အခန်း ၈၅၇

အပိုင်း ( ၈၅၇ ) ဘယ်သူက နစ်နာခဲ့တာလဲ၊ အင်မော်တယ်အရင်းအမြစ် ဘိုးဘေးသွေးကြောကို စုဆောင်းခြင်း။

ချွန်ထက်သောဓားဦးက ကျွင်းရှောင်ယောက်၏ မျက်ခုံးနှစ်ခုကြားကို တိုက်ရိုက် ဦးတည်ခဲ့သည်။

ကျွင်းရှောင်ယောက် အပြောင်းအလဲမရှိသော အမူအရာဖြင့် ကြည့်နေသည်။

အဆုံးတွင်၊ ဓားက ရှေ့ဆက်မတိုးဘဲ ကျွင်းရှောင်ယောက်၏နဖူးရှေ့ သုံးလက်မခန့်အကွာတွင် ရပ်တန့်သွား၏။

ဓားကိုင်ထားသော လင်ယွမ်၏ ကျောက်စိမ်းလက်များက အနည်းငယ် တုန်ခါသွားသည်။

ဖော်ပြရန်ခက်ခဲပြီး မရှင်းလင်းသော ခံစားချက်တစ်ခုကလည်း သူမကို အလွန်အမင်း စိတ်ရှုပ်ထွေးစေခဲ့ပေသည်။

ဒေါသ၊ အရှက်၊ မုန်းတီးမှု၊ စိတ်ရှုပ်ထွေးမှု။

ခံစားချက်မျိုးစုံက လင်ယွမ်၏ နှလုံးသားထဲတွင် လှိုင်းထနေခဲ့သည်။

သူမ၏ နှလုံးသားမှာ ဤမျှလောက် တစ်ခါမှ မရှုပ်ထွေးခဲ့ဖူးပေ။

လင်ယွမ်သည် အမြဲတစေ မြင့်မားပြီး ဝေးကွာနေခဲ့သည်။

သူမ၏အမြင်တွင်၊ အမြင့်ဆုံးအာဏာနှင့် အထွတ်အထိပ် ကျင့်ကြံခြင်းကမှ သူမ လိုက်စားသင့်သောအရာပင်။

ကျန်သော အရာအားလုံးက အရေးမပါပေ။

မိန်းမပျိုလေးများ အလွန်တန်ဖိုးထားသော ချစ်ခြင်းမေတ္ဆာကိုပင် ပယ်သတ်ထားခဲ့သည်။

ထို့အတွက်ကြောင့် သူမက ကူတိကျစ်၏ ပိုးပန်းမှုကို လျစ်လျူရှုခြင်း သို့မဟုတ် အထင်မြင်သေးမှုတို့ ရှိခဲ့ခြင်းပင်။

ယခုတော့ သူမ၏ ကံကြမ္မာရန်သူဖြစ်ခဲ့သော ဤလူက သူမနှင့် ဤမျှရှုပ်ထွေးသော ပတ်သက်မှုတစ်ခုရှိနေပြီ ဖြစ်သည်။

လင်ယွမ်၏ နှလုံးသားက ပထမဆုံးအကြိမ် ကျရှုံးခဲ့ရသည်။

သို့သော်လည်း လင်ယွမ် ငြိမ်သက်သွားချိန်တွင်...

ကျွင်းရှောင်ယောက်က လက်နှင့်တောက်ပြီး ဓားကိုဖယ်ရှားကာ အေးစက်စက်ဖြင့် ပြောလိုက်သည်။

"လင်ယွမ်၊ မှတ်ထားပါ။ ငါ နတ်ဘုရားသားတော်ရှေ့မှာ သန့်စင်တဲ့ သူတော်စင်မိန်းကလေးပုံစံ လာမဖမ်းနဲ့"

"နောက်ပြီး မင်းက ဘာလုပ်ချင်တာလဲ။ ငါ့မျက်လုံးတွေကို ဖောက်ထုတ်ချင်လို့လား"

ကျွင်းရှောင်ယောက်က နိမ့်ကျသော ဇာတ်ကောင်မျိုးမဟုတ်ပါ။

ဥပမာအားဖြင့်...

သန့်စင်သော အပျိုစင် သူတော်စင်မလေး၏ ခန္ဓာကိုယ်ကို မတော်တဆ တွေ့မိသည်။ ထိုအခါ သူတော်စင်မလေးက ရှက်လွန်းသဖြင့် ဒေါသဖြစ်ပြီး ထိုဇာတ်လိုက်၏မျက်လုံးကို ဖောက်ထုတ်ရန် ကြိုးစားလိမ့်မည်။

ထို့နောက်တွင် ဇာတ်လိုက်က ထိုသူတော်စင်မလေး၏ နှလုံးသားကို အနိုင်ယူရန် အသည်းအသန်ကြိုးစားနေသည့် ခွေးလျှာတစ်ကောင်အဖြစ် ချက်ချင်းပြောင်းလဲသွားမည် ဖြစ်သည်။

ကျွင်းရှောင်ယောက်ကတော့ ထိုသို့မဟုတ်ပါ။ သူ၏ ကြည့်ရှူခံရခြင်းက သူမအတွက် ဂုဏ်ယူစရာ ဖြစ်သည်။

လင်ယွမ်က မြင့်မြတ်လျှင်ပင် ဘာဖြစ်သေးသနည်း။

လုံယောက်အာကဲ့သို့ သူမျိုးကိုပင် ခွေးတစ်ကောင်အဖြစ် အနိုင်ယူခဲ့သည်။

ထိုစကားကိုကြားတော့ လင်ယွမ် လွန်စွာရှက်ရွံ့ပြီး ဒေါသဖြစ်သဖြင့် သူမ၏ ခန္ဓာကိုယ်ကလေးမှာလည်း တုန်လှုပ်သွားလေသည်။

သူမ၏ ခန္ဓာကိုယ်ကို မိမွေးတိုင်းဖမွေးတိုင် ကြည့်ခံခဲ့ရသည်။

အားကြီးနှင့် ရိုက်နှက်တာကိုလည်း ခံလိုက်ရ၏။

ရလဒ်အနေဖြင့် ကျွင်းရှောင်ယောက်က နစ်နာသူတစ်ဦးပမာ ပြုမူနေပြီ။

အမှန်တကယ် နစ်နာခဲ့သူက မည်သူနည်း။

ရုတ်တရက်၊ လင်ယွမ်၏မျက်နှာမှာ ညှိုးကျသွားလေသည်။

သူမက မည်မျှသန်မာပြီး အေးစက်နေပါစေ၊ မိန်းမတစ်ယောက် ဖြစ်နေဆဲ ဖြစ်သည်။ ဤအခြေအနေမျိုးကို ကြုံလာရပါက သဘာဝအတိုင်း မခံချင်ဘဲ ဝမ်းနည်းမိလိမ့်မည်။

ဒါကိုမြင်ရပြန်တော့ ကျွင်းရှောင်ယောက် တစ်ဖက်လှည့်ပြီး ပုံမှန်လေသံဖြင့် ပြောလိုက်သည်။

"အရမ်းခံစားမနေနဲ့၊ အနည်းဆုံးတော့ မင်းရဲ့အသက်ကို ငါကယ်ခဲ့တာ။ မဟုတ်ရင် အိပ်မက်ထဲမှာ မင်း အမြဲတမ်း ပိတ်မိနေလိမ့်မယ်"

ထိုစကားကိုကြားတော့ အိပ်မက်ထဲမှ မြင်ကွင်းများကို ပြန်လည်သတိရလာကာ လင်ယွမ်၏ မျက်နှာလေးက ပန်းနုရောင်သန်းသွားလေသည်။

ဤအိပ်မက်အကြောင်းကို ကျွင်းရှောင်ယောက် မသိစေရဘူး။

အသက်ပြင်းပြင်းရှူလိုက်ပြီးနောက် လင်ယွမ် ခေတ္တငြိမ်သက်သွားသည်။

အမှန်တော့ သူမ၏ စိတ်ထဲတွင် ရှက်ရွံ့မှုနှင့် ဒေါသဖြစ်နေသေးသည်။

သို့သော်လည်း ဤနေရာတွင် ကျွင်းရှောင်ယောက်နှင့် သေသည်အထိ တိုက်ခိုက်ရန်တော့ မဖြစ်နိုင်ပါ။ ယင်းက လက်တွေ့မကျပေ။

အချိန်အတော်ကြာ တိတ်ဆိတ်သွားပြီးနောက် လင်ယွမ်၏ အမူအရာက အနည်းငယ် စိတ်ရှုပ်ထွေးလာပုံရကာ ရုတ်တရက် မေးလိုက်သည်။

"ဒီတော့ နင်က ငါ့ကို ကယ်တင်ဖို့ တကယ်လာခဲ့တယ်ပေါ့"

ကျွင်းရှောင်ယောက် တည်ငြိမ်စွာ ပြန်ဖြေလိုက်၏။

"ဟုတ်ပါတယ်၊ နတ်သမီးယွမ်အတွက် ငါလုပ်လိုက်တာ"

"ဒါဆိုရင် နင် ငါ့ကို နတ်သမီးယွမ်ကြောင့် ကယ်ခဲ့တာလား"

"မဟုတ်ရင်ကော"

ဘာရယ်ကြောင့်မှန်းမသိ၊ သူမ၏ နှလုံးသားထဲတွင် စိတ်ဆိုးလာသလို ခံစားလိုက်ရသည်။

ပို၍ ဒေါသဖြစ်သလို ခံစားရ၏။

သူ့နှလုံးသားကို စိမ့်ဝင်စေသော "မနာလိုခြင်း" အငွေ့အသက်များပင် ရှိနေပုံရ‌သည်။

အခြား မိန်းမအတွက် ကယ်တင်ခဲ့တယ်ဆိုတာ ဘာသဘောလဲ။

ကျွင်းရှောင်ယောက်က သူ့ကို ဘာအတွက် ကယ်တင်ခဲ့တာလဲ။

နတ်သမီးယွမ်ရဲ့ ဆက်စပ်သူတစ်ခုမို့လား။

အမှန်ဆိုလျှင် နတ်သမီးယွမ်ကမှ သူမ၏ ဆက်စပ်သူ ဖြစ်သည်။

လင်ယွမ်၏ အမူအရာကိုမြင်တော့ ကျွင်းရှောင်ယောက် လှောင်ပြောင်ပြောဆိုလိုက်သည်။

"လင်ယွမ်၊ ဒီနတ်ဘုရားသားတော်က မင်းကို အရမ်းကြင်နာပြီး ရိုးရိုးသားသား ကယ်တင်လိမ့်မယ်လို့တော့ မင်းမထင်ဘူး မဟုတ်လား"

"ဒီဧကရီ အဲဒီလောက် မတုံးဘူး"

လင်ယွမ်၏ အမူအရာက အေးစက်သွားကာ အကြည့်လွှဲလိုက်သည်။

ကျွင်းရှောင်ယောက်ကို မကြည့်တော့ပေ။

ကျွင်းရှောင်ယောက် ခေါင်းခါယမ်းလိုက်သည်။

ဤဧကရီသမီးတော်က သာမန်လူများရှေ့တွင် အလွန်မြင့်မားပြီး ဝေးကွာနေခဲ့သည်။

သူ့ရှေ့မှာတော့ မာနကြီးသူတစ်ဦး ဖြစ်လာ၏။

ကျွင်းရှောင်ယောက်လည်း လင်ယွမ်ကို လျစ်လျူရှုကာ ဤနေရာမှ ထွက်သွားရန် ဟန်ပြင်လိုက်သည်။

ကျွင်းရှောင်ယောက်က သူမကို လုံးဝ လျစ်လျူရှုထားတာမြင်တော့ လင်ယွမ် နှုတ်ခမ်းကိုကိုက်လိုက်သည်။

သူမ အမှန်တကယ် ကျွင်းရှောင်ယောက်ကို ဖက်ကိုက်ချင်နေပြီ။

လင်ယွမ်လည်း စိတ်တိုနေသည့်တိုင် ကျွင်းရှောင်ယောက်နှင့်အတူ ထွက်ခဲ့ရသည်။

ဟင်းလင်းပြင်က တွန့်လိပ်သွား၏။

ကျွင်းရှောင်ယောက်နှင့် လင်ယွမ်လည်း ဘိုးဘေးသွေးကြောမှ ပလ္လင်ပေါ်တွင် ပြန်ပေါ်လာတော့သည်။

သို့သော်၊ မုန့်ကျန်းနှင့် အဓိပဓိတစ်ပိုင်းနတ်ဆိုးကို မမြင်ရပေ။

သူတို့နှစ်ဦးလည်း မူလလမ်းအတိုင်း ပြန်ထွက်လာခဲ့ကြသည်။

ပတ်ဝန်းကျင်ကို ကြည့်လိုက်တော့ မြေပြင်ပေါ်တွင် အလောင်းများစွာကို တွေ့ရ၏။

တိုင်းတစ်ပါးမှ သတ္တဝါများအပြင် မုန့်မိသားစုအဖွဲ့မှ အလောင်းများလည်း ရှိသည်။

အလောင်းအားလုံးက သွေးအိုင်အဖြစ်သို့ ပြောင်းလဲသွားခဲ့ကြပေသည်။

"ကြည့်ရတာ နတ်ဘုရားရဲ့မိစ္ဆာအတွေးက သူ့လမ်းက သက်ရှိအားလုံးကို တိုက်ရိုက် သုတ်သင်ခဲ့ပုံပဲ"

ကျွင်းရှောင်ယောက် ခန့်မှန်းလိုက်သည်။

ထိုအချိန်တွင် မနီးမဝေးမှ တောင်တစ်လုံးမှ လူရိပ်တစ်ခု ခုန်ထွက်လာခဲ့သည်။

မုန့်ကျန်းဖြစ်ချေသည်။

ဤအခိုက်တွင် မုန့်ကျန်းက ဒဏ်ရာများဖြင့် ဖုံးလွှမ်းနေပြီး သွေးများလည်း စီးကျနေသည်။

သို့သော်လည်း သူ့အမူအရာက စိတ်လှုပ်ရှား ပျော်ရွှင်မှုတို့ ပြည့်နေလေသည်။

"နတ်ဘုရားသားတော်၊ ဧကရှသမီးတော်၊ မင်းတို့ အသက်ရှင်နေသေးတာပဲ။ သိပ်ကောင်းတယ်"

နတ်ဘုရား၏မိစ္ဆာအတွေး ပေါ်လာကတည်းက ကျွင်းရှောင်ယောက်နှင့် လင်ယွမ်တို့ သေလောက်ပြီဟု သူတွေးမိခဲ့သည်။

သို့ရာတွင်၊ အမှန်တကယ် လွတ်မြောက်နိုင်မည်ဟု မမျှော်လင့်ထားပေ။

"ကံကောင်းလို့ပါ"

ကျွင်းရှောင်ယောက် တည်ငြိမ်စွာ ပြောလိုက်၏။

မိစ္ဆာအတွေးက သူ့ကို ဘာကြောင့် ဆက်လက်မတိုက်ခိုက်ခဲ့သလဲ ဆိုတာကိုတော့ သူ့စိတ်ထဲတွင် အနည်းငယ် မှန်းဆထားမိသည်။

ယင်းမှာ အသက်စမ်းရေတွင်းမှ ကြာမျိုးစေ့နှင့် ဆက်စပ်သင့်ပေသည်။

ကျွင်းရှောင်ယောက်နှင့် လင်ယွမ်ကို ကြည့်လိုက်ပြီးနောက် ဒဏ်ရာရမထားကြောင်း မြင်လိုက်ရသောကြောင့် မုန့်ကျန်း အံ့ဩသွားမိသည်။

ထို့ထက် မုန့်ကျန်း၏ မျက်လုံးအကြည့်ကို အနည်းငယ် ထူးဆန်းသွားစေသည့်အရာမှာ...

လင်ယွမ်၏ အမူအရာက အနည်းငယ် ထူးဆန်းနေပုံရခြင်း ဖြစ်သည်။

သူမ၏ အမူအရာက အေးစက်နေသော်လည်း မျက်နှာလေးမှာ ပန်းနုရောင်သန်းနေသည်။

သူမကိုကြည့်ရသည်မှာ အနိုင်ကျင့်ခံရသောကြောင့် ဒေါသထွက်နေသော်လည်း မစွမ်းနိုင်သောကြောင့် အကူအညီမဲ့သော မိန်းမပျိုလေးတစ်ယောက်ကဲ့သို့ပင်။

မုန့်ကျန်းလည်း ကျွင်းရှောင်ယောက်နှင့် လင်ယွမ်ကို တစ်လှည့်စီကြည့်ကာ သံသယစိတ်များ ဖြစ်ပေါ်လာခဲ့သည်။

အလွန်ဆိုးရွားသော သေခြင်းရှင်ခြင်း အခြေအနေများတွင် သူတို့နှစ်ဦးကြားမှာ အံ့သြဖွယ်ကောင်းသော ဆက်ဆံရေးတစ်ခု တည်ဆောက်နိုင်ခဲ့ခြင်း ဖြစ်မည်လော။

ထိုသို့တွေးမိသောအခါ မုန့်ကျန်းက ယောင်္ကျားတစ်ယောက်၏ လေးစားသောအကြည့်မျိုးဖြင့် ကျွင်းရှောင်ယောက်ကို ကြည့်လိုက်သည်။

ရန်သူများကိုပင် အောင်နိုင်သူကမှ အာဂ ယောင်္ကျား ဖြစ်သည်။ ကျွင်းရှောင်ယောက်က အမှန်တကယ် ထူးချွန်သော ပုဂ္ဂိုလ်ပင်။

ကျွင်းရှောင်ယောက်က မုန့်ကျန်း၏ လေးစားနေသောအကြည့်ကို လျစ်လျူရှုကာ ပြောလိုက်သည်။

"ခေါင်းဆောင်၊ ဒီမှာ အခြေအနေတွေက..."

"အိုး၊ ဒါက ဒီလိုပါ..."

ထို့နောက်တွင် မုန့်ကျန်းက အပြင်ဘက်မှ အကြောင်းအရာအချို့ကို ကျွင်းရှောင်ယောက်အား ပြောပြခဲ့သည်။

ထိုစဉ်က သူသည် အဓိပဓိတစ်ပိုင်းနတ်ဆိုးနှင့် တိုက်ခိုက်နေတုန်း ကြောက်စရာကောင်းသော အရှိန်အဝါတစ်ခုကို သတိပြုလိုက်မိသည်။

တံဆိပ်ကိုချိုးဖျက်ပြီး မိစ္ဆာအတွေး လွတ်မြောက်လာပြီဟု နားလည်လိုက်သောကြောင့်...

သူတို့အားလုံး ချက်ချင်း ဆုတ်သွား၏။

နောက်တော့ မိစ္ဆာအတွေးက အမှန်တကယ် လွတ်မြောက်လာကာ သူ၏အရှိန်အဝါတစ်ခုတည်းဖြင့် သက်ရှိ အမြောက်အများကို သေစေခဲ့တော့သည်။

သို့သော်လည်း မိစ္ဆာအတွေးက တမင်တကာ သတ်ဖြတ်ခြင်းမပြုဘဲ တိုက်ရိုက်ထွက်ခွာသွားခဲ့သည်။

နတ်ဘုရား၏မိစ္ဆာအတွေး ထွက်ခွာသွားသည်ကိုမြင်သောအခါ ကောင်းကင်နတ်ဆိုးမျိုးနွယ်စု၏ ကျန်ကျွမ်းကျင်သူများနှင့် အခြားတစ်ပါးသော သတ္တဝါတို့လည်း အခြေအနေကို သတင်းပို့လိုသည့်အတိုင်း ဆုတ်ခွာသွားကြလေသည်။

မုန့်ကျန်းနှင့် မုန့်မိသားစုအဖွဲ့လည်း ၎င်းတို့၏ ဒဏ်ရာများကို ကုသရန်အတွက် ပြန်လည်ဆုတ်ခွာသွားခဲ့သည်။

မုန့်ကျန်းက ဒဏ်ရာအနည်းငယ် သက်သာလာပြီးနောက် ကျွင်းရှောင်ယောက်တို့ကို ရှာရန် ထွက်လာခြင်းဖြစ်သော်လည်း...

မထင်မှတ်ပဲ ကျွင်းရှောင်ယောက်က တိုက်ရိုက်ထွက်လာခဲ့ပေသည်။

"ဒီလိုကိုး"

ကျွင်းရှောင်ယောက် သဘောပေါက်သွားသည်။

နတ်ဘုရား၏မိစ္ဆာအတွေးက အခြား မိစ္ဆာအတွေးများနှင့် ပေါင်းစည်းရန် သို့မဟုတ် ကမ္ဘာ့သစ်ပင်၏ နေရာကိုသွားခြင်း ဖြစ်နိုင်သည်။

အကြောင်းမူ၊ ရှန်းရွှီကမ္ဘာကို ဖြတ်ကျော်လိုပါက ကမ္ဘာ့သစ်ပင်အား ရယူရန် လိုအပ်သောကြောင့်ပင်။

ယင်းက ကျွင်းရှောင်ယောက်၏ အခွင့်အလမ်း ဖြစ်သည်။

"နတ်ဘုရားသားတော် နောက်ထပ် ဘာဆက်လုပ်မယ် တွေးထားလဲ"

မုန့်ကျန်းက မေးသည်။

ယခုအခါ ကျွင်းရှောင်ယောက်က အဖွဲ့၏ ကျောရိုးပင်။

သူ့အစွမ်းအစကို လူတိုင်းသိနေပြီ ဖြစ်သည်။

မိစ္ဆာအတွေး၏ လက်ထဲမှပင် ရှင်သန်နိုင်ခဲ့ခြင်းက အံ့သြစရာပင်။

"ဒီမိစ္ဆာအတွေးက လွတ်သွားမှတော့ ငါတို့ အခြား မိစ္ဆာအတွေးတွေကိုပဲ ရှာရတော့မှာပဲ"

"ဒါပေမဲ့ မင်းတို့အားလုံး ဒဏ်ရာတွေ ရနေတာဆိုတော့ ဒီမှာ အရင်ဆုံး ကုသနေသင့်တယ်။ ငါကတော့ အင်မော်တယ်အရင်းအမြစ် ဘိုးဘေးသွေးကြောကို စိတ်ဝင်စားနေတယ်"

ကျွင်းရှောင်ယောက် ပြောလိုက်သည်။

မုန့်ကျန်း အနည်းငယ် ခေါင်းညိတ်လိုက်၏။

ဤတစ်ကြိမ်တွင် ကျွင်းရှောင်ယောက်၏ ပံ့ပိုးကူညီမှုက အကြီးမားဆုံးဖြစ်သည်။

အင်မော်တယ်အရင်းအမြစ် ဘိုးဘေးသွေးကြောကို ရယူလိုခြင်းမှာ အမှားအယွင်းမရှိပေ။

"ဒီဘိုးဘေးသွေးကြောကို နင်တစ်ယောက်တည်း လိုချင်တာလား"

လင်ယွမ် ရုတ်တရက် ပြောလိုက်သည်။

"ဘာလဲ၊ မင်းက ကန့်ကွက်ချင်လို့လား။ မင်းအသက်ကို ဘယ်သူကယ်ခဲ့တယ်ဆိုတာ မမေ့နဲ့ဦး"

ကျွင်းရှောင်ယောက် လျစ်လျူရှုစွာ ပြောလိုက်၏။

လင်ယွမ် တိတ်ဆိတ်သွားသော်လည်း သူမ၏ မျက်နှာလေးက ရှက်ရွံ့မှု၊ ဒေါသတို့ဖြင့် နီရဲလာတော့သည်။

ဤမြင်ကွင်းက သူတို့နှစ်ယောက်ကြားမှာ တစ်ခုခုဖြစ်နေပြီဟူသော မုန့်ကျန်း၏အတွေးကို ပို၍ ခိုင်မာစေခဲ့သည်။

"ဒီလောက်ကြီးမားတဲ့ အင်မော်တယ်အရင်းအမြစ် ဘိုးဘေးသွေးကြော ကြီးကိုယူပြီး နင်မသေစေနဲ့ဦး"

လင်ယွမ် လက်ပိုက်ပြီး အေးစက်စက်ဖြင့် ပြောလိုက်သည်။

"ဧကရီငယ် လင်ယွမ်၊ စိတ်ပူစရာ မလိုပါဘူး"

ကျွင်းရှောင်ယောက် ဂရုမစိုက်တော့ပေ။ သူ့လက်ကို မြှောက်လိုက်သည်နှင့် အားကောင်းသောစွမ်းအင်များ ထွက်ပေါ်လာခဲ့သည်။

ဝါးမျိုခြင်းဖင်းဂေါ့ကျန်းကို ထုတ်ဖော်လိုက်သောအခါ ပြင်းထန်သော စုပ်ယူမှုအင်အားကြောင့် ကြီးမားသော အင်မော်တယ်အရင်းအမြစ် ဘိုးဘေးသွေးကြောတစ်ခုလုံးက မြေပြင်မှ ကြွတက်လာခဲ့၏။

ထို့နောက်မှာတော့ လင်ယွမ်၏ အံ့အားသင့်နေသော အကြည့်အောက်မှာပင် ကျွင်းရှောင်ယောက်က ၎င်းကို သူ့ခန္ဓာကိုယ်ထဲသို့ စုပ်ယူသွားတော့သည်။