အခန်း ၁၁၈၆

အခန်း ( ၁၁၈၆ ) ဇနီးသည်ကို ကာကွယ်နေတာလား။

အင်မော်တယ်ခုံရုံးဘက်တွင် ကူတိကျစ်က ပြပွဲကောင်းကို ကြည့်နေပုံရသည်။

ယခင်က သူသည် အဆုံးစွန်ရှေးဟောင်းလမ်းအပြင် ရှန်းရွှီကမ္ဘာတွင်လည်း ကျွင်းရှောင်ယောက်နှင့် ဆက်ဆံရန် နည်းလမ်းတိုင်းကို ကြိုးစားခဲ့သည်။

သို့သော်လည်း အဆုံးမှာတော့ မအောင်မြင်ခဲ့ကြပေ။

ဆန့်ကျင်ဘက်အနေဖြင့် ကျွင်းရှောင်ယောက်၏ လှည့်စားခြင်းကို ခံခဲ့ရသည်။

ယခုတော့ တိဟောက်ထျန်းနှင့် ရင်ဆိုင်တော့မည်မို့ ကျွင်းရှောင်ယောက်ကို ဤမျှ တည်ငြိမ်နိုင်ဦးမည်ဟု သူ မယုံကြည်ပါ။

တစ်ဖက်မှာတော့ လင်ယွမ်မှာ ခံစားချက်များ ရှုပ်ထွေးနေသည်။

တိဟောက်ထျန်း မွေးဖွားလာပြီးနောက် သူ့ကို ရှေးဧကရာဇ်ငယ်ဟု ခေါ်ခဲ့သည်။

သို့ဆိုလျှင် လက်ရှိ ခေတ်ပြိုင်ဧကရာဇ်ငယ်ဖြစ်သော သူမက မည်သို့ဖြစ်မည်နည်း။

လင်ယွမ်က အလွန်သန်မာသည်။ သူသည် ဝါဟွမ်အင်မော်တယ်မျိုးရိုးမှ အဓိက ပျိုးထောင်ပေးထားသော ပါရမီရှင် ဖြစ်၏။

သို့သော်လည်း အင်မော်တယ်ခုံရုံးတွင် သူမ၏ အနေအထားက တိဟောက်ထျန်းလောက် မမြင့်မားပေ။

ထိုမျှသာမကဘဲ တိဟောက်ထျန်း၏ လွှမ်းမိုးနိုင်စွမ်းကလည်း အနည်းငယ် ပိုသာသည်။

ယခုဆိုလျှင် တိဟောက်ထျန်းနှင့် ကျွင်းရှောင်ယောက်က ထိပ်တိုက်တွေ့နေပြီ။ သို့သော်လည်း သူမ၏ အထောက်အထားဖြင့် ဝင်ပါရန်မှာ အခက်အခဲရှိနေသည်။ ယင်းက သူမအတွက် အဆင်မပြေသော အခြေအနေပင်။

"ကျွင်းရှောင်ယောက်၊ မင်းက ငါ့ရဲ့မျှော်လင့်ချက်ကို ကျော်လွန်သွားပြီလို့ ပြောရမယ်"

တိဟောက်ထျန်းက ပြောလိုက်သည်။

ကျွင်းရှောင်ယောက်က အခွင့်အလမ်းများကို ရယူသွားသော်လည်း တိဟောက်ထျန်းက‌ ဂရုမစိုက်သေးပေ။

အခွင့်အလမ်းများစွာကို သူသိထားသည်။ ရွှီထျန်းလောကမှာ ၎င်းတို့ထဲမှ တစ်ခုမျှသာ ဖြစ်ချေသည်။

"တိဟောက်ထျန်း၊ မင်းက ငါ့ရှေ့မှာ ဖုန်ထနိုင်ဖို့ အရည်အချင်းမရှိဘူး"

ကျွင်းရှောင်ယောက်က တည်ငြိမ်စွာ ပြောလိုက်သည်။

တိဟောက်ထျန်းက ယခင် ရန်ဘက်များနှင့် အနည်းငယ် ကွာခြားသည်။

သူသည် အနည်းငယ်ပိုအားကောင်းသလို ပိုလည်းထူးခြား၏။

သို့သော်လည်း ကျွင်းရှောင်ယောက်က ဂရုမစိုက်သေးပါ။

ထိုမျှသာမကဘဲ သူသည် ဤတစ်ကြိမ်မှာ အကျိုးအမြတ်များစွာ ရခဲ့သည်။ အင်မော်တယ်အကယ်ဒမီသို့ ပြန်သွားပြီး တိတ်တဆိတ် လေ့ကျင့်လိုက်ပါက သူ၏ခွန်အားများ တစ်ဖန်တိုးတက်လာလိမ့်မည်။

အချိန်တန်သောအခါ၊ တိဟောက်ထျန်းတွင် သူနှင့် ယှဉ်ပြိုင်နိုင်မည့်စွမ်းရည် ရှိမရှိကို သူကြည့်ချင်သည်။

"ငါက အရည်အချင်းမရှိဘူးလား"

တိဟောက်ထျန်းက လျစ်လျူရှုစွာ ပြောလိုက်သည်။

ထို့နောက် လက်ဝါးရိုက်ချက် ထုတ်ဖော်လိုက်၏။

နဂါးဟိန်းသံ ထွက်ပေါ်လာပြီး ကောင်းကင်က တုန်ခါသွားတော့သည်။

ကောင်းကင်နဂါး ရှစ်ဆယ်တစ်ကောင်က ဟိန်းဟောက်ပြီး ပြေးထွက်လာတော့သည်။

ကောင်းကင်နဂါးတစ်ကောင်စီက ရွှေနှင့်ဖြင့်ပြုလုပ်ထားပုံရပြီး မီတာတစ်သောင်း ရှည်လျားသည်။

အမြီးကို လွှဲလိုက်ရုံဖြင့် ကြယ်များကို ကွဲအက်သွားစေနိုင်ပေသည်။

"ဒါက နဂါးမျိုးနွယ်ရဲ့ အစွမ်းထက်နည်းလမ်းတစ်ခုပဲ"

အင်မော်တယ်အကယ်ဒမီမှ တပည့်အချို့က ၎င်းကို သိရှိကာ ပြောဆိုလိုက်ကြသည်။

၎င်းက နဂါးမျိုးနွယ်၏ ရှေးကျသော နည်းလမ်းတစ်ခုဖြစ်သော်လည်း နောက်ပိုင်းတွင် ပျောက်ဆုံးသွားခဲ့ပေသည်။

ယခုတော့ တိဟောက်ထျန်း၏လက်မှာ ပြန်ပေါ်လာခဲ့ပြီ ဖြစ်သည်။

သို့သော်လည်း တိဟောက်ထျန်းက ဤခေတ်မှ ပါရမီရှင်မဟုတ်ဘူးဟု တွေးမိသောအခါ သူ ဤနည်းလမ်းကို ထုတ်ဖော်နိုင်ခြင်းမှာ သဘာဝကျပေသည်။

ကျွင်းရှောင်ယောက်ခန္ဓာကိုယ်က တုန်ခါသွားသည်။ ကစဉ့်ကလျားစွမ်းအင်များ‌ ပေါက်ကွဲထွက်လာ၏။

ကစဉ့်ကလျား လက်ဝါးကြီး ထွက်ပေါ်လာပြီး ကောင်းကင်နဂါးများကို ရိုက်ချလိုက်တော့သည်။

ကစဉ့်ကလျားစွမ်းအင်နှင့် နဂါးစွမ်းအင်များ ထွက်ပေါ်လာပြီး ကမ္ဘာကြီးကို တုန်လှုပ်စေခဲ့သည်။

ကျွင်းရှောင်ယောက်၏ စိတ်ထဲတွင် အနည်းငယ် အံ့ဩသွားသည်။ ဤတိဟောက်ထျန်းက တကယ်ကို တစ်ခုခုပင်။

ယခင်က ရွှီထျန်းလောကတွင် မဟာဗြမ္မာကောင်းကင်သံစဉ်ဟုခေါ်သော ဗုဒ္ဓကျင့်စဉ်တစ်မျိုးကို အသုံးပြုခဲ့သည်။

ယခုလည်း နဂါးမျိုးနွယ်၏ နည်းလမ်းကို ထပ်မံအသုံးပြုနေပြီ။

ဤတိဟောက်ထျန်းက နည်းမျိုးစုံကို တတ်မြောက်နေသူဟုပင် သူ ခံစားရသည်။

ကစဉ့်ကလျား လက်ဝါးကြီးက ကောင်းကင်နဂါးများကို ဖမ်းဆုပ်လိုက်သည်။

ထိပ်တိုက်တွေ့ဆုံမှုမှ ပြင်းထန်သော စွမ်းအင်လှိုင်းများ ဖြာထွက်လာ၏။

ယင်းက လူများစွာကို တုန်လှုပ်စေခဲ့သည်။

ဒါက တကယ်ကို သူတို့နဲ့ မျိုးဆက်တူသူတွေလား။

"တော်လောက်ပြီ၊ နှစ်ယောက်စလုံး ရပ်လိုက်ကြပါ"

အကြီးအကဲရွှီမော့က ရပ်မကြည့်နိုင်တော့ဘဲ တားဆီးရန် ရှေ့ကိုလှမ်းလိုက်သည်။

အမှန်အတိုင်းပြောရလျှင် သူ အကြပ်ရိုက်သလို ခံစားမိ၏။

ဤလူနှစ်ယောက်တွင် မည်သူ့ကိုမျှ သူ မစော်ကားနိုင်ပါ။

ကျွင်းရှောင်ယောက်က ရပ်လိုက်သည်။ တိဟောက်ထျန်းမှာလည်း အလားတူပင် ဖြစ်၏။

အကြီးအကဲရွှီမော့က တည်ကြည်သော လေသံဖြင့် ပြောလိုက်သည်။

"အခုအခါ စန်းမျိုးနွယ်နဲ့ ကောင်းကင်ကိုးခု တားမြစ်မိသားစုတွေ ပေါ်လာပြီဆိုတာကို အားလုံး မြင်တွေ့ခဲ့ရပြီ"

"အင်မော်တယ်နယ်မြေကြီးက အနာဂတ်မှာ ငြိမ်းချမ်းတော့မှာမဟုတ်ဘူး"

"မင်းတို့အားလုံးက အင်မော်တယ်နယ်မြေကြီးရဲ့ မဏ္ဍိုင်တွေဖြစ်တာကြောင့် အတွင်းပိုင်းပွတ်တိုက်မှုတွေ မဖြစ်သင့်ဘူး"

"ကျုပ်က စိတ်မဝင်စားဘူး"

ကျွင်းရှောင်ယောက်က လျစ်လျူရှုစွာ ပြောလိုက်သည်။

တိဟောက်ထျန်းက ကျွင်းရှောင်ယောက်ကို လေးလေးနက်နက် ကြည့်လိုက်၏။

ပြန်လည်ဝင်စားခြင်း လမ်းကြောင်းခြောက်သွယ် အင်မော်တယ်အမြစ်က ကျွင်းရှောင်ယောက်၏လက်သို့ ကျရောက်သင့်သည်ဟု သူခံစားမိသည်။

ရှောင်ချမ်ရွယ်ကလည်း တိဟောက်ထျန်း၏ သိလိုစိတ်ကို နှိုးဆွနိုင်ပေသည်။

'ကိစ္စမရှိပါဘူးလေ၊ နောက်ဆုံးမှာတော့ ငါ့ဟာက ငါ့ဟာပဲဖြစ်လိမ့်မယ်'

တိဟောက်ထျန်းက သူ့စိတ်ထဲမှ တွေးလိုက်သည်။

အနာဂတ်တွင်၊ သူဆုံးရှုံးခဲ့သမျှ ပြန်ရမည်ဟု ယုံကြည်မှုရှိပေသည်။

ထို့နောက်တွင် တိဟောက်ထျန်းက လင်ယွမ်ကို လှည့်ကြည့်လိုက်သည်။

ဤလူနှစ်ဦးတွင် တစ်ဦးက ခေတ်ပြိုင်ဧကရာဇ်ငယ်ဖြစ်ပြီး ကျန်တစ်ဦးက ရှေးဧကရာဇ်ငယ် ဖြစ်၏။

လေထုက ရုတ်တရက် ပြောင်းလဲလာပြန်သည်။

တိဟောက်ထျန်းက အပြောင်းအလဲမရှိ‌သော အမူအရာဖြင့် ပြောလိုက်သည်။

"လင်ယွမ်၊ အင်မော်တယ်ခုံရုံးရဲ့ ခေတ်ပြိုင် ဧကရာဇ်ငယ်အနေနဲ့ မင်းရဲ့ အထောက်အထားကိုသိပြီး အပြုအမူတွေကို ဂရုစိုက်ပါ"

"ငါ့နောက်လိုက်တွေရဲ့ လုပ်ရပ်က နည်းနည်း လွဲမှားခဲ့တယ်။ ဒါပေမဲ့... အတိုင်းအတာတစ်ခုထိပဲ ဖြစ်သင့်တယ်"

"အနာဂတ်မှာ စည်းမျဉ်းနဲ့ သိက္ခာကို မင်းနားလည်လိမ့်မယ်လို့ ငါမျှော်လင့်တယ်"

သူက လင်ယွမ်နှင့် ကျွင်းရှောင်ယောက်ကြားမှ ဆက်ဆံရေးကို ရည်ညွှန်းပြောဆိုနေခြင်း ဖြစ်၏။ ယင်းက သူမ၏ နောက်ခံ၊ ရပ်တည်မှုနှင့် ဆန့်ကျင်ဘက် ဖြစ်သည်။

လင်ယွမ်၏ မျက်နှာက အနည်းငယ် အေးစက်သွားသည်။

တိဟောက်ထျန်းက ရှေးဧကရာဇ်ငယ်ဖြစ်သော်လည်း သူမကို ဤလေသံဖြင့် ပြောဆိုရန် အခွင့်အရေးမရှိပေ။

ထို့ပြင်၊ သူမကလည်း ခေတ်ပြိုင်ဧကရာဇ်ငယ်တစ်ဦး ဖြစ်သည်။

သို့သော်လည်း ယခုတော့ တိဟောက်ထျန်းသည် အကြီးမှ အငယ်တစ်ယောက်ကို ဆုံးမနေသကဲ့သို့ပင်။

သို့ရာတွင် တိဟောက်ထျန်းက လင်ယွမ်၏ အမူအရာပြောင်းလဲမှုကို ဂရုမစိုက်ပါ။

လင်ယွမ်က အနာဂတ်တွင် အလွန်အရေးကြီးသောအခန်းကဏ္ဍမှ ပါဝင်လာမည်ဖြစ်မှန်း သူ သိသည်။

၎င်းက‌ ရှေးခေတ်အင်မော်တယ်ခုံရုံး၏ အရေးကြီးသော ပုဂ္ဂိုလ်တစ်ဦးနှင့် ပတ်သက်မှုရှိ၏။

ထို့ကြောင့် လင်ယွမ်ကို ကျွင်းရှောင်ယောက်နှင့် ပတ်သက်မခံနိုင်ပေ။

မဟုတ်လျှင်၊ သူ့အစီအစဉ်ကို ထိခိုက်လာနိုင်သည်။

ထိုအချိန်တွင် ကျွင်းရှောင်ယောက်က ရှေ့သို့တိုးလာသည်။

"တိဟောက်ထျန်း၊ မင်းရဲ့လူတွေကို ငါသတ်ခဲ့တာ... မင်းက တစ်ယောက်ယောက်ကို ပစ်မှတ်ထားချင်ရင် ငါ့ကိုပဲ ပစ်မှတ်ထားရမယ်"

"အချင်းချင်း ရန်စမီးပွားတွေ ဖြစ်စေတာက အင်မော်တယ်ခုံရုံးရဲ့ အစဉ်အလာပဲလား"

ကျွင်းရှောင်ယောက်၏ စကားများက လူများစွာကို အမူအရာပြောင်းစေခဲ့သည်။

သူတို့က ကျွင်းရှောင်ယောက်ကိုတစ်လှည့်... လင်ယွမ်ကိုတစ်လှည့် ကြည့်လိုက်ကြ၏။

ဒါက... သူ့ဇနီးသည်ကို ကာကွယ်ပေးနေတာလား။

ယခင်ကတည်းက သူတို့နှစ်ယောက်၏ ဆက်ဆံရေးဟာ မရှင်းမလင်း ဖြစ်ခဲ့သည်။

ယခု‌ဆိုလျှင်၊ ကျွင်းရှောင်ယောက်က လင်ယွမ်အတွက် ရပ်တည်ပေးနေပြီ။

ကျွင်းမိသားစု၏ နတ်ဘုရားသားတော်က အင်မော်တယ်ခုံရုံးမှ ဧကရာဇ်ငယ်ကို ကာကွယ်ပေးနေသည်မှာ စိတ်ကူးကြည့်ရန် ခက်ခဲသည်။

လင်ယွမ်လည်း အံ့ဩသွားသည်။ ကျွင်းရှောင်ယောက်ကို သူ့အတွက် စကားပြောလိမ့်မည်ဟု မထင်ခဲ့ပေ။

ယင်းက ဖော်ပြ၍မရနိုင်သော စိတ်ရှုပ်ထွေးမှုနှင့် ပျော်ရွှင်မှုတို့ကို လင်ယွမ်အား ခံစားရစေသည်။

ပျော်ရွှင်ခြင်းမှာ ကျွင်းရှောင်ယောက်၏ ကာကွယ်ပေးမှုကြောင့် ဖြစ်သည်။

စိတ်ရှုပ်ထွေးခဲ့ခြင်းကတော့... ကျွင်းရှောင်ယောက်၏ လှုပ်ရှားမှုကြောင့် တိဟောက်ထျန်းနှင့် သူမတို့ကြားမှ ပဋိပက္ခကို ပိုနက်ရှိုင်းစေခဲ့သောကြောင့်ပင်။

အမှန်လည်း ဤသည်မှာ ကျွင်းရှောင်ယောက်က ရည်ရွယ်ချက်ရှိရှိ လုပ်ခဲ့ခြင်း ဖြစ်သည်။

သို့ရာတွင်၊ သူက လင်ယွမ်နှင့် တိဟောက်ထျန်းကို မရည်ရွယ်ပါ။

ထိုအစား ဝါဟွမ်အင်မော်တယ်မျိုးရိုးနှင့် ဖူရှီအင်မော်တယ်မျိုးရိုးတို့ကြားမှ ပဋိပက္ခကို နှိုးဆွပေးလိုသည်။

ယနေ့ခေတ်တွင် ဤအင်မော်တယ်မျိုးရိုးနှစ်ခုက အင်မော်တယ်ခုံရုံး၏ အမြင့်ဆုံးတည်ရှိမှုနှစ်ခု ဖြစ်သည်။

အကယ်၍၊ ဤအင်မော်တယ်မျိုးရိုးနှစ်ခုက ဆန့်ကျင်ဘက်ဖြစ်နေလျှင် အင်မော်တယ်ခုံရုံးအတွက် ပြင်းထန်သော ထိုးနှက်ချက်တစ်ခု ဖြစ်လာမည်မှာ သေချာလှပေသည်။

'ဒီကျွင်းရှောင်ယောက်က မျှော်လင့်ထားတဲ့အတိုင်းပဲ'

တိဟောက်ထျန်း၏ မျက်လုံးထဲတွင် ထူးဆန်းသော အရိပ်အယောင်တို့ ပေါ်လာသည်။

ကျွင်းရှောင်ယောက်က အရည်အချင်းနှင့် ခွန်အားသာရှိသော ပါရမီရှင်တစ်ဦးထက်ပိုကြောင်း သူ နားလည်ခဲ့ပြီ။

သူ၏ အကြံအစည်ကလည်း နက်နဲသည်။

၎င်းက သူနှင့် လင်ယွမ်တို့ကြားမှ ရန်စမီးကို မွှေးပေးနေကြောင်း ထင်ရှားလှပေသည်။

"ဒါက ငါတို့ အင်မော်တယ်ခုံရုံးရဲ့ ကိုယ်ပိုင်ကိစ္စပါ။ အပြင်လူတွေက ဝင်စွတ်ဖက်စရာမလိုဘူး"

"ကျွင်းရှောင်ယောက်၊ ငါ မင်းနဲ့ တရားဝင်တွေ့ဆုံမဲ့နေ့ကို စောင့်နေမယ်"

တိဟောက်ထျန်းက ပြောလိုက်သည်။ ထို့နောက်မှာတော့ သူ့ခန္ဓာကိုယ်က ရွှေရောင်အလင်းတန်းများအဖြစ်သို့ ပြောင်းလဲကာ ပျောက်ကွယ်သွားတော့သည်။

"ဒါ...ဒါက ဓမ္မခန္ဓာပဲလား"

ဤမြင်ကွင်းကိုမြင်တော့ လူများစွာတို့ အံ့ဩသွားကြသည်။

ယခုလေးတင် တိဟောက်ထျန်းက ကျွင်းရှောင်ယောက်နှင့် ရိုးရှင်းသော ဖလှယ်မှုများ ပြုလုပ်ခဲ့ကြသေးသည်။

သို့သော်လည်း ထိုအင်အားက အလွန်အစွမ်းထက်သောကြောင့် လက်ရှိ ပါရမီရှင် အများစုကို နောက်ဆုတ်စေခဲ့သည်။

ယခုတော့ ၎င်းက ဓမ္မခန္ဓာတစ်ခုမျှသာ ဖြစ်နေပြီ။

တိဟောက်ထျန်း၏ မူလခန္ဓာက လေ့ကျင့်မှုကနေ ထွက်မလာသေးပေ။

လူများစွာတို့ တုန်လှုပ်ပြီး တိတ်ဆိတ်သွားကြသည်။

သူတို့က တိဟောက်ထျန်း၏ ဓမ္မခန္ဓာနှင့်ပင် မနှိုင်းယှဉ်နိုင်ပေ။

ဟုတ်သည်၊ မထီမဲ့မြင်ပြုသူများလည်း ရှိသေးသည်။ သူတို့အားလုံးက ကျွင်းရှောင်ယောက်၏ဘက်မှာ ရှိနေကြသူများ ဖြစ်သည်။

"ဓမ္မခန္ဓာနဲ့ အင်အားပြတာများ ဘာခက်လဲ၊ လူတိုင်းကို နတ်ဘုရားသားတော်လို့ ထင်လို့လား။ အဲဒီတုန်းက နတ်ဘုရားသားတော်ရဲ့ ဓမ္မခန္ဓာဆိုရင် အသျှင်ခန္ဓာနဲ့တောင် ကောင်းကောင်း ယှဉ်ခဲ့တယ်"

လူတစ်ယောက်က အေးစက်စက် ပြောလိုက်သည်။

လူအုပ်ထဲတွင် လုံယောက်၏မျက်နှာက မည်းခနဲ ဖြစ်သွား၏။

ဤသည်မှာ သူ့အတွက် အစပြန်မဖော်လိုသော အတိတ်ဟောင်းနှင့် အိပ်မက်ဆိုးတစ်ခု ဖြစ်သည်။

ကျွင်းရှောင်ယောက်၏ အမူအရာကတော့ အမှအဆုံးထိ မပြောင်း‌လဲပေ။

ဤအခြေအနေကို သူ သိပြီးသား ဖြစ်သည်။

"တိဟောက်ထျန်း၊ ငါ မင်းနဲ့ တရားဝင်တွေ့ဆုံဖို့ စောင့်နေတယ်"

ကျွင်းရှောင်ယောက်က အနည်းငယ် ပြုံးလိုက်သည်။

သူ့ကို စိတ်ဝင်စားစေနိုင်သော တည်ရှိမှုမျိုးက လွန်စွာ တွေ့ရခဲပေသည်။