အခန်း ၉၇၀

အခန်း ( ၉၇၀ ) ကမ္ဘာဖျက်ဆီးရေးတားမြစ်လက်နက်။

စစ်နတ်ဘုရားနန်းတော်မှာ တိုင်းတပါး၏ အထွတ်အမြတ် အကယ်ဒမီတစ်ခု ဖြစ်သည်။

သို့ဖြစ်ပေရာ၊ သူတို့ထဲတွင် အင်မော်တယ်ဘုရင် အကျော်အမော် သဘာဝအတိုင်း ရှိ၏။

ဟုတ်သည်၊ ဤသည်မှာ အကယ်ဒမီတစ်ခုသာဖြစ်၍ အင်မော်တယ်ဘုရင်များ အများအပြား မရှိပေ။

သို့သော်လည်း အင်မော်တယ်ဘုရင် တစ်ပါးတည်းဖြစ်လျှင်ပင် အလွန်အရှိန်အအဝါကြီးမားကာ လူတိုင်း မထိပါးနိုင်ပေ။

ဤအခိုက်အတန့်တွင်၊ စစ်နတ်ဘုရားနန်းတော်အတွင်း၌ လောကီရေးရာများကို လျစ်လျူရှုလုနီးပါးဖြစ်သော အင်မော်တယ်ဘုရင်က ကျွင်းရှောင်ယောက်ကို ဘေးကင်းစေလိုကြောင်း ပြောဆိုလာခဲ့ပြီ ဖြစ်သည်။

ဤအလေးချိန်က လော့ရှန်းလင်ထက် များစွာပို၍ လေးပေသည်။

နောက်ဆုံးတွင်၊ အင်မော်တယ်ဘုရင်တစ်ပိုင်း၏ အဆင့်အတန်းက မြင့်မားသော်လည်း စစ်မှန်သော အင်မော်တယ်ဘုရင်နှင့် နှိုင်းယှဉ်ပါက ကွာဟချက်အချို့ ရှိနေဆဲ ဖြစ်သည်။

မဟုတ်ပါက ချီရှောင်းမျိုးနွယ်စုသည် ဇီးကွက်နီ ချီရှောင်းဘုရင်ကြောင့် ဧကရာဇ်တစ်ပိုင်းမျိုးနွယ်အဖြစ်သို့ ရာထူးတိုးမြှင့်ခံရရန် မဖြစ်နိုင်ပေ။

ကောင်းကင်တွင်၊ မော့ကျဲဧကရာဇ်မျိုးနွယ်မှ အင်မော်တယ်တစ်ပိုင်းက ငြိမ်သက်စွာ ရပ်နေခဲ့သည်။ မှုန်ဝါးဝါး အငွေ့အသက်များကလည်း သူ့ကို လွှမ်းခြုံထား၏။

သို့သော်လည်း၊ ထိုအခြေအနေမျိုးမှာပင် သူ၏ လေးနက်နေခြင်းကို ခံစားနိုင်သေးသည်။

ကျွင်းရှောင်ယောက်၏ အထောက်အထားက သူမျှော်လင့်ထားသည်ထက် များစွာကျော်လွန်သည်။

ဤတွင်၊ မျက်စိမျက်နှာပျက်ပြီး မကျေမနပ်ဖြစ်နေသော အခြားလူတစ်ဦးလည်း ရှိသေးသည်။

ထိုလူမှာ သဘာဝအတိုင်း ဘုရင်ဖုဖုန်း ဖြစ်သည်။

"ဒါက ဘယ်လိုလုပ် ဖြစ်နိုင်မှာလဲ။ သူက ဘယ်လိုဖြစ်ပြီး ဖျက်ဆီးခြင်းဘုရင်ခြောက်ပါးထဲက တစ်ယောက်ဖြစ်နိုင်တာလဲ"

ဘုရင်ဖုဖုန်း မယုံနိုင်လောက်အောင် ဖြစ်ခဲ့သည်။

မူလကတော့ သူဟာ ကျွင်းရှောင်ယောက်ကို သူ၏ပြိုင်ဘက်အဖြစ် မမှတ်ယူခဲ့ပေ။

အကြောင်းမူ၊ သူနှင့် ကျွင်းရှောင်ယောက်အကြား ကွာဟမှုက ကြီးမားလွန်းသောကြောင့် ဖြစ်သည်။

သို့သော်လည်း ယခုအချိန်တွင်၊ ကျွင်းရှောင်ယောက်က ဖျက်ဆီးခြင်းဘုရင်ခြောက်ပါး အထောက်အထားကို ထုတ်ဖော်လာခဲ့ပြီ ဖြစ်သည်။

သူ၏ ကစဉ့်ကလျားခန္ဓာ အရည်အချင်းနှင့်အတူ၊ အနာဂတ်တွင် အနည်းဆုံး အင်မော်တယ်ဘုရင် ဖြစ်လာပေလိမ့်မည်။

ထိုအခြေအနေတွင်၊ သူက လော့ရှန်းလင်နှင့် အမှန်တကယ် မထိုက်တန်ဘဲ ရှိပါဦးမည်လော။

'ဒီကောင်စုတ်လေးက ဒီဝှက်ဖဲကို အစကတည်းက ဖုံးကွယ်ထားခဲ့တာပဲ။ သူက ငါ့ကို လှည့်စားဖို့ ကြိုးစားနေတာလား'

ဘုရင်ဖုဖုန်းလည်း ဤတော့မှ ကျွင်းရှောင်ယောက်ဟာ သူ့အကြံအစည်ကို အခွင့်ကောင်းယူသွားမှန်း သိလိုက်သည်။

ယခင်က သူဟာ ကျွင်းရှောင်ယောက်ကို ကိုယ့်ကျေးဇူးရှင်အား အန္တရာယ်ကျရောက်အောင် ထပ်မံတွန်းပို့နေသူဟု စွပ်စွဲပြောဆိုခဲ့သည်။

ထိုအခါ ကျွင်းရှောင်ယောက်က ရှေ့သို့ထွက်လိုက်၏။

သူဟာ လော့ရှန်းလင်၏လက်ကို ဆုပ်ကိုင်ထားသည့်အပြင် လူအများ၏ နှစ်သက်ဖွယ်လှိုင်းများကိုလည်း ရရှိခဲ့သေးသည်။

ထို့ပြင်၊ သူက ဖျက်ဆီးခြင်းဘုရင်ခြောက်ပါး၏ အထောက်အထားကိုလည်း ထပ်မံထုတ်ပြ၍ မော့ကျဲဧကရာဇ်မျိုးနွယ်မှ အင်မော်တယ်တစ်ပိုင်းအား ဘာမျှမတတ်နိုင်အောင် ဖြစ်စေခဲ့သည်။

ဤသို့ဖြင့်၊ နောက်ဆုံးတွင် လူရွှင်တော်က ဘုရင်ဖုဖုန်းကိုယ်တိုင် ဖြစ်လာရတော့သည်။

ထိုအကြောင်းများကို တွေးကြည့်မိတော့ ဘုရင်ဖုဖုန်း၏ အင်မော်တယ်တစ်ပိုင်း စိတ်နေစိတ်ထားဖြင့်ပင် မတည်ငြိမ်နိုင်တော့သလို ခံစားလိုက်ရသည်။

အင်မော်တယ်တစ်ပိုင်း အကျော်အမော်ဖြစ်ပြီး အဓိပဓိတစ်ပိုင်း အငယ်တစ်ဦးထံမှ လှောင်ပြောင်ခံနေရသည်။ သူ့မျက်နှာကို ဘယ်နေရာသို့ သွားထားရမည်နည်း။

ဘုရင်ဖုဖုန်း၏ မျက်လုံးများက အေးစက်စက် အလင်းများ ပြည့်သွားသည်။

နောက်ဘက်မှ လော့ရှန်းလင်လည်း ကျွင်းရှောင်ယောက်၏ အထောက်အထားကြောင့် အံ့အားသင့်သွားမိလေသည်။

သို့သော်လည်း စိတ်သက်သာရာရသွားပြီး မော့ကျဲဧကရာဇ်မျိုးနွယ်မှ အင်မော်တယ်တစ်ပိုင်းဘက်သို့ လှမ်းကြည့်ကာ အေးစက်စက်ဖြင့် ပြောလိုက်သည်။

"အခု တိုက်ခိုက်ချင်သေးလား"

မော့ကျဲဧကရာဇ်မျိုးနွယ်မှ အင်မော်တယ်တစ်ပိုင်းက ကမူးရှုးထိုး ပြုမူတတ်သူတော့ မဟုတ်ပေ။

ယနေ့ ဖြစ်ပျက်ခဲ့သည်များက ဖြေရှင်းရန် မလွယ်ကူတော့ကြောင်း သူ သိသည်။

"ငါတို့ မော့ကျဲဧကရာဇ်မျိုးနွယ်ကို စော်ကားတာက မလွယ်ကူဘူးဆိုတာ သိထားပါ"

မော့ကျဲဧကရာဇ်မျိုးနွယ်မှ အင်မော်တယ်တစ်ပိုင်းက ကျွင်းရှောင်ယောက်ကို စူးစူးစိုက်စိုက် ကြည့်လိုက်သည်။ နောက်တော့ နေရာမှ ဖျတ်ခနဲ ပျောက်ကွယ်သွားတော့သည်။

ဤကိစ္စက သူတစ်ယောက်တည်း ဆုံးဖြတ်နိုင်သောအရာ မဟုတ်တော့ကြောင့် ထင်ရှားသည်။ ဤအခြင်းရာအတွက် မော့ကျဲဧကရာဇ်မျိုးနွယ်၏ အခြားအကျော်အမော်များနှင့် ဆွေးနွေးရန် လိုသေးသည်။

မော့ကျဲဧကရာဇ်မျိုးနွယ်၏ အင်မော်တယ်တစ်ပိုင်း ထွက်ခွာသွားခြင်းနှင့်အတူ မိုးနှင့်မြေကြားမှ လေထုဖိအားသည်လည်း ပြေလျော့သွားခဲ့သည်။

စူးစမ်းချင်စိတ်၊ စိတ်အားထက်သန်မှုနှင့် လေးစားမှု၊ ကြောက်ရွံ့နေသော အကြည့်များကတော့ ရှိနေဆဲ ဖြစ်၏။

ပိအန်းမင်းသား၊ လီကျိုးမင်နှင့် အခြားသူများ၏ အမူအရာများမူကား အလွန်မာကျောကာ အဆင်မပြေတော့ပေ။

တုရှန်ဝမ်ဝမ်နှင့် အခြားမိန်းကလေးများ၏ မျက်နှာများမှာတော့ လေးစားချစ်ခင်မှု အရိပ်အယောင်များ ပြည့်‌နှက်နေခဲ့သည်။

နောက်ဆုံးတွင်၊ ကျွင်းရှောင်ယောက်၏ အထောက်အထားများ ထုတ်ဖော်ခြင်းက တကယ်ကို စိတ်လှုပ်ရှားဖွယ်ကောင်းလှသည်။

ပထမ၊ ပထမမျိုးဆက် စစ်နတ်ဘုရား၏ အလိုတော်ကို ဆက်ခံသူ။

ထို့နောက် ဖျက်ဆီးခြင်း ဘုရင်ခြောက်ပါးအနက်မှ တစ်ဦးဖြစ်သော အမှောင်စီကွမ် ဖြစ်လာပြီ။

ယခုအခါ ကျွင်းရှောင်ယောက်က သူတို့၏စိတ်ထဲမှ သူရဲကောင်းတစ်ဦး၏ အသွင်ပြင်နှင့် လုံးဝထပ်တူကျသွားပြီ ဖြစ်သည်။ ထို့ထက် ပို၍ပင် သာလွန်နေသေးသည်။

ကျွင်းရှောင်ယောက်၏ အမူအရာက တည်ငြိမ်နေသော်လည်း သူ့စိတ်ထဲမှာတော့ သက်ပြင်းတစ်ချက်ချလိုက်သည်။

ယခင်ကတော့ ကျွင်းရှောင်ယောက်ဟာ ဖျက်ဆီးခြင်းဘုရင်ခြောက်ပါးမှ တစ်ပါးဟူသော အထောက်အထားကို မည်မျှ အစွမ်းထက်မည်မှန်း သူ မသိခဲ့ပါ။

ယခုတော့၊ ကျွင်းရှောင်ယောက်ဟာ ဖျက်ဆီးခြင်းဘုရင်ခြောက်ပါးဟူသော သူ့အထောက်အထားကို လျှော့တွက်နေမိဆဲ ဖြစ်ပုံရသည်။

ကျွင်းရှောင်ယောက်လည်း ကောင်းကင်သင်္ချိုင်းမှ ထိုအမျိုးကောင်းသားအတွက် စိတ်မကောင်းဖြစ်သွားမိလေသည်။

ဤခေတ်တွင် သူ့အရည်အချင်းကို ပြသနိုင်တော့မည်ဖြစ်သော်လည်း...

ကံမကောင်းစွာဖြင့်၊ သင်္ချိုင်းအတွင်းမှ သူခုန်တက်လာသည်နှင့် ကျွင်းရှောင်ယောက်၏ သတ်ဖြတ်ခံလိုက်ရရှာသည်။

ကျွင်းရှောင်ယောက်လည်း နတ်ဘုရားငိုကြွေးစစ်လှံပုဆိန်ကို ဖယ်ရှားလိုက်လေသည်။ သူ့လက်မောက်သို့ စိုက်ဝင်နေသော သွေးကြောများလည်း ပျောက်ကွယ်သွားခဲ့သည်။

ထိုအခါ၊ ကျွင်းရှောင်ယောက်၏ လက်မောင်းမှ သွေးကြောမျှင်ပေါက်ရာများက ချက်ချင်း ပျောက်ကွယ်သွားခဲ့သည်။ သူ၏ ဖြူဆွတ်သွားသော ဆံပင်များမှာလည်း မူလအတိုင်း အနက်ရောင်ပြန်ဖြစ်သွားတော့သည်။

'ဒါက တကယ်ကို နတ်ဆိုးလက်နက်တစ်ခုပဲ'

ကျွင်းရှောင်ယောက်လည်း သူ့ကိုယ်သူ တွေးလိုက်မိသည်။

နတ်ဘုရားငိုကြွေးစစ်လှံပုဆိန်ကို အသုံးပြုသောအခါ၊ နတ်ဘုရားငိုကြွေးစစ်လှံပုဆိန်က ပိုင်ရှင်၏သွေးများကို အမှန်တကယ် စုပ်ယူသွားခဲ့သည်။

ဟုတ်သည်၊ လက်နက်ပိုင်ရှင်၏သွေးမျိုးဆက်က ပိုအားကောင်းလေ... နတ်ဘုရားငိုကြွေးစစ်လှံပုဆိန်က ပို၍ အားကောင်းလေပင်။

သို့သော်လည်း ထိုသို့ဖြစ်လျှင်ပင် ကျွင်းရှောင်ယောက်က ဂရုမစိုက်ပါ။

နတ်ဘုရားငိုကြွေးစစ်လှံပုဆိန်မှာ ပို၍လေးနက်သော အဓိပ္ပါယ်ရှိပြီး ကြီးမားသောလျှို့ဝှက်ချက်မျိုး ပါဝင်နိုင်ကြောင်း သူခံစားခဲ့ရသည်။

သို့သော်လည်း ကျွင်းရှောင်ယောက်ကတော့ နတ်ဘုရားငိုကြွေးစစ်လှံပုဆိန်၏ လျှို့ဝှက်ချက်ကို ရှာဖွေရန် စိတ်မလောပါ။

နတ်ဘုရားငိုကြွေးစစ်လှံပုဆိန်ကို ဖယ်ရှားပြီးနောက် ကျွင်းရှောင်ယောက်က ပတ်ဝန်းကျင်ကို ကြည့်လိုက်သည်။

မည်သည့် မျိုးဆက်သစ်ပါရမီရှင်ကမျှ ကျွင်းရှောင်ယောက်ကို တိုက်ရိုက်မကြည့်ဝံ့တော့ပေ။

နောက်ဆုံးတွင်၊ ထိုပုဂ္ဂိုလ်က မော့ကျဲဧကရာဇ်သားတော်ကိုပင် တစ်ချက်တည်း သတ်ပစ်နိုင်သော မကောင်းဆိုးရွားတစ်ကောင် ဖြစ်သည်။

ပိအန်းမင်းသားနှင့် အခြားသူများပင်လျှင် အကြည့်လွှဲသွားကြပေသည်။

ဘုရင်ဖုဖုန်းတစ်ဦးသာ အေးစက်စက် မှုန်ကုပ်ကုပ်ဖြင့် ရှိခဲ့သည်။

ကျွင်းရှောင်ယောက်၏ မျက်လုံးများမှာလည်း အေးစက်သော အလင်းတစ်ခု ပေါ်လာခဲ့ပေသည်။

အနာဂတ်တွင် နည်းလမ်းရှာပြီး ဘုရင်ဖုဖုန်းကို ကိုင်တွယ်ရဦးမည် ဖြစ်သည်။

"အားလုံးပဲ ပြပွဲကောင်းကြီးပြီးသွားပြီ၊ ကိုယ့်နေရာကို ပြန်ကြတော့"

ကျွင်းရှောင်ယောက်က သူ့လက်ကိုဝှေ့ယမ်းလိုက်သည်။

ကျွင်းရှောင်ယောက်၏ အေးဆေးတည်ငြိမ်ပြီး ကျက်သရေရှိသော အသွင်အပြင်ကို မြင်လိုက်ရတော့ ပရိသတ်ထဲမှ ပါရမီရှင်များအားလုံး သက်ပြင်းချလိုက်ကြသည်။

သူသည် ဧကရာဇ်ငယ်ခုနစ်ပါးအဆင့်မှ ပါရမီရှင်တစ်ဦးကို စက္ကန့်ပိုင်းအတွင်း သတ်ဖြတ်ခဲ့ပြီး အင်မော်တယ်တစ်ပိုင်း အကျော်အမော်နှင့် ရင်ဆိုင်ခဲ့သည့်တိုင် တည်ငြိမ်နေသေးသည်။

ဤစိတ်နေစိတ်ထားက အမှန်တကယ် အံ့ဖွယ်ကောင်းလှသည်။

"ရှန်းလင်၊ ကျေးဇူးအများကြီးတင်ပါတယ်"

ကျွင်းရှောင်ယောက်က လော့ရှန်းလင်ကို ကြည့်လိုက်သည်။

"အဲဒီလိုပြောစရာမလိုပါဘူး"

ကျွင်းရှောင်ယောက်၏ ရိုးသားသော မျက်လုံးများကိုကြည့်ရင်း လော့ရှန်းလင်လည်း ခဏတာ မည်သို့မည်ပုံ တုံ့ပြန်ရမည်မှန်း မသိတော့ပေ။

"ကျွန်တော့်နေရာကို သွားကြရအောင်"

ကျွင်းရှောင်ယောက်က ပြောလိုက်သည်။

လော့ရှန်းလင် အနည်းငယ် ခေါင်းညိတ်လိုက်၏။

နှစ်ယောက်သား ထွက်သွားကြတော့သည်။

တုရှန်ချွန်းချွန်းနှင့် အခြားမိန်းကလေးများလည်း နောက်မှ လိုက်သွားခဲ့ကြသည်။

ဘုရင်ဖုဖုန်းလည်း ဤမြင်ကွင်းကိုမြင်သောအခါ မျက်နှာမသာမယာဖြင့် ထွက်သွားတော့သည်။

ကျင့်ကြံခြင်းအပိုင်းတွင် သူက ကျွင်းရှောင်ယောက်ထက် အဆပေါင်းများစွာ သာလွန်သည်။

သို့သော်၊ မိန်းကလေးများနှင့် ပရောပရီလုပ်ရာမှာတော့ ကျွင်းရှောင်ယောက်၏ ခြေဖျားကိုပင် မမီခဲ့ပေ။

စစ်နတ်ဘုရားတောင်မှ အခြေအနေများကတော့ ပြီးသွားပြီ ဖြစ်သည်။

သို့သော်လည်း သက်ရောက်မှုများက မရပ်တန့်သေးပေ။

နတ်ဘုရားငိုကြွေးစစ်လှံပုဆိန်ကို ဆွဲနှုတ်ပြီး မော့ကျဲဧကရာဇ်သားတော်ကို ချက်ချင်းသတ်သည်။

အင်မော်တယ်တစ်ပိုင်း အကျော်အမော်၏ တိုက်ခိုက်မှုတစ်ခုကို ရင်ဆိုင်ခဲ့၏။

ဖျက်ဆီးခြင်း ဘုရင်ခြောက်ပါး၏ အထောက်အထားများကိုပင် ဖော်ထုတ်ပြသခဲ့သေးသည်။

ဤအဖြစ်အပျက် တစ်ခုစီတိုင်းက အရပ်ရပ်ကို တုန်လှုပ်ချောက်ချားစေရန် လုံလောက်သည်။

ဤအဖြစ်အပျက်က အဓိက ပြည်နယ်ကြီးဆယ်ခုစလုံးကိုပင် တုန်ခါသွားစေခဲ့ပေသည်။

နတ်ဆိုးချောက်နက်ပြည်နယ်၏ ရှေးဟောင်းတားမြစ်နယ်မြေဖြစ်သော ကောင်းကင်အတားအဆီး သွေးချောက်နက်တွင်...

အဆုံးမဲ့ သွေးပင်လယ်ထဲမှာ ကျောက်တလားကြီးတစ်ခု မျောပါနေသည်။

ကျောက်တလားကြီးက သွေးပင်လယ်အတွင်းမှ အရိုးများနှင့် သွေးစွမ်းအင်များကို စုပ်ယူနေ၏။

သွေးအမှုန်အမွှားများ ဖုံးလွှမ်းနေသော ကျောက်တလားထဲမှာလည်း ပုံရိပ်တစ်ခုကို ယောင်ဝါးဝါး မြင်နိုင်သေးသည်။

"ကြည့်ရတာ ပထမဘုရင်က သူ့ရဲ့ ကမ္ဘာ့ဖျက်ဆီးရေးတားမြစ်လက်နက်ကို ဆွဲနှုတ်ယူပြီးသွားပုံပဲ။ ငါလည်း ငါ့ရဲ့ ကမ္ဘာ့ဖျက်ဆီးရေးတားမြစ်လက်နက်ကို ရယူမယ်"

"အချိန်ကျရင် ကမ္ဘာဖျက်ဆီးရေးဘုရင်ခြောက်ပါးရဲ့ တားမြစ်လက်နက်ခြောက်ခုကို စုဆောင်းပြီး ဖျက်ဆီးခြင်းဘုရင်ခြောက်ပါးရဲ့ အမွေကို ငါ အမှန်တကယ် ဆက်ခံရလိမ့်မယ်"

"ပထမဘုရင်၊ ငါ့ကိုစောင့်နေပါ။ မကြာခင် ငါ နင့်ကိုတွေ့ရတော့မယ်"

လူရိပ်က နူးညံ့ပြီး မျှော်လင့်ချက်တို့ ပြည့်နှက်နေသော လေသံဖြင့် ခပ်တိုးတိုး ရေရွတ်လိုက်လေသည်။