အခန်း ၁၁၇၈

အခန်း ( ၁၁၇၈ ) ကြယ်ရှစ်ပွင့်ဆုလာဘ်။

ထိုသွေးစက်က မီးတောက်နေသော စိန်တစ်ပွင့်ကဲ့သို့ နီရဲပြီး တောက်ပနေသည်။

နှစ်ပေါင်း မည်မျှကြာသွားသည်ဖြစ်စေ၊ ကြောက်စရာကောင်းသော သွေးနှင့် ချီစွမ်းအင်တို့ကို ထုတ်လွှတ်နေသေးသည်။

ဤသွေးတစ်စက်ကြောင့် မိစ္ဆာသွေးပုံရိပ်ယောင်နယ်မြေတစ်ခုလုံး ဖြစ်ပေါ်လာခဲ့ရသည်။

ထို့ပြင် မိစ္ဆာသွေးပုံရိပ်ယောင်နယ်မြေတွင် ရှေးဟောင်းမြင့်မြတ်ခန္ဓာသွေးတစ်စက် ပေါ်လာခြင်းက မည်သို့သောအဓိပ္ပာယ် ဖြစ်သနည်း။

ရှေးသမိုင်းတွင် လျှို့ဝှက်ထားသော ထိုစစ်ပွဲတွင်၊ မြင့်မြတ်ခန္ဓာ မျိုးရိုးက အကြွင်းမဲ့ အဓိက စွမ်းအားဖြစ်နိုင်သည်။

ဤသွေးတစ်စက်ကလည်း ထိုတိုက်ပွဲမှာ ကျန်ရစ်ခဲ့ခြင်း ဖြစ်လိမ့်မည်။

စစ်ပွဲကြီး ပြီးဆုံးခဲ့သည်မှာ နှစ်ပေါင်းမသိနိုင်အောင် ကြာမြင့်ခဲ့ပြီဖြစ်သော်လည်း...

ဤသွေးတစ်စက်က အသက်ရှင်နေသကဲ့သို့ လတ်ဆတ်စွာ ခုန်နေဆဲ ဖြစ်သည်။

"ဒီမြင့်မြတ်ခန္ဓာသွေးကို တောက်ပ‌တဲ့ ရွှေရောင်အလွှာက ဖုံးအုပ်ထားပြီး ပြီးပြည့်စုံမှုနဲ့ သူ့ရဲ့ စစ်မှန်တဲ့ မူလသဘာဝကို ပြန်လည်ရောက်ရှိသွားပြီ"

"ဒီသွေးတစ်စက်က လုံးဝကို ပြီးပြည့်စုံသွားပြီပဲ။ ကြီးမားသောအောင်မြင်မှု ရှေးဟောင်းမြင့်မြတ်ခန္ဓာထက်တောင် ဒါက ပိုပြီး အားကောင်းတယ်"

ကျွင်းရှောင်ယောက်က လွန်စွာ သိချင်လာမိသည်။ ဤသွေးစက်ပိုင်ရှင်က မည်သူဖြစ်သနည်း။

"ဒီသွေးစက်ပိုင်ရှင်က ဘယ်သူဆိုတာ ငါမသိပေမဲ့ ဒါက ငါ့အတွက်တော့ အများကြီး အဓိပ္ပာယ်ရှိတယ်"

ကျွင်းရှောင်ယောက်၏ မျက်လုံးများက တောက်ပလ သည်။

သူ့အတွက်၊ ဤသွေးတစ်စက်၏တန်ဖိုးသည် ပြန်လည်ဝင်စားခြင်း လမ်းကြောင်းခြောက်သွယ် အင်မော်တယ်အမြစ်ထက် အားမနည်းပေ။

ကျွင်းရှောင်ယောက် မွေးဖွားစဉ်က အချုပ်အနှောင်ကြိုးဆယ်ချောင်းကို ချိုးဖြတ်သည့် ရှေးဟောင်းမြင့်မြတ်ခန္ဓာကို လက်မှတ်ထိုးဝင်နိုင်ခဲ့သော်လည်း...

အတိအကျပြောရလျှင် ယင်းက ကြီးမားသော အောင်မြင်ခြင်း မဟုတ်သေးပေ။

စစ်မှန်သည့် ရှေးဟောင်းမြင့်မြတ်ခန္ဓာက ဧကရာဇ်အားလုံးနှင့် ပခုံးချင်းယှဉ် ရပ်တည်နိုင်သော တည်ရှိမှုတစ်ခု ဖြစ်သည်။

ကျွင်းရှောင်ယောက်၏ မြင့်မြတ်ခန္ဓာက အချုပ်အနှောင်မရှိသော ရှေးဟောင်းမြင့်မြတ်ခန္ဓာပင်။

ယခုမူ ဤသွေးတစ်စက်က ကျွင်းရှောင်ယောက်အတွက် အလွန် အရေးကြီးသည်။

ဤသည်က ရှေးဟောင်းမြင့်မြတ်ခန္ဓာ၏ လျှို့ဝှက်ချက်များကို နားလည်ရန် သူ့အတွက် များစွာ အထောက်အကူ ဖြစ်စေသော အသန်မာဆုံး မြင့်မြတ်ခန္ဓာ၏ သွေးတစ်စက်ပင်။

ကျွင်းရှောင်ယောက်က ယခုအချိန်ထိ ရှေးဟောင်းမြင့်မြတ်ခန္ဓာ၏ ရူပါရုံ ခြောက်ခုအနက် လေးခုကိုသာ နားလည်သေးကြောင်း သိထားကြရမည် ဖြစ်သည်။

သို့ရာတွင်၊ သူ၏ နားလည်နိုင်စွမ်းက မလုံလောက်မှုကြောင့် မဟုတ်ပါ။

သူ့တွင် နတ်ဘုရားစွမ်းရည်များ များပြားလွန်းပြီး ကစဉ့်ကလျားခန္ဓာကိုလည်း လေ့ကျင့်နေခဲ့ရခြင်းကြောင့် ဖြစ်သည်။

ထို့ကြောင့်‌ ရှေးဟောင်းမြင့်မြတ်ခန္ဓာ၏ ရူပါရုံများကို နားလည်ရန် အချိန်မရှိခဲ့ပေ။

ယခုမူ၊ ဤသွေးတစ်စက်ကို ရပြီးနောက်...

ကျွင်းရှောင်ယောက်သည် သူ၏ ရှေးဟောင်းမြင့်မြတ်ခန္ဓာကို သန့်စင်နိုင်သည့်အပြင် မြင့်မြတ်ခန္ဓာ၏ရူပါရုံကိုလည်း နားလည်နိုင်သည်။

အချိန်တန်သောအခါ၊ ရူပါရုံကြီးခြောက်ခုက ပေါင်းစည်း၍ ပြန်လည်ဝင်စားခြင်း လမ်းစဉ်ခြောက်ပါးကို ဖွဲ့တည်ကာ ခေတ်ကာလတစ်လျှောက် ရန်သူအားလုံးကို လွှမ်းမိုးနိုင်မည် ဖြစ်သည်။

ဤသည်မှာ အသျှင်ခန္ဓာ၏ မြင့်မြတ်သောပုံစံကိုးမျိုးနှင့် အတူတူပင်။ ရူပါရုံအားလုံးကို နားလည်ပြီးသည်နှင့် သူတို့၏ စွမ်းအားက နှစ်ဆတိုးလာမည် ဖြစ်သည်။

ကျွင်းရှောင်ယောက်လည်း မတုံ့ဆိုင်းတော့ဘဲ ရှေးဟောင်းမြင့်မြတ်ခန္ဓာ၏ သွေးတစ်စက်ကို တိုက်ရိုက် သိမ်းယူလိုက်လေသည်။

ဤနေရာတွင် သာမန်လူဖြစ်ပါက ဤသွေးစက်အနီးသို့ ရောက်လာသည်နှင့် သူ၏ဝိညာဉ် ပျက်စီးသွားလိမ့်မည်။

အကြောင်းမှာ ရှေးဟောင်းမြင့်မြတ်ခန္ဓာ၏ သွေးက အလွန်ပြင်းထန်ပြီး ယန်ဓာတ်ဖြစ်သည်။

ရှေးဦးဝိညာဉ်က ယင်ဓာတ်ဖြစ်သောကြောင့် အဆင်ပြေရန်မလွယ်ပေ။

ကျွင်းရှောင်ယောက်ကတော့ သူကိုယ်တိုင်က ရှေးဟောင်းမြင့်မြတ်ခန္ဓာဖြစ်သောကြောင့် လုံးဝကောင်းမွန်နေသည်။

ပြီးပြည့်စုံသော မြင့်မြတ်ခန္ဓာ၏ သွေးတစ်စက်ကို သိမ်းယူပြီးနောက် ကျွင်းရှောင်ယောက်က ကျေနပ်သွားလေသည်။

"လက်မှတ်ထိုးဝင်ခြင်းက မစတင်သေးဘူး။ ကြည့်ရတာ ငါဆက်ပြီး သွားရဦးမယ်"

ဆုံးဖြတ်ပြီးနောက် ကျွင်းရှောင်ယောက်က ပို၍ နက်နဲစွာ လျှောက်လှမ်းသွားသည်။

အတွင်းပိုင်းကို ပိုနက်ရှိုင်းလာသည်နှင့် ကျွင်းရှောင်ယောက်သည် ပြန်လည်ဝင်စားခြင်း၏ အားနည်းသော အငွေ့အသက်များကို ခံစားလာခဲ့ရသည်။

ကျွင်းရှောင်ယောက်က နက်ရှိုင်းစွာ ဝင်ရောက်သွားပြီး မကြာမီ...

မိစ္ဆာသွေးပုံရိပ်ယောင်နယ်မြေ အပြင်ဘက်တွင် ပုံရိပ်သုံးခု ပေါ်လာသည်။

တိဟောက်ထျန်း၊ ‌ပုလော့ရွယ်နှင့် ဆံနီမိစ္ဆာတို့ ဖြစ်၏။

"ဧကရာဇ်ငယ်သခင်၊ ဒါက မိစ္ဆာသွေးပုံရိပ်ယောင်နယ်မြေဖြစ်ပြီး ကောင်းကင်ကိုးခုရဲ့ တားမြစ်နယ်မြေတစ်ခုပါ။ ဒီနေရာက ရှေးဦးဝိညာဉ်တွေ ထိုးဖောက်ဝင်ရောက်ဖို့ ခက်ပါတယ်"

ပုလော့ရွယ်က သတိပေးလိုက်သည်။

"ဟုတ်ပါတယ်... ငါသိတယ်၊ ဒါပေမဲ့... ကိစ္စမရှိဘူး"

တိဟောက်ထျန်းက တည်ငြိမ်စွာ ကြည့်နေသည်။

သူ့လက်ကို ဝှေ့ယမ်းလိုက်ရာ ရွှေရောင်ဝိညာဉ်စွမ်းအားက တဟုန်ထိုးတက်လာ၏။ ပုလော့ရွယ်နှင့် ဆံနီမိစ္ဆာတို့ကို လွှမ်းခြုံလိုက်တော့သည်။

ထို့နောက် သူတို့သုံးဦးက မိစ္ဆာသွေးပုံရိပ်ယောင်နယ်မြေထဲသို့ တိုက်ရိုက်ဝင်ရောက်လာခဲ့သည်။

'ဧကရာဇ်ငယ်က မျှော်လင့်ထားတဲ့အတိုင်းပဲ...'

ပုလော့ရွယ်၏ မျက်လုံးများက မြတ်နိုးမှုဖြင့် အရောင်လက်သွားသည်။

ဤတားမြစ်နယ်မြေများက တိဟောက်ထျန်း၏ ခြေလှမ်းများကို လုံးဝမရပ်တန့်နိုင်ပေ။

သို့သော်လည်း တိဟောက်ထျန်းက အနည်းငယ် မျက်မှောင်ကြုတ်သွားသည်။

ဤနေရာတွင် ချီနှင့် သွေးစွမ်းအင်များ အလွန်အားနည်းသွားသည်ကို သူသတိပြုမိ၏။

ဖြစ်နိုင်ချေကို တွေးလိုက်မိသောအခါ သူက အရှိန်မြှင့်လိုက်တော့သည်။

များမကြာမီ သူတို့က မိစ္ဆာသွေးပုံရိပ်ယောင်နယ်မြေ၏ နက်နဲရာသို့ ရောက်လာခဲ့ကြသည်။

သို့သော်လည်း ‌ထိုနေရာတွင် သွေးအရိပ်အယောင်မျှသာ ကျန်တော့သည်။

ထိုနေရာမှ တိဟောက်ထျန်း အမှန်တကယ် လိုချင်သောအရာမှာ ပျောက်သွားပြီ ဖြစ်သည်။

တိဟောက်ထျန်း မျက်မှောင်ကြုတ်လိုက်သည်။

ယခင်က ပြန်လည်ဝင်စားခြင်း လမ်းစဉ်ခြောက်သွယ် အင်မော်တယ်အမြစ်အတုကို မရရှိခဲ့သော်လည်း တိဟောက်ထျန်းက ဂရုမစိုက်ခဲ့ပေ။

ယခုတော့ သူ အဓိကလိုချင်သည့် သူ့ခန္ဓာကိုယ်ကို သန့်စင်နိုင်သော သွေးတစ်စက်က ထပ်မံ ပျောက်သွားပြီ ဖြစ်သည်။

ယင်းက တိဟောက်ထျန်း၏ သတိကို နိုးထလာစေသည်။

မူလက သူပိုင်ဆိုင်သင့်သည့် အခွင့်အလမ်းများကို ဆုပ်ကိုင်ထားသူတစ်ဦး အမြဲရှိနေပုံပင်။

'တစ်ခါက မတော်တဆမှု... နှစ်ကြိမ်က တိုက်ဆိုင်မှုပဲ၊ ဒါပေမဲ့ တတိယအကြိမ်ကော ဖြစ်မလာနိုင်ဘူးလို့ ဘယ်သူပြောနိုင်မှာလဲ'

တိဟောက်ထျန်း၏ မျက်လုံးများက မှုန်ကုပ်သွားသည်။

စစ်မှန်သော ပြန်လည်ဝင်စားခြင်း လမ်းစဉ်ခြောက်သွယ် အင်မော်တယ်အမြစ်က ရွှီထျန်းလောက၏ အနက်ရှိုင်းဆုံးအပိုင်းတွင် ဖြစ်သည်။ ယင်းကို သူ ရအောင်ယူရမည်။

တိဟောက်ထျန်းတို့ သုံးဦးသားလည်း လျင်မြန်စွာ လျှောက်လှမ်းသွာကြသည်။

တစ်ဖက်တွင်၊ ရှေ့မှ လျှောက်လှမ်းနေသော ကျွင်းရှောင်ယောက်က မိစ္ဆာသွေးပုံရိပ်ယောင်နယ်မြေမှ ထွက်လာပြီဖြစ်ကြောင်း တွေ့လိုက်ရသည်။

ဘေးပတ်ပတ်လည်ကို ကြည့်လိုက်မည်ဆိုလျှင် ထူးခြားသော ကြယ်ကောင်းကင်ကို မြင်ရမည် ဖြစ်၏။

အချိန်ဟင်းလင်းပြင် အက်ကြောင်းအမျိုးမျိုးကလည်း နေရာအနှံ့ ပြန့်ကျဲနေသေးသည်။

ပြိုပျက်နေသော ကောင်းကင်၊ မှိန်ဖျော့သောကြယ်များနှင့် လွန်စွာ ဖရိုဖရဲဖြစ်စေသော နေရာတစ်ခု ဖြစ်ပေါ်လာသည်။

'ဒီနေရာက ရွှီထျန်းလောကရဲ့ အနက်ရှိုင်းဆုံးအပိုင်းဖြစ်ပြီး အကျော်အမော်ကြီးတွေ တိုက်ခိုက်ခဲ့ကြတဲ့နေရာလည်း ဖြစ်နိုင်တယ်'

ကျွင်းရှောင်ယောက်က သူ့စိတ်ထဲမှ တွေးနေမိသည်။

ဤတိုက်ပွဲတွင် တိုက်ခိုက်ခဲ့သူတစ်ဦးက ပြီးပြည့်စုံသော ရှေးဟောင်းမြင့်မြတ်ခန္ဓာ သွေးစက်၏ ပိုင်ရှင်ဖြစ်လျှင်...

သူ၏ပြိုင်ဘက်က မည်မျှအားကောင်းပါမည်နည်း။

'ရှေးဟောင်းမြင့်မြတ်ခန္ဓာ မျိုးရိုးမှာ ဒီလောက်တောင် ကြောက်စရာကောင်းတဲ့ ရန်သူရှိတာလား။ မြင့်မြတ်ခန္ဓာရဲ့ ရန်သူကို ဖယ်ရှားပြီးပြီလား'

ကျွင်းရှောင်ယောက်က တွေးလိုက်၏။

ရှေးဟောင်းမြင့်မြတ်ခန္ဓာ၏ ရန်သူက အသျှင်ခန္ဓာမျိုးရိုး မဖြစ်နိုင်ဟုတော့ သူခံစားရသည်။

အသျှင်ခန္ဓာက သန်မာသော်လည်း မြင့်မြတ်ခန္ဓာမျိုးရိုးနှင့် ဤမျှကြီးမားသောစစ်ပွဲကို ဆင်နွှဲရန် အကြောင်းမရှိပေ။

သက်ရှည်ကျွမ်း၊ အမှောင်ကမ္ဘာ၊ မြင့်မြတ်ခန္ဓာရဲ့ကျိန်စာ၊ မိစ္ဆာသွေးပုံရိပ်ယောင်နယ်မြေမှ ထင်ဟပ်နေတဲ့ စစ်ပွဲ။

ဒါတွေအားလုံးဟာ လျှို့ဝှက်စွာ ချိတ်ဆက်ထားသော ကွန်ရက်တစ်ခုကဲ့သို့ပင်။

ဤ‌အခြေအနေအားလုံးတွင် ကြောက်စရာကောင်းသော လျှို့ဝှက်ချက်တစ်ခု ရှိသင့်သည်ဟု သူခံစားရသည်။

ကျွင်းရှောင်ယောက်က အဓိက သဲလွန်စတွေကို ရှာမတွေ့သေးဘဲ ဆက်စပ်မှုများကို မဖော်ထုတ်နိုင်သေးရုံသာ။

ကျွင်းရှောင်ယောက်က စဉ်းစားနေချိန်တွင်...

စနစ်၏ စက်ရုပ်ဆန်ဆန်အသံက သူ့စိတ်ထဲတွင် မြည်လာသည်။

"ဒင်၊ လက်မှတ်ထိုးဝင်မဲ့နေရာ... ရွှီထျန်းလောကကို ရောက်ပါပြီ။ လက်မှတ်ထိုးဝင်ချင်ပါသလား"

"ဝင်ရောက်မယ်"

"ဒင်... ဂုဏ်ယူပါတယ် ပိုင်ရှင်၊ ကြယ်ရှစ်ပွင့်ဆုလာဘ်... ကမ္ဘာကြီးကို ကာကွယ်သူရဲ့ နှလုံးသားကို ရရှိခဲ့ပြီ"

"ကမ္ဘာကြီးကို ကာကွယ်သူရဲ့ နှလုံးသားလား"

ကျွင်းရှောင်ယောက်က စိတ်ရှုပ်ထွေးသွားသည်။ ထို့နောက် ကာကွယ်သူ၏နှလုံးသား အလုပ်လုပ်ပုံကို စစ်ဆေးကြည့်လိုက်၏။

ထိုအခါ ကာကွယ်သူ၏ နှလုံးသားက အလွန်အစွမ်းထက်သော နည်းလမ်းတစ်ခုဖြစ်ကြောင်း တွေ့လိုက်ရသည်။

ကမ္ဘာကြီးကို ကာကွယ်စောင့်ရှောက်လိုသော ကရုဏာစိတ်ရှိသရွေ့ ဤနှလုံးသားကို ပေါင်းစည်းနိုင်သည်။ ၎င်းက ဧကရာဇ်တစ်ပိုင်းနယ်ပယ်အောက်မှ မည်သည့်အဆင့်ကိုမဆို တိုက်ရိုက် ဖြတ်ကျော်စေနိုင်ပေသည်။

"ဘယ်အဆင့်ကိုမဆို အဆင့်တစ်ခု ဖြတ်ကျော်နိုင်ပြီး ခန္ဓာကိုယ်ကိုလည်း ဆက်လက်တိုးတက်စေနိုင်တာလား"

ကျွင်းရှောင်ယောက် အံ့ဩသွားသည်။ ဤသည်က အလွန်ကောင်းမွန်သော လက်မှတ်ထိုးဝင်ခြင်းဆုလာဘ် ဖြစ်၏။ ၎င်းက ကြယ်ရှစ်ပွင့်အထိ ရောက်ရှိနိုင်သည်မှာ အံ့သြဖွယ်မရှိတော့ပေ။

ဧကရာဇ်တစ်ပိုင်းအထက်တွင် ကန့်သတ်ချက်တချို့ ရှိသည်။

သို့ရာတွင်၊ ပျက်စီးခြင်းတာအိုသခင်မှ ၎င်းကိုသန့်စင်ပါက ဧကရာဇ်တစ်ပိုင်းအဖြစ်သို့ တိုက်ရိုက် ချိုးဖျက်နိုင်လိမ့်မည်။

ယင်းက တကယ်ကို မယုံနိုင်စရာပင်။ ဤသတင်းသာ ပျံ့နှံ့သွားပါက ပျက်စီးခြင်းတာအိုသခင်များ ဘယ်လောက်တောင် အုတ်အော်သောင်းတင်းဖြစ်ကုန်မလဲ မသိနိုင်ပေ။

သို့ရာတွင်... ကျွင်းရှောင်ယောက်ကတော့ သိပ်ပြီး စိတ်မဝင်စားပါ။

အကြောင်းမှာ၊ ဧကရာဇ်တစ်ပိုင်းကို ဖြတ်ကျော်ရန်က သူ့အတွက် တကယ်မခက်သောကြောင့်ပင်။

ကာကွယ်သူ၏နှလုံးသားနှင့် ပေါင်းစည်းရန်၊ လူတစ်ဦးက ကြီးမားသော ကရုဏာနှင့် ကမ္ဘာကြီးကို ကယ်တင်ခြင်းဆိုင်ရာ စိတ်ထားရှိရန် လိုအပ်သည်။

ကျွင်းရှောင်ယောက်ကတော့ တစ်ချက်မှ မညီပေ။

သူက သူ၏ဆွေမျိုးများ၊ မိသားစု၊ သူငယ်ချင်းများနှင့် ချစ်ရသူများကို ကာကွယ်လိုစိတ်သာ ရှိသည်။

ကမ္ဘာကြီးကို ကယ်တင်ရန်တော့... သူ စိတ်မဝင်စား‌ပေ။

ယခုအခါ သူက အင်မော်တယ်နယ်မြေကြီးတွင် လူတိုင်းလေးစားရသော သူရဲကောင်းတစ်ဦး ဖြစ်လာခြင်းမှာလည်း တိုက်ဆိုင်မှုတစ်ခုသာ ဖြစ်သည်။

သူက အန်တီဟီးရိုးနှင့် ပိုတူသည်။

ကျွင်းရှောင်ယောက်၏ ဖခင် ကျွင်းဝူဟွေ့ကတော့ အတော်လေး သင့်တော်သည်။

သူက တကယ့်သူရဲကောင်း ဖြစ်၏။

သို့သော်လည်း ကျွင်းဝူဟွေ့တွင် ကိုယ်ပိုင်လမ်းစဉ် ရှိသည်။

ဤကာကွယ်သူ၏ နှလုံးသားကို မလိုအပ်ပေ။

"ဟုတ်ပြီ"

ကျွင်းရှောင်ယောက်၏ မျက်လုံးများက တောက်ပလာသည်။

ကမ္ဘာကြီးကို ကာကွယ်ရန် အသင့်တော်ဆုံးသူ...

တစ်စုံတစ်ယောက်ကို သူတွေးမိပြီ။