အရင်က အင်ပါယာ၏ တတိယ ကိုလိုနီ နယ်မြေတွင် ရှိမနေခဲ့ချေ။

ထို့ကြောင့် ကျင်းကျုံးယွဲ့သည် ဤတစ်ကြိမ်တွင် လျှို့ဝှက်ဆန်းကြယ်သော စစ်တပ်ကို ဦးဆောင်ကာ အင်ပါယာ၏ ကိုလိုနီ နယ်မြေကို တမင်တကာ ဝင်ရောက် တိုက်ခိုက်ခြင်း ဖြစ်သည်။

ယခုအခါ တတိယ ကိုလိုနီ နယ်မြေ တစ်ခုလုံး ကျဆုံးသွားခဲ့ပြီ ဖြစ်သည်။ သို့မဟုတ် တာ့ယန် အင်ပါယာသစ်သည် တတိယ ကိုလိုနီ နယ်မြေ၏ အုပ်ချုပ်ခွင့်ကို ဆုံးရှုံးသွားပြီဟု ပြော၍ ရနိုင်၏။

ဤသည်မှာ စတုရန်း ကီလိုမီတာ ငါးသန်းတိတိ ကျယ်ဝန်းသော ကိုလိုနီ နယ်မြေကြီး ဖြစ်ပြီး သတ္တုတွင်း အများအပြား ရှိကာ ရော်ဘာ တောအုပ်များလည်း ရှိသည်။

ယခင်က တာ့ယန် အင်ပါယာသစ်သည် ရော်ဘာကို သိပ်မလိုအပ်ခဲ့သော်လည်း ယခုအခါတွင်မူ မတူညီတော့ပေ။ ရူပဗေဒ တော်လှန်ရေးသစ် အောက်တွင် စက်မှုလုပ်ငန်း အများအပြား၌ ရော်ဘာကို လိုအပ်နေပြီ ဖြစ်၏။

အင်ပါယာ၏ ရူပဗေဒ ပညာရှင်များသည် ရေနံကတ္တရာကို အသုံးပြု၍ ပလတ်စတစ်များ ဖန်တီးနိုင်နေပြီ ဖြစ်သော်လည်း ဓာတ်ခွဲခန်း အတွင်း၌သာ ရှိနေသေးသည်။

လက်ရှိအချိန်တွင် သဘာဝ အမျှင်များကို နိုက်ထရိတ် ဓာတ်ပြုစေကာ ပလတ်စတစ် ပုံသွင်းဆေးများကို အသုံးပြု၍ ရှေးဦး ပလတ်စတစ်များကိုသာ ဖန်တီးနိုင်သေး၏။

ထို့အပြင် တတိယ ကိုလိုနီ နယ်မြေတွင် ရွှေ၊ ငွေ၊ အလူမီနီယမ် စသည့် အခြား သတ္တုတွင်း အများအပြားလည်း ရှိသေးသည်။

ထို့ကြောင့် ကိုလိုနီ နယ်မြေကြီး သုံးခုတွင် တတိယ ကိုလိုနီ နယ်မြေကို နောက်ဆုံးမှ ရှာဖွေတွေ့ရှိခဲ့ခြင်း ဖြစ်ပြီး အင်ပါယာက ၎င်းကို သိမ်းပိုက်ထားသည်မှာ နှစ် နှစ်ဆယ်ပင် မပြည့်သေးသော်လည်း ၎င်းသည် အင်ပါယာ၏ အကျိုးစီးပွားအတွက် အရေးအကြီးဆုံး ဖြစ်၏။

တတိယ ကိုလိုနီ နယ်မြေကို အင်ပါယာ၏ တရားဝင် အခေါ်အဝေါ်တွင် ဟုန်ရီပြည်နယ် ဟုခေါ်ဆိုသည်။ အဘယ်ကြောင့်ဆိုသော် ထိုနေရာမှ တိုင်းရင်းသားများသည် အသားညိုသူများ ဖြစ်သော်လည်း အနီရောင် ဘက်သို့ တိမ်းညွတ်နေသောကြောင့် ဖြစ်သည်။

၎င်းသည် တာ့ယန် အင်ပါယာသစ်နှင့် မိုင်ပေါင်း တစ်သောင်း သုံးထောင်ခန့် ကွာဝေးပြီး အလွန် ဝေးကွာသော အကွာအဝေး ဖြစ်နေပြီ ဖြစ်ကာ တာ့ယန် အင်ပါယာသစ်၏ အနောက်တောင်ဘက်၊ အပူပိုင်း ဒေသတွင် တည်ရှိ၏။

ရေလမ်းမှ သွားမည်ဆိုပါက တာ့ယန် အင်ပါယာသစ်၏ စစ်သင်္ဘောများသည် အလွန် အဆင့်မြင့်သောကြောင့် လဝက်ခန့်အတွင်း ရောက်ရှိနိုင်သည်။

အကယ်၍ လေသင်္ဘောကို အသုံးပြုမည် ဆိုပါက အချိန် ပိုမို တိုတောင်းမည် ဖြစ်သော်လည်း အင်ပါယာ၏ လေသင်္ဘောများသည် ဤမျှ ဝေးကွာသော ခရီးစဉ်ကို တစ်ခါမှ စမ်းသပ် ပျံသန်းဖူးခြင်း မရှိသေးပေ။

ထို့နောက် တာ့ယန် အင်ပါယာသစ်သည် နိုင်ငံခြားရေး ဝန်ကြီးဌာနမှ အရာရှိ တစ်ဦးကို ချက်ချင်း စေလွှတ်ကာ စစ်သင်္ဘောစီး၍ တတိယ ကိုလိုနီ နယ်မြေ ဟုန်ရီပြည်နယ်သို့ သွားရောက်စေခဲ့သည်။

ဆွေးနွေးမှုများ ပြုလုပ်ရန် မသွားမီ အင်ပါယာ ဝန်ကြီးအဖွဲ့နှင့် စစ်တပ် ဦးစီးဌာနတို့သည် ယွင်ကျုံးဟဲ့၏ ကိုယ်တိုင်ရေးစာ တစ်စောင်ကို ပေးပို့သင့်၊ မသင့် ဆွေးနွေးခဲ့ကြ၏။

မည်သို့ပင်ဖြစ်စေ ကျင်းကျုံးယွဲ့သည် ယွင်ကျုံးဟဲ့၏ ဇနီး ဖြစ်ခဲ့ပြီး ကလေး နှစ်ယောက်ကိုလည်း မွေးဖွားပေးခဲ့သည်။

သို့ပေမည့် အကြိမ်ကြိမ် ဆွေးနွေးပြီးနောက် ယွင်ကျုံးဟဲ့၏ ကိုယ်တိုင်ရေးစာကို အရင် မပို့ဘဲ အင်ပါယာ ဝန်ကြီးအဖွဲ့၏ နာမည်ဖြင့် တစ်ဖက်လူနှင့် သွားရောက် တွေ့ဆုံကာ သူတို့၏ သဘောထားကို စမ်းသပ်ကြည့်ရန် ဆုံးဖြတ်လိုက်ကြ၏။

နောက်ထပ် အချက်တစ်ခုမှာ တတိယ ကိုလိုနီ နယ်မြေကို ဝင်ရောက် တိုက်ခိုက်ခဲ့သော လျှို့ဝှက်ဆန်းကြယ်သည့် စစ်တပ်၏ ခေါင်းဆောင်မှာ ကျင်းကျုံးယွဲ့ ဟုတ်၊ မဟုတ်ကို ယခုအချိန်တွင် သေချာ မဆုံးဖြတ်နိုင်သေးသောကြောင့် ဖြစ်သည်။

ဤတစ်ကြိမ်တွင် အင်ပါယာ၏ အဆင့်မြင့် လေသင်္ဘော တစ်စင်းသည် ဤစစ်သင်္ဘောနှင့်အတူ လိုက်ပါသွားမည်ဖြစ်ပြီး လေကြောင်း အသာစီး ရယူထားရန် ဖြစ်၏။

နောက်ဆက်တွဲ အနေဖြင့် နိုင်ငံခြားရေး ဝန်ကြီးဌာနမှ သတင်းအချက်အလက်များကို တိတ်ဆိတ်စွာ စောင့်ဆိုင်းနေရုံသာ ရှိတော့သည်။

နှစ်ဆယ့်သုံးရက် အကြာတွင်…

သတင်းများ ထပ်မံ ရောက်ရှိလာပြန်ပြီး သတင်းဆိုးများပင် ဖြစ်၏။

အင်ပါယာ နိုင်ငံခြားရေး ဝန်ကြီးဌာနမှ စေလွှတ်လိုက်သော သင်္ဘောတစ်စင်းလုံးရှိ လူများ အားလုံးကို လျှို့ဝှက်ဆန်းကြယ်သော သိုင်းသမား စစ်တပ်က ဖမ်းဆီးသွားပြီး စစ်သင်္ဘောကိုလည်း လုယူသွားခဲ့သည်။

ထိုဖြစ်စဉ်အတွင်း ပဋိပက္ခများ ဖြစ်ပွားခဲ့ပြီး အသေအပျောက်များပင် ရှိခဲ့သည်။ ဤလျှို့ဝှက်ဆန်းကြယ်သော သိုင်းသမား စစ်တပ်သည် အင်ပါယာအပေါ် ပြင်းထန်သော ရန်လိုမှုကို ပြသခဲ့ပြီး ဆွေးနွေးလိုသည့် ဆန္ဒ အနည်းငယ်မှ မရှိခဲ့ပေ။

သင်္ဘောတစ်စင်းလုံးရှိ လူများအားလုံး အဖမ်းခံလိုက်ရသောကြောင့် ထွက်ပြေးလွတ်မြောက်လာပြီး သတင်းပို့သူများမှာ လေသင်္ဘောပေါ်မှ လူများသာ ဖြစ်သည်။

“အရှင်... ကောင်းကင်ယံကနေ ကျုပ်တို့ မြင်တွေ့ခဲ့ရတာက တတိယ ကိုလိုနီ နယ်မြေမှာ ရှိတဲ့ ကျုပ်တို့ရဲ့ အုပ်ချုပ်ရေးရုံး အားလုံး သိမ်းပိုက်ခံလိုက်ရပါပြီ။ ပြီးတော့ ဒေသခံ တိုင်းရင်းသားတွေ အားလုံးကလည်း ဒီလျှို့ဝှက်ဆန်းကြယ်တဲ့ စစ်တပ်ကို သစ္စာခံလိုက်ကြပါပြီ။”

သတင်းပို့သူက ပြောလိုက်၏။ “ဒါပေမဲ့ ကျုပ်တို့ တပ်မှူး ကျီးယန်ကို လုံးဝ မတွေ့ရသေးသလို အင်ပါယာ စစ်သည်တွေကိုလည်း မတွေ့ရပါဘူး။ သူတို့... အားလုံး ကျဆုံးသွားပြီလား ဆိုတာ မသိရပါဘူး။”

ဤစကား ထွက်ပေါ်လာချိန်မှာတော့ ယွင်ကျုံးဟဲ့၏ မျက်နှာ အနည်းငယ် တုန်ယင်သွားသည်။

‘ဒီလို ရလဒ်မျိုးတော့ လုံးဝ မဖြစ်ပါစေနဲ့။ အကယ်၍ ကျီးယန် လက်အောက်ခံ စစ်တပ် နှစ်သောင်းစလုံး သေဆုံးသွားပြီ ဆိုရင် ပြန်လည် ကုစားဖို့ အရမ်း ခက်ခဲသွားပြီး နှစ်ဖက်စလုံး လုံးဝ ရန်သူတွေ ဖြစ်သွားလိမ့်မယ်။’

“အရှင်... ဒါက တစ်ဖက်ရန်သူရဲ့ အလံပါ။” သတင်းပေးသူက ပုံတစ်ပုံကို ဆက်သလိုက်၏။

ယွင်ကျုံးဟဲ့ ယူကြည့်လိုက်ရာ အနီရောင် နောက်ခံ အလံပေါ်တွင် အနက်ရောင် နဂါး တစ်ကောင်က အစိမ်းရောင် မီးတောက်များကို မှုတ်ထုတ်နေပြီး အနားသတ်များတွင် ဓားနှစ်လက် ကြက်ခြေခတ် ပုံစံ ရေးဆွဲထားသည်ကို တွေ့လိုက်ရသည်။

“ဒါက ကျီရွှေ့အဖွဲ့အစည်း ရဲ့ သင်္ကေတလား။” ယွင်ကျုံးဟဲ့က မေးလိုက်၏။

ကျီးကျန်းက ဖြေသည်။ “အရှင်... အရင်က ကျီရွှေ့အဖွဲ့အစည်းရဲ့ သင်္ကေတက မီးတောက် တစ်ခုထဲမှာ ဓားနှစ်လက် ကြက်ခြေခတ်ထားတဲ့ ပုံစံပါ။ အခု ဒီအလံရဲ့ သင်္ကေတက ကြီးမားတဲ့ အပြောင်းအလဲတွေ ရှိသွားပေမယ့် ကျီရွှေ့အဖွဲ့အစည်းနဲ့ ပတ်သက်နေသေးတာ သေချာပါတယ်။

ဒါပေမဲ့ ဒီအလံက ကြောက်စရာကောင်းတဲ့ အသွင်အပြင်ကို ပြသနေပါတယ်။ အနက်ရောင် နဂါးက အစိမ်းရောင် မီးတောက်တွေကို မှုတ်ထုတ်နေတာက အမှောင်ထုနဲ့ အစွန်းရောက်မှုကို ခံစားရစေပြီး လျှို့ဝှက်ဆန်းကြယ်တဲ့ စွမ်းအား တစ်မျိုးကို ရှာဖွေနေတယ် ဆိုတာကို ပြသနေပါတယ်။”

ယွင်ကျုံးဟဲ့က မေးလိုက်၏။ “တစ်ဖက်ရန်သူမှာ စစ်သည် ဘယ်လောက် ရှိလဲ။ ခေါင်းဆောင်က ဘယ်သူလဲ။ ကျင်းကျုံးယွဲ့ ဆိုတာ သေချာလား။”

ထိုသတင်းပေးသူက ဖြေသည်။ “အရှင်... ကျုပ်တို့က ကောင်းကင်ယံ အမြင့်ကြီးကနေ မှန်ပြောင်းနဲ့ပဲ ကြည့်ရဲတာပါ။ တစ်ဖက်ရန်သူရဲ့ ခေါင်းဆောင်ကိုလည်း ကျုပ်တို့ မြင်ချင်ခဲ့ပေမယ့်... သူ လုံးဝ ထွက်မလာခဲ့တဲ့အတွက် ကျင်းကျုံးယွဲ့ ဟုတ်၊ မဟုတ် ဆိုတာကို မဆုံးဖြတ်နိုင်ပါဘူး။”

သို့ပေမည့် ပထမဆုံး ရောက်ရှိလာသော အစီရင်ခံစာမှာ ကျီးယန်၏ စတုရန်း တပ်တော် လက်အောက်ရှိ သတင်းပေး တစ်ဦးထံမှ ဖြစ်ပြီး သူသည် တာ့ယန် အင်ပါယာသစ်သို့ အသက်လု ထွက်ပြေးလာခဲ့ကာ ပုံတစ်ပုံကို ပေးအပ်ခဲ့သည်။ ထိုပုံကို စစ်ဆေးကြည့်ပြီးနောက် ထိုသူမှာ ကျင်းကျုံးယွဲ့ ဖြစ်ကြောင်း အတည်ပြုနိုင်ခဲ့၏။

သို့ပေမည့် ကျင်းကျုံးယွဲ့ နှင့် မင်းသမီး ဝူရွှမ်း တို့သည် အလွန် ဆင်တူကြ၏။ တာ့ယန် အင်ပါယာသစ်မှ လူများသည် ကျင်းဝူရွှမ်းကို မမြင်ဖူးကြဘဲ ကျင်းကျုံးယွဲ့ ကိုသာ မြင်ဖူးကြသည်။

ထို့ကြောင့် ဤလျှို့ဝှက်ဆန်းကြယ်သော စစ်တပ်၏ ခေါင်းဆောင်သည် ဝူရွှမ်း လား သို့မဟုတ် ကျင်းကျုံးယွဲ့ လား သေချာ မသိနိုင်ပေ။

ထိုသူမှာ ကျင်းကျုံးယွဲ့ ဖြစ်ရန် ယွင်ကျုံးဟဲ့ မျှော်လင့်နေမိသည်။ ထိုသို့ဆိုလျှင် ဤအင်အားကြီးမားသော သိုင်းသမား အင်အားစုကို စည်းရုံးနိုင်မှာဖြစ်သည်။

အဘယ်ကြောင့်ဆိုသော် တာရှန်း မိစ္ဆာနိုင်ငံကို ဆန့်ကျင်ရာတွင် ကျီရွှေ့အဖွဲ့အစည်းသည် အနည်းဆုံးတော့ တာ့ယန် အင်ပါယာသစ်နှင့် ရပ်တည်ချက် တူညီသောကြောင့် ဖြစ်၏။

သို့ပေမည့် အကယ်၍ မင်းသမီး ဝူရွှမ်းသာ ဖြစ်နေပါက တာရှန်း မိစ္ဆာနိုင်ငံ၏ အင်အားစုများသည် တာ့ယန် အင်ပါယာသစ်၏ ဩဇာခံ နယ်မြေ အတွင်းသို့ ထိုးဖောက် ဝင်ရောက်လာပြီ ဆိုသည့် အဓိပ္ပာယ်ပင် ဖြစ်ရာ ၎င်းသည် ကြီးမားသော ဘေးအန္တရာယ်ကြီး တစ်ခု လုံးဝ ဖြစ်သွားမှာဖြစ်သည်။

သတင်းပေးသူက ဆက်ပြော၏။ “ကျုပ်တို့က ကောင်းကင်ယံမှာ ဆက်ပြီး ပျံဝဲရင်း ဆက်လက် စောင့်ကြည့်ဖို့ ရည်ရွယ်ထားခဲ့တာပါ။ ဒါပေမဲ့ တစ်ဖက်ရန်သူက မီးပုံးပျံအချို့ လွှတ်တင်ပြီး ကျုပ်တို့ကို လိုက်လံ တိုက်ခိုက်ခဲ့လို့ ကျုပ်တို့ မတတ်သာဘဲ ဆုတ်ခွာခဲ့ရတာပါ။ အဲဒီလိုမှ မဟုတ်ရင် ဒီသတင်း အချက်အလက်လေးကိုတောင် ပြန်ပို့ပေးနိုင်တော့မှာ မဟုတ်ပါဘူး။”

ယွင်ကျုံးဟဲ့က ပြောလိုက်သည်။ “ခင်ဗျားတို့ လုပ်တာ မှန်ပါတယ်။”

ထို့နောက် ယွင်ကျုံးဟဲ့သည် ဝန်ကြီးအဖွဲ့၊ စစ်တပ် ဦးစီးဌာနတို့နှင့် ထပ်မံ ဆွေးနွေးတိုင်ပင်သည်။ လက်ရှိ အခြေအနေသည် အလွန် အန္တရာယ်များနေပြီ ဖြစ်၏။

ပထမဦးစွာ တစ်ဖက်ရန်သူ၏ သိုင်းပညာ အင်အားက အလွန် ကြီးမားပြီး အလွန် အစွန်းရောက်ကာ ဆွေးနွေးလိုသည့် ဆန္ဒ အနည်းငယ်မျှ မရှိဘဲ လူများကို တိုက်ရိုက် ဖမ်းဆီး သိမ်းဆည်းကာ လူသတ်သည်အထိ ရန်လိုမှု ပြင်းထန်လွန်းနေသည်။

သူတို့သည် တတိယ ကိုလိုနီ နယ်မြေကို တိုက်ရိုက် သိမ်းပိုက်လိုက်ပြီး ကျီးယန် လက်အောက်ခံ စစ်တပ်သည်လည်း အသက်ရှင်သလား၊ သေဆုံးသွားသလား မသိရပေ။

အင်ပါယာမှ စေလွှတ်လိုက်သော သံတမန် အဖွဲ့ကိုပင် တိုက်ရိုက် ဖမ်းဆီးလိုက်ပြီး စစ်သင်္ဘောကိုလည်း လုယူသွားခဲ့သည်။ ဤသဘောထားက အရမ်း ပြတ်သားလွန်းပြီး ရန်လိုမှုများပင် ပြည့်နှက်နေ၏။

ယွင်ကျုံးဟဲ့က ပြောသည်။ “အခု ဆုံးဖြတ်ချက် တစ်ခု ချဖို့ လိုအပ်တယ်။ တစ်ဖက်ရန်သူက ကျင်းကျုံးယွဲ့ လား၊ ဒါမှမဟုတ် ကျင်းဝူရွှမ်းလား။ ပြီးတော့ တစ်ဖက်ရန်သူက ကျီရွှေ့အဖွဲ့အစည်းရဲ့ သိုင်းသမား စစ်တပ် ဟုတ်သလား။ အကယ်၍ ဟုတ်တယ် ဆိုရင် သူတို့က အစွန်းရောက်နေရင်တောင်၊ အမှောင်ဘက် ရောက်သွားရင်တောင် စည်းရုံးလို့ ရနိုင်ပါသေးတယ်။ တာရှန်း မိစ္ဆာနိုင်ငံကို အတူတကွ တိုက်ခိုက်လို့ ရနိုင်ပါသေးတယ်။

အကယ်၍ တစ်ဖက်ရန်သူရဲ့ ခေါင်းဆောင်က ကျင်းဝူရွှမ်း ဖြစ်နေရင်တော့ တာရှန်း မိစ္ဆာနိုင်ငံရဲ့ အင်အားစုတွေ ကျုပ်တို့ အနားကို ရောက်လာပြီ ဆိုတာကို သက်သေပြနေတာပဲ။ ပြင်ဆင်မှုတွေ မလုပ်ရသေးပေမယ့် စစ်ပွဲက ကျုပ်တို့နဲ့ အရမ်း နီးကပ်နေပြီ။ စစ်ပွဲကြီးအတွက် ပြင်ဆင်ရတော့မယ်။”

ဟွာပီက ပြောလိုက်၏။ “ဒုတိယအချက် မဟုတ်ဖို့ မျှော်လင့်ပါတယ်။ ကျုပ်တို့က နေ့တိုင်း အင်အား ကြီးမားလာနေပေမယ့် ဒီစစ်ပွဲကြီးအတွက် ကျုပ်တို့ လုံးဝ အဆင်သင့် မဖြစ်သေးပါဘူး။ ကျုပ်တို့ရဲ့ ရေတပ်တွေ၊ ကျုပ်တို့ရဲ့ စစ်တပ်တွေက အခုမှ အဆင့်မြှင့်တင်မှု စတင်ရုံပဲ ရှိပါသေးတယ်။”

အပိုင်း (၈၀၂)

ကျီးကျန်းက ပြောလိုက်သည်။ “အရှင်... တစ်ဖက်ရန်သူရဲ့ အလံကို ကြည့်ရတာ တစ်ဖက်ရန်သူက ကျီရွှေ့အဖွဲ့အစည်း ဖြစ်နိုင်ခြေ ပိုများပါတယ်။ အကယ်၍ ကျီရွှေ့အဖွဲ့အစည်း ဖြစ်တယ်ဆိုရင် တစ်ဖက်ရန်သူရဲ့ ခေါင်းဆောင်က ကျင်းကျုံးယွဲ့ ဖြစ်နိုင်ခြေ ပိုများပါတယ်။”

ယွင်ကျုံးဟဲ့က ပြော၏။ “မလွှဲမရှောင်သာတဲ့ အခြေအနေမျိုး မရောက်မချင်း နှိမ်နင်းဖို့ စစ်တပ်ကြီး မစေလွှတ်ပါနဲ့အုံး။ ကျုပ်တို့ရဲ့ ရန်သူက အမြဲတမ်း တာရှန်း မိစ္ဆာနိုင်ငံပဲ ဖြစ်တယ်။ ကျီရွှေ့အဖွဲ့အစည်းက ကျုပ်တို့နဲ့ အရင်က သဘောထား ကွဲလွဲခဲ့ဖူးရင်တောင် အဲဒါက ပြည်တွင်းရေး ပြဿနာပဲ။ ကိုယ့်လူတွေပဲလို့ သတ်မှတ်လို့ ရနိုင်သေးတယ်။ အရင်ဆုံး ဆွေးနွေးဖို့ပဲ အဓိကထားရမယ်။”

ဟွာပီက ပြောလိုက်သည်။ “ဒါပေမဲ့ အခု တစ်ဖက်ရန်သူရဲ့ သဘောထားက အရမ်း ပြင်းထန်လွန်းနေတယ်။ လုံးဝ ဆွေးနွေးဖို့ မရည်ရွယ်ဘဲ လူတွေကို တိုက်ရိုက် ဖမ်းဆီး သိမ်းဆည်းရုံတင် မကဘူး၊ လူတောင် သတ်သေးတယ်။ ရန်လိုမှုက အရမ်း ပြင်းထန်လွန်းနေတယ်။”

ယွင်ကျုံးဟဲ့က ပြော၏။ “ကျုပ် ကိုယ်တိုင် စာတစ်စောင် ရေးမယ်။ သူမက ကျင်းကျုံးယွဲ့ ဟုတ်သည်ဖြစ်စေ၊ မဟုတ်သည်ဖြစ်စေ သူမကို ကျင်းကျုံးယွဲ့ အဖြစ်ပဲ သဘောထားမယ်။”

ထို့နောက် ယွင်ကျုံးဟဲ့က စာတစ်စောင် ရေးလိုက်သည်။ အကြောင်းအရာက အလွန် ရိုးရှင်းသည်။ “လမင်း... ကျုပ်က ယွင်ကျုံးဟဲ့ပါ။ သေနတ် မပစ်နဲ့၊ ကျုပ်တို့ ဆွေးနွေးကြရအောင်။”

နောက်တစ်နေ့တွင်…

အင်ပါယာက စစ်သင်္ဘော တစ်စင်းကို ထပ်မံ စေလွှတ်လိုက်သည်။ သံတမန် အဖွဲ့သစ်သည် ယွင်ကျုံးဟဲ့၏ လျှို့ဝှက်စာကို ယူဆောင်ကာ တတိယ ကိုလိုနီ နယ်မြေ ဟုန်ရီပြည်နယ်သို့ ထွက်ခွာသွား၏။

နောက်ဆက်တွဲ အနေဖြင့် ယွင်ကျုံးဟဲ့သည် တတိယ ကိုလိုနီ နယ်မြေဘက်မှ တုံ့ပြန်မှုကို တိတ်ဆိတ်စွာ စောင့်ဆိုင်းနေရုံသာ ရှိတော့သည်။

နောက်ထပ် နှစ်ဆယ့်သုံးရက် ကုန်လွန်သွားပြန်သည်။ သတင်း ရောက်လာ၏။ ဤတစ်ကြိမ် စေလွှတ်လိုက်သော စစ်သင်္ဘောသည် ထပ်မံ၍ သိမ်းဆည်းခံလိုက်ရပြီး သံတမန် အဖွဲ့သည်လည်း ထပ်မံ၍ အဖမ်းခံလိုက်ရသည်။ ပြန်ရောက်လာသည်မှာ လေသင်္ဘောသာ ဖြစ်၏။

လေသင်္ဘောပေါ်မှ သတင်းပေးသူသည် တစ်ဖက်ရန်သူ ခေါင်းဆောင်၏ စာတစ်စောင်ကိုလည်း ယူဆောင် လာခဲ့သည်။ “ကောင်းပြီ။ ယွင်ကျုံးဟဲ့... ရှင်ကိုယ်တိုင် လာပြီး ဆွေးနွေး။”

ယွင်ကျုံးဟဲ့သည် ဤစာကို အကြိမ်ကြိမ် အဖန်ဖန် ဖတ်ရှုနေ၏။ ‘မမှားဘူး။ ဒါက တကယ်ပဲ ကျင်းကျုံးယွဲ့ရဲ့ လက်ရေးပဲ။’

ချက်ချင်းဆိုသလို သူ သက်ပြင်းရှည်ကြီး တစ်ချက် ချလိုက်မိသည်။ ‘အနည်းဆုံးတော့ ဒါက ကျင်းကျုံးယွဲ့ အသက်ရှင်နေသေးတယ် ဆိုတာကို သက်သေပြနေတယ်။ ပြီးတော့ သူ ခေါ်လာတဲ့ ဒီလျှို့ဝှက်ဆန်းကြယ်တဲ့ သိုင်းသမား စစ်တပ်ဟာ တာရှန်း မိစ္ဆာနိုင်ငံရဲ့ စစ်တပ် မဟုတ်ဘဲ ကျီရွှေ့အဖွဲ့အစည်းရဲ့ သိုင်းသမား စစ်တပ် ဖြစ်ဖို့ များတယ်။’

သို့ပေမည့် ကျင်းကျုံးယွဲ့၏ လက်ရေးမှာလည်း ကြီးမားသော အပြောင်းအလဲများ ဖြစ်ပေါ်နေပြီး အလွန် ပြင်းထန်ကာ အလွန် ကြမ်းတမ်းနေ၏။

အရင်က ကျင်းကျုံးယွဲ့၏ လက်ရေးမှာ ဤသို့ မဟုတ်ပေ။ ထက်မြက်မှုများ ပြည့်နှက်နေသော်လည်း လွတ်လပ်ပေါ့ပါးမှုနှင့် အထီးကျန်ဆန်မှုများ ပါဝင်နေ၏။ ယခုအခါ သူမ၏ လက်ရေးများတွင် ဒေါသများ ပြည့်နှက်နေသည်။

ယွင်ကျုံးဟဲ့က မေးလိုက်၏။ “ဒီစာကို ခင်ဗျား ဘယ်လို ရလာတာလဲ။”

သတင်းပေးသူက ဖြေသည်။ “လူတစ်ယောက်က မြားနဲ့ ပစ်ပေးလိုက်တာပါ။”

‘ချီးတဲ့မှ... မြေကြီးပေါ်ကနေ အပေါ်ကို ဒီစာကို ပစ်ပေးလိုက်တာလား။’

“အဲဒီတုန်းက ခင်ဗျားတို့ လေသင်္ဘောက အမြင့် ဘယ်လောက်မှာ ရှိနေတာလဲ။” ယွင်ကျုံးဟဲ့က ထပ်မေး၏။

သတင်းပေးသူက ဖြေလိုက်သည်။ “မီတာ သုံးရာ့ငါးဆယ်လောက်မှာပါ။”

ယွင်ကျုံးဟဲ့က ပြော၏။ “ဘယ်လို လေးမြားမျိုးကမှ ဒီလောက် မြင့်အောင် မပစ်နိုင်ပါဘူး။ မြေဆွဲအားကြောင့် မီတာ တစ်ရာလောက် အမြင့်ကို ပစ်နိုင်တာတောင် အရမ်း တော်နေပါပြီ။”

သတင်းပေးသူက ဖြေလိုက်သည်။ “အဲဒီတုန်းက ဒီမြားက အုပ်ချုပ်ရေးရုံး မျှော်စင်ရဲ့ အမြင့်ဆုံး နေရာကနေ ပစ်လိုက်တာပါ။ မျှော်စင်ရဲ့ အမြင့်က မူလတည်းက မြင့်ပါတယ်။ ဒါပေမဲ့ ဒီမြား ရောက်လာတဲ့ အမြင့်ကတော့ ကျုပ်တို့ကို တကယ်ပဲ အလန့်တကြား ဖြစ်သွားစေခဲ့တာ အမှန်ပါပဲ။ လုံးဝ မယုံကြည်နိုင်အောင်ပါပဲ။ လူတစ်ယောက်က မြားကို ဒီလောက် မြင့်အောင် ပစ်နိုင်တယ်ဆိုတော့ အဲဒီလူရဲ့ သိုင်းပညာက ဘယ်လောက်တောင် အင်အားကြီးမလဲ ဆိုတာ တွေးကြည့်လို့တောင် မရနိုင်ပါဘူး။”

ယွင်ကျုံးဟဲ့က ပြောလိုက်၏။ “ကျုပ် သိပါပြီ။ ခင်ဗျားရဲ့ အစီရင်ခံစာကို ဒီမှာ ထားခဲ့ပြီး သွားနားလိုက်တော့။ ခင်ဗျား ပင်ပန်းသွားပြီ။”

ထို့နောက် ယွင်ကျုံးဟဲ့သည် ဝန်ကြီးအဖွဲ့၊ စစ်တပ် ဦးစီးဌာနတို့နှင့် ထပ်မံ ဆွေးနွေးတိုင်ပင်သည်။

ဤတစ်ကြိမ် ဆွေးနွေးသည့် အကြောင်းအရာမှာ တစ်ခုတည်းသာ ဖြစ်သည်။ ယွင်ကျုံးဟဲ့သည် တတိယ ကိုလိုနီ နယ်မြေသို့ သွားရောက်၍ ကျင်းကျုံးယွဲ့ နှင့် ဆွေးနွေးသင့်၊ မသင့် ပင်ဖြစ်၏။

တစ်ဖက်ရန်သူ၏ သဘောထားက အရမ်း ပြင်းထန်ပြီး ရန်လိုမှုက အရမ်း ကြီးမားနေသောကြောင့် ယွင်ကျုံးဟဲ့ အနေဖြင့် အင်ပါယာ၏ အရှင်သခင် တစ်ဦးဖြစ်ရာ သွားရောက်၍ အန္တရာယ်ကို ရင်မဆိုင်သင့်ကြောင်း ဝန်ကြီးအဖွဲ့နှင့် စစ်တပ် ဦးစီးဌာနက တညီတညွတ်တည်း ယူဆကြသည်။

“အရှင်... ကျင်းကျုံးယွဲ့ဟာ အရှင့်ရဲ့ ဇနီး ဖြစ်ခဲ့ဖူးပေမယ့် သူမရဲ့ စရိုက်က မူလတည်းက ထူးဆန်းပါတယ်။ ပြီးတော့ လွန်ခဲ့တဲ့ နှစ်အနည်းငယ်က ကျုပ်တို့ရဲ့ ငြင်းပယ်ခြင်းကို ခံခဲ့ရလို့ လူတစ်သောင်းကျော်ကို ခေါ်ဆောင်ပြီး ဆက်လက် လေလွင့်နေခဲ့ရတဲ့အတွက် တာ့ယန် အင်ပါယာသစ်အပေါ် အမုန်းတရားတွေ ပြည့်နှက်နေမှာပါ။ အရှင်က တာ့ယန် အင်ပါယာသစ်ရဲ့ ဘုရင် တစ်ပါး ဖြစ်နေတော့ ဒါကို သစ္စာဖောက်မှု တစ်ခုလို့ သူမက ယူဆကောင်း ယူဆနိုင်ပါတယ်။”

ဟွာပီက ပြောလိုက်၏။ “ပြီးတော့ အင်ပါယာအတွက် အရှင့်ရဲ့ အရေးပါမှုကို ဘယ်စကားလုံးနဲ့မှ ဖော်ပြလို့ မရနိုင်ပါဘူး။ အဲဒါကြောင့် အရှင်က ကျင်းကျုံးယွဲ့ နဲ့ သွားရောက် ဆွေးနွေးလို့ လုံးဝ မဖြစ်ပါဘူး။”

ကျီးကျန်းက ပြောသည်။ “အရှင်... အခု ကျီးယန် ဦးဆောင်တဲ့ အင်ပါယာ စစ်တပ်က အသက်ရှင်သလား၊ သေဆုံးသွားသလား မသိရသေးပါဘူး။ ပြီးတော့ ကျုပ်တို့ သံတမန်အဖွဲ့ သုံးဖွဲ့ စေလွှတ်ခဲ့ပေမယ့် အားလုံး ဖမ်းဆီး ဖမ်းဆီးခံခဲ့ရပြီး တစ်ဖက်ရန်သူက ကျုပ်တို့ရဲ့ သံတမန် အဖွဲ့ဝင်တွေကိုတောင် သတ်ဖြတ်ခဲ့ပါတယ်။ ဒါက ရိုးရိုး ရန်လိုမှု မဟုတ်တော့ပါဘူး။

နောက်ဆုံး စေလွှတ်လိုက်တဲ့ သံတမန် အဖွဲ့မှာ အရှင့်ရဲ့ လျှို့ဝှက်စာ ပါသွားတာတောင်မှ အဖမ်းခံလိုက် ရသေးတယ်။ အဲဒါကြောင့် အရှင် ကိုယ်တိုင် တတိယ ကိုလိုနီ နယ်မြေကို သွားမယ်ဆိုရင် အရမ်း အန္တရာယ် များလွန်းပါတယ်။”

ဟွာပီက အကြံပေးလိုက်၏။ “အရှင်... ဒီလို လုပ်လို့ ရပါတယ်။ အရှင် ကိုယ်တိုင် သွားပြီး ကျင်းကျုံးယွဲ့နဲ့ ဆွေးနွေးလို့ ရပါတယ်။ ဒါပေမဲ့ အင်အားကြီးမားတဲ့ အမြောက် စစ်သင်္ဘောသစ်တွေ ယူသွားရပါမယ်။ အရှင့်ရဲ့ ဘေးမှာ အင်အားကြီးမားတဲ့ စစ်တပ်ရဲ့ ကာကွယ်မှု ရှိရပါမယ်။ ပြီးတော့ ဆွေးနွေးမယ့် နေရာကလည်း ကျုပ်တို့ရဲ့ ယန်ကျိုး သင်္ဘောပေါ်မှာပဲ ဖြစ်ရပါမယ်။”

“ကျုပ် ထောက်ခံပါတယ်။”

“ကျုပ် ထောက်ခံပါတယ်။”

ဝန်ကြီးအဖွဲ့နှင့် စစ်တပ် ဦးစီးဌာနမှ ထိပ်သီး ခေါင်းဆောင် ခြောက်ဦးစလုံး သဘောတူညီကြသည်။

ကြည့်ရသည်မှာ ဤအစီအစဉ်သည် အလွန် ခိုင်မာပြီး ယွင်ကျုံးဟဲ့၏ လုံခြုံရေးအတွက်လည်း ပိုမို အကျိုးရှိ၏။

သူသည် အင်ပါယာ၏ အရှင်သခင် အဖြစ် တစ်ဖက်ရန်သူ၏ နယ်မြေသို့ သွားရောက် ဆွေးနွေးရန်မှာ အလွန် အန္တရာယ်များလွန်းလှသည်။

အကယ်၍ သူသာ အန္တရာယ် တစ်ခုခု ဖြစ်သွားပါက တာ့ယန် အင်ပါယာသစ်သည်လည်း ကြီးမားသော ထိုးနှက်မှုကို ခံရမှာဖြစ်၏။

သို့မဟုတ် ဤသို့ ပြော၍ ရနိုင်သည်။ ယွင်ကျုံးဟဲ့သာ တတိယ ကိုလိုနီ နယ်မြေတွင် ပြဿနာ တစ်ခုခု ဖြစ်သွားပါက နောက်ဆက်တွဲ တာ့ယန် အင်ပါယာသစ်၏ စစ်ရေး ပစ်မှတ်မှာ တာရှန်း မိစ္ဆာနိုင်ငံ မဟုတ်တော့ဘဲ ကျီရွှေ့အဖွဲ့အစည်း ဖြစ်သွားပေလိမ့်မည်။

ဒေါသထွက်နေသော တာ့ယန် အင်ပါယာသစ်သည် စစ်သည် သန်းချီ စေလွှတ်ကာ သူတို့ လောက အစွန်အဖျားတွင် ရှိနေပါစေ၊ လောကကြီး၏ မည်သည့် ထောင့်တွင် ရှိနေပါစေ ကျီရွှေ့အဖွဲ့အစည်း၏ အင်အားစု အားလုံးကို အစွမ်းကုန် ကြိုးစား၍ အမြစ်ပြတ် ချေမှုန်းပစ်မှာဖြစ်သည်။

ယွင်ကျုံးဟဲ့က ပြောလိုက်၏။ “အမတ်ကြီးတို့... ကျုပ် အင်ပါယာရဲ့ အာဏာရှင် ဘုရင်အဖြစ် တာဝန်ယူခဲ့တာ နှစ်ဝက်ကျော် ရှိသွားပါပြီ။ အဆုံးစွန်မှာတော့ ကျုပ်က အာဏာတွေကို ခွဲဝေပေးဖို့ ဆန္ဒရှိရုံသာမက အချိန်တိုင်း ကိုယ့်ကိုယ်ကိုယ်လည်း ထိန်းချုပ်နေပါတယ်။ အာဏာရှင် ဘုရင် တစ်ပါး ဖြစ်ရင်တောင် အင်ပါယာရဲ့ ဥပဒေကို မချိုးဖောက်ပါဘူး၊ ဟုတ်တယ်မလား။”

ဤစကား ထွက်ပေါ်လာချိန်မှာတော့ ဝန်ကြီးအဖွဲ့နှင့် စစ်တပ် ဦးစီးဌာနမှ ထိပ်သီး ခေါင်းဆောင် ခြောက်ဦးလုံး မတ်တတ်ရပ်ကာ ဒူးတစ်ဖက် ထောက်လိုက်ကြသည်။

“အမတ်ကြီးတို့... ဒီလို မလုပ်ပါနဲ့၊ ဒီလို မလုပ်ပါနဲ့။” ယွင်ကျုံးဟဲ့ အမြန် ရှေ့တိုးသွားကာ ဆွဲထူလိုက်၏။

ဟွာပီက ပြောလိုက်သည်။ “အရှင်... ဘုရင်ရာထူးကို တက်ရောက်ပြီးနောက်ပိုင်း အာဏာရှင်ဆန်ဆန် မပြုမူရုံသာမက ပိုပြီးတော့တောင် နှိမ့်ချ သတိထားလာပါတယ်။ အချိန်တိုင်း အင်ပါယာအတွက် ကိုယ်ကျင့်တရား စံပြအဖြစ် နေထိုင်ပြီး စိတ်လိုက်မာန်ပါ လုပ်ရပ်မျိုး တစ်ခါမှ မလုပ်ခဲ့ပါဘူး။ ကျုပ်တို့ အရာရှိတွေရော၊ အင်ပါယာ နိုင်ငံသားတွေပါ အားလုံး ဝမ်းမြောက်ဝမ်းသာ ဖြစ်ရပြီး ကျေးဇူးတင်နေကြပါတယ်။”

သူ၏ ဤစကားသည် စိတ်ရင်းမှန်ဖြင့် ပြောကြားလိုက်ခြင်း ဖြစ်၏။

တကယ်တမ်းတွင် ဝန်ကြီးအဖွဲ့နှင့် စစ်တပ် ဦးစီးဌာနမှ လူများသည် ယွင်ကျုံးဟဲ့ အာဏာရှင် ဘုရင် ဖြစ်လာပြီးနောက် ထင်ရာစိုင်းကာ အာဏာရှင်ဆန်ဆန် လုပ်ဆောင်မည်ကို စိုးရိမ်ခဲ့ကြသည်။

သို့ပေမည့် လုံးဝ မရှိခဲ့ပေ။ ဘုရင်ရာထူး မရမီက ယွင်ကျုံးဟဲ့သည် စိတ်လိုက်မာန်ပါ လုပ်ကာ ဟန်ရေးပြခဲ့ သော်လည်း ဘုရင်ရာထူး လက်ခံပြီးနောက်ပိုင်း သူ ဘာလုပ်လုပ် အချိန်တိုင်း အင်ပါယာ၏ အကျိုးစီးပွားကို အရင် စဉ်းစားပြီး သူ၏ ကိုယ်ပိုင် အကျိုးစီးပွားကို မစဉ်းစားခဲ့ပေ။

ထို့အပြင် အများစု အချိန်များတွင် သူသည် ဝန်ကြီးအဖွဲ့နှင့် စစ်တပ် ဦးစီးဌာနကို အာဏာ လွှဲပြောင်းပေးထားပြီး သူကိုယ်တိုင်ကတော့ ကြားဝင် စေ့စပ်ပေးသူ တစ်ဦး အဖြစ်သာ နေထိုင်သည်။

ဤသို့ ပြော၍ ရနိုင်သည်။ ယွင်ကျုံးဟဲ့ နန်းတက်သည်မှာ တစ်နှစ်ပင် မပြည့်သေးသော်လည်း အင်ပါယာ အရာရှိများနှင့် နိုင်ငံသားများ အားလုံးက ဤသည်မှာ အင်ပါယာ၏ အကောင်းဆုံး ခေတ်ကာလ ဖြစ်သည်ဟု ထင်မြင်ကြ၏။

ကျီးချင့် သည် မိဖုရား ဖြစ်လာသော်လည်း သိပ္ပံနှင့် ပညာရေး ဝန်ကြီးဌာနတွင် ဒုတိယ ဝန်ကြီး အဖြစ် ဆက်လက် တာဝန်ထမ်းဆောင်နေပြီး ကလေး နှစ်ယောက်မှာလည်း အသက် တစ်နှစ် ပြည့်တော့မည် ဖြစ်သော်လည်း မင်းသမီး အဖြစ် ဘွဲ့ထူး ချီးမြှင့်ခြင်း မခံရသေးပေ။

အချက်အလက် မျိုးစုံက ဤအာဏာရှင် ဘုရင်သည် မျိုးရိုးစဉ်ဆက် ဆက်ခံသည့် စနစ်ကို ပြုလုပ်ရန်ပင် ရည်ရွယ်ထားခြင်း မရှိကြောင်း ပြသနေသည်။

လောကတစ်ဝန်းရှိ ပြည်သူများနှင့် အရာရှိများ အားလုံး ကြည်ညိုလေးစားကြ၏။

ထို့အပြင် ဤတစ်နှစ်နီးပါး ကာလအတွင်း ယွင်ကျုံးဟဲ့သည် အချိန်အများစုတွင် မည်သည့် အမိန့်ကိုမှ တိုက်ရိုက် မချမှတ်ခဲ့ဘဲ အမတ်များ၏ အဆိုပြုချက်များ အပေါ်တွင်သာ ကြားဝင် စေ့စပ်ပေးခဲ့သည်။

ထို့ကြောင့် မိတ်ဆွေ ဖြစ်သော ကျိုးလီ၏ သွားလာလှုပ်ရှားခွင့် နယ်မြေသည်လည်း စားကျက်ကွင်း အတွင်း၌သာ ဆက်လက် ရှိနေဆဲ ဖြစ်သည်။ အဘယ်ကြောင့်ဆိုသော် တာရှန်း မိစ္ဆာနိုင်ငံ သွေးကြောနှင့် ပတ်သက်သော အင်ပါယာ၏ ဥပဒေ ပြင်ဆင်မှု မပြီးပြတ်သေးသောကြောင့်ပင်။

ဤသည်မှာ တွေ့ရခဲသော ဉာဏ်ပညာ ကြီးမားသည့် ဘုရင် တစ်ပါး ဖြစ်သည်။

သို့ပေမည့် ယွင်ကျုံးဟဲ့ တစ်ခွန်း ဟလိုက်သည်နှင့် ဝန်ကြီးအဖွဲ့နှင့် စစ်တပ် ဦးစီးဌာနသည် လုံးဝ သံသယဝင်မည် မဟုတ်သလို ဆန့်ကျင်မည်လည်း မဟုတ်ပေ။

ယွင်ကျုံးဟဲ့က ပြောလိုက်သည်။ “ကျုပ် သိပါတယ်။ အင်ပါယာရဲ့ အရှင်သခင် တစ်ယောက် အနေနဲ့ စိတ်လိုက်မာန်ပါ လုပ်လို့ မရသလို၊ စိတ်လိုက်မာန်ပါ လုပ်ခွင့်လည်း မရှိပါဘူး။ ဒါပေမဲ့ ကျုပ် ဒီလို တွေးမိတယ်။ ပထမဦးဆုံး အနေနဲ့ လက်ရှိ အကြီးမားဆုံး ရန်သူ၊ လောကကြီး တစ်ခုလုံးကို ပျက်စီးစေနိုင်တဲ့ ရန်သူဟာ တာရှန်း မိစ္ဆာနိုင်ငံပဲ ဖြစ်တယ်။ ဒီရန်သူ ပစ်မှတ်က ရှင်းလင်းရမယ်။ တာရှန်း မိစ္ဆာနိုင်ငံကို ဖျက်ဆီးပစ်ဖို့အတွက် ကျုပ်တို့က စည်းရုံးလို့ ရနိုင်တဲ့ အင်အားစု အားလုံးကို စည်းရုံးရမယ်။

ဒုတိယ အနေနဲ့ တာ့ယန် အင်ပါယာသစ်ဟာ သိုင်းပညာကို စွဲကိုင်ထားတဲ့ ကျီရွှေ့အဖွဲ့အစည်း ရဲ့ အဖွဲ့ဝင်တွေကို နယ်နှင်ဒဏ် ပေးခဲ့ဖူးသလို ကျင်းကျုံးယွဲ့ကို ခိုလှုံခွင့် ပေးဖို့လည်း ငြင်းပယ်ခဲ့ဖူးတယ်။ အဲဒါကြောင့် သူက လူတစ်သောင်းကျော်ကို ခေါ်ဆောင်ပြီး သနားစရာကောင်းအောင် ထွက်ခွာသွားရပြီး နေစရာ နေရာမရှိဘဲ စိတ်ပျက် မျှော်လင့်ချက်မဲ့ ဖြစ်ခဲ့ရတယ်။ အဲဒါကြောင့် သူတို့က ကျုပ်တို့အပေါ် ရန်လိုမှု ရှိတာ၊ အမုန်းတရား ရှိတာက လုံးဝ နားလည်ပေးလို့ ရပါတယ်။

ကျီရွှေ့အဖွဲ့အစည်းက အမှောင်ဘက် ရောက်သွားနိုင်သလို အရမ်းလည်း အစွန်းရောက်သွားနိုင်ပါတယ်။ သိုင်းပညာကိုပဲ အပြည့်အဝ အာရုံစိုက်ထားတဲ့ သူတို့ဟာ အင်အားကြီးမားတဲ့ တစ်ကိုယ်ရည် သိုင်းပညာတွေ ရှိကြပါတယ်။ အဲဒါကြောင့် အနာဂတ်မှာ တာရှန်း မိစ္ဆာနိုင်ငံကို ဆန့်ကျင်တိုက်ခိုက်ရာမှာ ကျုပ်တို့ရဲ့ အကောင်းဆုံး မဟာမိတ် ဖြစ်လာနိုင်ပါတယ်။

ဆိုလိုချင်တာ ကျီရွှေ့အဖွဲ့အစည်းဟာ တာ့ယန် အင်ပါယာဟောင်းက လူတွေပါပဲ။ ကျုပ်တို့က တာ့ယန် အင်ပါယာရဲ့ ဆက်ခံသူတွေ၊ လမ်းသစ်ဖောက်သူတွေ အနေနဲ့ သူတို့ကို ခွင့်လွှတ် လက်ခံပေးနိုင်တဲ့ လုံလောက်တဲ့ စိတ်ထား ရှိသင့်ပါတယ်။”