အခန်း ၃၈၇
Vol. 39 Ch. 387
🍋 Chapter 387
နိုရယ် ဖုန်းချလိုက်ပြီးနောက် သူမ၏ဖခင်ထံသို့ ချက်ချင်း အပြေးအလွှား သွားခဲ့သည်။
ကျိုးထျန်း ပြောသမျှကို သူမ ပြန်လည်ပြောပြပြီးနောက် ဖရန်စစ်၏ မျက်မှောင်ကြုတ်မှုမှာ ပိုမို နက်ရှိုင်းသွားခဲ့သည်။
"ရှိသမျှအကုန်လုံး အရောင်းလောင်းကြေး ထပ်ရမယ် ဟုတ်လား"
"နောက်ထပ် ၂၄ နာရီအတွင်းမှာ သိရမယ် ဟုတ်လား"
ဖရန်စစ်အနေဖြင့် မယုံကြည်နိုင်ဘဲ ဖြစ်နေသော်လည်း ကျိုးထျန်းသည် လွန်ခဲ့သည့် အကြိမ်ပေါင်းများစွာတွင် သူ၏အစွမ်းကို သက်သေပြခဲ့ပြီးဖြစ်သည်။
သူသည် သူ၏ကတိစကားများကို မည်သည့်အခါမျှ ပျက်ကွက်ခဲ့ခြင်းမရှိချေ။
ကျိုးထျန်း ပြင်သစ်တွင် လုပ်ဆောင်ခဲ့သမျှ အရာအားလုံးကို သမီးဖြစ်သူထံမှတစ်ဆင့် သိရှိထားပြီးဖြစ်သည်။
ပထမတစ်ကြိမ်တွင် သူသည် ယူရို ၁၅၀,၀၀၀ ဖြင့် အိမ်ခြံမြေတစ်ခုကို ဝယ်ယူခဲ့ပြီး ယူရိုသန်းပေါင်းများစွာ အမြတ်ထုတ်ခဲ့သည်။
ဒုတိယတစ်ကြိမ်တွင် သူသည် ဖဲလ်နှင့် ပီယဲတို့ကို လှည့်စားကာ ယူရိုသန်းဆယ်ချီ၍ ရှာဖွေခဲ့ပြန်သည်။
ယခုမူ တတိယအကြိမ်မြောက် ရောက်ရှိလာခဲ့ပြီဖြစ်ရာ သူသည် အခြားအံ့ဖွယ်ဖြစ်ရပ်တစ်ခုကို ထပ်မံဖန်တီးနိုင်ဦးမည်လော။
ဖရန်စစ်သည် သူ၏ကုလားထိုင်တွင် ထိုင်ရင်း လက်ချောင်းများဖြင့် ပေါင်ကို ချက်ချက် ချက်ချက်နှင့် တောက်ခေါက်နေခဲ့သည်။
"မဟုတ်ဘူး တစ်ခုခုတော့ မမှန်ဘူး"
"အရင်နှစ်ကြိမ်က ဖဲလ်ကို ဒီအရှုပ်အထွေးထဲ ဆွဲသွင်းဖို့ သက်သက်ပဲလား၊ စတော့ဈေးကွက်ထဲမှာ သူ့ပိုက်ဆံတွေကို အမြတ်ထုတ်ဖို့အတွက်လား"
"ဖြစ်နိုင်တယ် တော်တော်လေး ဖြစ်နိုင်ခြေရှိတယ်"
"ဒါက ဒီကောင်လေး လုပ်မယ့် အကွက်မျိုး သေချာပေါက်ပဲ"
သူသည် သမီးဖြစ်သူဘက်သို့ လှည့်ကြည့်လိုက်သည်။
"နိုရယ် သမီး သူ့ကို ယုံလား၊ သူပြောတဲ့စကားအားလုံးကို ယုံလား"
နိုရယ်က ခေါင်းညိတ်လိုက်သည်။
"အဖေ သမီး သူ့ကို ယုံတယ်၊ အရင်ကလိုပဲပေါ့၊ သူက အရာအားလုံးကို ထိန်းချုပ်ထားနိုင်လို့ပဲ သမီးတို့ကို ဒါမျိုး လုပ်ခိုင်းတာ ဖြစ်ရမယ်"
"ဒါ့အပြင် သူက ကတိတည်တဲ့လူပဲ၊ ပြီးခဲ့တဲ့အကြိမ်ကလည်း သမီး သတင်းစကား ပါးပေးရင် ဝိုင်တစ်ပုလင်း ပေးမယ်လို့ ပြောခဲ့ပြီးတော့ ကတိအတိုင်း ပေးခဲ့တာပဲ"
"ဒီတစ်ကြိမ်မှာလည်း သူက သမီးကို သတင်းစကား ပါးခိုင်းပြီးတော့ ထိုက်တန်တဲ့ ဆုလာဘ် ပေးမယ်လို့ ကတိပေးထားတယ်၊ အခု သူ လုပ်နေတာလည်း အဲဒီအတွက်ပဲလို့ သမီး ထင်တယ်"
ဖရန်စစ် သက်ပြင်းတစ်ချက် ချလိုက်သည်။
ပုံမှန်အားဖြင့် သူ့အပေါ် သစ္စာရှိသော သမီးဖြစ်သူမှာ ယခုမူ တစ်ဖက်သို့ ပါသွားခဲ့ပြီ ဖြစ်ပုံရသည်။
သို့သော် ငြင်းပယ်၍မရသည့်အချက်မှာ နိုရယ်ပြောသည်က မှန်ကန်နေခြင်းပင်။
ကျိုးထျန်းသည် သူ၏ကတိကို မည်သည့်အခါမျှ မဖျက်ခဲ့ဖူးသည့်အပြင် အမြဲတမ်း ပြီးပြည့်စုံအောင် လုပ်ဆောင်နိုင်ခဲ့သည်။
"နိုရယ် ဖေဖေ သမီးကို နောက်ထပ် မေးခွန်းတစ်ခု မေးပါရစေဦး"
"ဖေဖေမှာ လက်ရှိ ငွေသား ယူရို ၂၄ သန်း ရှိတယ်၊ ဒါက မရွှေ့ပြောင်းနိုင်တဲ့ ပိုင်ဆိုင်မှုတွေကလွဲရင် ငါတို့မိသားစုရဲ့ ရှိသမျှ အကုန်လုံးပဲ၊ သမီးအမြင်အရ ဘယ်လောက် ရင်းနှီးမြှုပ်နှံသင့်လဲ"
"အားလုံးပဲ"
အစောပိုင်းက ကျိုးထျန်း ဖုန်းထဲတွင် ပြောခဲ့သည့်အတိုင်း နိုရယ်က ပြတ်ပြတ်သားသား ပြန်လည်ဖြေကြားခဲ့သည်။
"ဒီပိုက်ဆံတွေ အကုန်လုံး ဆုံးရှုံးသွားရင် ငါတို့ အိမ်ငှားခရတဲ့ ဝင်ငွေလေးနဲ့ပဲ ရပ်တည်နိုင်တော့မယ်ဆိုတာကို သမီး သေချာရဲ့လား"
ဖရန်စစ်သည် အမှန်တကယ်တော့ ချဲ့ကားပြောဆိုနေခြင်းသာ ဖြစ်သည်။
၎င်းတို့မိသားစု၏ အခြေအနေမှာ ဤမျှအထိ ဆိုးရွားသွားနိုင်စရာ အကြောင်းမရှိပေ။
"အားလုံးပဲ"
နိုရယ်က ထပ်မံ၍ ထပ်လောင်းပြောဆိုလိုက်သည်။
ဖရန်စစ်က အောက်သို့ ငုံ့ကြည့်ရင်း အသာအယာ ရယ်မောလိုက်သည်။
"ငါ အသက်ကြီးသွားပြီထင်တယ်၊ အရင်ကလောက် သတ္တိမရှိတော့ဘူး"
"ကောင်းပြီ"
သူသည် အဆုံးအဖြတ်နှင့် ပြတ်သားမှုများ ပြည့်နှက်နေသော မျက်လုံးများဖြင့် ခေါင်းကို အားမာန်ပါပါ မော့လိုက်သည်။
"ဒါဆိုရင် ရှိသမျှအကုန်လုံးကို ၁၀ ဆ လီဗာရေ့ချ်နဲ့ အရောင်းလောင်းကြေး ထပ်လိုက်မယ်၊ ကျိုးထျန်း နောက်ထပ် အံ့ဖွယ်တစ်ခု ဖန်တီးနိုင်မလားဆိုတာ ငါ စောင့်ကြည့်ချင်သေးတယ်"
ကျိုးထျန်းသည် နိုရယ် ပေးပို့လာသော မက်ဆေ့ခ်ျကို တွေ့လိုက်ရသည်။
"သူမနဲ့ သူမရဲ့အဖေက တကယ့်ကို ပါးနပ်တဲ့လူတွေပဲ၊ သူတို့က ငါ့ကို ယုံကြည်ကြတာဆိုတော့ ငါကလည်း သူတို့ကို ရက်ရက်ရောရော ပြန်ပေးဆပ်ရမှာပေါ့"
မကြာမီမှာပင် ဂျပန်စတော့ဈေးကွက် ပိတ်သွားခဲ့ပြီး ယနေ့အတွက် တိုက်ပွဲ ပြီးဆုံးသွားခဲ့သည်။
ဖဲလ်နှင့် သူ၏အဖွဲ့ဘက်မှ ထွက်ပေါ်လာသော အလွန်ကောင်းမွန်သည့် သတင်းများကြောင့် ဈေးကွက်ပိတ်ချိန်တွင် စတော့ဈေးနှုန်းမှာ ၅၇၀.၆၁ အထိ မြင့်တက်သွားခဲ့သည်။
သူ၏ ရန်ပုံငွေ ထက်ဝက်ကျော်မှာ ဆုံးရှုံးသွားခဲ့ပြီ ဖြစ်သည်။
သို့သော် သူသည် လုံးဝ စိုးရိမ်ပူပန်ခြင်းမရှိသည့်အပြင် ဂျက်ဆီကိုလည်း အရှုံးခံဖြတ်မည့် စတော့စျေးနှုန်း သတ်မှတ်ရန်ပင် မခိုင်းခဲ့ပေ။
အဘယ်ကြောင့်ဆိုသော် သူသည် အရာအားလုံး ဆုံးရှုံးသွားမည်မဟုတ်ကြောင်း အသေအချာ သိရှိထားသောကြောင့် ဖြစ်သည်။
၉၉ ရာခိုင်နှုန်းအထိ ကျဆင်းသွားလျှင်ပင် သူသည် မနက်ဖြန်တွင် အခြေအနေကို ပြောင်းပြန်လှန်ပစ်နိုင်သည်။
လူက ကြံစည်သော်လည်း အောင်မြင်ခြင်းမှာ အဆုံးသတ်တွင် စနစ်ကို မကျော်လွန်နိုင်ချေ။
ထို့နောက် စိတ်အပန်းဖြေရန်အတွက် ရေကူးရန် စီစဉ်လိုက်ပြီးနောက် ရေချိုးကာ အနားယူတော့မည် ဖြစ်သည်။
သူသည် စတော့ရှယ်ယာများကို ပြန်လည်မရောင်းချရသေးသော်လည်း သူ့အတွက်မူ ဤကစားပွဲက ပြီးဆုံးသွားခဲ့ပြီ ဖြစ်သည်။
မနက်ဖြန် မနက်စောစော ထရန် မရည်ရွယ်ထားဘဲ မွန်းတည့်ချိန်အထိ အိပ်ရေးဝဝ အိပ်စက်ရန် ဆုံးဖြတ်ထားသည်။
သူသည် ရေကူးဘောင်းဘီလဲပြီး ရေကူးကန်ဘေးသို့ ရောက်ခါနီးတွင်ပင် သူ၏ဖုန်း မြည်လာခဲ့သည်။
"ဒီအချိန်ကြီး ဘယ်သူ ဖုန်းခေါ်တာလဲ"
မုယန်သည် မကြာသေးမီက ရှန်ဟိုင်းတွင် မရှိသလို၊ ကျောက်ရှင်းသည်လည်း ရုပ်ရှင်ရိုက်ကူးရေးဖြင့် အလုပ်ရှုပ်နေသည်။
ဟယ်ဝေရွှမ်းအကြောင်းမူ ပြောနေရန်ပင် မလိုတော့ချေ။
လွန်ခဲ့သည့်အကြိမ်က စိတ်ကူးယဉ်ဆန်ဆန် ပြသခဲ့သော်လည်း ၎င်းမှာ ပုံမှန်မဟုတ်ပေ။
ချက်ချင်းပင် သူမ၏ သန်မာထက်မြက်ပြီး လွတ်လပ်သော ပုံစံသို့ ပြန်လည်ပြောင်းလဲသွားကာ ရတနာကုမ္ပဏီရှိ သူမ၏အလုပ်များထဲတွင် အားသွန်ခွန်စိုက် နစ်မြုပ်နေခဲ့သည်။
ကျိုးကြောင်းဆီလျော်စွာ စဉ်းစားလျှင် သူသည် မကြာသေးမီက အတော်လေး အားလပ်နေသဖြင့် မည်သူကမျှ သူ့ထံ ဖုန်းခေါ်ဆိုစရာ အကြောင်းမရှိပေ။
သူ ဖုန်းကို ကောက်ကိုင်ကြည့်လိုက်သည့်အခါ မသိသော နံပါတ်တစ်ခု ဖြစ်နေသော်လည်း နိုင်ငံကုဒ် နံပါတ်ကို မြင်ရုံမျှဖြင့် မည်သူဖြစ်သည်ကို သူ အကြမ်းဖျင်း ခန့်မှန်းမိလိုက်သည်။
"ဟယ်လို"
"ဟယ်လို မစ္စတာကျိုး၊ ကျွန်တော် ဖဲလ်ပါ"
"ဟယ်လို မစ္စတာဖဲလ် မကြာသေးခင်က ရက်ဒ်ဝိုင်တွေ ဘာတွေ သောက်ဖြစ်သေးလား"
သူကိုယ်တိုင် ဖုန်းခေါ်ဆိုလာခြင်း ဖြစ်သောကြောင့် ယဉ်ကျေးနေရန် မလိုတော့ပေ။
"မင်း ဟားဟား မင်း ငါ့ကို ရန်စနေဖို့ မလိုပါဘူး၊ ဘာလို့လဲဆိုတော့ အဲဒါက အလကားပဲမို့လို့"
ဖဲလ်သည် ကျိုးထျန်းက နာကျင်စရာကိစ္စကို တမင်တကာ ထုတ်ပြောနေသည်ကို သိသော်လည်း သူ၏ဒေါသကို မျိုသိပ်ထားလိုက်သည်။
"မစ္စတာကျိုး မကြာသေးခင်က အရောင်းလောင်းကြေး ကစားပွဲက ဘယ်လိုလဲ"
"အနိမ့်အမြင့် အတက်အကျတွေကို ကြုံတွေ့နေရတယ် မဟုတ်လား"
ဖဲလ်၏ လေသံမှာ လှောင်ပြောင်သရော်မှုများ ပြည့်နှက်နေပြီး အသံမှာ အနည်းငယ် တုန်ရီနေကာ လည်ချောင်းသံ ပါနေသဖြင့် သူ အိပ်ရေးပျက်ထားပြီး သလိပ်များပင် ထွက်နေကြောင်း ထင်ရှားလှသည်။
"ဟူး မင်း ငါ့အတွက် တော်တော်လေး အားထုတ်ခဲ့တာပဲ"
ကျိုးထျန်းသည် မတတ်နိုင်သလို ခေါင်းခါလိုက်သည်။
"မင်း ဒီလို ကောလာဟလတွေကို ဖြန့်နေတာကြောင့် နောက်ပိုင်းမှာ အပြစ်ပေးခံရမှာကို မကြောက်ဘူးလား၊ တချို့ စကားတွေကို စိစစ်မပါဘဲ လျှောက်ပြောလို့မရဘူးဆိုတာ မင်း နားမလည်ဘူးလား"
"အို မစ္စတာကျိုး၊ သေချာပေါက် ငါ နားလည်တာပေါ့၊ ဒါပေမဲ့ ယူရိုဘီလီယံပေါင်းများစွာ ဒါမှမဟုတ် ယူရိုသန်းသောင်းချီတဲ့ အကျိုးအမြတ်တွေနဲ့ ယှဉ်ရင် ဒါက ဘာမှမဟုတ်ပါဘူး"
ဖဲလ်က အကျယ်ကြီး ရယ်မောရင်း ပြောလိုက်သည်။
"မင်းက ဘဏ္ဍာရေး ဈေးကွက်အကြောင်းကို လုံးဝ နားမလည်ဘူး၊ လူ့အဖွဲ့အစည်းအကြောင်းကိုလည်း နားမလည်သလို၊ လူတွေက ပိုက်ဆံအတွက် ဘာတွေ လုပ်ရဲလဲဆိုတာကိုလည်း မင်း မသိဘူး"
"မင်းလို ပြင်ပလူတစ်ယောက်က ငါ့ရဲ့ အထူးပြုနယ်ပယ်ထဲကို ခြေစုံပစ်ဝင်လာရဲတာလား၊ မင်းက တကယ့်ကို သတ္တိရှိတဲ့လူပဲ၊ ဒါပေမဲ့ ဒီလိုသတ္တိမျိုးကို မိုက်ရူးရဲဆန်တယ်လို့ပဲ ခေါ်ရမယ်"
"ငါ မင်းကို သင်ခန်းစာတစ်ခု ပေးပါရစေ၊ ရန်ပုံငွေ ဈေးကွက်ဆိုတာ ဘာလဲဆိုတာ မင်းကို ပြပေးမယ်"
"နိုင်တဲ့လူက အကုန်သိမ်းတာပဲ၊ ဘယ်သူ့မှာ ရန်ပုံငွေ အများဆုံးရှိလဲ၊ အဲဒီလူက ဈေးကွက်ကို ကြိုးကိုင်နိုင်တာပဲ"
"မင်းရဲ့ ရန်ပုံငွေတွေက ငါ့ရှေ့မှာတော့ ရယ်စရာတစ်ခုပဲ"
"မနက်ဖြန် မနက် ဈေးကွက်ပွင့်တာနဲ့ မင်း သေချာပေါက် ပြာကျသွားလိမ့်မယ်"
"ကျိုးထျန်း မင်းမှာ တခြား လှည့်ကွက်တွေ ကျန်သေးလား"
ဤသို့ ပြောပြီးနောက် ဖဲလ်သည် ပျားရည် နှစ်ပိဿာခန့် စားထားရသကဲ့သို့ တဟားဟားနှင့် မရပ်မနား ရယ်မောနေခဲ့သည်။
"ငါ့မှာ လှည့်ကွက်တွေလည်း မကျန်တော့ဘူး၊ ပိုက်ဆံလည်း ကုန်သွားပြီ"
ကျိုးထျန်းက ရိုးရိုးသားသားပင် ပြောလိုက်သည်။
"ဟီးဟီး မင်း ဝန်ခံလိမ့်မယ်လို့ ငါ မထင်ထားဘူး၊ မဆိုးပါဘူး၊ မင်းသာ အစကတည်းက ငါတို့ ဖဲလ်မိသားစုနဲ့ သေသေချာချာ ပူးပေါင်းဆောင်ရွက်ခဲ့ရင် ငါတို့ သူငယ်ချင်းတွေ ဖြစ်နိုင်ခဲ့မှာ"
"စိတ်မကောင်းပါဘူး၊ ငါ့မိဘတွေက ငါ့ကို လူအတွေနဲ့ မကစားခိုင်းဘူး"
"ဒါ့အပြင် ငါကလည်း မင်းနဲ့ ဘယ်တုန်းကမှ သူငယ်ချင်း မဖြစ်ချင်ခဲ့ဘူး၊ အဆုံးသတ်မှာတော့ ငါတို့ရဲ့ တန်ဖိုးထားမှုတွေက မတူညီကြဘူးလေ၊ အဆင်မပြေနိုင်ပါဘူး"
"ထပ်ပြောရရင် မစ္စတာဖဲလ် မင်း တစ်ခုခုကို အထင်လွဲနေပုံရတယ်၊ ဘယ်သူကမှ မင်းကို ရန်သူလို့ သဘောမထားခဲ့သလို၊ မင်း ငါ့ကို ဆန့်ကျင်လာအောင်လည်း ရည်ရွယ်ချက် မရှိခဲ့ဘူး"
"ဒါတွေအားလုံးက မင်းနဲ့ မင်းရဲ့သားက စခဲ့တာပဲ၊ ငါကတော့ မင်းတို့ကို အဖက်လုပ်ပြီး စိတ်မဝင်စားခဲ့ဘူး"
"ဒီစကူရိုင်းစတီးလ်ကို အရောင်းလောင်းကြေးထပ်တဲ့ ကိစ္စအပါအဝင်ပေါ့၊ ငါ မင်းကို ဆွဲမသွင်းခဲ့ဘူး၊ ဒါက မင်းကိုယ်တိုင် ရွေးချယ်ခဲ့တာပဲ"
ကျိုးထျန်းက လက်နှစ်ဖက်ကို ဖြန့်ရင်း မတတ်နိုင်သလို ပြောလိုက်သည်။
အမှန်တကယ်ပင် အစကတည်းက သူ့ကို လာရောက်ရန်စခဲ့သည်မှာ ပီယဲ ဖြစ်ပြီး ဝိုင်ကိစ္စ အပါအဝင် ၎င်းတို့ဘက်မှ တက်တက်ကြွကြွ လာရောက် ရှာဖွေခဲ့ခြင်း ဖြစ်သည်။
သူသည် အချို့သော လှည့်ကွက်များကို ပြင်ဆင်ထားခဲ့သော်လည်း ၎င်းတို့ဘက်မှ ငါးစာမဟပ်ပါက သူ ကျွေးမွေးနိုင်လိမ့်မည် မဟုတ်ပေ။
"မင်း ကြိုက်သလို ပြောနိုင်ပါတယ်၊ ရှုံးနိမ့်သူရဲ့ ကြေညာချက်က ဘာအာဏာမှမရှိသလို မင်း ကြုံတွေ့ရတော့မယ့် ရှုံးနိမ့်မှုကိုလည်း ပြောင်းလဲနိုင်မှာ မဟုတ်ဘူး"
"ဒါကတော့ သေချာပေါက် ပြောလို့မရသေးပါဘူး၊ အံ့ဖွယ်ဖြစ်ရပ်တစ်ခု ဖြစ်လာရင်ကော"
ကျိုးထျန်းမှ စေတနာဖြင့် သတိပေးလိုက်သည်။