အခန်း ၉၆၆

အခန်း ( ၉၆၆ ) အံ့မခန်းစွမ်းအား။

စကားလုံးဖြင့် ဖော်ပြန်ရန် မစွမ်းသာသော မြင်ကွင်းတစ်ခုက လူတိုင်းရှေ့တွင် ပေါ်လာခဲ့သည်။

စစ်နတ်ဘုရားတောင်ထိပ်တွင်၊ ချောမောသော အဖြူရောင်ဝတ်စုံဝတ် လူငယ်တစ်ဦးက နှစ်ပေါင်းများစွာ စိုက်ထူထားသော နတ်ဘုရားငိုကြွေး စစ်လှံပုဆိန်ကိုနှုတ်ယူ၍ ကောင်းကင်ကို ချိန်ရွယ်မြှောက်ထား၏။

ဤမြင်ကွင်းက လူတိုင်းကို တုန်လှုပ်ချောက်ချားစေပြီး လိပ်ပြာဝိညာဉ်များပင် လွင့်စဉ်မတတ် ဖြစ်စေခဲ့ပေသည်။

"ဒါက ဘယ်လိုလုပ်ပြီး ဖြစ်နိုင်မှာလဲ"

ပိအန်းမင်းသား၊ လီကျိုးမင်နှင့် အခြားသူများကို မဆိုထားဘိ။

ဤအခိုက်အတန့်တွင် မော့ကျဲဧကရာဇ်သားတော်၏ အမူအရာသည်ပင် ပြောင်းလဲနေခဲ့ပြီ ဖြစ်သည်။

သူ့စိတ်တို့ မတည်ငြိမ်နိုင်တော့ပေ။

ပထမဆုံး စစ်နတ်ဘုရားနှင့်အတူ နတ်ဘုရားငိုကြွေး စစ်လှံပုဆိန်၏ ဒဏ္ဍာရီကို တိုင်းတပါး ပြည်နယ်ဆယ်ခုမှ လူတိုင်းသိကြသည်။

ယခုမူကား အဘယ်နည်း။

ဒဏ္ဍာရီလာ နတ်ဘုရားငိုကြွေး စစ်လှံပုဆိန်မှာ မြေပြင်မှ ဆွဲနှုတ်ယူခြင်းခံလိုက်ရပြီ ဖြစ်သည်။

ဤတုန်လှုပ်မှုက ပြောမပြတတ်အောင်ပင်။

"ငါ့မိတ်ဆွေလေး... သူ တကယ်လုပ်ခဲ့ပြီ။ နတ်ဘုရားငိုကြွေး စစ်လှံပုဆိန်ကလည်း သူ့ကိုပိုင်ရှင်အဖြစ် အသိအမှတ်ပြုလိုက်ပြီ"

အကြီးအကဲမူ၏ မျက်လုံးများလည်း တုန်လှုပ်သွားလေသည်။

နတ်ဘုရားငိုကြွေး စစ်လှံပုဆိန်မှ သွေးကြောကဲ့သို့လိုင်းများက ကျွင်းရှောင်ယောက်၏လက်ကို ထိုးဖောက်ဝင်ရောက်၍ သွေးများ စုပ်ယူနေကြောင်း သူမြင်လိုက်ရသည်။

ဤသည်မှာ၊ နတ်ဘုရားငိုကြွေး စစ်လှံပုဆိန်က သူ့အား ပိုင်ရှင်အဖြစ် အလိုအလျောက် အသိအမှတ်ပြုလိုက်သော အဓိပ္ပါယ်ပင်။

ယင်းက အလွန်အရေးကြီးသည်။

'ဟင်၊ ဒီလှံပုဆိန်...'

နတ်ဘုရားငိုကြွေး စစ်လှံပုဆိန်ကိုကြည့်ရင်း စူးဟုန်ယီ၏ စိတ်ထဲတွင် ခဏတာ တုန်လှုပ်သွားသည်။

သူ့စိတ်ထဲမှာလည်း မှုန်ဝါးဝါးမြင်ကွင်းတစ်ခု ထွက်ပေါ်လာ၏။

သွေးနှင့်မီးများ တောက်လောင်နေသော စစ်မြေပြင်...

သူ့ဘေးမှာလည်း နတ်ဘုရားငိုကြွေး စစ်လှံပုဆိန်ကိုကိုင်ပြီး ရပ်နေသော မှုန်ဝါးဝါးလူရိပ်တစ်ခု...

ဟုတ်သည်၊ ဤမြင်ကွင်းများက မကြာပေ။ စူးဟုန်ယီ ကိုယ်တိုင်ပင် စိတ်ရှုပ်ထွေးသွားခဲ့မိသည်။

"နတ်ဘုရားငိုကြွေး စစ်လှံပုဆိန်ကို မင်း ဘယ်လိုလုပ်ပြီး ဆွဲထုတ်နိုင်တာလဲ"

မော့ကျဲဧကရာဇ်သားတော် အံ့အားသင့်ပြီး မယုံကြည်နိုင်စွာ ပြောလိုက်မိသည်။

ကောင်းကင်ကို တုန်လှုပ်စေနိုင်သော နတ်ဘုရားငိုကြွေး စစ်လှံပုဆိန်မှ ထွက်ပေါ်လာသည့် ကမ္ဘာကြီးကိုပင် ဖျက်ဆီးနိုင်သော စွမ်းအားကို သူ ခံစားနိုင်သည်။

ဤအခိုက်အတန့်တွင်၊ နတ်ဘုရားငိုကြွေး စစ်လှံပုဆိန်ကို ဆွဲထုတ်ခဲ့သော ကျွင်းရှောင်ယောက်လည်း... နတ်ဘုရားငိုကြွေး စစ်လှံပုဆိန်က သူ၏ ကစဉ့်ကလျားသွေးများကို အရူးအမူး စုပ်နေသကဲ့သို့ ခံစားလိုက်ရသည်။

ဤအရာကား ကမ္ဘာကိုဖျက်စီးနိုင်သော နတ်ဆိုးလက်နက် ဖြစ်၏။

ဤနေရာတွင်၊ သာမန်လူတစ်ဦးဖြစ်ပါက နတ်ဘုရားငိုကြွေး စစ်လှံပုဆိန်ကြောင့် ချက်ချင်း သေဆုံးသွားနိုင်သည်။

သို့သော်၊ ကျွင်းရှောင်ယောက်ကတော့ မတူပေ။

သူ၏ ကစဉ့်ကလျားခန္ဓာက သူ့အား အဆုံးအစမဲ့လုနီးပါး စွမ်းအားတို့ကို ပေးနိုင်သည်။

သူ၏ ချီနှင့် သွေးများက အလွန်အားကောင်း၏။

သွေးကြောများကဲ့သို့ နတ်ဘုရားငိုကြွေး စစ်လှံပုဆိန်၏ လိုင်းများက ကျွင်းရှောင်ယောက်၏ ကစဉ့်ကလျားသွေးများကို ရူးသွပ်စွာ စုပ်ယူနေခဲ့သည်။

ကျွင်းရှောင်ယောက်၏ အနက်ရောင်ဆံပင်များလည်း တဖြည်းဖြည်းချင်း ဖြူလာပြီး နောက်ဆုံးတွင် နှင်းများပမာ ဆွတ်ဆွတ်ဖြူသွား၏။

ဤအခိုက်တွင် အဖြူရောင်ဆံပင်၊ အဖြူရောင်ဝတ်စုံတို့ဖြင့် နတ်ဘုရားငိုကြွေး စစ်လှံပုဆိန်ကိုကိုင်ကာ စစ်နတ်ဘုရားတောင်ထိပ်တွင်ရပ်နေသော သူ့မြင်ကွင်းက ရှိနေသူတိုင်း၏ စိတ်ထဲတွင် နက်နက်နဲနဲ ထွင်းထုပြီးသား ဖြစ်သွားတော့သည်။

"သခင်လေး..."

တုရှန်ချွန်းချွန်း၏ မျက်လုံးများ မှုန်ဝါးသွားသည်။

တုရှန်ဝမ်ဝမ်၊ ဖေးချင်ရွယ်နှင့် စူးဟုန်ယီတို့လည်း ငေးမောသွား၏။

အမှောင်ရိပ်မှ လျှို့ဝှက်စွာ စောင့်ကြည့်နေသော လော့ရှန်းလင်သည်ပင် တုန်လှုပ်သွားတော့သည်။

"မင်း..."

ပုန်းကွယ်နေသော နဂါးတစ်ကောင် နိုးထလာသကဲ့သို့ ကျွင်းရှောင်ယောက်၏ အရှိန်အဝါများအား သတိပြုမိပြီးနောက် မော့ကျဲဧကရာဇ်သားတော်၏ အမူအရာက အလွန်လေးနက်လာခဲ့သည်။

မူလက၊ မော့ကျဲဧကရာဇ်သားတော်သည် ကျွင်းရှောင်ယောက်ကို အနိုင်ယူရန် တစ်ရာ ရာခိုင်နှုန်း ယုံကြည်မှုရှိသည်။

သို့သော်၊ ယခုအချိန်မှာတော့ သူ မပြောတတ်တော့ပေ။

အကြောင်းမူ ယခုအချိန်တွင် ကျွင်းရှောင်ယောက်က လျှို့ဝှက်ဆန်းကြယ်လွန်းပြီး သူ၏ အရှိန်အဝါကလည်း အားကောင်းလွန်းသောကြောင့်ဖြစ်သည်။

ယင်းမှာ၊ ဒဏ္ဍာရီလာ ပထမမျိုးဆက် စစ်နတ်ဘုရား၊ ကမ္ဘာဖျက်ဆီးခြင်း နတ်ဆိုးဘုရင်ကဲ့သို့ပင်။

"လာ၊ လာတိုက်ခိုက်စမ်း။ နတ်ဘုရားငိုကြွေး စစ်လှံပုဆိန်ကို ဆွဲထုတ်ပြီးနောက် မင်း ဘယ်လောက်ထိ သန်မာလာတယ်ဆိုတာ ကြည့်ရအောင်"

မော့ကျဲဧကရာဇ်သားတော် အော်ပြောလိုက်သည်။ သူ့ကိုယ်သူ ရဲဆေးတင်လိုက်သည့်ပမာ သူ့အသံက ဟိန်းထွက်သွား၏။

သို့သော်လည်း ကျွင်းရှောင်ယောက်၏ အမူအရာက ပြောင်းလဲခြင်းမရှိပေ။

သူ့ခန္ဓာကိုယ်အတွင်းမှ အနှိုင်းမဲ့သွေးများက ဆူပွက်ပြီး စတုတ္ထမြောက် နတ်ဘုရားစွမ်းရည် ထွက်ပေါ်လာခဲ့သည်။

တချိန်တည်းမှာပင်၊ ကစဉ့်ကလျားစွမ်းအင်ဖြင့် ပေါင်းစပ်ထားသော စကြာဝဠာ၏မူလ စွမ်းအားတစ်ခုက ကျွင်းရှောင်ယောက်၏ခန္ဓာကိုယ်မှ ထွက်ပေါ်လာပြီး နတ်ဘုရားငိုကြွေး စစ်လှံပုဆိန်ထဲသို့ စီးဝင်သွား၏။

"ဝုန်း"

နတ်ဘုရားငိုကြွေး စစ်လှံပုဆိန်၏ ဓားသွားက တုန်ခါပြီး ဟင်းလင်းပြင်ကိုပင် ပြိုကွဲစေနိုင်သော အသံတစ်မျိုး ထွက်ပေါ်လာခဲ့သည်။

ကမ္ဘာကြီးကို ဖျက်စီးပစ်နိုင်ပုံရသော စွမ်းအားတစ်ခုကလည်း ပေါက်ကွဲထွက်လာခဲ့၏။

ပရိသတ်ထဲရှိ ပါရမီရှင်အားလုံး ထိတ်လန့်တုန်လှုပ်သွားကြသည်။

အကြီးအကဲမူနှင့် နန်းတော်မှ အခြား အကြီးအကဲများပင်လျှင် အမူအရာများ ပြောင်းလဲသွားကြသည်။ ထိုအရှိန်အဝါက သူတို့ကိုပင် လေးနက်သွားစေခဲ့၏။

"ငါ ဘယ်လောက်တောင် သန်မာလဲ... ဟုတ်လား"

ကျွင်းရှောင်ယောက် ပြုံးလိုက်သည်။

"ငါလုပ်နိုင်တာကို မင်းမှာ လက်ခံဖို့ အရည်အချင်းမရှိဘူး"

ပြောပြီးသည်နှင့်၊ ကျွင်းရှောင်ယောက်က နတ်ဘုရားငိုကြွေး စစ်လှံပုဆိန်ဖြင့် မော့ကျဲဧကရာဇ်သားတော်ကို ပစ်ထိုးလိုက်သည်။

စတုတ္ထမြောက် နတ်ဘုရားစွမ်းရည်၊ စကြာဝဠာ၏မူလစွမ်းအားနှင့် ကစဉ့်ကလျားခန္ဓာ စွမ်းအားတို့ကို ပေါင်းစပ်ထားသော အင်အားက အလွန်ကြီးမားသည်။

နတ်ဘုရားငိုကြွေး စစ်လှံပုဆိန်ကိုယ်တိုင်ကလည်း ကမ္ဘာကြီးကို ဖျက်ဆီးပစ်နိုင်သော စွမ်းအားများရှိ၏။

ဤတိုက်ခိုက်မှုက မိုးနှင့်မြေကိုပိုင်းခြားကာ ကမ္ဘာကြီးကို ကွဲကြေစေခဲ့သည်။

ဟင်းလင်းပြင် အက်ကြောင်းများကလည်း ကောင်းကင်တခွင်မှာ မိုင်ထောင်ချီကာ ပျံ့နှံ့သွား၏။

ကြယ်များ တုန်ခါပြီး နေနှင့်လ၏ အလင်းရောင်များပင် ပျောက်ကွယ်သွားရသည်။ ဤလှံချက်အောက်တွင် ကမ္ဘာကြီးတစ်ခုလုံး ပျက်စီးသွားခဲ့သလိုပင်။

ကြောက်စရာကောင်းသော ပျက်စီးခြင်းစွမ်းအားကို ခံစားလိုက်ရသဖြင့် မော့ကျဲဧကရာဇ်သားတော်၏ အမူအရာက ရုတ်တရက် ပြောင်းလဲသွားခဲ့ရသည်။

"နိယာမအားလုံးကို တားဆီးခြင်း၊ နယ်မြေဆယ်ခု"

မော့ကျဲဧကရာဇ်သားတော်က ဟိန်းဟောက်လိုက်သည်။ သူ့ခန္ဓာကိုယ်ပတ်လည်ရှိ နတ်လက်စွပ်ကွင်းဆယ်ခုက အဆုံးမဲ့တောက်ပသော အလင်းများ ထုတ်လွှတ်လာ၏။

ယင်းက သူ့ခန္ဓာကိုယ်ကို အလွှာလိုက် တစ်ထပ်စီ ဖုံးအုပ်ထားသော ကမ္ဘာဆယ်ခုအဖြစ် ပြောင်းလဲသွားသကဲ့သို့ပင်။

ဤသည်မှာ မော့ကျဲဧကရာဇ်သားတော် သန့်စင်ထားသော အဆုံးစွန် နတ်ဘုရားစွမ်းရည်ဖြစ်ပြီး အရာအားလုံးကို ခုခံနိုင်စွမ်းရှိသည်။

အဆင့်တူ ကျွမ်းကျင်သူတစ်ဦးပင်လျှင် တားမြစ်နည်းလမ်းများကို အသုံးပြုခြင်းဖြင့် ဤနယ်မြေဆယ်ခုကို ဖြတ်ကျော်နိုင်မည် မဟုတ်ပေ။

ဤနယ်မြေဆယ်ခုတွင် တစ်ဆင့်ချင်းစီက အားကောင်းသော ဖိနှိပ်မှုစွမ်းရည် ရှိသည်။ နတ်ဘုရားစွမ်းရည်မှန်သမျှ နောက်ဆုံးတွင် လွန်လွန်ကဲကဲ ဖိနှိပ်ခံရလိမ့်မည်။

သို့သော်...

ကျွင်းရှောင်ယောက်၏ မျက်လုံးများက အရောင်တလက်လက် တောက်နေသည်။

စစ်နတ်ဘုရားကျမ်း၏ အခန်းကဏ္ဍက နတ်ဘုရားစွမ်းရည်များကို ကောက်ချက်ချရန်သက်သက် မဟုတ်ပါ။

အခြား နတ်ဘုရားစွမ်းရည်များ၏ အားနည်းချက်များကို ရှာဖွေပြီး ချိုးဖျက်နိုင်သည့် အခြားစွမ်းရည်တစ်ခုလည်း ရှိသည်။

ဤနယ်မြေဆယ်ခုက အပြင်လူများ၏ အမြင်မှာတော့ ပြီးပြည့်စုံပြီး ချွတ်ယွင်းချက် မရှိပေ။

သို့သော်လည်း စစ်နတ်ဘုရားကျမ်းကို လေ့ကျင့်ထားသော ကျွင်းရှောင်ယောက်၏ အမြင်မှာတော့ ချို့ယွင်းချက်အချို့ ရှိနေသည်။

ယင်းက သေးငယ်သော်လည်း ဟာကွက် ဖြစ်၏။

"သတ်"

ကျွင်းရှောင်ယောက်က ကြိမ်းမောင်းလိုက်သည်။ နတ်ဘုရားငိုကြွေး စစ်လှံပုဆိန်က ဆက်လက် ပြေးထွက်သွား၏။

"ဝုန်း"

နှစ်ဖက် ထိပ်တိုက်တွေ့ဆုံခြင်းက ကြယ်နှစ်စင်း တိုက်မိသကဲ့သို့ ကျယ်လောင်သော အသံတစ်ခု ထွက်ပေါ်လာခဲ့သည်။

"ဝုန်း၊ ဝုန်း၊ ဝုန်း..."

အမှောင်နှင့်ရွှေရောင် နတ်ဘုရားငိုကြွေး စစ်လှံပုဆိန်က ဟာကွက်တည့်တည့်သို့ကျရောက်ပြီး အတားအဆီး နယ်မြေများကို တစ်ခုပြီးတစ်ခု ဖောက်ဝင်သွား၏။

မော့ကျဲဧကရာဇ်သားတော်၏ စွမ်းအင်ခုခံကာကွယ်ခြင်း နတ်လက်စွပ်ကွင်းဆယ်ခုက တစ်ခုပြီးတစ်ခု ကျိုးပေါက်သွားတော့သည်။

"ဒါက ဘယ်လိုလုပ်ပြီး ဖြစ်နိုင်မှာလဲ"

မော့ကျဲဧကရာဇ်သားတော် မျက်စိမျက်နှာပျက်သွားပြီး မယုံကြည်နိုင်စွာ အော်ဟစ်လိုက်သည်။

သူ၏ နတ်လက်စွပ်ကွင်းဆယ်ခုသည် တူညီသော အဆင့်ရှိ နတ်ဘုရားစွမ်းအားအများစုကို ခုခံနိုင်စွမ်းရှိသည်။

သို့သော်၊ ကျွင်းရှောင်ယောက်ကိုတော့ အနည်းငယ်မျှ မတားဆီးနိုင်ပေ။

အကြောင်းပြချက်က တစ်ခုသာ ရှိသည်။

ဤကျွင်းရှောင်ယောက်က တကယ်ကို သန်မာလွန်းပေသည်။

နတ်ဘုရားငိုကြွေး စစ်လှံပုဆိန်က အလွန်ကြီးစိုးပြီး အတားအဆီးအားလုံးကို ဖျက်ဆီးသွားသည်။

နတ်ဆိုးက တားဆီးပါက နတ်ဆိုးကိုသတ်မည်။

နတ်ဘုရားများ တားဆီးပါက နတ်ဘုရားကိုပါ သတ်ရမည်။

ဤသည်မှာ ပထမမျိုးဆက် စစ်နတ်ဘုရား၏ ထာဝရ တိုက်ခိုက်ချင်စိတ်နှင့် နတ်ဘုရားငိုကြွေး စစ်လှံပုဆိန်၏ ကမ္ဘာကို ဖျက်စီးနိုင်သော စွမ်းအား ဖြစ်သည်။

နတ်ဘုရားငိုကြွေး စစ်လှံပုဆိန်၏ရှေ့မှာ မည်သူမျှ မရပ်နိုင်ပေ။

ချွန်ထက်သော ဓားသွားက နယ်မြေဆယ်ခုကိုချိုးဖောက်ပြီး မော့ကျဲဧကရာဇ်သားတော်ရှေ့သို့ ရောက်လာခဲ့သည်။

"မဟုတ်ဘူး"

မော့ကျဲဧကရာဇ်သားတော် ဝမ်းခေါင်းသံကြီးဖြင့် အော်ဟစ်လိုက်သည်။

ဓားသွားက မော့ကျဲဧကရာဇ်သားတော်၏ခန္ဓာအား ထိုးဖောက်ဝင်ရောက်သွားသည်။ အဓိပဓိသွေးများက နေရာအနှံ့ကို ဖြာကျသွား၏။

မော့ကျဲဧကရာဇ်သားတော်၏ ခန္ဓာကိုယ်က နတ်ဘုရားငိုကြွေး စစ်လှံပုဆိန်နောက်သို့ အရှိန်ဖြင့်လွင့်ပါးသွားပြီး စစ်နတ်ဘုရားတောင်တွင် တိုက်ရိုက် စိုက်ဝင်သွားတော့သည်။

လှံပုဆိန်မှ ကြောက်မက်ဖွယ်ကောင်းသော ပျက်စီးခြင်းစွမ်းအားက မော့ကျဲဧကရာဇ်သားတော်၏ အတွင်းအင်္ဂါများနှင့် ရှေးဦးဝိညာဉ်ကိုပင် ကြေမွသွားစေခဲ့သည်။

တိတ်ဆိတ်သည်။

ပြင်းထန်သော တိုက်ခိုက်မှုအပြီးတွင် အရာအားလုံးက တိတ်ဆိတ်ငြိမ်သက်သွားခဲ့သည်။

မိုးနှင့်မြေကြားမှာလည်း အသံများအားလုံး ပျောက်ကွယ်သွား၏။

ကြီးစွာသော တုန်လှုပ်ချောက်ချားမှုတို့ ပြည့်နှက်နေသော မျက်နှာများသာ ကျန်ခဲ့သည်။

မော့ကျဲဧကရာဇ်မျိုးနွယ်၏ မော့ကျဲဧကရာဇ်သားတော်၊ တိုင်းတပါး၏ ဧကရာဇ်ငယ်ခုနစ်ပါးအနက်မှ တစ်ပါးမှာ...

စစ်နတ်ဘုရားတောင်တွင် ကျွင်းရှောင်ယောက်၏ အလွယ်တကူ သတ်ဖြတ်ခံခဲ့ရပြီ ဖြစ်သည်။