အခန်း ၁၁၉၆

အခန်း ( ၁၁၉၆ ) ဒါက မင်းတို့အတွက် ငါ့ရဲ့ ဖြေရှင်းချက်ပဲ။

ကျွင်းရှောင်ယောက်က အဖြူရောင်ဝတ်စုံကို ဝတ်ဆင်ထားဆဲ ဖြစ်သည်။

သူ့အဝတ်အစားထောင့်စွန်းများက လေထဲတွင် လူးလွန့်လှုပ်ရှားနေ၏။

ကောင်းကင်အဓိပဓိငယ် အငွေ့အသက်များကို ရုတ်သိမ်းလိုက်ပြီးနောက် သူက ရိုးရှင်းသော ပုံစံရှိသည်။

သို့သော်လည်း လူများကို နားလည်ရန်ခက်ခဲသော ခံစားချက်မျိုး ခံစားရစေခဲ့သေးသည်။

ကျွင်းရှောင်ယောက်က စကြာဝဠာ၏ ဗဟိုချက်ကဲ့သို့ ဖြစ်သည်။

ဤသည်မှာ အလွန်ထူးဆန်းသော ခံစားချက်တစ်ခု ဖြစ်၏။

သူတို့မသိကြသည်မှာ ကျွင်းရှောင်ယောက်က ကမ္ဘာငယ်ကို ‌တည်ဆောက်ထားခဲ့ပြီး ဖြစ်သည်။ ထို့ကြောင့် ဤခံစားချက်ကို ခံစားရခြင်းမှာ အံ့ဩစရာတော့ မဟုတ်ပေ။

သူတို့အတွက်တော့ ထိုခံစားချက်ကို ဤသို့ ဖော်ပြနိုင်သည်။

လောကသခင်။

မမှားပေ၊ ကျွင်းရှောင်ယောက်ကို ကမ္ဘာငယ်၏ အရှင်သခင်ဟု ခေါ်နိုင်ပြီ ဖြစ်သည်။

ထို့ကြောင့် အခြားသူများက ကမ္ဘာလောက၏ အရှင်သခင်တစ်ပါးကဲ့သို့ ခံစားခဲ့ကြရခြင်းပင်။

ကျွင်းရှောင်ယောက်၏ ပေါ်လာခြင်းက တုန်လှုပ်နေကြသော အင်မော်တယ်အကယ်ဒမီ၏ တပည့်များကို တည်ငြိမ်သွားစေသည်။

အကယ်ဒမီမှ အကြီးအကဲကြီးပင်လျှင် တိတ်တဆိတ် သက်ပြင်းချလိုက်ကြလေသည်။

ကျွင်းရှောင်ယောက် ပေါ်လာသရွေ့၊ ပြဿနာအားလုံးမှာ ပြဿနာမဟုတ်တော့သလို ထင်ရသည်။

တချို့ကတော့ တံခါးပိတ်လေ့ကျင့်ပြီးနောက် ကျွင်းရှောင်ယောက်ဟာ ဘယ်အတိုင်းအတာအထိ တိုးတက်လာသလဲဟု သိချင်နေကြသည်။

သို့သော်လည်း ကျွင်းရှောင်ယောက်က ဆန္ဒမရှိလျှင်၊ ဧကရာဇ်တစ်ပိုင်းသော်မှ သူ၏ ကျင့်ကြံမှုကို ထိုးဖောက်မြင်ရန် ခက်ခဲသည်။

ကောင်းကင်ကိုခိုးယူကာ နေကိုပြောင်းလဲခြင်းကျင့်စဉ်ကြောင့် ကျွင်းရှောင်ယောက်ကို ထိုးဖောက်နိုင်မြင်နိုင်သူမှာ အလွန်နည်းပေသည်။

တိဟောက်ထျန်း၏ ငွေရောင်မျက်လုံးများပင် မမြင်နိုင်ခဲ့ပေ။

ကျွင်းရှောင်ယောက်က နှုတ်ခမ်းထောင့်တွင် သွေးစတချို့ ရှိနေသေးသော ကျန်းထျန်းယန်ကို ပထမဆုံး ကြည့်လိုက်သည်။

ထို့နောက် သူ့လက်ကိုဝှေ့ယမ်းလိုက်သောအခါ အသက်စမ်းရေမှ ရေတစ်စက်က ကျန်းထျန်းယန်၏ လက်ထဲသို့ ကျရောက်သွား၏။

ကျန်းထျန်းယန်လည်း ဝမ်းသာအားရဖြင့် လက်ယှက်ကာ ပြောလိုက်သည်။

"ကျေးဇူးတင်ပါတယ် သခင်လေး"

ကျွင်းရှောင်ယောက်၏ အခြား အထောက်အထားတစ်ခု ရှိသေးသည်။ သူက ကျန်းမိသားစု၏ သခင်လေး ဖြစ်သည်။

"ဟင်၊ အဲဒီရေစက်က..."

ပတ်ဝန်းကျင်ရှိ လူတိုင်း မျက်လုံးပြူးသွားကြသည်။

၎င်းက မိုးနှင့်မြေကြားမှ ရှားပါးရတနာတစ်ပါးဖြစ်သော အသက်ရေတစ်စက် ဖြစ်၏။

အသက်စမ်းရေတစ်စက်က အဆင့်မြင့် ဆေးဝါးများနှင့် ယှဉ်နိုင်သော်လည်း ကျွင်းရှောင်ယောက်ကတော့ ပေါ့ပေါ့ပါးပါး ပေးပစ်လိုက်သည်။

"‌ဖေဖေ..."

ရှောင်ချမ်ရွယ်က ပျော်ရွှင်စွာ အော်ဟစ်လိုက်သည်။ သူက ကျွင်းရှောင်ယောက်၏ ရင်ခွင်ထဲသို့ ပြေးဝင်သွားပြီး ခေါင်းဖြင့်တိုးဝှေ့လိုက်လေသည်။

သူမက သခင်ကို တွေ့လိုက်ရသော ကြောင်လေးတစ်ကောင်ကဲ့သို့ပင် ဖြစ်သည်။

"ကိုကိုရှောင်ယောက်၊ နင် နောက်ဆုံးတော့ လေ့ကျင့်တာပြီးသွားပြီ"

ကျန်းလော့လီလည်း ပျော်ရွှင်သွားလေသည်။

လော့ရှန်းလင်ကလည်း ကျွင်းရှောင်ယောက်ဆီသို့ ရောက်လာသည်။

သူ့နောက်လိုက်များ၊ သူငယ်ချင်းများ၊ ကျွင်းမိသားစု၏ ပါရမီရှင်များ၊ ကျန်းမိသားစုမှ ပါရမီရှင်များ... စသည်တို့လည်း ရှိသေးသည်။

ဤရပ်ဝန်းတွင် ကျွင်းရှောင်ယောက်က ပင်မကျောရိုးဟု ဆိုနိုင်သည်။

သူ့အနားမှာ ရှိနေသမျှ လူတိုင်း၏စိတ်နှလုံးဟာ တည်ငြိမ်မှုရှိလိမ့်မည်။

"ကျွင်းရှောင်ယောက်၊ နောက်ဆုံးတော့ မင်းပေါ်လာပြီ။ မင်း ပုန်းရှောင်မနေတော့ဘူး"

ယုကန်းက ရှေ့သို့ ခြေတစ်လှမ်းတိုးလိုက်သည်။ သူ့မျက်လုံးများက လျှပ်စီးများ တဖျတ်ဖျတ်လက်လာသည်။

"ကျွင်းရှောင်ယောက်၊ နင် အစ်ကိုတောက်ရီရဲ့ အကြွေးကို ဘယ်လိုဖြေရှင်းပေးမှာလဲ"

ကျိရင်ရင်ကလည်း ရှေ့သို့တိုးလာ၏။

"ကျွင်းရှောင်ယောက်၊ မင်းက လွမ်ကုရဲ့အမွေကို ရရှိထားတယ်။ ဒါက ငါ့ကျင်းမိသားစုနောက်ကွယ်က တားမြစ်နယ်မြေကို စိတ်ထဲအဆင်မပြေဖြစ်စေတယ်"

"ဒါပေါ့၊ မင်းက ကျွင်းမိသားစုရဲ့ နတ်ဘုရားသားတော်ဖြစ်တာကြောင့် မတူခြားနားစွာ ဆက်ဆံနိုင်တယ်။ လွမ်ကုရဲ့အမွေကို စွန့်လွှတ်ပြီး လွမ်ကုဧကရာဇ်အဆောင်ကို လွှဲပြောင်းပေးဖို့ ဆန္ဒရှိနေသရွေ့ ငါတို့ ဒီကိစ္စကို ဆက်မလိုက်တော့ဘူး"

ကျင်းမိသားစုမှ ကောင်းကင်အဓိပဓိတစ်ပါးက ပြောလိုက်၏။

တားမြစ်မိသားစုသုံးခုက အရှိန်အဝါများကို တမင်တကာ မထုတ်ဖော်ခဲ့ပေ။

သို့သော်လည်း သာလွန်မြင့်မြတ်သူလို အရှိန်အဟုန်တို့ ရှိနေဆဲ ဖြစ်သည်။

ကျွင်းရှောင်ယောက် တွေ့ဖူးသမျှ လူများထဲတွင်...

စန်းမျိုးနွယ်အပြင်၊ ဤကောင်းကင်ကိုးပါးအထက်မှ လူများက မာနအကြီးဆုံး ဖြစ်သည်။

သို့သော်လည်း ကျွင်းရှောင်ယောက်က စိတ်ဆိုးဟန်မပြပေ။

သူက ယုကန်းကို ပထမဆုံးကြည့်ပြီး ပြောလိုက်သည်။

"ဒါဆို မင်းက ဘာလုပ်ချင်တာလဲ"

ယုကန်းက သေချာကြည့်လိုက်သည်။ တစ်ခုခုမှားနေသလို ခံစားရသော်လည်း ဘယ်နေရာကမှားနေမှန်း သူ မသိပေ။

သူက မျက်နှာထား ခပ်တည်တည်ဖြင့် ပြောလိုက်သည်။

"ဒါက ရိုးရှင်းပါတယ်။ ပထမအနေနဲ့ ဒီမိန်းကလေးကို ငါတို့ ခေါ်သွားမယ်။ သူက ဒီနေရာနဲ့မသက်ဆိုင်ဘဲ မင်းလည်း သူ့ကိုကာကွယ်ထားလို့မရဘူး"

ယုကန်းက ကျန်းလော့လီကို လက်ညှိုးထိုးပြလိုက်သည်။

"ငါက ကိုကိုရှောင်ယောက်နဲ့ပဲနေမယ်။ ဘယ်မှမသွားဘူး"

ကျန်းလော့လီက အေးစက်စက်ပြောပြီး ကျွင်းရှောင်ယောက်အနားကို တိုးကပ်လိုက်၏။

"တစ်ခြားရှိသေးလား"

ကျွင်းရှောင်ယောက်က‌ ဆွေးနွေးညှိနှိုင်းရန် ကြိုးစားနေသလို ပေါ့ပေါ့ပါးပါးပြုံးကာ မေးလိုက်သည်။

"မင်းက ငါ့ညီလေး ယုခွင်းကို သတ်လိုက်တယ်"

"မင်းရဲ့အဆင့်အတန်းက တကယ့်ကို သာမန်မဟုတ်ပါဘူး။ ဒါကြောင့် မင်းအသက်နဲ့ ပြန်ပေးဆပ်စေဖို့ စိတ်ကူးမရှိဘူး။ ‌ဒါပေမဲ့ ကောင်းကင်ဘုံမှာရှိတဲ့ ငါ့ညီလေးကို တောင်းပန်ရမယ်။ ပြီးတော့ လျော်ကြေးပေးပါ"

"ဥပမာ... မင်း စောစောက‌ပေးလိုက်တဲ့ အသက်စမ်းရေဟာ တော်တော်ကောင်းတယ်။ နောက်ပြီးတော့ မင်းက ရွှီထျန်းလောကမှာ ပြန်လည်ဝင်စားခြင်း လမ်းကြောင်းခြောက်သွယ် အင်မော်တယ်အမြစ်ကို ရရှိခဲ့ပုံရတယ်"

ယုကန်းက လောဘကြီးစွာ ပြောလိုက်၏။

ဤစကားများက အင်မော်တယ်အကယ်ဒမီမှ တပည့်များစွာကို အနည်းငယ် ဒေါသထွက်စေခဲ့သည်။

ဒါက ကျွင်းရှောင်ယောက်ကို ဆူဖြိုးသော သိုးကောင်ကဲ့သို့ ဆက်ဆံနေခြင်းပင်။

ကျွင်းမိသားစုနှင့် ကျန်းမိသားစု၏ ပါရမီရှင်များဆိုလျှင် ပို၍ပင် ဒေါသထွက်သွားခဲ့ကြသည်။

အင်မော်တယ်နယ်မြေကြီးတွင် ကျွင်းရှောင်ယောက်၏ အဆင့်အတန်းက အနှိုင်းမဲ့ ဖြစ်သည်။ မည်သူက သူ့ကို အမြတ်ထုတ်ဝံ့မည်နည်း။

သို့သော်လည်း ကျွင်းရှောင်ယောက်၏ အမူအရာက တည်ငြိမ်နေဆဲ ဖြစ်သည်။ သူက လက်မြှောက်ပြပြီး အားလုံးကို တိတ်တိတ်နေရန် အချက်ပြလိုက်လေသည်။

ပတ်ဝန်းကျင်တစ်ခုလုံး တိတ်ဆိတ်သွားပြန်သည်။

"မင်းကရော..."

ကျွင်းရှောင်ယောက်က ကျိရင်ရင်ကို ကြည့်လိုက်သည်။

ကျွင်းရှောင်ယောက်၏ အကြည့်က သူ့အပေါ်သို့ ကျရောက်လာသောအခါ၊ ကျိရင်ရင်၏ ရင်ထဲတွင် ထိတ်ခနဲ ဖြစ်သွားသည်။

"ငါက အများကြီးမလိုချင်ပါဘူး။ ငါ့အစ်ကိုတောက်ရီကို စိတ်ရင်းမှန်နဲ့ တောင်းပန်ပြီး ကောင်းကင်ဘုံက သူ့ဝိညာဉ်ကို နှစ်သိမ့်ပေးသရွေ့ လုံလောက်ပြီ"

ကျိရင်ရင်က ပြောလိုက်၏။

ကျွင်းရှောင်ယောက်က ခေါင်းညိတ်လိုက်သည်။ သူက ကျင်းမိသားစုကိုတော့ မမေးတော့ပါ။

အကြောင်းမူ၊ ကျင်းမိသားစုက အခြေအနေများကို ပြောခဲ့ပြီးပြီဖြစ်သောကြောင့်ပင်။

လွမ်ကု၏အမွေကို စွန့်လွှတ်ပြီး လွမ်ကုဧကရာဇ်အဆောင်ကို လွှဲပြောင်းပေးရမည် ဖြစ်သည်။

"ငါ့အကြောင်းကို မင်းတို့ သိပ်မသိဘူးထင်တယ်။ ငါ့ရဲ့ အမူအကျင့်တစ်ချို့ကို ကြားဖူးရုံပဲ"

"နောက်ပြီးတော့ မင်းတို့ကို မင်းတို့နောက်ကွယ်မှာရှိတဲ့ တားမြစ်နယ်မြေတွေက ထောက်ပံ့ပေးထားတဲ့အပြင် အခြား အကြောင်းရင်းတစ်ခုက... ငါတို့ ကျွင်းမိသားစုက ကျိန်စာစူးနေလို့ အခြားသူတွေကို ဂရုစိုက်ဖို့ အချိန်မရှိဘူး ထင်နေတာကြောင့် မဟုတ်လား"

ကျွင်းရှောင်ယောက်က ပြောလိုက်သည်။

တားမြစ်မိသားစုသုံးခုက ဘာမျှမပြောပေ။ သို့သော်လည်း သူတို့၏ အဓိပ္ပာယ်က ထင်ရှားသည်။

ကျွင်းမိသားစုသာ အန္တိမကပ်ဘေးကြီး၏ ကျိန်စာသက်ရောက်မှု မခံခဲ့ရလျှင် သူတို့ကိုယ်သူတို့ အနည်းငယ် ချုပ်တည်းကြလိမ့်မည်။

ယခုတော့....

"ဒါပေမဲ့ မင်းတို့ပြောတာက တကယ်မှန်ပါတယ်"

ကျွင်းရှောင်ယောက်က အနည်းငယ် ခေါင်းညိတ်သည်။

ယင်းက အင်မော်တယ်အကယ်ဒမီ၏ တပည့်များကို အနည်းငယ် အံ့အားသင့်စေခဲ့သည်။

ဒါက ကြီးစိုးတဲ့ ကျွင်းမိသားစုရဲ့ နတ်ဘုရားသားတော်လား။

"ဟမ့်၊ သူလည်း တစ်ခါတလေ ဦးညွှတ်နေရတာပဲထင်တယ်"

အဝေးတွင်၊ ကုရ်အာန်သူတော်စင်ဂိုဏ်းမှ အမှန်တရား၏သားတော်က ခေါင်းကိုခါယမ်းကာ အနည်းငယ်ပြုံးလိုက်သည်။

"အဲဒီတုန်းက စန်းမျိုးနွယ်ကြောင့် ငါနောက်ဆုတ်ရတဲ့အခါ လူတော်တော်များများက ငါ့ကို တိတ်တဆိတ် လှောင်ပြောင်ကြတယ်။ အခု ကျွင်းရှောင်ယောက်လည်း အတူတူပဲ မဟုတ်လား"

တစ်ဖက်တွင်၊ ဟွမ်နျဲ့တောက်က အဝေးမှကြည့်နေပြီး အေးစက်စက်ဖြင့် တီးတိုး ရေရွတ်လိုက်သည်။

သို့သော် လူတိုင်း အံ့ဩ၍မဆုံးခင်...

ကျွင်းရှောင်ယောက်က ဆက်ပြောလိုက်သည်။

"ငါစိတ်မကောင်းပါဘူး၊ ငါ အမှားလုပ်မိသွားတယ်။ ငါမှားခဲ့တယ်။ ပထမက မင်းတို့ညီအစ်ကိုတွေကို သေကွဲကွဲအောင် မလုပ်သင့်ဘူး၊ ပြန်ဆုံစေသင့်တယ်"

"ဒုတိယအနေနဲ့ ကျိတောက်ရီရဲ့ သေဆုံးမှုအတွက်လည်း တောင်းပန်ပါတယ်။ မင်းက သူ့အပေါ်မှာ အင်မတန် သစ္စာရှိတယ်။ ဒါကြောင့် မင်းကို သူနဲ့ပြန်တွေ့ပေးဖို့ နည်းလမ်းရှာသင့်တယ်"

"တတိယအချက်ကတော့ လွမ်ကုဧကရာဇ်ရဲ့ မျိုးဆက်တစ်ဦး ဖြစ်လာတဲ့အတွက်ကြောင့် တောင်းပန်ပါတယ်"

စကားသုံးခွန်း...

တောင်းပန်ခြင်း သုံးမျိုး...

ပတ်ဝန်းကျင်တစ်ခုလုံး တိတ်ဆိတ်သွားခဲ့သည်။

ထိုအချိန်တွင် လူတိုင်းက တစ်ခုခု ထူးခြားနေသလို ခံစားလိုက်ရသည်။

ပုံမှန်ဆိုလျှင်၊ ကျွင်းရှောင်ယောက်က ထိုသို့သောသူ မဟုတ်ပေ။

ယုကန်းနှင့် အခြားသူများလည်း အန္တရာယ်ကို ရုတ်တရက် ခံစားလာခဲ့ရသည်။

နောက်အခိုက်တွင်၊ အဖြူရောင်ဝတ်စုံနှင့် လူရိပ်တစ်ခုက သူ့ရှေ့မှာ ပေါ်လာတာကို မြင်လိုက်ရသည်။

"ငါတောင်းပန်ပါတယ်၊ ညီအကိုတွေ ပြန်ဆုံခွင့်ပေးမယ်"

ကျွင်းရှောင်ယောက်က ပြုံးနေဆဲပင်။ သူက ရိုးရှင်းသော လက်ဝါးတစ်ချက် ရိုက်ထုတ်လိုက်သည်။

‌

မေယုကမ္ဘာသုံးထောင်၏ စွမ်းအားက ပေါက်ကွဲထွက်လာ၏။

မည်သည့် အထူးစွမ်းရည်ကိုမျှ အသုံးပြုရန် မလိုပါ။

ရိုးရိုးရှင်းရှင်း လက်ဝါးတစ်ချက် ရိုက်ထုတ်ခြင်းက ကြောက်စရာအကောင်းဆုံး လှုပ်ရှားမှု ဖြစ်သည်။

ထိုမှသာလျှင်၊ ယုကန်းက ကျွင်းရှောင်ယောက်သည် လုံးဝ တောင်းပန်ခြင်းမဟုတ်ကြောင်း နားလည်သွားခဲ့သည်။

သူက နောက်ပြောင်နေရုံပင်။

"အတင့်မရဲနဲ့ ကျွင်းရှောင်ယောက်၊ ငါ့ကို အင်မော်တယ်နယ်မြေကြီးက ပါရမီရှင်တွေနဲ့ အတူတူပဲ ထင်နေတာလား"

ယုကန်းက ဒေါသတကြီး အော်ဟစ်ပြီး ချက်ချင်း တုံ့ပြန်လိုက်သည်။

နိယာမကိုးခု၊ အမြင့်ဆုံးနယ်ပယ်နှင့် နီးစပ်သူတစ်ဦးအနေဖြင့်... သူ၏ အစွမ်းသတ္တိမှာ ပါရမီရှင် အများစုထက် အမှန်တကယ် သာလွန်သည်။

သို့သော်...

"ဖောင်း"

ပေါက်ကွဲသံတစ်ခု ထွက်ပေါ်လာ၏။

ယုကန်း၏ ဝိညာဉ်နှင့် ခန္ဓာကိုယ်က အပိုင်းပိုင်း ပေါက်ကွဲသွားကာ တွန်းလှန်ရန်ပင် စွမ်းအားမရှိခဲ့ပေ။

ယုမိသားစု၏ ပါရမီရှင် သေသွားပြီ ဖြစ်သည်။

"ပြီးတော့ မင်းရဲ့အစွဲအလန်းတွေကို ငါဖြည့်ဆည်းပြီး ကျိတောက်ရီနဲ့ တွေ့ဖို့ လွှတ်လိုက်မယ်"

ကျွင်းရှောင်ယောက်က ကျိရင်ရင်ကိုကြည့်ကာ လက်ဝါးဖြင့် ထပ်မံရိုက်လိုက်သည်။

"မဟုတ်ဘူး..."

ကျိရင်ရင်မှာ စကားတစ်ခွန်းသာ ပြောလိုက်ရ၏။ သူမ၏ နူးညံ့သိမ်မွေ့သော ခန္ဓာကိုယ်ကလေးကလည်း ပေါက်ကွဲကာ သွေး၊ အရိုးနှင့် အသားစများ နေရာအနှံ့ကို လွင့်စဉ်သွားတော့သည်။

သူမ၏ ရှေးဦးဝိညာဉ်ကလည်း မလွတ်မြောက်နိုင်ဘဲ တိုက်ရိုက် ပျက်သုဉ်းသွားသည်။

"ပြီးတော့ မင်း"

ကျွင်းရှောင်ယောက်က လွမ်ကုဧကရာဇ်၏ လျှို့ဝှက်ကျင့်စဉ်ကို အသုံးပြုလိုက်သည်။

လွမ်ထျန်းလျှို့ဝှက်ကျင့်စဉ်... ကြယ်ကောင်းကင်ဆုံမှတ်။

ကျင်းမိသားစုမှ ကောင်းကင်အဓိပဓိကို တိုက်ခိုက်လိုက်၏။

"ငါက ကောင်းကင်အဓိပဓိကွ"

ကျင်းမိသားစုမှ ကောင်းကင်အဓိပဓိက ဒေါသတကြီးဖြင့် အော်ဟစ်လိုက်သည်။

သူက မျိုးဆက်သစ်မဟုတ်သလို၊ သူ၏ အစွမ်းသတ္တိကလည်း သာမန်မဟုတ်ပေ။

သို့သော်လည်း ရလဒ်က အတူတူသာ ဖြစ်သည်။

သူ့ခန္ဓာကိုယ်က လေးစိတ်ကွဲသွားပြီး သူ့ဝိညာဉ်လည်း ပျက်စီးသွားတော့သည်။

သုံးကြိမ် လှုပ်ရှားပြီး လူသုံးယောက် သေသွားသည်။

"ဒါက... ငါ့ရဲ့ ဖြေရှင်းချက်ပဲ"