အခန်း ၁၁၄၅

အခန်း ( ၁၁၄၅ ) ကောင်းကင်ကိုးခု အင်မော်တယ်အကယ်ဒမီ။

ကောင်းကင်ကိုးခု အင်မော်တယ်အကယ်ဒမီက ကောင်းကင်ကိုးခု အင်မော်တယ်နယ်မြေကြီးတွင် မရှိပေ။

ထိုအစား သီးခြား ဟင်းလင်းပြင်တွင် ဖြစ်သည်။

၎င်းက ကြယ်‌များကြားတွင် တိတ်တဆိတ် တည်ရှိနေသည့် တိုက်ကြီးတစ်ခုကဲ့သို့ အင်မော်တယ်ကျွန်းကြီး တစ်ကျွန်းပင်။

အင်မော်တယ်ကျွန်းတစ်ခုလုံးကို နတ်အလင်းများက လွှမ်းခြုံထားသည်။

ကြယ်မြစ်ကြီးက အင်မော်တယ်ကျွန်းပတ်ပတ်လည်တွင် ကျောက်စိမ်းခါးပတ်ကဲ့သို့ ရှိနေ၏။

တောက်ပသော ကြယ်များက အင်မော်တယ်ကျွန်းကို အလှဆင်နေသကဲ့သို့ပင်။

ကြီးမားလှသော တံခါးကြီးကို ဥက္ကာခဲများဖြင့် ထောက်ပံ့ထားကာ ကြယ်ကောင်းကင်တွင် မြင့်မားစွာ တည်ရှိနေသည်။

တံခါးဝမှာတော့ ကောင်းကင်ကိုးခု အင်မော်တယ်အကယ်ဒမီ(ကျိုး ထျန်း ရှန်း ယွမ်) ဟူသော စာလုံးကြီးလေးလုံးကို ခမ်းနားထည်ဝါစွာ ရေးသားထားပေသည်။

"ဒါက ကောင်းကင်ကိုးခု အင်မော်တယ်အကယ်ဒမီပေါ့"

အဝေးတွင်... ဧရာမ ဂဠုန်ငှက်ကြီးတစ်ကောင်က အတောင်ပံတဖြန်းဖြန်း ရိုက်ခတ်ရင်း ပျံသန်းလာနေသည်။ သူ၏ အတောင်ပံရိုက်ခတ်မှုကြောင့် ပတ်ဝန်းကျင်မှ ဥက္ကာခဲများပင် ကြေမွသွား၏။

ဂဠုန်ငှက်ကြီးအပေါ်မှာတော့ ကျွင်းရှောင်ယောက်နှင့် ကျန်းလော့လီက ရပ်နေသည်။

အဝေးမှ ကြီးကျယ်ခမ်းနားသည့် ကောင်းကင်ကိုးခု အင်မော်တယ်အကယ်ဒမီကို လှမ်းကြည့်ရင်း ကျွင်းရှောင်ယောက်က အနည်းငယ် သက်ပြင်းချလိုက်လေသည်။

သူသည် အတွေ့အကြုံ ဗဟုသုတ ကြွယ်ဝသော်လည်း ကောင်းကင်ကိုးခု အင်မော်တယ်အကယ်ဒမီကို မြင်လိုက်ရချိန်တွင် အံ့ဩနေရဆဲ ဖြစ်သည်။

နတ်ဆိုးမျိုးနွယ်၏ နတ်ဆိုးဘုရင်အကယ်ဒမီနှင့် ရှေးဟောင်းတော်ဝင်မိသားစုများ၏ ရှေးဟောင်းဧကရာဇ်အကယ်ဒမီ နှစ်ခုစလုံးက ထိပ်တန်းများ ဖြစ်ကြသော်လည်း ကောင်းကင်ကိုးခု အင်မော်တယ်အကယ်ဒမီကိုတော့ မမီပေ။

ထို့ကြောင့်၊ နတ်ဆိုးမျိုးနွယ်များစွာနှင့် ရှေးဟောင်းတော်ဝင်မိသားစုများ၏ မျိုးစေ့များက ၎င်းတို့၏ သက်ဆိုင်ရာ အကယ်ဒမီများသို့ မသွားရောက်ဘဲ လေ့ကျင့်ရန် ကောင်းကင်ကိုးခု အင်မော်တယ်အကယ်ဒမီသို့ ရောက်လာခဲ့ကြသည်။

ဟုတ်သည်၊ ကောင်းကင်ကိုးခု အင်မော်တယ်အကယ်ဒမီက မည်သူ့ကိုမျှ မငြင်းဆန်ပါ။

အင်မော်တယ်နယ်မြေကြီးမှ သက်ရှိအားလုံးက အကယ်ဒမီ၏ ရွေးချယ်မှုစံနှုန်းနှင့် ပြည့်မီသရွေ့ ဝင်ရောက်လေ့ကျင့်နိုင်သည်။

ထိုအချိန်တွင် ငွေရောင် ချပ်ဝတ်တန်ဆာ ဝတ်ဆင်ထားသော အစောင့်အကြပ်များ ရှေ့တွင် ပေါ်လာသည်။

သူတို့က ကောင်းကင်ကိုးခု အင်မော်တယ်အကယ်ဒမီ၏ အစောင့်များ ဖြစ်ပြီး သူတို့၏ ကျင့်ကြံမှုမှာလည်း သူတော်စင်ဘုရင်အဆင့်သို့ ရောက်နေပြီ။

သူတော်စင်ဘုရင်များကို အစောင့်အဖြစ် ထားရှိခြင်းက အကယ်ဒမီ၏အင်အားကို မြင်နိုင်သည်။

"ရှေ့က ဘယ်သူလဲ၊ မင်းရဲ့ နာမည်ပြောစမ်း"

အစောင့်တစ်ယောက်က ပြောလိုက်၏။

ဘုရင်ဖုဖုန်းက အသွင်အပြင်က ဤအစောင့်များကို သတိထားစေသည်။

သို့သော်၊ ကောင်းကင်ကိုးခု အင်မော်တယ်အကယ်ဒမီရှေ့တွင် မည်သူမျှ မိုက်မိုက်ကန်းကန်း ပြုမူဝံ့မည်မဟုတ်ဟု သူတို့ ယုံကြည်ခဲ့ပေသည်။

"ကျွင်းမိသားစု၊ ကျွင်းရှောင်ယောက်"

ကျွင်းရှောင်ယောက်က လက်နှစ်ဖက်ကို နောက်သို့ယှက်ထားပြီး တည်ငြိမ်စွာပြောလိုက်သည်။

"ဘယ်လို... နတ်ဘုရားသားတော်လား"

အစောင့်များ မျက်လုံးပြူးသွားသည်။ သူတို့က ချက်ချင်း ဦးညွတ်လိုက်၏။

ကျွင်းရှောင်ယောက်က ကောင်းကင်ကိုးခု အင်မော်တယ်အကယ်ဒမီကို ရုတ်တရက် ရောက်လာမည်ဟု မမျှော်လင့်ထားပေ။

ကြိုတင်အကြောင်းကြားပါက ကောင်းကင်ကိုးခု အင်မော်တယ်အကယ်ဒမီသည် ကျွင်းရှောင်ယောက်ကို အကောင်းဆုံး ဆက်ဆံမှုဖြင့် သေချာပေါက် ကြိုဆိုမည် ဖြစ်သည်။

“နတ်ဘုရားသားတော်၊ ကြွပါ"

အစောင့်များက လေးလေးစားစား ပြောဆိုလိုက်ကြသည်။ တချိန်တည်းမှာပင် အကယ်ဒမီ၏ အကြီးအကဲများကို သတင်းပို့လိုက်၏။

အကယ်၍ အခြားသော ပါရမီရှင်များ၊ အင်မော်တယ်အင်အားစုမှ လူများ ရောက်လာလျှင်ပင် ဤအစောင့်များ၏ အမူအရာများက ပြောင်းလဲမည် မဟုတ်ပါ။

သို့ရာတွင်၊ ကျွင်းရှောင်ယောက်က ကောင်းကင်ကိုးခု အင်မော်တယ်နယ်မြေကြီးတွင် ဂုဏ်သိက္ခာအရှိဆုံးနှင့် အမြင့်မားဆုံးသော မျိုးဆက်သစ်လူငယ် ဖြစ်သည်။

သူတို့ကို မဆိုထားဘိ၊ အင်မော်တယ်အကယ်ဒမီမှ အကြီးအကဲများပင်လျှင် ကျွင်းရှောင်ယောက်ကို ကောင်းမွန်စွာ ဆက်ဆံရလိမ့်မည်။

ကျန်းလော့လီလည်း ထိုမြင်ကွင်းကိုကြည့်ရင်း အနည်းငယ် သက်ပြင်းချလိုက်သည်။

"ကိုကိုရှောင်ယောက်က မျှော်လင့်ထားတဲ့အတိုင်းပါပဲ။ အခြားသူတွေ အကယ်ဒမီကို လာရောက်ကြတုန်းက သူတို့မှာ ဒီလိုသဘောထားမျိုး မရှိခဲ့ဘူး"

ကျွင်းရှောင်ယောက်ကတော့ ပြုံးရုံသာ ပြုံးလိုက်၏။

ဤအပေါ်ယံများကို သူက ဂရုမစိုက်ပေ။ သူ့အတွက် ယုံကြည်ခြင်းစွမ်းအား ရရှိနိုင်လျှင်တော့ ကောင်းသည်။

ခဏချင်းမှာပင် အင်မော်တယ်ကျွန်းအတွင်းမှ အလင်းတန်းများစွာ ထွက်ပေါ်လာသည်။ ၎င်းတို့အားလုံးက အင်မော်တယ်အကယ်ဒမီမှ အဆင့်အတန်းမြင့်သော အကြီးအကဲများ ဖြစ်၏။

ခေါင်းဆောင်က အကယ်ဒမီ၏ မဟာအကြီးအကဲ ဖြစ်သည်။

"ဟားဟားဟား၊ မိတ်ဆွေလေးရှောင်ယောက်က ငါ့ကို တကယ် မစောင့်နိုင်အောင် ဖြစ်စေတာပဲ"

မဟာအကြီးအကဲ ရယ်မောလိုက်သည်။

ထို့နောက် ကျွင်းရှောင်ယောက် စီးနင်းထားသော မိုးပြာရောင် ဂဠုန်ငှက်ကြီးကို ကြည့်လိုက်၏။

သူ၏ ကျင့်ကြံမှုက ပျက်စီးခြင်းတာအိုသခင် ဖြစ်သည်။

ကျွင်းရှောင်ယောက်၏ စီးတော်သားရဲပင်လျှင် သူ့ထက် ပိုအစွမ်းထက်သေးသည်။

"ဘာ... ကျွင်းမိသားစုရဲ့ နတ်ဘုရားသားတော်က အင်မော်တယ်အကယ်ဒမီကို ရောက်လာပြီလား"

"တကယ်ကို နတ်ဘုရားသားတော်ပဲ"

"ဒါက ကျွင်းမိသားစုရဲ့ နတ်ဘုရားသားတော်လား။ နောက်ဆုံးတော့ သူ့ကို ကိုယ်တိုင်မြင်တွေ့ဖူးပြီ"

အကယ်ဒမီမှ အကြီးအကဲများအားလုံး အတူတကွ ပေါ်လာခြင်းက အကယ်ဒမီရှိ တပည့်များကို သဘာဝအတိုင်း လှုပ်လှုပ်ရှားရှား ဖြစ်စေခဲ့သည်။

ကျွင်းရှောင်ယောက်က အကယ်ဒမီသို့ ရောက်ရှိလာပြီဖြစ်ကြောင်း သိရသောအခါ မရေမတွက်နိုင်သော ပါရမီရှင်များက ချက်ချင်း ပေါ်လာကြလေသည်။

လူများစွာက အကယ်ဒမီအရှေ့တွင် ပေါ်လာပြီး ရိုသေလေးစားသော အကြည့်မျိုးဖြင့် ကျွင်းရှောင်ယောက်ကို ကြည့်နေကြသည်။

ဟုတ်သည်၊ မကျေနပ်သော အရိပ်အယောင်ဖြင့် ရှိနေကြသူများလည်း ရှိသေးသည်။

ရှေးဟောင်း တော်ဝင်မိသားစုများ၊ အင်မော်တယ်ခုံရုံး၏ ပါရမီရှင်တချို့... စသည်ဖြင့် ဖြစ်ကြသည်။

"သခင်လေး ရောက်လာပြီ"

ယွိချန်ကျွမ့်၊ ထိုက်ယင်ကျောက်စိမ်း‌ယုန်၊ မင်းသမီးလုံကျိနှင့် အခြားသူများလည်း ပေါ်လာကြ၏။

ကျွင်းရှောင်ယောက်၏ နောက်လိုက်များလည်း ရှိသေးသည်။

ကျွင်းမိသားစု၏ လျှို့ဝှက်သွေးကြောမှ ပါရမီရှင်အချို့လည်း ပေါ်လာကြသည်။

ကျွင်းရှောင်ယောက် ရောက်ရှိလာခြင်းက ကောင်းကင်ကိုးခု အင်မော်တယ်အကယ်ဒမီ တစ်ခုလုံးကို လှိုင်းလုံးကြီးများ ဖြစ်စေခဲ့သည်ဟု ဆိုနိုင်သည်။

ဟုတ်သည်၊ လူတချို့ကတော့ ပေါ်လာခြင်းမရှိပါ။

ထိုက်ရွှီရှေးနဂါးမျိုးနွယ်စုမှ လုံယောက်အာလည်း မပေါ်လာခဲ့ပါ။

ကူတိကျစ်လည်း မပေါ်လာပေ။

ဧကရီသမီးတော် လင်ယွမ်သည်ပင် မပေါ်လာဘဲ ရှိသည်။

သို့သော်လည်း အဓိပဓိအင်မော်တယ်ခုံရုံး၏ ဧကရာဇ်ငယ်ဟူသော သူမ၏ အထောက်အထားကို တွေးကြည့်သောအခါ...

သူမက တကယ်ကို မပေါ်လာသင့်ပေ။

ထိုအခိုက်အတန့်တွင် ရိုးရှင်းသော ဝတ်စုံကို ဝတ်ဆင်ထားပြီး အပြာရောင် ဆံပင်ရှည်များနှင့် လှပသော အမျိုးသမီးတစ်ဦး ပေါ်လာသည်။

လော့ရှန်းလင်။

"ရှောင်ယောက်"

လော့ရှန်းလင်က ကျွင်းရှောင်ယောက်ဆီသို့ ခပ်သွက်သွက်လေး လျှောက်လာသည်။ ပတ်ဝန်းကျင်တွင် လူအုပ်ကြီး ရှိနေသော်လည်း ကျွင်းရှောင်ယောက်ကို ပွေ့ဖက်လိုက်သေးသည်။

သို့ရာတွင်၊ ဤတစ်ကြိမ်တော့ ကျန်းလော့လီက ပူပန်ဟန်မပြပါ။

နောက်ဆုံးမှာတော့ သူမ၏ နေရာက တည်ငြိမ်နေပြီ ဖြစ်သည်။

"အဲဒီအကြီးအကဲက အတော်လှတယ်နော်"

"သူကလည်း ကျွင်းမိသားစုရဲ့ နတ်ဘုရားသားတော်နဲ့ ပတ်သက်နေတာလား"

လူတချို့က ရေရွတ်လိုက်ကြသည်။

လော့ရှန်းလင်၏ လျှို့ဝှက်ဆန်းကြယ်သော မူလဇစ်မြစ်၊ အစွမ်းထက်သော ခွန်အားနှင့် အသွင်အပြင်တို့ကြောင့် သူမသည် ကောင်းကင်ကိုးခု အင်မော်တယ်အကယ်ဒမီသို့ ရောက်လာသည်နှင့် တပြိုင်နက် နတ်ဘုရားမအဆင့် တည်ရှိမှုတစ်ခု ဖြစ်လာသည်မှာ သံသယဖြစ်ဖွယ်မရှိပေ။

အင်မော်တယ်အကယ်ဒမီ၏ မဟာအကြီးအကဲကလည်း ပါးနပ်သည်။ လော့ရှန်းလင်က ဧကရာဇ်တစ်ပိုင်းအဆင့် ကျင့်ကြံမှုရှိသည့်အပြင် ကျွင်းရှောင်ယောက်နှင့်လည်း ရင်းနှီးသောဆက်ဆံရေးရှိမှန်း သိသည်။

ထို့ကြောင့် သူမကို ဂုဏ်ထူးဆောင် အကြီးအကဲအဖြစ် တိုက်ရိုက်ခန့်အပ်ခဲ့ပေသည်။

လော့ရှန်းလင်အတွက်လည်း ယင်းက အဆင်ပြေခဲ့သည်။

စစ်နတ်ဘုရားနန်းတော်၏ လော့ဝမ်ဖြစ်ခဲ့စဉ်ကနှင့် ကွာခြားမှု သိပ်မရှိတော့ပေ။

"ရှန်းလင်၊ မင်းက အကယ်ဒမီမှာ အဆင်ပြေပုံရတယ်"

ကျွင်းရှောင်ယောက်က အနည်းငယ် ပြုံးလိုက်သည်။

"ဟားဟားဟား၊ ငါတို့ရဲ့ အကယ်ဒမီကို နောက်ထပ် အကျော်အမော်တစ်ယောက် ပို့လွှတ်ပေးခဲ့တဲ့အတွက် မိတ်ဆွေလေးကို ကျေးဇူးတင်ရဦးမယ်"

မဟာအကြီးအကဲက ရယ်ကာမောကာ ပြောလိုက်သည်။

ထို့နောက် ကျွင်းရှောင်ယောက်ကို ကြိုဆိုရန် ကြီးကျယ်ခမ်းနားသော ပွဲတစ်ခုကို ကျင်းပခဲ့လေသည်။

သို့သော်လည်း ကျွင်းရှောင်ယောက်က ထိုပွဲမျိုးကို မကြိုက်သောကြောင့် ရိုးရိုးရှင်းရှင်းသာ ပြောဆိုဆက်ဆံခဲ့သည်။

ထို့‌နောက် အကယ်ဒမီ၏ မဟာအကြီးအကဲက ကျွင်းရှောင်ယောက်အတွက် နေအိမ်ကို စီစဉ်ပေးလေသည်။

အကယ်ဒမီတွင် ဂူပေါင်းသုံးဆယ့်ခြောက်ခုနှင့် မင်္ဂလာနယ်မြေ ခုနစ်ဆယ့်နှစ်နေရာ ရှိသည်။ ဤသည်မှာ အကြီးအကဲများနှင့် မျိုးစေ့အဆင့် ပါရမီရှင်တစ်စုသာ နေထိုင်ရန် အရည်အချင်းပြည့်မီသော ရတနာမြေများ ဖြစ်သည်။

ကျွင်းရှောင်ယောက်၊ ကျန်းလော့လီနှင့် အခြားသူများ အားလုံးကို ဂူတစ်ခုတွင် နေရာချပေးခဲ့ပေသည်။

ထို့နောက်မှာတော့ အကယ်ဒမီက ပြန်လည်ငြိမ်သက်သွားသည်။

အကယ်ဒမီတွင် တပည့်များအချင်းချင်း တိုက်ခိုက်ခြင်းမှ တင်းကြပ်စွာ တားမြစ်ထားသောကြောင့် ယေဘုယျအားဖြင့်တော့ တိတ်ဆိတ်ငြိမ်သက်နေတတ်သည်။

ကျွင်းရှောင်ယောက်က လင်ယွမ်ထံသို့ ချက်ချင်း မသွားပါ။

ထိုအစား သူဟာ ကျန်းလော့လီ၏ ပျက်စီးနေသော ရှေးဦးဝိညာဉ်ကမ္ဘာကို ပြန်လည်ပြုပြင်ရန်အတွက် ကမ္ဘာ့သစ်ပင်၏ စွမ်းအားကို အသုံးပြုရန် စီစဉ်ခဲ့သည်။

ကျန်းလော့လီလည်း အလွန်ပျော်ရွှင်ပြီး သူမ၏ နှလုံးသားမှာ ချိုမြိန်မှုတို့ ပြည့်နေတော့သည်။

ကျွင်းရှောင်ယောက်က ကျန်းလော့လီ၏ ရှေးဦးဝိညာဉ်ကမ္ဘာတွင် မည်သည့်လျှို့ဝှက်ချက် ရှိနေမည်ကို အနည်းငယ် သိချင်နေသည်။

နောက်ဆုံးတွင်၊ ရှေးဦးဝိညာဉ်ကမ္ဘာ၏ နိယာမများက အင်မော်တယ်နယ်မြေကြီး၏ နိယာမများမဟုတ်ကြောင်း သူ ယခင်က ခံစားခဲ့ရဖူးပေသည်။

တစ်နည်းဆိုရသော်၊ ရှေးဦးဝိညာဉ်ကမ္ဘာကို တည်ဆောက်ခဲ့သူက အင်မော်တယ်နယ်မြေကြီးမှ အကျော်အမော် မဟုတ်နိုင်ပေ။

ထိုအချိန်တွင်၊ အင်မော်တယ်ချီများနှင့် ပြည့်နှက်နေသော အခြားဂူတစ်ခုမှာ...

လှပသော မိန်းကလေးတစ်ယောက်က ဂူပေါက်ဝတွင် ရပ်ကာ ဂူအတွင်းဘက်သို့ လှမ်းပြောလိုက်သည်။

"ဧကရီ... ကျွင်းမိသားစုရဲ့ နတ်ဘုရားသားတော်က အင်မော်တယ်အကယ်ဒမီကို ရောက်လာပါပြီ။ သူက အခု ကျန်းလော့လီနဲ့အတူ ရှိနေပါတယ်"

"ငါနားလည်ပြီ၊ သွားပါ"

ဂူအတွင်းမှ အေးစက်သော အသံတစ်ခု ထွက်ပေါ်လာ၏။

"ကောင်းပါပြီ"

ဤလှပသောမိန်းကလေးက လင်ယွမ်၏ အစေခံ ရူယင်း ဖြစ်သည်။ သူမက အနည်းငယ်ခေါင်းညိတ်ကာ နောက်ပြန်ဆုတ်သွားလေသည်။

သို့သော်လည်း သူ့စိတ်ထဲမှာတော့ သက်ပြင်းချလိုက်မိသည်။

'ဧကရီလေးရယ်... နင့်စိတ်ထဲမှာ ဘာဖြစ်နေတယ်ဆိုတာ ငါတောင်မြင်ရပါတယ်။ နင် ဘာဖြစ်လို့များ ပိုပြီး ပြတ်ပြတ်သားသား မပြောရတာလဲ"