အခန်း ၁၁၂၇

အခန်း ( ၁၁၂၇ ) လော့ရှန်းလင် ရောက်ရှိလာပြီ။

ကျွင်းရှောင်ယောက်က သူ့အတွက် အကျိုးမရှိသောအရာကို လုပ်ရန် စိတ်မဝင်စားပေ။

အင်မော်တယ်အကယ်ဒမီ၏ မဟာအကြီးအကဲက ဆက်ပြောလိုက်သည်။

"ကံကောင်းခြင်းရဲ့ ထွတ်မြတ်နယ်မြေကို ရွှီထျန်းလောကလို့ ခေါ်တယ်။ အဲဒါက အကန့်အသတ်မဲ့ပင်လယ်နဲ့ မဝေးဘူး"

“ကောလဟာလကတော့ အဲဒီနေရာဟာ ရှေးခေတ်က အကျော်အမော်တွေရဲ့ စိတ်ဆန္ဒတွေ တိုက်မိပြီး ဖြစ်ပေါ်လာတာတဲ့"

"ရှေးဦးဝိညာဉ်တွေပဲ ရွှီထျန်းလောကကို ဝင်ရောက်နိုင်တယ်"

"ဒါပေမဲ့ ပြင်ပကမ္ဘာမှာ ရှာမတွေ့နိုင်တဲ့ ရတနာတွေတောင် အဲဒီမှာ ရှိနေနိုင်တယ်။ သူတို့ရဲ့ တန်ဖိုးက အင်မော်တယ်အဆင့် ကံကောင်းခြင်းထက် နိမ့်ကျမှာမဟုတ်ဘူး"

အင်မော်တယ်အကယ်ဒမီမှ မဟာအကြီးအကဲ၏ စကားကိုကြားပြီးနောက် ကျွင်းရှောင်ယောက်၏ မျက်လုံးများက ပို၍ တောက်ပလာသည်။

ရှေးဦးဝိညာဉ်သာလျှင် ဝင်နိုင်တာလား။

သို့ဆိုလျှင် သူ၏ မျိုးဆက်သုံးခု ရှေးဦးဝိညာဉ်က ပြိုင်ဘက်ကင်းနေတော့မည် မဟုတ်ပါလော။

"ဒါပေါ့၊ ရွှီထျန်းလောကဟာ အန္တရာယ်တွေ ကင်းမဲ့နေတာတော့ မဟုတ်ဘူး။ နောက်ဆုံးမှာတော့ ဒါဟာ ရှေးခေတ်က တန်ခိုးရှင်ကြီးတွေရဲ့ စိတ်ဆန္ဒတွေ တိုက်မိခြင်းကနေ ဖြစ်ပေါ်လာတဲ့ ကစဉ့်ကလျား နေရာတစ်ခုပဲလေ"

"အကန့်အသတ်ပင်လယ်နဲ့လည်း နီးစပ်တာကြောင့် အချိန်ဟင်းလင်းပြင်ကနေ အမည်မသိ နေရာတွေကို ရောက်ရှိသွားနိုင်တယ်"

"‌ဒါပေါ့၊ ရှေးဦးဝိညာဉ်ရဲ့ တစ်စိတ်တစ်ပိုင်းကိုပဲ ဝင်ရောက်စေလို့လည်း ရတယ်။ ဒီနည်းနဲ့ အနည်းဆုံးတော့ အသက်အန္တရာယ်ကို အာမခံနိုင်တယ်"

အင်မော်တယ်အကယ်ဒမီ၏ မဟာအကြီးအကဲက ပြောလိုက်သည်။

"နားလည်ပါပြီ။ ဒီလိုဆိုရင် အင်မော်တယ်အကယ်ဒမီကို ဘာဖြစ်လို့ မဝင်ရောက်ရမှာလဲ"

ကျွင်းရှောင်ယောက်က ခေါင်းညိတ်သဘောတူလိုက်သည်။

"ဟားဟားဟား၊ ကောင်းတယ်။ အင်မော်တယ်အကယ်ဒမီကနေ မိတ်ဆွေလေး ရောက်လာတာကို စောင့်နေမယ်"

အင်မော်တယ်အကယ်ဒမီ၏ မဟာအကြီးအကဲလည်း ရယ်မောပြီး ထွက်သွားလေတော့သည်။

"အင်မော်တယ်အကယ်ဒမီမှာ ထွတ်မြတ် ကံ‌ကြမ္မာနယ်မြေတစ်လု ရှိနေသေးတာပဲ။ ဒီအဘိုးကြီးက ငါတို့ကိုတောင် လျှို့ဝှက်ထားခဲ့တယ်"

ကျန်းလော့လီက နှာခေါင်းကို အနည်းငယ် ရှုံ့လိုက်သည်။

ကျွင်းရှောင်ယောက် ပြန်လာပြီးနောက် ကျန်းလော့လီမှာ အနည်းငယ်ပို၍ ရွှင်လန်းတက်ကြွလာပုံရလေသည်။

"မေ့လိုက်ပါ၊ အချိန်တန်မှ သွားကြည့်ရအောင်"

ကျွင်းရှောင်ယောက်က ပေါ့ပေါ့ပါးပါး ပြုံးလိုက်သည်။

ထို့နောက်မှာတော့ ကျွင်းရှောင်ယောက်က ရှေးဦးအင်ပါယာမြို့တော်မှာပဲ ဆက်နေခဲ့သည်။

သူ့အကြောင်း ဒဏ္ဍာရီများကတော့ ကောင်းကင်ကိုးခု အင်မော်တယ်အကယ်ဒမီတွင် ပျံ့နှံ့နေပြီ။

ထိုအချိန်က အင်မော်တယ်နယ်မြေကြီး၏ ကျင့်ကြံသူများစွာသည် အန္တိမကပ်ဘေးကြီးနှင့် ကျွင်းရှောင်ယောက်တို့၏ တိုက်ပွဲကို မြင်တွေ့ခဲ့ရသော်လည်း...

အင်မော်တယ်နယ်မြေကြီးတစ်ခုလုံးနှင့် နှိုင်းယှဉ်ပါက အလွန်နည်းပါးသော အရေအတွက် ဖြစ်နေသေးသည်။

လဝက်ခန့်ကြာသွားသည်။

ထိုနေ့တွင်၊ နယ်စပ်မှ အချက်ပေးသံ ထွက်ပေါ်လာ၏။

"မကောင်းတော့ဘူး၊ နယ်စပ်မှာ လူတွေ အများကြီး လာနေတာကို တွေ့ရတယ်။ သူတို့က တိုင်းတပါးသား ကျင့်ကြံသူတွေဖြစ်ပုံရတယ်"

"စစ်ပွဲပြီးတာတောင် ဘယ်လောက်ကြာသေးလို့လဲ၊ တိုင်းတပါးက ထပ်ရောက်လာပြန်ပြီလား"

နယ်စပ်တွင် လှုပ်လှုပ်ရှားရှား ဖြစ်ကုန်ကြပြန်သည်။

ယခင်က လူများစွာသည် ကမ္ဘာနှစ်ရပ်ကြား စစ်ပွဲအပြီးတွင် ကာလကြာရှည်စွာ ကြီးမားသော လှုပ်ရှားမှုများ ရှိတော့မည်မဟုတ်ဟု ယုံကြည်ခဲ့ကြသည်။

လဝက်ကျော်ကြာသည်နှင့် လှုပ်ရှားမှုများ ထပ်မံ ရှိလာဦးမည်ဟု မမျှော်လင့်ခဲ့ပေ။

"မ‌စိုးရိမ်ကြနဲ့၊ တိုင်းတပါးက အခုအချိန်မှာ တိုက်ပွဲကြီးတစ်ခုကို စတင်ဖို့ အရည်အချင်းမရှိသေးဘူး"

အမာရွတ်လေးခုသခင်ကြီးက လေထဲတွင်ပေါ်လာကာ ပြောလိုက်သည်။

ဤအခိုက်အတန့်တွင် သူက အစွမ်းထက်သော ရောင်ဝါကို ခံစားလိုက်ရ၏။

"ဧကရာဇ်တစ်ပိုင်းလား"

အမာရွတ်လေးခုသခင်ကြီးက နယ်စပ်တံခါး အပြင်ဘက်မှ ကြယ်ကောင်းကင်ကို စူးစူးစိုက်စိုက် ကြည့်လိုက်သည်။

ထိုစဉ်၊ နယ်စပ်မှာ အဖြူရောင် ၀တ်စုံဖြင့် လူရိပ်တစ်ခု ပေါ်လာသည်။

"အားလုံးပဲ၊ စိတ်အေးအေးထားကြပါ"

သူက တည်ငြိမ်သော လေသံဖြင့် ပြောလိုက်၏။

"နတ်ဘုရားသားတော်ပဲ"

"နတ်ဘုရားသားတော်"

ရောက်လာသူမှာ ကျွင်းရှောင်ယောက် ဖြစ်သည်။

သူ့ကိုမြင်တော့ တံခါးစောင့်အားလုံးက လေးလေးစားစား ဦးညွှတ်ပြီး နှုတ်ဆက်လိုက်ကြလေသည်။

"ဒါက ငါတို့ဘက်က တစ်ယောက်ပါ၊ စိတ်မပူကြနဲ့"

ကျွင်းရှောင်ယောက်က သူ့လက်ကို ဝှေ့ယမ်းလိုက်သည်။

"ဘယ်လို"

ကျွင်းရှောင်ယောက်၏ စကားကို ကြားရပြီးနောက် ရောက်ရှိလာသော တံခါးစောင့်များအားလုံး အံ့အားသင့်သွားကြသည်။

အမာရွတ်လေးခုသခင်ကြီးလည်း စိတ်ရှုပ်ထွေးသွား၏။

နယ်စပ်အပြင်ဘက်တွင် ပျော့ပျောင်းသော ဆံပင်ရှည်များနှင့် ကျက်သရေရှိစွာ လှပသော အမျိုးသမီးတစ်ဦး ဦးဆောင်သည့် သတ္တဝါအုပ်စုကြီး ပေါ်လာသည်။

ဦးဆောင်လာသူက လော့ရှန်းလင်...

သူ့ပတ်ဝန်းကျင်တွင် ရွယ်ယွဲ့၊ ဖေးချင်ရွယ်၊ ထိုပါ့ယွိ၊ ထိုပါ့လျန်နှင့် အခြား ကျွန်မျိုးနွယ်များ ရှိ၏။

ရေခဲဝိညာဉ်တော်ဝင်မျိုးနွယ်နှင့် အခြား တိုင်းတပါး၏ တော်ဝင်မျိုးနွယ်များပင် ပြောင်းရွှေ့လာခဲ့ကြသည်။

ကျွင်းရှောင်ယောက်က ကောင်းကင်မဲ့အမှောင်နယ်မြေသို့ မဝင်မီတွင် လော့ရှန်းလင်အား နောက်ဆက်တွဲကိစ္စများကို စီစဉ်ပေးရန် တောင်းဆိုထားပြီး ဖြစ်ချေသည်။

"ရှောင်ယောက်"

ကျွင်းရှောင်ယောက်ကို တွေ့လိုက်သောအခါ လော့ရှန်းလင် အလွန်ဝမ်းသာသွားသည်။ သူမက ပေါ့ပါးသွက်လက်စွာ ‌ပြေးလာပြီး ကျွင်းရှောင်ယောက်ကို ပွေ့ဖက်လိုက်၏။

ကျွင်းရှောင်ယောက်မှ ကောင်းကင်မဲ့အမှောင်နယ်မြေသို့ ဝင်ရောက်ပြီးနောက်တွင် သူမ မည်မျှ စိတ်ပူနေသည်ကို ဘုရားမှသာ သိမည်။

နောက်ဆုံးတွင်၊ ၎င်းက အန္တိမကပ်ဘေးကြီး၏ နယ်မြေဖြစ်သည် မဟုတ်လော။

ယခုမှ ကျွင်းရှောင်ယောက်က အန္တိမကပ်ဘေးကြီးကို ချေမှုန်းခဲ့သည့်အပြင် ဘေးကင်းသည်ကိုပါ မြင်လိုက်ရသည်။

လော့ရှန်းလင်မှာ အလွန် ပျော်ရွှင်ရသလို ကျွင်းရှောင်ယောက်အတွက်လည်း ဂုဏ်ယူခဲ့လေသည်။

ထိုမြင်ကွင်းကိုမြင်တော့ အမာရွတ်လေးခုသခင်ကြီးနှင့် တခြားသူများ အံ့အားသင့်သွားသည်။

သူမက တိုင်းတပါးမှ တန်ခိုးကြီးသော ဧကရာဇ်တစ်ပိုင်းဖြစ်သော်လည်း...

ယခုတော့ ကျွင်းရှောင်ယောက်၏ ရင်ခွင်ထဲကို ရောက်သွားပြီ။

ဤအကွက်က အမာရွတ်လေးခုသခင်ကြီးကို တုန်ယင်သွားစေသည်။

သူ့ပတ်ဝန်းကျင်မှ အကြည့်များကို သတိပြုမိသွားဟန်ဖြင့် လော့ရှန်းလင်၏ မျက်နှာလေးမှာ ရဲခနဲ ဖြစ်သွားသည်။ သူမက လူချင်းခွဲပြီး ‌ပြောလိုက်လေသည်။

"မင်း ပြောထားတဲ့သူ အပါအဝင် အကုန်လုံးကို ခေါ်လာခဲ့ပြီ"

လော့ရှန်းလင်၏ နောက်တွင် အနက်ရောင် ဝတ်ရုံကြီး လွှမ်းခြုံထားသော အခြားရုပ်သွင်တစ်ခုက တိတ်တိတ်ဆိတ်စွာ ရပ်နေသည်။

ကျွင်းရှောင်ယောက်လည်း တစ်ချက်ကြည့်လိုက်ပြီးနောက် ခေါင်းညိတ်ပြလိုက်လေသည်။

"ကျေးဇူးတင်ပါတယ် ရှန်းလင်"

"ကိစ္စမရှိပါဘူး"

လော့ရှန်းလင်က ပေါ့ပေါ့ပါးပါး ပြုံးလိုက်သည်။

သူ ချစ်ရသူကို ကူညီနိုင်တာက သူမအတွက် ပျော်ရွှင်စရာပင်။

ကျွင်းရှောင်ယောက်က အမာရွတ်လေးခုသခင်ကြီးကို ကြည့်ပြီး ပြောလိုက်သည်။

"သူတို့က တိုင်းတစ်ပါး သတ္တဝါတွေ ဖြစ်ပေမဲ့ သူတို့ အားလုံးက ကျုပ်အပေါ် သစ္စာစောင့်သိတာကြောင့် စိတ်ပူစရာ မလိုပါဘူး"

"ဒါက သဘာဝအတိုင်းပါပဲ"

အမာရွတ်လေးခုသခင်ကြီးနှင့် အခြားသူများလည်း အတားအဆီးများကို ဖယ်ရှားကာ လော့ရှန်းလင်နှင့် အခြားသူများကို နယ်စပ်သို့ ဝင်ခွင့်ပြုလိုက်ကြသည်။

တခြားသူသာဆိုလျှင် ဤတံခါးစောင့်တွေက လွယ်လွယ်ခွင့်ပြုကြမှာ မဟုတ်ပါ။

လက်ရှိ ကျွင်းရှောင်ယောက်၏ နာမည်ဂုဏ်သတင်းဖြင့် အထူးပြောစရာ မလိုတော့ပေ။

ချက်ခြင်းပင်၊ ကျွင်းရှောင်ယောက်က လော့ရှန်းလင်နှင့် အခြားသူများကို နန်းတော်သို့ ပြန်ခေါ်သွားခဲ့သည်။

သူတို့၏ ထွက်ခွာသွားသော ရုပ်ပုံများကို ကြည့်လိုက်ရင်း အမာရွတ်လေးခုသခင်ကြီး သက်ပြင်းချလိုက်လေသည်။

"သခင်လေးက မျှော်လင့်ထားတဲ့အတိုင်းပဲ... အရမ်းတော်တယ်"

"ကိုယ့်ရန်သူရဲ့ သမီးပျိုကို အောင်နိုင်သူကမှ တကယ့်ယောက်ျားပဲ။ ငါတော့ မလေးစားဘဲကို မနေနိုင်တော့ပါဘူး"

တံခါးစောင့်များနှင့် ကျင့်ကြံသူများစွာလည်း သက်ပြင်းချလိုက်ကြလေသည်။

နန်းတော်သို့ပြန်ရောက်ပြီးနောက်၊ ကျန်းလော့လီနှင့် အခြား မိန်းကလေးများ၏ အကြည့်များက လော့ရှန်းလင်အပေါ်သို့ ချက်ချင်း ကျရောက်လာကြသည်။

မိန်းကလေးများ၏ ဗီဇအရ အခြား လှပသော မိန်းကလေးတစ်ယောက်ကို မြင်သောအခါ သတိထားကြလေသည်။

"ကိုကိုရှောင်ယောက်၊ ဒီမမက ဘယ်သူလဲ"

ကျန်းလော့လီက လှပစွာပြုံးရင်း ကျွင်းရှောင်ယောက်ကို မှီတွဲကာ မေးလိုက်သည်။

ကျွင်းရှောင်ယောက် ခဏတာ ဘာပြောရမှန်းမသိတော့ပေ။

ကျွင်းရှောင်ယောက်နှင့် ကျန်းလော့လီ၏ ရင်းနှီးသောပုံစံကို မြင်ရသော်လည်း လော့ရှန်းလင်၏ အမူအရာကတော့ မပြောင်းလဲပါ။

ကျွင်းရှောင်ယောက်ကဲ့သို့ ထူးချွန်သော အမျိုးသားတစ်ဦးသည် အင်မော်တယ်နယ်မြေကြီးရှိ မိန်းကလေးများကြားတွင်လည်း အလွန်ရေပန်းစားနေရမည်ကို သူသိသည်။

လော့ရှန်းလင်၏ မူလခန္ဓာက မြစ်တစ်စင်း၏ ဝိညာဉ်သာ ဖြစ်သည်။

ကျွင်းရှောင်ယောက်က သူမကို လူသားတစ်ယောက်အနေဖြင့် အသိအမှတ်ပြုစေခဲ့သူ ဖြစ်၏။

ထို့ကြောင့် လော့ရှန်းလင်၏ တစ်ခုတည်းသောမျှော်လင့်ချက်မှာ ကျွင်းရှောင်ယောက်အနားတွင် ရှိနေနိုင်ရန်ပင်။

ဤသည်မှာ သူ၏ နှလုံးသားထဲမှ ရိုးရှင်းသော အတွေးတစ်ခုသာ ဖြစ်သည်။

"အဟမ်း... အဟမ်း၊ မင်းတို့ စကားပြောကြပါဦး။ ငါ တခြားကိစ္စတွေ စီစဉ်ရဦးမယ်"

ကျွင်းရှောင်ယောက်လည်း မိန်းကလေးများ၏ ပြိုင်ဆိုင်မှုကြားတွင် မနေလိုတော့ဘဲ ‌ခြေလှမ်းသွက်သွက်ဖြင့် ထွက်သွားလေသည်။

ဒါကိုမြင်တော့ ကျန်းလော့လီက မသိမသာလေး အံကြိတ်လိုက်သည်။

"အစ်မစန်းယီသာ သိရင်..."

တစ်ဖက်တွင်၊ ကျွင်းရှောင်ယောက်က ပင်မ ခန်းမတစ်ခုသို့ ရောက်လာသည်။

ရွယ်ယွဲ့၊ ဖေးချင်ရွယ်၊ ထိုပါ့ယွိနှင့် အခြားသူများ အားလုံး ဤနေရာတွင် ရှိနေကြ၏။

ကံကြမ္မာနှင့် ဖန်ဆင်းခြင်း နတ်ဘုရားကို ယုံကြည်သော ရေခဲဝိညာဉ်တော်ဝင်မျိုးနွယ် အပါအဝင် တော်ဝင်မျိုးနွယ် အများအပြားလည်း လိုက်ပါခဲ့ကြသည်။

ထို့ပြင် အနက်ရောင်ဝတ်ရုံကြီးဖြင့် တိတ်ဆိတ်စွာရပ်နေသည့် လူရိပ်တစ်ခုလည်း ရှိနေသေးသည်။

"အခု ငါ့ရဲ့ သရုပ်မှန်ကို သိကြပြီဆိုတော့ မင်းတို့ ဘယ်လိုသဘောရလဲ"

ကျွင်းရှောင်ယောက်က လူအုပ်ကို ဝေ့ကြည့်လိုက်သည်။

ထိုပါ့ယွိက ပထမဆုံး ပြောသည်။

"သခင်က ကျုပ်တို့ရဲ့ကံကြမ္မာကို ပြောင်းလဲဖို့ အခွင့်အရေး ပေးခဲ့တာပါ။ ကျုပ်တို့ သခင်နဲ့ ကံကြမ္မာနဲ့ဖန်ဆင်းခြင်းရဲ့ နတ်ဘုရားကို အမြဲသစ္စာစောင့်သိနေပါမယ်"

ထိုပါ့ယွိက တာအိုနှလုံးသား နတ်ဆိုးကျမ်းကို ပထမဆုံးလေ့ကျင့်ခဲ့သူ ဖြစ်သည်။

ဤနေရာမှ ဂိုဏ်းဝင်အားလုံးထဲတွင် သူက ကျွင်းရှောင်ယောက်အပေါ် အလေးစားဆုံး ဖြစ်၏။

ကျွင်းရှောင်ယောက်က အင်မော်တယ်နယ်မြေကြီး၏ ကျင့်ကြံသူတစ်ဦးဖြစ်လျှင်ပင်၊ ထိုပါ့ယွိ၏ နှလုံးသားထဲမှ ယုံကြည်ခြင်းက လုံးဝ အားနည်းသွားလိမ့်မည် မဟုတ်ပေ။