အခန်း ၁၁၈၉

အခန်း ( ၁၁၈၉ ) အတွင်းစကြာဝဠာ၏ အသွင်ကူးပြောင်းမှု။

အင်မော်တယ်နယ်မြေကြီးတွင် အံ့ဖွယ်ခုနစ်ပါးရှိပြီး တစ်ခုချင်းစီက လျှို့ဝှက်ဆန်းကျယ်ကာ ထူးဆန်းသည်။

၎င်းတို့ကို သာမန် ကျင့်ကြံသူများက လုံးဝ မဝင်ရောက်ဝံ့ပေ။

ကျွင်းရှောင်ယောက်က အံ့ဖွယ်နှစ်ပါးကို ဝင်ရောက်ခဲ့ပြီး ကောင်းမွန်စွာ ပြန်ထွက်လာနိုင်ခဲ့သည့် တစ်ဦးတည်းသောသူ ဖြစ်သည်။

အံ့ဖွယ်ခုနစ်ပါးထဲတွင် မေ့ပျောက်ခြင်းတိုင်းပြည်က အထူးဆန်းဆုံးနှင့် အဆန်းကျယ်ဆုံး ဖြစ်ချေသည်။

ကောလဟာလများအရ မေ့ပျောက်ခြင်းတိုင်းပြည်မှာ တည်နေရာအတိအကျ မရှိဘဲ မည်သူမျှ ရှာမတွေ့နိုင်ပေ။

ယင်ဟော်နတ်ဆိုးကြယ် ပေါ်လာပြီးမှသာ သွေးအလင်းရောင် ထွန်းလင်းသည့်နေရာတွင် မေ့ပျောက်ခြင်းတိုင်းပြည် ပေါ်လာမည် ဖြစ်သည်။

ရှေးခေတ်က အင်မော်တယ်နယ်မြေကြီး၏ အကျော်အမော်များစွာတို့သည် မေ့ပျောက်ခြင်းတိုင်းပြည်ကို ဝင်ရောက်ခဲ့ကြသည်။

သို့ရာတွင်၊ လူအများစုက ဝင်ရောက်ပြီးနောက် ပြန်မထွက်လာကြတော့ပေ။

ရှေးခေတ်အင်မော်တယ်ခုံရုံး၏ အပျက်အယွင်းက မေ့ပျောက်ခြင်းတိုင်းပြည်တွင် ရှိနေသည်ဟုဆိုခြင်းမှာ ယုံကြည်ရန် ခက်သည်။

သို့သော်လည်း တွေးကြည့်ရလျှင်...

အန္တရာယ်အရှိဆုံးနေရာက အလုံခြုံဆုံးနေရာပင် မဟုတ်လော။

ရှေးခေတ်အင်မော်တယ်ခုံရုံး၏ အပျက်အယွင်းက ထိုနေရာတွင်ရှိလျှင် အပြင်လူများက ထိခိုက်နိုင်စေရန် ခက်သည်။

ထိုသတင်းထွက်လာပြီးနောက် အင်မော်တယ်ခုံရုံးက ချက်ချင်း လှုပ်ရှားခဲ့ကြသည်။

အင်မော်တယ်ခုံရုံးက ဟွင်းထျန်းအင်မော်တယ်နယ်မြေကြီးတစ်ခုလုံးကို ပိတ်ဆို့ထားရန် ကျွမ်းကျင်သူများနှင့် စစ်သည်များကို စေလွှတ်ခဲ့၏။ အခြား အင်မော်တယ်နယ်မြေကြီးမှ ကျင့်ကြံသူများကို ဝင်ရောက်ခွင့်မပြုတော့ပေ။

ယင်းက လူများစွာကို မပျော်မရွှင် ဖြစ်စေခဲ့သည်။

နောက်ဆုံးတွင်၊ ယင်းက ရှေးခေတ်အင်မော်တယ်ခုံရုံး၏ အပျက်အယွင်း ဖြစ်သည်။ ထိုနေရာတွင် အခွင့်အလမ်းများ ဘယ်လောက်ရှိမလဲဆိုတာကို ဘုရားမှသာ သိလိမ့်မည်။

၎င်းက ရှေးခေတ်အင်မော်တယ်ခုံရုံး၏ အဖိုးတန်ဆုံး ရတနာများ ပါဝင်သော ဘဏ္ဍာတိုက်တစ်ခုကဲ့သို့ ဖြစ်သည်။

ဤအဖြစ်အပျက်ကြောင့် ကောင်းကင်ကိုးခု အင်မော်တယ်နယ်မြေကြီးတစ်ခုလုံးက အချိန်အတိုင်းအတာတစ်ခုအထိ လှုပ်လှုပ်ရှားရှား ဖြစ်ခဲ့ရပေသည်။

ကျွင်းမိသားစု၏ တုံ့ပြန်မှုကိုလည်း လူအများက သိချင်နေကြသည်။

အဓိပဓိအင်မော်တယ်ခုံရုံးကို ရှေးခေတ်အင်မော်တယ်ခုံရုံး၏ အပျက်အယွင်းမှ အခွင့်အလမ်းများ ရရှိခွင့်ပြုလိုက်ပါက...

အဓိပဓိအင်မော်တယ်ခုံရုံး၏ အင်အားမှာ သိသိသာသာ တိုးတက်လာလိမ့်မည်။

ဒါက ကျွင်းမိသားစုအတွက် ကောင်းမွန်သောကိစ္စ မဟုတ်ပေ။

ယခုဆိုလျှင် ယင်ဟော်နတ်ဆိုးကြယ်က ပေါ်လာပြီမို့ မေ့ပျောက်ခြင်းတိုင်းပြည် မပေါ်လာမီ အချိန်အနည်းငယ်သာ လိုသည်။

ထို့ကြောင့် ကောင်းကင်ကိုးခု အင်မော်တယ်အကယ်ဒီမှာလည်း လှုပ်လှုပ်ရှားရှား ဖြစ်နေပေသည်။

အင်မော်တယ်ခုံရုံးက လင်ယွမ်နှင့် ကူတိကျစ်ကဲ့သို့ အင်မော်တယ်မျိုးရိုးကြီးကိုးခု၏ ပါရမီရှင်များကို ပြန်ခေါ်ခဲ့ကြသည်။

သူတို့က မေ့ပျောက်ခြင်းတိုင်းပြည်အတွက် ပြင်ဆင်နေပုံရပေသည်။

နောက်ဆုံးတွင် ဤသည်က အင်မော်တယ်ခုံရုံးအတွက် အရေးကြီးသော ကိစ္စရပ်တစ်ခု ဖြစ်သည်။

ကျွင်းရှောင်ယောက်ကတော့ တံခါးပိတ်လေ့ကျင့်နေသောကြောင့် ဤသတင်းများကို မသိသေးပေ။

အင်မော်တယ်အကယ်ဒမီ၏ နက်နဲရာအရပ်မှ ရှေးဟောင်း တောင်တစ်လုံးတွင်...

ထိုနေရာတွင် ဝိညာဉ်စွမ်းအင်ကြွယ်ဝပြီး မြူခိုးများလည်း ထူထပ်စွာ ပြည့်နေသည်။

ကျောက်စိမ်းမြက်များနှင့် ထူးဆန်းသော ပန်းပွင့်များလည်း တစ်နှစ်ပတ်လုံး ပွင့်လန်းလျက်ရှိ၏။

ဤသည်မှာ အင်မော်တယ်အကယ်ဒမီ၏ ထိပ်တန်း ကျင့်ကြံမှု ရတနာနယ်မြေ ဖြစ်သည်။

ယေဘူယျအားဖြင့်၊ ၎င်းက မဟာအကြီးအကဲနှင့် အခြားသူများအတွက် လေ့ကျင့်ရာနေရာ ဖြစ်သည်။

ယခုတော့ ကျွင်းရှောင်ယောက်ကို ပေးအပ်ထားခဲ့ပြီ။

ဤအခိုက်တွင်၊ ကျွင်းရှောင်ယောက်က ရှေးဟောင်းမြေ၏ အလယ်ဗဟိုတွင် တင်ပျဉ်ခွေထိုင်နေသည်။

သူက အဆင့်တက်ရန် ပြင်ဆင်နေ၏။

ဤတစ်ကြိမ်တွင် သူက အကျိုးအမြတ်များစွာ ရခဲ့သည်။

ကျွင်းရှောင်ယောက်က နောက်ထပ် အချိန်မဆွဲလိုတော့ပေ။

သူက မျိုးဆက်သုံးခု ကြေးခေါင်းတလားကို ထုတ်ယူလိုက်သည်။

၎င်းတွင် အန္တိမကပ်ဘေးကြီးကို သန့်စင်ပြီးနောက် ကျန်ရစ်ခဲ့သော နိယာမအပိုင်းအစများ ပါရှိလေ၏။

ဤနိယာမစွမ်းအင်များ၏ အကူအညီဖြင့် ကျွင်းရှောင်ယောက်က သူ၏ ကစဉ့်က‌လျား အင်မော်တယ်စွမ်းအင်ကို ကစဉ့်ကလျားနိယာမအဖြစ် တစ်ဖန် ပေါင်းစည်းခဲ့သည်။

"နောက်ပြီးတော့ ယုံကြည်ခြင်းစွမ်းအားလည်း ရှိသေးတယ်"

ရွှီထျန်းလောကတွင် ကျွင်းရှောင်ယောက်က အမှန်တရားသားတော်၏ ဝိညာဉ်ခန္ဓာကို ဝါးမျိုပြီး သန့်စင်ခဲ့သည်။

၎င်းက အမှန်တရားသားတော်၏ ဝိညာဉ်စွမ်းအင် တစ်စိတ်တစ်ပိုင်းမျှသာ ဖြစ်သော်လည်း...

ကျွင်းရှောင်ယောက်အတွက် အသုံးဝင်နေဆဲပင်။

၎င်းက ယုံကြည်ခြင်းလမ်းစဉ်ကို နက်နဲစွာ နားလည်သဘောပေါက်စေသည်။

ထို့ပြင်၊ ကျွင်းရှောင်ယောက်မှာ ယုံကြည်ခြင်း နတ်ဘုရားဒမ္မခန္ဓာ ရှိနေသေးသည် မဟုတ်လော။

ထို့ကြောင့် ကျွင်းရှောင်ယောက်က ယုံကြည်ခြင်းစွမ်းအားကို နက်နဲစွာ နားလည်သဘောပေါက်နိုင်သည်။

အချိန်တစ်ခုကြာ နားလည်ဆင်ခြင်ပြီးနောက်...

နောက်ဆုံးတွင် ကျွင်းရှောင်ယောက်က ယုံကြည်ခြင်းနိယာမကို ဖွဲ့စည်းနိုင်ခဲ့သည်။

ဤနိယာမက အလွန်တောက်ပသည်။ ၎င်းက သန်းနှင့်ချီသော သက်ရှိသတ္တဝါများမှ ရိုသေစွာ ရှိခိုးပူဇော်နေသကဲ့သို့ ဖြစ်၏။

အကြောင်းမှာ ကျွင်းရှောင်ယောက်က အန္တိမကပ်ဘေးကြီးကို သတ်ခဲ့သောကြောင့် ဖြစ်သည်။

ထို့ကြောင့်၊ ယနေ့တိုင်အောင် ကျွင်းရှောင်ယောက်၏ အတွင်းစကြာဝဠာထဲသို့ ယုံကြည်ခြင်း စွမ်းအားများ စီးဆင်းနေသေးသည်။

"ယုံကြည်ခြင်းနိယာမကို ဖွဲ့စည်းထားပြီးပြီ။ အခု အင်အားနိယာမအလှည့်..."

ကျွင်းရှောင်ယောက်က အင်အားနိယာမကို တစ်ဖန် နားလည်ဆင်ခြင်လိုက်သည်။

သူကိုယ်တိုင်က ရှေးဟောင်းမြင့်မြတ်ခန္ဓာဖြစ်ခြင်းကြောင့် အင်အားနိယာမကို နားလည်ရာတွင် အလွန်လျင်မြန်သည်။

ထို့ပြင်၊ သူက နတ်ဆိုးနတ်ဘုရားပုရွက်ဆိတ်မျိုးနွယ်၏ နတ်ဘုရားစွမ်းရည်ကိုလည်း လေ့ကျင့်ထားခဲ့သေးသည်။

အချိန်တစ်ခုကြာပြီးနောက်၊ ကျွင်းရှောင်ယောက်က အင်အားနိယာမကို ထပ်မံဖွဲ့စည်းနိုင်ခဲ့သည်။

"နောက်တစ်ခုက ယင်ယန် အသွင်ပြောင်းဖို့ပဲ"

တစ်ချိန်က သူသည် ရွှေကျီးကန်း ဒသမမင်းသားကို သတ်ခဲ့ပြီး မဟာနေမင်းအင်မော်တယ်ကျမ်း၏ အနှစ်သာရကို ရရှိခဲ့သည်။

ယွိချန်ကျွမ့်ထံမှ ထိုက်ယင်အင်မော်တယ်ကျမ်းကိုလည်း ရရှိထား၏။

မကြာမီ၊ ကျွင်းရှောင်ယန်က ယင်နှင့်ယန် နိယာမကို ဖွဲ့စည်းနိုင်ပြန်သည်။

ယခုအခါ ကျွင်းရှောင်ယောက်က နိယာမဆယ့်ခုနှစ်ခုကို ဖွဲ့စည်းထားပြီးပြီ။

ဤသည်မှာ အလွန်ကြောက်စရာကောင်းသော အရေအတွက် ဖြစ်သည်။

နိယာမကိုးခုဆိုလျှင်ပင် အစွန်းရောက်နယ်ပယ်ဟု ခေါ်နိုင်သည်။

သို့ဆိုလျှင်၊ နိယာမဆယ့်ခုနစ်ခုက မည်သို့သောအဓိပ္ပာယ်ဖြစ်သနည်း။

"မပြီးသေးဘူး"

ကျွင်းရှောင်ယောက်က ပြန်လည်ဝင်စားခြင်း လမ်းကြောင်းခြောက်သွယ် အင်မော်တယ်အမြစ်ကို ထုတ်ယူလိုက်သည်။

ဤအရာသည် ကမ္ဘာ့သစ်ပင်ထက် များစွာမနိမ့်ကျသော ရတနာတစ်ပါး ဖြစ်၏။ ၎င်းက ကျွင်းရှောင်ယောက်၏ အတွင်းစကြာဝဠာတွင်လည်း မရှိမဖြစ်လိုအပ်သော အရာလည်းဖြစ်သည်။

ကျွင်းရှောင်ယောက်က ပြန်လည်ဝင်စားခြင်း လမ်းကြောင်းခြောက်သွယ် အင်မော်တယ်အမြစ်ကို အတွင်းစကြာဝဠာသို့ ထည့်သွင်းလိုက်သည်။

ရုတ်တရက်... တည်ငြိမ်သော ရေကန်အတွင်းကို ကျောက်တုံးတစ်တုံး ကျသွားသောအခါ လှိုင်းထလာသကဲ့သို့ အတွင်းစကြာဝဠာက လှုပ်ရှားလာသည်။

ပြန်လည်ဝင်စားခြင်း လမ်းကြောင်းခြောက်သွယ် အင်မော်တယ်အမြစ်ဖြင့် သက်ရှိအားလုံးက ပြန်လည်ဝင်စားနိုင်ချေပြီ။

"ဝုန်း"

ခဏချင်းမှာပင်၊ အတွင်းစကြာဝဠာအတွင်း၌ ပြန်လည်ဝင်စားခြင်း လမ်းစဉ်ခြောက်သွယ်ဖြင့် အငွေ့အသက်များ မြင့်တက်လာခဲ့သည်။

"ငါ့ရဲ့ အတွင်းစကြာဝဠာက ကမ္ဘာငယ်အဆင့်ကို ရောက်သွားပြီ"

ကျွင်းရှောင်ယောက်၏ အမူအရာက ပြောင်းလဲသွားပြီးနောက် ပျော်ရွှင်မှု‌တို့ ပေါ်လာခဲ့သည်။

အတွင်းစကြာဝဠာအဆင့်သည် ဖုန်မှုန့်ကမ္ဘာမှ စတင်သည်။

ထို့နောက် ကမ္ဘာငယ်၊ အလယ်လတ်ကမ္ဘာ၊ မဟာကမ္ဘာ၊ စကြာဝဠာ တစ်ခု၊ အနန္တစကြာဝဠာအထိ အဆင့်ဆင့် ရှိ၏။

ယခင်က ကျွင်းရှောင်ယောက်၏ အတွင်းစကြာဝဠာဟာ ဖုန်မှုန့်ကမ္ဘာအဆင့်တွင် အမြဲရှိခဲ့သည်။

ယခုတော့ ကမ္ဘာသစ်ပင်နှင့် ပြန်လည်ဝင်စားခြင်း လမ်းကြောင်းခြောက်သွယ် အင်မော်တယ်အမြစ်ကို ပေါင်းထပ်လိုက်ပြီးနောက်...

ကျွင်းရှောင်ယောက်၏ အတွင်းစကြာဝဠာသည် ကမ္ဘာငယ်အဆင့်သို့ ရောက်ရှိသွားခဲ့ပြီ ဖြစ်သည်။

သူ၏ အတွင်းစကြာဝဠာတစ်ခုလုံးက တုန်ခါပြီး လျင်မြန်စွာ ကျယ်ပြန့်လာသည်။

အတွင်းစကြာဝဠာ၏ အသွင်ကူးပြောင်းမှုနှင့်အတူ...

ကျွင်းရှောင်ယောက်၏ ကမ္ဘာနိယာမအပေါ် နားလည်သဘောပေါက်မှုမှာ ပို၍ နက်နဲလာသည်။

နောက်ဆုံးမှာတော့ ကမ္ဘာအင်မော်တယ်စွမ်းအင်က ကမ္ဘာနိယာမအဖြစ်သို့ ပြောင်းလဲသွားပြန်တော့သည်။