အခန်း ၁၀၃၀

အခန်း ( ၁၀၃၀ ) မင်းကိုယ်မင်း အရေးပါသူလို့ တကယ်ကြီး ထင်နေတာလား။

ယွင်ရှောင်ဟေးမှာ ကျွင်းရှောင်ယောက်အပေါ် အလွန် အေးစက်သွားခဲ့သည်။

ကျွင်းရှောင်ယောက်အတွက်သာ မဟုတ်လျှင်၊ တုရှန်ဝမ်ဝမ်က သူ့အပေါ် မည်သို့ ဤကဲ့သို့သဘောထားမည်နည်း။

ကျွင်းရှောင်ယောက်က သူမအပေါ်တွင် မကောင်းသောရည်ရွယ်ချက် ရှိနိုင်သည်ဟု သူ ပြောခဲ့ဖူးသည်။

သို့ရာတွင်၊ တုရှန်ဝမ်ဝမ်က လုံးဝ မယုံဘဲ သူ့ကိုပင် ကြိမ်းမောင်းခဲ့သေးသည်။

ယွင်ရှောင်ဟေး၏ စိတ်ထဲတွင်၊ ကျွင်းရှောင်ယောက်က သူနှင့် တုရှန်ဝမ်ဝမ်ကြားမှ အတားအဆီးတစ်ခု ဖြစ်သည်။

သို့သော်လည်း ယခင်က ယွင်ရှောင်ဟေးဟာ ကျွင်းရှောင်ယောက်ကို မယှဉ်နိုင်ခဲ့ပေ။

သူတို့နှစ်ဦးက နှိုင်းယှဉ်စရာမရှိဘဲ လုံးဝ မတူညီသော တည်ရှိမှုများ ဖြစ်ကြသည်။

ယခုတော့ ယွင်ရှောင်ဟေးမှာ တုရှန်ဝမ်ဝမ်ကို လိုက်ရန် အရည်အချင်းပြည့်မီပြီဟု ယုံကြည်မှုရှိသည်။

ယွင်ရှောင်ဟေး၏ အေးစက်သော ရန်လိုမှုကို သတိပြုမိတော့...

ကျွင်းရှောင်ယောက်လည်း မတရား စွပ်စွဲခံရသလို ခံစားလိုက်ရသည်။

သို့ရာတွင်၊ သူ ဂရုမစိုက်ပေ။

ယခုအခြေအနေက သူ မျှော်လင့်ထားသည့် အတိုင်းအတာအတွင်း၌ ရှိသည်။

"ဒါ မင်းရဲ့ မြင်းထိန်းလား"

ကျွင်းရှောင်ယောက်က ယွင်ရှောင်ဟေးကို ဂရုမစိုက်ဘဲ တုရှန်ဝမ်ဝမ်ကိုသာ ကြည့်လိုက်သည်။

"သခင်လေး၊ သူဘယ်လိုဖြစ်သွားမှန်း မသိပေမဲ့ သူက တကယ်ကို ငါ့ရဲ့မြင်းထိန်းပါပဲ"

တုရှန်ဝမ်ဝမ်က ကျွင်းရှောင်ယောက်၏ အနီးသို့ တိုးကပ်သွားသည်။ ချပ်ဝတ်တန်ဆာကို ဝတ်ဆင်ထား၍ ထင်ရှားစွာရှိသော အလှတရားများက ကျွင်းရှောင်ယောက်၏လက်မောင်းကို ဖိကပ်မိသွား၏။

ထိုမြင်ကွင်းကြောင့် ယွင်ရှောင်ဟေး၏ မျက်လုံးများမှာ နီရဲသွားတော့သည်။

တုရှန်ဝမ်ဝမ်၏ သူ့အပေါ် အကြင်နာဆုံးအရာမှာ မြင်းများကို ကောင်းစွာမွေးမြူခြင်းအတွက် သူ့အား ချီးကျူးနေချိန် ဖြစ်သည်။

သို့သော်လည်း ကျွင်းရှောင်ယောက်ကတော့ တုရှန်ဝမ်ဝမ်၏ အာရုံစိုက်မှုအားလုံးကို အလွယ်တကူ ရနေပေသည်။

သူ့နတ်သမီးက အခြားသူကို မှီခိုနေသည်အား မြင်နေရသဖြင့် ယွင်ရှောင်ဟေး ပေါက်ကွဲတော့မည်။

"ဝုန်း"

ယွင်ရှောင်ဟေး၏ နောက်ဘက်မှ အဆုံးမဲ့ မှောင်မိုက်နေသော နတ်ဆိုးစွမ်းအင်များ ပေါက်ကွဲထွက်လာခဲ့သည်။

ဆိုးသွမ်းသော ရောင်ဝါနှင့် ဖျက်ဆီးခြင်း၏ စွမ်းအားများ လွှမ်းခြုံထားသော အနက်ရောင် နတ်ဆိုးမြေခွေးတစ်ကောင်က ယောင်ဝါးဝါး ထင်ထင် ပေါ်လွင်လာ၏။

ထို့နောက်မှာတော့ မြေခွေးအမြီးဆယ်ခုက လှုပ်ရှားလာတော့သည်။

"အဲဒါက..."

တုရှန်မြေခွေးမျိုးနွယ်မှ လူအားလုံး သူတို့၏‌သွေးမျိုးဆက်မှ ထွက်လာသည့် ပြင်းထန်သောဖိအားကို ချက်ချင်း ခံစားလိုက်ရတော့သည်။

"ဒုန်း"

တုရှန်မြေခွေးမျိုးနွယ်မှ သတ္တဝါအားလုံး မြေပြင်ပေါ်တွင် ဒူးထောက်ကုန်ကြသည်။

သူတို့၏ ဆန္ဒအလျောက်မဟုတ်ဘဲ၊ သူတို့ခန္ဓာကိုယ်ကို မထိန်းချုပ်နိုင်ကြခြင်း ဖြစ်ချေသည်။ သူတို့၏ ဝိညာဉ်များကလည်း ထိုအရှိန်အဝါအောက်တွင် ကြောက်ရွံ့တုန်လှုပ်နေခဲ့ရသည်။

သာမန်တုရှန်မြေခွေးမျိုးနွယ်များကို မဆိုထားဘိ။

တုရှန်မင်းသမီးငါးပါး၏ သိမ်မွေ့သော ခန္ဓာကိုယ်လေးများက တုန်လှုပ်သွားပြီး ဒူးထောက်ကာ ဦးညွတ်ချင်သလို ခံစားလိုက်ရတော့သည်။

"မဟုတ်ဘူး..."

တုရှန်ဝမ်ဝမ်၏ မျက်နှာက ဖြူဖျော့သွားသည်။

ယွင်ရှောင်ဟေး၏ရှေ့တွင် အမှန်တကယ် ဒူးထောက်မိပါက မည်သို့ဖြစ်နည်း။

ယင်းကိုမြင်တော့ ကျွင်းရှောင်ယောက်က သူ့အင်္ကျီလက်ကို ဆတ်ခနဲ ခါယမ်းပြီး မင်းသမီးငါးယောက်ကို အကာအကွယ်ပေးလိုက်သည်။

သွေးမျိုးဆက်မှ ထွက်ပေါ်လာသော ဖိအားများလည်း ထိုမှသာ ပျောက်ကွယ်သွားတော့သည်။

"သခင်လေး..."

ဖိအားများ ရုတ်တရက် ပျောက်ကွယ်သွားသည်ဟု ခံစားလိုက်ရသောကြောင့် တုရှန်ဝမ်ဝမ်၏ လှပသော မျက်လုံးများမှာ လှုပ်သွားသည်။ သူ ခံစားသွားရ၏။

လူတစ်ယောက်မှ မိမိကို ချစ်မချစ် သိလိုပါက ထိုသူ၏အပြုအမူကို ကြည့်နိုင်သည်။

ကျွင်းရှောင်ယောက်က အများကြီးမပြောသော်လည်း သူ၏ အပြုအမူများက ထင်ရှားပေသည်။

တုရှန်ဝမ်ဝမ်လည်း တစ်ခါမျှ မကြုံဖူးသော လုံခြုံမှု ခံစားချက်ကို ခံစားလိုက်ရသည်။

သူမတင်မကဘဲ အခြားသော မင်းသမီးလေးယောက်လည်း သူတို့၏ဖိအားများ လုံးဝပျောက်ကွယ်သွားသည်ဟု ခံစားခဲ့ရလေသည်။

ကျွင်းရှောင်ယောက်ကိုကြည့်ရင်း သူတို့၏ မျက်လုံးများ တောက်ပသွားကြသည်။

ကျွင်းရှောင်ယောက်ကတော့ သူ၏ ကျပန်းလုပ်ဆောင်မှုကြောင့် မင်းသမီးငါးယောက်၏ သူ့အပေါ် ခံစားချက်များ ပို၍ တိုးလာစေခဲ့မှန်း မသိသေးပါ။

တုရှန်မင်ဖေးမှာတော့ သူမ၏ကျင့်ကြံခြင်းကြောင့် သရုပ်ပျက်သည်အထိ မဖြစ်နိုင်ပေ။

သို့သော်လည်း သူမ၏ သွေးမျိုးဆက်မှ ဖြစ်ပေါ်လာသော ဖိအားတစ်မျိုးကို ခံစားခဲ့ရသည်။

"ဒါ...ဒါက ဘယ်လိုလုပ် ဖြစ်နိုင်မှာလဲ။ အမြီးဆယ်ချောင်း မြေခွေးနက်သွေးမျိုးဆက်က ပျောက်ကွယ်နေခဲ့ပြီ မဟုတ်ဘူးလား"

တုရှန်မင်ဖေးလည်း မယုံနိုင်လောက်အောင် ဖြစ်သွားသည်။

အမြီးဆယ်ချောင်း မြေခွေးနက်မှာ အလွန်ရှားပါးသော သွေးမျိုးဆက် ဖြစ်သည်။

ယင်းက အလွန်အစွမ်းထက်သော်လည်း အန္တရာယ်များ၏။

ယင်းက ထိန်းချုပ်ရခက်ပြီး အလွန်ရှားပါးပေသည်။

ယခုအခါ မြေခွေးနက်အများစုက သာမန်ဆန်လွန်းပြီးနှင့် နိမ့်ပါးသော မြေခွေးများသာ ဖြစ်ကြသည်။

ထို့ကြောင့် အမြီးဆယ်ချောင်း မြေခွေးနက်တစ်ကောင် ထပ်မံပေါ်လာရန် မဖြစ်နိုင်ပေ။

"ဘယ်လိုလဲ ဝမ်ဝမ်၊ ငါ မင်းကိုလက်ထပ်ဖို့ အရည်အချင်းပြည့်မီပြီလား"

ယွင်ရှောင်ဟေးက ဝံ့ကြွားစွာ မေးလိုက်သည်။ ဒူးထောက်ထားသည့် မြေခွေးမျိုးနွယ်စုများကို ကြည့်လိုက်ရာ၊ သူ့ကိုယ်သူ လူအများထက် သာလွန်သူဟု ခံစားလိုက်ရ၏။

အကြည့်တစ်ချက်ဖြင့် မရေမတွက်နိုင်သော သတ္တဝါများကို ကြောက်ရွံ့တုန်လှုပ်စေသည့် ခံစားချက်က တကယ်ကို အံ့ဩစရာပင်။

"နင့်မှာခွန်အားရှိတာနဲ့ ငါနင့်ကို စွဲလမ်းနေမယ်ထင်ရင် နင်မှားသွားပြီ"

တုရှန်ဝမ်ဝမ်၏ မျက်လုံးများက ရွံရှာမှု အရိပ်အယောင်များ ပေါ်လာခဲ့သည်။

အမှန်တော့၊ မူလက သူဟာ ကျွင်းရှောင်ယောက်၏ လျှို့ဝှက်ဆန်းကြယ်မှုနှင့် စွမ်းအားကြောင့် စိတ်ဝင်စားခဲ့မိသည်။

သို့သော်လည်း၊ ပို၍ ရင်းနှီးလာပြီးနောက်...

ကျွင်းရှောင်ယောက်၏ ခွန်အားသက်သက်ကြောင့် စိတ်ဝင်စားခဲ့ခြင်းမဟုတ်ကြောင်း သိလာခဲ့ရသည်။

သူ၏ စကားပြောဟန်၊ ကိုယ်ရည်ကိုယ်သွေးနှင့် ကျင့်ကြံခြင်းတွင် လမ်းညွှန်ပေးခဲ့ခြင်း...

ကျွင်းရှောင်ယောက်က ပြီးပြည့်စုံပြီး ကဏ္ဍတိုင်းမှ သူမကို ဆွဲဆောင်ခဲ့ခြင်း ဖြစ်ပေသည်။

"ငါ့မှာ ခွန်အားသက်သက်ပဲ ရှိတာမဟုတ်ဘူး"

ယွင်ရှောင်ဟေးက အနည်းငယ်မျှ စိတ်မပျက်ပေ။ သူ့ဝမ်းဗိုက်မှ အလင်းရောင် တောက်ပလာပြီးနောက် ကောင်းကင်တွင် အနက်ရောင် ခြောက်ထောင့်ကြယ် အမှတ်အသားတစ်ခု ပေါ်လာတော့သည်။

"ဒါက ခြောက်ထောင့်ကြယ် အမှတ်အသားပဲ။ သူကလည်း... ဖြစ်နိုင်မလား"

ထိုအခိုက်တွင် အရာအားလုံး တိတ်ဆိတ်သွားခဲ့သည်။

ထို့နောက် ရုတ်ရုတ်သဲသဲ ဖြစ်သွား၏။

ကမ္ဘာဖျက်ဆီးခြင်း ဘုရင်တစ်ပါး ထပ်မံပေါ်လာပြီ။

လူတိုင်း တုန်လှုပ်သွားကြသည်။

ဤမင်္ဂလာဆောင်တွင် ကမ္ဘာဖျက်ဆီးခြင်းဘုရင်တစ်ပါး၏ နိုးထမှုကို ထပ်မံ သက်သေခံနိုင်မည်ဟု မထင်ထားခဲ့ပေ။

ယင်းက အနည်းငယ် အိပ်မက်ဆန်သည်။

"အချိန်တိုလေးအတွင်းမှာ ကမ္ဘာဖျက်ဆီးခြင်း ဘုရင်သုံးပါး ပေါ်လာပြီ"

"ဒီအမြီးဆယ်ချောင်း မြေခွေးနက်က စစ်နတ်ဘုရားနဲ့ ပခုံးချင်းယှဉ်ရပ်တည်နိုင်တဲ့ အရည်အချင်းရှိပုံရတယ်"

"အမှန်ပဲ၊ ကမ္ဘာဖျက်ဆီးခြင်း ဘုရင်‌အနေနဲ့ သူ့မှာ ဒီလိုအရည်အချင်းတွေ ရှိပုံရတယ်"

ဖျက်ဆီးခြင်းဘုရင် အထောက်အထားကို ထုတ်ဖော်လိုက်ပြီးနောက် အခြေအနေက ပြောင်းလဲသွားခဲ့သည်။

ယခင်က လူအများဟာ ယွင်ရှောင်ဟေး၏ ဇာစ်မြစ်ကို ကဲ့ရဲ့ရှုတ်ချခဲ့ကြသည်။

ယခုတော့ သတ္တဝါများစွာ၏ မျက်လုံးများတွင် ကြောက်ရွံ့ခြင်းသာ ရှိတော့သည်။

နောက်ဆုံးတွင်၊ ဖျက်ဆီးခြင်းဘုရင်ခြောက်ပါးက လက်ရှိ တိုင်းတပါးအတွက် အလွန်အရေးကြီးပြီး အထိခိုက်မခံနိုင်ပေ။

ယွင်ရှောင်ဟေး၏ နှုတ်ခမ်းများက အနည်းငယ်တွန့်ကွေးသွားခဲ့သည်။

လူအများ၏ ကြည်ညိုလေးစားမှု ခံစားချက်က အလွန်အံ့သြဖွယ်ကောင်းပြီး ရင်ခုန်စိတ်လှုပ်ရှားဖွယ် ကောင်းလှပေသည်။

သို့သော်လည်း ကျွင်းရှောင်ယောက်၏ အမူအရာမှာတော့ လုံးဝ ပြောင်းလဲသွားခြင်းမရှိကြောင်း သူတွေ့ခဲ့ရသည်။

"ဘာဖြစ်လို့လဲ ဝမ်ဝမ်၊ ငါ့ရဲ့ အထောက်အထားက မလုံလောက်သေးဘူးလား"

ယွင်ရှောင်ဟေးက လက်သီးကို တင်းတင်းဆုပ်လိုက်ရာ သူ့နဖူးသွေးကြောများပင် အနည်းငယ် ထောင်ထလာခဲ့သည်။

သူ့ဘက်က ဤအခြေအနေထိ ထုတ်ပြထားပြီးသည့်တိုင် တုရှန်ဝမ်ဝမ်က ဘာကြောင့် မပြောင်းလဲသေးသနည်း။

"နင် ဘာမှနားမလည်သေးပါလား။ နင့်ကို မြင်းထိန်းအဖြစ် ခေါ်ယူခဲ့တာက ငါ အမြင်မရှိခဲ့လို့ပဲ ဖြစ်ရမယ်"

တုရှန်ဝမ်ဝမ် စိတ်ပျက်စွာဖြင့် ခေါင်းခါယမ်းလိုက်သည်။

သူ၏ ကြင်နာမှုက နောက်ဆုံးမှာတော့ ဤသို့သော ပြဿနာများကို ယူဆောင်လာခဲ့ပေသည်။

အရေးကြီးဆုံးအချက်က ကျွင်းရှောင်ယောက်ကိုပင် ပြဿနာထဲသို့ ဆွဲခေါ်မိခဲ့ခြင်း ဖြစ်သည်။

"တောင်းပန်ပါတယ်သခင်လေး၊ ငါ့ကြောင့် သူ နင့်ကို ပစ်မှတ်ထားနေတာ"

တုရှန်ဝမ်ဝမ်က စိုးရိမ်ပူပန်စွာဖြင့် တောင်းပန်လိုက်လေသည်။

"ကိစ္စမရှိပါဘူး၊ ဒီလိုဖြစ်လာမယ်လို့ ဘယ်သူက မျှော်လင့်ထားမှာလဲ"

ကျွင်းရှောင်ယောက််လည်း တုရှန်ဝမ်ဝမ်၏ ပခုံးကိုပုတ်ပြီး နှစ်သိမ့်လိုက်သည်။

'သခင်လေးက တကယ်ကို နူးညံ့သိမ်မွေ့တဲ့လူပဲ'

တုရှန်ဝမ်ဝမ် ထပ်မံ ခံစားသွားရ၏။

ယွင်ရှောင်ဟေးမှာလည်း ဤမြင်ကွင်းကြောင့် မျက်လုံးများပင် ပေါက်ထွက်လုနီး ဖြစ်နေပြီ။

"မင်း ငါ့ကို နားမလည်သေးဘူးလို့ ပြောပေမဲ့ တကယ်တော့ ငါနားလည်သွားပါပြီ။ ဒါက သူ့ကြောင့်ပဲ"

"သူမရှိတော့ရင် အရာအားလုံးက မူလအနေအထားကို ပြန်ရောက်သွားနိုင်တယ်"

ယွင်ရှောင်ဟေးက ကျွင်းရှောင်ယောက်ကို စိုက်ကြည့်လိုက်သည်။

သူ့နှလုံးသားထဲမှ မနာလိုစိတ်များကို မထိန်းနိုင်တော့ပေ။

အဓိပဓိအဆင့် အရှိန်အဝါများက ပေါက်ကွဲထွက်ပေါ်လာခဲ့သည်။

ယွင်ရှောင်ဟေးက ကျွင်းရှောင်ယောက်ဆီသို့ လျင်မြန်သော အဟုန်ဖြင့် ပြေးဝင်လာ၏။ သူ့နောက်မှ မြေခွေးအမြီးဆယ်ချောင်းကလည်း အနက်ရောင် လှံဆယ်ချောင်းအဖြစ် ပြောင်းလဲကာ ကျွင်းရှောင်ယောက်ကို ထိုးဖောက်လာတော့သည်။

"မင်းသေရင် အရာအားလုံး ပုံမှန်ပြန်ဖြစ်သွားလိမ့်မယ်"

ဤတိုက်ခိုက်မှုက သာမန် အဓိပဓိများကို ချက်ချင်းသတ်ရန် လုံလောက်သည်။

ဤသည်မှာ အမြီးဆယ်ချောင်း မြေခွေးနက်၏ စွမ်းရည် ဖြစ်သည်။

သို့သော်...

ကျွင်းရှောင်ယောက်၏ ခန္ဓာကိုယ်က တုန်ခါသွားသည်။ သူက လက်သီးဆုပ်ပြီး ကောင်းကင်ကို လက်သီးတစ်ချက် ထုတ်ဖော်လိုက်၏။

"ဝုန်း"

ကောင်းကင်ကြီး နှစ်ခြမ်းကွဲသွားသလို ပေါက်ကွဲသံကြီး ထွက်ပေါ်လာတော့သည်။

သွေးများ ဖြာရဲသွားခဲ့သည်။

ယွင်ရှောင်ဟေး၏ ခန္ဓာကိုယ်က လွင့်ထွက်သွားပြီး သူ့ရင်ဘတ် ပွင့်ထွက်သွား၏။ မျက်စိတစ်မှိတ်အတွင်း သူ ဒဏ်ရာရသွားပြီး သရုပ်ပျက်သွားရတော့သည်။

"စကားများလိုက်တာ၊ မင်းကိုယ်မင်း အရေးပါသူတစ်ယောက်လို့ တကယ် ထင်နေတာလား"

ကျွင်းရှောင်ယောက်က အနည်းငယ် စောင်းငဲ့ကြည့်လိုက်သည်။ ပုရွက်ဆိတ်တစ်ကောင်နှင့် စကားပြောနေသကဲ့သို့ သူ့လေသံက လုံးဝ ပြောင်းလဲမှုမရှိပေ။