အခန်း ၁၁၇၆

အခန်း ( ၁၁၇၆ ) လျှို့ဝှက်ဆန်းကြယ်သော ထိပ်တန်းတားမြစ်နယ်မြေ ဆယ်ခု။

မုန်တိုင်းများကို ဖျက်ဆီးရန်က မြင့်မြတ်ခန္ဓာမျိုးရိုး၏ တာဝန် ဖြစ်သည်။ သို့သော်လည်း သူတစ်ဦးတည်းတော့ မဟုတ်ပေ။

စင်စစ်တွင် သာမန်လူများကို ဂရုစိုက်ပြီး နယ်မြေကြီးကို သစ္စာရှိသည့် ဧကရာဇ်အချို့လည်း လှုပ်ရှားခဲ့ကြသည်။

လွမ်ကုဧကရာဇ်သည်လည်း ၎င်းတို့အထဲမှ တစ်ဦးဖြစ်ချေသည်။

ဤလူအုပ်စုကတော့ ကောင်းကင်ကိုးပါးအထက်မှ ဆင်းသက်လာသူဖြစ်သည့်အပြင် လွမ်ကုဧကရာဇ်အပေါ်လည်း အလွန်သတိထားကြသည်။

ကျွင်းရှောင်ယောက်၏ ခန့်မှန်းချက်က မမှားလျှင်...

သူတို့နောက်ကွယ်မှ မိသားစုအပြင် အသက်တားမြစ်နယ်မြေမှ တည်ရှိမှုတချို့ပင် လွမ်ကုဧကရာဇ်နှင့် ပတ်သက်မှု ရှိနိုင်သည်။

ထို့ပြင် သူတို့၏ အမူအရာများအရ ကောင်းမွန်သော ပတ်သက်မှုမျိုး မဖြစ်နိုင်ပေ။

"မင်းတို့ကလည်း ကောင်းကင်ကိုးခုအထက် တားမြစ်မိသားစုကလား"

ကျွင်းရှောင်ယောက်က လျှို့ဝှက်ဆန်းကြယ်သော လူအုပ်စုကို ကြည့်လိုက်သည်။

"အင်း... မင်းက ကျွင်းရှောင်ယောက်လား"

လျှို့ဝှက်ဆန်းကြယ်သော လူအုပ်စုကလည်း အံ့အားသင့်မှု အရိပ်အမြွက်ဖြင့် ကြည့်နေကြ၏။

ကျွင်းရှောင်ယောက်၏ နာမည်ဟာ ကောင်းကင်ကိုးခုအထက်မှာလည်း ပျံ့နှံ့နေသည်။

ယင်းက ကောင်းကင်ကိုးခု အင်မော်တယ်နယ်မြေကြီး‌လောက် ဂုဏ်ရှိန်မပြနိုင်သော်လည်း ဩဇာကြီးမားနေသေးသည်။

ယင်းကြောင့် ဤလူအုပ်စု၏ မျက်နှာများက အမူအရာ အနည်းငယ် ပြောင်းလဲသွားခဲ့ကြသည်။

အကယ်၍ ဤနေရာတွင် တော်ရုံလူဖြစ်လျှင်၊ သူတို့ တားမြစ်မိသားစု၏ အထောက်အထားဖြင့် တိုက်ရိုက် ဖျက်ဆီးပစ်နိုင်သည်။

သို့သော်လည်း ကျွင်းရှောင်ယောက်ကတော့ မတူပေ။

တားမြစ်မိသားစုက သာလွန်ပြီး ကျွင်းရှောင်ယောက်ကို ထိချင်လျှင်ပင် သူတို့၏ ကိုယ်ပိုင်အရည်အချင်းကို ပြန်ဆန်းစစ်ရမည် ဖြစ်သည်။

သူတို့နောက်ကွယ်မှ အသက်တားမြစ်နယ်မြေက မလှုပ်ရှားလျှင်...

ယင်းက သူတို့ထိန်းချုပ်နိုင်သောအရာ မဟုတ်ပါ။

ထိုသို့တွေးမိသောအခါ ဤလူများ၏ အမူအရာက တုံ့ဆိုင်းဆိုင်းဖြစ်လာကြသည်။

သူတို့က မတုံးပါ။

ထို့ပြင်၊ ယခုအခါ မိစ္ဆာသွေးမိုးကြိုးနဂါးတောင်မှ ကျွင်းရှောင်ယောက်ထံ ထူးထူးခြားခြား လက်နက်ချသွားပြီ ဖြစ်သည်။

သူတို့က မိုက်မဲစွာဖြင့် ရှေ့ဆက်တိုးနေမည် မဟုတ်ပေ။

"ဟမ့်၊ သွားကြစို့"

ခေါင်းဆောင်က သူ့လက်တွေကို ဝှေ့ယမ်းပြီး ထွက်ခွာရန် ဟန်ပြင်လိုက်သည်။

"ခဏနေဦး"

ရုတ်တရက်၊ ကျွင်းရှောင်ယောက်ထံမှ လျစ်လျူရှုထားသော စကားသံ ထွက်ပေါ်လာ၏။

သဲလွန်စတစ်ခုက ရှေ့ကိုရောက်လာမှတော့ လက်လွတ်မခံနိုင်တော့ပေ။

"ငါက မင်းတို့ကို ထွက်သွားဖို့ ပြောခဲ့လို့လား"

ကျွင်းရှောင်ယောက်က တည်ငြိမ်စွာ ကြည့်လိုက်သည်။

အခြားသူများသာဆိုလျှင် ကောင်းကင်ကိုးခုအထက်မှ တားမြစ်မိသားစုများကို အလွန်သတိထားနေပေမည်။

သို့သော်လည်း ကျွင်းရှောင်ယောက်ကတော့ ဂရုမစိုက်ပါ။

သူက ကြီးစိုးပြီး မည်သည့်နောက်ခံ သို့မဟုတ် အင်အားစုကိုမျှ ဂရုမစိုက်ပေ။

"ကျွင်းရှောင်ယောက်၊ မင်း ဘာသဘောလဲ"

ခေါင်းဆောင်၏ မျက်နှာက အနည်းငယ် မှုန်ကုပ်သွားသည်။

သူတို့က နောက်သို့ ခြေတစ်လှမ်းဆုတ်ထားသော်လည်း ကျွင်းရှောင်ယောက်က ရှေ့တိုးလိုက်နေသည်။

"မင်းတို့ရဲ့ ရန်ငြိုးထားတဲ့ အငွေ့အသက်တွေက ငါ့ရဲ့စိတ်ကို အဆင်မပြေဖြစ်စေတယ်။ ပြောစမ်း၊ မင်းတို့က လွမ်ကုဧကရာဇ်ရဲ့ ဆက်ခံသူကို ဘာဖြစ်လို့ အရမ်းသတိထားနေတာလဲ"

ကျွင်းရှောင်ယောက်က မေးလိုက်သည်။

"မင်းနဲ့မဆိုင်ဘူး"

ထိုလူတစ်စုက လှည့်ထွက်သွားကြ၏။

ကျွင်းရှောင်ယောက်က ခေါင်းကို အနည်းငယ်ခါယမ်းပြီး သက်ပြင်းချကာ လက်ညိုးတစ်ချက်ညွှန်လိုက်သည်။

"ဂါး"

မိုးကြိုးနဂါးက ချက်ချင်း ပါးစပ်ဟကာ မိုးကြိုးများဖြင့် ပစ်ချလိုက်တော့သည်။

"ကျွင်းရှောင်ယောက်၊ မင်း တရားလွန်သွားပြီ"

"ငါတို့က မင်းကို ကြောက်မယ်မထင်နဲ့"

လူစုကလည်း ဒေါသတကြီး အော်ငေါက်ပြီး သူတို့၏ ကိုယ်ပိုင်နည်းလမ်းများကို ထုတ်ဖော်လိုက်ကြသည်။

ကောင်းကင်ကိုးပါး၏အထက်မှ နည်းလမ်းများက အင်မော်တယ်နယ်မြေကြီးနှင့် အနည်းငယ် ကွဲပြားသည်။

သို့သော်... မိစ္ဆာသွေးပုံရိပ်ယောင်နယ်မြေမှာ မိစ္ဆာသွေးမိုးကြိုးနဂါး၏ နယ်မြေ ဖြစ်သည်။

တားမြစ်မိသားစုမှ လူများပင်လျှင် မယှဉ်နိုင်ပေ။

"ဝုန်း... ဝုန်း"

တားမြစ်မိသားစုဝင်များက တစ်ယောက်ပြီးတစ်ယောက် လဲကျသွားကြသည်။

သူတို့က ရွှီထျန်းလောကသို့ ရောက်လာပြီး အခွင့်အလမ်းများစွာကို မရှာဖွေနိုင်မီတွင် အခွင့်အရေး ဆုံးရှုံးခဲ့ပေသည်။

ခဏ‌အတွင်းမှာပင် ခေါင်းဆောင်တစ်ယောက်သာ ကျန်သည်။ သူ့မျက်နှာက မည်းမှောင်နေတော့သည်။

"ငါ နောက်တစ်ကြိမ် ထပ်မပြောချင်ဘူး"

ကျွင်းရှောင်ယောက်က လျစ်လျူရှုစွာ ပြောလိုက်သည်။

"လွမ်ကုကရာဇ်ဟာ တစ်ချိန်က ငါ့ ကျင်းမိသားစုရဲ့ နောက်ကွယ်က တားမြစ်နယ်မြေ တည်ရှိမှုကို စော်ကားခဲ့တယ်"

ခေါင်းဆောင်က အံကိုကြိတ်ပြီး ပြောလိုက်လေသည်။

"လွမ်ကုဧကရာဇ်ရဲ့ ဆက်ခံသူဖြစ်သရွေ့ မင်းလို ကျွင်းမိသားစုရဲ့ နတ်ဘုရားသားတော် အဆင့်အတန်းရှိရင်တောင် အနာဂတ်မှာ ကောင်းကောင်းနေနိုင်မှာ မဟုတ်ဘူး"

'မျှော်လင့်ထားတဲ့အတိုင်းပဲ'

ကျွင်းရှောင်ယောက်က သူ့စိတ်ထဲမှ တွေးလိုက်သည်။

"ဟင်း... ဆရာကြီး လွမ်ကုဧကရာဇ် လုပ်ဆောင်ခဲ့ပုံက တစ်ခုခုမှားခဲ့ပုံရတယ်"

သူက ရုတ်တရက် ပြောလိုက်၏။

ကျင်းမိသားစုဝင်က ထူးခြားဟန်ဖြင့် သူ့ကိုကြည့်လိုက်သည်။

"ဘာလဲ၊ မင်းက ငါတို့မိသားစုရဲ့နောက်ကွယ်က တားမြစ်နယ်မြေနဲ့ ငြိမ်းချမ်းရေး လိုချင်တာလား။ ရိုးရိုးသားသားပြောရရင်တော့ ဒါက မကောင်းတဲ့ အကြံမဟုတ်ပါဘူး"

သို့သော်လည်း နောက်အခိုက်အတန့်တွင် ကျွင်းရှောင်ယောက်က ပေါ့ပေါ့ပါးပါး ပြောလိုက်၏။

"လွမ်ကုဧကရာဇ်ရဲ့အမှားက တားမြစ်နယ်မြေကို အသက်ရှင်လျက် မထားခဲ့သင့်ဘူး။ ငါသာဆိုရင် တားမြစ်နယ်မြေကို တိုက်ရိုက် အမှုန့်ချေပစ်ခဲ့မှာ"

"ကျွင်းရှောင်ယောက်၊ မင်းက အတင့်ရဲလို့"

"ငါတို့မိသားစုရဲ့နောက်ကွယ်က တားမြစ်နယ်မြေဟာ တားမြစ်နယ်မြေကြီး ဆယ်ခုထဲက တစ်ခုပဲ။ အဲဒါက ဖျက်ဆီးလို့မရဘူးကွ။ မိုးနဲ့မြေကို အမြဲ လွှမ်းမိုးထားမှာ"

ကျင်းမိသားစုဝင်က ဒေါသတကြီး ဖြစ်သွားသည်။

ကျွင်းရှောင်ယောက်ကို ငြိမ်းချမ်းရေးလိုချင်သည်ဟု ထင်ထားသော်လည်း...

ဤလွမ်ကုဧကရာဇ်‌၏ ဆက်ခံသူက လွမ်ကုဧကရာဇ် ကိုယ်တိုင်ထက်ပင် လေလုံးထွားနေသေးသည်။

ကျွင်းရှောင်ယောက်က ပေါ့ပေါ့ပါးပါး လက်‌ဖျစ်တီးပြီး ထိုသူ၏ ရှေးဦးဝိညာဉ်ကို တိုက်ရိုက် ဖျက်ဆီးပစ်လိုက်သည်။

"ထိပ်တန်း တားမြစ်နယ်မြေ ဆယ်ခု..."

ကျွင်းရှောင်ယောက်က တီးတိုး ရေရွတ်လိုက်၏။

အင်မော်တယ်နယ်မြေကြီးရှိ သတ္တဝါများအတွက် ကောင်းကင်ကိုးခုအထက်သည် အလွန်လျှို့ဝှက်ဆန်းကြယ်သော နယ်မြေတစ်ခု ဖြစ်သည်။

သို့ရာတွင်၊ ထို့ထက်ပိုပြီး လျှို့ဝှက်ဆန်းကြယ်သော တားမြစ်နယ်မြေကြီးဆယ်ခု ရှိနေသေးသည်။

"နတ်ဆိုးဧကရီလေးရဲ့ ပြောစကားအရတော့ ဒီမငြိမ်မသက်မှုတွေက ကောင်းကင်ကိုးခုအထက်ကနေ စတင်ခဲ့တာပဲ"

"ထိပ်တန်း တားမြစ်နယ်မြေဆယ်ခုက ဒီနေရာမှာ အရေးကြီးဆုံး အခန်းကဏ္ဍတွေ ဖြစ်ရမယ်"

"နတ်ဆိုးဧကရီလေးရဲ့ နောက်ကွယ်က အင်အားစုအမှန်ကရော ဘာလဲ။ လွမ်ကုဧကရာဇ်ကို ရန်ငြိုးထားတဲ့ တားမြစ်နယ်မြေကကော ဘာလဲ"

ထိုအကြောင်းများကို ပို၍တွေးလေ၊ အခြေအနေက ပို၍ ရှုပ်ထွေးလာလေပင်။

တားမြစ်နယ်မြေ ဆယ်ခုကြားမှ ဆက်ဆံရေးကလည်း ရှုပ်ထွေးလွန်းသည်။

'မေ့လိုက်ပါ၊ ငါ နောက်မှစဉ်းစားမယ်'

ကျွင်းရှောင်ယောက်လည်း ယာယီ ဘေးဖယ်ထားရန် ဆုံးဖြတ်လိုက်သည်။

ယခုအချိန်တွင် မိစ္ဆာသွေးမိုးကြိုးနဂါးက အညံ့ခံပြီးပြီမို့ ကျွင်းရှောင်ယောက်သည် မိစ္ဆာသွေးပုံရိပ်ယောင်နယ်မြေ၏ နက်နဲရာကို သဘာဝအတိုင်း ဘေးကင်းစွာ ဝင်ရောက်နိုင်ပြီ ဖြစ်သည်။

ထိုအချိန်...

အခြားတစ်ဖက်တွင်...

ရွှီထျန်းလောက၏ အခြားနေရာတစ်ခုမှာ တိုက်ပွဲတစ်ခု ဖြစ်ပွားနေသည်။

တိုက်ပွဲဝင်နေသူ နှစ်ဘက်စလုံးက တိဟောက်ထျန်းနှင့် ကျွင်းရှောင်ယောက်တို့၏ နောက်လိုက်များ ဖြစ်ကြ၏။

တိဟောက်ထျန်း၏ နောက်လိုက်များမှာ ပုလော့ရွယ်၊ ဆံနီမိစ္ဆာနှင့် အခြားလူတချို့ ဖြစ်သည်။

ကျွင်းရှောင်ယောက်ဘက်မှာတော့ ရီယု၊ ဝမ့်ချွမ်၊ ရန်ချင်းယင်နှင့် အခြားသူများ ပါဝင်ပေသည်။

"အားလုံးပဲ... ဆက်ပြီး တိုက်ခိုက်ချင်တာ သေချာလား"

ပုလော့ရွယ်က တည်ငြိမ်သော လေသံဖြင့် မေးလိုက်သည်။

သူမသည် ထူးခြားသော တာအိုခန္ဓာရှိပြီး ဉာဏ်ပညာကြွယ်ဝသောကြောင့် ရန်ယွင်မြင်းသည်တော် ဆယ့်ရှစ်ဦးတွင် စတုတ္ထ ဖြစ်လာခဲ့ပေသည်။

သူမ၏ ရှေးဦးဝိညာဉ်ကလည်း သူ၏တာအိုခန္ဓာနှင့်သက်ဆိုင်သော အထူးနည်းလမ်းတစ်မျိုးဖြင့် လေ့ကျင့်ထားခြင်း ဖြစ်သည်။

၎င်းက လူတစ်၏ စိတ်ဝိညာဉ်ကို လုံးဝ အေးခဲသွားစေနိုင်သည့် ကြောက်မက်ဖွယ်ကောင်းသော အအေးဓာတ်ကို ထုတ်လွှတ်နိုင်ပေသည်။

"ငါတို့ကို အရင်ရန်စတဲ့သူက ဘယ်သူလဲ။ ငါ့သခင်လေးကို ရန်ယွင်မြင်းသည်တော်တွေကပဲ အရင်ထိပါးခဲ့တာ မဟုတ်လား"

ရန်ချင်းယင်က အေးစက်စက် အော်ဟစ်လိုက်၏။

"မင်း ဘာဖြစ်လို့ အပိုစကားတွေပြောနေတာလဲ၊ ဆုပ်ဖြဲပစ်လိုက်ရုံပဲ မဟုတ်လား"

ဆံနီမိစ္ဆာက ရက်စက်ကြမ်းကြုတ်သော အမူအရာဖြင့် ပြောလိုက်၏။

ထိုအချိန်တွင်...

ရွှေရောင်အလင်းများ ရုတ်တရက် ဖြာထွက်လာသည်။

လေထဲမှ ရွှေရောင်လမ်းတစ်ခု ပေါ်လာ၏။

အင်မော်တယ်နတ်ဘုရား၏ သားတော်ကဲ့သို့ သာလွန်မြင့်မြတ်သော ရုပ်သွင်တစ်ခုက ရွှေရောင်လမ်းပေါ်မှ လျှောက်လှမ်းလာတော့သည်။

သူ၏ ရွှေရောင်ဆံပင်များက နံနက်ခင်း နေအလင်းရောင်ကဲ့သို့ တောက်ပနေသည်။ ငွေရောင် သူ့မျက်လုံးများက နေနှင့်လကဲ့သို့ နက်ရှိုင်း၏။ သူ၏ စိတ်နေစိတ်ထားက လွတ်လပ်ပေါ့ပါးသော်လည်း နေနှင့်လကို လက်ထဲတွင် ကိုင်ဆောင်ထားကာ အရာအားလုံးကို ထိန်းချုပ်နိုင်သည့် နတ်ဘုရင်တစ်ပါးကဲ့သို့ ဖြစ်သည်။

တိဟောက်ထျန်းပင် ဖြစ်တော့သည်။