အခန်း ၁၅၂

အခန်း။ ၁၅၂

ဂူချန်က တည်ငြိမ်စွာပင် ဆက်လက်ရှင်းပြသည်။

"အခင်းဖြစ်တဲ့လမ်းမှာ စောင့်ကြည့်ကင်မရာ မရှိသလို ရှဲ့စီယုရဲ့ မာစီဒီးကားကလည်း အဲဒီနေ့ကမှ မတော်တဆမှု ဖြစ်ပြီး ကားပျက်စီးကာ Dashcam လည်း ပျက်သွားတာကြောင့် ဗီဒီယိုမှတ်တမ်း မရှိတာ အမှန်ပါပဲ။ ဒါပေမဲ့ ကျွန်တော့်လက်ထဲမှာ ဓာတ်ပုံ ၂ ပုံရှိပါတယ်။ တစ်ပုံက မတော်တဆမှု ဖြစ်ပြီးနောက်ပိုင်း ရှဲ့စီယုရဲ့ ကားပုံစံပါ။ နောက်တစ်ပုံကတော့ အဘိုးအိုနဲ့ ကျူးဂွေးကျန်းတို့က သူမတိုက်တယ်လို့ စွပ်စွဲပြီးနောက်ပိုင်းမှာ ရိုက်ထားတဲ့ ကားပုံစံပါ။ နှစ်ပုံလုံးမှာ ကားရဲ့အသွင်အပြင်မှာ ဘာမှပြောင်းလဲမှု မရှိပါဘူး"

"ဒါကတော့ အဲဒီနေ့က ချန်ဖုန်းလမ်းမပေါ်မှာ ရှဲ့စီယု မောင်းနှင်ခဲ့တဲ့ အမြန်နှုန်းပါ။ တွေ့တဲ့အတိုင်းပဲ သူမဟာ ၂၀ ကနေ ၃၀ ကီလိုမီတာနှုန်းလောက်ကိုပဲ တည်ငြိမ်စွာ မောင်းနှင်ခဲ့ပြီး ရုတ်တရက် ဘရိတ်အုပ်တာမျိုး လုံးဝမရှိခဲ့ပါဘူး။ ချန်ဖုန်းလမ်းရဲ့ ဒီအပိုင်းမှာ ယာဉ်ထိန်းမီးမရှိသလို လမ်းကူးမျဉ်းကြောင်းလည်း မရှိတဲ့အတွက် ရှဲ့စီယုအနေနဲ့ ကျန်းဂူဘင်နဲ့ ကျူးဂွေးကျန်းတို့ နှစ်ယောက်စလုံးကို တစ်ပြိုင်နက်တိုက်မိဖို့ဆိုတာ လုံးဝ မဖြစ်နိုင်သလောက်ပါပဲ။ သူတို့နှစ်ယောက်က အသိမိတ်ဆွေတွေဖြစ်ပြီး အတူတူ လမ်းလျှောက်နေမှသာ တစ်ပြိုင်နက်တိုက်မိဖို့ အကြောင်းရှိမှာပါ"

ဂူချန်က ဆက်လက်၍ "ကျန်းဂူဘင် ရဲ့ ကျန်းမာရေးအခြေအနေကို စစ်ဆေးကြည့်တဲ့အခါ အရိုးကျိုးပြီး ဒဏ်ရာအများအပြား ရထားတာကို တွေ့ရပေမဲ့ ကျူးဂွေးကျန်းမှာတော့ ဘာဒဏ်ရာမှ မရှိပါဘူး။ တကယ်လို့ ကားတစ်စီးတည်းနဲ့ တစ်ပြိုင်နက် တိုက်မိတာဆိုရင် ကျန်းဂူဘင်က အရိုးကျိုးပြီး ကျူးဂွေးကျန်းက ဘာဒဏ်ရာမှ မရှိတာမျိုး မဖြစ်နိုင်ပါဘူး"

"ကျူးဂွေးကျန်း ခင်ဗျားကို မေးပါရစေ။ ခင်ဗျား နစ်နာသူဆိုရင် ကားရဲ့ ဘယ်အပိုင်းက ခင်ဗျားကို တိုက်သွားတာလဲ။ ကားရဲ့ ဘယ်နေရာနဲ့ ခင်ဗျား ထိမိတာလဲ"

ကျူးဂွေးကျန်းက မျက်လုံးများ လှည့်ပတ်ကာ "ဘယ်လိုလုပ် မှတ်မိမှာလဲ။ သူမ တိုက်သွားတာပဲ။ သူမ တာဝန်ယူရမှာပေါ့။ ရှဲ့စီယု အမြန်မောင်းလာပြီး ကျွန်မတို့နှစ်ယောက်စလုံးကို တိုက်သွားတာ။ ကျွန်မက အသားမာလို့ ဒဏ်ရာမရတာ" ဟု ပြောသည်။

ဂူချန်က "ရှဲ့စီယု မောင်းတဲ့အရှိန်မှာ ရုတ်တရက် ဘရိတ်အုပ်တာ မရှိတဲ့အတွက် ကားက လူတွေကို လွင့်ထွက်သွားအောင် မတိုက်နိုင်ပါဘူး။ တကယ်လို့ တိုက်မိတယ်ဆိုရင်တောင် ကားက ဖြည်းဖြည်းချင်းပဲ ရပ်သွားမှာမို့ လူတွေက ကားအောက်မှာပဲ ညပ်နေရမှာပါ။ ပထမအချက်အနေနဲ့ ရှဲ့စီယုက ရှေ့က လူတွေကို မြင်ရင် အရှိန်လျှော့မှာပဲ။ အရှိန်လျှော့တယ်ဆိုတာ ဘရိတ်အုပ်တာပါ။ ဒါပေမဲ့ ကားရဲ့ သွားလာမှုမှတ်တမ်းအရ သူမ ဘရိတ်မအုပ်ခဲ့တဲ့အတွက် လူတစ်ယောက်ကိုမှ မတိုက်မိခဲ့ပါဘူး။ ဒုတိယအချက်က ၂၀၊ ၃၀ ကီလိုမီတာနှုန်းမှာ ဘရိတ်မအုပ်ဘဲနဲ့ လူတွေကို လွင့်ထွက်သွားအောင် မတိုက်နိုင်ပါဘူး။ တတိယအချက်က အကယ်၍ ကားအောက်မှာ ညပ်နေတာဆိုရင် ရှဲ့စီယု ချက်ချင်း ၁၂၀ အရေးပေါ်ဆေးကုသရေး ဖုန်းဆက်ရမှာပါ။ ဒါပေမဲ့ ဖြစ်စဉ်မှာ ကျန်းဂူဘင်က ကားနဲ့ အဝေးကြီးမှာ ရှိနေတာပါ။ စတုတ္ထအချက်က တကယ်လို့ တိုက်မိတယ်ဆိုရင် တစ်ယောက်က အရိုးကျိုးပြီး နောက်တစ်ယောက်က ဘာမှမဖြစ်တာ မဖြစ်နိုင်ပါဘူး"

"ဒီအချက်တွေအားလုံးအရ ကျွန်တော့်အမှုသည် ရှဲ့စီယုက ဘယ်သူ့ကိုမှ မတိုက်မိခဲ့ပါဘူး"

ဂူချန်၏ အချက်အလက်နှင့် ယုတ္တိဗေဒမှာ အလွန်ရှင်းလင်းပြီး တိကျလှသည်။

ကားမောင်းသူတစ်ယောက်အနေဖြင့် လူကိုတိုက်မိတော့မည်ဆိုလျှင် ရုတ်တရက် ဘရိတ်အုပ်မိမှာ သေချာသည်။

သို့သော် ရှဲ့စီယု၏ ကားမှတ်တမ်းတွင်မူ ထိုသို့မရှိခဲ့ပေ။

ဤသည်မှာ သူမ တိုက်မိခြင်း မရှိကြောင်း အကောင်းဆုံး သက်သေပင်။

တိုက်ရိုက်ထုတ်လွှင့်မှုကြည့်နေသူများမှာလည်း အံ့အားသင့်ကာ မှတ်ချက်များ ရေးသားကြသည်။

[ဝါး ရှေ့နေဂူက တကယ်ကို တော်တာပဲ]

[ဒါက ရှေ့နေဂူရဲ့ အမှု စိစစ်နိုင်စွမ်းပဲ။ ရှဲ့စီယု တကယ် မတိုက်မိခဲ့ဘူးဆိုတာ သေချာသွားပြီ]

[Dashcam မရှိပေမဲ့ ကားရဲ့ မှတ်တမ်းတွေက အားလုံးကို ပြောပြနေတာပဲ။ ကားက ဖြည်းဖြည်းချင်းပဲ အရှိန်လျှော့သွားတာ]

[ရှဲ့စီယု လုံးဝ မတိုက်မိခဲ့ပါဘူး။ တိုက်မိရင် အာမခံခေါ်မှာပေါ့။ သူမက စေတနာနဲ့ ကူညီပေးတာကို ငွေညှစ်ခံရတာ။ တကယ့်ကို ရွံစရာကောင်းလိုက်တာ]

[ရှေ့နေဂူ တကယ် မိုက်တယ်]

[အခုမှပဲ နားလည်တော့တယ်]

[ဒီလူနှစ်ယောက်က တမင်သက်သက် ငွေညှစ်နေတာပဲ။ သူတို့ တာဝန်ယူကို ယူရမယ်]

[ဟုတ်တယ် ငွေညှစ်တာဆိုတာ လုယက်တာနဲ့ အတူတူပဲ မဟုတ်လား။ လုယက်ရင်တော့ တာဝန်ယူရမှာပေါ့]

[ဒီလိုမျိုး လူတွေကို လွတ်လပ်စွာ ငွေညှစ်ခွင့် ပေးထားလို့ မရဘူးလေ ဟုတ်တယ်မလား]

ကျန်းကျီချန်က မကျေမနပ်ဖြင့် "ခင်ဗျား ပြောနေတဲ့ အပိုစကားတွေကို ဘယ်သူက နားထောင်မှာလဲ။ အခြေအနေက ရိုးရိုးလေးပါ။ အခင်းဖြစ်တဲ့အချိန်မှာ သူမ ကားတစ်စီးပဲ ရှိတာမို့ သူမ တိုက်တာပဲ ဖြစ်ရမယ် ခြေထောက်ကျိုးတာလည်း သူမ တိုက်လို့ပဲ သူမ တာဝန်ယူကို ယူရမယ်" ဟု အော်ပြောသည်။

ကျူးဂွေးကျန်းကလည်း ဘေးကနေ အော်ဟစ်သည်။

"ကျွန်မ မျက်မြင်သက်သေပဲ။ သူမ တိုက်တာပဲဟာကို ဒီမှာ ဘာတွေ လာပြီး ရေရွတ်နေတာလဲ။ လူကို တိုက်ပြီး မဝန်ခံရဲတာလား။ သူမက ဘယ်လိုလူမျိုးလဲ"

တရားသူကြီးချုပ် ယန်လီဝေက တရားစီရင်ရေးတူကို ရိုက်လိုက်သည်။

"တိတ်ဆိတ်ကြပါ"

ဂူချန်က ဆက်လက်ပြောကြားသည်။

"တရားခွင်မှာ အထောက်အထားဆိုတာ အသက်ပါ။ ပထမအဆင့်မှာ ကျွန်တော့်အမှုသည်ကို ထောင်ဒဏ် ၁၀ နှစ်၊ လျော်ကြေး ယွမ် ၁.၄ သန်း ပေးဆောင်ခိုင်းခဲ့တာကို ကျွန်တော် လုံးဝ လက်မခံနိုင်ပါဘူး။ ရှဲ့စီယု တိုက်မိတယ်ဆိုတဲ့ အထောက်အထား တစ်စုံတစ်ရာမှ မရှိသလို ယုတ္တိဗေဒအရ ဆန်းစစ်ကြည့်ရင်လည်း သူမ မတိုက်မိကြောင်း ထင်ရှားနေပါတယ်"

"တစ်စုံတစ်ယောက်က ငွေညှစ်ချင်တဲ့ စကားလုံး အနည်းငယ် ပြောလိုက်ရုံနဲ့ ကျွန်တော့်အမှုသည်က လျော်ကြေးပေးရမှာလား ထောင်ကျခံရမှာလား"

"မတော်တဆမှု ဟန်ဆောင်ပြီး ငွေညှစ်တာတွေက အခုနောက်ပိုင်း ခပ်စိပ်စိပ် ဖြစ်လာနေပါတယ်။ အဘိုးအိုကို ကူညီတာက ဘယ်တုန်းက အမှားဖြစ်သွားရတာလဲ။ အဘိုးအိုကို ကူညီတဲ့သူက ကိုယ့်ကိုကိုယ် အပြစ်မရှိကြောင်း သက်သေပြနေရတော့မှာလား။ လူကောင်းတွေက ဘာလို့ အပြစ်မရှိကြောင်း သက်သေပြနေရမှာလဲ။ တကယ်တိုက်မိတဲ့သူက အထောက်အထား ဗီဒီယို တင်ပြရမှာ မဟုတ်ဘူးလား ပါးစပ်သက်သေနဲ့ပဲ အမှုတည်ဆောက်လို့ ရတော့မှာလား"

ဂူချန်က ဆက်လက်တင်ပြသည်။

"ယုတ္တိအရှိဆုံး ဆုံးဖြတ်ချက်ကတော့ အဲဒီအချိန်က လမ်းက မြေပြင်မညီညာတဲ့အတွက် ကျန်းဂူဘင်က လမ်းလျှောက်ရင်း သူ့ဘာသာ လဲကျသွားတာပါ။ ရှဲ့စီယုက လဲကျနေတဲ့ အဘိုးအိုကို မြင်လို့ သွားကူညီမိရာကနေ အခုလို ငွေညှစ်ခံရတာပါ"

"ကျူးဂွေးကျန်းနဲ့ ပတ်သက်ရင်တော့... တရားသူကြီးချုပ်ခင်ဗျာ ကျူးဂွေးကျန်းက ငွေညှစ်လေ့ရှိတဲ့သူ ဖြစ်ပါတယ်။ ကျွန်တော့်လက်ထဲမှာ ရှိတဲ့ အထောက်အထားတွေအရ သူမရဲ့ ငွေညှစ်မှုပေါင်းက အကြိမ် ၂၀ ကျော်ရှိနေပြီး စုစုပေါင်း ငွေပမာဏကလည်း ယွမ် ၂ သိန်းကျော် ရှိနေပါပြီ"