အခန်း ၁၁၅၈

အခန်း ( ၁၁၅၈ ) အမှန်တရားရဲ့သားတော်၏ ရည်ရွယ်ချက်။

အားလုံးက အသံလာရာကို လှမ်းကြည့်လိုက်သောအခါ အဝေးမှ တိမ်တိုက်ပေါ်တွင် တစ်စုံတစ်ယောက်ရပ်နေကြောင်း မြင်လိုက်ရသည်။

၎င်းက ဘာသာဝင်တစ်ဦး၏ ရိုးရာဝတ်စုံကို ဝတ်ဆင်ထား၏။

သူ့လက်ထဲမှာလည်း တောက်ပသော ရွှေရောင် တောင်ဝှေးတစ်ချောင်းကို ကိုင်ထားသေးသည်။

သူ့မျက်နှာက ကြည်လင်ပြီး ချောမောသည်။

သူ့တစ်ကိုယ်လုံးကို အဆုံးမဲ့ သန့်စင်သောအလင်းနှင့် ယုံကြည်ခြင်းအလင်းရောင်တို့ ဖုံးလွှမ်းထားလေသည်။

သူ၏ ဦးခေါင်းနောက်မှာတော့ တောက်ပသော သစ္စာတရား၏ ရွှေရောင်အလင်းစက်ဝိုင်းတစ်ခု ရှိနေသည်။ ထိုအလင်းစက်ဝိုင်းကလည်း အားကောင်းသော ယုံကြည်ခြင်း စွမ်းအားကို ထုတ်လွှတ်နေ၏။

သူကား ကုရ်အာန်သူတော်စင်ဂိုဏ်း၏ အမှန်တရား၏သားတော်ပင်။

ကုရ်အာန်သူတော်စင်ဂိုဏ်းသည် အနောက်ဘက်နိဗ္ဗာန်ဘုံကဲ့သို့ မရေမတွက်နိုင်သော ယုံကြည်သူများရှိပြီး ကောင်းကင်ကိုးခု အင်မော်တယ်နယ်မြေကြီးတွင် ကျော်ကြားသော ဂိုဏ်းတစ်ခု ဖြစ်သည်။

ဤသို့သော ဘာသာကြီးများက ယုံကြည်ခြင်း၏စွမ်းအားကို အထူးပြုပေသည်။

ယခုအချိန်တွင်၊ ကုရ်အာန်သူတော်စင်ဂိုဏ်းမှ အမှန်တရား၏သားတော် ပေါ်လာပြီ ဖြစ်သည်။

သူ၏ နာမည်အရင်းကို ဘယ်သူမှ မသိကြပေ။

ကုရ်အာန်သူတော်စင်ဂိုဏ်းမှ လူများပင်လျှင် ထိုသူအား အမှန်တရား၏သားတော်ဟုသာ ခေါ်ကြသည်။

သူက အမှန်တရား၏ သင်္ကေတဖြစ်ပြီး အမြင့်မြတ်ဆုံး သိမ်မွေ့မှုကို ကိုယ်စားပြုပုံရပေသည်။

"တိုင်းတပါးရဲ့ ကပ်ဘေးတွေက ပြီးဆုံးသွားတာ မကြာသေးဘူး။ ပြည်တွင်းပြဿနာတွေ မဖြစ်သင့်ဘူးလို့ ထင်ပါတယ်။ အဲဒီအစား ကိုယ့်ကိုကိုယ် တိုးတက်အောင်လုပ်ဖို့ ဒီအခွင့်အလမ်းကို ဆုပ်ကိုင်ထားရမယ်"

အမှန်တရား၏သားတော်က တည်ငြိမ်သော အမူအရာဖြင့် နွေးထွေးစွာပြုံးနေဆဲ ဖြစ်သည်။

သူ့ကိုကြည့်ရသည်မှာ နွေဦးလေညင်းကဲ့သို့ပင်။

သူက မျိုးဆက်သစ်လူငယ်များကြားတွင် နာမည်ကောင်းရှိပြီး အခြားသူများနှင့် ပြဿနာဖြစ်ခဲသည်။

"တကယ်လို့ သူသာ နတ်ဆိုးဖီးနစ်ရှေးဟောင်းဂူရဲ့ လူတွေကို အရင် မလှုပ်ရှားခဲ့ဘူးဆိုရင် ငါကလည်း ဒုက္ခပေးမှာ မဟုတ်ဘူး"

ဟွမ်နျဲ့တောက်က အေးစက်စက် ပြောလိုက်သည်။

အမှန်တရား၏ သားတော်က ပြုံးရုံသာပြုံးပြီး မှတ်ချက်မပြုပေ။

သူက ကျွင်းရှောင်ယောက်ကို လှည့်ကြည့်ကာ ပြောလိုက်သည်။

"ကောင်းကင်ကိုးခု အင်မော်တယ်နယ်မြေကြီးကို ကယ်တင်ခဲ့တဲ့ သူရဲကောင်းက မျှော်လင့်ထားတဲ့အတိုင်းပါပဲ။ သူက လူအပေါင်းတို့ရဲ့ ယုံကြည်မှုကိုခံရတာ မအံ့ဩတော့ပါဘူး"

ကျွင်းရှောင်ယောက်က အပြောင်းအလဲမရှိသော အမူအရာဖြင့် အမှန်တရား၏သားတော်ကို ပြန်ကြည့်လိုက်၏။

သူ့စိတ်ထဲမှာတော့ တိတ်တဆိတ် အကဲခတ်နေသည်။

အမှန်တရား၏သားတော်က ပြုံးရွှင်နေကာ ကမ္ဘာကြီး၏ ငြိမ်းချမ်းရေးကို ဖော်ဆောင်သူကဲ့သို့ပင်။

သို့သော်လည်း ကျွင်းရှောင်ယောက်သည် သူ့ကိုကြည့်သော အမှန်တရား၏သားတော်၏ မျက်လုံးများတွင် ထူးခြားသော အရိပ်အယောင်တစ်ခုရှိနေတာကို ဝိုးတဝါး ခံစားမိသည်။

ကျွင်းရှောင်ယောက်က အကြောင်းရင်းကို ချက်ချင်း ခန့်မှန်းလိုက်မိ၏။

နတ်ဘုရား ဓမ္မခန္ဓာမှ ယုံကြည်ခြင်းစွမ်းအား။

ကုရ်အာန်သူတော်စင်ဂိုဏ်းက အကျွမ်းကျင်ဆုံးမှာ ယုံကြည်ခြင်းစွမ်းအားဖြင့် လေ့ကျင့်ခြင်း ဖြစ်သည်။

ကျွင်းရှောင်ယောက်၏ နတ်ဘုရားဓမ္မခန္ဓာက ယုံကြည်ခြင်း၏ အဆုံးစွန်သော ဖော်ပြချက်ဖြစ်သည်မှာ သေချာလှ၏။

နတ်ဘုရားဓမ္ခခန္ဓာ၏ စွမ်းအားဖြင့် ကျွင်းရှောင်ယောက်သည် အန္တိမကပ်ဘေးကြီးကိုပင် ရင်ဆိုင်တိုက်ခိုက်ခဲ့ဖူးသည်။

ကုရ်အာန်သူတော်စင်ဂိုဏ်းက နတ်ဘုရားဓမ္မခန္ဓာကို လိုချင်လောဘရှိနေခြင်း ဖြစ်လိမ့်မည်။

ထို့ပြင်၊ ကျွင်းမိသားစုက ကုရ်အာန်သူတော်စင်ဂိုဏ်းနှင့် ပဋိပက္ခများ ရှိဖူးသည်။

ပျက်စီးခြင်းကောင်းကင် အင်မော်တယ်နယ်မြေကြီးမှ ကုရ်အာန်သူတော်စင်ဂိုဏ်းခွဲကို ကျွင်းမိသားစုက ဖျက်ဆီးခဲ့သည် မဟုတ်လော။

ကျွင်းရှောင်ယောက် ကိုယ်တိုင်လည်း ကုရ်အာန်သူတော်စင်ဂိုဏ်း၏ ပါရမီရှင်များစွာကို သတ်ပစ်ခဲ့ဖူးသည်။

ထို့ကြောင့်၊ ကျွင်းရှောင်ယောက်က အမှန်တရား၏သားတော်သည် သူ့အပေါ်ရန်ငြိုးမထားဘဲနေမည်ဟု မယုံပေ။

'ငါ့ရဲ့ ဓမ္မခန္ဓာကို ချောင်းမြောင်းနေတဲ့ ပြုံးနေတဲ့ကျားတစ်ကောင်ပဲ'

ကျွင်းရှောင်ယောက်က သူ့စိတ်ထဲမှ‌ တွေးလိုက်သည်။

ဤသည်မှာ အမှန်တရားရဲ့သားတော်၏ စိတ်ကူးသက်သက်ထက် ပိုလိမ့်မည်။

ကုရ်အာန်သူတော်စင်ဂိုဏ်းမှ အဆင့်မြင့်ပုဂ္ဂိုလ် အများအပြားကလည်း ထိုကဲ့သို့ တွေးနေကြမည်ကို ကြောက်ရသည်။

အကယ်၍ ကုရ်အာန်သူတော်စင်ဂိုဏ်းက နတ်ဘုရားဓမ္မခန္ဓာကို ရရှိခဲ့လျှင် ပြိုင်ဘက်ကင်းသလောက် ဖြစ်လိမ့်မည်။

ဟွမ်နျဲ့တောက်၏ ရိုးရှင်းသော သဘောသဘာဝနှင့် နှိုင်းယှဉ်လျှင်..

အမှန်တရား၏သားတော်ကဲ့သို့ ပြုံးနေသောကျားများကို လူတို့ ပို၍သတိထားရန် လိုအပ်သည်။

'ဒါပေမဲ့... မင်းတို့က ငါ့ရဲ့ နတ်ဘုရားဓမ္မခန္ဓာကို လိုချင်နေကြသလို...'

'ငါကလည်း ကုရ်အာန်သူတော်စင်ဂိုဏ်းရဲ့ ယုံကြည်ခြင်း လေ့ကျင့်နည်းတွေကို သိချင်တယ်'

ကျွင်းရှောင်ယောက်၏ အမူအရာက မပြောင်းလဲသော်လည်း သူ့စိတ်ထဲတွင် တွက်ချက်မှုများ ပြုလုပ်နေပြီ။

တစ်စုံတစ်ယောက်က သူ့ကို ဆန့်ကျင်ရန် ကြံစည်ဝံ့ပါက၊ သူက နှစ်ဆပိုပြီး ကြံစည်မည် ဖြစ်သည်။

'ဟင်'

အမှန်တရားရဲ့သားတော်၏ နှလုံးသားထဲတွင် ရုတ်တရက် တုန်လှုပ်မှုကို ခံစားလိုက်ရသည်။

သို့သော်လည်း ကျွင်းရှောင်ယောက်ကို ကြည့်လိုက်သောအခါ၊ ကျွင်းရှောင်ယောက်၏ အမူအရာက မပြောင်းလဲပေ။

'သူက ရည်ရွယ်ချက်တွေကို သတိပြုမိသွားတာများလား'

အမှန်တရား၏သားတော်က သူ့စိတ်ထဲမှ တွေးလိုက်မိသည်။

ဒါက မမြင်နိုင်သော ကစားပွဲတစ်ခုဟု ဆို၍ရပေသည်။

နေရာတွင် လေထုက အနည်းငယ် တင်းမာနေချိန်...

အဝေးမှ နောက်ထပ် ပုံရိပ်တချို့ ပေါ်လာသည်။

"နောက်ထပ် ဆရာကြီးတွေ ပေါ်လာတော့မှာလား"

ပတ်ဝန်းကျင်မှ လူများလည်း လှမ်းကြည့်လိုက်ကြ၏။

ဤတစ်ကြိမ်တွင် တစ်ယောက်၊ နှစ်ယောက် မဟုတ်ဘဲ...

ခြောက်ဦး၊ ခုနစ်ဦးခန့် ပြိုင်တူ ပေါ်လာကြသည်။

သူတို့က အမျိုးမျိုးသော သားရဲများကို စီးနင်းထား၏။ အားလုံးက ရက်စက်ကြမ်းကြုတ်သော သားရဲမျိုးစိတ်များ ဖြစ်ကြသည်။

"အဲဒါက ရန်ယွင်မြင်းသည်တော်တွေပဲ။ ရှေးဧကရာဇ်ငယ်က အတားအဆီးကို ချိုးဖျက်ပြီး ပြန်လည်ပေါ်လာခဲ့ပြီလား"

ထိုလူအုပ်စုကို မြင်ရသောအခါ ရင်ပြင်ရှိ ပါရမီရှင်များ ရုတ်ရုတ်သဲသဲ ဖြစ်သွားကြသည်။

ယခုအချိန်တွင် မျက်စိကို ဖမ်းစားနိုင်ဆုံး၊ လျှို့ဝှက်ဆန်းကျယ်ဆုံး လူများမှာ...

လျှို့ဝှက်ဆန်းကျယ်သော ကစဉ့်ကလျားခန္ဓာနှင့် အင်မော်တယ်ခုံရုံး၏ ရှေးဧကရာဇ်ငယ်တို့ ဖြစ်ကြသည်။

သို့သော်လည်း အားလုံးကို အနည်းငယ် စိတ်ပျက်သွားစေသည့်အရာမှာ...

ရန်ယွင်မြင်းသည်တော်တချို့သာ ရောက်ရှိလာကြခြင်း ဖြစ်သည်။

ရှေးဧကရာဇ်ငယ်က မလာပေ။

သို့သော်လည်း ဤအခိုက်တွင် ရောက်ရှိလာကြသူတိုင်းက အစွမ်းထက်ကြသည်။

သူတို့၏ စီးတော်များကပင် တော်ရုံပါရမီရှင်များထက် အစွမ်းထက်၏။

သို့သော်လည်း ယင်းက ပုံမှန်ပင်။ သူတို့က ရှေးဧကရာဇ်ငယ် တိဟောက်ထျန်းနှင့် တူညီသောခေတ်မှ ပါရမီရှင်များ ဖြစ်ကြသည်။

သူတို့အားလုံးက သူတို့ခေတ်မှ ထူးကဲသော တည်ရှိမှုများ ဖြစ်၏။

ယခင်က၊ ကျွင်းရှောင်ယောက်သည် အမှတ်ဆယ့်ရှစ်နှင့် အခြားသူများကို ရှောင်တခင်သတ်ခဲ့သောကြောင့် သူတို့၏အင်အားကို လျှော့မတွက်သင့်ပေ။

အကြောင်းမှာ၊ သူတို့က ထာဝရကွဲလွဲမှု ကျွင်းရှောင်ယောက်ကို ရင်ဆိုင်ခဲ့ရသောကြောင့်သာ ဖြစ်သည်။

သာမန် မျိုးစေ့အဆင့် ပါရမီရှင်များက အမှတ်ဆယ့်ရှစ်နှင့် အခြားသူများကို အလွယ်တကူသတ်ရန် မဖြစ်နိုင်ပေ။

"ကျွင်းရှောင်ယောက်၊ အမှတ်ဆယ့်ရှစ်နဲ့ အခြားသူတွေရဲ့အကြွေးကို မင်း ဘယ်လိုဖြေရှင်းပေးမှာလဲ"

တစ်ယောက်က အေးစက်စက် ပြောလိုက်သည်။

ကျွင်းရှောင်ယောက်ကတော့ သူတို့ကို လုံးဝ ဂရုမစိုက်သလို ကြည့်တောင်မကြည့်ပေ။

အားလုံးကို တိုက်ရိုက် လျစ်လျူရှုလိုက်သည်။

"တော်လောက်ပြီ၊ အချိန်နီးနေပြီ"

တတိယအကြီးအကဲက မျက်မှောင်ကြုတ်ကာ ပြောလိုက်သည်။

"တတိယအကြီးအကဲ၊ ဒီကိစ္စက ခင်ဗျားနဲ့ မဆိုင်ဘူး။ ကျုပ်တို့က ရှေးဧကရာဇ်ငယ်ရဲ့ နောက်လိုက်တွေဖြစ်ပြီး ဒီကိစ္စမှာ တရားမျှတမှုကို ရှာဖို့လိုတယ်"

အခြား မြင်းသည်တော်တစ်ဦးက ပြောလိုက်၏။

တတိယအကြီးအကဲ၏ မျက်နှာမှာ အနည်းငယ် မှုန်ကုပ်သွားသည်။

ရှေးဧကရာဇ်ငယ်က သူတို့ကို အကြွင်းမဲ့ယုံကြည်မှု ပေးထားပုံရသည်။ ၎င်းတို့က သူကဲ့သို့ အကြီးအကဲတစ်ဦးကိုပင် အလေးအနက်မထားတော့ပေ။

သူတို့အားလုံးက ကျွင်းရှောင်ယောက်ကို ပြန်ကြည့်လိုက်ကြသည်။

ကျွင်းရှောင်ယောက်ကတော့ သူတို့ကို မမြင်မတွေ့သလို လျစ်လျူရှုထားဆဲပင်။

ယင်းက သူတို့၏ နှလုံးသားထဲမှ ဒေါသကို ထိန်းထားရန် ပို၍ပင် ခက်ခဲစေသည်။

"အတင့်ရဲလို့၊ မင်းတို့က သခင်လေးနဲ့ စကားပြောဖို့ အရည်အချင်းမရှိဘူး"

ကျွင်းရှောင်ယောက်၏ နောက်လိုက်တစ်ယောက်ဖြစ်သည့် ရီယုက ရှေ့ကိုလှမ်းလိုက်သည်။

"အမှန်ပဲ၊ မင်းတို့ရဲ့အဆင့်နဲ့လား... သခင်လေးရဲ့ အကြည့်တစ်ချက်ကို ခံယူဖို့တောင် အရည်အချင်းမပြည့်မီဘူး"

ဝမ့်ချွမ်ကလည်း ရှေ့သို့တိုးလာသည်။

ထာဝရဆင်းရဲဒုက္ခနတ်ဘုရားမ၊ ရန်ချင်းယင်နှင့် အခြားသူများလည်း ထွက်လာကြ၏။

ထို့ပြင် မင်းသမီးလုံကျိကလည်း ရပ်တည်ခဲ့သည်။

သူမက ကျွင်းရှောင်ယောက်၏ နောက်လိုက်မဟုတ်သော်လည်း၊ တစ်ချိန်က ကျွင်းရှောင်ယောက်၏ အစီးအနင်းသားရဲ ဖြစ်ခဲ့ဖူးပေသည်။

ယွိချန်ကျွမ့်၊ ထိုက်ယင်ကျောက်စိမ်းယုန်နှင့် အခြားသူများကပါ ရပ်တည်ကြသည်။

ယင်းက ထိုမြင်းသည်တော်များ၏ အမူအရာကို အနည်းငယ် ပြောင်းလဲသွားစေခဲ့သည်။

"လက်ကိုးချောင်း သူတော်စင် နဂါးဧကရာဇ်ရဲ့ဆက်ခံသူ၊ ရီမျိုးနွယ်ရဲ့ မျိုးဆက်၊ ဆမ်ဆာရာခန္ဓာ၊ ထိုက်ယင်မြင့်မြတ်ခန္ဓာ..."

သူတို့ရှေ့မှ လူများကိုကြည့်ရင်း ရန်ယွင်မြင်းသည်တော်များ အံ့ဩသွားကြသည်။

ဤပါရမီရှင်များက ကျွင်းရှောင်ယောက်၏ နောက်လိုက်များဖြစ်ပြီး တစ်ယောက်ချင်းစီကလည်း သူတို့ထက် အားမနည်းကြပေ။

ရန်ယွင်မြင်းသည်တော်များအနက် ထိပ်တန်း လူအချို့သာ ဤဘီလူးများနှင့် ပုခုံးချင်းယှဉ် ရပ်တည်နိုင်မည့်ပုံရသည်။

ထို့ပြင် ကျွင်းမိသားစုမှ လူငယ်များကလည်း သူတို့ကို အေးစက်စက် စောင့်ကြည့်နေကြသေးသည်။

ယင်းက ရန်ယွင်မြင်းသည်တော်တချို့ကို သူတို့ စိတ်မြန်လက်မြန် ပြုမူလွန်းသွားပြီဟု ခံစားရစေခဲ့သည်။

ထိုစဉ်... မြင်းသည်တော်အားလုံး ပြင်းထန်သော အကျပ်အတည်းကို ရုတ်တရက် ခံစားလိုက်ရသည်။

"ဝှစ်..."

လေထဲတွင် ကြောက်စရာကောင်းအောင် သတ်ဖြတ်ခြင်းအငွေ့အသက်များဖြင့် လှပသော ရုပ်သွင်နှစ်ခု ပေါ်လာသည်။

သူတို့က ရွယ်ယွဲ့နှင့် စူးဟုန်ယီတို့ပင်။

တစ်ယောက်က ကျူးရှန်းဓားပြခေါင်းဆောင်ဟောင်းဖြစ်ပြီး ကျန်တစ်ယောက်က ကောင်းကင်နက်မျိုးနွယ်မှ ဆင်းသက်လာကာ မဟာကာလီ၏ ဆက်ခံသူ ဖြစ်သည်။

သူတို့က ကျွင်းရှောင်ယောက်၏ နောက်လိုက်များအနက် အထက်ဆုံး ဓားနှစ်လက်ပင်။

"ဝှစ်..."

မိန်းကလေးနှစ်ယောက်က တိုက်ရိုက် လှုပ်ရှားလိုက်ကြသည်။

ရွယ်ယွဲ့က သေမင်းတံစဉ်ကောက်နှင့် ကောင်းကင်ကိုဝါးမျိုပြီး နတ်ဖန်ဆင်းခြင်းကျင့်စဉ်ကို အသုံးပြုကာ လူတစ်ယောက်ကို တိုက်ခိုက်လိုက်သည်။

စူးဟုန်ယီ၏ မျက်လုံးများက နီရဲလာသည်။ သူ့လက်ထဲတွင် ကောင်းကင်နက်ကြေးမုံကို ကိုင်ထားကာ စတေးခံ ယဇ်ပူဇော်ခြင်းစွမ်းရည်ကို အသုံးပြုလိုက်၏။

"ဝုန်း... ဝုန်း"

တခဏချင်းမှာပင် ရန်ယွင်မြင်းသည်တော်နှစ်ဦး အသတ်ခံလိုက်ရတော့သည်။