အခန်း ၁၁၉၀

အခန်း ( ၁၁၉၀ ) ကောင်းကင်အဓိပဓိငယ် ကြီးမားသောပြီးပြည့်စုံခြင်း အဆင့်။

ယခုအခါ ကျွင်းရှောင်ယောက်က စုစုပေါင်း နိယာမဆယ့်ရှစ်ခုကို ဖွဲ့စည်းထားပြီးပြီ ဖြစ်သည်။

ခန္ဓာနိယာမ၊ အရာအားလုံး၏မိခင်ချီနိယာမ၊ ပြန်လည်ဝင်စားခြင်း နိယာမ၊ ဟင်းလင်းပြင် နိယာမ၊ အပြစ်သား နိယာမ၊ နတ်ဘုရား နိယာမ၊ ဝါးမျိုခြင်း နိယာမ၊ မဟာစွမ်းအား နိယာမ၊ သေခြင်းရှင်ခြင်း နိယာမ...

ဖန်ဆင်းခြင်း နိယာမ၊ ကမ္ဘာ နိယာမ၊ သံလိုက်ဓာတ်ချီနိယာမ၊ ကစဉ့်ကလျား နိယာမ၊ ရှေးဦးဝိညာဉ် နိယာမ၊ ဓားနိယာမ၊ အင်အား နိယာမ၊ ယုံကြည်ခြင်း နိယာမ၊ ယင်နှင့်ယန် နိယာမ...

ဒါက တကယ်ကို ကြောက်စရာကောင်းသော အရေအတွက်တစ်ခုပင်။

နိယာမကိုးပါးက အဆုံးစွန်ဖြစ်သည်။ ရလဒ်အနေဖြင့် ကျွင်းရှောင်ယောက်က နှစ်ဆပိုများနေခဲ့ပြီ။

ဒါက လူသားများ လုပ်‌ဆောင်နိုင်သောအရာ မဟုတ်တော့ပေ။

ကျွင်းရှောင်ယောက်က တကယ်ကို ထာဝရကွဲလွဲသူတစ်ဦး ဖြစ်သည်။

"အဆင့်တက်ဖို့ အချိန်တန်ပြီ"

ကျွင်းရှောင်ယောက်က ကျေနပ်စွာ ခေါင်းညိတ်လိုက်သည်။

ယခင်က သူ၏ ကိုယ်ပိုင်အင်မော်တယ်စွမ်းအင်များကို အပြည့်အဝ မဖွဲ့စည်းရသေးသောကြောင့် ကောင်းကင်အဓိပဓိငယ်အဆင့်ကို မဖြတ်ကျော်ခဲ့ခြင်း ဖြစ်သည်။

သို့သော်လည်း ယခုတော့ လုံလောက်ပြီ။

ကျွင်းရှောင်ယောက်သာ ဆန္ဒရှိလျှင် နောက်ထပ် နိယာမများကို နားလည်နိုင်သည်။

သို့ရာတွင်၊ မလိုအပ်တော့ပေ။

အကြောင်းမှာ ကျွင်းရှောင်ယောက်က အကန့်အသတ်ကို လုံးဝ ချိုးဖြတ်ခဲ့ခြင်းကြောင့် ဖြစ်သည်။

"အနာဂတ်မှာ တာအိုဉာဏ်အလင်းရတဲ့အခါ နိယာမတွေကို ပိုပြီး နားလည်နိုင်လိမ့်မယ်။ နိယာမသုံးထောင်ကို ဆုပ်ကိုင်ပြီးတဲ့အခါ ဘယ်သူက ငါ့ရဲ့ပြိုင်ဘက် ဖြစ်နိုင်မှာလဲ"

ကျွင်းရှောင်ယောက်က ရေရွတ်လိုက်သည်။

"နောက်ပြီးတော့ ငါ့ရဲ့ မေယုကမ္ဘာ..."

ကျွင်းရှောင်ယောက်က အပြောင်းအလဲတစ်ခုကို သတိပြုမိသည်။

သူသည် ခန္ဓာကျမ်းမှ မေယုကမ္ဘာသုံးထောင်ကို လေ့ကျင့်ထားခဲ့ခြင်း ဖြစ်သည်။

ယခင်ကတော့ မေယုကမ္ဘာနှစ်ထောင်အထိသာ ဖွဲ့စည်းရသေးသည်။

ယခုမူကား အတွင်းစကြာဝဠာ၏ အသွင်ကူးပြောင်းမှုနှင့် ဆင့်ကဲပြောင်းလဲခြင်းနှင့်အတူ...

ကမ္ဘာကြီး၏ ကြီးကျယ်ခမ်းနားသော စွမ်းအားကို ဆဲလ်များက စုပ်ယူကာ မေယုကမ္ဘာသို့ ပြောင်းလဲသွားခဲ့သည်။

မသိလိုက်ခင်မှာပင် ကျန်သော မေယုကမ္ဘာတစ်ထောင်ကိုလည်း အောင်မြင်စွာ ပေါင်းစည်းနိုင်ခဲ့ပြီ။

ကျွင်းရှောင်ယောက်က မေယုကမ္ဘာသုံးထောင်စလုံးကို အောင်မြင်စွာ လေ့ကျင့်နိုင်ခဲ့ပြီ ဖြစ်သည်။

လက်သီးဆုပ်လိုက်သည်နှင့် မေယုကမ္ဘာသုံးထောင်၏ စွမ်းအားက ပေါက်ကွဲထွက်လာ၏။

ရန်သူ၏ တိုက်ခိုက်မှုက မေယုကမ္ဘာသုံးထောင်၏ အတားအဆီးများကို ဖြတ်ကျော်ပြီးမှသာ သူ့အပေါ်သို့ ကျရောက်နိုင်လိမ့်မည်။

ခန္ဓာကျမ်း၏ အစွမ်းထက်နည်းလမ်းကို ကျွင်းရှောင်ယောက်က အောင်မြင်နိုင်ခဲ့ပြီ ဖြစ်သည်။

"ဒါပေမဲ့... ဒါက အစမှတ်တစ်ခုလို့ ငါ ဘာဖြစ်လို့ ခံစားရတာလဲ"

ကျွင်းရှောင်ယောက် အံ့သြသွားသည်။

သူ့ခန္ဓာကိုယ်ရှိ ဆဲလ်သုံးထောင်က မေယုကမ္ဘာသုံးထောင် ဖြစ်သွားသည်။

သို့သော်လည်း လူ့ခန္ဓာကိုယ်တွင် ဆဲလ်ပေါင်း သုံးဆယ်ထရီလီယံကျော် ရှိသည်။

၎င်းတို့အားလုံးကို မေယုကမ္ဘာအဖြစ်သို့ ပြောင်းလဲနိုင်မည်ဆိုလျှင်...

ထိုအကြောင်းကိုတွေးမိသောအခါ ကျွင်းရှောင်ယောက်က အသက်ပြင်းပြင်းရှူလိုက်မိသည်။

မေယုကမ္ဘာသုံးထောင်ပင်လျှင် အလွန်ကြောက်စရာကောင်းနေပြီ ဖြစ်သည်။

ထိုအဆင့်ထိ လေ့ကျင့်နိုင်လျှင် မည်မျှ ကြောက်စရာကောင်းလိုက်ပါမည်နည်း။

ထိုအချိန်တွင် လက်ညှိုးတစ်ချက်ညွှန်လိုက်သည်နှင့် ကောင်းကင်တစ်ခုလုံစ ပြိုကျသွားရမည် ဖြစ်သည်။

ဟုတ်ပေသည်၊ ဤသည်မှာ ကျွင်းရှောင်ယောက်၏ စိတ်ကူးသက်သက် ဖြစ်သည်။

‌ထို့ပြင်၊ မေယုကမ္ဘာသုံးထောင်ကို လေ့ကျင့်ရုံမျှဖြင့် စွမ်းအင်စားသုံးမှုက အလွန်ကြီးမားနေပြီ ဖြစ်သည်။

အကယ်၍ လူ့ခန္ဓာကိုယ်ရှိ ဆဲလ်တိုင်းကို မေယုကမ္ဘာသို့ အမှန်တကယ် လေ့ကျင့်လိုပါက...

လိုအပ်သော အရင်းအမြစ်များသည် စိတ်ကူးကြည့်ရန်ပင် မလွယ်ပေ။

ထို့ကြောင့် ကျွင်းရှောင်ယောက်က ဤအကြံအစည်ကို သူ့နှလုံးသားထဲတွင် သိမ်းဆည်းထားခဲ့သည်။

ထိုအချိန်တွင်၊ ကမ္ဘာဦးအစမှ မိုးနှင့်မြေကို ခွဲခြမ်းလိုက်သကဲ့သို့ အသံတစ်ခုက ကျွင်းရှောင်ယောက်၏ အတွင်းစကြာဝဠာမှ ထွက်ပေါ်လာသည်။

ယင်းမှာ ကျွင်းရှောင်ယောက်၏ အတွင်းစကြာဝဠာက အသွင်ပြောင်းသွားခဲ့ခြင်းပင်။ နောက်ဆုံးတွင်၊ ဖုန်မှုန့်ကမ္ဘာမှ ကမ္ဘာငယ်အဆင့်သို့ ရောက်သွားပြီ ဖြစ်သည်။

ကမ္ဘာငယ်က ဖုန်မှုန့်ကမ္ဘာထက် အဆတစ်ထောင်ကျော် ကြီးမားကျယ်ပြန့်ပေသည်။

ကြယ်မျိုးစုံက ရွေ့လျားနေပြီး ကမ္ဘာ့စွမ်းအားများလည်း စီးဆင်းနေသည်။

အင်မော်တယ်ရင်းမြစ် ဘိုးဘေးသွေးကြောနှင့် တိုင်းတပါးမှ နဂါးသွေးကြောက မိုးနှင့်မြေအား ကြီးမားသော ဝိညာဉ်စွမ်းအင်ပမာဏကို ပေးစွမ်း၏။

ကျွင်းရှောင်ယောက်၏ အတွင်းစကြာဝဠာက တက်ကြွမှုအပြည့်ရှိသည်ဟု ဆိုနိုင်သည်။

ထိုအချိန်တွင်၊ သူ၏ နယ်ပယ်က ထိန်းချုပ်မနိုင်တော့ဘဲ မီးတောင်ကဲ့သို့ ပေါက်ကွဲထွက်လာသည်။

ကျွင်းရှောင်ယောက်လည်း သူ၏ကျင့်ကြံမှုကို မဖိနှိပ်ထားတော့ဘဲ လွှတ်ပေးလိုက်တော့သည်။

ပြင်းထန်သော ပေါက်ကွဲသံကြီးက‌ ရှေးဟောင်းတောင်မှ ထွက်လာခဲ့သည်။

သို့သော်လည်း ဤနေရာသည် ပြင်ပကမ္ဘာနှင့် ကင်းကွာသောကြောင့် လူအတော်များများ သတိမထားမိခဲ့ကြပေ။

အင်မော်တယ်အကယ်ဒမီမှ မဟာအကြီးအကဲနှင့် လေ့ကျင့်နေသော အခြားအကြီးအကဲများကတော့ ရုတ်တရက် တအံ့တဩဖြင့် မျက်လုံးဖွင့်လိုက်ကြသည်။

"ဒီလှိုင်းလုံးကြီးက အဲဒီရှေးဟောင်းမြေက လာတာပဲ။ ကျွင်းရှောင်ယောက်က အဆင့်တက်တော့မှာလား"

အင်မော်တယ်အကယ်ဒမီ၏ အကြီးအကဲ အံ့ဩသွားသည်။

ကျွင်းရှောင်ယောက်၏အသက်က ဘယ်လောက်ရှိသေးလို့လဲ။

ဤအသက်အရွယ်တွင် အဓိပဓိအဆင့် ကျင့်ကြံမှုကို ပိုင်ဆိုင်ထားခြင်းမှာ ပကတိမကောင်းဆိုးရွား ဖြစ်နေပြီဖြစ်သည်။

ယခုဆိုလျှင်၊ သူက ကောင်းကင်အဓိပဓိငယ်အဆင့်သို့ ဖြတ်သွားတော့မည်။

"မျိုးဆက်သစ်တွေက ငါတို့ကို ကျော်လွန်သွားလိမ့်မယ်"

မဟာအကြီးအကဲက ခါးသက်သက်ပြုံးရင်း ခေါင်းခါယမ်းလိုက်သည်။

ကျွင်းရှောင်ယောက်က မကြာမီ သူတို့ကိုကျော်တက်မည်ဟု သူ ခံစားလိုက်ရလေသည်။

သို့သော်လည်း မဟာအကြီးအကဲသည် ကျွင်းရှောင်ယောက်ကို အင်မော်တယ်အကယ်ဒမီသို့ အပိုင်ဆွဲခေါ်ပြီး မိတ်ဆွေဖွဲ့နိုင်ခဲ့သည့်အတွက် အလွန်ကျေနပ်မိခဲ့သည်။

ရှေးဟောင်းရတနာမြေတွင်...

မိုးကြိုးထစ်ချုန်းသံများ၊ နတ်လျှပ်စီးများက ပြိုးပြိုးပြက်ပြက် တောက်ပနေသည်။

ဤကပ်ဘေးမျိုးက နိယာမကိုးပါး၏ အဆုံးစွန်ကပ်ဘေးဒုက္ခထက် အဆများစွာ ပိုကြောက်စရာကောင်းပေသည်။

အကယ်၍ နိယာမကိုးပါးကို လေ့ကျင့်ထားသူက ဤမိုးကြိုးကပ်ဘေးကို ရင်ဆိုင်ရလျှင် အသက်ပင်သေလောက်သည်။

သို့သော်လည်း ကျွင်းရှောင်ယောက်ကတော့ အလွန်တည်ငြိမ်ပြီး ခုခံရန်ပင် စိတ်ကူးမရှိခဲ့ပေ။

ခန္ဓာကိုယ်ကြံ့ခိုင်မှု တစ်ခုတည်းဖြင့် မိုးကြိုးများကို ဆင်းသက်စေခဲ့သည်။

‌

မေယုကမ္ဘာသုံးထောင်ကို ပြီးနောက်၊ ကျွင်းရှောင်ယောက်၏ ခန္ဓာကိုယ်က ပို၍ ကြောက်စရာကောင်းလာသည်။

ထို့ပြင် အတွင်းစကြာဝဠာကလည်း ကမ္ဘာငယ်အဆင့်သို့ ရောက်ရှိသွားခဲ့ပြီ။

ယခုဆိုလျှင် ကျွင်းရှောင်ယောက်၏၏ စွမ်းအားကို သူ့နယ်ပယ်နှင့် တိုင်းတာ၍ မရတော့ပေ။

မကြာမီပင် မိုးကြိုးကပ်ဘေးက ဘာမျှမစွမ်းနိုင်ရှာဘဲ ပြီးဆုံးသွားခဲ့သည်။

ကျွင်းရှောင်ယောက်၏ အရှိန်အဝါက တဟုန်ထိုး တိုးတက်လာ၏။

အဓိပဓိမှ ကောင်းကင်အဓိပဓိငယ်အဆင့်သို့...

ကောင်းကင်အဓိပဓိငယ် အစောပိုင်းအဆင့်...

ကောင်းကင်အဓိပဓိငယ် အလယ်လတ်အဆင့်...

ကောင်းကင်အဓိပဓိငယ် နှောင်းပိုင်းအဆင့်...

ကောင်းကင်အဓိပဓိငယ် ပြီးပြည့်စုံမှုအဆင့်...

ကောင်းကင်အဓိပဓိငယ် ကြီးမားသော ပြီးပြည့်စုံမှု...

သာမန် ကျင့်ကြံသူများက အဓိပဓိနယ်ပယ်တွင် အဆင့်တစ်ခုတက်ရန် အချိန်များစွာ သုံးစွဲရပေသည်။

ကျွင်းရှောင်ယောက်ကတော့ တခဏချင်းတွင် နယ်ပယ်ကြီးတစ်ခုကို ဖြတ်ကျော်ပြီး ကောင်းကင်အဓိပဓိငယ်၏ အထွတ်အထိပ်သို့ ရောက်ရှိခဲ့သည်။

ထို့ပြင် ဤသည်က သတ်မှတ်ချက်တစ်ခုမျှသာ...

သူ၏ စစ်မှန်သောခွန်အားက ထို့ထက်များစွာသာလွန်သည်။

"မဆိုးဘူး"

ကျွင်းရှောင်ယောက်က ကျေနပ်စွာ ခေါင်းညိတ်လိုက်သည်။

အမှန်တော့ ဤသည်မှာ သူ၏ မျှော်လင့်ချက်အတွင်း၌ ရှိပေသည်။

ကျွင်းရှောင်ယောက်က သူ့ကိုယ်သူ အချိန်အကြာကြီး ဖိနှိပ်ထားခဲ့သည်။

အကယ်၍ ထိုသို့မဖိနှိပ်ထားပါက ကျွင်းရှောင်ယောက်သည် ကောင်းကင်အဓိပဓိငယ်အဆင့်ကို အစောကြီးကတည်းက ဖြတ်ကျော်နိုင်လိမ့်မည်။

ဤသည်မှာ ကောင်းမွန်စွာ စုဆောင်းမှု၏ ရလဒ် ဖြစ်သည်။

"ကောင်းကင်အဓိပဓိအဆင့်မှာ လူတစ်ဦးက အမျိုးမျိုးသော နိယာမတွေကို ထိန်းချုပ်နိုင်စွမ်း အင်မတန်မြင့်မားသွားပြီ"

ကျွင်းရှောင်ယောက်က လက်ဝါးတစ်ဖက်ဖြန့်လိုက်သည်။ နိယာမများက ငါးကလေးများ ကူးခတ်နေသကဲ့သို့ သူ့လက်ချောင်းထိပ်များပေါ်တွင် ပျံဝဲနေ၏။

ဤသည်မှာ ကောင်းကင်အဓိပဓိတစ်ပါး၏ စွမ်းအား ဖြစ်သည်။ နိယာမများကို အသုံးပြုနိုင်စွမ်းက အဓိပဓိများ နှိုင်းယှဉ်နိုင်တာ မဟုတ်ပေ။

"စကားမစပ်... ငါ့အတွင်းစကြာဝဠာက..."

နယ်ပယ်အောင်မြင်မှုများနှင့် နှိုင်းယှဉ်ပါက ကျွင်းရှောင်ယောက်သည် သူ၏အတွင်းစကြာဝဠာကို ပို၍ သိချင်စိတ်များသည်။

ဖုန်မှုန့်ကမ္ဘာမှ ကမ္ဘာငယ်အထိ...

၎င်းက အရည်အသွေးပိုင်းဆိုင်ရာ ပြောင်းလဲမှုတစ်ခုဖြစ်သည်။

သို့သော်လည်း ကမ္ဘာငယ်အဆင့်မှ အလယ်လတ်ကမ္ဘာသို့ ပြောင်းလဲရန်မှာ အလွန်ခက်ခဲသည်။ နေ့ချင်းညချင်း လုပ်လို့မရပေ။

အကြောင်းမှာ အလယ်လတ်ကမ္ဘာက ကမ္ဘာငယ်တစ်ထောင်နှင့် နှိုင်းယှဉ်နိုင်သောကြောင့် ဖြစ်သည်။

အလယ်လတ် ကမ္ဘာတစ်ထောင်၏ ပေါင်းလဒ်က မဟာကမ္ဘာနှင့် နှိုင်းယှဉ်နိုင်ပေသည်။

ကျွင်းရှောင်ယောက်လည်း သူ၏အတွင်းစကြာဝဠာကို အသွင်ပြောင်းရန် အချိန်အတော်ကြာမည်ဟု ခန့်မှန်းလိုက်မိသည်။

ထိုအချိန်တွင်၊ ကျွင်းရှောင်ယောက်က သူ၏အတွင်းစကြဝဠာတွင် စကြဝဠာ၏မူလစွမ်းအင်မှ အလင်းဆယ်ရှစ်ခုရှိနေကြောင်း သတိပြုမိလိုက်သည်။

"အဲဒါက... သဘာဝဖင်းဂေါ့တွေ"

ကျွင်းရှောင်ယောက်မှာ တကယ်ကို အံ့သြသွား၏။

စကားတစ်ခွန်းက သူ့စိတ်ထဲတွင် ပေါ်လာသည်။

သမိုင်းမတင်မီကမ္ဘာဦး။