အခန်း ၁၁၁၄

အခန်း ( ၁၁၁၄ ) မျိုးဆက်သုံးခု ကြေးခေါင်းတလား။

ကမ္ဘာပေါ်တွင် ကိုယ်ထင်ပြလာကတည်းက အန္တိမကပ်ဘေးကြီးသည် လျစ်လျူရှုထားကာ မည်သူ့ကိုမျှ ဂရုမစိုက်ခဲ့ပေ။

သူဟာ ပြိုင်ဘက်ကင်းသော တည်ရှိမှုတစ်ခုကဲ့သို့ ဖြစ်သည်။

သူ ဒဏ်ရာရခဲ့သည်အထိ အေးဆေးတည်ငြိမ်သေးပြီး အရာအားလုံးကို အဆုံးမှာ ဖြေရှင်းနိုင်မည်ဟု ထင်နေသေးသည်။

ယခုမူကား...

ရှေးဟောင်း ကြေးခေါင်းတလားကို မြင်လိုက်ရပြီးနောက် အမြဲတမ်း လျစ်လျူရှုထားပြီး ခံစားချက်ကင်းမဲ့သော အန္တိမကပ်ဘေးကြီးမှာ စိတ်တည်ငြိမ်မှုတို့ လုံးဝဆုံးရှုံးသွားခဲ့ပြီ ဖြစ်သည်။

သူ တုန်လှုပ်ချောက်ချားသွားပြီ။

ဤကြေးခေါင်း‌တလားသည် ကျွင်းရှောင်ယောက် လက်မှတ်ထိုးဝင်ရာမှ ရရှိခဲ့သော ကြယ်ဆယ်ပွင့်ဆုလာဘ် ဖြစ်သည်။

ယခင်က၊ ကျွင်းရှောင်ယောက်သည် ဤမျိုးဆက်သုံးခု ကြေးခေါင်းတလား၏ အခန်းကဏ္ဍကို မသိဘဲ၊ အဘယ်ကြောင့် ကြယ်ဆယ်ပွင့်ဆုလာဘ် ဖြစ်ရသလဲ ဆိုတာကိုလည်း မသိခဲ့။

သို့သော် နောက်ပိုင်းတွင်၊ မျိုးဆက်သုံးခု ကြေးခေါင်းတလားသည် အန္တိမကပ်ဘေးကြီးနှင့် တုံ့ပြန်မှုတစ်မျိုးမျိုး ရှိနေပုံရကြောင်း တွေ့ရှိခဲ့ရသည်။

ထို့ကြောင့် ကျွင်းရှောင်ယောက်က အန္တိမကပ်ဘေးကြီးကို ဖိနှိပ်နိုင်မလားဆိုတာကို စမ်းသပ်ရန် မျိုးဆက်သုံးခု ကြေးခေါင်းတလားကို ထုတ်ဖော်လိုက်ခြင်း ဖြစ်၏။

ယခုတော့ အန္တိမကပ်ဘေးကြီး၏ တုံ့ပြန်မှုကို မြင်လိုက်ရပြီးနောက် ကျွင်းရှောင်ယောက် လုံးဝ နားလည်သွားပြီ ဖြစ်သည်။

မျိုးဆက်သုံးခု ကြေးခေါင်းတလားနှင့် အနက်ရောင်သွေး၏ အရင်းအမြစ်က အမှန်တကယ် ဆက်စပ်နေသည်။

ယင်းက အေးစက်နေသော ပလ္လင်ပေါ်တွင် ထိုင်နေသည့် အမှောင်နတ်ဆိုးပုံရိပ်နှင့်ပင် ဆက်စပ်နေပေမည်။

မျိုးဆက်သုံးခု ကြေးခေါင်းတလားက ရိုးရှင်းပြီး နေ၊ လ၊ ကြယ်များ၊ အသီးအရွက်များ၊ ပိုးကောင်များနှင့် ငါးများ... အစရှိသော ပုံစံမျိုးစုံကို ရေးထွင်းထားသည်။

အလွန်ရှေးကျသော အငွေ့အသက်များလည်း ထွက်ပေါ်နေ၏။

၎င်း၏ အရည်အသွေးက ဧကရာဇ်လက်နက်များ နှိုင်းယှဉ်နိုင်တာ မဟုတ်ပေ။

မျိုးဆက်သုံးခု ကြေးခေါင်းတလားကို ထုတ်ဖော်လိုက်သောအခါ... အန္တိမကပ်ဘေးကြီး တုန်လှုပ်လာသည်။

၎င်း၏ လက်တံများအားလုံးက ဓမ္မခန္ဓာကို ရိုက်ချလိုက်၏။

သို့သော်လည်း၊ အမှောင်ထုသို့ ဝင်ရောက်ပြီးနောက် ဓမ္မခန္ဓာက အန္တိမကပ်ဘေးကြီးကို လုံးဝ မကြောက်တော့ပါ။

သူက လက်တစ်ဖက်တွင် ယုံကြည်ခြင်းစွမ်းအားကို ထိန်းချုပ်ထားပြီး ကျန်လက်တစ်ဖက်မှာတော့ အနက်ရောင်သွေး၏ စွမ်းအားကို ထိန်းချုပ်ထားသည်။

တစ်ချိန်တည်းမှာပင်၊ မျိုးဆက်သုံးခု ကြေးခေါင်းတလားကို အသက်သွင်းလိုက်၏။

ကျယ်လောင်သော ပေါက်ကွဲသံနှင့်အတူ ပြင်းထန်သော စွမ်းအားများက မိုးနှင့်မြေကို ပြိုကျသွားစေခဲ့သည်။

လက်တံရှည်များစွာလည်း အပိုင်းပိုင်း ပြတ်တောက်သွားတော့သည်။

အန္တိမကပ်ဘေးကြီးမှာ အော်ဟစ်ရင်း နောက်သို့ ဆုတ်သွားရသည်။

မျိုးဆက်သုံးခု ကြေးခေါင်းတလားက အန္တိမကပ်ဘေးကြီးကို ဖိနှိပ်နေသော ရှေးဟောင်း တောင်ကြီးတစ်လုံးကဲ့သို့ပင်။

ကြီးကျယ်ခမ်းနားသော အင်အားတစ်ခုက အန္တိမကပ်ဘေးကြီး၏ စွမ်းအားများစွာကို ဖိနှိပ်ထားခဲ့သည်။

ကျွင်းရှောင်ယောက်က ဓမ္မခန္ဓာကို ထိန်းချုပ်ပြီး ရှေ့သို့ ခြေတစ်လှမ်းတိုးလိုက်သည်။ ဓမ္မခန္ဓာက လက်တစ်ဖက်ကို ဆန့်ထုတ်ပြီး အန္တိမကပ်ဘေးကြီးကို ထိုးစိုက်ထားသော အင်မော်တယ်သတ်ဓားကို ဆွဲနှုတ်လိုက်၏။

"ဝမ်"

တခဏအတွင်းမှာပင် သန်းပေါင်းများစွာသော ဓားအလင်းများက ဖြာထွက်လာတော့သည်။

ဓားအလင်းတစ်ခုစီက ကျယ်ပြောလှသော အမှောင်ထုကို ဖြတ်ကျော်သွားနိုင်ပုံရသည်။

အင်မော်တယ်သတ်ဓားကို ဆုပ်ကိုင်ပြီးနောက် ဓမ္မခန္ဓာ၏ စွမ်းအားက ပို၍ ကြီးမားလာပုံရသည်။

မူလက အင်မော်တယ်သတ်ဓားသည် အစွမ်းထက်သော်လည်း ထိန်းချုပ်ထားသူ မရှိသောကြောင့် စွမ်းအားမှာလည်း အကန့်အသတ်ရှိခဲ့သည်။

ယခုမူကား၊ ဓမ္မခန္ဓာက အင်မော်တယ်သတ်ဓားကို ကိုင်ဆောင်ထားလိုက်ပြီ။ ၎င်း၏ စွမ်းအားက အချိန်မြစ်ကိုပင် ဖြတ်‌တောက်ပစ်နိုင်ပုံရသည်။

"ရင်းနှီးနေသလိုပဲ"

အင်မော်တယ်သတ်ဓား၏ ဓားဝိညာဉ်က တီးတိုးရေရွတ်လိုက်သည်။

ဤနေရာတွင်၊ အခြားသူဖြစ်ပါက အင်မော်တယ်သတ်ဓားကို အသက်သွင်းရန် နေနေသာသာ၊ ဆွဲနှုတ်ရန်ပင် မဖြစ်နိုင်ပေ။

ကျွင်းမိသားစု၏ အသန့်စင်ဆုံးသော သွေးမျိုးဆက်ရှိသူသာလျှင် ၎င်းကို ထိန်းချုပ်ရန် အရည်အချင်း ပြည့်မီသည်။

"မဟုတ်ဘူး၊ ငါက ထာဝရ မပျက်စီးနိုင်တဲ့ အန္တိမကပ်ဘေးကြီးပဲ"

အန္တိမကပ်ဘေးကြီးက ဒေါသတကြီး အော်ဟစ်လိုက်သည်။ အနက်ရောင်သွေး စွမ်းအင်များကလည်း ဒီရေကဲ့သို့ လှိုင်းထနေ၏။

သို့သော်လည်း အသုံးမဝင်ပေ။

မျိုးဆက်သုံးခု ကြေးခေါင်းတလားက အန္တိမကပ်ဘေးကြီးကို ပြတ်ပြတ်သားသား နှိမ်နင်းနိုင်သော ထာဝရတောင်ကြီးတစ်လုံးကဲ့သို့ ဖြစ်သည်။

ဓမ္မခန္ဓာက အင်မော်တယ်သတ်ဓားကို ကိုင်မြှောင်လိုက်သည်။

အကန့်အသတ်မရှိသောစွမ်းအင်များက အင်မော်တယ်သတ်ဓားထဲသို့ စီးဆင်းသွား၏။

ဓား၏ပတ်ဝန်းကျင်တဝိုကတွင် အင်မော်တယ်အလင်းလှိုင်းများ ပေါ်လာတော့သည်။

အချိန်မြစ်ကြီးကိုပင် ဖြတ်တောက်နိုင်သကဲ့သို့ မိုင်ပေါင်းသန်းပေါင်းများစွာ ရှည်လျားသော ဓားအလင်းကြီးတစ်ခု ပေါ်လာခဲ့သည်။

ဤဓားချက်က ကောင်းကင်မဲ့အမှောင်နယ်မြေ တစ်ခုလုံးကို ခွဲချသွား၏။

ထို့နောက်တွင်၊ အင်မော်တယ်ဓားအလင်းက အန္တိမကပ်ဘေးကြီးဆီသို့ ဝင်ရောက်သွားတော့သည်။

"ဝုန်း"

ထိုအချိန်တွင် အရာအားလုံး ပျောက်ကွယ်သွားပုံရသည်။

မျက်စိရှေ့တွင် မြင်နိုင်သမျှ တစ်ခုတည်းသောအရာက စကြာဝဠာတစ်ခုလုံးတွင် အတောက်ပဆုံးသော ဓားအလင်းကြီး ဖြစ်၏။

ဤအခိုက်အတန့်တွင် ကမ္ဘာနှစ်ခုလုံးရှိ သတ္တဝါအားလုံး အလွန်တုန်လှုပ်သွားကြသည်။

အဆုံးတွင် အန္တိမကပ်ဘေးကြီးကို တွန်းလှန်နိုင်သူက...

ကျွင်းဝူဟွေ့မဟုတ်၊ ဧကရာဇ်ချီထျန်း၏ အစစ်အမှန်ဝိညာဉ် မဟုတ်၊ လျှို့ဝှက်ဆန်းကြယ်သည့် သရဲမျက်နှာဖုံးဖြင့် အမျိုးသမီးလည်း မဟုတ်ပါ။

ထိုအစား ကျွင်းရှောင်ယောက် ဖြစ်သည်။

အဓိပဓိအဆင့် ကျင့်ကြံခြင်းသာရှိသော ကျွင်းရှောင်ယောက် ဖြစ်၏။

တိုင်းတပါး၏ အင်မော်တယ်ဘုရင်များလည်း အလွန်တုန်လှုပ်သွားတော့သည်။

သူတို့၏ မျက်လုံးထဲတွင် ပုရွက်ဆိတ်နှင့်မခြားသော အင်မော်တယ်နယ်မြေကြီးမှ ပါရမီရှင်လေးက ဤတိုက်ပွဲတွင် အရေးကြီးဆုံးသော ပုဂ္ဂိုလ်တစ်ဦး ဖြစ်လာသည်။

"အခြေအနေက ဘယ်လိုလဲ"

တောက်ပလွန်းသည့် ဓားအလင်းကြီးကိုကြည့်ရင်း လူများမှာ အသက်မရှူနိုင်တော့ပေ။

နောက်ဆုံးတွင် ဧရာမ ဓားအလင်းကြီးက မှိန်ဖျော့လာသည်။

မြင်ကွင်းများကို ရှင်းရှင်းလင်းလင်း ပြန်မြင်လာရသောအခါ၊ အားလုံး၏ ရင်ထဲတွင် အေးစက်သွား၏။

သူတို့ ဘာကိုမြင်နေရသနည်း။

ရှေးဟောင်းကြယ်တစ်လုံးကဲ့သို့ ကြီးမားသည့် အန္တိမကပ်ဘေးကြီးမှာ ဖရဲသီးလိုက်သကဲ့သို့ ထက်ခြမ်းကွဲသွားသည်။

တိုင်းတပါးသား အားလုံး၏ ကျောရိုးထဲတွင် စိမ့်တက်သွားတော့သည်။

သူတို့အားလုံး သွေးပျက်ချောက်ချားပြီး သူတို့၏ ဝိညာဉ်များပင်လျှင် အေးခဲသွားပုံရသည်။

အန္တိမကပ်ဘေးကြီးက အမှန်တကယ် ထက်ခြမ်းကွဲသွားပြီ။

"မဟုတ်ဘူး၊ မပြီးသေးဘူး"

တိုင်းတစ်ပါးမှ အင်မော်တယ်ဘုရင်အချို့က ခေါင်းမာပြီး လက်မလျှော့သေးပါ။

"အား"

ကောင်းကင်မဲ့အမှောင်နယ်မြေတွင်၊ ထက်ခြမ်းကွဲသွားသော အန္တိမကပ်ဘေးကြီး၏ ဒေါသတကြီး ဟိန်းဟောက်သံ ထွက်ပေါ်လာခဲ့သည်။

ထက်ခြမ်းကွဲသွားသော်လည်း သူ မသေသေးပါ။

သူက လူခန္ဓာမရှိဘဲ အသားပုပ်နှင့် သွေးမည်းတို့ဖြင့် ပြည့်နှက်နေသော မျက်လုံးတစ်လုံး ဖြစ်သည်။

သို့သော်လည်း ဓားအလင်းကြောင့် မရေမတွက်နိုင်သော လက်တံကြီးများ ပြတ်တောက်သွားခဲ့ရပေသည်။

"မင်းတို့ ကျွင်းမိသားစုရဲ့ ဘိုးဘေးတွေတောင် ငါ့ကို မဖျက်ဆီးနိုင်ဘူး။ မင်းလို ပုရွက်ဆိတ်တစ်ကောင်မှာ ဘယ်လိုလုပ်ပြီး ဒီလိုအရည်အချင်းရှိနိုင်မှာလဲ"

အန္တိမကပ်ဘေးကြီးက အော်ဟစ်လိုက်သည်။ အနက်ရောင်သွေးစွမ်းအင်များက တဟုန်ထိုးတက်လာကာ ဒဏ်ရာများကိုသပြီး ပြန်လည်ပေါင်းစပ်ရန် ကြိုးစားလိုက်၏။

မှန်သည်။

အဓိပဓိနယ်ပယ်တွင်သာရှိသော ကျွင်းရှောင်ယောက်က အန္တိမကပ်ဘေးကြီး၏ မျက်စိထဲတွင်ပုရွက်ဆိတ်ပင် မဖြစ်နိုင်ပေ။

အကယ်၍ ဓမ္မခန္ဓာအတွက် မဟုတ်ပါက၊ ကျွင်းရှောင်ယောက်သည် အန္တိမကပ်ဘေးကြီးကို ရင်ဆိုင်ရန်ပင် အရည်အချင်းရှိမည် မဟုတ်ပေ။

သို့သော်လည်း ကျွင်းရှောင်ယောက်က အခြေအနေများထက် ရလဒ်ကိုသာ ကြည့်သည်။

"ငါပြောပြီးပြီ၊ ဒီနေ့က မင်းရဲ့ အဆုံးသတ်ပဲ"

ကျွင်းရှောင်ယောက်၏ အမူအရာက မပြောင်းလဲပေ။ သူက အေးစက်စက်ဖြင့် ပြောလိုက်သည်။

ကျွင်းရှောင်ယောက်၏ ထိန်းချုပ်မှုဖြင့် ဓမ္မခန္ဓာက အင်မော်တယ်သတ်ဓားကို ထပ်မံဝင့်လိုက်သည်။

ဓားချက် ထုတ်ဖော်လိုက်သောအခါ နတ်ဘုရားများ ကြွေကျသကဲ့သို့ ထူးကဲသော မြင်ကွင်းများ ပေါ်လာ၏။

တောက်ပသော ဓားအလင်းတစ်ခု ထပ်မံ ဖြာထွက်လာပြန်တော့သည်။

"ဝုန်း"

အန္တိမကပ်ဘေးကြီးမှာ ထက်ခြမ်းကွဲသွားရာမှ လေးပိုင်း ဖြစ်သွားသည်။

သူက အဆုံးမဲ့ အနက်ရောင်သွေးစွမ်းအားဖြင့် ပေါက်ကွဲထွက်ချင်သော်လည်း...

ကောင်းကင်၏ အနက်ရောင်သွေးစွမ်းအားက ဖိနှိပ်ထားခဲ့သည်။

ကျွင်းရှောင်ယောက်က အန္တိမကပ်ဘေးကြီး၏ သဘာဝရန်သူဟုပင် ဆိုရမည်။

အန္တိမကပ်ဘေးကြီးကို ဖိနှိပ်နိုင်သော နည်းလမ်းအမျိုးမျိုးက သူ့ထံတွင် ရှိသည်။

ထိုအချိန်တွင်၊ မျိုးဆက်သုံးခု ကြေးခေါင်းတလားက အဖုံးပွင့်လာသည်။

ရှေးဟောင်း အင်မော်တယ်နတ်ဘုရား ပြန်လည်ရှင်သန်လာသကဲ့သို့ အကန့်အသတ်မရှိသော အငွေ့အသက်များ ထွက်ပေါ်လာ၏။

အဆုံးမဲ့ ကြောက်စရာကောင်းသော စွမ်းအားတစ်ခုက အရာခပ်သိမ်းကို စုပ်ယူပြီး ဝါးမျိုထားရန် ကြိုးစားလာတော့သည်။

အင်မော်တယ်သတ်ဓားဖြင့် ဖြတ်တောက်ခံရပြီး ပြင်းထန်စွာ ဒဏ်ရာရသွားသည့် အန္တိမကပ်ဘေးကြီးကို မျိုးဆက်သုံးခု ကြေးခေါင်းတလားထဲသို့ တိုက်ရိုက် ဆွဲသွင်းသွားလိုက်သည်။

"မဟုတ်ဘူး၊ ငါ လက်မခံနိုင်ဘူး။ ငါက ကမ္ဘာပျက်သုဉ်းခြင်းရဲ့ နိယာမ... ငါက ထာဝရပျက်စီးခြင်းပဲ"

အန္တိမကပ်ဘေးကြီးက အော်ဟစ်လိုက်သည်။

မျိုးဆက်သုံးခု ကြေးခေါင်းတလားထဲသို့ ဆွဲသွင်းခံလိုက်ရပါက၊ သူ အမှန်တကယ် သေဆုံးရတော့မည်ဟု ခံစားနေရ၏။

အကြောင်းမူကား၊ ထိုကြေးခေါင်းတလားမှာ အနက်ရောင်သွေးကို ထိန်းချုပ်ရန် မွေးဖွားလာသောကြောင့်ပင်။