အခန်း ၁၀၂၇

အခန်း ( ၁၀၂၇ ) ချီဟုန်ယွိနှင့် အလောင်းအစား။

ဤမြင်ကွင်းက လူတိုင်းကို အံ့အားသင့်စေသည်။

ဤကဲ့သို့ ရယ်စရာကောင်းသော မြင်ကွင်းမျိုး ဖြစ်လာမည်ဟု မမျှော်လင့်ထားခဲ့ကြပေ။

တုရှန်အလှလေးငါးဦးတွင် တစ်ဦးကို ရရှိနိုင်ရုံဖြင့် ကောင်းချီးမင်္ဂလာ ဖြစ်နိုင်သည်။ ယခုအခါ၊ ကမ္မကြိုးနီငါးခုက ကျွင်းရှောင်ယောက်ကို ချည်နှောင်ထားခဲ့ပြီ။

ပို၍ အရေးကြီးသည်က၊ သူတို့၏မိခင် တုရှန်မင်ဖေး၏ ကမ္မကြိုးနီကလည်း ကျွင်းရှောင်ယောက်နှင့် ချိတ်ဆက်ထားခဲ့ခြင်း ဖြစ်သည်။

ယင်းက ပရိသတ်အားလုံးကို မျက်လုံးမျက်ဆံ ပြူးကျယ်သွားစေခဲ့သည်။

ကျွင်းရှောင်ယောက်ကိုယ်တိုင်လည်း တုန်လှုပ်သွားခဲ့မိသည်။

ဤတုရှန်ဧကရာဇ်မျိုးနွယ်၏ နည်းလမ်းက တစ်ခုခုပင်။

ကျွင်းရှောင်ယောက်က အလွန်ထူးချွန်ပြီး တုနှိုင်းမယှဉ်သာသူ ဖြစ်သည်။

ရုပ်ရည်ပိုင်းမှာလည်း အပြစ်ဆိုဖွယ်မရှိအောင် လွန်စွာ ချောမော၏။

သို့သော်လည်း ဤသည်ကတော့ အနည်းငယ် လွန်ပုံရသည်။

"အမေ၊ ဒါကို ဘယ်လိုလုပ်မှာလဲ။ ဒါက သမီးတို့ရဲ့ မင်္ဂလာပွဲကို"

တုရှန်ချွန်းချွန်းက ခြေဆောင့်လိုက်သည်။

သူတို့ညီအစ်မ ငါးဦးနှင့်ပင် ပြိုင်ဆိုင်မှုက အလွန်ကြီးမားနေပြီ။

ရလဒ်အနေဖြင့်၊ ယခုအခါ သူတို့၏အမေပါ ပါဝင်လာခဲ့ပြီ ဖြစ်သည်။

ယင်းကတော့ ပုံမှန် မဟုတ်တော့ပေ။

တုရှန်‌မင်ဖေး၏ မျက်နှာမှာလည်း ရှက်ရွံ့မှုကြောင့် အနည်းငယ် နီရဲသွားသည်။ ဤအခြေ‌အနေမျိုး ဖြစ်လာမည်ဟု သူ မမျှော်လင့်ထားခဲ့ပေ။

မူလက သူဟာ အိမ်ထောင်ရေး ကမ္မကြိုးနီမှာ တစ်ခုခု မှားနေသလား ဆိုတာကို စမ်းသပ်လိုခဲ့သည်။

ယခုတော့...

ကျွင်းရှောင်ယောက်က ထူးချွန်လွန်းခြင်း ဖြစ်ပုံပင်။

သူဟာ တုရှန်ဧကရာဇ်မျိုးနွယ်၏ အိမ်ထောင်ဖက်ရွေးချယ်မှု စံနှုန်းများနှင့် လိုက်ဖက်ညီပြီး ပြီးပြည့်စုံမှုရှိသည်။

ထို့ကြောင့် ကမ္မကြိုးနီအားလုံးက ကျွင်းရှောင်ယောက်နှင့် ချိတ်ဆက်ခဲ့ခြင်း ဖြစ်ချေသည်။

ကျွင်းရှောင်ယောက် အနားမှာ မရှိလျှင်တော့ အိမ်ထောင်ရေး ကမ္မကြိုးနီဟာ ချီဟုန်ယွိ၊ အန်းလန်ဧကရာဇ်သားတော်နှင့် အခြားသူများကို ရွေးချယ်နိုင်လောက်သည်။

ယခုတော့၊ ကျွင်းရှောင်ယောက်၏ တည်ရှိမှုကြောင့် အခြားလူငယ် နှစ်ဆယ်မှာ လမင်းကြီးနှင့် ပိုးစုန်းကြူးများပမာ ဖြစ်ရပေတော့သည်။

"အခု ဘယ်နှယ့်လုပ်ကြမလဲ"

"စစ်နတ်ဘုရားကလည်း အိမ်ထောင်ရေးညီလာခံမှာ ပါဝင်ဖို့ ရောက်လာပုံမရဘူး"

"အင်း၊ သူက အခမ်းအနားကို လာကြည့်တာဖြစ်ရမယ်"

"ပရိသတ်က ပါဝင်သူ ပါရမီရှင်အားလုံးကို ကျော်လွန်သွားတာကတော့ တကယ်ကို ကမောက်ကမကြီးပဲ"

လူများစွာက ရေရွတ်ပြောဆိုလိုက်ကြသည်။

"ထင်ထားတဲ့အတိုင်း၊ သခင်လေးက ချွန်းချွန်းရဲ့လူပဲ"

တုရှန်ချွန်းချွန်းက ပျော်ရွှင်စွာ ပြောလိုက်သည်။

ယခင်က သူဟာ အိမ်ထောင်ရေးညီလာခံတွင် ပါဝင်ရန် စိတ်ကူးမရှိခဲ့ပေ။ ကျွင်းရှောင်ယောက်မှတပါး မည်သူ့ကိုမျှ လက်မထပ်ရန်လည်း ဆုံးဖြတ်ထားခဲ့သည်။

ယခုတော့ အရာအားလုံး ပြီးပြည့်စုံသွားပြီ။

"သခင်လေး၊ ငါလည်း အဲဒီလိုပါပဲ"

တုရှန်ဝမ်ဝမ်လည်း ပြောလိုက်သည်။ သူဟာ သူရဲကောင်းဆန်ပြီး ရဲရင့်သူတစ်ဦးဖြစ်သော်လည်း ဤအခိုက်တွင် ရှက်ရွံ့နေမိ၏။

"သူက စစ်နတ်ဘုရားပေါ့၊ သူ့ကိုကြည့်ရတာတော့ နူးညံ့သိမ်မွေ့ပြီး ရုပ်ရည်ကလည်း မဆိုးပါဘူး။ ဒါပေမဲ့ သူ့ကိုယ်ရည်ကိုယ်သွေးက ဘယ်လိုလဲမသိဘူး"

တုရှန်ထောင်ထောင်က ကျွင်းရှောင်ယောက်ကို တိတ်တဆိတ် ကြည့်ပြီး ခပ်တိုးတိုးလေး ရေရွတ်လိုက်သည်။

"ဘယ်လိုဖြစ်တာလဲ၊ ကျွင်းရှောင်ယောက်အပြင် တခြားတစ်ယောက်ရှိသေးတလား"

တုရှန်ရှောင်ရှောင်း‌မှာတော့ အနည်းငယ် သံသယဝင်လာခဲ့သည်။

ယခင်က သူမ၏ အိမ်ထောင်ရေးကြိုးနီသည် အင်မော်တယ်နယ်မြေကြီးရှိ ကျွင်းမိသားစု၏ နတ်ဘုရားသားတော်နှင့် ချိတ်ဆက်ခဲ့သည်။

သို့သော်လည်း ကျွင်းရှောင်ယောက် သေဆုံးသွားပြီဖြစ်ကြောင်း သူမ သေချာသိပေသည်။

'ဒီကစဉ့်ကလျားခန္ဓာရဲ့ အရည်အချင်းဟာ အင်မော်တယ်နယ်မြေကြီးက ကျွင်းမိသားစုရဲ့ နတ်ဘုရားသားတော်ထက် တကယ်ကို အားနည်းပုံမရဘူး'

တုရှန်ရှောင်ရှောင်းက သူ့စိတ်ထဲမှ တွေးနေမိသည်။

တစ်ဖက်တွင်၊ တုရှန်ယွဲ့ယွဲ့က လှပသော မျက်လုံးများနှင့် ကျွင်းရှောင်ယောက်ကို ကြည့်လိုက်သည်။

'ရှေးကစဉ့်ကလျားခန္ဓာက တကယ်ကို အကောင်းဆုံးပစ်မှတ်ပဲ။ သူက ငါ့ကို မြင့်မားတဲ့အဆင့်ထိ ပို့ဆောင်ပေးနိုင်တယ်'

'ဒါထက် အရေးကြီးတာက ကစဉ့်ကလျားခန္ဓာဟာ အချိန်ကြာကြာ ရပ်တည်နိုင်ဖို့ပဲ'

တုရှန်ယွဲ့ယွဲ့က နှုတ်ခမ်းကို လျှာဖြင့်သပ်လိုက်သည်။

သူမက ဆွဲဆောင်မှုရှိပြီး ပရောပရည်လုပ်တတ်သော်လည်း အမှန်တွင် သူမ၏ခန္ဓာကို ထိခိုက်မခံပေ။

သူ စိတ်ပိုင်းဖြတ်ထားပြီးပါက လူတစ်ဦးတည်းကိုသာ သစ္စာရှိမည် ဖြစ်သည်။

ထို့ပြင်၊ ကျွင်းရှောင်ယောက်က အိမ်ထောင်ဖက်ရွေးချယ်ခြင်းအတွက် အမှန်ပင် သူတို့၏စံနှုန်းများနှင့် ကိုက်ညီသည်။

အန်းလန်ဧကရာဇ်သားတော်နှင့် ချီဟုန်ယွိထက် အများကြီး သာလွန်ပေသည်။

"ဟင်းဟင်း၊ သားမက်လေး... မင်း လာတာ နောက်ကျတော့မလို့"

တုရှန်မင်ဖေးလည်း အနေရခက်သော အခြေအနေကို ဖြေလျှော့ရန်အတွက် လှပစွာပြုံးရင်း ပြောလိုက်သည်။ အိမ်ထောင်ရေးကြိုးနီကလည်း တိတ်တဆိတ် ပျောက်ကွယ်သွား၏။

ကျွင်းရှောင်ယောက်ကို ပိုကြည့်မိလေ၊ သူမ ပို၍ ကျေနပ်လာလေပင်။

"အကြီးအကဲ မင်ဖေးထင်ပါတယ်၊ ကျွန်တော်က ဒီကို အခမ်းအနားကြည့်ဖို့ပဲ ရောက်လာခဲ့တာပါ။ တခြားရည်ရွယ်ချက် မရှိဘူး"

ကျွင်းရှောင်ယောက်က ယဉ်ကျေးစွာပြောရင်း ပြုံးလိုက်သည်။

တခြားသူသာဆိုလျှင်၊ ဤသို့ ဆက်ဆံခံရပါက အလှလေးငါးပါးကို တစ်ဦးမျှ အလွတ်ပေးမည် မဟုတ်ပေ။

သို့သော်လည်း ကျွင်းရှောင်ယောက်ဟာ လမ်းတစ်လျှောက်တွင် လှပသော အမျိုးသမီးများကို အများအပြားကို တွေ့မြင်ခဲ့ဖူးသည်။ သူ၏ ခံနိုင်ရည်က အလွန် မြင့်မားနေပြီ။

သူဟာ သူတော်စင်တစ်ပါး မဟုတ်သော်လည်း၊ မိန်းမတိုင်းကို စိတ်ဝင်စားသူ မဟုတ်ပေ။

သူက လူတစ်ယောက်ကို လွယ်လွယ်စိတ်ဝင်စားတတ်သူ မဟုတ်ပါ။

"သခင်လေး၊ နင် ငြင်းလို့မရဘူးနော်"

တုရှန်ချွန်းချွန်းက ပြောလိုက်သည်။

"သခင်လေး၊ ဝမ်ဝမ်လည်း သခင်လေးရဲ့ လမ်းညွှန်မှုကို ရရှိဖို့ မျှော်လင့်ပါတယ်"

တုရှန်ဝမ်ဝမ်၏ စကားများက ရိုးရှင်းလေသည်။

"ချစ်ခြင်းအိပ်မက် အင်မော်တယ်ကျမ်းက ငါ့အတွက် ရွေးချယ်မှုလုပ်ဖို့ ကူညီပေးခဲ့တယ်ထင်တယ်"

တုရှန်ရှောင်ရှောင်းကလည်း မငြင်းပါ။

"ငါလည်း ကြိုးစားချင်တယ်"

တုရှန်ထောင်ထောင်ကမူ ရှက်ရွံ့ဟန်ဖြင့် လက်လေးတစ်‌ဖက်ကို မသိမသာ မြှောက်ပြသည်။

"ယောက်ျား၊ နင်က‌တော့ ငါ့ရဲ့အာရုံကို တကယ် ဖမ်းစားခဲ့ပြီပဲ"

တုရှန်ယွဲ့ယွဲ့က ကျွင်းရှောင်ယောက်ကို မျက်စိမှိတ်ပြလိုက်၏။

တုရှန်အလှလေးငါးပါးက တစ်ချိန်တည်းတွင် ကျွင်းရှောင်ယောက်ကို စိတ်ဝင်စားကြောင်း ဖော်ပြခဲ့ကြပြီ။

စမ်းသပ်မှုကို ကျော်ဖြတ်ခဲ့ရသော ပါရမီရှင်နှစ်ဆယ်လည်း အမူအရာများ ပြောင်းသွားသည်။

သူတို့၏နှလုံးသားများ အေးခဲသွားသလို ခံစားလိုက်ကြရလေသည်။

"ဒါက စည်းမျဉ်းတွေနဲ့ မညီဘူး"

နောက်ဆုံးတွင်၊ ချီဟုန်ယွိက မထိန်းနိုင်တော့ဘဲ ထပြောလိုက်သည်။

သူတို့မှာ စမ်းသပ်မှု အဆင့်သုံးဆင့်ကို ဖြတ်သန်းခဲ့ပြီး နောက်ဆုံးမှ အိမ်ထောင်ရေးလက်ဆောင်များဖြင့် ကမ်းလှမ်းနိုင်ရခြင်း ဖြစ်သည်။

ရလဒ်အနေဖြင့်၊ ကျွင်းရှောင်ယောက်က ရောက်လာပြီးသည်နှင့် ဘာမျှမလုပ်ဘဲ အလှလေးငါးပါးအပြင် ယောက္ခမကိုတောင် အနိုင်ယူခဲ့၏။

ယင်းကြောင့် ချီဟုန်ယွိမှာ ဒေါသပေါက်ကွဲတော့သည်။

မိန်းမလှလေးကို အိမ်ခေါ်ပြန်ရန် အစီအစဉ်ကကော။

သူ့ကတိအတိုင်း အရှက်တရားကို ချေဖျက်ရန်ကကော။

ဤသည်က ဇာတ်ကွက်အတိုင်း သွားနေခြင်း မဟုတ်ပေ။

"စည်းမျဥ်းလား၊ ဒီအိမ်ထောင်ရေး ကြိုးနီက အကောင်းဆုံးစည်းမျဉ်းပဲလေ"

တုရှန်ဝမ်ဝမ်က နှုတ်ခမ်းကိုမဲ့ကာ ပြောလိုက်သည်။

သူဟာ စစ်နတ်ဘုရားနန်းတော်တွင် ရှိစဉ်ကတည်းက ကျွင်းရှောင်ယောက်ကို သဘောကျခဲ့ခြင်း ဖြစ်သည်။

ထို့အပြင် ‌ယနေ့ ကျွင်းရှောင်ယောက် မလာလျှင်ပင် ချီဟုန်ယွိကို လက်ထပ်မည် မဟုတ်ပါ။

အရှုံးကို လက်မခံလိုသော ချီဟုန်ယွိကိုကြည့်ရင်း ကျွင်းရှောင်ယောက်၏ မျက်လုံးများက တိတ်တဆိတ် တောက်ပလာခဲ့သည်။

ယင်းက သူမြင်လိုသည့်အတိုင်း အတိအကျပင် မဟုတ်လော။

"ချီဟုန်ယွိ၊ မင်းက တကယ်ကို စိတ်အားထက်သန်နေပုံရတယ်"

ကျွင်းရှောင်ယောက် ပြောလိုက်သည်။

"မင်းဘာပြောချင်တာလဲ"

ချီဟုန်ယွိက မျက်ခုံးပင့်လိုက်၏။

ကျွင်းရှောင်ယောက်က ယခုအခါ တိုင်းတစ်ပါးတွင် နာမည်ကျော်ကြားသည်။

သို့ရာတွင်၊ ချီဟုန်ယွိကလည်း အားမနည်းသောကြောင့် သိပ်ပြီး မကြောက်ပေ။

"ငါ့ကို ဆွဲဆောင်နိုင်မဲ့ အရာတစ်ခုခုရှိရင် ငါ မင်းနဲ့ အလောင်းအစား လုပ်ပေးနိုင်တယ်။ ငါရှုံးခဲ့ရင် လက်ရှိအခြေအနေမှာ ဝင်စွက်ဖက်မှာ မဟုတ်ဘူး"

ကျွင်းရှောင်ယောက်က နှုတ်ခမ်းတွန့်ရုံ ပြုံးလိုက်သည်။

"အိုး၊ ဘယ်လိုလောင်းမှာလဲ"

ချီဟုန်ယွိက မေးသည်။

"မင်းကို ငါ့ကိုအနိုင်ယူပါဆိုရင် များလွန်းနေလိမ့်မယ်"

ကျွင်းရှောင်ယောက်က ပြောလိုက်သည်။

ထိုစကားကြောင့် ချီဟုန်ယွိ၏မျက်နှာမှာ တင်းခနဲ ဖြစ်သွား၏။

သို့သော်လည်း သူက ဘာမှ မပြောခဲ့ပေ။

ထိုစကားက မမှားယွင်းကြောင်း သူသိသည်။

"ဒီလိုလုပ်ရအောင်။ မင်း ငါ့ကို ခြေတစ်လှမ်း နောက်ပြန်ဆုတ်စေနိုင်ရင် မင်းအနိုင်ရလိမ့်မယ်"

"ခြေလှမ်းတစ်ဝက်ဆိုရင်လည်း ရတယ်၊ မဆိုင်းမတွဘဲ ငါချက်ချင်း ထွက်သွားမယ်"

"ဒါပေါ့၊ အရေးကြီးတာက ငါ့ကို ဆွဲဆောင်နိုင်မဲ့ အရာတစ်ခုခုတော့ လိုအပ်တယ်။ မဟုတ်ရင် ဘာမှ ဆွေးနွေးနေစရာ မလိုဘူး"

ကျွင်းရှောင်ယောက်က လမ်းကြောင်းဖောက်လိုက်သည်။ ချီဟုန်ယွိကို ထောင်ချောက်ထဲသို့ သူ ဆွဲခေါ်နေပြီ။

ကျွင်းရှောင်ယောက်၏ လူများ၏နှလုံးသားကို ထိုးဖောက်ဝင်ရောက်နိုင်စွမ်းမှာ နက်နဲလွန်းလှသည်။

ထို့အပြင် ချီဟုန်ယွိ၏ အခြေအနေကို သူ သိ၏။

သေချာပေါက်၊ သူ ငြင်းမှာ မဟုတ်ပေ။