အခန်း ၄၅၈

အခန်း။ ၄၅၈

ထိုစွမ်းအင်တန်းသည် သူမ၏ သုံးဆင့်ပြောင်းလဲခြင်း ဒိုင်းနှင့် ထိခိုက်မိသည်နှင့် တစ်ပြိုင်နက် ရာနှင့်ချီသော မီတာအတွင်းရှိ အဆောက်အအုံတိုင်းကို ဖျက်ဆီးပစ်လိုက်ပြီး မိစ္ဆာတို့၏ အစိတ်အပိုင်းများမှာ လေထဲတွင် ပြန့်ကျဲသွားတော့သည်။

ရွှီရန်၏ အကာအကွယ်အောက်တွင် ရှိနေသော အံ့ဖွယ်အဖွဲ့ဝင်များမှာမူ တစ်စုံတစ်ရာ ထိခိုက်မှု မရှိခဲ့ပေ။

ထိုလေဆာတန်းသည် တစ်မိနစ်ခန့် ဆက်လက် တောက်ပနေခဲ့သည်။

အားလုံးက ထိုအတိုင်း ဆက်ဖြစ်နေမည်ဟု ထင်မှတ်နေချိန်တွင် လေဆာတန်းမှာ ရုတ်တရက် ပျောက်ကွယ်သွားသည်။

ထိုအချိန်တွင် ဘုရားသခင်အဆင့် ပိုးကောင်မှာ ပါးလွှာသော မီးခိုးငွေ့အဖြစ် ပြောင်းလဲသွားပြီး လေထဲတွင် ပြာအဖြစ် လွင့်ပါးပျောက်ကွယ်သွားသည်။

"ဟင်"

ထိုမြင်ကွင်းကို မြင်လိုက်ရသောအခါ အားလုံးမှာ နားမလည်နိုင်စွာ ဖြစ်သွားကြသည်။

သို့သော် ဤတစ်ကြိမ်တွင် တန်ချီချီ အနိုင်ရရှိသွားပြီ ဖြစ်ကြောင်း သူတို့ သိလိုက်ကြသည်။

မီးခိုးငွေ့များ ကင်းစင်သွားသောအခါ တန်ချီချီမှာ ဒဏ်ရာ အနည်းငယ်သာ ရရှိထားပြီး မြေပြင်ပေါ်တွင် ခိုင်မာစွာ ရပ်တည်နေသည်။

ထိုမြင်ကွင်းကို မြင်သောအခါ ကွမ်ရှင်းက ကုသပေးနိုင်သော ငွေရောင် မြက်ကို တန်ချီချီ၏ ခန္ဓာကိုယ်ပေါ်တွင် အသုံးပြုလိုက်ရာ ဒဏ်ရာများမှာ ခဏချင်းပင် ပျောက်ကင်းသွားသည်။

"ချီချီ ဘယ်လိုလုပ်လိုက်တာလဲ"

ကျားမလေးက စိတ်ဝင်တစား မေးသည်။

ကျားမလေးသာမက အခြားသူများလည်း စိတ်ဝင်တစား ရှိနေကြသည်။

'မဖြစ်နိုင်တာ...

ဘာဖြစ်လို့ သူမက ဒဏ်ရာ အနည်းငယ်ပဲ ရပြီး ဟို ဘုရားသခင်အဆင့် ပိုးကောင်ကြီးကျမှ ကိုယ့်ဘာသာကိုယ် အပိုင်းပိုင်းအစစ ပျက်စီးသွားရတာလဲ…

ဒါ ဘယ်လိုလုပ် ဖြစ်နိုင်မှာလဲ...'

တန်ချီချီက ပြုံးလျက် "ကျွန်မရဲ့ သုံးဆင့်ပြောင်းလဲခြင်း ဒိုင်းမှာ တန်ပြန်တိုက်ခိုက်တဲ့ သက်ရောက်မှု ရှိတယ်လေ"

"အဲဒီ ဘုရားသခင်အဆင့် ပိုးကောင်က သူ့ရဲ့ ကိုယ်ပိုင် တိုက်ခိုက်မှုနဲ့ သူပြန်သေသွားတာပါ"

အဖွဲ့ဝင်များမှာ တန်ချီချီအပေါ် ဒေါသတကြီး ပုံအော တိုက်ခိုက်နေသည့် ပိုးကောင်၏ ရူးသွပ်နေသော အမူအရာကို ပြန်လည် မြင်ယောင်မိကြသည်။

သို့သော် ကံမကောင်းစွာဖြင့် သူသည် သူကိုယ်တိုင် ပစ်လွှတ်လိုက်သော တိုက်ခိုက်မှုကြောင့်ပင် သေဆုံးသွားခဲ့ရသည်။

ရွှီရန်က တန်ချီချီ၏ ပုခုံးကို ခပ်ဖွဖွ ပုတ်ပေးလိုက်ပြီး "ကောင်းတယ် ရန်သူ့ကို မထင်မှတ်တဲ့ အချိန်မှာ တန်ပြန် တိုက်ခိုက်တာက အရမ်းကောင်းတယ်" ဟု ပြောသည်။

"တစ်စုံတစ်ယောက်က မင်းရဲ့ သုံးဆင့်ပြောင်းလဲခြင်း ဒိုင်းရဲ့ သက်ရောက်မှုကို မသိဘဲ မိုက်မိုက်ကန်းကန်း တိုက်ခိုက်လာရင် သူတို့ သေချာပေါက် အကြီးအကျယ် ဒုက္ခရောက်မှာပဲ"

စကားပြောပြီးနောက် ရွှီရန်၏ အကြည့်မှာ နင်းရွှမ်ဆီသို့ ရောက်သွားပြီး "နင်းရွှမ် မင်းအလှည့်ပဲ" ဟု ပြောသည်။

နင်းရွှမ်မှာ အသင့်ပြင်ထားပြီး ဖြစ်သည်။

ကိုးဆင့်ရှိသော မြင့်မြတ်သော နဂါးတံဆိပ်က သူမကို အစွမ်းမြှင့်တင်ပေးလိုက်ရာ သူမ၏ အရှိန်အဝါ၊ သွေးစွမ်းအင်နှင့် ရုပ်ပိုင်းဆိုင်ရာ စွမ်းအားများမှာ မြင့်တက်လာသည်။

သူမ ပြင်ဆင်ပြီးသည်နှင့် ဘုရားသခင်အဆင့် ပိုးကောင်မှာ ပြန်လည် ရှင်သန်လာသည်။

သူသည် အလွန်တရာ စိတ်ဓာတ်ကျနေသည်။

'ကိုယ် ကိုယ်တိုင်ပစ်လိုက်တဲ့ တိုက်ကွက်ကြီးနဲ့တင် ကိုယ့်ဘာသာကိုယ် ပြန်သေရလိမ့်မယ်လို့ ဘယ်သူကများ စိတ်ကူးယဉ်ဖူးမှာလဲ...

အဲဒီလို သေပြီးခါမှလည်း မသေသေးဘဲ အရှက်တကွဲ ပြန်ရှင်လာရသေးတယ်...'

'ဒီလောက်အထိ အရှက်ရဖို့ကောင်းပြီး သိက္ခာကျတဲ့ အခြေအနေမျိုးကို... ဘယ်လိုလူကများ မျက်နှာပြောင်ပြောင်နဲ့ သည်းခံနိုင်မှာလဲ...'

သူက စူးရွားစွာ ဆဲဆိုရန် ပြင်လိုက်စဉ်မှာပင် နင်းရွှမ်မှာ သူ၏ ရှေ့သို့ ရောက်နေနှင့်ပြီ ဖြစ်သည်။

ချက်ချင်းဆိုသလိုပင် ကွမ်ရှင်း ရှာဖွေပေးထားသည့် အသက်အန္တရာယ်ရှိသော အချက်အချာနေရာကို သူမက ထိုးနှက်လိုက်သည်။

တစ်ခဏအတွင်းမှာပင် ဘုရားသခင်အဆင့် ပိုးကောင်၏ ခန္ဓာကိုယ်မှာ အပိုင်းပိုင်း ကွဲထွက်သွားသည်။

ထို့နောက် နင်းရွှမ်မှာ ရွှီရန်၏ ဘေးသို့ ပြန်လည် ရောက်ရှိလာသည်။

ရွှီရန်က ချီးကျူးလိုက်သည်မှာ "ကောင်းတယ် အသင်းဖော်တွေ ဖန်တီးပေးတဲ့ အခွင့်အရေးကို ဘယ်လို သုံးရမလဲဆိုတာ ကောင်းကောင်း သိတာပဲ"

ရွှီရန်သည် နင်းရွှမ်၏ နည်းလမ်းကို လုံးဝ အပြစ်မဆိုပေ။

မည်သို့ဆိုစေ သူမမှာ အထောက်အကူပြုသူတစ်ဦးသာ ဖြစ်ပြီး မြင့်မြတ်သော နဂါးတံဆိပ်က အခြေခံအရိုးကိုသာ အားဖြည့်ပေးနိုင်သည်။

ထို့ကြောင့် အသင်းဖော်များ ဖန်တီးပေးထားသော အခွင့်အရေးကို အသုံးပြု၍ ရန်သူကို ထိခိုက်မှု ဖြစ်စေခြင်းမှာ အကောင်းဆုံး နည်းလမ်းပင်။

ရွှီရန်၏ ချီးကျူးစကား အဆုံးတွင် ဘုရားသခင်အဆင့် ပိုးကောင်မှာ ထပ်မံ၍ ပြန်လည် ရှင်သန်လာပြန်သည်။

ယခုတစ်ကြိမ်တွင်မူ သူသည် သည်းခံနိုင်စွမ်း၏ အဆုံးစွန်သို့ ရောက်ရှိသွားပြီ ဖြစ်သည်။

"ငါက... မှိုမြို့တော်ရဲ့ မြို့စားကြီး၊ ကပ်ဘေးအဆင့် ညစ်ညမ်းမှုဇုန်ရဲ့ အရှင်သခင်၊ ဘုရားသခင်အဆင့် ကျင့်ကြံသူပဲ...

ပြီးတော့ ခေါင်းသုံးလုံးပါ မြွေနတ်ဆိုးရဲ့ အသစ္စာအရှိဆုံး နောက်လိုက်..."

"မင်းတို့လို အဆင့်နိမ့် လူသားတွေရဲ့ စော်ကားမှုကိုတော့... ငါ ဘယ်တော့မှ ခေါင်းငုံ့ခံမှာ မဟုတ်ဘူး..."

ထိုစကားနှင့်အတူ ဧရာမ ပိုးကောင်ကြီး၏ အရိပ်ပုံရိပ်မှာ မှိုမြို့တော်တစ်ခုလုံးကို လွှမ်းခြုံသွားသည်။

တစ်ချိန်တည်းမှာပင် ပူဇော်ရာ နေရာရှိ အစိမ်းရင့်ရောင် ကျောက်တိုင်များမှ အလင်းတန်းများ ထွက်ပေါ်လာပြီး အဆုံးမရှိသော ညစ်ညမ်းမှုများကို စုပ်ယူလိုက်သည်။

"သေရရင်တောင် ငါ မင်းတို့ ပုရွက်ဆိတ်တွေကို ဒီမှာ သတ်ပစ်မယ်"

ထိုစကားနှင့်အတူ သူ၏ ကိုယ်ခန္ဓာအတွင်း စုဝေးနေသော ညစ်ညမ်းမှုများမှာ ပေါက်ကွဲထွက်လာတော့သည်။

ထိုညစ်ညမ်းမှုများကြောင့် ပိုးကောင်၏ ကိုယ်ပေါ်တွင် အဖုအပိမ့်များ ထွက်လာပြီး လင်းပိုင်မြွေကဲ့သို့ အနက်ရောင် အငွေ့အသက်များ ထွက်ပေါ်လာသည်။

ထိုမြင်ကွင်းကို မြင်သောအခါ ရွှီရန်က "သူ ကိုယ့်ကိုကိုယ် ဖောက်ခွဲတော့မယ်" ဟု သတိပေးလိုက်သည်။

ထို့နောက် သူက ရှေ့သို့ တစ်လှမ်းတိုးလိုက်ပြီး "ကိုယ့်ကိုကိုယ် ဖောက်ခွဲချင်တာလား ငါ့ကို အရင် ခွင့်တောင်းရဲ့လား" ဟု ပြောသည်။

ရွှီရန်၏ အသံမှာ ပိုးကောင်၏ နားသို့ ရောက်ရှိသွားရာ သူက လှောင်ပြောင်ကာ ရယ်မောလိုက်သည်။

"ဟားဟား ယွဲ့အဆင့် ပုရွက်ဆိတ် တစ်ကောင်တည်းနဲ့ ငါ့ကို တားနိုင်မယ်လို့ ထင်နေတာလား"

"မင်း ငါ့ကို လုံးဝ သတ်နိုင်တဲ့ စွမ်းအား ရှိတယ်လို့ တကယ် ယုံနေတာလား"

"မင်း သူတစ်ပါးကို လှည့်စားနိုင်ပေမဲ့ ကိုယ့်ကိုယ်ကိုတော့ လှည့်စားမနေနဲ့"

ကိုယ်ခန္ဓာ ဖောင်းပွနေသဖြင့် ပိုးကောင်၏ စကားများမှာ မပီမသ ဖြစ်နေသည်။

ရွှီရန်က အနည်းငယ် ပြုံးလျက် "ငါပြောတဲ့ စကားတွေက မမှန်ဘူးဆိုတာ မင်း ဘယ်လို သိတာလဲ" ဟု ပြောလိုက်သည်။

ထို့နောက် သူက လက်ဖဝါးကို ဓားသွားကဲ့သို့ လှုပ်ရှားလိုက်ရာ ပြတ်သားသော ဓားရောင်ခြည်များ ပေါက်ကွဲထွက်လာသည်။

"စူပါ ပေါက်ကွဲမှု အားပြင်းဓားချက်"

ရွှီရန် တိုးညင်းစွာ ရွတ်ဆို လိုက်သည်။

တစ်ခဏအတွင်းမှာပင် ဖောင်းပွနေသော ပိုးကောင်မှာ အပိုင်းပိုင်း ကွဲထွက်သွားပြီး အဆုံးမရှိသော ဖျက်ဆီးခြင်း အရှိန်အဝါများမှာ အပိုင်းအစများကြားတွင် လှည့်လည်သွားကာ ညစ်ညမ်းမှုများကို အစအနမကျန်အောင် ဖျက်ဆီးပစ်လိုက်သည်။

ညစ်ညမ်းမှုများ ကင်းစင်သွားသောအခါ ပိုးကောင်၏ အပိုင်းအစများမှာ မြေပြင်ပေါ်သို့ ပြုတ်ကျလာသည်။

တစ်ချိန်တည်းမှာပင် ကောင်းကင်ရှိ ညစ်ညမ်းမှုများမှာလည်း ပျောက်ကွယ်သွားပြီး ပူဇော်ရာ နေရာသို့ ပြန်လည် စီးဝင်သွားသည်။

ရွှီရန်၏ ဓားချက်ဖြင့် အပိုင်းပိုင်း ဖြစ်သွားသော ပိုးကောင်၏ အစိတ်အပိုင်းများမှာ သွေးအိုင်အဖြစ် ပြောင်းလဲသွားကာ မြေကြီးထဲသို့ စိမ့်ဝင်သွားသည်။

တစ်ချိန်တည်းမှာပင် ရွှေရောင် အလင်းတန်း တစ်ခုမှာ ရွှီရန်၏ ကိုယ်ခန္ဓာထဲသို့ ပေါင်းစပ်ဝင်ရောက်သွားသည်။

ထို့ကြောင့် မှိုမြို့တော်၏ မြို့စားကြီးမှာ အပြီးတိုင် ကျဆုံးသွားခဲ့ရလေပြီ။

ရွှီရန်၏ စကားများ မှန်သည်ဖြစ်စေ၊ မှားသည်ဖြစ်စေ သေလွန်ပြီးနောက် မသေမျိုး အရှင်သခင်နှင့် တွေ့ဆုံသောအခါ အဖြေကို သိရလိမ့်မည်ပင်။

[ဂုဏ်ယူပါတယ်။ သင်သည် မြင့်မြတ်သော မူလအစ ၁ စက်ကို ရရှိခဲ့သည်။ စုစုပေါင်း မြင့်မြတ်သော မူလအစ ၃၁ စက်]

စိတ်ထဲမှ အသံကို ကြားသောအခါ ရွှီရန်မှာ ကျေနပ်စွာ ခေါင်းညိတ်လိုက်သည်။

သွေးစွမ်းအင် ၁၉ သန်းရှိသော ဘုရားသခင်အဆင့် သတ္တဝါ တစ်ကောင်အတွက် မြင့်မြတ်သော မူလအစတစ်စက် ရရှိခြင်းမှာ အလွန်ကောင်းမွန်သော ရလဒ်ဖြစ်သည်။

ဤရလဒ်အတွက် သူ ကျေနပ်မိသည်။

ထို့အပြင် ကပ်ဘေးအဆင့် ညစ်ညမ်းမှုဇုန်အတွင်းတွင် ဘုရားသခင်အဆင့် သတ္တဝါများစွာ ရှိနေသေးသဖြင့် မြင့်မြတ်သော မူလအစမှာ လိုအပ်ချက် ရှိမည် မဟုတ်ပေ။

အဖွဲ့ဝင်များမှာလည်း ပိုးကောင်၏ အပြီးတိုင် ကျဆုံးသွားသည်ကို မြင်သောအခါ ရွှီရန်၏ ဘေးတွင် စုရုံးလာကြသည်။

ကျားမလေးက သူ၏ ခေါင်းကို မနာလိုစွာဖြင့် ကြည့်ရင်း "အစ်ကိုကြီး ကျွန်မလည်း ဘုရားသခင်အဆင့် သတ္တဝါတွေကို အပြီးတိုင် သတ်ပစ်ချင်တယ်" ဟု ပြောသည်။

ပြန်လည် ရှင်သန်နိုင်စွမ်းရှိသော သတ္တဝါများနှင့် တွေ့တိုင်း သူတို့မှာ ရွှီရန်၏ အပြီးသတ် အသတ်ချက်ကိုသာ မှီခိုနေရသည်။

အခြားသူများတွင် ထိုကဲ့သို့သော စွမ်းရည်မျိုး မရှိပေ။

ကျားမလေး၏ အတွေးကို နားလည်သော ရွှီရန်က သူမ၏ ခေါင်းကို ပုတ်ကာ နှစ်သိမ့်ပေးလိုက်သည်။

"မင်းလည်း ဖြည်းဖြည်းချင်း လမ်းစ ရှာကြည့်ပါဦး"