အခန်း ၃၆၀

🍋 Chapter 360

"၈.၈ သန်း..... ထပ်ပြီး ဆွဲမယ့်သူ ရှိသေးလားခင်ဗျာ"

ဈေးနှုန်း ငြိမ်သက်သွားသည်ကို မြင်သည့်အခါ ကျိုးထျန်းက ပြုံးလျက် သူ၏ လေလံဆိုင်းဘုတ်ပြားကို လှမ်း၍ မြှင့်တင်လိုက်သည်။

လူအများစုမှာ လေလံပွဲများတွင် ဈေးနှုန်းမြှင့်တင်ပေးတတ်သည့် ကြားလူများရှိတတ်သည်ကို သိကြသဖြင့် ဤသည်မှာ ထူးဆန်းသည့် ကိစ္စတစ်ခု မဟုတ်ချေ။

သူ့ကဲ့သို့ပင် မိမိ၏ ပစ္စည်းများကို ဈေးနှုန်း မြင့်တက်သွားစေရန် ပြုလုပ်ကြသူများမှာ အနည်းငယ် ရှိလှပေသည်။

"၈.၉ သန်း..... ဒီလူကြီးမင်းက ၈.၉ သန်း ဆွဲလိုက်ပါတယ်ခင်ဗျာ၊ ဝါး... ဒါက တကယ်ပဲ ပြင်းထန်လွန်းပါတယ်၊ ဝိုင်တွေရဲ့ ဘုရင်လို့ ခေါ်ဆိုထိုက်တာ တကယ်ပဲ မဆန်းပါဘူးဗျာ"

"ယွမ် ၉ သန်း..... အခန်းအပြင်ဘက်က လူကြီးမင်းတစ်ဦးက ယွမ် ၉ သန်း ဆွဲလိုက်ပါတယ်"

ကျိုးထျန်းသည် ဆိုင်းဘုတ်ပြားကို ထပ်မံ၍ မမြှင့်တော့ချေ။

အကယ်၍ မိမိပစ္စည်းကို မိမိဘာသာ လေလံအောင်သွားပါက အရှက်ရစရာ ဖြစ်လာနိုင်သောကြောင့် ဖြစ်သည်။

"၉.၆ သန်း တစ်ကြိမ်..... ၉.၆ သန်း နှစ်ကြိမ်..... ၉.၆ သန်း သုံးကြိမ်....."

"ဒုန်း..... လေလံအောင်သွားပါပြီ"

ဝန်ထမ်းများက ဝိုင်ပုလင်းကို သယ်ဆောင်သွားကြစဉ် ကျိုးထျန်းက ပြုံးလိုက်သည်။

"သေချာတယ်၊ ငါ မျှော်လင့်ထားသလိုပဲ၊ ၁၉၄၅ ခုနှစ်ထုတ် ပုလင်းရဲ့ ဈေးနှုန်းထက် သုံးဆလောက် ပိုများသွားတယ်"

သူ့ဘေးရှိ အမျိုးသားမှာမူ ယွမ် ၇ သန်းအထိ ရောက်ရှိပြီးနောက်တွင် ဆက်လက် မဆွဲတော့ဘဲ စိတ်ပျက်လက်ပျက် ဖြစ်နေခဲ့သည်။

"ဟူး... ဒီနေ့တော့ ငါ အလကား လာခဲ့ရတာပဲ၊ တကယ် နှမြောစရာကောင်းတယ်"

သူသည် စိတ်ပျက်လက်ပျက်ဖြင့် ထရပ်လိုက်ပြီး အပြင်သို့ လှမ်းလျှောက်သွားတော့သည်။

"မဖြစ်နိုင်တာ၊ သူ့ရဲ့ စိတ်ဓာတ်ကြံ့ခိုင်မှုက အားနည်းလွန်းတယ်"

ကျိုးထျန်းက ထိုသူ ထွက်ခွာသွားသည်ကို ကြည့်ရင်း တိုးညှင်းစွာ ရေရွတ်လိုက်သည်။

နာရီဝက်ခန့် ကြာပြီးနောက်တွင် အခြားသော ပစ္စည်းနှစ်ခုမှာလည်း ပိုင်ရှင်များ အသီးသီး ရရှိသွားခဲ့ကြသည်။

ထိုပစ္စည်းနှစ်ခု လေလံတင်ပြီးနောက်တွင် ရောက်ရှိနေကြသော သူများမှာ ယခင်ကထက် သိသိသာသာ ပိုမို စိတ်အားထက်သန်လာကြသည်။

လူတိုင်း၏ တက်ကြွမှုမှာ ထိုဝိုင်ပုလင်းကြောင့် အရှိန်အဟုန် မြင့်တက်လာခဲ့ခြင်း ဖြစ်သည်။

ယင်းက လေလံကုမ္ပဏီ အလိုလားဆုံး အခြေအနေပင် ဖြစ်သည်။

"လူကြီးမင်းတို့ခင်ဗျာ..... အခုဆိုရင် ကျွန်တော်တို့ရဲ့ အဓိက ပစ္စည်းကြီး ရောက်ရှိလို့လာခဲ့ပါပြီ။"

လေလံဆွဲသူ၏ အပြုံးမှာ နားရွက်ချိတ်မတတ် ဖြစ်နေခဲ့သည်။

ယနေ့ လေလံပွဲ၏ ဈေးနှုန်းများမှာ ပုံမှန်ထက် သိသိသာသာ ပိုမို မြင့်မားနေခဲ့သဖြင့် သူ၏ ကော်မရှင်ခမှာလည်း အများကြီး ရရှိတော့မည် ဖြစ်သည်။

"လူကြီးမင်းတို့အားလုံး အခုနက ရိုမန်နီ ကွန်တီ ဝိုင်ပုလင်းကို မှတ်မိကြဦးမှာပါ"

"အခု ပြသမယ့် နောက်ထပ်တစ်ပုလင်းကတော့ လုံးဝ ပြီးပြည့်စုံတဲ့ အခြေအနေမှာ ရှိနေပြီး စုဆောင်းသိမ်းဆည်းဖို့နဲ့ တန်ဖိုးထားမြတ်နိုးဖို့အတွက် အလွန်အမင်း သင့်တော်လှတဲ့ နှစ်ပေါင်း ရာချီ သက်တမ်းရှိ ရတနာတစ်ပါး ဖြစ်တာကြောင့် လူကြီးမင်းတို့ မြင်တွေ့ဖူးသမျှထဲမှာ အကောင်းဆုံး ဝိုင်နီ ဖြစ်လာမှာ အသေအချာပါပဲဗျာ"

"လူကြီးမင်းတို့အနေနဲ့ မြည်းစမ်းဖို့ပဲဖြစ်ဖြစ်၊ စုဆောင်းဖို့ပဲဖြစ်ဖြစ် ကမ္ဘာ့အဆင့်မီ ပြိုင်ဘက်ကင်း လက်ရာမွန်တစ်ခုရဲ့ ဆွဲဆောင်မှုတွေကို အပြည့်အဝ ခံစားရစေမှာ ဖြစ်ပါတယ်"

"စကားတွေ အများကြီး မပြောတော့ဘဲ အခြေခံ ဈေးနှုန်းကတော့....."

လေလံဆွဲသူက တမင်တကာ စကားကို ဖြတ်လိုက်ရင်း ပြုံးပြလိုက်ပြီး သုံးစက္ကန့်ခန့် ကြာမှသာ ဆက်လက် ပြောဆိုလိုက်သည်။

"ယွမ် ၈ သန်း ဖြစ်ပါတယ်ခင်ဗျာ"

ဤလုံးဝ ပြီးပြည့်စုံစွာ ထိန်းသိမ်းထားရှိသော ဝိုင်ပုလင်း၏ အခြေခံဈေးနှုန်းမှာ ယခင်ပုလင်း၏ လေလံအောင်ဈေးနှုန်းနှင့် နီးပါး တည်ရှိနေခဲ့သည်၊ ဈေးနှုန်း သတ်မှတ်ချက်မှာ ရူးသွန်းစရာ ကောင်းလှသော်လည်း အမှန်တကယ်ပင် သဘာဝကျလှပေသည်။

တစ်ကြိမ်ဆွဲလျှင် ယွမ် ငါးသိန်းစီ တိုးမြှင့်ရမည်ဖြစ်ပြီး သုံးမိနစ်မျှသော အချိန်အတွင်းမှာပင် ဈေးနှုန်းမှာ ယွမ် ၁၅ သန်းအထိ လွယ်ကူစွာဖြင့် ထိုးတက်သွားခဲ့တော့သည်။

တစ်ပြိုင်နက်တည်းမှာပင်၊ ပြင်သစ်နိုင်ငံရှိ ရဲတိုက်ကြီးတစ်ခုအတွင်း၌ သီးသန့် ဧည့်ခံပွဲငယ်တစ်ခု ကျင်းပနေခဲ့သည်။

နှစ်ပေါင်း ၃၀၀ ကျော် သက်တမ်းရှိသော ဤရဲတိုက်ကြီးမှာ မူလက ပြင်သစ် ရှေးဟောင်း မင်းမျိုးမင်းနွယ်တစ်ဦး ပိုင်ဆိုင်ခဲ့ခြင်း ဖြစ်သည်။

လွန်ခဲ့သော ငါးနှစ်ခန့်က ပျက်စီးယိုယွင်းနေသော ဤရဲတိုက်ကြီးကို ဖဲလ် ဂရု က ဝယ်ယူခဲ့ပြီး ယခင်ကဲ့သို့ ခန့်ညားထည်ဝါမှုမျိုး ပြန်လည် ရရှိစေရန်အတွက် ပြုပြင်မွမ်းမံမှုများတွင် ယူရို ၁၀ သန်းခန့် အသုံးပြုခဲ့သည်။

ပြင်ပရှိ ရိုးရှင်းပြီး မညီမညာဖြစ်နေသော ကျောက်တုံးနံရံများနှင့် မတူဘဲ အတွင်းပိုင်းကိုမူ ခေတ်မီဆန်းသစ်လှသော အသုံးအဆောင် ပစ္စည်းမျိုးစုံဖြင့် ပြီးပြည့်စုံစွာ ဆင်ယင်ထားရှိသည်။

ယနေ့တွင်မူ ဖဲလ်သည် သူ၏ သားဖြစ်သူ ပီယာနှင့်အတူ ပထမထပ်ရှိ ကြီးမားလှသော စားသောက်ခန်းမကြီးအတွင်း၌ နိုအာ၏ မိသားစုကို ဖိတ်ကြားကာ တည်ခင်းဧည့်ခံနေခြင်း ဖြစ်သည်။

ရုပ်မြင်သံကြား ဇာတ်လမ်းတွဲများထဲကကဲ့သို့ပင် ၆ မီတာကျော် ရှည်လျားလှသော ထမင်းစားစားပွဲကြီးပေါ်တွင် အရသာရှိသော အစားအစာများဖြင့် ပြည့်နှက်နေခဲ့ပြီး မီးလင်းဖိုများနှင့် ဆွဲမီးဆိုင်းများမှ အလင်းရောင်များဖြင့် လင်းထိန်နေခဲ့သည်။

ပီယာသည် သဘာဝကျကျပင် နိုအာအား မျက်စိမှိတ်ပြလိုက်၊ မြှောက်ပင့်ပြောဆိုလိုက်ဖြင့် ရှိနေခဲ့သည်။

နိုအာ၏ မိဘများသည် ဖဲလ်နှင့်အတူ ယဉ်ကျေးပျူငှာစွာ စကားပြောဆိုနေကြပြီး အထက်တန်းလောကရှိ သတင်းအတင်းအဖျင်းများနှင့် အချို့သော စီးပွားရေးဆိုင်ရာ အကြောင်းအရာများကို ဆွေးနွေးနေကြသည်။

၎င်းတို့၏ အဓိက ရင်းနှီးမြှုပ်နှံမှု လုပ်ငန်းများအပြင် ဖဲလ်ဂရုသည် မကြာသေးခင်ကမှ ရန်ပုံငွေ လုပ်ငန်း အတွင်းသို့ ဝင်ရောက်ခဲ့သည်။

ရင်းနှီးမြှုပ်နှံမှုလောကရှိ ၎င်းတို့၏ ကျယ်ပြန့်လှသော ကွန်ရက်များနှင့် အတွေ့အကြုံများကို အသုံးပြုကာ ဖဲလ်ရန်ပုံငွေအဖွဲ့သည် ပြီးခဲ့သည့်နှစ်က ယူရို သန်း ၇၀၀ ခန့်အထိ အမြတ်အစွန်းများ ရရှိခဲ့သည်။

ဤနှုန်းထားအတိုင်းဆိုလျှင် အဘိုးကြီး ဖဲလ်၏ နိုင်ငံတွင်း အချမ်းသာဆုံး စာရင်းဝင် အဆင့်အတန်းမှာ မကြာမီအချိန်အတွင်း ပိုမို မြင့်တက်လာတော့မည် ဖြစ်သည်။

နိုအာ၏ ဖခင်သည်လည်း ဖဲလ်ရန်ပုံငွေအဖွဲ့တွင် ငွေကြေးအမြောက်အမြား ရင်းနှီးမြှုပ်နှံထားခဲ့ပြီး ပြီးခဲ့သည့်နှစ်က ၁၁ ရာခိုင်နှုန်းခန့် အမြတ်အစွန်း ရရှိခဲ့သဖြင့် အလွန်အမင်း ကျေနပ်အားရနေခဲ့သည်။

ထို့ကြောင့် နိုအာ၏ ဖခင်သည် သူမအား ဖဲလ်မိသားစုနှင့် တွေ့ဆုံပွဲများသို့ မကြာခဏ ခေါ်ဆောင်သွားလေ့ရှိပြီး ပန်းခြံတွင် တွေ့ဆုံခဲ့ကြခြင်းမှာလည်း ဤအကြောင်းရင်းကြောင့်ပင် ဖြစ်သည်။

သို့သော် ယနေ့တွင်မူ မတူညီတော့ချေ။

ပုံမှန်နှင့်မတူဘဲ ယနေ့ တွေ့ဆုံပွဲကိုမူ သူမ၏ ဖခင် တောင်းဆိုချက်ကြောင့် မဟုတ်ဘဲ နိုအာ ကိုယ်တိုင်က စတင် ကမ်းလှမ်းခဲ့ခြင်း ဖြစ်သည်။

ဤအချက်က သူမ၏ ဖခင်အား သံသယ ဖြစ်စေခဲ့သည်။

သူ့အနေဖြင့် မိမိ၏ သမီးအကြောင်းကို ဘာကြောင့် မသိဘဲ နေမည်နည်း။

နိုအာသည် ပီယာဆိုသော ကောင်လေးကို ဘယ်တော့မှ စိတ်ဝင်စားလိမ့်မည် မဟုတ်ချေ။

သို့သော် သူမက ထိုမိသားစုနှင့် တက်ကြွစွာ ဆက်သွယ်နေခြင်းမှာ ဘာကို ရည်ရွယ်နေခြင်း ဖြစ်သနည်း။

သူမ၏ ဖခင်သည် အချိန်အတော်ကြာ စဉ်းစားတွေးတောနေခဲ့ပြီး ဤကဲ့သို့သော ပုံမှန်မဟုတ်သည့် အပြုအမူများမှာ ဝိုင်များကို ပိုင်ဆိုင်ထားသော ထိုလူငယ်နှင့် သက်ဆိုင်နေနိုင်သည်ဟု မရေမရာ ခံစားမိနေခဲ့သည်။

သို့သော် သူ သေချာမသိသေးသဖြင့် သမီးဖြစ်သူ ဘာတွေ ကြံစည်နေသည်ကို စောင့်ကြည့်ရန်အတွက်သာ ဆုံးဖြတ်လိုက်သည်။

အကယ်၍ ထိုကောင်လေးနှင့်သာ သက်ဆိုင်နေမယ်ဆိုရင် သူမအနေဖြင့် သူ့ကို ပိုပြီး တားဆီးနိုင်မည် မဟုတ်ချေ၊ အဘယ်ကြောင့်ဆိုသော် သူမသည် ထိုသူ၏ အကူအညီကို လိုအပ်နေဆဲ ဖြစ်သောကြောင့် ဖြစ်သည်။

ပြီးခဲ့သည့်အကြိမ်က သူမသည် နိုအာအား ကျိုးထျန်းနှင့် ဆက်သွယ်ခိုင်းခဲ့ပြီး မိမိ၏ စုဆောင်းမှုများနှင့် ဝိုင်တစ်ပုလင်းကို အပြန်အလှန် လဲလှယ်ရန် မျှော်လင့်ခဲ့ဖူးသည်။

သို့သော် ထိုကောင်လေးက ဘာကိုမှ မလိုချင်ခဲ့သဖြင့် ဝိုင်ကို လဲလှယ်ခွင့် မရရှိခဲ့ချေ။

သို့သော် ဖုန်းပြောပြီးနောက်တွင် သမီးဖြစ်သူက ထိုဝိုင် ရှိနေသည့် အကြောင်းကို မည်သူ့ကိုမှ ထုတ်မပြောရန် အထူးတလည် မှာကြားခဲ့သည်။

ထို့ပြင် ထိုကောင်လေးနှင့် ဗီဒီယိုကောလ် ပြောပြီးနောက်တွင် သမီးဖြစ်သူ၏ မျက်နှာပေါ်၌ ယုန်တစ်ကောင်ကို ဖမ်းမိလိုက်သည့် မြေခွေးတစ်ကောင်ကဲ့သို့သော အပြုံးမျိုး ပေါ်ထွက်နေခဲ့သည်။

ဤကဲ့သို့သောအရာမျိုးက အလွန် ရှားပါးလှပြီး ပုံမှန်အားဖြင့် သမီးဖြစ်သူက တစ်စုံတစ်ယောက်ကို တိတ်တဆိတ် လှည့်စားပြီးသည့် အခါမျိုးတွင်သာ ပေါ်ထွက်တတ်သဖြင့် သူမအား ပိုမို သံသယပွားစေခဲ့သည်။

ထို့ကြောင့် ယနေ့ ညစာစားပွဲတွင် သူမသည် နိုအာ ဘာတွေ ကြံစည်နေသည်ကို သိရှိနိုင်ရန်အတွက် တိတ်တဆိတ် စောင့်ကြည့်နေခဲ့ခြင်း ဖြစ်သည်။

အမြည်းများ၊ စွပ်ပြုတ်များနှင့် အဓိက အစားအစာများ စားသုံးပြီးသည့်တိုင်အောင် နိုအာမှာ တည်ငြိမ်နေဆဲဖြစ်ပြီး တက်ကြွနေသော ပီယာနှင့်အတူ ယဉ်ကျေးစွာဖြင့် တိုးတိုးတိတ်တိတ် စကားပြောဆိုနေခဲ့သည်။

အချိုပွဲ ပြင်ဆင်ပေးသည့် အခါမှသာ နိုအာသည် သူမ၏ အိတ်ကပ်ထဲရှိ ဖုန်း တုန်ခါလာသည်ကို ခံစားလိုက်ရသည်။

သူမသည် စားပွဲအောက်မှနေ၍ ဖုန်းကို သေချာစွာ ထုတ်ယူကာ တစ်ချက် ကြည့်လိုက်ရာ သူမ၏ နှုတ်ခမ်းပေါ်တွင် အပြုံးငယ်တစ်ခု ပေါ်ထွက်လာခဲ့သော်လည်း ချက်ချင်းပင် ပြန်လည် ထိန်းချုပ်လိုက်ရင်း စိုးရိမ်ပူပန်နေသည့် အမူအရာတစ်ခုအဖြစ်သို့ ချက်ချင်း ပြောင်းလဲလိုက်တော့သည်။

"နိုအာ..... ဘာဖြစ်လို့လဲ"

ပီယာသည် အစားအစာကို သေချာစွာ မစားဘဲ နိုအာ၏ မျက်နှာကိုသာ စိုက်ကြည့်နေခဲ့သဖြင့် သူ မျှော်လင့်နေရသော မိန်းကလေး၏ အမူအရာ ပြောင်းလဲသွားသည်ကို ချက်ချင်း သတိပြုမိလိုက်သည်။

"ဘာမှမဖြစ်ပါဘူး. ဒါက.."

ဤကဲ့သို့သော ပွဲမျိုးတွင် ဖုန်းထုတ်ကြည့်ခြင်းက မယဉ်ကျေးလှသဖြင့် နိုအာက တုံ့ဆိုင်းနေခဲ့သည်။

"ပြောပါဦး.. ဘာဖြစ်တာလဲလို့"

ပီယာ၏ အသံမှာ ကျယ်လောင်သွားခဲ့သဖြင့် ဘေးနားတွင် စကားပြောနေကြသော လူကြီး လေးဦးစလုံးက ၎င်းတို့ထံသို့ လှည့်ကြည့်လာကြသည်။

"ဘာကိစ္စလဲ"

အိမ်ရှင်ဖြစ်သူ ဖဲလ်က သားဖြစ်သူအား အနည်းငယ် မကျေမနပ်ဖြစ်စွာဖြင့် လှမ်းကြည့်လိုက်သည်။

ပြီးခဲ့သည့်အကြိမ်က ဤကောင်လေးသည် ပျက်စီးနေသော ပန်းခြံတစ်ခုအတွက် ယူရို ၁၀ သန်းခန့် အသုံးပြုခဲ့သဖြင့် သူ့ကို အလွန်အမင်း ဒေါသထွက်စေခဲ့သည်။

ရက်အနည်းငယ်ခန့်အထိ သူသည် ပီယာအား အိမ်ပြင်သို့ အထွက်မခံဘဲ မိမိ၏ အမှားများကို ပြန်လည် ဆင်ခြင်ခိုင်းခဲ့သည်။

ချမ်းသာသည်ဆိုသော်လည်း ငွေကို ဤကဲ့သို့ မသုံးစွဲသင့်ချေ။

မိန်းကလေးတစ်ယောက်ကို လိုက်ပိုးရသည့် ကုန်ကျစရိတ်မှာ အလွန်အမင်း မြင့်မားလွန်းလှသည်။

သို့သော် လွန်ခဲ့သော ရက်အနည်းငယ်က နိုအာ၏ မိသားစုထံမှ ညစာစားရန် ဖိတ်ကြားချက်ကို လက်ခံရရှိခဲ့သည့် အခါတွင်မူ အဘိုးကြီးဖဲလ်၏ စိတ်ခံစားချက်မှာ သိသိသာသာ ကောင်းမွန်သွားခဲ့ရသည်။

‘တကယ်လို့ ဒါက ငါ့သားနဲ့ နိုအာတို့ရဲ့ ဆက်ဆံရေးကို တိုးတက်အောင် ကူညီပေးနိုင်မယ်ဆိုရင်တော့ သန်း ၁၀ သန်း သုံးစွဲခဲ့ရတာက..... တန်ဖိုးမရှိဘူးဆိုပေမဲ့ အနည်းဆုံးတော့ လက်ခံနိုင်စရာ အခြေအနေတစ်ခုပဲလေ’

ပီယာသည် ဖခင်ဖြစ်သူ၏ စစ်ဆေးမေးမြန်းလိုသော မျက်လုံးများနှင့် ရင်ဆိုင်လိုက်ရသည့်အခါ စိတ်ပျက်လက်ပျက်ဖြင့် ပခုံးတွန့်ပြလိုက်သည်။

"မစ္စတာဖဲလ်.. စိတ်မရှိပါနဲ့၊ ဒါ ကျွန်မရဲ့ အမှားပါ၊ သူ့ကို အပြစ်မတင်ပါနဲ့ရှင်"

လှပသော နိုအာသည် ယခုအခါတွင် ပီယာအတွက် အနည်းငယ် စိုးရိမ်ပူပန်ပေးနေသည့် အမူအရာဖြင့် စကားပြောဆိုလိုက်ရာ အလွန်အမင်း သနားစဖွယ် ကောင်းလှပေသည်။

အဘိုးကြီးဖဲလ်ပင်လျှင် ခေတ္တမျှ မှင်သက်သွားခဲ့ရပြီး စိတ်ထဲတွင် တိတ်တဆိတ် ဝမ်းသာသွားခဲ့သည်။

‘ဒီမိန်းကလေးက ငါ့သားအတွက် ရှေ့ကနေ မားမားမတ်မတ် ရပ်တည်ပေးနေတာပဲ၊ ဒါဆိုရင် သူတို့နှစ်ယောက်ကြားမှာ မျှော်လင့်ချက် ရှိနေပြီဆိုတဲ့ သဘောပဲ မဟုတ်လား’

အကယ်၍ မိသားစုနှစ်စုသာ အမှန်တကယ် လက်ထပ်ထိမ်းမြားနိုင်ကြမယ်ဆိုရင် သူသည် ရတနာသိုက်ကြီးကို ရရှိလိုက်သလိုမျိုး ဖြစ်သွားမှာ အသေအချာပင်။