အခန်း ၃၇၂

အခန်း (၃၇၂) နတ်သမီး၏ တောင်းဆိုချက်... စွမ်းအင်များကို ဖယ်ထုတ်ပစ်ခြင်း

လင်းကျန့်တောင် (ဝိညာဉ်ဓားတောင်) ၏ အရှေ့ဘက် လေဟာနယ်ထက်တွင်။

ကျန်းချဲ့သည် အနက်ရောင်ဝတ်ရုံကို ဆင်မြန်းလျက် လက်နောက်ပစ်ကာ မတ်မတ်ရပ်နေလေသည်။

သူ၏ ကိုယ်ပတ်လည်တွင် ကြီးမားလှသော ဖိအားအရှိန်အဝါတစ်ခု ရစ်သိုင်းနေပြီး အရှေ့ဘက်ရှိ ဓားရှည်များနှင့်တူသော တောင်ထွတ်များကို ကြည့်ကာ မျက်လုံးများကို အနည်းငယ် မှေးကျဉ်းလိုက်သည်။

လင်းကျန့်တောင်သည် နာမည်နှင့်လိုက်ဖက်အောင်ပင် တောင်တန်းဖြင့် ဓားကိုမွေးမြူကာ ဓားသွားဖြင့် တောင်တန်းကို ကာကွယ်ထားပေသည်။

ယခင်က ချီမိသားစုမှ အကြီးအကဲများနှင့် စကားစမြည်ပြောဆိုစဉ်က လင်းကျန့်တောင်အကြောင်းကို ပြောဖြစ်ခဲ့ကြသည်။

ထိုအခါက အားလုံးသည် လင်းကျန့်တောင်၏ ဂိုဏ်းစောင့်အစီအရင် မည်မျှထက်မြက်ကြောင်းကို ချီးကျူးခဲ့ကြပြီး ယွဲ့ပြည်နယ်ရှိ နဂါးကျားတာအိုဂိုဏ်းထက်ပင် အများကြီးသာလွန်သည်ဟု ဆိုခဲ့ကြသည်။

သိုင်းသူတော်စင် မဟုတ်လျှင် ထိုအစီအရင်ကို လုံးဝဖျက်ဆီးနိုင်မည်မဟုတ်ပေ။

ဤမျှလောက် အလှမ်းဝေးနေသည်တောင်မှ အရှေ့ဘက်ရှိ သွယ်တန်းနေသော တောင်ထွတ်များပေါ်မှ ထွက်ပေါ်လာသည့် ထက်မြက်သော ဓားအရှိန်အဝါများကို သွယ်ဝိုက်၍ ခံစားနေရဆဲပင်ဖြစ်သည်။

အချိန်အနည်းငယ် ကြာပြီးနောက် လေဟာနယ်ထဲတွင် ဓားမြည်သံတစ်ခု ဟိန်းထွက်လာပြီး အစိမ်းရောင်ဝတ်ရုံကို ဆင်မြန်းထားသော ကျောက်ရှန်းကျီသည် ဓားကိုစီးနင်းလျက် ရောက်ရှိလာလေသည်။

လူ့လောကသို့ ဆင်းသက်လာသော ဓားနတ်မိမယ်လေးတစ်ပါးအလား ပင်တည်း။

သူမ၏ ပြည့်ဖြိုးလှပသော ကိုယ်လုံးကိုယ်ပေါက်မှာ ချီဝမ်ကျင်းထက် လုံးဝမနိမ့်ကျချေ။

အနည်းငယ်ပင် ပို၍ သာလွန်နေသေးသည်ဟု ဆိုရပေမည်။

အလှအပဘက်တွင်တော့ တစ်ယောက်တစ်မျိုးစီ သာလွန်ကြလေသည်။

ချီဝမ်ကျင်းသည် အမျိုးသားများထက် မနိမ့်ကျသော စစ်သူကြီးတစ်ဦးအလား ရဲရင့်ပြတ်သားသည့် အလှမျိုးကို ပိုင်ဆိုင်ထားပြီး ကျောက်ရှန်းကျီသည်တော့ လူ့လောက အညစ်အကြေးများ ကင်းစင်သော နတ်မိမယ်တစ်ပါးအလား လှပလေသည်။

အပြင်ပန်းတွင် သူမသည် အေးစက်စက်နိုင်လှသော်လည်း ကျန်းချဲ့နှင့် ရင်းနှီးသွားပြီးနောက်တွင်တော့ ထိုသို့ မထင်တော့ပေ။

တကယ်တမ်းတွင် ကျောက်ရှန်းကျီသည် အပြင်ပန်းတွင်သာ အေးစက်ပြီး အတွင်းစိတ်နွေးထွေးကာ ယဉ်ကျေးသိမ့်မွေ့သော မိန်းမပျိုလေးတစ်ယောက်သာ ဖြစ်လေသည်။

"တာအိုမိတ်ဆွေကျန်းက တကယ်ကို ကတိတည်တဲ့သူပဲ လာတာ ဒီလောက်မြန်မယ်လို့ မထင်ထားဘူး"

ကျောက်ရှန်းကျီ အနည်းငယ် အံ့အားသင့်သွားရလေသည်။

မင်္ဂလာပွဲ ပြီးကတည်းက ယခုအချိန်အထိ ရက်အနည်းငယ်သာ ရှိသေးရာ သူမကပင် အလျင်စလို မလုပ်ရန် တွေးထားခဲ့သော်လည်း တစ်ဖက်လူက ပို၍ပင် ဂရုတစိုက်ရှိနေမည်ဟု လုံးဝမထင်မှတ်ထားခဲ့ပေ။

ဤအတွက်ကြောင့် သူမ၏ရင်ထဲတွင် ပို၍ပင် ကျေးဇူးတင်သွားမိလေသည်။

"ကတိပေးထားပြီးမှတော့ သေချာပေါက် လာရမှာပေါ့ နတ်သမီးက ထိုက်ယင် ဝိညာဉ်စွမ်းအင်တွေကြောင့် ဒုက္ခရောက်နေတာ အတော်ကြာပြီဆိုတော့ ကျုပ်အနေနဲ့ တစ်ဖက်တစ်လမ်းကနေ ကူညီပေးနိုင်ရင် တမင်သက်သက် ငြင်းဆန်နေစရာ အကြောင်းမရှိပါဘူး"

ကျန်းချဲ့က ခပ်ဖျော့ဖျော့ ပြုံးလိုက်လေသည်။

တကယ်တမ်းတွင်မူ သူကိုယ်တိုင်က ယခုအချိန်၌ ထိုက်ယင်ဝိညာဉ်စွမ်းအင်များကို အလွန်အမင်း လိုအပ်နေသောကြောင့်သာ ဖြစ်သည်။

"တာအိုမိတ်ဆွေကို ကျေးဇူးတင်ပါတယ် တောင်ပေါ်ကို ကြွပါဦး"

ကျောက်ရှန်းကျီက အပြုံးလေးဖြင့် ကျန်းချဲ့ကို ဖိတ်ခေါ်လိုက်လေသည်။

ကျန်းချဲ့ကလည်း ဘာမှ မငြင်းဆန်တော့ဘဲ ဝင်ရောက်သွားလေသည်။

စကားပြောဆိုရင်း ကျောက်ရှန်းကျီသည် ဓားတစ်ချက်ဝှေ့ယမ်းကာ မြူခိုးများကို ဖယ်ရှားလိုက်ပြီး လမ်းတစ်လမ်းဖောက်ကာ ကျန်းချဲ့ကို လင်းကျန့်တောင်အတွင်းသို့ ခေါ်ဆောင်သွားလေသည်။

သို့သော် သူမသည် ကျန်းချဲ့ကို လင်းကျန့်တောင်ရှိ လူများနှင့် မိတ်ဆက်ပေးခြင်းမရှိဘဲ သူမ၏ ချင်းရှောင်ဓားတောင်ထွတ်သို့သာ တိုက်ရိုက် ခေါ်ဆောင်သွားလေသည်။

ထိုနေရာသည် သူမ၏ အမွေဆက်ခံရာ နေရာဖြစ်ပြီး ထို့ကြောင့်ပင် သိုင်းလောကမှ လူများက သူမကို ချင်းရှောင်ဓားသခင်မ ဟု ခေါ်ဝေါ်ကြခြင်းဖြစ်သည်။

သေချာသည်ကတော့ ကျောက်ရှန်းကျီက ကျန်းချဲ့ကို တရားဝင် မိတ်ဆက်ပေးခြင်းမရှိသော်လည်း ချင်းရှောင်ဓားတောင်ထွတ်ပေါ်တွင် ရှန်ရှန်းအဆင့် မဟာသိုင်းသခင်ကြီး နှစ်ယောက် စောင့်ဆိုင်းနေကြလေသည်။

တစ်ယောက်က လင်းကျန့်တောင်၏ ဂိုဏ်းချုပ်ဖြစ်ပြီး အခြားတစ်ယောက်ကတော့ ယခင်က ကျန်းချဲ့၏ မင်္ဂလာပွဲတွင် ဦးဆောင်ပေးခဲ့သော လင်းကျန့်တောင်မှ ချန်ဟယ်ဓားသခင် ပင်ဖြစ်သည်။

မည်သို့ပင်ဆိုစေ ယင်နှင့်ယန်ကို အချိုးအစားညီမျှအောင် ပြုလုပ်ခြင်းက အနည်းနှင့်အများဆိုသလို အန္တရာယ်ရှိနေသေးရာ သူတို့သည် အတွင်းသို့ ဝင်ရောက်မည်မဟုတ်သော်လည်း ကျောက်ရှန်းကျီအတွက် အစောင့်အရှောက်အဖြစ် တောင်ထွတ်အပြင်ဘက်တွင် စောင့်နေကြမည်ဖြစ်သည်။

ထို့အပြင် နောက်ထပ် လျှို့ဝှက်ရည်ရွယ်ချက်တစ်ခုလည်း ရှိနေသေးလေသည်။ ၎င်းမှာ ကျန်းချဲ့ကို စောင့်ကြည့် ကာကွယ်ရန် ပင်တည်း။

ဤသည်မှာ ကျောက်ရှန်းကျီ၏ သဘောဆန္ဒမဟုတ်ဘဲ လင်းကျန့်တောင် ဂိုဏ်းချုပ်၏ ဆန္ဒသာဖြစ်သည်။

မြောက်ပိုင်း ချီမိသားစုနှင့် လင်းကျန့်တောင်တို့သည် ဆက်ဆံရေး အလွန်ကောင်းမွန်သော်လည်း မိသားစုဝင် မဟုတ်ကြပေ။

လင်းကျန့်တောင်၏ နောက်တစ်ဆက်တွင် သိုင်းသူတော်စင်အဆင့်သို့ တက်လှမ်းရန် အလားအလာအကောင်းဆုံးသူ ဖြစ်သောကြောင့် ကျောက်ရှန်းကျီအပေါ် ထားရှိသည့် အလေးပေးမှုမှာ အလွန်မြင့်မားလေသည်။

အပြန်အလှန် နှုတ်ဆက်ပြီးနောက် လင်းကျန့်တောင်မှ မဟာသိုင်းသခင်ကြီး နှစ်ယောက်သည် ကျန်းချဲ့ကို လှိုက်လှိုက်လှဲလှဲ ကျေးဇူးတင်စကား ပြောကြားခဲ့ကြသည်။

ထို့နောက် အကယ်၍ မမျှော်လင့်ထားသောအရာများ ဖြစ်ပေါ်လာပါက အချိန်မီ ကူညီပေးနိုင်ရန် တောင်အပြင်ဘက်မှ အစောင့်အရှောက်အဖြစ် နေပေးမည်ဖြစ်ကြောင်း ပြောကြားခဲ့ကြလေသည်။

ထို့နောက် သူတို့နှစ်ယောက်သည် အချိန်ဆွဲမနေတော့ဘဲ ချင်းရှောင်ဓားတောင်ထွတ်မှ တိုက်ရိုက် ထွက်ခွာသွားကြလေသည်။

"ကြည့်ရတာ လင်းကျန့်တောင်က ကျုပ်ကို သိပ်ယုံကြည်ပုံမပေါ်ဘူး"

ကျန်းချဲ့က ပြုံးလျက် ပြောလိုက်လေသည်။

ကျောက်ရှန်းကျီက အားနာသော အမူအရာဖြင့် ပြန်ပြောလိုက်လေသည်။

"တာအိုမိတ်ဆွေကျန်း စိတ်ထဲမထားပါနဲ့ ဒီကိစ္စက တကယ်တော့..."

"ရပါတယ် ဒါက အပေးအယူတစ်ခုပဲလေ ကျုပ် နားလည်ပေးနိုင်ပါတယ်"

ကျန်းချဲ့၏ ရင်ထဲတွင် အနည်းငယ် မကျေမနပ်ဖြစ်သွားသည်မှာ မှန်သော်လည်း အများကြီးတော့ မဟုတ်ပေ။ အကယ်၍ သူသာဆိုလျှင် ထိုထက်မက ပို၍ပင် စောင့်ကြည့်ကာကွယ်ဦးမည်သာ ဖြစ်လေသည်။

ထိုသို့ပြောပြီးသည်နှင့် သူသည် ကပ်ဆိုးတစ်သောင်း မိစ္ဆာဓားကို လေဟာနယ်ထဲသို့ လွှင့်ပစ်လိုက်ကာ ချီရွှယ်မိစ္ဆာသခင်ကို အစောင့်အရှောက် လုပ်ခိုင်းလိုက်လေသည်။

"မင်းကောင်လေး တကယ်ပဲ..."

ချီရွှယ်မိစ္ဆာသခင်က နှာခေါင်းရှုံ့ကာ လျှို့ဝှက်အသံဖြင့် လှမ်းပြောလိုက်လေသည်။

ကျန်းချဲ့ကတော့ မျက်နှာထား လုံးဝမပျက်ဘဲ ဘာမှမကြားရသည့်အလား နေလိုက်လေသည်။

ကျောက်ရှန်းကျီသည် ထို မိစ္ဆာဓားကို တစ်ချက်ကြည့်လိုက်ပြီး အတွင်းမှ ထွက်ပေါ်လာသော အရှိန်အဝါကို ခံစားမိလိုက်သော်လည်း ဘာမှမပြောဘဲ ပြုံးရုံသာပြုံးလိုက်လေသည်။

ထို့နောက် သူမက ကျန်းချဲ့ကို သီးသန့်ပြင်ဆင်ထားသော လျှို့ဝှက်ခန်းမတစ်ခုအတွင်းသို့ ခေါ်ဆောင်သွားလေသည်။

လျှို့ဝှက်ခန်းမကြီးမှာ အလွန်ကျယ်ဝန်းပြီး မီတာတစ်ရာခန့် ကျယ်ဝန်းလေသည်။

အတွင်းဘက်တွင် ထူးဆန်းသော မှော်စာလုံးများစွာကို ရေးဆွဲထားပြီး သေချာပေါက် အစီအရင်တစ်ခုခု ဖြစ်ကြောင်း သိသာလှပေသည်။

ကျောက်ရှန်းကျီသည် ကျန်းချဲ့ စိတ်ဝင်တစား ကြည့်နေသည်ကိုမြင်သောအခါ ချက်ချင်း ရှင်းပြလိုက်လေသည်။

"ဒါတွေက အဆက်ဆက်သော ချင်းရှောင်ဓားသခင်မတွေ ရေးဆွဲခဲ့တဲ့ အစီအရင် မျိုးစုံပါပဲ ကာကွယ်တာတွေ စွမ်းအင်စုဆောင်းတာတွေနဲ့ စိတ်ကို တည်ငြိမ်စေတဲ့ အာနိသင်တွေ ရှိတယ် ဒီမှာ တံခါးပိတ်ကျင့်ကြံတာက တခြား လျှို့ဝှက်နယ်မြေတွေထက် လုံးဝမနိမ့်ကျပါဘူး"

"တကယ်ကို ကောင်းတာပဲ"

ကျန်းချဲ့က ပတ်ဝန်းကျင်ကို တစ်ချက်ဝေ့ကြည့်လိုက်ပြီးနောက် သဘောတကျ ခေါင်းညိတ်လိုက်လေသည်။

သူ၏ အကဲခတ်မှုအရ ကျောက်ရှန်းကျီ ပြောသည့်အတိုင်း အမှန်တကယ်ပင် သာမန်မဟုတ်သော အာနိသင်များ ရှိနေကြောင်း သိလိုက်ရလေသည်။

"ကျမ အရင်ဆုံး အခြေအနေကို နည်းနည်းလေး ချိန်ညှိလိုက်ဦးမယ် အဲ့ဒါပြီးရင် တာအိုမိတ်ဆွေကျန်းကို ဒုက္ခပေးရတော့မယ်"

ကျောက်ရှန်းကျီက ပြုံးလိုက်ပြီးနောက် တရားထိုင်ခုံတစ်ခုပေါ်တွင် တင်ပျဉ်ခွေထိုင်ကာ ယင်နှင့်ယန် အချိုးအစား ညီမျှစေရန် စတင် ပြင်ဆင်တော့လေသည်။

သို့သော် ကျန်းချဲ့က သူမကို လှမ်းတားလိုက်လေသည်။

"နတ်သမီး ခဏလေး ကျုပ် မေးချင်တာလေး နှစ်ခုလောက် ရှိနေလို့ပါ"

ကျောက်ရှန်းကျီက မျက်လုံးများကို ပြန်ဖွင့်လိုက်ပြီး ခေါင်းညိတ်ပြလိုက်လေသည်။

"တာအိုမိတ်ဆွေ ပွင့်ပွင့်လင်းလင်းသာ မေးပါ"

"ကျုပ် သိချင်တာက နတ်သမီး ယင်နဲ့ ယန် အချိုးအစား ညီမျှသွားပြီးရင် ထိုက်ယင် ဝိညာဉ်စွမ်းအင်တွေကို ဆက်ပြီး ဖန်တီးနိုင်စွမ်း ရှိဦးမလား ဆိုတာပါပဲ"

ကျောက်ရှန်းကျီ ယင်နှင့်ယန်ကို ညီမျှအောင် လုပ်ဆောင်ရန် အလွန်ခက်ခဲမည်ဟု ကျန်းချဲ့ ထင်မြင်ထားပြီး သူ၏ အကူအညီဖြင့် ထိုက်ယင်ဝိညာဉ်စွမ်းအင် အချို့ကို ဖယ်ထုတ်ပစ်ရန် လိုအပ်လိမ့်မည်ဟု ခန့်မှန်းထားသော်လည်း အပြည့်အဝတော့ မသေချာလှပေ။

ထို့ကြောင့် ကြိုတင်မေးမြန်းထားရန် လိုအပ်လေသည်။

မည်သို့ပင်ဆိုစေ စိတ်နှလုံးမိစ္ဆာ သွေးကျိန်စာ၏ ကန့်သတ်ချက်များ ရှိနေသဖြင့် တစ်ဖက်လူ ယင်နှင့်ယန် ညီမျှအောင် ကြိုးစားနေချိန်တွင် သူက လှည့်ကွက်များ သုံး၍မရချေ။ မဟုတ်ပါက ပြောင်းပြန်ရိုက်ခတ်မှုများကို ခံရမည်ဖြစ်သည်။

သို့သော် ထိုသို့ဖြစ်သွားပါက ထိုက်ယင်ဝိညာဉ်စွမ်းအင် အမျှင်တစ်ထောင်ကို သူ မည်သို့မျှ ရနိုင်တော့မည်မဟုတ်ပေ။

ထို့ကြောင့် အကယ်၍ တစ်ဖက်လူက ဆက်လက် မဖန်တီးနိုင်တော့ဘူး ဆိုပါက ယင်စွမ်းအင်များကို အရင်ဖယ်ထုတ်ပေးရန် တောင်းဆိုရမည်ဖြစ်သည်။

"တာအိုမိတ်ဆွေက ထိုက်ယင် ဝိညာဉ်စွမ်းအင်တွေကို လိုအပ်နေလို့လား"

ကျောက်ရှန်းကျီသည် ကျန်းချဲ့၏ ဆိုလိုရင်းကို ချက်ချင်း သဘောပေါက်သွားပြီး ပြန်လည် မေးမြန်းလိုက်လေသည်။

"မှန်ပါတယ်"

"တာအိုမိတ်ဆွေ ထိုက်ယင် ဝိညာဉ်စွမ်းအင် ဘယ်လောက်များများ လိုအပ်နေတာလဲ"

ကျောက်ရှန်းကျီ မျက်မှောင်ကျုံ့ကာ မေးလိုက်လေသည်။

"အမျှင်တစ်ထောင်လောက်ဆိုရင် လုံလောက်ပါပြီ"

ကျန်းချဲ့က ပွင့်ပွင့်လင်းလင်းပင် ပြန်ဖြေလိုက်လေသည်။

ကျောက်ရှန်းကျီ အချိန်အနည်းငယ်မျှ တိတ်ဆိတ်သွားပြီးနောက် ကျန်းချဲ့ကို မလွှဲတမ်း ကြည့်ကာ ပြောလိုက်လေသည်။

"ထိုက်ယင် ဝိညာဉ်စွမ်းအင် အမျှင်တစ်ထောင်ဆိုရင် ကျမ ယင်နဲ့ယန်ကို အချိုးအစား ညီမျှအောင် လုပ်ပြီးလို့ ယွမ်ရှန်အဆင့်ကို တက်လှမ်းသွားတဲ့အခါကျရင် မူလအနှစ်သာရ နည်းနည်းလောက် အကုန်ခံပြီး တစ်လလောက် အချိန်ယူရင် ဖန်တီးပေးလို့ ရပါတယ် အဲ့ဒီအချိန်ကျရင် တာအိုမိတ်ဆွေကို ပေးပါ့မယ် ဒါပေမဲ့ အခုတော့ ကျမ ယင်နဲ့ ယန် ကို အရင်ဆုံး ညီမျှအောင် ကြိုးစားကြည့်ချင်သေးတယ် တကယ်လို့ အဆင်မပြေဘူး ဆိုရင်တော့ ထွက်လာမယ့် ထိုက်ယင် ဝိညာဉ်စွမ်းအင်တွေကို တာအိုမိတ်ဆွေကပဲ ယူလိုက်ပါတော့ ဘယ်လိုလဲ"

သူမ၏ ယခုလက်ရှိ ထိုက်ယင် မူလအနှစ်သာရများအရ ယင်နှင့်ယန်ကို ညီမျှအောင် လုပ်ဆောင်နိုင်သွားပါက အလွန် ကြောက်မက်ဖွယ်ကောင်းသော အခြေခံအုတ်မြစ်များကို ပိုင်ဆိုင်နိုင်မည်ဖြစ်ပြီး နောင်တစ်ချိန် သိုင်းသူတော်စင်အဆင့်သို့ တက်လှမ်းရန်အတွက် ခိုင်မာသော အားကိုးရာတစ်ခု ရရှိသွားမည်ဖြစ်သည်။

သို့သော် အကယ်၍ မူလအနှစ်သာရများကို ကြိုတင် ဖယ်ထုတ်လိုက်ရမည်ဆိုပါက ယွမ်ရှန်အဆင့်သို့ တက်လှမ်းနိုင်လျှင်တောင်မှ အခြေခံအုတ်မြစ် အားနည်းသွားမည်ဖြစ်ပြီး ပြန်လည် ဖြည့်တင်းရန် ခက်ခဲပေလိမ့်မည်။

ထို့ကြောင့် သူမ၏ ပထမဆုံးသော ရည်မှန်းချက်မှာ အမြဲတမ်း ယင်နှင့်ယန်ကို အချိုးအစား ညီမျှအောင် လုပ်ဆောင်ရန်သာ ဖြစ်လေသည်။

အကယ်၍ အမှန်တကယ် မဖြစ်နိုင်တော့မှသာ နောက်ဆုတ်ရွေးချယ်မှုကို ပြုလုပ်မည်ဖြစ်သည်။

"ကောင်းပါပြီ ဒီလိုဆိုမှတော့ နတ်သမီး ယင်နဲ့ယန် ညီမျှသွားအောင် အရင်ကူညီပေးရတာပေါ့"

တစ်လအချိန်ဆိုသည်မှာ တိုတောင်းသည်ဟု မဆိုသာသော်လည်း ရှည်လျားလွန်းသည်ဟုလည်း မဆိုနိုင်ပေ။ ကျန်းချဲ့ အနေဖြင့် စောင့်ဆိုင်းနိုင်စွမ်း ရှိလေသည်။

"ကျေးဇူးတင်ပါတယ်"

ကျောက်ရှန်းကျီက နောက်တစ်ကြိမ် ကျေးဇူးတင်စကား ဆိုလိုက်လေသည်။

အကယ်၍ ကျန်းချဲ့သာ ထိုက်ယင်ဝိညာဉ်စွမ်းအင်များကို လိုချင်နေသည့်အကြောင်း ဖုံးကွယ်ထားပြီး သူမ ယင်နှင့်ယန် ညီမျှအောင် လုပ်ဆောင်နေချိန်တွင် လှည့်ကွက်များ သုံးလာမည်ဆိုပါက သူမ အမှန်တကယ် အန္တရာယ်ကြီးသွားမည်ကို သူမ ကောင်းစွာ သိရှိထားလေသည်။

ကျန်းချဲ့၏ ရိုးသားပွင့်လင်းမှု အပေါ် သူမ လှိုက်လှိုက်လှဲလှဲ ကျေးဇူးတင်မိလေသည်။

"အပြန်အလှန် အကျိုးရှိတာပါပဲ ဒါနဲ့ နောက်ထပ် ကိစ္စတစ်ခု ရှိသေးတယ် ကျုပ် လိုအပ်တာက ထိုက်ယင် ဝိညာဉ်စွမ်းအင် တစ်ခုတည်း မဟုတ်ဘူး ထိုက်ယန် ဝိညာဉ်စွမ်းအင်ကိုပါ လိုအပ်နေတာ ဒါပေမဲ့ ကျုပ် ချီမိသားစုရဲ့ ရှေးဟောင်းစာအုပ်တွေကို ရှာကြည့်တော့ ရေရေရာရာ အဖြေမရခဲ့လို့ နတ်သမီး များ သိထားတာ ရှိရင် လမ်းညွှန်ပေးနိုင်မလား"

ကျန်းချဲ့ ဆက်လက် မေးမြန်းလိုက်လေသည်။

"ထိုက်ယန် ဝိညာဉ်စွမ်းအင်လား"

ကျောက်ရှန်းကျီ ရင်ထဲတွင် သဘောပေါက်သွားလေသည်။ ကျန်းချဲ့သည် ထိုက်ယင်နှင့် ထိုက်ယန် ဝိညာဉ်စွမ်းအင်များကို စုပ်ယူချေဖျက်ပြီး ကျင့်ကြံခြင်းစွမ်းအားများကို မြှင့်တင်လိုနေကြောင်း သူမ ခန့်မှန်းမိလိုက်သည်။

အကြောင်းမူကား ယခင်က သူမကိုယ်တိုင်လည်း ထိုသို့ပင် လုပ်ဆောင်ခဲ့သောကြောင့် ဖြစ်သည်။

သို့သော် သူမက ခန္ဓာကိုယ် သဘောသဘာဝကြောင့် ထိုက်ယင် ဝိညာဉ်စွမ်းအင် တစ်မျိုးတည်းကိုသာ စုပ်ယူချေဖျက်နိုင်ခဲ့ခြင်း ဖြစ်လေသည်။

"ထိုက်ယန် ဝိညာဉ်စွမ်းအင် ကလည်း ထိုက်ယင် ဝိညာဉ်စွမ်းအင်နဲ့ အတူတူပါပဲ အထူးရုပ်ခန္ဓာ မျိုးတွေ ဒါမှမဟုတ် ထူးဆန်းတဲ့ ရတနာ တစ်ခုခု ရှိမှသာ အဲ့ဒီ ဝိညာဉ်စွမ်းအင်မျိုးကို ဖန်တီးနိုင်မှာပါ ဒါပေမဲ့ ထူးဆန်းတဲ့ ရတနာပဲဖြစ်ဖြစ် အထူးရုပ်ခန္ဓာ ပိုင်ရှင်ပဲဖြစ်ဖြစ် အရမ်းကို ရှားပါးလွန်းပါတယ်"

"ဒါဆို ဘယ်လို ရုပ်ခန္ဓာမျိုးတွေက ထိုက်ယန် ရုပ်ခန္ဓာမျိုးတွေလို့ သတ်မှတ်လဲ ဆိုတာကို နတ်သမီး ပြောပြပေးလို့ ရမလား"

"ယွမ်ယန် တာအိုရုပ်ခန္ဓာ... ချွန်းယန် ရုပ်ခန္ဓာ... နေမင်းကိုးစင်း (ယန်ကိုးပါး) သူတော်စင်ရုပ်ခန္ဓာ... တကယ်တော့ အဲ့ဒါတွေ အားလုံးက ထိုက်ယန် ရုပ်ခန္ဓာ အဖြစ် သတ်မှတ်လို့ ရပါတယ်"

ဤကိစ္စနှင့် ပတ်သက်၍ ကျောက်ရှန်းကျီ က ပိုမို သိရှိထားပုံပေါ်လေသည်။

ရုပ်ခန္ဓာ အချို့နှင့် အထူးရတနာ အချို့ကို အလွယ်တကူပင် ပြောပြနိုင်လေသည်။

"နေပါဦး နတ်သမီး အစောက နေမင်းကိုးစင်း သူတော်စင်ရုပ်ခန္ဓာ လို့ ပြောလိုက်တာလား"

ကျန်းချဲ့က ရုတ်တရက် ဝင်ဖြတ်ပြောလိုက်ပြီး သူ၏ရင်ထဲတွင် တစ်စုံတစ်ခုကို သတိရသွားလေသည်။

ချင်းထျန်းဂိုဏ်း၏ သူတော်စင်သားတော် ချူးဟယ် သည် နေမင်းကိုးစင်း သူတော်စင်ရုပ်ခန္ဓာကို ပိုင်ဆိုင်ထားပြီး သူ၏ အခြေခံအုတ်မြစ်များမှာ အလွန် ကြောက်စရာကောင်းကြောင်းကို သူ ကောင်းစွာ သိရှိထားလေသည်။

ယခင်က ထိုသူကို အနိုင်ယူရန်အတွက် သူ၏ အင်အားများကို အစွမ်းကုန် ထုတ်သုံးခဲ့ရသည် မဟုတ်ပါလော။

သူတော်စင်ရုပ်ခန္ဓာ၏ အစွမ်းထက်မှုကို မြင်တွေ့နိုင်ပေသည်။

"ဒါပေါ့ နံပါတ် ကိုး ဆိုတာက အဆုံးစွန် အဓိပ္ပာယ်ကို ဆောင်တယ် နေမင်းကိုးစင်း ဆိုတာက ထိုက်ယန် ကို ကိုယ်စားပြုတယ်... နေမင်းကိုးစင်း သူတော်စင်ရုပ်ခန္ဓာကနေ ဖန်တီးထားတဲ့ မူလအနှစ်သာရ စွမ်းအင်ဆိုတာကလည်း ထိုက်ယန် ဝိညာဉ်စွမ်းအင် တစ်မျိုးပါပဲ"

ကျောက်ရှန်းကျီက ရှင်းပြလိုက်လေသည်။

ကျန်းချဲ့က တွေးတောနေသော မျက်နှာထားဖြင့် ခေါင်းညိတ်လိုက်ပြီး ထိုက်ယန် ဝိညာဉ်စွမ်းအင်ကို မည်သည့်နေရာမှ ရရှိနိုင်မည်ကို သေချာပေါက် သိရှိသွားလေပြီ။

ပစ်မှတ် ရှိသွားပြီဖြစ်ရာ ကျန်ရှိနေသည်ကတော့ လက်တွေ့ အကောင်အထည်ဖော်ရန်သာ ဖြစ်လေသည်။

အချိန်အနည်းငယ်မျှ စဉ်းစားပြီးနောက် သူ ဆက်လက် မေးမြန်းလိုက်လေသည်။

"ဒါဆို ယွမ်ယင် ဝိညာဉ်ရုပ်ခန္ဓာ နဲ့ ရွှမ်ယင် ဝိညာဉ်ရုပ်ခန္ဓာ တွေကရော ထိုက်ယင် ဝိညာဉ်စွမ်းအင်ကို ဖန်တီးနိုင်စွမ်း ရှိလား"

ကျောက်ရှန်းကျီက ကျန်းချဲ့ကို ပြုံးစိစိ မျက်နှာထားဖြင့် ကြည့်လိုက်လေသည်။

"တာအိုမိတ်ဆွေက နင်ပင်းနဲ့ ဝမ်ကျင်း တို့ ကောင်မလေး နှစ်ယောက်အတွက် မေးပေးနေတာ မဟုတ်လား"

"နတ်သမီးကလည်း သိနေတာလား"

ကျန်းချဲ့ အနည်းငယ် အံ့အားသင့်သွားရလေသည်။

ချီနင်ပင်းနှင့် ချီဝမ်ကျင်းတို့ ဝိညာဉ်ရုပ်ခန္ဓာ ပိုင်ဆိုင်ထားသည်ကို လူတိုင်းသိသော်လည်း မည်သည့် ဝိညာဉ်ရုပ်ခန္ဓာမျိုး ဖြစ်သည်ကိုတော့ သိုင်းလောကတွင် သိရှိသူ အလွန်ရှားပါးလှပေသည်။

၎င်းမှာ ချီကျန်းနန်က တမင်သက်သက် ဖုံးကွယ်ထားခြင်း ဖြစ်ကြောင်း ကျန်းချဲ့ ကောင်းစွာ သိရှိထားလေသည်။

ထိုက်ယင် ရွှမ်ယွမ် ဝိညာဉ်စွမ်းအင်၏ လျှို့ဝှက်ချက် အပြင်သို့ ပေါက်ကြားသွားပြီး အခြားသူများ၏ လိုချင်တပ်မက်မှုကို မခံရစေရန် အတွက် ပင်ဖြစ်သည်။

"သေချာပေါက် သိတာပေါ့ ဝမ်ကျင်းနဲ့ နင်ပင်း ငယ်ငယ်တုန်းကဆိုရင် ကျမ သူတို့ကို ချီတောင် ချီခဲ့ဖူးသေးတယ် တကယ်လို့ အတိအကျ ပြောရမယ်ဆိုရင် သူတို့က ကျမကို အန်တီကျောက် လို့တောင် ခေါ်ရဦးမှာ"

ကျောက်ရှန်းကျီက ပြုံးလျက် ပြောလိုက်လေသည်။

"ဒါဆို နတ်သမီးနဲ့ နင်ပင်းရဲ့ မိခင်က..."

"အဲ့ဒီလိုတော့ မဟုတ်ပါဘူး ကျမနဲ့ သူတို့ရဲ့ မိခင်က ရင်းနှီးရုံ သက်သက်ပါ ဘာမှ ထူးထူးခြားခြား ပတ်သက်မှု မရှိပါဘူး မျိုးဆက် အနေနဲ့ ပြောရင် အဲ့ဒီလို ပြောလို့ ရတယ်လို့ ဆိုလိုတာပါ"

"ဪ..."

ကျန်းချဲ့ သက်ပြင်း ဖွဖွလေး တစ်ချက် ချလိုက်လေသည်။

ရုတ်တရက်ကြီး ဆွေမျိုး အကြီးအကဲ တစ်ယောက် ထွက်လာမည်ကို သူ လုံးဝ မလိုလားချေ။

"ဝမ်ကျင်းနဲ့ နင်ပင်း တို့ရဲ့ ရုပ်ခန္ဓာက ဝိညာဉ်ရုပ်ခန္ဓာ အဆင့်မှာပဲ ရှိသေးတာ နောက်ပိုင်း ကံကြမ္မာ အခွင့်အရေး ရလို့ သူတော်စင်ရုပ်ခန္ဓာ အဖြစ် ပြောင်းလဲသွားနိုင်မယ် ဆိုရင်တော့ ထိုက်ယင် ဝိညာဉ်စွမ်းအင်ကို ဖန်တီးနိုင်မှာပါ ပြီးတော့ ရှားပါးတဲ့ ဝိညာဉ်စွမ်းအင် တစ်ခုတည်း အဖြစ် ပေါင်းစပ်သွားနိုင်ပါသေးတယ်"

ကျန်းချဲ့ ရင်ထဲတွင် အတွေးတစ်ခု ပေါ်လာလေသည်။

"အဆင့်တက်လှမ်းဖို့အတွက် အထောက်အကူ ဖြစ်နိုင်မလား"

"ဒီကိစ္စကတော့ ကျမလည်း သေချာ မသိဘူး"

ကျောက်ရှန်းကျီ အနည်းငယ် တွန့်ဆုတ်သွားပြီးနောက် ခေါင်းရမ်းလိုက်လေသည်။

"ဒါဆို သူတို့ကို သူတော်စင်ရုပ်ခန္ဓာ အဖြစ် ပြောင်းလဲသွားအောင် ဘယ်လို လုပ်ပေးရမလဲ"

ကျန်းချဲ့ ဆက်လက် မေးမြန်းလိုက်လေသည်။

"ရုပ်ခန္ဓာ ပြောင်းလဲသွားဖို့ အတွက် ထိုက်ယင် မူလအနှစ်သာရ စွမ်းအင်ကို ချေဖျက်စုပ်ယူဖို့ လိုအပ်တယ်"

"ထိုက်ယင် မူလအနှစ်သာရ စွမ်းအင်လား"

"ဒီ မူလအနှစ်သာရ စွမ်းအင်က သာမန် စွမ်းအင်မျိုး မဟုတ်ဘူး ဒီလို စွမ်းအင်မျိုးက အရမ်းကို ရှားပါးလွန်းတယ် လောကကြီးထဲမှာတောင် တွေ့ရခဲတယ် ကျမကိုယ်တိုင်တောင် တစ်ခါမှ မမြင်ဖူးဘူး ကြားပဲ ကြားဖူးတာ တာအိုမိတ်ဆွေကျန်း အဲ့ဒါကို ရချင်တယ်ဆိုရင်တော့ တော်တော်လေး ခက်ခဲတဲ့ လမ်းခရီးကို သွားရလိမ့်မယ်"

ကျန်းချဲ့ ချက်ချင်း သဘောပေါက်သွားပြီး ခေါင်းညိတ်လိုက်လေသည်။

သူကိုယ်တိုင် ယခုအချိန်အထိ နာမည်ကိုပင် မကြားဖူးသေးရာ လတ်တလောတွင် ဤကိစ္စကို ဘေးဖယ်ထားရန်သာ ရှိလေတော့သည်။

နောက်ထပ် မေးခွန်းအချို့ကို ဆက်လက်မေးမြန်းပြီးနောက် ကျောက်ရှန်းကျီကလည်း အမှန်အတိုင်း ပြန်လည်ဖြေကြားပေးလေသည်။

ကျန်းချဲ့ အချိန်အနည်းငယ်မျှ စဉ်းစားပြီးနောက် ဆက်လက်မေးမြန်းရန် မသင့်တော်တော့သဖြင့် ပြုံးလျက် ပြောလိုက်လေသည်။

"နတ်သမီးကို ဒုက္ခပေးသလို ဖြစ်သွားပြီ အခု စတင် ပြင်ဆင်ကြရအောင်လေ"

ကျောက်ရှန်းကျီက ခပ်ဖျော့ဖျော့ ပြုံးလိုက်လေသည်။

"ရပါတယ်"

ထိုသို့ပြောပြီးနောက် ကျန်းချဲ့ထံမှ နောက်ထပ် စကားသံ ထွက်မလာသည်ကို မြင်သောအခါ သူမသည် မျက်လုံးများကို ဖြည်းညင်းစွာ မှိတ်လိုက်လေသည်။

အချိန်များ တရွေ့ရွေ့ ကုန်ဆုံးသွားပြီးနောက်...

နာရီဝက်ခန့် အကြာတွင် ဂူအတွင်းရှိ အပူချိန်မှာ တဖြည်းဖြည်း ကျဆင်းလာပြီး ဂူ၏ နံရံများတွင် ပါးလွှာသော ရေခဲလွှာလေးများပင် ဖုံးလွှမ်းလာလေသည်။

တင်ပျဉ်ခွေထိုင်နေသော ကျောက်ရှန်းကျီ ၏ တစ်ကိုယ်လုံးမှလည်း ရေခဲရောင် အလင်းတန်းများ ဖြာထွက်နေပြီး သူမ၏ ကိုယ်ပေါ်မှ ထွက်ပေါ်လာသော ထိုက်ယင် ဝိညာဉ်စွမ်းအင်များကြောင့် ဘေးနားရှိ ကျန်းချဲ့ ကိုယ်တိုင်ပင် အရိုးထဲထိ စိမ့်ဝင်သွားမတတ် အေးစက်မှုကို ခံစားလိုက်ရလေသည်။

ရုတ်တရက် ကျောက်ရှန်းကျီ မျက်လုံးများကို ဖွင့်လိုက်ပြီး ကျန်းချဲ့ကို ကြည့်ကာ တည်ကြည်သော လေသံဖြင့် ပြောလိုက်လေသည်။

"တာအိုမိတ်ဆွေကျန်း ယင်ယန် မိစ္ဆာမီးတောက်တွေကို အရင်ဆုံး ထုတ်လွှတ်ပေးပါ ပြီးတော့မှ ယင်ယန် ထိုက်ကျိ ပုံသဏ္ဌာန်ကို စတင် လည်ပတ်ပေးပါ"

"ကောင်းပါပြီ"

ကျန်းချဲ့ လုံးဝ တွေဝေနေခြင်းမရှိဘဲ စိတ်အာရုံကို လှုပ်ရှားလိုက်ရာ မျက်ခုံးနှစ်ခုကြားတွင် အဖြူနှင့် အနက်ရောင် နတ်ဘုရားသင်္ကေတ နှစ်ခု စတင် ထွက်ပေါ်လာလေသည်။

နောက်တစ်ခဏတွင်တော့ အဆုံးအစမရှိသော အဖြူနှင့် အနက်ရောင် ယင်ယန် မိစ္ဆာမီးတောက်များက ဂူတစ်ခုလုံးကို ချက်ချင်း ဖုံးလွှမ်းသွားလေတော့သည်။

အလွန် ပြင်းထန်သော အပူရှိန်များ ချက်ချင်း ပြန်လည် မြင့်တက်လာလေသည်။

ကျောက်ရှန်းကျီ၏ ခေါင်းအထက် ဆယ်ပေခန့်အကွာတွင် ဧရာမ ယင်ယန် ထိုက်ကျိ ပုံသဏ္ဌာန်ကြီး တစ်ခု စတင် ပေါင်းစပ် ဖွဲ့စည်းလာပြီး သူမကို ဖုံးလွှမ်းထားလိုက်လေသည်။

ဘေးပတ်ဝန်းကျင်ရှိ ယင်ယန် မိစ္ဆာမီးတောက်များ လည်း ထိုက်ကျိ ပုံသဏ္ဌာန်ကြီး အတွင်းသို့ လျင်မြန်စွာ စုပ်ယူသွားပြီး ယင်နှင့် ယန် စွမ်းအင်များ တဖြည်းဖြည်း အချိုးအစား ညီမျှစပြုလာလေသည်။

ဘေးပတ်ဝန်းကျင်မှ စွမ်းအားများကို ခံစားကြည့်ပြီးနောက် ကျောက်ရှန်းကျီ ၏ မျက်ဝန်းများ ကျဉ်းမြောင်းသွားလေသည်။

'အခုပဲ'

ရင်ထဲတွင် အတွေးတစ်ခု ပေါ်လာသည်နှင့် သူမသည် လုံးဝ တွေဝေနေခြင်းမရှိဘဲ အင်္ကျီလက်ထဲမှ ဝိညာဉ်ကျောက်စိမ်းများဖြင့် ပြုလုပ်ထားသော ကျောက်စိမ်းပုလင်း ခုနစ်လုံးကို ထုတ်ယူလိုက်လေသည်။

ထိုအထဲတွင် သူမ နှစ်ပေါင်းများစွာ အားထုတ် ကြိုးပမ်း၍ စုဆောင်းထားခဲ့သော ထိုက်ယန် ဝိညာဉ်စွမ်းအင် အမျိုးမျိုး ပါဝင်လေသည်။

ဝုန်း...

ကျကွဲသွားသော အသံနှင့်အတူ ကျောက်စိမ်းပုလင်း တစ်လုံး ချက်ချင်း ပေါက်ကွဲသွားပြီး ထိုက်ယန် ဝိညာဉ်စွမ်းအင် တစ်ခု ချက်ချင်း ထွက်ပေါ်လာလေသည်။

ကျောက်ရှန်းကျီ လက်တစ်ချက် ဝှေ့ယမ်းလိုက်ရာ ထို ထိုက်ယန် ဝိညာဉ်စွမ်းအင်သည် သူမ၏ လက်ဖဝါးထဲသို့ ရောက်ရှိသွားလေသည်။

သူမ၏ ဆွဲဆောင်မှုအောက်တွင် ထိုစွမ်းအင်သည် သူမ၏ သွေးကြောမကြီး အောက်ဘက် တစ်လက်မခန့် အကွာသို့ တဖြည်းဖြည်း စီးဝင်သွားလေသည်။ ထိုနေရာသည် သူမ၏ ထိုက်ယင် ရုပ်ခန္ဓာ၏ မူလအနှစ်သာရ တည်ရှိရာ နေရာပင် ဖြစ်သည်။

သို့သော် ထိုက်ယန် ဝိညာဉ်စွမ်းအင် တစ်ခုတည်းက သူမ၏ ခန္ဓာကိုယ်အတွင်းရှိ ထိုက်ယင် ဝိညာဉ်စွမ်းအင်များကို အချိုးအစား ညီမျှစေရန် လုံလောက်မှု မရှိချေ။

ထို့ကြောင့် သူမသည် နောက်ထပ် ကျောက်စိမ်းပုလင်း အများအပြားကို ဆက်တိုက် ရိုက်ခွဲလိုက်ပြီး ထိုက်ယန် ဝိညာဉ်စွမ်းအင်များ အားလုံးကို ခန္ဓာကိုယ် အတွင်းသို့ အဆက်မပြတ် သွင်းယူလိုက်လေသည်။

ကျန်းချဲ့ကတော့ သူ၏ စိတ်ရောကိုယ်ပါ အာရုံစိုက်ကာ ယင်ယန် ထိုက်ကျိ ပုံသဏ္ဌာန်ကြီးကို အသက်သွင်းနေပြီး ကျောက်ရှန်းကျီ အတွက် အချိုးအစား ညီမျှစေမည့် အခွင့်အရေး တစ်ခုကို ရှာဖွေပေးနေလေသည်။

ထို့အပြင် ယင်ယန် မိစ္ဆာမီးတောက်များ ကို အသုံးပြု၍ သူမ၏ ခန္ဓာကိုယ်အတွင်းရှိ ယင်နှင့် ယန် ကို ညီမျှအောင် ကူညီပေးနေလေသည်။

အချိန်များ မျက်တောင်တစ်ခတ်အတွင်း ကုန်ဆုံးသွားပြီး အသက်ရှူ အကြိမ်ရေ တစ်ရာခန့် အကြာတွင် ကျောက်စိမ်းပုလင်း ခုနစ်လုံးစလုံး ကွဲအက်သွားပြီး ထိုက်ယန် ဝိညာဉ်စွမ်းအင်များ အားလုံး ကျောက်ရှန်းကျီ၏ ခန္ဓာကိုယ် အတွင်းသို့ ဝင်ရောက်သွားလေသည်။

သူမ၏ ကိုယ်ပေါ်ရှိ အလင်းတန်းများမှာလည်း ရေခဲရောင် နှင့် မီးတောက်ရောင် တို့ အဆက်မပြတ် အချင်းချင်း ရောယှက် ပြောင်းလဲနေလေသည်။ သို့သော် ထို ညီမျှမှုမှာ အသက်ရှူ အကြိမ်ရေ နှစ်ဆယ်ခန့်သာ ခံနိုင်ရည်ရှိပြီး နောက်ဆုံးတွင်တော့ ရေခဲရောင် အလင်းတန်းများကသာ အပေါ်စီးမှ နေရာယူသွားလေသည်။

ကျောက်ရှန်းကျီ ၏ မျက်နှာထား လုံးဝ မပြောင်းလဲဘဲ သိုလှောင်ကွင်း အတွင်းမှ ရွှေဝါရောင် ကျောက်စိမ်းပုလင်း တစ်လုံးကို ထပ်မံ ထုတ်ယူလိုက်ပြီး လက်ဖြင့် ရိုက်ခွဲလိုက်လေသည်။

အလွန် အစွမ်းထက်သော ထိုက်ယန် ဝိညာဉ်စွမ်းအင် တစ်ခုကို ထပ်မံ ဆွဲယူကာ ချေဖျက် စုပ်ယူလိုက်ပြန်လေသည်။

ကျောက်ရှန်းကျီ တွင် နောက်ထပ် အရန် အစီအစဉ် ရှိနေသေးသည်ကို မြင်သောအခါ ကျန်းချဲ့ လည်း သက်သာရာ ရသွားလေသည်။

အချိန်သိပ်မကြာမီမှာပင် ကျောက်ရှန်းကျီ ၏ ကိုယ်ပေါ်ရှိ အရောင်နှစ်မျိုးလုံး ထပ်မံ ရောယှက်သွားပြီး အချိုးအစား ညီမျှသော အခြေအနေသို့ ပြန်လည် ရောက်ရှိသွားလေသည်။

ဤတစ်ကြိမ် တွင်တော့ အချိန်အတော်ကြာအောင် ခံနိုင်ရည် ရှိပြီး ဆယ့်ငါးမိနစ် ခန့် အကြာမှသာ အလင်းတန်း နှစ်ခုစလုံး ဖြည်းညင်းစွာ ပျောက်ကွယ်သွားပြီး ကျောက်ရှန်းကျီ လည်း ပုံမှန် အခြေအနေ သို့ တဖြည်းဖြည်း ပြန်လည် ရောက်ရှိလာလေသည်။

ယခုအချိန်တွင် ကိစ္စ၏ ထက်ဝက်ခန့် အောင်မြင်သွားပြီဟု ကျန်းချဲ့ ခံစားလိုက်ရလေသည်။

ကျန်ရှိနေသော ထက်ဝက် ကတော့ ကျောက်ရှန်းကျီ အနေဖြင့် ပြင်ပ စွမ်းအားများကို အသုံးပြု၍ သူမ၏ ခန္ဓာကိုယ် အတွင်း စုဆောင်းထားသော ထိုက်ယင် ဝိညာဉ်စွမ်းအင် များကို အမှန်တကယ် အချိုးအစား ညီမျှအောင် လုပ်ဆောင်နိုင်စွမ်း ရှိမရှိ အပေါ်တွင် သာ မူတည်နေလေတော့သည်။

ယခုအခါ ကျောက်ရှန်းကျီ လည်း ကိစ္စကြီး ပြီးမြောက်သွားပြီဟု ခံစားလိုက်ရပြီး ထို စွမ်းအင် နှစ်ခုကို တည်ငြိမ်အောင် ထိန်းသိမ်းကာ ကျန်းချဲ့ ဖန်တီးခဲ့သည့် အတိုင်း ယင်ယန် ပေါင်းစပ် ထိုက်ကျိ ပုံသဏ္ဌာန် ကို ဖန်တီးနိုင်မည် ဆိုပါက သူမ၏ လျှို့ဝှက် အန္တရာယ်များ အားလုံး အခြေခံအားဖြင့် ပြေလည် သွားမည် ဖြစ်လေသည်။

ထိုအခါကျမှသာ ယွမ်ရှန်အဆင့် သို့ တက်လှမ်းပြီး အရှင်သခင် တစ်ပါး ဖြစ်လာမည် ဖြစ်လေသည်။

သို့သော် အချိန်များ တရွေ့ရွေ့ ကုန်ဆုံးသွားသည်နှင့်အမျှ ကျောက်ရှန်းကျီ ၏ မျက်နှာထား ရုတ်တရက် ပြောင်းလဲသွားလေသည်။

သူမ၏ ခန္ဓာကိုယ် အတွင်းရှိ ထိုက်ယင် ဝိညာဉ်စွမ်းအင် များမှာ သူမ ထင်မှတ်ထားသည်ထက် ပိုမို ကြောက်စရာ ကောင်းနေပြီး သူမ၏ ရုပ်ခန္ဓာ အနက်ရှိုင်းဆုံး နေရာမှနေ၍ ဆန့်ကျင်ဘက် ပြုလုပ်လာကြောင်း တွေ့လိုက်ရလေသည်။

ရုတ်တရက် ခန္ဓာကိုယ် အတွင်းသို့ ဝင်ရောက်လာသော ထိုက်ယန် ဝိညာဉ်စွမ်းအင် များကို အကြီးအကျယ် တွန်းကန် လာလေသည်။

အဆိုးရွားဆုံးသော အခြေအနေ ကြီး အမှန်တကယ် ဖြစ်ပေါ်လာခဲ့လေပြီ။

ကျောက်ရှန်းကျီ ၏ ကိုယ်ပေါ်ရှိ အလင်းတန်း နှစ်ခုလုံး ရုတ်တရက် အလွန် တောက်ပလာပြီး အထူးသဖြင့် ရေခဲရောင် ထိုက်ယင် ဝိညာဉ်စွမ်းအင် များက အဆက်မပြတ် ထွက်ပေါ်လာရာ သူမ၏ မျက်ခုံး နှစ်ဖက် တွင်ပင် ရေခဲလွှာ များ ဖုံးလွှမ်း လာလေသည်။

ကျန်းချဲ့ ဤမြင်ကွင်းကို မြင်လိုက်ရသောအခါ ချက်ချင်းပင် ယင်ယန် ထိုက်ကျိ ပုံသဏ္ဌာန်ကြီး ၏ လည်ပတ်မှုကို အရှိန်မြှင့် လိုက်လေသည်။

သို့သော် ကျန်းချဲ့ ၏ အစွမ်းကုန် ဖိနှိပ်မှု များက ကျောက်ရှန်းကျီ ၏ ခန္ဓာကိုယ် အတွင်းရှိ ယင်နှင့် ယန် ကို ညီမျှသွားစေခြင်း မရှိဘဲ ပို၍ပင် ပြင်းထန်သော ပြောင်းပြန် ရိုက်ခတ်မှု များကို သာ ဖြစ်ပေါ်လာစေခဲ့လေသည်။

ဤအချိန်တွင် သူမ၏ တစ်ကိုယ်လုံး မှ အလွန် အေးစက်သော အငွေ့အသက် များ ထွက်ပေါ် နေလေသည်။

ကျောက်ရှန်းကျီ သွားကို တင်းတင်း ကြိတ်ထားပြီး မျက်နှာထား မှာ အလွန် ကြည့်ရဆိုး နေလေသည်။

သူမ ဤမျှလောက် အများကြီး ပြင်ဆင် ထားခဲ့သည် တောင်မှ ယင်နှင့် ယန် ကို အချိုးအစား ညီမျှအောင် မလုပ်နိုင် လိမ့်မည် ဟု လုံးဝ ထင်မှတ် မထားခဲ့ချေ။

အကြောင်းမူကား သူမ စုဆောင်း ထားခဲ့သော အခြေခံအုတ်မြစ် များမှာ အလွန် အစွမ်းထက် လွန်းနေပြီး ထို ထိုက်ယန် ဝိညာဉ်စွမ်းအင် များမှာ လုံးဝ မလုံလောက် သောကြောင့် ပင်ဖြစ်သည်။

အကယ်၍ လုံလောက် မည် ဆိုလျှင်တောင် မှ ညီမျှအောင် လုပ်ဆောင်ရန် အလွန် ခက်ခဲပြီး ပို၍ ပြင်းထန်သော ပြောင်းပြန် ရိုက်ခတ်မှု များကို သာ ခံစားရမည် ဖြစ်လေသည်။

ခန္ဓာကိုယ် ပေါက်ကွဲ ကာ သေဆုံး သွားသည် အထိ ပင် ဖြစ်နိုင်လေသည်။

မဟုတ်သေးဘူး... တိတိကျကျ ပြောရမည် ဆိုလျှင် သူမ ယခု အချိန်တွင် ဆက်လက် ၍ အချိုးအစား ညီမျှအောင် ကြိုးစား နေမည် ဆိုပါက ခန္ဓာကိုယ် ပေါက်ကွဲ ကာ သေဆုံး သွားရန် သာ ရှိတော့လေသည်။

ဤကိစ္စ အတွက် ကျောက်ရှန်းကျီ ၏ ရင်ထဲတွင် အလွန် မကျေမနပ် ဖြစ်နေမိလေသည်။ သို့သော် ပြဿနာ မှာ သူမ ယခု အချိန်တွင် အသက်ရှင် ချင်သေးသည် ဆိုပါက ယခင်က ကျန်းချဲ့ အကြံပြု ထားသော ဒုတိယ နည်းလမ်း ကိုသာ အသုံးပြု ရတော့မည် ဖြစ်လေသည်။

စွမ်းအင်များကို ဖယ်ထုတ် ပစ်ရန် ပင်တည်း။

အလွန် များပြားလှသော ထိုက်ယင် ဝိညာဉ်စွမ်းအင် များကို ဖယ်ထုတ် ပစ်မှ သာ သူမ ကို ပြန်လည် ညီမျှသော အခြေအနေ သို့ ရောက်ရှိ စေနိုင်မည် ဖြစ်လေသည်။

သို့သော် ဤသို့ လုပ်ဆောင် လိုက်ပါက နောင်တစ်ချိန် တွင် သိုင်းသူတော်စင် အဆင့် သို့ တက်လှမ်း ချင်ပါက ထို အခြေခံအုတ်မြစ် မျိုး မရှိတော့ သဖြင့် အခွင့်အရေး မှာ အလွန် နည်းပါး သွားမည် ဖြစ်လေသည်။

သို့သော် ယခု အချိန်တွင် သူမ မရွေးချယ် ပါက သေလမ်း သာ ရှိလေတော့သည်။

ဤအချက်ကို တွေးမိသောအခါ ကျောက်ရှန်းကျီ က ကျန်းချဲ့ ကို ရုတ်တရက် လှမ်းကြည့် လိုက်ပြီး တည်ကြည်သော လေသံ ဖြင့် ပြောလိုက်လေသည်။

"တာအိုမိတ်ဆွေကျန်း ကျမ ခန္ဓာကိုယ် ထဲက ထိုက်ယင် ဝိညာဉ်စွမ်းအင် တွေကို ကူညီပြီး ဖယ်ထုတ်ပေးပါ”