အခန်း ၃၂၃

🫧 Chapter 323

[ဟင် ဟင် ဟင် ငါ ဝင်လို့ရသွားပြီ]

[ငါ ဝင်လာတယ်၊ ပြန်ထွက်သွားတယ်၊ အခု ပြန်ဝင်လာပြန်ပြီ]

အကြိမ်ကြိမ် ကန်ထုတ်ခံနေရသော ပရိသတ်တစ်စုမှာ ရုတ်တရက် ဝင်ခွင့်ရသွားကြ၏။

မသိစိတ်အရ 'အနောက်သို့' ကို နှိပ်လိုက်ပြီးမှသာ၊ တိုက်ရိုက်ထုတ်လွှင့်မှု အခန်းထဲသို့ ဝင်ရောက်နိုင်သွားကြောင်း သတိထားမိလိုက်ကြသည်။

[ဆေးရုံသွားပြီး စစ်ဆေးပြီးပြီ နေ့လယ်လောက်ဆို အဖြေထွက်လောက်မယ်]

[အင်း ငါ့ဟာက မနက်ဖြန်မှ အဖြေထွက်မှာ ငါ စဉ်းစားကြည့်တာတောင် ကိုယ့်ဘာသာ ဘယ်လိုလုပ် ရုတ်တရက်ကြီး ရောဂါကြီး ရသွားလဲဆိုတာ နားမလည်နိုင်သေးဘူး]

[ငါက ပုံမှန်ဆို ဆေးလိပ်သောက်တတ်တော့ ဒါနဲ့ ပတ်သက်နေမယ် ထင်တယ် ]

[ဟင် တခြား ပရိသတ်တွေရော ဘာလို့ စကားမပြောကြတော့တာလဲ]

အသစ်ဝင်လာသော ပရိသတ်များသည် ခဏမျှ စကားပြောဆိုကြပြီး၊ မိမိတို့၏ ဤနေ့တစ်ဝက်တာ အတွေ့အကြုံများကို ဝေမျှပြီးနောက်၊ မှတ်ချက်များ တဖြည်းဖြည်း နည်းပါးလာကြောင်း သတိထားမိလိုက်ကြ၏။

နောက်ဆုံးတွင်မူ ကန်ထုတ်ခံရပြီးနောက် ပြန်လည် ဝင်ရောက်လာသူများသာ ကျန်ရစ်တော့သည်။

အခြားသူများရော ဘယ်ရောက်သွားကြသနည်း။

အခြားသူများမှာ စကားမပြောချင်ကြတော့ချေ။

နေ့တစ်ဝက်တိတိ အစားအသောက် ပွဲတော်ကို ဖြတ်သန်းခဲ့ရသော ပရိသတ်များသည် ဤသူများ၏ စကားပြောဆိုမှုများကို တိတ်ဆိတ်စွာ ကြည့်နေကြ၏။

[......]

'အဲ့အချိန်တုန်းက ငါတို့ ဘာလို့များ ထွက်မသွားခဲ့ကြပါလိမ့်'

'အဲဒီတုန်းက ငါတို့ ဦးနှောက်တွေ ဘာတွေများ တွေးနေခဲ့ကြတာလဲ'

'Streamer က အကြိမ်ကြိမ် သတိပေးနေခဲ့တာကို'

[အတိတ်က တန်ဖိုးရှိတဲ့ အခွင့်အရေးတစ်ခု ငါ့ရှေ့မှာ ရှိခဲ့ဖူးတယ်၊ ဒါပေမယ့် ငါ သေချာ တန်ဖိုးမထားခဲ့ဘူး]

[ခေတ်ရေစီးကြောင်း နောက်ကို လိုက်မယ်၊ Streamer ရဲ့ ခြေလှမ်းတွေ နောက်ကို လိုက်မယ်၊ မရှုံးပါဘူး၊ မရှုံးပါဘူး]

[တချို့ကိစ္စတွေက တစ်ယောက်ယောက်တော့ သိထားဖို့ လိုတယ်၊ တစ်ယောက်ယောက်တော့ မှတ်မိနေဖို့ လိုတယ်၊ ပြီးတော့ ဆက်လက် လက်ဆင့်ကမ်းသွားရမယ် ဒါ့အတွက် ငါ ဘာပဲဖြစ်ဖြစ် နည်းနည်းလေးမှ အရေးမကြီးပါဘူး]

အခုမှ ဝင်လာပြီး အစားအသောက် ပွဲတော်ကို မမြင်လိုက်ရသော ပရိသတ်များမှာမူ [.....] ဟုသာ မှတ်ချက်ပေးနိုင်တော့၏။

'ဒီကောင်တွေ ဘာတွေ ပြောနေကြတာလဲ'

'နားထောင်ရတာ တစ်မျိုးကြီးပဲ'

'ငါတို့ မရှိတဲ့ အချိန်တုန်းက ဘာတွေများ ဖြစ်သွားခဲ့တာလဲ' ဟု တွေးတောနေကြသည်။

[ရှူး တိတ်တိတ်နေ Streamer နောက်လိုက်ပြီး တစ္ဆေဈေးတန်း လျှောက်လည်ကြစို့]

……

တိုက်ရိုက်ထုတ်လွှင့်မှု မြင်ကွင်းထဲတွင်

လမ်းမပေါ်၌ 'မရည်ရွယ်ဘဲ ကြည့်မိသယောင် ဟန်ဆောင်ကာ' ကြည့်လာကြသော၊ မသေချာ မရေရာမှု အနည်းငယ် ပါဝင်နေပုံရသည့် အကြည့်များ ပိုမိုများပြားလာသည်ကို သတိပြုမိလိုက်၏။

ထိုအခါ ကျန်းလင် သည် ပတ်ဝန်းကျင်ကို တစ်ချက် ကြည့်လိုက်ပြီးနောက်၊ အနီးအနားရှိ တစ္ဆေလက်နက်ဆိုင် တစ်ဆိုင် အတွင်းသို့ ဝင်ရောက်သွားတော့သည်။

အနောက်ဘက်နန်းဆောင်၏ တစ္ဆေဈေးတန်းတွင် လမ်းဘေးဆိုင်ငယ်များ နည်းပါးပြီး၊ အများစုမှာ ဆိုင်ခန်းများ သီးသန့် ဖြစ်ကြသည်။

ဤဆိုင်အတွင်းရှိ အခင်းအကျင်းမှာ အလွန် ရိုးရှင်းလှပြီး၊ မည်သည့် ပစ္စည်းများ ရှိနေသည်ကို တစ်ချက်ကြည့်ရုံဖြင့် သိနိုင်၏။

ကုန်ပစ္စည်းတင်စင် အနည်းငယ်နှင့် ကောင်တာ တစ်ခုသာ ရှိသည်။

ကုန်ပစ္စည်းတင်စင်ပေါ်ရှိ ပစ္စည်းများမှာ မနည်းလှဘဲ၊ ကုန်စုံဆိုင် တစ်ဆိုင်နှင့်ပင် တူနေပေသည်။

ကောင်တာ အရှေ့တွင်

တီရှပ်အပွကြီးကို ဝတ်ဆင်ထားပြီး ဆံပင်ရှည်ကို အနောက်တွင် စည်းနှောင်ထားသော အမျိုးသား အရောင်းဝန်ထမ်း တစ်ဦး ရှိနေ၏။

ဧည့်သည် မရှိသဖြင့်၊ ထိုဝန်ထမ်းမှာ ပျင်းရိပျင်းတွဲဖြင့် တုတ်တစ်ချောင်းကို ကိုင်ထားသည်။

တုတ်၏ တစ်ဖက်စွန်းတွင် သန့်ရှင်းရေး တစ္ဆေ ကောင်ရေ အတော်များများကို ဆက်သွယ်ထား၏။

၎င်းမှာ ကြက်မွေးတံမြက်စည်း တစ်ချောင်း သကဲ့သို့ ရှိပြီး၊ ကောင်တာပေါ်တွင် ဘယ်ညာ ပွတ်တိုက်ကာ မိမိဘာသာ သန့်ရှင်းရေး လုပ်နေတော့သည်။

ဧည့်သည် ရောက်လာသည်ကို တွေ့သောအခါ၊ သူက ပျင်းရိပျင်းတွဲဖြင့် တစ်ခွန်းသာ ပြောလိုက်၏။

"ဘာဝယ်ချင်လဲ ကိုယ့်ဘာသာ ကြည့်ချင်တာ ကြည့်၊ ရွေးပြီးရင် ဒီမှာ လာရှင်း"

ကျန်းလင် ကလည်း မလောပါဘဲ "အင်း" ဟု ဖြေလိုက်ကာ၊ ကုန်ပစ္စည်းတင်စင် တစ်ခုမှ စတင်၍ လိုက်လံ ကြည့်ရှုလိုက်သည်။

ကုန်ပစ္စည်းတင်စင်ပေါ်တွင် အများအားဖြင့် အသေးစား တစ္ဆေလက်နက်များသာ ရှိပြီး၊ တစ်ခုချင်းစီ၏ အောက်တွင် အတိုချုံး မိတ်ဆက်စာနှင့် စျေးနှုန်းများကို ဖော်ပြထား၏။

'အမြန်ဖတ်' ဟုခေါ်သော ပစ္စည်းတစ်ခု ရှိပြီး၊ ပုံပန်းသဏ္ဍာန်မှာ မျက်မှန်တစ်လက် ဖြစ်ကာ အနက်၊ အဖြူ၊ အနီ စသည့် အရောင်အမျိုးမျိုး ရှိသည်။

မိတ်ဆက်စာအရ၊ ဤမျက်မှန်သည် သင့်၏ စိတ်ပိုင်းဆိုင်ရာ အာရုံကြောများနှင့် ချိတ်ဆက်ကာ လျင်မြန်စွာ ဖတ်ရှုနိုင်ရန် ကူညီပေးနိုင်၏။

တူညီသော စာအုပ်တစ်အုပ်ကို ပုံမှန် အမြန်နှုန်းဖြင့် တစ်နာရီ သို့မဟုတ် ရက်အနည်းငယ် ကြာနိုင်သော်လည်း၊ ဤမျက်မှန်ကို တပ်ဆင်ထားပါက နာရီဝက် သို့မဟုတ် ဆယ်မိနစ် အတွင်းပင် ဖတ်ပြီးသွားနိုင်ပေသည်။

၎င်းမှာ အမြန်နှုန်း မြှင့်တင်စက် တစ်ခုနှင့် ဆင်တူလှ၏။

ထို့ပြင် သင့်၏ စိတ်အာရုံများနှင့် တိုက်ရိုက် ချိတ်ဆက်ထားသောကြောင့်၊ စာအုပ်ထဲရှိ အကြောင်းအရာများကိုလည်း ရှင်းလင်းပြတ်သားစွာ မြင်တွေ့နိုင်မည် ဖြစ်သည်။

သို့သော် စိတ်အာရုံများနှင့် ချိတ်ဆက်ထားခြင်းကြောင့်ပင်၊ အသုံးပြုသူ၏ လက်ခံနိုင်စွမ်းနှင့် စွမ်းအား အတိုးအလျော့ပေါ် မူတည်၍၊ ဦးနှောက်ထဲတွင် ပိတ်ဆို့နေသော ခံစားချက်မျိုး အနည်းနှင့်အများ ဖြစ်ပေါ်လာနိုင်၏။

စွမ်းအား နည်းပါးလေ၊ လက်ခံနိုင်စွမ်း ညံ့ဖျင်းလေ၊ ဤပိတ်ဆို့မှု ခံစားချက်က ပိုမို သိသာလာလေပင် ဖြစ်တော့သည်။

ဤသည်မှာ အရာဝတ္ထု တစ်ခုကို ဦးနှောက်ထဲသို့ အတင်းအကျပ် ထိုးသွင်းလိုက် သကဲ့သို့ ဖြစ်ရာ၊ သက်တောင့်သက်သာ မရှိခြင်းမှာ ပုံမှန်ပင် ဖြစ်၏။

သို့သော် ကောင်းကျိုးမှာ မိမိဖတ်ရှုလိုသော အရာများကို လျင်မြန်စွာ ဖတ်ရှုနိုင်ခြင်းပင် ဖြစ်သည်။

စာမေးပွဲ မတိုင်မီ အပြင်းအထန် ကြိုးစားသူများအတွက် မရှိမဖြစ်၊ အချိန်လုနေသူများအတွက် မရှိမဖြစ်ပစ္စည်းပင်ဖြစ်သည်လေ။

ဒုတိယ ပစ္စည်းမှာ 'စခန်းချရာတွင် မရှိမဖြစ် တဲ' ဖြစ်ပြီး၊ မူလပုံစံမှာ တဲငယ်လေး တစ်လုံး ဖြစ်သည်။

မိတ်ဆက်စာအရ ၎င်းအတွင်းသို့ တစ္ဆေချီများ ထည့်သွင်းလိုက်ရုံဖြင့်၊ လူနှစ်ဦး သို့မဟုတ် သုံးဦးခန့် နေထိုင်နိုင်သော အိပ်ခန်းငယ်လေး တစ်ခု အဖြစ်သို့ ပြောင်းလဲသွားနိုင်၏။

အတိုင်းအတာ တစ်ခုအထိ ကာကွယ်ပေးနိုင်စွမ်းနှင့် အာရုံခံစားမှုများကို ဖြတ်တောက်ပေးနိုင်စွမ်း ရှိသဖြင့်၊ အပြင်ဘက်တွင် တိတ်တဆိတ် စိတ်လှုပ်ရှားမှုများ ရှာဖွေချင်လျှင်တောင် ရနိုင်ပေသည်။

ထို့အပြင် အသေးစား ဂိမ်းစက်များ၊ ဝါးပုစဉ်းများ၊ သန့်ရှင်းရေး တစ္ဆေနှင့် တွဲဖက် အသုံးပြုရသော သန့်ရှင်းရေး ဦးထုပ် စသည်တို့လည်း ရှိသေး၏။

ယနေ့ နံနက်က သတင်းအသစ် လာပို့သော အတောင်ပံပါ ဘောလုံးမျိုးကိုလည်း ကျန်းလင် တွေ့လိုက်ရပြီး၊ ၎င်း၏ စျေးနှုန်းမှာ လူသားများ၏ မိုဘိုင်းဖုန်း တစ်လုံးစာနှင့် ညီမျှပေသည်။

……

ကုန်ပစ္စည်းတင်စင်ပေါ်တွင် အကြီးအသေး ပစ္စည်း အမျိုးပေါင်း ရာချီ မက ရှိနေပြီး၊ တစ်ခုချင်းစီ၏ လုပ်ဆောင်ချက်များမှာ ကွဲပြားခြားနားကြသည်။

တိုက်ရိုက်ထုတ်လွှင့်မှု အခန်းရှိ ပရိသတ်များသည်လည်း ကင်မရာ မြင်ကွင်းမှ တစ်ဆင့် လိုက်လံ ကြည့်ရှုနေကြ၏။

သူတို့၏ မျက်စိများပင် ပြာလာကြပြီး၊ မျက်နှာပေါ်တွင် 'လို ချင် တယ်' ဟူသော စာလုံးများ ရေးသားထား သကဲ့သို့ ရှိနေတော့သည်။

[ဒီပစ္စည်းတွေက တော်တော် ဆော့လို့ကောင်းမယ့်ပုံပဲ]

[အမြန်ဖတ် စက်လေးသာ ရှိရင် အမေက ငါ နောက်ဆုံးမိနစ်မှ စာကျက်တာ အလုပ်မဖြစ်မှာကို စိတ်ပူစရာ မလိုတော့ဘူး]

[ပွင့်ပွင့်လင်းလင်းပဲ ပြောမယ်၊ ငါ အဲဒီ တဲလေးကို လိုချင်တယ်]

[အပေါ်က လူ၊ ဘယ်တဲလေးကိုလဲ]

ဖုန်း မျက်နှာပြင်ရှေ့တွင်မူ

ပညာရှင် အချို့သည်လည်း မိမိတို့၏ မျက်မှန်များကို ပင့်တင်လိုက်ကြ၏။

ထို တစ္ဆေလက်နက် တစ်ခုချင်းစီကို အလေးအနက် အကဲခတ်နေကြသည်။

ယခု သူတို့ လေ့လာသုတေသန ပြုလုပ်ခွင့် ရနိုင်မည်လား မသိနိုင်ပေမဟုတ်လော။

……

'ရွှတ် ရွှတ်'

ထို အမျိုးသား အရောင်းဝန်ထမ်းမှာ သန့်ရှင်းရေး တစ္ဆေကို ကိုင်ကာ ဆက်လက် ပွတ်တိုက်နေရင်း၊ တစ်ဖက်မှလည်း တွေးတောနေ၏။

'ခုနက အသံက နည်းနည်းရင်းနှီးနေသလိုပဲ၊ သိတဲ့ တစ္ဆေများလား'

အတန်ကြာသည်အထိ အသံမကြားရတော့သဖြင့်၊ သူက ခေါင်းမော့ကာ ဟိုဘက်သို့ တစ်ချက် လှမ်းကြည့်လိုက်ရာ၊ မြင့်မားသော အဖြူရောင် ဦးထုပ်ကြီး တစ်လုံးကို မြင်လိုက်ရသည်။

'တမန်တော်လား၊ Cosplay လား'

အနောက်ဘက်နန်းဆောင်၏ ဝတ်စုံနှင့် အရှေ့ဘက်နန်းဆောင်၏ အလုပ်ဝတ်စုံတို့မှာ သိသာထင်ရှားစွာ ကွဲပြားခြားနားကြ၏။

ငရဲပြည် တိုက်ရိုက်ထုတ်လွှင့်မှု အခန်း ပေါ်လာပြီးကတည်းက၊ အနောက်ဘက်နန်းဆောင်တွင် အရှေ့ဘက်နန်းဆောင်မှ အဖြူရောင်ဝိညာဉ်ဖမ်းတမန်တော်ကို Cosplay လုပ်သူ အတော်များများ ရှိလာခဲ့သည်။

ကောင်တာဘက်တွင် သန့်ရှင်းရေး လုပ်၍ ပြီးလုနီးပါး ဖြစ်သွားသောအခါ၊ တာ့ယန် သည် ဟိုဘက်သို့ တစ်ချက် ထပ်ကြည့်လိုက်၏။

ထို့နောက် အနည်းငယ် စဉ်းစားလိုက်ပြီး သန့်ရှင်းရေး တစ္ဆေ အခိုင်လိုက်ကို ကိုင်ကာ ကုန်ပစ္စည်းတင်စင်ဘက်သို့ လျှောက်သွားရင်း၊ ကျပန်း လိုက်လံ သန့်ရှင်းရေး လုပ်နေလိုက်ကာ တစ်ဖက်မှလည်း မေးလိုက်၏။

"လိုချင်တာ မတွေ့ဘူးလား"

ကျန်းလင် မှာ ကုန်ပစ္စည်းတင်စင် နှစ်ခုကို ကြည့်ပြီးသွားပြီ ဖြစ်ကာ၊ ယခုအချိန်တွင် အဖြူရောင် ခရုခွံ တစ်ခုကို ကိုင်ထားသည်။

"စိတ်ဝင်စားစရာ ကောင်းပြီး အသုံးဝင်မယ့် ဟာလေးတွေ ဝယ်ချင်လို့ပါ"

'ဒီအသံက'

တာ့ယန် မှာ ရုတ်တရက် ခေါင်းမော့လာပြီး ကျန်းလင်ကို အထက်အောက် တစ်ချက် အကဲခတ် ကြည့်ရှုလိုက်ကာ ပြုံးလိုက်၏။

"ညီအစ်ကို မင်းရဲ့ Cosplay က တော်တော် ပြည့်စုံတာပဲ၊ အသံပြောင်းစက်တောင် ပြင်ဆင်ထားသေးတယ်"

စကား တစ်ဝက်ခန့် အရောက်တွင်၊ ကျန်းလင် လက်ထဲရှိ ခရုခွံကို အောက်ချလိုက်ပြီး ခေါင်းလှည့် ကြည့်လာရာ၊ မျက်နှာပေါ်တွင် အနည်းငယ် နားမလည်နိုင်သော အမူအရာများ ပေါ်လွင်နေ၏။

ထိုအခါ တာ့ယန် ၏ နှုတ်ခမ်းထောင့်မှ အပြုံးမှာ ချက်ချင်း တောင့်တင်းသွားတော့သည်။

ကျန်နေသော စကားများမှာလည်း လည်ချောင်းထဲတွင် တစ်ဆို့သွားတော့သည်။

အတန်ကြာပြီးနောက်၊ သူက အသံခြောက်ကြီးဖြင့် နှစ်ချက်ခန့် ရယ်မောလိုက်ကာ မေးလိုက်၏။

"Cosplay လုပ်ထားတာ ဝိညာဉ်တမန်တော်ကျန်း လား"

ကျန်းလင် သူ့ကို ကြည့်နေသော်လည်း၊ စကားမပြောပါချေ။

တာ့ယန် မှာ ဆက်၍ မရယ်နိုင်တော့ဘဲ၊ ဦးနှောက်က တဖြည်းဖြည်း စိတ်လှုပ်ရှားလာချိန်တွင် ရုတ်တရက် ကျန်းလင် ထံမှ "အင်း" ဟူသော အသံကို ကြားလိုက်ရသည်။

"Cosplay လုပ်ထားတာလေ၊ တူတယ် မဟုတ်လား" ဟု ကျန်းလင် က ပြောလိုက်၏။

ထိုအခါမှသာ တာ့ယန် မှာ သက်ပြင်းရှည်ကြီး တစ်ချက် ချလိုက်မိသော်လည်း၊ အနည်းငယ် စိတ်ပျက်သွားပုံရသည်။

'ဟုတ်သားပဲ၊ ဝိညာဉ်တမန်တော်ကျန်းက မနက်အစောကြီးကတည်းက အစားအသောက် ပွဲတော် သွားတက်နေတယ်လို့ ကြားထားတာပဲ'

သူက ကျန်းလင်၏ ပခုံးကို ပေါ့ပေါ့ပါးပါး ပုတ်လိုက်ကာ ပြောလိုက်၏။

"ဟား ဟား ဟား တကယ် တူလွန်းတယ် ညီအစ်ကိုရာ၊ ငါက ဝိညာဉ်တမန်တော်ကျန်း အစစ်များ ရောက်လာပြီလားလို့တောင် ထင်လိုက်မိတာ"

"မြောက်ဘက်နန်းဆောင်က ကောင်တွေရဲ့ မျက်နှာပုံဖော်တဲ့ နည်းပညာက အကောင်းဆုံးလို့ ငါ ကြားဖူးတယ်၊ မင်းက သူတို့ကိုတောင် ကျော်လွန်သွားလုနီးပါးပဲ"

တာ့ယန် ကျွတ်ကျွတ်စုပ်ကာ အံ့သြချီးကျူးလိုက်၏။

"လာ လာ လာ၊ ငါ မင်းကို ဘယ်ပစ္စည်းတွေက ဆော့လို့ကောင်းလဲဆိုတာ အကြံပေးမယ်"