အခန်း ၃၃၉

အခန်း (၃၃၉)

အဲဒီနောက်မှာတော့ လူငယ်ကာကွယ်စောင့်ရှောက်ရေးနှင့် စီမံခန့်ခွဲရေးဗဟိုဌာန ညွှန်ကြားရေးမှူးနဲ့ မိသားစုကျန်းမာရေး မြှင့်တင်ရေးဗဟိုဌာန ညွှန်ကြားရေးမှူးတို့ကလည်း အလှည့်ကျ စကားပြောကြပါတယ်။ စောစောက ကြားခဲ့ရတဲ့ အကြောင်းပြချက်တွေကိုပဲ ထပ်ခါတလဲလဲ ပြောနေကြတာပါ။

သူတို့က ဂိမ်းစွဲလမ်းမှုရဲ့ ဆိုးရွားပုံ၊ လူငယ်တွေရဲ့ ကျန်းမာရေး၊ ပြီးတော့ ဂိမ်းဆော့တာက အကြမ်းဖက်လိုစိတ်တွေကို တိုးပွားစေပြီး ရာဇဝတ်မှု ကျူးလွန်တဲ့အထိ ဖြစ်စေတယ်ဆိုတဲ့ သူတို့ရဲ့ ယုတ္တိတွေကို ချပြကြတယ်။

သူတို့ပြောတာကို နားထောင်ကြည့်ရင် ဂိမ်းတွေက လောင်းကစားနဲ့ မူးယစ်ဆေးဝါး နှစ်ခုလုံး ပေါင်းထားတာထက်တောင် ပိုဆိုးနေသလိုပါပဲ။ လူမှုပတ်ဝန်းကျင်အတွက် အဆိပ်အတောက် ဖြစ်ရုံတင်မကဘဲ လူသားမျိုးနွယ်တစ်ခုလုံးအတွက်ပါ ဘေးဆိုးတစ်ခုလို့တောင် ခေါ်ရမလို ဖြစ်နေတာပါ။

ဒီအချိန်မှာ ကျွန်တော် စဉ်းစားမိတာက ‘သူတို့ပြောသလိုဆို ဂိမ်းထုတ်တဲ့လူတွေ အားလုံးကို ဖမ်းဆီးပြီး ကွပ်မျက်ပစ်လိုက်ရမှာလား’ ဆိုတာပါပဲ။

“တစ်နေ့ကို ၁၆ နာရီ ဂိမ်းဆော့တာက လည်ပင်းနဲ့ ခါးဆစ် ရောဂါဖြစ်နိုင်ခြေကို တိုးမြင့်စေပါတယ်။ ဒါကြောင့် ဂိမ်းပိတ်စနစ် အချိန်ကို တိုးမြှင့်ပြီး ကျွန်တော်တို့ လူငယ်တွေရဲ့ ကျန်းမာရေးကို ကာကွယ်ရပါမယ်”

အမှန်ပါပဲ၊ ထိုင်ပြီး ဂိမ်းပဲ ဆော့နေတာက ကျန်းမာရေးအတွက် မကောင်းပါဘူး။

“...တစ်နေ့ကို ၁၆ နာရီ စာကျက်တာကလည်း လည်ပင်းနဲ့ ခါးဆစ် ရောဂါဖြစ်နိုင်ခြေကို တိုးမြင့်စေတာပါပဲ”

ဒါပေမဲ့ စာကျက်ရင်း ကျန်းမာရေး ထိခိုက်တာကျတော့ အဆင်ပြေတယ် ထင်ပါတယ်။ စာကျက်လွန်းလို့ နှာခေါင်းသွေးလျှံတဲ့အထိ ဖြစ်ခဲ့တယ်လို့ ဂုဏ်ယူဝံ့ကြွားစွာ ပြောနေကြတာကို ဘယ်သူကများ လာကန့်ကွက်မှာလဲ။

အဲဒီနောက်မှာတော့ နောက်ဆုံးအနေနဲ့ ဝန်ကြီး ရှင်ဂျွန်မီ ရှေ့ထွက်လာတယ်။ အရင်က စကားအခြေအတင် ဖြစ်ခဲ့ဖူးပေမဲ့ လူချင်းတွေ့ရတာကတော့ ဒါ ပထမဆုံးအကြိမ်ပါပဲ။

ဖြစ်နိုင်ရင်တော့ သူနဲ့ လုံးဝ မဆုံချင်ခဲ့ပါဘူး။ ဝန်ကြီး ရှင်ဂျွန်မီက ကျွန်တော့်ကို အပြစ်တင်မယ့်ပုံစံနဲ့ တင်းတင်းမာမာ ပြောတယ်။

“OTK ကုမ္ပဏီက ကမ္ဘာလုံးဆိုင်ရာ အဖွဲ့အစည်းကြီးတစ်ခုပါ။ ဂိမ်းလောကရဲ့ အကျိုးအမြတ်ကိုပဲ ရှေ့တန်းတင်နေမယ့်အစား ကျန်းမာတဲ့ ဂိမ်းယဉ်ကျေးမှုတစ်ခု ဖြစ်လာအောင် လူမှုရေးအရ တာဝန်ယူမှု ရှိရပါမယ်။ အခုလို ဖြစ်နေတာက တကယ်ကို ရှက်ဖို့ကောင်းပါတယ်”

“ကုမ္ပဏီတစ်ခုက မိမိတို့ရဲ့ လုပ်ငန်းနယ်ပယ် အကျိုးစီးပွားကို ကိုယ်စားပြုပြောဆိုတာ ဘာလို့ ရှက်ဖို့ကောင်းရမှာလဲ။ ဝန်ကြီးလည်း အမျိုးသမီးနှင့် မိသားစုရေးရာ ဝန်ကြီးဌာနရဲ့ ရပ်တည်ချက်ကိုပဲ ကိုယ်စားပြု ပြောနေတာ မဟုတ်ဘူးလား။ အဲဒါကျတော့ မရှက်ဘူးလား”

တကယ်တော့ ဒီလိုနေရာမျိုးမှာ အခုလို ဆွေးနွေးငြင်းခုံနေရတာကတင် ရှက်ဖို့ကောင်းနေပါပြီ။ ကျွန်တော် ဘာလို့ ဒီနေရာမှာ ဒီလိုလုပ်နေရတာလဲ။ စိတ်ပျက်ပြီး ကိုယ့်ကိုကိုယ် ပြန်အပြစ်တင်မိတဲ့ စိတ်တွေ ဝင်လာပါတယ်။

ကျွန်တော့်စကားကြောင့် ဝန်ကြီး ရှင်ဂျွန်မီရဲ့ မျက်လုံးတွေ ပြူးကျယ်သွားတယ်။

ကိုရီးယားမှာ လွှတ်တော်အမတ်တွေနဲ့ ဝန်ကြီးတွေရဲ့ အရှိန်အဝါက တော်တော်ကြီးမားပါတယ်။ သူကတော့ အဲဒီ အာဏာနှစ်ရပ်လုံးကို ဆုပ်ကိုင်ထားသူပါ။ ဥပဒေပြုရေးနဲ့ အုပ်ချုပ်ရေး အာဏာနှစ်ခုလုံးကို တစ်ပြိုင်ထဲ ပိုင်ဆိုင်ထားသလိုပါပဲ။ ဒါကြောင့် ဘယ်သူကများ ဝန်ကြီး ရှင်ဂျွန်မီကို ဒီလို ပြန်ပြောရဲမှာလဲ။ အထူးသဖြင့် အခုအချိန်အထိ လုံးဝ ဝပ်တွား ခစားလာခဲ့ရတဲ့ ဂိမ်းလောကက လူတွေဆိုရင် ပိုလို့တောင် မပြောရဲကြပါဘူး။

“ပုဂ္ဂလိက ကုမ္ပဏီတစ်ခုရဲ့ အကျိုးအမြတ်ကို ရှာတာနဲ့ အများပြည်သူ အကျိုးစီးပွားကို ဖော်ဆောင်တာက မတူပါဘူး။ OTK ကုမ္ပဏီက OTK Games Korea ကတစ်ဆင့် Lost Fantasy M ဂိမ်းကို ရောင်းချနေတာလေ။ ဒီဂိမ်းက လူငယ်တွေအပေါ် ဘယ်လောက် ထိခိုက်နစ်နာစေလဲဆိုတာ စဉ်းစားကြည့်စမ်းပါ”

ကျွန်တော်က အေးအေးဆေးဆေးပဲ ပြန်ဖြေလိုက်တယ်။

“လူငယ်တွေ နှစ်သက်ကြတဲ့ အနုပညာ အကြောင်းအရာတွေ အများကြီး ရှိပါတယ်။ ရုပ်ရှင်၊ ဒရမ်မာ၊ သီချင်း၊ Webtoon နဲ့ Web Novel တွေလိုမျိုးပေါ့။ ဘာလို့ ဂိမ်းတစ်ခုထဲကိုပဲ အဆိပ်အတောက် ဖြစ်စေတဲ့ အရာအဖြစ် သတ်မှတ်နေရတာလဲ”

“ဒါကြောင့်လည်း စည်းမျဉ်းစည်းကမ်းတွေနဲ့အညီ ကျန်းမာတဲ့ ဂိမ်းတွေ ထုတ်လုပ်ဖို့ လိုအပ်တာပေါ့။ အဲဒီအတွက် လမ်းညွှန်ချက်တွေတောင် ရှိပါတယ်”

ကျွန်တော် ပြင်ဆင်လာတဲ့ စာရွက်စာတမ်းတွေကို ကြည့်ပြီး ပြောလိုက်တယ်။

“‘လူငယ်များအတွက် အကျိုးရှိပြီး ကျန်းမာသော အင်တာနက်ဂိမ်း ထုတ်လုပ်မှု လမ်းညွှန်’ ကို ပြောတာလား”

“မှန်တယ်”

အဲဒါက ယခင်အစိုးရလက်ထက်မှာ အမျိုးသမီးနှင့် မိသားစုရေးရာ ဝန်ကြီးဌာန (MOGEF) က ထုတ်ပြန်ခဲ့တဲ့ လမ်းညွှန်ချက် ဖြစ်ပါတယ်။

အဲဒီထဲမှာ အဓိက အချက်ကြီး သုံးချက် ပါဝင်ပါတယ်။ ‘အတင်းအကြပ် အပြန်အလှန် ဆက်သွယ်စေခြင်း’၊ ‘လွန်ကဲသော ဆုလာဘ် စနစ်’ နဲ့ ‘အသာစီးရလိုစိတ်နှင့် ပြိုင်ဆိုင်လိုစိတ် ဖြစ်ပေါ်စေခြင်း’ တို့ ဖြစ်ပါတယ်။ အသေးစိတ် အချက်အလက်တွေကို ကြည့်လိုက်ရင် တကယ်ကို အံ့ဩစရာ ကောင်းပါတယ်။

“အချက် ၁ ကို ကြည့်ရင် ကစားသမားတွေအနေနဲ့ အခန်းကဏ္ဍတွေ ခွဲခြားပြီး ဇာတ်ကောင်ရဲ့ အဆင့် ဒါမှမဟုတ် စွမ်းရည် တိုးတက်ဖို့ တခြားလူတွေနဲ့ ပူးပေါင်းဆောင်ရွက်တာကို ခွင့်မပြုသင့်ဘူးလို့ ရေးထားပါတယ်။ အဖွဲ့သားတွေနဲ့အတူ Quest တွေကို အောင်မြင်အောင် လုပ်ဆောင်ခြင်းကနေ ရရှိလာတဲ့ စိတ်ကျေနပ်မှုကိုလည်း မပေးရဘူးလို့ ဆိုထားပါတယ်။ အချက် ၂ မှာတော့ အချိန်အကြာကြီး ဂိမ်းဆော့ပြီး ဂိမ်းတွင်းငွေကြေး၊ ပစ္စည်းတွေ ဒါမှမဟုတ် အဆင့်နဲ့ ကျွမ်းကျင်မှုတွေကို မြှင့်တင်တာက ပြဿနာဖြစ်စေတယ်လို့ ဖော်ပြထားပါတယ်။ ပြီးတော့ အချက် ၃ မှာကျတော့ ဂိမ်းက လွှမ်းမိုးချုပ်ကိုင်နိုင်စွမ်းကို ပေးရင်၊ ကစားသမားတွေကို အာဏာနဲ့ သြဇာကြီးမားစေရင်၊ အစစ်အမှန်ထက် ဂိမ်းထဲမှာ ပိုပြီး သာလွန်တယ်လို့ ခံစားရစေရင်၊ ဒါမှမဟုတ် တခြားလူတွေနဲ့ ပြိုင်ဆိုင်တာမျိုး ရှိရင် ပြဿနာရှိတယ်လို့ ဆိုထားပါတယ်”

ဝန်ကြီး ရှင်ဂျွန်မီက ယုံကြည်မှုအပြည့်နဲ့ ပြောတယ်။

“မှန်ပါတယ်။ အဲဒါတွေအားလုံးက ဂိမ်းတွေမှာ ရှိနေတဲ့ ပြဿနာတွေပဲ”

“ပထမဆုံး ကျွန်တော် နားမလည်တာက အချက် ၁ မှာ တခြားလူတွေနဲ့ ပူးပေါင်းဆောင်ရွက်တာက ပြဿနာလို့ ပြောထားပြီး၊ အချက် ၃ မှာကျတော့ တခြားလူတွေနဲ့ ပြိုင်ဆိုင်တာက ပြဿနာလို့ ပြောထားပြန်တယ်။ ဘယ်ဟာကို လိုက်နာရမှာလဲ”

ရှင်ဂျွန်မီက စာရွက်စာတမ်းတွေကို ကြည့်ရင်း ခဏလောက် ယောင်ချာချာ ဖြစ်သွားတယ်။

“နှစ်ခုလုံးက ပြဿနာပဲ။ အဖွဲ့လိုက် ကစားတာကနေတစ်ဆင့် အတင်းအကြပ် ဆက်သွယ်ခိုင်းတာကလည်း ပြဿနာပဲ၊ လွန်ကဲတဲ့ ပြိုင်ဆိုင်မှုကို ဖြစ်စေတာကလည်း ပြဿနာပဲ။ အဲဒီကနေ ကစားသမားတွေက ပျော်ရွှင်မှု ဒါမှမဟုတ် စိတ်ကျေနပ်မှု ရသွားရင် ပိုတောင် ပြဿနာကြီးသေးတယ်”

“...”

ပျော်ရွှင်မှု ဒါမှမဟုတ် စိတ်ကျေနပ်မှုလည်း မရရဘူး၊ ပြိုင်ဆိုင်မှုလည်း မရှိရဘူးဆိုရင် ဂိမ်းကို ဘာလို့ ဆော့နေတော့မှာလဲ။ ဒါက လူတွေကို ညစ်ညမ်းမှုမပါတဲ့ ညစ်ညမ်းဗီဒီယို ရိုက်ခိုင်းနေသလိုပါပဲ။

“ဒါဆို ဒီယုတ္တိကို စာကျက်တာမှာ တိုက်ရိုက် အသုံးချကြည့်ရအောင်။ အဖွဲ့လိုက် ပရောဂျက်တွေ လုပ်ဆောင်ပြီး စိတ်ကျေနပ်မှု ရတာကို တားမြစ်ရမယ် မဟုတ်ဘူးလား။ အချိန်အကြာကြီး စာကျက်ပြီး အသိပညာတွေ စုဆောင်းတာ၊ အမှတ်တွေ တိုးတက်လာတာ၊ ဒါမှမဟုတ် ပညာသင်ဆု ရတာတွေကိုလည်း လွန်ကဲတဲ့ ဆုလာဘ်တွေအဖြစ် သတ်မှတ်ပြီး ပိတ်ပင်ရပါမယ်။ ပြီးတော့ အတန်းထဲမှာ အဆင့်ကောင်းရဖို့ ကြိုးစားတာကလည်း တခြားလူတွေကို တွန်းဖယ်ပြီး ပြိုင်ဆိုင်ရတာ ဖြစ်လို့၊ ကိုယ့်ကိုကိုယ် ပိုသာလွန်တယ်လို့ ခံစားရစေနိုင်တဲ့အတွက် အဲဒါကလည်း ပြဿနာ ဖြစ်ရပါမယ်။ MOGEF ရဲ့ လမ်းညွှန်ချက်တွေအရဆိုရင် ကလေးတွေကို စာမကျက်ခိုင်းဘဲ အရင်ဆုံး တားမြစ်ရမှာ မဟုတ်ဘူးလား”

“စာကျက်တာနဲ့ ဂိမ်းဆော့တာက မတူပါဘူး။ ကောင်းမွန်တဲ့ အစားအစာက များများစားလေ အကျိုးရှိလေပဲ၊ ဒါပေမဲ့ လမ်းဘေးစာတွေလို အမှိုက်အစားအစာတွေကိုတော့ အားမပေးသင့်ဘူး”

တက်ဂယူက ဝင်ပြောတယ်။

“ဒါဆို eSports ကျတော့ကော။ eSports တွေက ဂိမ်းတွေကို သုံးပြီး ပြိုင်ပွဲတွေတောင် တရားဝင် ကျင်းပနေကြတာလေ”

ဝန်ကြီး ရှင်ဂျွန်မီက ခေါင်းညိတ်ပြတယ်။

“eSportsကိုလည်း စည်းမျဉ်းတွေနဲ့ ထိန်းချုပ်ရမယ်လို့ ကျွန်မ ယုံကြည်ပါတယ်”

သူက ဂိမ်းလောကတစ်ခုလုံးကို အမြစ်ပြတ်အောင် ရှင်းပစ်ဖို့ ရည်ရွယ်နေတာလား။

ကျွန်တော် ချက်ချင်းပဲ ဆက်ပြောလိုက်တယ်။

“ဒါဆို သာမန် အားကစားတွေကျတော့ကော။ ဆောင်းရာသီ အိုလံပစ်ပြိုင်ပွဲတုန်းက ဝန်ကြီးကိုယ်တိုင် အမျိုးသမီး Curling အဖွဲ့ကို အားပေးခဲ့ပြီး ‘ကိုရီးယား အမျိုးသမီးတွေရဲ့ ညီညွတ်မှုကြောင့် စိတ်လှုပ်ရှားမိရပါတယ်’ လို့ ပြောခဲ့ဖူးတယ်မလား။ အဖွဲ့လိုက် အားကစားတွေက တာဝန်တွေ ခွဲခြားပြီး ပူးပေါင်းဆောင်ရွက်ရပြီး အတူတူ ကစားရင်း စိတ်ကျေနပ်မှု ရရှိကြတာမျိုးပါ။ ပြီးတော့ တခြားနိုင်ငံက အသင်းတွေနဲ့ ပြိုင်ဆိုင်ပြီး နိုင်ရင်လည်း ဂုဏ်ယူစွာနဲ့ ဆုတံဆိပ်တွေ၊ ဆုကြေးငွေတွေ ရကြပါတယ်။ ဒါက ဂိမ်းတွေမှာ ရှိတယ်ဆိုတဲ့ ပြဿနာတွေဖြစ်တဲ့ ပျော်ရွှင်မှု၊ စိတ်ကျေနပ်မှု၊ အဖွဲ့တွင်း ပူးပေါင်းဆောင်ရွက်မှု၊ အဖွဲ့အချင်းချင်း ပြိုင်ဆိုင်မှုနဲ့ လွန်ကဲတဲ့ ဆုလာဘ်တွေ အားလုံး စုပြုံနေတာ မဟုတ်ဘူးလား။ အဲဒီ Curlingအဖွဲ့ကိုလည်း ဖျက်သိမ်းပစ်ရမှာလား”

ဝန်ကြီး ရှင်ဂျွန်မီက အသံကျယ်ကျယ်နဲ့ အော်ပြောတယ်။

“ဂိမ်းတွေကို စာကျက်တာ ဒါမှမဟုတ် အားကစားတွေနဲ့ လာမနှိုင်းယှဉ်ပါနဲ့။ ဂိမ်းတွေကို အဓိက စွဲလမ်းမှုကြီး လေးခုထဲက တစ်ခုအဖြစ် သတ်မှတ်ထားတာaemf။ နှိုင်းယှဉ်ချင်တယ်ဆိုရင် အရက်၊ လောင်းကစား၊ မူးယစ်ဆေးဝါးတွေနဲ့ နှိုင်းယှဉ်တာကမှ မှန်ကန်လိမ့်မယ်”

“...”

ချီးထုတ် ‘အဓိက စွဲလမ်းမှုကြီး လေးခု’။

ဂိမ်းတွေကို အရက်၊ လောင်းကစား၊ မူးယစ်ဆေးဝါးတွေနဲ့ တစ်တန်းထဲ ဘာလို့ လာထားလဲဆိုတာ ကျွန်တော် စဉ်းစားလို့ မရပါဘူး။ အဲဒီ ဥပဒေကြမ်း ထွက်လာကတည်းက ဂိမ်းတွေကို ဖျော်ဖြေရေး ဒါမှမဟုတ် အပန်းဖြေမှုတစ်ခုလို သဘောမထားတော့ဘဲ စွဲလမ်းစေတဲ့ အရာတွေလိုပဲ ဆက်ဆံလာကြတာပါ။

“တင်ပြထားတဲ့ စည်းမျဉ်းဥပဒေကြမ်းကို ကြည့်ရင် အမျိုးသမီးနှင့် မိသားစုရေးရာ ဝန်ကြီးကို ဂိမ်းကုမ္ပဏီတွေရဲ့ ဝင်ငွေထဲက ၁ ရာခိုင်နှုန်းကို အခွန်အဖြစ် တရားဝင် ကောက်ခံခွင့် ပေးထားပြီး၊ ဒဏ်ငွေအနေနဲ့ ၅ ရာခိုင်နှုန်းအထိ ကောက်ခံခွင့် ပေးထားပါတယ်။ တခြား ဘယ်လုပ်ငန်းနယ်ပယ်ကမှာမှ ဒီလို စည်းမျဉ်းမျိုးနဲ့ ရင်ဆိုင်နေရတာမရှိပါဘူးခင်ဗျာ”

“အဲဒီအချက်နဲ့ ပတ်သက်ပြီး နားလည်မှုမလွဲအောင် ရှင်းပြပါရစေ။ ဂိမ်းကုမ္ပဏီ အားလုံးဆီကနေ ၁ ရာခိုင်နှုန်း အခွန် သတ်မှတ်ပြီး ကောက်ခံမှာ မဟုတ်ပါဘူး၊ အဲဒီထက် လျှော့ပြီးတော့လည်း သတ်မှတ်နိုင်ပါတယ်”

“အဲဒီ ပမာဏကို ဝန်ကြီးက စိတ်ကြိုက် ဆုံးဖြတ်နိုင်တာကပဲ ပြဿနာ မဟုတ်ဘူးလား”

“ဒီရန်ပုံငွေကို အင်တာနက်ဂိမ်း စွဲလမ်းမှု ကုသရေး စင်တာတွေ တည်ထောင်ဖို့နဲ့ အခြေခံပညာ မူလတန်း၊ အလယ်တန်း၊ အထက်တန်းကျောင်းတွေမှာ ဂိမ်းစွဲလမ်းမှုဆိုင်ရာ အထူးပြု ဆရာ၊ ဆရာမတွေ ခန့်ထားဖို့ သုံးမှာပါ။ ဒီရန်ပုံငွေကို ကောင်းမွန်တဲ့ ရည်ရွယ်ချက်အတွက် စုဆောင်းတာ ဖြစ်လို့ ပူးပေါင်းဆောင်ရွက်ပေးဖို့ မျှော်လင့်ပါတယ်”

ဂိမ်းစွဲလမ်းမှုဆိုင်ရာ အထူးပြု ဆရာ၊ ဆရာမတွေဆိုတာက ဘာလဲ။ ဂိမ်းစွဲလမ်းမှုက ရောဂါတစ်ခုဆိုရင် ကုသမှုကို ဆေးဘက်ဆိုင်ရာ ကျွမ်းကျင်သူတွေကပဲ ကိုင်တွယ်ရမှာ မဟုတ်ဘူးလား။ အဲဒီ ‘အထူးပြု ဆရာ၊ ဆရာမတွေ’ က ဘာလုပ်ရမှာလဲ။ အမှန်တော့ အဲဒီ ‘ဂိမ်းစွဲလမ်းမှုဆိုင်ရာ ဆရာမတွေ’ ကို ငှားရမ်းတာနဲ့ လေ့ကျင့်ပေးတဲ့ တာဝန်က MOGEF ဆီပဲ လုံးလုံးလျားလျား ရောက်သွားမှာပါ။ တစ်နည်းအားဖြင့် အလုပ်အကိုင် အခွင့်အလမ်း သစ်တွေ ဖန်တီးပေးတာပေါ့။

“တချို့ ဂိမ်းကုမ္ပဏီတွေအတွက် ပြည်ပ ဝင်ငွေက ပြည်တွင်း ဝင်ငွေထက် ပိုများပါတယ်။ ဒါပေမဲ့ အခွန်ကိုတော့ ကိုရီးယားရဲ့ MOGEF က ကောက်ခံတာပါ။ ဝန်ကြီးရဲ့ ယုတ္တိအရဆိုရင် တခြားနိုင်ငံက ကလေးတွေကို ‘ဂိမ်းစွဲအောင်’ လုပ်ပြီး ရလာတဲ့ ပိုက်ဆံနဲ့ ကိုရီးယားက ကလေးတွေကို ကုသပေးဖို့ ရည်ရွယ်နေတာပေါ့နော်။ အဲဒီလိုဆို တခြားနိုင်ငံတွေအပေါ်မှာ မတရားသလိုဖြစ်မနေဘူးလား”

မထင်မှတ်ထားတဲ့ အချက်ကို ထောက်ပြလိုက်လို့ ထင်ပါတယ်၊ ဝန်ကြီး ရှင်ဂျွန်မီ တုန်လှုပ်သွားတယ်။

“ဒီလိုအချက်ကို ဒီနေရာမှာ ယူဆောင်လာပြီး ပြောတာက တကယ်ကို အောက်တန်းကျပါတယ်”

“...ဘာပြောလိုက်တယ်”

ခဏလောက်တော့ ကျွန်တော် နားကြားမှားတာလားလို့ တွေးမိပါတယ်။ တရားဝင် ဆွေးနွေးပွဲတစ်ခုမှာ ဒီလို စကားလုံးမျိုး သုံးတာက တကယ်ပဲ လက်ခံနိုင်စရာ ရှိလို့လား။

ညှိနှိုင်းရေးမှူးက သတိပေးပါတယ်။

“ဆွေးနွေးပွဲက အရမ်းကို ပြင်းထန်လာပါပြီ။ စကားပြောဆိုရာမှာ သတိထားပေးကြပါ”

သူက ဝန်ကြီး ရှင်ဂျွန်မီကို မဟုတ်ဘဲ ကျွန်တော့်ကို ကြည့်ပြီး ပြောတာပါ။ ဒါ ဘယ်လို ဆွေးနွေးပွဲမျိုးလဲ။

ကိုယ့်ကိုကိုယ် အမြဲတမ်း မှန်ကန်နေတယ်လို့ အခိုင်အမာ ယုံကြည်ထားတဲ့ လူတွေနဲ့ ဆွေးနွေးနေရတာ ဘာအဓိပ္ပာယ် ရှိမှာလဲ။

ဒါပေမဲ့လည်း နောက်ဆုံးအချိန်အထိ အကောင်းဆုံး ကြိုးစားဖို့ ကျွန်တော် ဆုံးဖြတ်လိုက်တယ်။

“MOGEF က ဂိမ်းစွဲလမ်းမှု ကုသရေးအတွက် ရန်ပုံငွေ ကောက်ခံဖို့ စီစဉ်နေပေမဲ့ အဲဒီထဲမှာ ပေါ့ပေါ့ပါးပါး ကစားရတဲ့ ဂိမ်းတွေနဲ့ ပညာရေးဆိုင်ရာ ဂိမ်းတွေ ထုတ်လုပ်တဲ့ ကုမ္ပဏီတွေလည်း ပါဝင်နေပါတယ်။ ဒီကုမ္ပဏီတွေက ဂိမ်းစွဲလမ်းမှု ပြဿနာတွေနဲ့ ပတ်သက်မှု မရှိသလောက်ပါပဲ။ ဥပဒေကို အားလုံးအပေါ် တပြေးညီ အတင်းအကြပ် သက်ရောက်စေတာကြောင့် သူတို့အတွက် မတရားတော့ဘဲ နစ်နာရမှာ မဟုတ်ဘူးလား”

ဝန်ကြီး ရှင်ဂျွန်မီက ခေါင်းညိတ်တယ်။

“ဟုတ်ပါတယ်၊ တချို့ ကုမ္ပဏီတွေ ထိခိုက်နစ်နာနိုင်တယ်ဆိုတာကို ကျွန်မ အသိအမှတ်ပြုပါတယ်။ ဒါပေမဲ့ အဲဒါက ရှောင်လွှဲလို့မရတဲ့ စတေးမှုတစ်ခုပါ။ ကုမ္ပဏီတစ်ခုချင်းစီအနေနဲ့ မတရားဘူးလို့ ခံစားရနိုင်ပေမဲ့ လူငယ်တွေနဲ့ အမျိုးသမီးတွေကို ကာကွယ်ဖို့၊ ပြီးတော့ လူမှုပတ်ဝန်းကျင် တစ်ခုလုံးအတွက် ဒီမူဝါဒကို မဖြစ်မနေ အကောင်အထည်ဖော်ရပါမယ်။ ကုမ္ပဏီတစ်ခုချင်းစီရဲ့ အခြေအနေတွေကိုပဲ အခြေအတင် ပြောမနေဘဲ လူမှုပတ်ဝန်းကျင်တစ်ခုလုံးကို လွှမ်းခြုံနိုင်တဲ့ အမြင်မျိုးနဲ့ ကြည့်မြင်ပေးဖို့ တောင်းဆိုချင်ပါတယ်”

“ဒါဆို ဝန်ကြီးပြောချင်တာက လူများစုရဲ့ တရားမျှတမှုအတွက် လူနည်းစုရဲ့ စတေးမှုက ရှောင်လွှဲလို့မရဘူးလို့ ဆိုလိုတာလား”

“အတိအကျပါပဲ၊ အဲဒါကို ပြောတာပါ”

“ကျွန်တော် သိသလောက်တော့ အတိတ်တုန်းကလည်း အဲဒီစကားလုံးကို အတိအကျ ပြောခဲ့ဖူးတဲ့ နိုင်ငံရေးသမားတစ်ယောက် ရှိခဲ့တယ်”

“ဘယ်သူလဲ”

“အဒေါ့ဖ် ဟစ်တလာပါ”

ကျွန်တော့်စကားကြောင့် တစ်ခန်းလုံး ရုတ်ရုတ်သဲသဲ ဖြစ်သွားပါတယ်။

ဝန်ကြီး ရှင်ဂျွန်မီက အော်ဟစ်သံနီးပါးနဲ့ အော်ပြောပါတယ်။

“ရှင်က ကျွန်မကို ဟစ်တလာနဲ့ တူတယ်လို့ ပြောနေတာလား”

“ကျွန်တော် အဲဒီလို မပြောပါဘူး။ ဟစ်တလာလည်း ဒီစကားအတိုင်း ပြောခဲ့ဖူးတယ်လို့ ထောက်ပြရုံသက်သက်ပါ”

“တကယ်ကို အောက်တန်းကျပြီး ယုတ်မာလိုက်တာ။ ဘယ်လိုတောင် ရိုင်းစိုင်းတဲ့ စကားမျိုးကို ပြောရက်တာလဲ”

ကျွန်တော်က ပခုံးတွန့်ပြလိုက်ပါတယ်။

“အင်း... ဝန်ကြီးကိုယ်တိုင် ဟစ်တလာပြောခဲ့တဲ့ စကားနဲ့ အတူတူပဲ ပြောခဲ့တာက ပြဿနာ မဟုတ်ဘူးလား။ ဝန်ကြီးက ဟစ်တလာနဲ့ တူတဲ့စကား ပြောခဲ့လို့ ကျွန်တော်က ထောက်ပြမိတာကို ကျွန်တော့်အပြစ်လို့ ပြောလို့ရမလား”

ကျွန်တော့်စကား မဆုံးခင်မှာပဲ အားလုံးက ထိုင်ရာကနေ ထရပ်ပြီး လက်ညှိုးထိုး အော်ဟစ်ကြပါတော့တယ်။ အခြေအနေကို ထိန်းသိမ်းရမယ့် ညှိနှိုင်းရေးမှူးကတောင် ထရပ်ပြီး ဝိုင်းဝန်း ပြစ်တင်ရှုတ်ချရာမှာ ပါဝင်လာပါတယ်။ ဆွေးနွေးပွဲ မဟုတ်တော့ဘဲ ရုန်းရင်းဆန်ခတ် ဖြစ်ရပ်တစ်ခုလိုပါပဲ။ အခြေအနေက ကျွန်တော် တကယ်ပဲ ကိုယ်ထိလက်ရောက် တိုက်ခိုက်ခံရတော့မယ့်အတိုင်းပါ။ အဲဒီအချိန်မှာပဲ တက်ဂယူက စားပွဲကို အရှိန်နဲ့ ရိုက်ပြီး ရုတ်တရက် ထရပ်လိုက်ပါတယ်။ အားလုံးရဲ့ အကြည့်တွေက သူဆီ ရောက်သွားချိန်မှာတော့ တက်ဂယူက တုန်လှုပ်စရာကောင်းတဲ့ စကားကို စပြောပါတော့တယ်။

ဆွေးနွေးပွဲ ပြီးဆုံးသွားပြီးနောက် အမျိုးသမီးနှင့် မိသားစုရေးရာ ဝန်ကြီးဌာနက မှတ်တမ်းအကျဉ်းကို ထုတ်ပြန်ခဲ့ပါတယ်။ ဒါပေမဲ့ အကြောင်းအရာတွေကတော့ လုံးဝ အဆင်မပြေအောင် ပြုပြင်ထားတာပါ။

သူတို့ရဲ့ အဓိပ္ပာယ်မရှိတဲ့ စကားတွေကို ယုတ္တိရှိသလိုလို ဖြစ်အောင် ပြင်ဆင်ထားပြီး၊ ကျွန်တော်တို့ ပြောခဲ့တဲ့ စကားတွေထဲကမှ စိတ်လှုပ်ရှားစရာ အကောင်းဆုံး အစိတ်အပိုင်းတွေကိုပဲ ကွက်ပြီး ဖော်ပြထားပါတယ်။ တကယ်ကို အဓိပ္ပာယ်မရှိလွန်းလို့ ကျွန်တော် စကားတောင် မပြောနိုင်တော့ပါဘူး။

ကျွန်တော်တို့အပေါ် ဝေဖန်မှုတွေက မိုးသက်မုန်တိုင်းလို ကျရောက်လာပါတယ်။

-ဟားဟား။ ကန်ဂျင်ဟူကတော့ ဆွေးနွေးပွဲမှာ တကယ် ညံ့တာပဲ။

-သူ ပြောနေတဲ့ အဓိပ္ပာယ်မရှိတဲ့ စကားတွေကို ကြည့်ပါဦး။

-ဒါတွေအားလုံးက သူ ဂိမ်းဆော့နေလို့ပဲ။ ဂိမ်းဆော့ရင် ဦးနှောက် ပျက်စီးတတ်တယ်။

-ဂိမ်းကို အဲဒီလောက်တောင် ကြိုက်နေရင် ဆွေးနွေးမနေဘဲ အိမ်ပြန်ပြီး ဂိမ်းပဲ သွားဆော့တော့။

-ဝန်ကြီး ရှင်ဂျွန်မီက Joan of Arc လိုပဲ။ တကယ် အားကျဖို့ကောင်းတယ်။

-ရှေ့နေ ပတ်ဟဲဂျင်က ရှေ့နေတစ်ယောက်ပီပီ တကယ်ကို ယုတ္တိရှိရှိနဲ့ စကားပြောတာ ကောင်းလွန်းတယ်။ ဒီနေ့ကစပြီး အမာခံပရိသတ် ဖြစ်သွားပြီ။

-အမျိုးသမီး အခွင့်အရေး လှုပ်ရှားမှု မြှင့်တင်ရေး စင်တာရဲ့ အကြံပေးရှေ့နေအဖြစ် သူ့လို လူမျိုး ရှိနေတာ တကယ်ကို စိတ်ချရတယ်။

-ယုတ္တိမရှိတော့တဲ့အခါ ရုတ်တရက်ကြီး ဟစ်တလာလို့ လာပြောတယ် ဟုတ်လား။ ဘယ်လိုတောင် အဲဒီလို စကားမျိုး ပြောနိုင်ရတာလဲ။

-ကျွန်မဖြင့် စိတ်တိုလွန်းလို့ လက်တွေ ခြေတွေ တုန်ပြီး ငိုတောင် ငိုမိတယ် ㅜㅜ

-ရှင်ဂျွန်မီ၊ စိတ်ဓာတ်မကျနဲ့၊ ဆက်ချပါ။

ကျွန်တော် သက်ပြင်းချလိုက်ပါတယ်။

“ဒါကမှ တကယ်ကို အောက်တန်းကျပြီး ယုတ်မာတာပဲ”

သူတို့ ဒီလိုမျိုး လုပ်လာလိမ့်မယ်ဆိုတာ ကျွန်တော် ကြိုတင် မျှော်လင့်ထားပြီးသားပါ။ ဒါကြောင့် ဆွေးနွေးပွဲကို သတင်းယူနေတဲ့ မီဒီယာတစ်ခုနဲ့ ကြိုတင် ညှိနှိုင်းထားခဲ့တာ ဖြစ်ပါတယ်။ မီဒီယာအများစုက MOGEF ဘက်က ဖြစ်နေပေမဲ့ OTK Games နဲ့ အဓိက ဂိမ်းကုမ္ပဏီကြီး ငါးခုက သူတို့ကို ကြော်ငြာအမြောက်အမြား ပေးမယ်လို့ ကတိပြုလိုက်တဲ့အခါမှာတော့ သူတို့ရဲ့ သဘောထားက ချက်ချင်း ပြောင်းလဲသွားပါတယ်။

တက်ဂယူက ပြုံးလိုက်တယ်။

“မီဒီယာတွေက ပြည်သူတွေရဲ့ ချစ်ခြင်းမေတ္တာနဲ့ ရှင်သန်တာ မဟုတ်ဘူး၊ ကြော်ငြာ ဝင်ငွေနဲ့ ရှင်သန်တာ”

ကြော်ငြာ သဘောတူညီချက် ရယူထားတဲ့ မီဒီယာကနေ ဆွေးနွေးပွဲရဲ့ အဖြတ်အတောက်မရှိတဲ့ ဗီဒီယိုအပြည့်အစုံကို ထုတ်လွှင့်လိုက်တော့တယ်။

သတင်းထောက်က ပြောပါတယ်။

“MOGEF က ထုတ်ပြန်ခဲ့တဲ့ မှတ်တမ်းအကျဉ်းက ပြုပြင်မွမ်းမံထားတာ ဖြစ်ပါတယ်။ ပြည်သူတွေရဲ့ သိပ္ပံပညာဆိုင်ရာ သိပ္ပံပိုင်ခွင့်အတွက် ကျွန်တော်တို့ သတင်းဌာနအနေနဲ့ ဆွေးနွေးပွဲ ဗီဒီယိုတစ်ခုလုံးကို ထုတ်လွှင့်ပေးသွားမှာပါ။ အမည်မဖော်လိုတဲ့ OTK ကုမ္ပဏီ ဒုတိယဥက္ကဌရဲ့ အသံကို အနည်းငယ် ပြောင်းလဲထားတာကလွဲလို့ တခြား ဘယ်အရာကိုမျှ ပြုပြင်ထားခြင်း မရှိကြောင်း အတည်ပြုပါတယ်”

ဗီဒီယို ထွက်လာပြီးတာနဲ့ သတင်းဆောင်းပါးတွေက ရေလွှမ်းမိုးသလို ထွက်ပေါ်လာပါတယ်။

[(သတင်းထူး) MOGEF ရဲ့ မှတ်တမ်း ပြုပြင်မွမ်းမံမှု။ ဘယ်သူ့အမိန့်လဲ]

[အဓိပ္ပာယ်မရှိသော ဆွေးနွေးပွဲ။ အပြုသဘောဆောင်တဲ့ အခြားရွေးချယ်စရာ မရှိ]

[ဝန်ကြီး ရှင်ဂျွန်မီရဲ့ အာဏာရှင်ဆန်တဲ့ စကား - ဂိမ်းကုမ္ပဏီတချို့ရဲ့ စတေးမှုက ရှောင်လွှဲလို့မရ]

[ဆေးဘက်ဆိုင်ရာ အသိုင်းအဝိုင်း - ‘ဂိမ်းကြောင့် ဦးနှောက်ပျက်စီးခြင်း’ ဆိုတာ လုပ်ကြံချက်တစ်ခု...]

[ရှေ့နေ ပတ်ဟဲဂျင်က ဘယ်သူလဲ]

[Ze ဥပဒေအကျိုးဆောင်လုပ်ငန်းရဲ့ အမည်က ကျား၊ မ ခွဲခြားမှုမရှိတဲ့ နာမ်စားကနေ ဆင်းသက်လာတာ...]

ဝန်ကြီး ရှင်ဂျွန်မီက လူသိများပြီးသား ဖြစ်ပေမဲ့ ရှေ့နေ ပတ်ဟဲဂျင်ကတော့ ဒီဖြစ်ရပ်ကြောင့် မီဒီယာတွေရဲ့ အာရုံစိုက်မှုကို ခံလိုက်ရတယ်။

မီဒီယာတွေက သူ့ကို အင်တာဗျူးဖို့ အလုအယက် ကြိုးစားကြပေမဲ့ ရုတ်တရက် ရောက်ရှိလာတဲ့ အာရုံစိုက်မှုတွေကြောင့် ထင်ပါတယ်၊ သူက ခွင့်ယူပြီး ပျောက်ကွယ်သွားခဲ့တယ်။ သူ့ရဲ့ ဝက်ဘ်ဆိုက်ကိုတောင် ပိတ်ပစ်ခဲ့တာပါ။

တုန်လှုပ်သွားတဲ့ MOGEF က သက်ဆိုင်ရာ မီဒီယာကို ပြင်းထန်စွာ ကန့်ကွက်ခဲ့ပြီး ဗီဒီယိုတွေကို ဖြုတ်ချဖို့နဲ့ ဆောင်းပါးတွေကို ပြင်ဆင်ပေးဖို့ သတင်းအဖွဲ့အစည်းတွေကို ဖိအားပေးခဲ့ပေမဲ့ အဲဒီဗီဒီယိုဖိုင်က နိုင်ငံတကာအထိ ပျံ့နှံ့သွားခဲ့ပါပြီ။

ဂိမ်းဝက်ဘ်ဆိုက်တွေတင်မကဘဲ အွန်လိုင်း လူမှုကွန်ရက် စာမျက်နှာအသီးသီးမှာလည်း အပြင်းအထန် ဆွေးနွေးငြင်းခုံမှုတွေ ဖြစ်ပွားခဲ့ပါတယ်။

-ဟားဟား။ မှတ်တမ်းကို အဲဒီလိုမျိုး ဖြတ်ညှပ်ကတ် လုပ်ထားတာဆိုပဲ။ သူတို့ တကယ်ပဲ မမိဘူးလို့ ထင်နေတာလား။

-MOGEF ကို ကာကွယ်ပေးနေတဲ့လူတွေ ဘယ်ပျောက်ကုန်ပြီလဲ။

-ရှင်ဂျွန်မီကို Joan of Arc တဲ့လား။ ဟားဟား။ တကယ် ရယ်ရတယ်။ Joan of Arcသာ သိရင် အုတ်ဂူထဲကနေ ထငိုလိမ့်မယ်။

-‘ ဝန်ကြီးကိုယ်တိုင် ဟစ်တလာပြောခဲ့တဲ့ စကားနဲ့ အတူတူပဲ ပြောခဲ့တာက ပြဿနာ မဟုတ်ဘူးလား။ ဝန်ကြီးက ဟစ်တလာနဲ့ တူတဲ့စကား ပြောခဲ့လို့ ကျွန်တော်က ထောက်ပြမိတာကို ကျွန်တော့်အပြစ်လို့ ပြောလို့ရမလား...’

-အဲဒါက တကယ်ကို အံ့ဩစရာကောင်းတဲ့ ဆွေးနွေးပွဲပဲ။ စည်းမျဉ်းတွေအတွက် အငြင်းပွားနေတဲ့သူတွေက MOGEF အနေနဲ့ ဂိမ်းတွေကို ဘာလို့ မထိန်းချုပ်သင့်ဘူးလဲဆိုတာကို ကိုယ်တိုင် သက်သေပြသွားကြတာပဲ။

-ရှေ့နေ ပတ်ဟဲဂျင်ကတော့ တကယ့် ဟာသပဲ။ ဟားဟား။ ဂိမ်းကစားသူတွေအားလုံးကို ရာဇဝတ်ကောင်တွေလို သဘောထားတာတဲ့လား။ ရာဇဝတ်မှု ကျူးလွန်တဲ့ ဂိမ်းကစားသူနဲ့ အိမ်မှာ အေးအေးဆေးဆေး ကစားနေတဲ့သူကို ခွဲခြားလို့မရဘူးတဲ့။

-ဂိမ်းကုမ္ပဏီတွေကို အရေးကြီးတဲ့ ဇာတ်ကောင်တွေနေရာမှာ ကျား၊ မ မျှတမှု ရှိအောင် လုပ်ခိုင်းပြီးတော့၊ သူကိုယ်တိုင်ကျတော့ အမျိုးသား ရှေ့နေတွေကိုပဲ အများဆုံး ငှားရမ်းထားတာဆိုပဲ ㅎㅎ

-ရှေ့နေလိုမျိုး ရာထူးကြီးတဲ့ နေရာတွေမှာ အမျိုးသားတွေကို ပိုပြီး ဘယ်လိုလုပ် ငှားရမ်းနိုင်ရတာလဲ။ စိတ်တိုလွန်းလို့ လက်တွေ ခြေတွေ တုန်ပြီး ငိုတောင် ငိုမိတယ် ㅜㅜ

-အဲဒီလို ဦးနှောက်မျိုးနဲ့ ရှေ့နေစာမေးပွဲကို ဘယ်လိုများ အောင်မြင်ခဲ့တာလဲ။

-တခြားလူတွေရဲ့ ဆွေးနွေးမှုစွမ်းရည်ကလည်း သိပ်တော့ မခေပါဘူး။ ဟားဟား။

-ဘာပဲဖြစ်ဖြစ် ဂိမ်းတွေက မကောင်းဘူး၊ ဒါပဲ။

ဒါပေမဲ့ တကယ့် တုန်လှုပ်စရာကောင်းတဲ့ အပိုင်းက နောက်မှ လာတာပါ။

အဲဒါကတော့ တရားဝင် မှတ်တမ်းထဲမှာ လုံးဝ ဖြတ်တောက်ခံခဲ့ရတဲ့ OTK ကုမ္ပဏီ ဒုတိယဥက္ကဌရဲ့ နောက်ဆုံး ပြောကြားချက် ဖြစ်ပါတယ်။ ဗီဒီယိုအပြည့်အစုံမှာတော့ သူပြောခဲ့တဲ့ စကားတွေက အတိုင်းသား ပါဝင်နေပါတယ်။

“ဒီဆွေးနွေးပွဲကြောင့် ဒီနိုင်ငံက ဂိမ်းလောကအပေါ် ဘယ်လို ဆက်ဆံလဲဆိုတာကို ကျွန်တော် ရှင်းရှင်းလင်းလင်း သိလိုက်ရပါပြီ။ ဝန်ကြီးခင်ဗျာ။ ဝန်ကြီးဟာ ဒီဆွေးနွေးပွဲမှာ နိုင်သွားပါပြီ။ OTK ကုမ္ပဏီရဲ့ ဒုတိယဥက္ကဌတစ်ယောက်အနေနဲ့ ကျွန်တော် MOGEF ရဲ့ စည်းမျဉ်းတွေကို အပြည့်အဝ လက်ခံပါမယ်”

အဲဒီစကားကြောင့် ဝန်ကြီး ရှင်ဂျွန်မီရဲ့ မျက်နှာက ဝင်းပသွားပါတယ်။

“တကယ်လား”

“ဟုတ်ပါတယ်။ အခုကစပြီး ဝန်ကြီး ရှင်ဂျွန်မီရဲ့ ဆန္ဒအတိုင်း ကျွန်တော် MOGEF နဲ့အတူ ရပ်တည်ပြီး ကိုရီးယား ဂိမ်းလောကကို အမြစ်ပြတ်အောင် ဖျက်ဆီးပစ်မယ့်နေရာမှာ ဦးဆောင်သွားပါမယ်။ ဒီနေ့ ဒီနေရာကို မလာခင်မှာ ကျွန်တော် ပြည်တွင်း ဂိမ်းကုမ္ပဏီတွေနဲ့ ဆွေးနွေးမှုတွေ လုပ်ပြီးခဲ့ပါပြီ။ တကယ်လို့ ဒီဆွေးနွေးပွဲမှာ ဝန်ကြီးကို နားဝင်အောင် မပြောနိုင်ခဲ့ရင် အဓိက ဂိမ်းကုမ္ပဏီကြီး အားလုံး ကိုရီးယားကနေ ထွက်ခွာသွားဖို့ သဘောတူညီခဲ့ကြပါတယ်”

ဝန်ကြီး ရှင်ဂျွန်မီ တုန်လှုပ်သွားတယ်။

“ဘာ... ဘာပြောလိုက်တာလဲ”

“OTK ကုမ္ပဏီရဲ့ ဦးဆောင်မှုအောက်မှာ စတော့ဈေးကွက်မှာ စာရင်းသွင်းထားတဲ့ ဂိမ်းကုမ္ပဏီ အားလုံးက စတော့စာရင်း ဖျက်သိမ်းပြီး၊ ကျွန်တော်တို့ရဲ့ ရုံးချုပ်တွေနဲ့ ကော်ပိုရိတ် အဖွဲ့အစည်းတွေကို ပြည်ပကို ပြောင်းရွှေ့ပါမယ်။ အခုကစပြီး ဂိမ်းထုတ်လုပ်တဲ့ ကုမ္ပဏီတွေ—ဒီလို အဆိပ်အတောက် ဖြစ်စေတဲ့ အရာတွေ၊ စွဲလမ်းစေတဲ့ ပစ္စည်းတွေကို ထုတ်လုပ်တဲ့သူတွေ—ကိုရီးယားမြေပေါ် ခြေချနိုင်တော့မှာ မဟုတ်ပါဘူး။ ဒီရလဒ်က ဝန်ကြီး ရှင်ဂျွန်မီ တစ်ယောက်ထဲရဲ့ ကိုယ်ပိုင် အောင်မြင်မှု ဖြစ်တယ်ဆိုတာကို ကျွန်တော် ရှင်းရှင်းလင်းလင်း ပြောကြားလိုပါတယ်။ ကဲ... အခုဆို ပြဿနာအားလုံး ပြေလည်သွားပြီ မဟုတ်ဘူးလား”