အခန်း ၁၁၃၁

အခန်း ( ၁၁၃၁ ) ကျောက်ဧကရာဇ်လေး၏ နောက်လိုက်။

မဟာ မြင့်မြတ်ဝိညာဉ်က အင်မော်တယ်ရွှေကျောက်အဖြစ်မှ တာအိုကို သက်သေပြခဲ့သူ ဖြစ်သည်။

သို့သော်လည်း ထိုအဆင့်သို့‌ ရောက်ရှိသောအခါ ဘဝ အသွင်ကူးပြောင်းမှု ဖြစ်၏။

အင်မော်တယ်ရွှေကျောက်နှင့် အသားရုပ်ခန္ဓာတို့ကြား ဆန္ဒရှိသလို ပြောင်းလဲနိုင်သည်။

ထို့ကြောင့် မျိုးဆက်သစ်တစ်ဦး မွေးဖွားခြင်းက သဘာဝကျပေသည်။

မဟာမြင့်မြတ်ဝိညာဉ်မှ ဆင်းသက်လာသူအနေဖြင့် ကျောက်ဧကရာဇ်လေး၏ အရည်အချင်းနှင့် ခွန်အားက သံသယဖြစ်စရာမလိုပေ။ သူက အင်မော်တယ်နယ်မြေကြီး၏ လူငယ်မျိုးဆက်တွင် ထိပ်တန်းဖြစ်သည်မှာ သေချာသည်။

"သူတို့က ဒီလောက် ရဲတင်းနေတာ အံ့ဩစရာမဟုတ်တော့ပါဘူး။ သူတို့နောက်ကွယ်မှာ မဟာမြင့်မြတ်ဝိညာဉ်ကနေ ဆင်းသက်လာသူ ရှိနေတာပဲ"

ထိုက်ရွှမ်ဂိုဏ်းခေါင်းဆောင်က သက်ပြင်းချလိုက်သည်။

မြင့်မြတ်ဝိညာဉ်ကျွန်း၏ အခြေခံအုတ်မြစ်ကို ထည့်မပြောလျှင်ပင်...

မဟာမြင့်မြတ်ဝိညာဉ်၏ အမွေဆက်ခံသူ အထောက်အထားက အင်မော်တယ်နယ်မြေကြီးရှိ လူများစွာအား နောက်တွန့်စေနိုင်သည်။

"ဒီလိုဆိုမှတော့ စောင့်ကြည့်ကြသေးတာပေါ့၊ ယောက်ချီ မြင့်မြတ်မြေက ဘယ်လိုတုံ့ပြန်မလဲ"

"အမှန်ပဲ၊ ကျန်းစန်းယီကြောင့်သာမဟုတ်ရင် မြင့်မြတ်ဝိညာဉ်ကျွန်းက ယောက်ချီကို ဟိုးအရင်ကတည်းက ကျူးကျော်ပြီးလောက်ပြီ"

လော့ထျန်း အင်မော်တယ်နယ်မြေကြီးမှ အင်အားစုများစွာက ဆွေးနွေးပြောဆိုလိုက်ကြသည်။

ယောက်ချီ မြင့်မြတ်မြေဘက်တွင်...

ယောက်ချီ၏ တောင်တံခါးကို သတ္တဝါအုပ်စုကြီးတစ်စုက ဝိုင်းရံထားသည်။

သေသေချာချာကြည့်လျှင် အင်မော်တယ်ရွှေနှင့် ကျောက်ဝိညာဉ် အမျိုးမျိုး ဖြစ်၏။

မြင့်မြတ်ဝိညာဉ်ကျွန်းက အလွန်ထူးခြားသည်။ ၎င်းတို့အားလုံးက မြင့်မြတ်ဝိညာဉ်များဖြစ်ပြီး အလွန်အစွမ်းထက်ကြပေသည်။

အထူးသဖြင့်၊ မြင့်မြတ်ဝိညာဉ်ကျွန်းတွင် မဟာမြင့်မြတ်ဝိညာဉ် တစ်ခုထက်မကရှိကြောင်း ကောလဟာလများ ရှိသည်။

ရှေးခေတ်သမိုင်းကို အမှန်တကယ် မျက်မြင်တွေ့ခဲ့ရသည့် တည်ရှိမှုများပင် ရှိနေသေးသည်။

ထို့ပြင်၊ မြင့်မြတ်ဝိညာဉ်များ၏ အထူးလက္ခဏာကြောင့်ဖြစ်သည်။

သူတို့တွင် အင်မော်တယ်ရွှေနှင့် ရတနာပစ္စည်းပြုလုပ်သည့် ကျောက်မျက်များက ရှားပါးမှုမရှိပေ။

မြင့်မြတ်ဝိညာဉ်ကျွန်းက အခြား အင်မော်တယ်အင်အားစုများထက် ဧကရာဇ်လက်နက်များ ပိုများသည်။

ထိုအကြောင်းများကြောင့်ပင်၊ မြင့်မြတ်ဝိညာဉ်ကျွန်းက အင်မော်တယ်အင်အားစုများကြားမှာ မည်သူမျှ အလွယ်တကူ မထိပါးဝံ့သော တည်ရှိမှုတစ်ခု ဖြစ်နေတော့သည်။

ယခုအချိန်တွင်...

ထိုသတ္တဝါများကြားမှ စက္ကူကဲ့သို့ ဖြူဆွတ်နေသော အသားအရည်၊ အလွန်သေးသွယ်သော ကိုယ်ကာယဖြင့် လှပသော မျက်နှာသွင်ပြင်ရှိသည့် မိန်းကလေးတစ်ယောက်က ရှေ့သို့ထွက်လာသည်။ သူက အေးစက်စက် လေသံဖြင့် အော်ပြောလိုက်၏။

"ယောက်ချီမြင့်မြတ်မြေက အခုထိ မဆုံးဖြတ်နိုင်သေးဘူးလား။ ကျွန်မ သခင်ရဲ့ စိတ်ရှည်မှုက အကန့်အသတ်ရှိတယ်နော်"

"တကယ်လို့ ဝင်ပေါက်ကိုးခု ကျောက်သန္ဓေကို လွှဲပေးမယ်ဆိုရင် ကျွန်မတို့ ချက်ချင်း ထွက်သွားမယ်။ မဟုတ်ရင်တော့ ယောက်ချီမြင့်မြတ်မြေရဲ့ ဂုဏ်သိက္ခာကို ကျဆင်းစေတဲ့အတွက် မြင့်မြတ်ဝိညာဉ်‌ကျွန်းကို အပြစ်မတင်လိုက်နဲ့"

ထိုမိန်းကလေးကို အရိုးစုမိန်းမပျိုဟု ခေါ်သည်။

‌သူမက နယ်စပ်တွင် ထွက်ပေါ်လာသော မြင့်မြတ်ဝိညာဉ်ကျွန်း၏ မျိုးစေ့အဆင့် ပါရမီရှင် အရိုးဖြူသခင်လေးနှင့် ဆင်တူပေသည်။

သူတို့အားလုံးက နတ်ရွှေနှင့် ရှေးဦး အကျော်အမော်များ၏ အကြွင်းအကျန်များ ရောနှောပြီး မွေးဖွားလာသော မြင့်မြတ်ဝိညာဉ်များ ဖြစ်သည်။

အရိုးစုမိန်းမပျို၏ သခင်ကတော့ သဘာဝအတိုင်း ကျောက်ဧကရာဇ်လေးပင်။

သူမက ကျောက်ဧကရာဇ်လေး၏ နောက်လိုက်တစ်ဦးဖြစ်သော်လည်း...

သူမ၏ အင်အားက သာမန် မျိုးစေ့အဆင့်ရှိ ပါရမီရှင်များထက် အားမနည်းပေ။

မျိုးစေ့အဆင့် ပါရမီရှင်တစ်ဦးကို နောက်လိုက်အနေဖြင့် ထားနိုင်ခြင်းက ကျောက်ဧကရာဇ်လေး၏ အရည်အချင်းနှင့် ခွန်အားကိုလည်း တွေ့မြင်နိုင်သည်။

"ရှင်တို့ မြင့်မြတ်ဝိညာဉ်ကျွန်းက ဘောင်ကျော်လာပြီ"

ယောက်ချီမြင့်မြတ်မြေဘက်မှ အမျိုးသမီးတစ်ဦးတစ်စု ပေါ်လာသည်။

ယောက်ချီမြင့်မြတ်မြေတွင်၊ အားလုံးက အမျိုးသမီးများဖြစ်ပြီး အမျိုးသားများ မရှိပေ။

ရှေ့ဆုံးမှ ဦးဆောင်လာသူက တော်ဝင်ဝတ်စုံကို ဝတ်ဆင်ထားပြီး လှပသော အမျိုးသမီးတစ်ဦး ဖြစ်သည်။

ဧကရာဇ်သင်္ချိုင်းကြယ်တွင် အမွေရသောအခါ၊ သူမက ကျန်းစန်းယီကို ယောက်ချီမြင့်မြတ်မြေသို့ လာရောက်ဖိတ်ကြားခဲ့သူ ဖြစ်ချေသည်။

ဆန်းကျယ်ကောင်းကင်အဓိပဓိ ကျင့်ကြံမှုဖြင့် သူမက ယောက်ချီမြင့်မြတ်မြေ၏ မဟာအကြီးအကဲလည်း ဖြစ်သည်။

ဤနယ်ပယ်ဖြင့် သူမ၏ အင်အားက အလွန်မြင့်မားနေပြီဖြစ်သော်လည်း...

ဤအခိုက်တွင်၊ သူ့မျက်နှာက လေးနက်နေသေးသည်။

တစ်ချက်ကြည့်ရုံဖြင့် မြင့်မြတ်ဝိညာဉ်ကျွန်းမှ သတ္တဝါများကို သူ သတိပြုမိသည်။

သူတို့ထဲတွင် ဆန်းကျယ်ကောင်းကင်အဓိပဓိ ပညာရှင်က တစ်ဦးထက်မက ရှိ၏။

ထိုအထဲမှ ခရမ်းရောင်ရွှေ မြင့်မြတ်ဝိညာဉ်တစ်ဦးဆိုလျှင်၊ သူမ၏ ကျင့်ကြံခြင်းဖြင့်ပင် ထိုးဖောက်မမြင်နိုင်ပေ။

ဤအရာက သူမ၏ အမူအရာကို အနည်းငယ် ပျက်သွားစေခဲ့သည်။

"ကျွန်မတို့က မြင့်မြတ်ဝိညာဉ်ကျွန်းရဲ့ ပစ္စည်းကိုပဲ ပြန်လိုချင်တာ၊ အဲဒါက ဘာမှားလို့လဲ"

အရိုးစုမိန်းမပျိုက အေးစက်စက် ပြုံးလိုက်သည်။

ကျောက်ဧကရာဇ်လေး၏‌ ထောက်ပံ့မှုဖြင့် သူမက ဘာကိုမျှမကြောက်ပေ။

"မိန်းကလေး မှားနေပြီ။ ဝင်ပေါက်ကိုးခု မြင့်မြတ်ဝိညာဉ် ကျောက်သန္ဓေဆိုတာ ရှေးခေတ်ကတည်းက ငါတို့ ‌ယောက်ချီမြင့်မြတ်မြေရဲ့ ရတနာပဲ"

"ငါက ပေးလိုက်ရင်တောင် မြင့်မြတ်ဝိညာဉ်ဖြစ်အောင် လေ့ကျင့်ဖို့ လွယ်မှာမဟုတ်ဘူး"

ယောက်ချီ၏ မဟာအကြီးအကဲက အေးစက်စက် ပြောလိုက်သည်။

ယောက်ချီက ဝင်ပေါက်ကိုးခု ကျောက်သန္ဓေကို ဝိညာဉ်အရည်အမျိုးမျိုး၊ ရတနာများဖြင့် ကျွေးမွေးပြီး ပြုစုခဲ့ရခြင်း ဖြစ်သည်။

ဘယ်အချိန်က မြင့်မြတ်ဝိညာဉ်ကျွန်း၏ ပိုင်ဆိုင်မှု ဖြစ်လာခဲ့သနည်း။

ထိုသို့ဆိုလျှင်၊ ကောင်းကင်ကိုးခု အင်မော်တယ်နယ်မြေကြီး တစ်ခုလုံးရှိ နတ်ရွှေနှင့် မြင့်မြတ်ရတနာများ အားလုံးက မြင့်မြတ်ဝိညာဉ်ကျွန်း၏ ပိုင်ဆိုင်မှုများ ဖြစ်နေတော့မည် မဟုတ်လော။

ထိုစကားကိုကြားသော်လည်း အရိုးစုမိန်းမပျို၏ အမူအရာက မပြောင်းလဲသေးပါ။

"ဒီအတွက် စိတ်ပူနေစရာမလိုပါဘူး။ သက်ရှိတစ်ဦးကို မမွေးနိုင်ရင်တောင်မှ ဝင်ပေါက်ကိုးခု ကျောက်သန္ဓေက ကျွန်မရဲ့သခင်အတွက် အကျိုးရှိလိမ့်မယ်"

အရိုးစုမိန်းမပျိုက ပြောလိုက်သည်။

သူတို့က ကျောက်ဧကရာဇ်လေး၏ တောင်းဆိုမှုဖြင့် ဝင်ပေါက်ကိုးခုကျောက်သန္ဓေကို ရယူရန် ရောက်ရှိလာကြခြင်း ဖြစ်သည်။

ဝင်ပေါက်ကိုးခု ကျောက်သန္ဓေက ကျန်းစန်းယီ၏ ပိုင်ဆိုင်မှု ဖြစ်ခြင်း မဖြစ်ခြင်းကို သူတို့ ဂရုမစိုက်ပေ။

"ကျောက်ဧကရာဇ်လေး..."

ယောက်ချီမှ အမျိုးသမီးအားလုံး၏ မျက်နှာအမူအရာများ အနည်းငယ် ပြောင်းလဲသွားကြသည်။

ကျွင်းရှောင်ယောက် ကျဆုံးသွားပြီးနောက်၊ မဟာမြင့်မြတ်ဝိညာဉ်မှ ဆင်းသက်လာသော ကျောက်ဧကရာဇ်လေးသည် ဤကမ္ဘာကြီးကို ဦးဆောင်ရန် အလားအလာအရှိဆုံး ပါရမီရှင်များထဲမှ တစ်ဦးအဖြစ် သမုတ်ခံခဲ့ရသည်။

အကယ်၍၊ သူသာ ဝင်ပေါက်ကိုးခု ကျောက်သန္ဓေကို ထပ်မံရရှိသွားပါက...

ကျောက်ဧကရာဇ်လေးက မည်မျှ အစွမ်းထက်လာမည်ကို တွေးကြည့်ရန်ပင် မလွယ်ပေ။

'ကျောက်ဧကရာဇ်လေးကို ဝင်ပေါက်ကိုးခု မြင့်မြတ်ဝိညာဉ် ကျောက်သန္ဓေကို ရယူသွားခွင့် မပြုနိုင်ဘူး'

ထိုအချိန်တွင် ယောက်ချီမှ လူတိုင်း၏စိတ်ထဲတွင် ထိုသို့ တွေးလိုက်မိကြသည်။

"ဟမ့်၊ ဘာဖြစ်လို့ အပိုစကားတွေ ပြောနေရတာလဲ။ လက်ရှိ ယောက်ချီမြင့်မြတ်မြေက ရှေးခေတ်ကနဲ့ ဘာမှမဆိုင်တော့ဘူး။ အနောက်တိုင်း မယ်တော်ဘုရင်မရဲ့ခေတ်နဲ့ဆိုရင် အဝေးကြီးပဲ"

"ယောက်ချီမြင့်မြတ်မြေ တစ်ခုလုံးမှာဆိုရင်တောင် ဧကရာဇ်အဆင့် အကျော်အမော်တွေ တစ်ဦးမှ မရှိမှာကို ကြောက်ရတယ်။ အလွန်ဆုံး ဧကရာဇ်တစ်ပိုင်းပဲ၊ ဒါပေမဲ့ သူကလည်း တံခါးပိတ်လေ့ကျင့်နေရတယ်"

မြင့်မြတ်ဝိညာဉ်ကျွန်းမှ ဆန်းကျယ်ကောင်းကင်အဓိပဓိက ရှေ့သို့ထွက်လာကာ အေးစက်စက် ပြောလိုက်သည်။

ယောက်ချီမှ မဟာအကြီးအကဲနှင့် အခြားသူများ၏ မျက်နှာအမူအရာများ ပြောင်းလဲသွား၏။

မြင့်မြတ်ဝိညာဉ်ကျွန်းက မလှုပ်ရှားမီတွင် ယောက်ချီမြင့်မြတ်မြေ၏ အခြေအနေများကို လျှို့ဝှက်စုံစမ်းခဲ့ကြပုံရသည်။

"ယောက်ချီမြင့်မြတ်မြေကို တိုက်ရိုက်သွားရအောင်။ ကျန်းမိသားစုရဲ့ နတ်ဘုရားမ ကျန်းစန်းယီကို ဖမ်းပြီး ဝင်ပေါက်ကိုးခု ကျောက်သန္ဓေကို ယူလိုက်ရင် ပြီးပြီ"

မြင့်မြတ်ဝိညာဥ်ကျွန်းမှ အခြား သတ္တဝါတစ်ကောင်ကလည်း လှောင်ပြောင်ပြောဆိုလိုက်၏။

"ရှင်တို့ ကျန်းမိသားစု ဒေါသဖြစ်မှာကို မကြောက်ဘူးလား"

‌ကျန်းမိသားစုမှ မဟာအကြီးအကဲက အော်ပြောလိုက်သည်။

ထိုစဉ်က၊ ကျန်းစန်းယီကို ယောက်ချီမြင့်မြတ်မြေ၏ သူတော်စင် ဖြစ်စေခဲ့ခြင်းမှာ...

ကျန်းစန်းယီက သန္တောစွမ်းအင်တာအိုသန္ဓေရှိသည့်အပြင် အနောက်တိုင်း၏ မယ်တော်ဘုရင်မထံမှ အမွေအနှစ်ကို ရရှိခဲ့ခြင်းကြောင့် ဖြစ်သည်။

အရေးကြီးဆုံးကတော့ ကျန်းစန်းယီ၏ ကျန်းမိသားစု၏ ကျန်းမိသားစုနောက်ခံ၊ ကျွင်းရှောင်ယောက်နှင့် သူမ၏ ဆက်ဆံရေးတို့ကြောင့်ပင်။

မြင့်မြတ်ဝိညာဉ်ကျွန်း၏ ဆန်းကျယ်ကောင်းကင်အဓိပဓိအဆင့် ပညာရှင်က အေးစက်စက် ပြောလိုက်သည်။

"သူက ကျန်းမိသားစုကဆိုရင်တောင် ဘာဖြစ်လဲ။ ကျုပ်တို့က ကျန်းစန်းယီကို သတ်မှာ မဟုတ်ဘူး၊ နောက်ပြီးတော့ ကျန်းမိသားစုကိုလည်း မကြောက်ဘူး"

ကျန်းမိသားစု၏ ဟန့်တားနိုင်စွမ်းက မြင့်မြတ်ဝိညာဉ်ကျွန်းကိုတော့ နောက်ဆုတ်သွားစေရန် မလုံလောက်ပေ။

"ဒါဆိုရင် ရှင်တို့က ကျွင်းမိသားစုကို ဂရုမစိုက်ဘူး၊ ကျွင်းရှောင်ယောက်ကိုလည်း ဂရုမစိုက်ဘူးပေါ့"

မဟာအကြီးအကဲက ထပ်မံပြောလိုက်၏။

ထိုစကားသံများ ထွက်လာသည်နှင့် ပတ်ဝန်းကျင်တစ်ခုလုံး ခဏတာ တိတ်ဆိတ်သွားသည်။

ကျွင်းမိသားစု...

ထိုမိသားစု၏ နာမည်က ဘယ်အချိန်ပြောပြော၊ လူအားလုံးကို နှုတ်ဆိတ်သွားစေရန် လုံလောက်သည်။

ကျန်းမိသားစုက အလွန်အစွမ်းထက်သော ရှေးဟောင်းမိသားစုတစ်ခုဖြစ်သော်လည်း၊ လူတိုင်း၏အမြင်တွင် ၎င်းတို့နှင့် ကျွင်းမိသားစုကြားမှာ ကွာဟချက်တစ်ခု ရှိနေဆဲပင်။

ကျွင်းမိသားစုက မိသားစုတစ်ခုတည်းဖြင့် အဓိပဓိအင်မော်တယ်ခုံရုံးနှင့် ယှဉ်နိုင်ပြီး တိုင်းတပါးကို ကြောက်ရွံ့စေနိုင်သည်။

ကျွင်းရှောင်ယောက်မှာတော့ တစ်ချိန်က အလွန်ဂုဏ်သိက္ခာမြင့်မားခဲ့သော နာမည်တစ်ခု ဖြစ်ချေသည်။

သို့သော်လည်း ခဏတာ တိတ်ဆိတ်သွားပြီးနောက်...

အရိုးစုမိန်းမပျိုက အေးစက်စက် ပြောလိုက်သည်။

"ကျွင်းရှောင်ယောက်... ဒါက ကျဆုံးသွားပြီဖြစ်တဲ့ နာမည်တစ်ခုပါပဲလေ"

"သူဟာ တစ်ချိန်က နာမည်ကျော်ကြားခဲ့ပေမဲ့ အဲဒါက ငါ့သခင် မမွေးဖွားသေးလို့ပဲ"

"ငါ့သခင်သာ စောစောမွေးခဲ့ရင် ကျွင်းရှောင်ယောက်က ဘယ်လိုလုပ်ပြီး ဖုန်ထနိုင်မှာလဲ"

အရိုးစုမိန်းမပျိုက ကျောက်ဧကရာဇ်လေးကို အကြွင်းမဲ့ ယုံကြည်ကိုးစား၏။

သို့သော်... ထိုအခိုက်တွင် အလွန်အေးစက်သော သတ်ဖြတ်လိုစိတ်များဖြင့် စကားသံတစ်ခုက ကောင်းကင်မှ ထွက်ပေါ်လာသည်။

"နင် ‌ပြောရဲရင် ထပ်ပြောကြည့်လိုက်စမ်း"

နှင်းသားကဲ့သို့ အဖြူရောင် ဆံနွယ်များနှင့် လှပသော ရုပ်သွင်တစ်ခုက ယောက်ချီမြင့်မြတ်မြေ၏ နက်နဲရာမှ ထွက်လာတော့သည်။