အခန်း ၃၂၄

🫧 Chapter 324

တာ့ယန် က ကျွတ်ကျွတ်စုပ်ကာ အံ့သြချီးကျူးလိုက်၏။

"လာ လာ လာ၊ ငါ မင်းကို ဘယ်ပစ္စည်းတွေက ဆော့လို့ကောင်းလဲဆိုတာ အကြံပေးမယ်"

တစ်ဖက်သို့ လှည့်လိုက်ချိန်တွင် ကျန်းလင် ၏ ထိုမျက်နှာကို မြင်လိုက်ရသဖြင့်၊ တာ့ယန် မှာ မသိစိတ်အရ အနည်းငယ် စိတ်လှုပ်ရှားသွားပြန်သည်။

ထို့နောက် 'ကျွတ် ကျွတ်' ဟု နှစ်ချက်ခန့် စုပ်သပ်လိုက်ပြီး ကျန်းလင် အား ဆိုင်အတွင်းရှိ ပစ္စည်းများကို စတင် မိတ်ဆက်ပေးလေရာ အလွန်ပင် သက်ဝင်လှုပ်ရှားနေတော့၏။

"ဒီ အုတ်ခဲနဲ့တူတဲ့ စာအုပ်ကို ကြည့်လိုက်၊ အထဲမှာ နေရာလွတ် ပါတယ်၊ လူတော်တော်များများက ပစ္စည်းတွေ ဝှက်ထားဖို့ သုံးကြတယ်၊ လျှို့ဝှက်နိုင်စွမ်း တော်တော် ကောင်းတာလေ ဒါပေမယ့် မိန်းမဖြစ်သူကများ တွေ့သွားရင်တော့ ဒါက ခေါင်းကို တိုက်ရိုက် ထုခွဲဖို့ ဖြစ်သွားနိုင်တယ်"

"ပြီးခဲ့တဲ့တစ်ခေါက်က ဘေးအိမ်က ဝမ်ရှောင်ဟွာ ဆိုရင် ဒါကိုသုံးပြီး သူ့ယောကျာ်း ခေါင်းကို ထုခွဲလိုက်တာလေ၊ လမ်းသုံးလမ်းလောက်အထိ ပြေးပြီးလိုက်ရိုက်တာ ဟား ဟား ဟား"

"ဒီ တစ်ရှူးထုပ်ကို ထပ်ကြည့်လိုက်ဦး၊ အထဲက တစ်ရှူးတွေက တစ်ခါသုံးတွေ ဖြစ်ပြီး သဲလွန်စတွေကို ဖျက်ပစ်နိုင်တယ်"

မည်သို့သော သဲလွန်စများ ဖြစ်သနည်း။

စာရေးသားထားသော သဲလွန်စများ၊ လမ်းလျှောက်ထားသော ခြေရာများ၊ ဆီစွန်းကွက်များ စသည်တို့ပင် ဖြစ်သည်။

မျက်စိဖြင့် မမြင်နိုင်သော အနံ့အသက်များမှစ၍၊ မျက်စိဖြင့် မြင်နိုင်သော မည်သည့် သဲလွန်စကိုမဆို ဖျက်ပစ်နိုင်ပေသည်။

"အနံ့ကို ဘယ်လို ဖျက်မလဲဆိုတော့၊ ဒါကို မီးရှို့လိုက်ရုံပဲ လမ်းလျှောက်ထားတဲ့ ခြေရာတွေ ဆိုရင်တော့၊ အပေါ်ကနေ ဖြန့်ခင်းလိုက်ရုံနဲ့ရတယ်"

"တချို့တစ္ဆေတွေက ဒါကိုသုံးပြီး စာလုပ်၊ စာမေးပွဲဖြေကြတယ်၊ တချို့ကျတော့လည်း ဟီး ဟီး"

ထိုအခါ တာ့ယန် က ပြုံးလိုက်ပြီး အသံကို နှိမ့်ကာ ပြောလိုက်၏။

"သန်းခေါင်ယံမှာ ခိုးထွက်ဖို့ သုံးကြတာလေ"

မည်သည့် သဲလွန်စမှ ကျန်ရစ်မည် မဟုတ်ကြောင်း သူ အာမခံနိုင်ပေသည်။

"ပြီးတော့ ဒီ ခရုခွံလေး"

တာ့ယန် ၏ စိတ်အားထက်သန်စွာ မိတ်ဆက်ပေးမှုအောက်တွင်၊ ကျန်းလင် သည် ဝယ်ယူလိုသော တစ္ဆေလက်နက်များကို လျင်မြန်စွာ ရွေးချယ်နိုင်ခဲ့သည်။

ထို့အပြင် အနောက်ဘက်နန်းဆောင်၏ ငရဲပြည် ဘဝက မည်မျှစုံလင်လှကြောင်းကိုလည်း တစ်ပါတည်း သိရှိနားလည်သွားတော့၏။

တိုက်ရိုက်ထုတ်လွှင့်မှု အခန်းထဲရှိ ပရိသတ်များမှာမူ အစောကြီးကတည်းက ရယ်မောလွန်း၍ သေမတတ် ဖြစ်နေကြလေပြီ။

[ရယ်လို့ မရတော့ဘူး ဟား ဟား ဟား Streamer က တော်တော် နောက်တာပဲ]

[Streamer 'ငါက ကိုယ့်ဘာသာ ပြန် Cosplay လုပ်ထားတာလေ၊ တူတယ် မဟုတ်လား']

[ဒီ တုံ့ပြန်မှုက တော်တော် သဘာဝကျတယ်၊ ငါလည်း ကိုယ့်အိုင်ဒေါကို ပထမဆုံးအကြိမ် မြင်ဖူးတုန်းက 'ဟင် ခုနက ငါ့အိုင်ဒေါများလား၊ ထပ်ကြည့်လိုက်တော့လည်း တော်တော် တူသားပဲ' လို့ တွေးမိတာပဲ]

ပရိသတ်များမှာ စားပွဲကို ပုတ်ကာ ရယ်မောနေကြပြီး၊ အပေါ်သို့ ကော့တက်နေသော မိမိတို့၏ နှုတ်ခမ်းထောင့်များကို လုံးဝ မထိန်းချုပ်နိုင်ကြတော့ချေ။

'အမလေး၊ Streamer ရဲ့ ဒီလုပ်ရပ်က ငါတို့ ထင်မှတ်ထားတာထက်ကို ကျော်လွန်နေတာပဲ'

Streamer ကို အသစ်တစ်ဖန် ပြန်လည် သိကျွမ်းလိုက်ရ သကဲ့သို့ ခံစားနေကြရသည်။

[ငါ ရယ်ရလွန်းလို့ အူတောင် တက်နေပြီ ဟား ဟား ဟား]

[အရောင်းဝန်ထမ်း 'မင်းတို့ ဖယ်လိုက်ကြ၊ မင်းတို့ အကုန်လုံးက ပရိသတ် အတုတွေပဲ၊ ဒါက သိသိသာသာကြီး ဝိညာဉ်တမန်တော်ကျန်း ကို ဟန်ဆောင်ထားတာလေ']

……

"ဖြည်းဖြည်း သွားပါဦး"

အရောင်းအဝယ် အောင်မြင်သွားသဖြင့် တာ့ယန် ၏ စိတ်အခြေအနေသည်လည်း မဆိုးလှပေ။

ကျန်းလင် ဤဆိုင်မှ ထွက်ခွာလာချိန်တွင်၊ မျက်နှာပေါ်၌ မျက်နှာဖုံး တစ်ခု တိုးလာခဲ့သည်။

ထိုအရောင်းဝန်ထမ်း ပြောပုံအရ၊ ၎င်းမှာ အနောက်ဘက်နန်းဆောင်၏ နောက်ဆုံးပေါ် မျက်နှာပုံဖော် မျက်နှာဖုံး ဖြစ်ပေသည်။

ကျန်းလင် သည် အဖြူရောင် မျက်နှာဝိုင်းဝိုင်း တစ်ခုကို အလွယ်တကူ ပုံဖော်လိုက်၏။

အရောင်လည်း မစပ်တော့ဘဲ၊ မျက်လုံးပေါက် နှစ်ပေါက်သာ ဖောက်ကာ မျက်နှာပေါ်တွင် တပ်ဆင်လိုက်တော့သည်။

ထို့နောက် သူ၏ ကိုယ်ခန္ဓာက လေပြေတစ်ပြည်ကဲ့သို့ ရွေ့လျားသွားကာ ဆိုင်ထဲမှ ထွက်ခွာသွားလေသည်။

တံခါးအပြင်ဘက်တွင် ခိုးကြောင်ခိုးဝှက် စောင့်ကြည့်နေကြသော တစ္ဆေသရဲများမှာ သတိပင် မထားမိလိုက်ကြဘဲ 'ခုနက တစ်ခုခု ဖြတ်သွားသလား' ဟုသာ တွေးလိုက်ကြသည်။

ဤတစ်ကြိမ် ကျန်းလင် လမ်းပေါ်တွင် ပြန်လျှောက်သောအခါ လမ်းသွားလမ်းလာများက မကြာခဏ ငေးကြည့်ခြင်း၊ လျှပ်စစ်တိုင်ကို ဝင်တိုက်ခြင်း၊ ခေါင်း ဒီဂရီ သုံးရာ့ခြောက်ဆယ် လှည့်ကြည့်ခြင်း စသည့် ဖြစ်ရပ်များ ထပ်မံ ပေါ်ပေါက်မလာတော့ချေ။

တစ်ခါတစ်ရံ ဖြတ်သွားသော တစ္ဆေငယ်လေးများက သူ၏ မျက်နှာဖုံးကို ကြည့်ကာ ပါးစပ်ပိတ်၍ ခိုးရယ်နေတတ်ကြခြင်းသာ ရှိတော့သည်။

တိုက်ရိုက်ထုတ်လွှင့်မှု အခန်းထဲရှိ ပရိသတ်များမှာမူ ရယ်မော၍ မဆုံးနိုင်သေးပေ။

[Streamer က နောက်ဆုံးတော့ နာမည်ကြီး တစ်ယောက်ရဲ့ အသိစိတ် ဝင်လာပြီပေါ့ ဟား ဟား ဟား]

[ငါ့မှာသာ ဒီလို မျက်နှာပုံဖော်တဲ့ နည်းပညာ ရှိခဲ့ရင်၊ အဲဒီတုန်းက အမေ လမ်းသုံးလမ်းလောက် ပြေးရိုက်တာကို ခံရမှာ မဟုတ်ဘူး]

[ဒီမျက်နှာဖုံးက ခေတ်စားလာတော့မယ်လို့ ငါ ထင်တယ်]

[အန်းအန်းစက်ရုံ မိတ်ဆွေတို့ ဒီမျက်နှာဖုံး ဝယ်ချင်ကြလား စီစဉ်ပေးလိုက်မယ်လေ]

……

ထို့နောက် ကျန်းလင်သည် အခြားသော တစ္ဆေလက်နက်ဆိုင် အချို့သို့လည်း သွားရောက် လည်ပတ်ခဲ့၏။

စီးနင်းရသော တစ္ဆေလက်နက် အမျိုးအစားများကိုလည်း တွေ့ခဲ့ရပြီး၊ ဆိုင်ကယ်များ၊ ပျံသန်းသောလင်ပန်းများ ပါဝင်ကာ သစ်သားမြင်းနှင့် ပုခက်ပုံစံများပင် ရှိနေပေသည်။

ဆိုင်ရှင်၏ မိတ်ဆက်မှုအရ၊ ဤတစ္ဆေလက်နက်များကို အသုံးပြုရန်အတွက် ကြိုတင်၍ စွမ်းအင် ဖြည့်သွင်းထားရမည် ဖြစ်သည်။

ခရီးသွားရန် အသုံးပြုပါက အမြန်နှုန်းမှာ သိပ်မမြန်လှချေ။

အလွန်အမင်း စိတ်လှုပ်ရှားဖွယ် ကစားနည်းများကို နှစ်သက်သူ အချို့မှလွဲ၍၊ ပုံမှန်အားဖြင့် ကလေးများ ကစားရန်အတွက်သာ ဝယ်ယူလေ့ရှိကြသည်။

တစ္ဆေများသည် လွင့်မျောသွားလာနိုင်ကြ၏။

သို့သော် လွင့်မျောနိုင်ခြင်းက သူတို့၏ ကစားခုန်စား ပြုလုပ်ခြင်းအပေါ် မည်သို့မျှ သက်ရောက်မှု မရှိပေ။

အထူးသဖြင့် အသက်ရှင်စဉ် အခါက မကစားခဲ့ရသော၊ အားရပါးရ မကစားခဲ့ရသော သူများအတွက် ပို၍ပင် မှန်ကန်လှသည်။

ကစားရန် အပြင်၊ ထိုယာဉ်ပုံစံများကို အထာကျကျ နေရန်အတွက်လည်း အသုံးပြုနိုင်ကြကာ အလွန်ပင် မိမိုက်လှပေသည်။

ခေါင်မိုးပေါ်သို့ တစ်ပတ်ခန့် သွားရောက် ပတ်ကူးကာ၊ လှည့်ကွက်များ ပြုလုပ်ပြပြီးနောက်၊ မိန်းကလေးများ၏ အားပေးအော်ဟစ်သံ နှစ်ခွန်းခန့် ကြားလိုက်ရခြင်းက မည်မျှ အရသာရှိလိုက်မည်နည်း။

ဤတစ္ဆေလက်နက်များမှာ ငရဲပြည်တွင် ငရဲပြည်၏ ကစားနည်းများ ရှိကြ၏။

ထို့အပြင် လူ့လောကတွင် ရှိစဉ်ကထက် ပိုမို လွတ်လပ်စွာ ကစားနိုင်ကြသည်။

မည်သူ၏ စိတ်ကူးဉာဏ်က ပို၍ ကျယ်ပြန့်သနည်း၊ မည်သူ၏ ကစားနည်းက ပို၍ ဆန်းသစ်သနည်း ဆိုသည်ကိုသာ ယှဉ်ပြိုင်ကြခြင်း ဖြစ်သည်။

တိုက်ရိုက်ထုတ်လွှင့်မှု အခန်းထဲရှိ ပရိသတ်များမှာ ကြည့်ရင်းဖြင့် စိတ်လှုပ်ရှားလာကြသော်လည်း၊ သူတို့က စွမ်းအင် မဖြည့်သွင်းနိုင်ကြချေ။

ရရှိခဲ့လျှင်တောင် ကစား၍ ရမည် မဟုတ်ပေ။

……

ကျန်းလင် တစ္ဆေဈေးတန်းမှ ထွက်ခွာသွားပြီး မကြာမီမှာပင် ကျန်းလင် ကို ပထမဆုံး ဧည့်ခံခဲ့သော ထိုတစ္ဆေလက်နက်ဆိုင် အတွင်း၌ တာ့ယန် သည် သတင်းတစ်ခုကို ရုတ်တရက် ရရှိလိုက်၏။

ထိုသတင်းမှာ ဝိညာဉ်တမန်တော် ကျန်း မှာ အစားအသောက် ပွဲတော်တွင် နေ့တစ်ဝက်ခန့်သာ နေပြီးနောက် ထွက်ခွာသွားခဲ့ပြီ ဖြစ်သည် ဟူသောသတင်းပင်ဖြစ်၏။

"ဘယ်ကို ထွက်သွားတာလဲ" ထိုအခါ တာ့ယန် က စိုးရိမ်တကြီး မေးလိုက်သည်။

သူ့ ရင်ထဲတွင်တော့ အဖြေတစ်ခုက ခပ်ရေးရေး ပေါ်လွင်နေပြီ ဖြစ်၏။

သတင်းလာပို့သော တစ္ဆေက ခေါင်းကုတ်လိုက်ပြီး "တစ္ဆေတချို့က သူ တစ္ဆေဈေးတန်းဘက်ကို လာတာ တွေ့လိုက်တယ်လို့ ပြောတယ်" ဟု ပြန်ဖြေသည်။

"တကယ်ပဲ တကယ်ပဲပေါ့"

တာ့ယန် မှာ စိတ်လှုပ်ရှားလွန်း၍ ခုန်တက်မိမတတ် ဖြစ်သွားတော့သည်။

ဝိညာဉ်တမန်တော်ကျန်း တကယ်ပဲ တစ္ဆေဈေးတန်းကို လာခဲ့ခြင်း ဖြစ်၏။

စိတ်လှုပ်ရှားစွာဖြင့် ဆိုင်အတွင်း သုံးပတ်ခန့် လှည့်ပတ်ပြီးနောက်၊ သူက ရုတ်တရက် ရပ်တန့်သွားသည်။

"အာ အာ အာ"

'ဝိညာဉ်တမန်တော်ကျန်း လာတုန်းက၊ ငါ ဘာတွေများ လုပ်ခဲ့မိပါလိမ့် သွားပါပြီ သွားပါပြီ.'

ထို့နောက် တာ့ယန်က သတင်းလာပို့သော တစ္ဆေကို ဆွဲထားလိုက်ပြီး "ငါ့ကို ကြည့်စမ်း၊ ပုံစံက ဘယ်လိုနေလဲ" ဟု မေးလိုက်၏။

"အင်း အဆင်ပြေပါတယ် မျက်နှာလေး ရှင်းပြီး အဝတ်အစား သပ်ရပ်နေတာပဲ"

"ဒါဆို တော်ပါသေးတယ် တော်ပါသေးတယ်"

တာ့ယန် မှာ ထပ်မံ၍ လှည့်ပတ်နေပြန်ပြီး၊ ခေါင်းထဲတွင်တော့ ခုနက ဝိညာဉ်တမန်တော်ကျန်းလာရောက် ဝယ်ယူခဲ့စဉ်က မြင်ကွင်းများကို အဆက်မပြတ် ပြန်လည် မြင်ယောင်နေတော့၏။

သူ ဘာတွေ ပြောခဲ့မိသနည်း။

ရိုင်းပျမှုများ မရှိခဲ့ဘူး မဟုတ်ပါလော။

' တိုက်ရိုက်ထုတ်လွှင့်မှု ကင်မရာကို သေချာ မျက်နှာမူခဲ့ရဲ့လား'

'ရုပ်ထွက်ရော ကောင်းရဲ့လား'

'နေပါဦး'

တာ့ယန် သူ၏ လက်ကို ရုတ်တရက် ကြည့်လိုက်သည်။

' အရင်တုန်းက သူက ဝိညာဉ်တမန်တော်ကျန်းကို နှစ်ချက်လောက် ပုတ်လိုက်မိသလိုပဲလား'

'ငါ့လက်ကြီးကို ဖြတ်ပြီး သိမ်းထားလိုက်ရမလားဟင် နောက်မှ လက်အသစ် ပြန်တပ်လို့ရတာပဲလေ'

……

တစ္ဆေဈေးတန်းမှ တစ်ပတ်ခန့် လည်ပတ်ပြီး ထွက်လာပြီးနောက် ပရိသတ် အတော်များများ၏ စိတ်များ လွင့်မျောသွားကြပြီး၊ မသိစိတ်အရ အစားအသောက် ပွဲတော်မှ အတွေ့အကြုံများကို မေ့ပျောက်သွားကြလေပြီ။

[အနောက်ဘက်နန်းဆောင်မှာ ဆော့လို့ကောင်းတဲ့ ပစ္စည်းတွေ အများကြီးပဲ၊ အီး ဟီး ဟီး ငါ သွားချင်တယ်]

[အရှေ့ဘက်နန်းဆောင်မှာ Streamer ရှိတယ်လေ ငါကတော့ တခြားဘယ်ကိုမှ သွားမှာ မဟုတ်ဘူး]

[ဒါပေမယ့် အရှေ့ဘက်နန်းဆောင်မှာ ဂိမ်းစက်တွေ မရှိဘူး၊ ဆိုင်ကယ်တွေလည်း မရှိဘူးလေ]

[ငါကတော့ တောင်ဘက်နန်းဆောင်က ပိုမိုက်တယ် ထင်တယ်၊ ဒီတစ္ဆေလက်နက်တွေက ဘာမှ မဟုတ်ဘူး၊ ကိုယ့်ဘာသာ အတောင်ပံ ပေါက်လာတာကမှ တကယ် အမိုက်စားကြီး]

ပရိသတ်များသည် အရှေ့၊ တောင် နှင့် အနောက် နန်းဆောင် သုံးခုကို အဓိကထား၍ ဆွေးနွေးလာကြသည်။

အရှေ့ဘက်နန်းဆောင်၏ အေးချမ်းသော အခြေအနေက မဆိုးလှပေ။

ချိတ်ပိတ်ခြင်း ပညာရပ်များကို သင်ယူနိုင်ပြီး၊ Streamer သည်လည်း ရှိနေ၏။

တောင်ဘက်နန်းဆောင်က ဖြောင့်မတ်ပြီး၊ အမိုက်စား စွမ်းရည်များနှင့် ကျင့်စဉ်များကလည်း အလွန်ကောင်းမွန်သည်။

အနည်းငယ် ဆင်းရဲခြင်းကသာ ပြဿနာဖြစ်၏။

အနောက်ဘက်နန်းဆောင်က ချမ်းသာပြီး၊ စိတ်ဝင်စားဖွယ် တစ္ဆေလက်နက် အများအပြား ရှိသည့်အပြင်၊ အသွင်ပြောင်းစက် နှင့် နေရာပြောင်းရွှေ့ခြင်း မှော်ဝင်္ကပါတို့လည်း ရှိပေသည်။

စိတ်ရှုပ်ထွေးစရာပင်။

သို့သော် ပြန်တွေးကြည့်မည် ဆိုလျှင်၊ သူတို့မှာ အသက်ရှင်ရန် နှစ်ပေါင်းများစွာ ကျန်ရှိနေသေး၏။

' ဖြည်းဖြည်းချင်း စဉ်းစားကြမည်ပေါ့လေ'

ပရိသတ် တစ်ဦးက ပြောလိုက်သည် [ငါ ထင်တာတော့၊ ငါ နောင်ကျရင် အရှေ့ဘက် နယ်မြေမှာပဲ ဆက်နေဖြစ်လိမ့်မယ်]

အရှေ့ဘက်နန်းဆောင်တွင် အိမ်တစ်လုံး၏ ခံစားချက်မျိုး ရှိနေသကဲ့သို့ ခံစားရ၏။

အခြား နေရာများ အားလုံးက ခရီးသွား ဧရိယာများနှင့် ပိုတူနေပေသည်။

ရုတ်တရက် ပရိသတ် အများအပြား ခေါင်းမော့ကြည့်လိုက်ချိန်တွင်၊ တိုက်ရိုက်ထုတ်လွှင့်မှု မြင်ကွင်းထဲ၌ Streamer ရပ်တန့်သွားကြောင်းကို ပထမဆုံး သတိထားမိလိုက်ကြသည်။

ကျန်းလင်သည် မူလက အနောက်ဘက်နန်းဆောင်မှ သူ့အတွက် စီစဉ်ပေးထားသော အိမ်ရာသို့ ပြန်ရန် ဖြစ်၏။

သို့သော် နေရာပြောင်းရွှေ့ခြင်း မှော်ဝင်္ကပါဆီသို့ သွားရာ လမ်းခုလတ်တွင်၊ သူက ရုတ်တရက် အနည်းငယ် ကွဲပြားခြားနားနေသော စွမ်းအင် အငွေ့အသက် တစ်ခုကို ခံစားလိုက်ရသည်။

ထို့ပြင် တိုက်ရိုက်ထုတ်လွှင့်မှု ဘောလုံးငယ်လေး ကလည်း အနည်းငယ် လှုပ်ရှားသွားသည်လေ။

ထိုအခါ ပရိသတ်များသည် Streamer ၏ အကြည့်များနောက်သို့ လိုက်ပါ ကြည့်ရှုလိုက်ကြ၏။

နောက်တစ်စက္ကန့်တွင်၊ လူတိုင်း၏ အသက်ရှူသံများ ရပ်တန့်သွားကြတော့သည်။

မှတ်ချက် နေရာမှာလည်း လုံးဝ ရှင်းလင်းသွားပြီး၊ ကီးဘုတ်ပေါ်တွင် တင်ထားသော လက်ချောင်းများမှာလည်း လှုပ်ရှားရန်ပင် မေ့လျော့သွားကြချေသည်။

ကြည့်လိုက်သော် မလှမ်းမကမ်းတွင်၊ အရပ်ရှည်ရှည် လူရိပ်ကြီး တစ်ခုက မနှေးမမြန် အရှေ့သို့ လျှောက်လှမ်းနေ၏။

၎င်း၏ခန္ဓာကိုယ် တစ်ခုလုံးကို ရွှေရောင် အလင်းတန်းများ ဖုံးလွှမ်းထားသဖြင့်၊ တိကျသော ပုံပန်းသဏ္ဍာန်ကို ရှင်းလင်းစွာ မမြင်ရချေ။

သူ့ပခုံးပေါ်တွင်မူ တုတ်ရှည် တစ်ချောင်းကို ထမ်းထားပြီး၊ ဟန်ပန်မှာ အလွန်ပင် လွတ်လပ်ပေါ့ပါးနေကာ စွမ်းအားကြီးမားကာ ယုံကြည်မှု ရှိသော အငွေ့အသက်များ ထွက်ပေါ်နေ၏။

၎င်း၏ လှုပ်ရှားမှုများက အေးအေးဆေးဆေး ရှိလှသည်ဟု ထင်ရသော်လည်း၊ ခြေတစ်လှမ်း လှမ်းလိုက်တိုင်း၊ နောက်တစ်စက္ကန့်တွင် အခြား နေရာတစ်ခုသို့ ရောက်ရှိသွားပေသည်။

စက္ကန့် အနည်းငယ်မျှ အချိန်တိုအတွင်းမှာပင် ထို ရွှေရောင်လူရိပ်ကြီးမှာ ငရဲပြည်၏နက်ရှိုင်းသော နေရာများဆီသို့ ပျောက်ကွယ်သွားလေတော့သည်။

ထိုအခါ တိုက်ရိုက်ထုတ်လွှင့်မှု အခန်းမှာ တိတ်ဆိတ်သွား၏။

အတန်ကြာပြီးမှသာ၊ မှတ်ချက် တစ်ခုက တိတ်တဆိတ် လွင့်မျောလာသည်။

[ငါ၊ ငါ ခုနက မျက်စိများ ပြာသွားတာလား၊ ဒါမှမဟုတ်ရင် ဘာလို့များ တစ်ယောက်ယောက်ကို တွေ့လိုက်ရသလို ခံစားနေရတာလဲ]