အခန်း ၈၄၄

အခန်း ( ၈၄၄ ) နတ်ဘုရား၏ မိစ္ဆာအတွေးများ၊ ခက်ခဲသောအလုပ်တာဝန်၊ လင်ယွမ်နှင့် တစ်ဖွဲ့တည်း နေရာကျသည်။

"အဇူရာဧကရာဇ်က သူ့ခန္ဓာကိုယ်ကို ကမ္ဘာအဖြစ် ပြောင်းလဲပြီး နယ်နိမိတ် ကွာဟချက်ကို ပိတ်ဆို့ထားတာကြောင့် သဘာဝအတိုင်း ကန့်သတ်ချက်တွေ ရှိပါတယ်"

"ဒါက အဓိပဓိနယ်ပယ်အောက်က လူတွေပဲ ရှန်းရွှီကမ္ဘာကို ဝင်ရောက်နိုင်တာပဲ"

"တစ်နည်းအားဖြင့် ရှန်းရွှီကမ္ဘာမှာ အသန်မာဆုံးက အဓိပဓိတစ်ပိုင်းပဲ ဖြစ်ရမယ်"

"ဒါက တိုင်းတပါးက အဓိပဓိနယ်ပယ်အထက် ကျွမ်းကျင်သူတွေ မဝင်ရောက်နိုင်အောင် တားမြစ်ထားခဲ့တာ"

"တိုင်းတပါးရဲ့ အဓိပဓိတစ်ပိုင်းတို့ ခိုးဝင်ချင်ရင်တောင် စိုးရိမ်စရာ မလိုဘူး။ သူတို့တွေ တိုက်ရိုက် သတ်ခံရလိမ့်မယ်"

အမာရွတ်လေးခု သခင်ကြီးက ပြောလိုက်သည်။

ဤတော့မှ ကျွင်းရှောင်ယောက်လည်း သူ့ကို အမာရွတ်လေးခုသခင်ကြီးက ဘာကြောင့် အလွန်အလေးအထားမှန်း ရုတ်တရက် နားလည်သွားသည်။

ဤသည်မှာ သူက ကျေးဇူးရှင်၏သားဖြစ်သောကြောင့်မျှသာ မဟုတ်ပါ။

ကျွင်းရှောင်ယောက်က မဟာသူတော်စင်သာ ဖြစ်သေးသော်လည်း အဓိပဓိတစ်ပိုင်းနှင့် တိုက်ခိုက်နိုင်သည်။

ရှန်းရွှီကမ္ဘာအတွင်း၌ သူက ဆရာကြီးအဆင့် တည်ရှိမှုတစ်ခု ဖြစ်၏။

မဟာသူတော်စင်နယ်ပယ်တွင်ရှိသော ကျွင်းရှောင်ယောက်က အဓိပဓိတစ်ပိုင်းနှင့်ယှဉ်နိုင်သော တိုက်ခိုက်ရေးစွမ်းအားဖြင့် ပေါက်ကွဲလာသောအခါ စိတ်ကူးကြည့်နိုင်သည်။

တိုင်းတပါးမှ ထိုသတ္တဝါများ...

လွန်စွာ မခံမရပ်နိုင် ဖြစ်ရလိမ့်မည်။

အမာရွတ်လေးခု သခင်ကြီးက ဆက်ပြောသည်။

"နတ်ဘုရားရဲ့ မိစ္ဆာအတွေးကို မင်းတို့ သိကြရဲ့လား"

"ကျုပ်သိပါတယ်၊ နတ်ဘုရားရဲ့ မိစ္ဆာအတွေးက ဧကရာဇ်အဆင့် တန်ခိုးကြီးတဲ့ အတွင်းစိတ်နတ်ဆိုးနဲ့ စွဲလမ်းမှု‌တွေပဲ။ ဧကဂာဇ်တွေ ကျဆုံးတဲ့အခါ သူတို့ မွေးလာနိုင်ချေ အင်မတန်များတယ်"

ပါရမီရှင်တစ်ဦးက ပြောလိုက်၏။

"ဟုတ်ပါတယ်၊ အဇူရာဧကရာဇ်က အင်မတန် ကြီးမြတ်တယ်။ သူက သူ့ခန္ဓာကိုယ်နဲ့ ကမ္ဘာကြီးအဖြစ် အသွင်ပြောင်းပြီး နယ်စပ်ရဲ့ အက်ကြောင်းကိုတောင် ပိတ်ဆို့ထားခဲ့တာ။ ဒါပေမဲ့ သူ့မှာလည်း အစွဲအလမ်းမကင်းဘူး"

"ရှန်းရွှီကမ္ဘာမှာ၊ အဇူရာဧကရာဇ်ရဲ့ နတ်ဘုရား မိစ္ဆာအတွေး ခုနစ်ခု ကျန်ရစ်ခဲ့တယ်။ ဒီအတွေးခုနစ်ခုက မတူညီတဲ့ လျှို့ဝှက်နေရာတွေမှာ တံဆိပ်ခတ်ထားတာ"

"ဒီနတ်ဘုရားရဲ့ မိစ္ဆာအတွေး ခုနစ်ခုသာ လွတ်မြောက်ပြီး တစ်ခုတည်းအဖြစ် ပေါင်းစည်းသွာရင် ကြောက်စရာကောင်းတဲ့ အပြစ်သားအဖြစ် ပြောင်းလဲသွားပြီး ရှန်းရွှီကမ္ဘာကို ပြိုကျစေလိမ့်မယ်"

"တိုင်းတပါးသားတွေလည်း ဒီချို့ယွင်းချက်ကို ရှာတွေ့သွားပြီလေ။ ဒါကြောင့် သူတို့က မိစ္ဆာအတွေးခုနစ်ခုရဲ့ တည်နေရာကို ရှာဖွေပြီး လွှတ်ပေးကြဖို့ ပြင်ဆင်နေကြတယ်"

"မင်းတို့ရဲ့တာဝန်က နတ်ဘုရားရဲ့ မိစ္ဆအတွေးတွေကို တတ်နိုင်သမျှ ပိတ်ဆို့တားဆီးဖို့ပဲ။ မင်းတို့ တတ်နိုင်လို့ မိစ္ဆာအတွေးကို ဖယ်ရှားပစ်နိုင်ရင် အကောင်းဆုံးပဲ"

အမာရွတ်လေးခုသခင်ကြီးက ပြောလိုက်သည်။

ထိုအခါ ယွီဟွာဝမ်က ရှေ့သို့လှမ်းပြီး လက်ယှက်၍ ပြောလိုက်၏။

"အကြီးအကဲ၊ ခင်ဗျား ကျုပ်တို့ကို နောက်နေတာလား။ မိစ္ဆာအတွေးက အရမ်းအစွမ်းထက်ပြီး ကြောက်စရာကောင်းတယ်။ အဲဒါတွေကို ကျုပ်တို့က ဘယ်လို ရှင်းပစ်နိုင်မှာလဲ"

ယွီဟွာဝမ်၏ မေးခွန်းက မေးသင့်သောကြောင့် ပါရမီရှင်များစွာ ခေါင်းညိတ်လိုက်ကြသည်။

ဧကရာဇ်တစ်ပါး၏ နတ်ဘုရားအတွေးက အလွန်ကြောက်စရာကောင်းသည်။ အနည်းဆုံး ဧကရာဇ်တစ်ပိုင်းအဆင့် ကပ်ဆိုးတစ်ခု ဖြစ်စေလောက်အောင် ကြောက်စရာကောင်း၏။

သူတို့ကဲ့သို့ လူငယ်လေးများက နတ်ဘုရားအတွေးကို မည်သို့ ဖျက်စီးနိုင်မည်နည်း။

အမာရွတ်လေးခု သခင်ကြီး ပြောလိုက်သည်။

"ကိစ္စမရှိပါဘူး၊ ရှန်းရွှီကမ္ဘာမှာ အဇူရာဧကရာဇ် ချန်ထားခဲ့တဲ့ လောကစည်းမျဉ်းတွေရှိတယ်။ နတ်ဘုရားရဲ့ မိစ္ဆာအတွေးတွေ လွတ်မြောက်လာရင်တောင် အလွန်ဆုံး အဓိပဓိတစ်ပိုင်းအဆင့် စွမ်းအားကိုပဲ ထုတ်လွှတ်နိုင်မှာ"

"ဒါပေမဲ့ မိစ္ဆာအတွေးခုနစ်ခု ပေါင်းစုံသွားရင်တော့ ပြီးပြည့်စုံတဲ့ မိစ္ဆာအတွေးပေါ်လာပြီး ရှန်းရွှီကမ္ဘာရဲ့ နိယာမတွေကို ဖျက်ဆီးပစ်နိုင်လိမ့်မယ်"

လူတိုင်း နားလည်သွားကြ၏။

ဤစမ်းသပ်မှုက တိုင်းတပါးသတ္တဝါများကို တိုက်ခိုက်ခြင်းသက်သက်မဟုတ်ပါ။

တိုင်းတစ်ပါးမှ တိုင်းတပါးသားများ မိစ္ဆာအတွေးများ၏ တံဆိပ်ကို ဖျက်ဆီးခြင်းမှ တားဆီးရန်မှာ ပိုအရေးကြီးသည်။

မိစ္ဆာအတွေးများကို ဖျက်ဆီးနိုင်ပါက အကောင်းဆုံး ဖြစ်၏။

သို့သော်လည်း မိစ္ဆာအတွေးများက အဓိပဓိတစ်ပိုင်းအဆင့်အထိ ဖိနှိပ်ခံထားရလျှင်ပင်...

၎င်းက ဒဏ္ဍာရီလာဧကရာဇ်၏ စွဲလမ်းမှုတစ်ခုအဖြစ် ကျန်ရှိနေဆဲဖြစ်ပြီး အဓိပဓိတစ်ပိုင်း ကျွမ်းကျင်သူအများစု ရင်ဆိုင်နိုင်တာ မဟုတ်ပေ။

၎င်းကိုဖယ်ရှားရန် ကြိုးစားခြင်းက စိတ်ကူးယဉ်နေသကဲ့သို့ ဖြစ်သည်။

သို့ဖြစ်ပေရာ၊ သူတို့ လုပ်နိုင်တာက တိုင်းတပါး၏ အကြံအစည်များ မအောင်မြင်စေရန် တားဆီးရန်သာ ဖြစ်တော့သည်။

လေထုက လေးလံပြီး အနည်းငယ် စိတ်ပျက်စရာ ဖြစ်လာခဲ့သည်။

တိုင်းတပါး သတ္တဝါများနှင့် ရင်ဆိုင်ရခြင်းကပင် အလွန်အန္တရာယ်များနေပြီ။

ယခုကဲ့သို့ မိစ္ဆာအတွေးခုနစ်ခုကို ပေါင်းထည့်လိုက်ပါက...

သမိုင်းတွင် အရက်စက်ဆုံးနှင့် အခက်ခဲဆုံးသော စမ်းသပ်မှုဟုပင် ခေါ်နိုင်သည်။

"အင်း၊ မင်းတို့ ထိတ်လန့်နေစရာ မလိုပါဘူး။ ဒီကာကွယ်သူမိသားစုတေံက စစ်သူရဲတွေလည်း မင်းတို့နဲ့အတူ လိုက်လာလိမ့်မယ်"

လေထုက လေးလံလာသည်ကို ခံစားမိသောအခါ အမာရွတ်လေးခု သခင်ကြီးက အနည်းငယ်ပြုံးပြီး ပြောလိုက်သည်။

ဤတော့မှ ပါရမီရှင်အားလုံး၏ မျက်နှာများက ပို၍ ကြည်လင်လာကြသည်။

ထိုစစ်သူရဲခေါင်းဆောင်အားလုံးက အဓိပဓိတစ်ပိုင်း ကျင့်ကြံခြင်းအခြေခံ ရှိ၏။

ဤစစ်သူရဲများက မိစ္ဆာအတွေးကို ရင်ဆိုင်ရန် အဓိကထားနေကြသော အဖွဲ့များဖြစ်ကြောင်း ထင်ရှားသည်။

"အခု ငါ နာမည်ခေါ်လိုက်တဲ့ ပါရမီရှင်တွေ ရှေ့ကို ထွက်လာခဲ့ကြချေ"

အမာရွတ်လေးခု သခင်ကြီးက ပြောလိုက်သည်။

အားလုံး အံ့ဩသွား၏။ ဘာများ ထပ်ဖြစ်ပြန်သနည်း။

"ကျွင်းရှောင်ယောက်"

အမာရွတ်လေးခု သခင်ကြီး ပထမဆုံး ခေါ်လိုက်သူမှာ ကျွင်းရှောင်ယောက် ဖြစ်သည်။

ကျွင်းရှောင်ယောက်၏ မျက်လုံးများက အရောင်တစ်ချက် လက်သွားပြီးနောက် ရှေ့သို့ ခြေတစ်လှမ်း တိုးလိုက်သည်။

"ကျွင်းလုံခန်း..."

"ကူတိကျစ်..."

"လင်ယွမ်..."

"ယွီဟွာဝမ်..."

"..."

အမာရွတ်လေးခု သခင်ကြီးက နာမည်များကို တစ်ခုပြီးတစ်ခု ခေါ်ထုတ်ခဲ့သည်။

နာမည်ခေါ်ခံရသူတိုင်းမှာ အဓိပဓိ တားမြစ်ပါရမီရှင်များဖြစ်ကြောင်း ကျွင်းရှောင်ယောက် ချက်ချင်း သတိပြုမိခဲ့၏။

နာမည်များခေါ်ပြီးနောက် အမာရွတ်လေးခု သခင်ကြီးက ပြောလိုက်သည်။

"မင်းတို့က ပါရမီရှင်တွေကြားမှာ အထွတ်အထိပ်တွေပဲ။ မင်းတို့ကို ဒီခေတ်ရဲ့ 'မျိုးစေ့' အဆင့် ပါရမီရှင်တွေလို့တောင် ပြောလို့ရတယ်"

"နောက်ပြီးရင် မဲဆွဲပြီး မဲကျတဲ့ စစ်သူရဲအဖွဲ့ထဲကို ဝင်ရောက်ရမယ်။ မင်းတို့ လုပ်ရမှာက စစ်သူရဲတွေ တိုင်းတပါးရဲ့ အစီအစဉ်ကို ဖျက်ဆီးရာမှာ ကူညီပေးဖို့ပဲ"

"ဒါက မင်းတို့အတွက် စမ်းသပ်မှုလို့လည်း မှတ်ယူလို့ရတယ်"

"ကျန်တဲ့ ပါရမီရှင်တွေကတော့ တိုင်းတပါးသားတွေကို တတ်နိုင်သမျှသတ်ကြပါ။ ဒါပေမဲ့ ပြောရဦးမှာက ကိုယ့်ကိုယ်ကိုယ် အတင်းအကျပ် ဖိအားမပေးနဲ့။ အသက်မသေဖို့က အရေးကြီးဆုံးပဲ"

ထိုစကားကိုကြားတော့ ကျွင်းရှောင်ယောက်အပါအဝင် တားမြစ် ပါရမီရှင်အားလုံး၏ မျက်နှာများက တည်ငြိမ်သွားခဲ့သည်။

ဤသည်က သူတို့အတွက် စိန်ခေါ်မှုနှင့် လေ့ကျင့်ခန်းတစ်ခုပင်။

"သေချာတာပေါ့၊ မင်းတို့ အသက်ရှင်လျက် ပြန်လာနိုင်ရင် ရက်ရက်ရောရော ဆုချလိမ့်မယ်"

"အခု နာမည်ခေါ်ခံရတဲ့ ပါရမီရှင်တွေသာ အသက်ရှင်လျက် ပြန်လာနိုင်ရင် အင်မော်တယ်အဆင့် ကံကောင်းခြင်းက စောင့်ကြိုနေလိမ့်မယ်"

အမာရွတ်လေးခု သခင်ကြီး၏ စကားက မူလ တိတ်ဆိတ်နေသော လေထုကို ရုတ်ခြည်း နွေးထွေးသွားစေခဲ့သည်။

အထူးသဖြင့် အင်မော်တယ်အဆင့် ကံကောင်းခြင်းကို ကြားရသောအခါ၊ လင်ယွမ်နှင့် ကူတိကျစ်ကဲ့သို့ သူများပင်လျှင် မျက်လုံးများ အရောင်လက်သွားကြသည်။

အင်မော်တယ်အဆင့် ကံကောင်းခြင်းမှာ အင်မော်တယ်များနှင့် ပတ်သက်သော အမွေဆက်ခံခွင့်တစ်ခု ဖြစ်သည်။ ယင်းက အလွန် တန်ဖိုးကြီး၏။

ယင်းကို အမှန်တကယ်ရနိုင်ပါက လုံးဝ ပြောင်းလဲသွားလိမ့်မည်။ ထို့အပြင် အဓိပဓိနယ်ပယ်သို့ ဖြတ်ကျော်ရန်အတွက်ပင် အသုံးပြုနိုင်သည်။

'ဒါက တကယ်ကို ကြီးမားတဲ့ ရင်းနှီးမြုပ်နှံမှုတစ်ခုပဲ'

ကျွင်းရှောင်ယောက် တစ်ယောက်တည်း တွေးလိုက်မိသည်။

"ကောင်းပြီ၊ စပြီး မဲဆွဲလိုက်ရအောင်"

အမာရွတ်လေးခု သခင်ကြီးက ပြောလိုက်သည်။

ကျွင်းရှောင်ယောက်နှင့် အခြားသူများလည်း တစ်ဦးပြီးတစ်ဦး မဲနှိုက်ရန် ခြေလှမ်းပြင်လိုက်ကြ၏။

ကြီးမြတ်သော စစ်သူရဲအဖွဲ့များကို ခုနစ်ဖွဲ့ ခွဲထားသည်။ သူတို့က နတ်ဘုရား၏ မိစ္ဆာအတွေးများကို ရှာဖွေရန် တာဝန်ရှိပေသည်။

ယခုအချိန်တွင် အဖွဲ့ခုနစ်ခု၏ ခေါင်းဆောင်များက အာရုံစိုက်နေကြသည်။

အဓိပဓိအဆင့် တားမြစ်ပါရမီရှင်တိုင်းက အလွန်အားကောင်းသော်လည်း မတူညီမှုများ ရှိနေသေးသည်။ စရိုက်လက္ခဏာ ကွဲပြားမှုများလည်း ရှိကြသည်။

ထို့ကြောင့် ဤစစ်သူရဲများဟာ သဘာဝအတိုင်း စိတ်ဓာတ်ကြံ့ခိုင်မှုမရှိသူ၊ တိုက်ခိုက်နိုင်စွမ်း အားနည်းသူတို့ကို ၎င်းတို့၏အဖွဲ့သို့ မရောက်စေချင်ကြပေ။

"ကျွင်းမိသားစုရဲ့ နတ်ဘုရားသားတော်သာ ငါ့အဖွဲ့ကိုရောက်လာရင် ကောင်းမယ်"

"ကျွင်းမိသားစုရဲ့ နတ်ဘုရားသားတော်က မဟာသူတော်စင်ဖြစ်ပေမဲ့ အဓိပဓိတစ်ပိုင်းကို ရင်ဆိုင်နိုင်တယ်။ ဘယ်အဖွဲ့က သူ့ကို ရနိုင်မလဲ မသိဘူး"

"အင်း၊ သူ့ကို ခေါ်ယူနိုင်တာက နောက်ထပ် အဓိပဓိတစ်ပိုင်းအဆင့် ကျွမ်းကျင်သူတစ်ယောက်ရှိတာနဲ့ အတူတူပဲ။ အရေးကြီးတဲ့ အချိန်တွေမှာ သူက တိုက်ပွဲအ‌ခြေအနေကို ပြောင်းလဲနိုင်လိမ့်မယ်"

အဖွဲ့များမှ စစ်သည်များက အချင်းချင်း ပြောဆိုလိုက်ကြသည်။

စစ်သည်တော် အားလုံးနီးပါးက နှစ်ခုမရှိသော လောကရတနာကို ကြည့်နေသကဲ့သို့ ကျွင်းရှောင်ယောက်ကို စိတ်အားထက်သန်စွာ ကြည့်‌နေကြ၏။

နောက်ဆုံးတွင် ကျွင်းရှောင်ယောက်၏ စရိုက်နှင့် တိုက်ပွဲ စွမ်းရည် နှစ်ခုလုံးက ကောင်းကင်ကို အန်တုနေသည်။

အချို့ စစ်သူရဲများပင်လျှင် ကျွင်းရှောင်ယောက်ထက် များစွာ အားနည်းသည်ဟု ခံစားခဲ့မိသည်။

ထို့ကြောင့် သူတို့မျက်လုံးထဲတွင် ကျွင်းရှောင်ယောက်က သဘာဝအတိုင်း သေချာပေါက် ဆုပ်ကိုင်ထားရမည့် ရတနာတုံးကြီး ဖြစ်နေတော့သည်။

ဤအရာက ကူတိကျစ်၊ ကျိတောက်ရီနှင့် အခြားသူများ၏ မျက်နှာကို အနည်းငယ် မှုန်ကုပ်သွားစေခဲ့သည်။

သူတို့အားလုံးက တားမြစ်ပါရမီရှင်များဖြစ်၏။ မည်သူက အခြားသူထက် ဘယ်လောက်ထိ အားနည်းပါမည်နည်း။

သို့သော်လည်း ကျွင်းရှောင်ယောက်ကိုသာ ထိုစစ်သူရဲများက ကြိုဆိုနေကြသည်။

'ငါ တိတ်တဆိတ်နေတာ အတော်ကြာသွားပုံရတယ်'

ကျိတောက်ရီ၏ စိတ်ထဲတွင် အနည်းငယ် မသက်မသာ ခံစားလိုက်ရသည်။

နောက်ဆုံးတွင်၊ သူ့မှာ ကောင်းကင်ကိုးခုအထက် တားမြစ်မိသားစုမှ ဆင်းသက်လာသူဟူသော အထူးအဆင့်အတန်းတစ်ခု ရှိသည်။

သူသည် လူသားအင်မော်တယ်ဂိုဏ်း၏ ဆက်ခံသူလည်း ဖြစ်၏။

ဤအဆင့်အတန်းက ကျွင်းရှောင်ယောက်ထက် မနိမ့်ကျသင့်ပေ။

ကျွင်းရှောင်ယောက်က မဲဆွဲယူပြီး ကြည့်လိုက်သည်။

"မုန့်မိသားစုအဖွဲ့"

သူပြောပြီးသည်နှင့် စစ်သူရဲတစ်ဦးက အားပါးတရ ရယ်မောရင်း ကျွင်းရှောင်ယောက်ဆီသို့ လျှောက်လာခဲ့၏။

"ဟားဟားဟား၊ နတ်ဘုရားသားတော်... ငါက မုန့်မိသားစုက မုန့်ကျန်းပါ။ ငါ့အဖွဲ့က နတ်ဘုရားသားတော်ကို ကြိုဆိုပါတယ်"

မုန့်ကျန်း၏ မျက်နှာပေါ်တွင် ရိုးသားသော အပြုံးတစ်ခု ပေါ်လာခဲ့သည်။

"မုန့်ကျန်း၊ မင်း တကယ်ကံကောင်းတာပဲ။ နတ်ဘုရားသားတော်က မင်းရဲ့အဖွဲ့ကို ရောက်လာတယ်"

"ဒီတစ်ခါတော့ မင်းတို့အဖွဲ့က ကြီးကျယ်ခမ်းနားတဲ့ အောင်မြင်မှုတွေ ရလိမ့်မယ်လို့ ငါထင်တယ်"

အနီးနားရှိ စစ်သူရဲများအားလုံး မနာလို၊ အားကျစွာဖြင့် ပြောလိုက်ကြသည်။

"ခေါင်းဆောင် ယဉ်ကျေးနေစရာ မလိုပါဘူး"

ကျွင်းရှောင်ယောက်လည်း ပေါ့ပေါ့ပါးပါး ပြုံးလိုက်၏။

ကာကွယ်သူမိသားစုများတွင် ချိုင်မိသားစု၊ ဖန်းမိသားစုနှင့် ဟုန်မိသားစုတို့ နယ်စပ်ကို စောင့်ကြပ်နေသည့် မိသားစုအကုန်မဟုတ်ပေ။ မုန့်မိသားစုကလည်း သူတို့ထဲမှ တစ်ဦးဖြစ်ပြီး မိမိ၏တာဝန်များကို အမြဲတမ်း သစ္စာရှိစွာ ထမ်းဆောင်ခဲ့ကြသည်။

ထိုအချိန်တွင် အေးစက်စက် အသံတစ်ခု ထွက်ပေါ်လာသည်။

"မုန့်မိသားစုအဖွဲ့"

စကားသံအဆုံးတွင် လူတိုင်း၏ မျက်နှာများက ထူးခြားသော အမူအရာများ ဖြစ်လာကြသည်။

မုန့်မိသားစုကို ဆွဲခဲ့မိသူက လင်ယွမ် ဖြစ်နေခဲ့၏။

ဤလူနှစ်ဦးတွင် တစ်ဦးက အင်မော်တယ်ခုံရုံး၏ ဧကရာဇ်ငယ်ဖြစ်ပြီး ကျန်တစ်ဦးကတော့ ကျွင်းမိသားစု၏ နတ်ဘုရားသားတော် ဖြစ်သည်။

သူတို့နှစ်ဦးက ဆန့်ကျင်ဘက် အစွန်းနှစ်ဖက်မှ တည်ရှိမှုများ ဖြစ်ကြ၏။ သို့သော်လည်း ယခုတော့ အဖွဲ့တစ်ခုတည်းတွင် တာဝန်ကျခဲ့ပြီ။

ယင်းက အံ့ဩစရာ ဖြစ်သည်။