အခန်း ၈၅၈

အခန်း ( ၈၅၈ ) ကျွင်းရှောင်ယောက်၏ ရူးလောက်စရာအစီအစဉ်၊ ချီရှောင်းမျိုးနွယ်၏ ငယ်ရွယ်ပြီး အစွမ်းထက်သော အဖွဲ့ဝင် ချီလင်ခုန်း။

ကျွင်းရှောင်ယောက်က အင်မော်တယ်အရင်းအမြစ် ဘိုးဘေးသွေးကြော တစ်ခုလုံးကို ဆွဲထုတ်ခဲ့သည်။

ပြင်းအား ကြီးမားသော ငလျင်လှုပ်သကဲ့သို့ ကမ္ဘာတစ်ခုလုံး စတင် တုန်ခါလာ၏။ မရေမတွက်နိုင်သော အက်ကြောင်းများလည်း ပြန့်နှံ့လာတော့သည်။

ဂြိုလ်၏မျက်နှာပြင်က အက်ကြောင်းများ ချက်ချင်း ဖုံးလွှမ်းသွားခဲ့သည်။

အင်မော်တယ်အရင်းအမြစ် ဘိုးဘေးသွေးကြောကို ထုတ်ယူပြီးနောက် ချောက်ကမ္ဘာကြီးကဲ့သို့ ကြီးမားသော အက်ကွဲကြောင်းတစ်ခု ကျန်ရစ်ခဲ့ပေသည်။

တစ်ချိန်တည်းမှာပင်၊ ဤဂြိုလ်မှ ဝိညာဉ်စွမ်းအင်များက သိသိသာသာ ကျဆင်းလာခဲ့သည်။

ရေအရင်းအမြစ်ကို ပိတ်လိုက်သကဲ့သို့၊ အင်မော်တယ်အရင်းအမြစ် ဘိုးဘေးသွေးကြောကို ဖယ်ရှားလိုက်သောအခါ...

ဝိညာဉ်စွမ်းအင်များက သဘာဝအတိုင်း ရှားပါးလာပြီး နောက်ဆုံးတွင် လုံးဝ ကွယ်ပျောက်သွားတော့မည် ဖြစ်သည်။

"နင်... နင့်ရဲ့ သိုလှောင်ခြင်းမှော်ရတနာက အင်မော်တယ်အရင်းအမြစ် ဘိုးဘေးသွေးကြော တစ်ခုလုံးကို လက်ခံနိုင်တာလား"

လင်ယွမ် အံ့အားသင့်ပြီး မျက်လုံးများ ဝိုင်းစက်သွားသည်။

မည်သို့သော်မှော်ရတနာမို့ အင်မော်တယ်အရင်းအမြစ် ဘိုးဘေးသွေးကြော တစ်ခုလုံးကို လက်ခံယူနိုင်သနည်း။

လင်ယွမ်က အတွင်းစကြာဝဠာကို မသိသောကြောင့် မဟုတ်ပါ။

သို့ရာတွင် ကျွင်းရှောင်ယောက်၏ ကျင့်ကြံခြင်းအခြေခံက မဟာသူတော်စင်နယ်ပယ်၌သာ ရှိသည်။

ကျွင်းရှောင်ယောက်တွင် အတွင်းစကြာဝဠာကို ပိုင်ဆိုင်ထားကြောင်းက စိတ်ကူးကြည့်ရန်ပင် မလွယ်ပေ။

ထို့အပြင် ကျွင်းရှောင်ယောက်က လျှို့ဝှက်ထားချင်လျှင်...

ကျွင်းရှောင်ယောက်၏ ခန္ဓာကိုယ်အတွင်းရှိ စကြာဝဠာအတက်အကျများကို ပြင်ပလူများ သိရှိရန်မှာ အလွန်တရာ ခက်ခဲသည်။

မုန့်ကျန်းလည်း အနည်းငယ် ထိတ်လန့်သွားပြီး တစ်ခုခုကို တွေးလိုက်မိသည်။

သို့သော်လည်း သူ ချက်ချင်း ငြင်းလိုက်မိ၏။

အကြောင်းမူကား၊ အဓိပဓိတစ်ပိုင်းဖြစ်သည့် သူပင်လျှင် အတွင်းစကြာဝဠာကို မပိုင်ဆိုင်သေးသောကြောင့်ပင်။

ရှေ့ပြေးပုံစံတောင် မရရှိသေးပါ။

'ဒါက ရှေးဟောင်း သိုလှောင်ခြင်း မှော်ရတနာတစ်ခုပဲ ဖြစ်ရမယ်'

မုန့်ကျန်း သူ့ကိုယ်သူ တွေးလိုက်သည်။

လင်ယွမ်လည်း ဆွံ့အနေပြီ။

ထို့နောက် တင်ပျဉ်ခွေထိုင်ကာ မျက်လုံးကိုမှိတ်ပြီး သူ့အရှိန်အဝါများကို ချိန်ညှိလိုက်သည်။

ကျွင်းရှောင်ယောက်ကတော့ မုန့်ကျန်းကို ဒဏ်ရာကုသဆေးတချို့ ပေးလိုက်၏။

"ခေါင်းဆောင်၊ မင်းဒဏ်ရာတွေကို အရင်ကုသလိုက်ပါ။ ပြီးရင် ငါတို့ ခရီးဆက်ကြမယ်"

ကျွင်းရှောင်ယောက် ပြောလိုက်သည်။

"ကျေးဇူးတင်ပါတယ်၊ နတ်ဘုရားသားတော"

မုန့်ကျန်းလည်း ကျေးဇူးတင်စကား ပြောဆိုပြီးနောက် သူ့လူများနှင့် ဒဏ်ရာများကိုကုသရန် ထွက်သွားတော့သည်။

သူတို့၏ ဒဏ်ရာများကို ပြန်လည်ကုသထားရန်က အရေးတကြီး လိုအပ်သည်။

မဟုတ်၍၊ တိုင်းတပါးသားများနှင့် ထပ်မံတွေ့လျှင် သေလိမ့်မည်။

မုန့်ကျန်း ထွက်သွားပြီးနောက် ကျွင်းရှောင်ယောက်က သူ့စိတ်ထဲမှ တွေးလိုက်သည်။

မူလကတော့ သူဟာ မစ်ရှင်ကို ပြီးမြောက်ပြီး တိုင်းတစ်ပါးသားများ နတ်ဘုရား၏မိစ္ဆာအတွေးကို မလွှတ်နိုင်ရေးအတွက် တားဆီးရန်သာ ဆန္ဒရှိခဲ့သည်။

ယခုတော့ ရှန်းရွှီကမ္ဘာအတွင်းမှ ကမ္ဘာ့သစ်ပင်ကို ရယူလိုလျှင်...

နတ်ဘုရား၏ မိစ္ဆာအတွေးများ အကူအညီကိုလည်း အားကိုးရမည့်ပုံပင်။

အကြောင်းမူကား ကမ္ဘာ့သစ်ပင်ကို ရယူရန် နေနေသာသာ၊ အဇူရာဧကရာဇ် ချန်ထားခဲ့သောတံဆိပ်ကို သူတစ်ယောက်တည်း ချိုးဖျက်ရန်ပင် ခက်ခဲသောကြောင့် ဖြစ်သည်။

ယခုအခါ၊ ကျွင်းရှောင်ယောက်က နတ်ဘုရား၏မိစ္ဆာအတွေးများကို တမင်လွှတ်ပေးကာ ကမ္ဘာ့သစ်ပင်၏တံဆိပ်ကို ချိုးဖျက်ရန် စိတ်ကူးနေပြီ။

ဤအကြံအစည်က အမှန်တကယ် ရူးမိုက်သည်။

သတိမထားမမိပါက ရှန်းရွှီကမ္ဘာ ပြိုကျမည်ဖြစ်ပြီး နယ်စပ်သည်လည်းဘေးဥပဒ်နှင့် ကြုံတွေ့ရလိမ့်မည်။

ကျွင်းရှောင်ယောက်၏ စိတ်ခံစားမှုနှင့် အကြောင်းပြချက်များအရ ထိုသို့သော အတွေးမျိုး မရှိသင့်ပါ။

သို့ရာတွင် ကျွင်းရှောင်ယောက်က ကိုယ်ကျိုးမဖက်သည့် သူရဲကောင်းတစ်ဦး မဟုတ်ပေ။

ထို့အပြင် ကျွင်းရှောင်ယောက်မှာ ရှေးဦးကြာပန်းမျိုးစေ့ရှိနေသေးသည်ကို သိထားကြရမည် ဖြစ်သည်။

သူဟာ ဤကြာမျိုးစေ့ကို အဇူရာဧကရာဇ်က နတ်ဘုရား၏မိစ္ဆာအတွေးများနှင့် ဆက်ဆံရန် အရန်အစီအစဉ်အဖြစ် ချန်ထားခဲ့ခြင်းဖြစ်သည်ဟု ဝေဝါးဝါး ခံစားခဲ့ရသည်။

ယင်းက ယခုအချိန်တွင် အပြည့်အဝ မနိုးသေးသော်လည်း...

အသက်စမ်းရေအတွင်း၌ နှစ်မြှုပ်ပြီးနောက်၊ နောက်ဆုံးတွင် စွမ်းရည်အချို့ကို ထုတ်ဖော်သင့်ပေသည်။

'ဒီအစီအစဉ်က မီးပုံထဲက သစ်သီးကို ဆွဲထုတ်ရမဲ့ပုံမျိုးပဲ။ သတိမထားမိရင် အားလုံးကို လောင်ကျွမ်းသွားနိုင်တယ်။ ဒါပေမဲ့... လောင်းကြေးထပ်ရကျိုးနပ်တယ်'

ကျွင်းရှောင်ယောက်၏ မျက်လုံးများက နက်နဲသော ဆုံးဖြတ်ချက် အရိပ်အမြွက်တို့ ပေါ်လာခဲ့သည်။

တစ်ခါတလေမှာ အားလုံးကို သတ္တိရှိရှိ စွန့်စားသင့်သည်။

ဤနည်းအားဖြင့်၊ တိုင်းတပါးသတ္တဝါများကလည်း ကျွင်းရှောင်ယောက်၏ အစီအစဉ်မှ တစ်စိတ်တစ်ပိုင်း ဖြစ်လာလိမ့်မည်။

ယခုအခါ ကျွင်းရှောင်ယောက်က စစ်တုရင်ကစားသမားဖြစ်ပြီး... ရှန်းရွှီကမ္ဘာတစ်ခုလုံးက စစ်တုရင်ခုံတစ်ခု ဖြစ်သည်။

ဆန့်ကျင်ခြင်းဧကရာဇ်များနှင့် တိုင်းတပါး သတ္တဝါများက ဆရာကြီးများ ဖြစ်ပုံရသော်လည်း အမှန်တော့ သူတို့အားလုံးမှာ သူ့လက်ထဲမှ နယ်ရုပ်များသာ ဖြစ်ချေသည်။

အဆုံးစွန်ရှေးဟောင်းလမ်းမှ ယခုအချိန်ထိ ကျွင်းရှောင်ယောက် ကစားခဲ့သမျှတွင် ဤပွဲက အကြီးမားဆုံးဟု ဆိုနိုင်သည်။

သူအနိုင်ရနိုင်လျှင် လုံးလုံးအသွင်ပြောင်းနိုင်ပြီး ကောင်းကင်နှင့် ကစားပွဲကိုပင် အနိုင်ယူနိုင်မည်။

ကျရှုံးလျှင်တော့ နောက်ဆက်တွဲဆိုးကျိုးများက ဆိုးရွားလွန်းမည် ဖြစ်သည်။

၎င်းက ကျွင်းရှောင်ယောက်ကိုယ်တိုင်သာမက ဤနယ်နိမိတ်နှင့် ကောင်းကင်ကိုးခု အင်မော်တယ်နယ်မြေကြီး တစ်ခုလုံးကိုပါ ထိခိုက်စေလိမ့်မည်။

ဤသည်မှာ ကျွင်းရှောင်ယောက်၏ အလောင်းအစားကြီးဟု ဆိုနိုင်သည်။

မည်သည့်လူငယ်မျှ သူကဲ့သို့ ရဲတင်းကြလိမ့်မည် မဟုတ်ပေ။

'ငါ့နယ်ပယ်ကို ဆက်ပြီးတိုးတက်စေဖို့ လိုနေသေးတယ်။ နောက်ဆုံးမှာတော့ ခွန်အားက အရာအားလုံးရဲ့ အခြေခံအုတ်မြစ်ပဲ'

ကျွင်းရှောင်ယောက် သူ့စိတ်ထဲမှ တွေးလိုက်မိသည်။

အင်မော်တယ်အရင်းအမြစ် ဘိုးဘေးသွေးကြောကို သူ၏အတွင်းစကြဝဠာအတွင်းသို့ ပေါင်းစည်းထားပြီးနောက်၊ ထိုကြီးကျယ်ခမ်းနားသော ဝိညာဉ်စွမ်းအင်၏ အကူအညီဖြင့် ခြေတစ်လှမ်း ပိုလှမ်းနိုင်သည်။

ကျွင်းရှောင်ယောက်လည်း စတင် လေ့ကျင့်တော့သည်။

သူ့ခွန်အားများ ပိုမြင့်မားလာပါက ဤအစီအစဉ်တစ်ခုလုံးအတွက် ပို၍ ယုံကြည်မှုရှိလာမည် ဖြစ်သည်။

ကျွင်းရှောင်ယောက်တို့ လေ့ကျင့်နေချိန်တွင်...

ကျန်သော အဖွဲ့ခြောက်ခုကလည်း နတ်ဘုရား၏ မိစ္ဆာအတွေးများ တည်နေရာကို ရှာနေခဲ့ကြသည်။

ရှန်းရွှီကမ္ဘာအတွင်းသို့ ဝင်ရောက်ခဲ့သော ကျန်ပါရမီရှင်များသည်လည်း တိုင်းတပါးသတ္တဝါများနှင့် တွေ့ဆုံပြီး တိုက်ပွဲများ စတင်ခဲ့ပေသည်။

တိုက်ပွဲများကတော့ သဘာဝအတိုင်း ရက်စက်သည်။

ရှန်းရွှီကမ္ဘာတစ်ခုလုံးတွင် နာကျင်စွာ ညည်းညူသံများနှင့် အော်ဟစ်ကြိမ်းမောင်းသံများက အခါအားလျော်စွာ ပဲ့တင်ထပ် ထွက်ပေါ်နေလေတော့သည်။

တစ်ချိန်တည်းမှာပင်၊ ရှန်းရွှီကမ္ဘာ၏ ဒေသတစ်ခုမှာ...

သွေးရောင် စစ်သင်္ဘောတစ်စင်းက လေထဲမှ ဖြတ်သန်းသွားခဲ့သည်။

ပတ်ဝန်းကျင်မှာလည်း ထူးခြားဆန်းပြားသော သတ္တဝါများ ပြည့်ကျပ်နေ၏။

စစ်သင်္ဘောပေါ်တော့ အနီရောင် ငှက်မွှေးဝတ်ရုံကို ဝတ်ဆင်ထားသည့် လူငယ်တစ်ဦး ရပ်နေလေသည်။

သူ့တွင် မီးတောက်မီးလျှံများကဲ့သို့ နီရဲနေသော မျက်လုံးတစ်စုံ ရှိသည်။

သူ့နောက်ကျောမှာလည်း ကောင်းကင်ဓားနှစ်လက်ကဲ့သို့ အနီရောင်အတောင်ပံတစ်စုံ ရှိ၏။

သူ့အနောက်မှာ မီးပင်လယ်ကြီးတစ်ခုလည်း ရှိခဲ့သည်။ ပူပြင်းသော မီးလျှံများကြောင့် ထောင်ပေါင်းများစွာသော သတ္တဝါများ အော်ဟစ်မြည်တမ်းနေရသည့် ပုံရိပ်များလည်း ပေါ်လွင်လျက်ရှိ၏။

ဤလူငယ်ကား ချီရှောင်းမျိုးနွယ်မှ ငယ်ရွယ်ပြီး အစွမ်းထက်သော ချီလင်ခုန်းမှတပါး အခြားသူမဟုတ်တော့ပေ။

သွေးရောင်ဇီးကွက်များက မီးထဲတွင် မွေးဖွားလာကြသော ထူးဆန်းသည့် ငှက်တစ်မျိုး ဖြစ်သည်။

ဤမျိုးနွယ်စု၏ အစွမ်းထက်ပုဂ္ဂိုလ်ကြီးများက ကမ္ဘာကြီးကိုပင် မီးလှောင်အိမ်အဖြစ် ပြောင်းလဲပစ်နိုင်သည်ဟု အဆိုရှိပေသည်။

ဇီးကွက်နီ ချီရှောင်းမျိုးရိုးသည် ယခင်က တိုင်းတစ်ပါးမှ ထိပ်တန်း တော်ဝင်မျိုးနွယ် ဖြစ်သည်။

သို့သော်လည်း၊ သူတို့မျိုးနွယ်တွင် အသန်မာဆုံးဖြစ်သော ဇီးကွက်နီဘုရင်က အင်မော်တယ်ဘုရင် ဖြစ်လာ၏။

ထို့ကြောင့် မျိုးနွယ်စုတစ်စုလုံး အဆင့်တက်သွားကြလေသည်။

အင်မော်တယ်ဘုရင်တစ်ပါး မွေးဖွားနိုင်သရွေ့၊ ထိုမျိုးနွယ်က ဧကရာဇ်တစ်ပိုင်းမျိုးရိုး ဖြစ်လာနိုင်သည်။

ဟုတ်ပေသည်၊ စစ်မှန်သည့် အင်မော်တယ်ဧကရာဇ်မျိုးရိုး ဖြစ်လာချင်လျှင်တော့ အင်မော်တယ်ဘုရင်ပဲ ရှိကြရမှာမဟုတ်ပါ။

နက်ရှိုင်းသော အခြေခံအုတ်မြစ်မျိုးစုံရှိရန်လည်း လိုအပ်သည်။

ဤအခိုက်အတန့်တွင် ချီလင်ခုန်း၏ရှေ့မှာ ထူးခြားဆန်းပြားသော သတ္တဝါတစ်စု ရပ်နေလေသည်။

ခေါင်းဆောင်က ကောင်းကင်နတ်ဆိုးမျိုးနွယ်၏ ယခင် အဓိပဓိတစ်ပိုင်းပုဂ္ဂိုလ် ဖြစ်သည်။

"အိုး၊ နောက်ဆုံးတော့ အင်မော်တယ်နယ်မြေကြီးရဲ့ ကျွင်းမိသားစုဝင်တွေ ပေါ်လာပြီပေါ့"

ချီလင်ခုန်း လှောင်ပြောင်ပြောဆိုလိုက်သည်။

ချီရှောင်းမျိုးနွယ်၏ လက်ရှိမျိုးဆက်တွင် ပါရမီရှင် နှစ်ဦးရှိသည်။

တစ်ယောက်က သူ ချီလင်ခုန်းဖြစ်ပြီး နောက်တစ်ယောက်ကတော့ သူ့အစ်ကို ချီဟုန်ယွီပင်။

ချီဟုန်ယွီက တိုင်းတပါးရှိ မျိုးဆက်သစ်လူငယ်များ၏ ထိပ်တန်းပုဂ္ဂိုလ်များထဲမှ တစ်ဦး ဖြစ်သည်။ ယခုအခါ သူက တိတ်တဆိတ် လေ့ကျင့်နေပြီး ရှန်းရွှီကမ္ဘာသို့ မဝင်ရသေးပေ။

"ကောင်းကင်နတ်ဆိုးရှစ်ပါးစလုံး ကျဆုံးသွားပြီ။ ကျွင်းရှောင်ယောက်က ကောလဟာလတွေအတိုင်းပါပဲ"

ချီလင်ခုန်း ရေရွတ်လိုက်၏။

ယခင်က ရှန်းရွီကမ္ဘာသို့ ဝင်ရောက်သောအခါ...

တိုင်းတပါးမှ ထိပ်တန်း လူငယ်အချို့သည် တိုင်းတပါး ထောက်လှမ်းရေး အဖွဲ့အစည်းထံမှ သတင်းအချက်အလက်တချို့ကို လက်ခံရရှိခဲ့ကြသည်။

ထိုအထဲတွင် အင်မော်တယ်နယ်မြေကြီးမှ သတိထားရမည့် လူတချို့ကို မှတ်တမ်းတင်ထား၏။

ပထမဆုံးက ကျွင်းရှောင်ယောက်အကြောင်း ရေးထားခြင်း ဖြစ်သည်။

ကျွင်းမိသားစု၏ မျိုးဆက်သစ် နတ်ဘုရားသားတော်၊ စီကွမ်သုည၊ ထို့အပြင် အင်မော်တယ်နယ်မြေကြီး၏ ခေတ်ပြိုင်မျိုးစေ့အဆင့် ပုဂ္ဂိုလ်တစ်ဦးလည်း ဖြစ်သည်။

အကယ်၍ ရှေးသမိုင်းတွင် မြှုပ်ထားသော မျိုးစေ့များ မထွက်လာပါက၊ ကျွင်းရှောင်ယောက်ဟာ နံပါတ်တစ်ဖြစ်ပြီး မည်သူမျှ ယှဉ်နိုင်မည်မဟုတ်ပေ။

"ဒါပေမဲ့ ဒီလိုဆိုရင် ကျွင်းရှောင်ယောက်ကို အနိုင်ယူဖို့က ပိုပြီးတော့တောင် စိတ်ဝင်စားစရာကောင်းလာပြီ"

"ငါက ဇီးကွက်နီဘုရင်ရဲ့ ဂုဏ်သိက္ခာကို ဆက်ခံချင်တာ။ ငါ့အစ်ကိုတောင် လှုပ်ရှားစရာမလိုဘူး။ ကျွင်းမိသားစုရဲ့ မျိုးဆက်သစ်တွေကို ငါ သုတ်သင်နိုင်တယ်"

ချီလင်ခုန်းက မာနကြီးပြီး အသံကျယ်ကျယ်ဖြင့် ပြောလိုက်သည်။

သို့သော်လည်း တိုင်းတပါးမှ သတ္တဝါများ၏စရိုက်ကိုက အများအားဖြင့် မာနကြီးပြီး တိုက်ခိုက်ချင်စိတ် အပြည့်ရှိပေသည်။

"ဒါပေမဲ့ အဲဒီမတိုင်ခင်မှာတော့ ငါတို့ ရှာတွေ့ထားတဲ့ တံဆိပ်ခတ်ထားတဲ့နေရာကို အရင်သွားရမယ်။ ကျွင်းရှောင်ယောက်ကိုတော့ နောက်မှ ငါကိုယ်တိုင်သတ်မယ်"

ချီလင်ခုန်း လှောင်ပြောင်လိုက်သည်။

ရှန်းရွီကမ္ဘာကို ရောက်ရှိလာသော ဧကရာဇ်တစ်ပိုင်း မျိုးနွယ်စုများက ချီရှောင်းမျိုးနွယ်တစ်ခုတည်း မဟုတ်ပါ။

အမှန်တော့ နောက်ပိုင်းတွင် အင်မော်တယ်ဧကရာဇ်မျိုးနွယ်မှ ပါရမီရှင်များပင် ရှိနိုင်သည်။

ချီလင်ခုန်းက အင်မော်တယ်နယ်မြေကြီးတွင် အသန်မာဆုံး မျိုးဆက်သစ်တစ်ဦးဖြစ်သော ကျွင်းရှောင်ယောက်ကို ဦးစွာ သတ်ချင်ခဲ့၏။

ဤနည်းဖြင့် သူက ကြီးမားသော ကောင်းမှုတစ်ခု ပြုလုပ်နိုင်ကာ ချီရှောင်းမျိုးနွယ်၏ ဂုဏ်သတင်းကို ပိုမိုမြင့်မားသော အဆင့်သို့ ပို့ဆောင်နိုင်လိမ့်မည်။