အခန်း ၈၆၁

အခန်း (၈၆၁) - ဓာတ်ကြီးငါးပါး တာအိုနယ်ပယ် ပြီးပြည့်စုံခြင်း... ငါသည်ပင်လျှင် တာအိုဖြစ်၏ (အပိုင်း ၃)

ယခင်ကကဲ့သို့ တာအိုမျှော်စင်၏ စွမ်းအား ရိုက်ခတ်မှုများကို သူ၏ ကိုယ်ပိုင် တာအိုနယ်ပယ် ဖြင့်

ခုခံ ကာကွယ်မနေတော့ပါ။

ယင်းအစား သူက ထိုအရာနှင့် ပေါင်းစည်းရန် ကြိုးပမ်း လိုက်ပြီး... ကောင်းကင်နှင့် မြေကြီး၏ ဓာတ်ကြီးငါးပါး အပြန်အလှန် ဖန်ဆင်းခြင်း ကို ဆက်လက် သရုပ်ဖော် ပြသနေခဲ့၏။

အပြန်အလှန် အနိုင်ယူ ချေမှုန်းခြင်း ဆိုသည်မှာ မရှိတော့ပေ။

အဘယ်ကြောင့်ဆိုသော် ကောင်းကင်နှင့် မြေကြီး၏ ဓာတ်ကြီးငါးပါး အပြန်အလှန် အနိုင်ယူ ချေမှုန်းကြသည့် ပြင်းထန်လှသော စွမ်းအားမှာ... စုယွီ၏ နတ်ဘုရား ဝိညာဉ် နှင့် လက်ရှိ ကျင့်ကြံခြင်း အဆင့် ဖြင့် ထိန်းချုပ် ကွပ်ကဲရန် အလွန်တရာ ကြမ်းတမ်း လွန်းနေသောကြောင့်ပင်။

အကယ်၍ ၎င်းက တာအိုနယ်ပယ် ၏ အစပျိုး အဆင့်မျှသာ ဖြစ်မည် ဆိုလျှင် အဆင်ပြေနိုင်ပေလိမ့်မည်။

သို့သော် စုယွီက ဓာတ်ကြီးငါးပါး ၏ အပြန်အလှန် အနိုင်ယူ ချေမှုန်းသည့် စွမ်းအားများ ပါဝင်သော တာအိုနယ်ပယ် ၏ မဟာ အောင်မြင်ခြင်း အဆင့်ကို စတင် စမ်းသပ်လိုက်သည့် အခိုက်အတန့် တွင်... သူ၏ ကိုယ်သူပင် အပြီးတိုင် ဖျက်ဆီးပစ်လုမတတ် ဖြစ်သွားခဲ့ရသည်။

ထို့နောက်ပိုင်း တာအိုမျှော်စင် ၏ နောက်ထပ် အလွှာများ အတွင်း၌... ဓာတ်ကြီးငါးပါး ၏ အပြန်အလှန် ဖန်ဆင်းခြင်း တာအို စွမ်းအားများကိုသာ သူ သရုပ်ဖော် ပြသဝံ့တော့၏။

မည်သည့် အဟန့်အတား၊ အဆီးအတား မျိုးမျှ လုံးဝ မရှိခဲ့ပါချေ။

စုယွီ တစ်ယောက် တာအိုမျှော်စင် ဟင်းလင်းပြင် ၏ နဝမ အလွှာသို့ ခြေချပြီး လအနည်းငယ် အကြာတွင်... ငါးရောင်ခြယ် ဓာတ်ကြီးငါးပါး ဝိညာဉ် အလင်းတန်းများက သူ၏ ပတ်လည်တွင် ချောမွေ့စွာ သရုပ်ပေါ်လာခဲ့သည်။ သူ၏ ထိန်းချုပ်မှု အောက်တွင် ဓာတ်ကြီးငါးပါး တာအို၏ စွမ်းအားများက အဆုံးအစမဲ့ လည်ပတ် နေပြီး... အသက်ဝင် လှုပ်ရှားနေသော တကယ့် ဓာတ်ကြီးငါးပါး သတ္တဝါ အစစ်များ အလား တိရစ္ဆာန်ငယ်လေး များကို တစ်ကောင်ပြီး တစ်ကောင် ဖန်တီး အသက်သွင်း နေခဲ့သည်။

ဓာတ်ကြီးငါးပါး ၏ အပြန်အလှန် ဖန်ဆင်းခြင်း စွမ်းအားမှာ အလွန်တရာ သိမ်မွေ့ နူးညံ့လှပြီး ကြမ်းတမ်း ဖျက်ဆီးလိုသော အရှိန်အဝါ မျိုး လုံးဝ ကင်းစင်ကာ အနည်းငယ်မျှပင် ပွတ်တိုက် ဆန့်ကျင်မှု မရှိပါချေ။

ဓာတ်ကြီးငါးပါး ၏ အပြန်အလှန် ဖန်ဆင်းခြင်း စွမ်းအားကို အသုံးပြု၍ တာအို စွမ်းအားများကို သရုပ်ဖော် ပြသခြင်း၏ ခက်ခဲမှုမှာ သိပ်ပြီး မကြီးမားလှပေ။

တာအိုမျှော်စင် ဟင်းလင်းပြင် ၏ နဝမ အလွှာ အတွင်း၌ ဓာတ်ကြီးငါးပါး ၏ အပြန်အလှန် ဖန်ဆင်းခြင်း စွမ်းအားများကို အောင်မြင်စွာ ထိန်းချုပ် လိုက်နိုင်ပြီးနောက်... ဉာဏ်အလင်း ပွင့်လာကာ စုယွီ၏ နတ်ဘုရား ဝိညာဉ် မှာလည်း တုန်ခါသွားခဲ့ရ၏။ သူ၏ အသိစိတ်က အခြားသော ကမ္ဘာ့ နယ်ပယ် တစ်ခုသို့ ဝင်ရောက်သွားသကဲ့သို့ ခံစား လိုက်ရသည်။

တစ်ချိန်တည်း မှာပင် တာအိုမျှော်စင် ကိုးထပ်လုံး မှ သူ၏ ခန္ဓာကိုယ် အပေါ်သို့ ဒေါသတကြီး ရိုက်ခတ် နေခဲ့သော အလွန်အမင်း ကြီးမားလှသည့် ဓာတ်ကြီးငါးပါး မဟာ တာအို၏ စွမ်းအားများ မှာလည်း... ထိုအခိုက်အတန့်လေး တွင် ရုတ်တရက် လှိုင်းဂယက်များ ထလာတော့၏။

နောက်တစ်စက္ကန့် တွင်။

ယခင်က မယဉ်ပါးသေးသော ဓာတ်ကြီးငါးပါး မဟာ တာအို၏ စွမ်းအားများက ယဉ်ပါးပြီးသား သိုးငယ်လေးများ အလား ငြိမ်သက်သွားကြ၏။ ထို့အပြင် သူတို့၏ သခင် ထံမှ ယုယ ကြင်နာမှု ကို တောင်းခံ နေသည့် အလား စုယွီ၏ ပတ်လည်တွင် မြူးထူး ကခုန် နေကြပြီး အလွန်တရာ သက်ဝင် လှုပ်ရှား နေကြတော့သည်။

ယခင်က စုယွီ အနေဖြင့် မဟာ အောင်မြင်ခြင်း တာအိုနယ်ပယ် နှင့် ပြီးပြည့်စုံသော တာအိုနယ်ပယ် တို့ အကြားရှိ ကွာဟချက်ကို နားလည် သဘောပေါက် ခဲ့ခြင်း မရှိပါချေ။

သို့သော် ဤအခိုက်အတန့် တွင်မူ... ဝိညာဉ် ခန္ဓာကိုယ် ပိုင်ရှင်များနှင့် တာအို ခန္ဓာကိုယ် ပိုင်ရှင် ပါရမီရှင် များ ပင်လျှင် ပြီးပြည့်စုံသော တာအိုနယ်ပယ် ကို အဘယ်ကြောင့် နားလည် သဘောပေါက်ရန် ခက်ခဲ နေရသနည်း ဆိုသည်ကို စုယွီ သိရှိ နားလည်သွားခဲ့လေပြီ။

ယခင်က သတ်မှတ် ထားခဲ့သော အစပျိုး တာအိုနယ်ပယ်၊ အသေးစား အောင်မြင်ခြင်း တာအိုနယ်ပယ်၊ မဟာ အောင်မြင်ခြင်း တာအိုနယ်ပယ် နှင့် ပြီးပြည့်စုံသော တာအိုနယ်ပယ် ဟူသည့် ခွဲခြားမှု များမှာ...။

စုယွီ၏ လက်ရှိ မျက်လုံးထဲ တွင် ၎င်းတို့က သိပ်ပြီး မှန်ကန်နေပုံ မရတော့ပါချေ။

တစ်ခုတည်းသော တိကျ မှန်ကန်သည့် ခွဲခြားမှု မှာ... အစပျိုး တာအိုနယ်ပယ် နှင့် ပြီးပြည့်စုံသော တာအိုနယ်ပယ် တို့ အကြားတွင်သာ ရှိသည်။

အစပျိုး တာအိုနယ်ပယ် တွင် မဟာ တာအို၏ စွမ်းအားကို ငှားရမ်း အသုံးပြု နိုင်ရုံမျှသာ ရှိပြီး... ဤစွမ်းအား၏ ပြင်းထန်မှု အတိုင်းအတာ က လူတစ်ယောက်၏ မဟာ တာအို စွမ်းအား အပေါ် နားလည် သဘောပေါက်မှု နှင့် ထိန်းချုပ် နိုင်စွမ်း အပေါ်တွင်သာ မူတည် သည်။

သို့သော်ငြား ဤကဲ့သို့ ငှားရမ်း အသုံးပြုခြင်း မှာ မိမိ၏ ကိုယ်ပိုင် စွမ်းအား မဟုတ်ဘဲ နောက်ဆုံး တွင်တော့ 'အခြား တစ်ယောက်' ၏ စွမ်းအားကိုသာ ငှားရမ်း နေရ၏။

အခြား တစ်ဖက် တွင်မူ ပြီးပြည့်စုံသော တာအိုနယ်ပယ် ကတော့ ကွာခြား သည်။ ပြီးပြည့်စုံသော တာအိုနယ်ပယ် ဆိုသည်မှာ….။

ဤအခိုက်အတန့် ၌ စုယွီသည် သူ ကိုယ်တိုင်သည်ပင်လျှင် တာအို ဖြစ်နေသည်ဟု ခံစားနေရသည်။

အကယ်၍ မူလဝိညာဉ်အဆင့် အရှင်သခင်ကြီး တစ်ဦးက သူ့ရှေ့တွင် မည်သည့် ဓာတ်ကြီးငါးပါး တာအိုနယ်ပယ် စွမ်းအား ကိုမဆို အသုံးပြု လာခဲ့မည် ဆိုလျှင် သူက အချိန်မရွေး ဆွဲခွာ ဖယ်ရှား ပစ်နိုင်စွမ်း ရှိ၏။ အဘယ်ကြောင့် ဆိုသော် ၎င်းက သူ၏ 'ကိုယ်ပိုင်' စွမ်းအား ဖြစ်နေသောကြောင့် ပါပင်။

မိမိ၏ ကိုယ်ပိုင် စွမ်းအားကို မိမိ အပေါ် ပြန်လည် အသုံးပြုရန် ဆိုသည်မှာ ရယ်စရာ ကောင်းနေသည် မဟုတ်ပါလော။

အချိန် အတော်ကြာ ကုန်လွန်သွားပြီး နောက် စုယွီ မျက်လုံးများ ဖြည်းညင်းစွာ ဖွင့်လိုက်ပြီး လက်တစ်ဖက် ဆန့်ထုတ် လိုက်လေရာ ငါးရောင်ခြယ် ဝိညာဉ် အလင်းလုံး တစ်ခု စုစည်း ဖြစ်တည် လာခဲ့သည်။ သူက တိုးညင်းစွာ ရေရွတ် လိုက်၏။

"ပြီးပြည့်စုံတဲ့ တာအိုနယ်ပယ်... ဒါက ဝိညာဉ်ခွဲထွက်အဆင့် ဒါမှမဟုတ် အဲဒီထက် ပိုအစွမ်းထက်တဲ့ မဟာ တာအို စွမ်းအား တွေကိုများ လွှမ်းမိုး နိုင်စွမ်း ရှိမလား မသိဘူး"

သူ၏ နတ်ဘုရား ဝိညာဉ်က နဝမ အလွှာ ဟင်းလင်းပြင် တစ်ခုလုံးသို့ စိမ့်ဝင် ပျံ့နှံ့သွားပြီး သူ၏ စိတ်အာရုံ တစ်ချက် လှုပ်ရှားလိုက်၏။

"ဝီ"

ကိုးထပ် မျှော်စင်၏ ဓာတ်ကြီးငါးပါး တာအို စွမ်းအား တစ်ခုလုံးက ရုတ်တရက် စုစည်း သရုပ်ပေါ် လာခဲ့ပြီး အလွန် ကြီးမားလှသော အရောင်ငါးမျိုး ပါဝင်သည့် ဝိညာဉ် အလင်းလုံးကြီး တစ်ခု အဖြစ် လည်ပတ်လာတော့သည်။

စုယွီက ပြီးပြည့်စုံသော ဓာတ်ကြီးငါးပါး တာအိုနယ်ပယ် ၏ စွမ်းအားများဖြင့် တာအို စွမ်းအားများကို သရုပ်ဖော် ပြသလိုက်သည်။

သစ်သား နွယ်ပင်များ၊ သစ်သား ဝိညာဉ် နဂါးများ၊ ဖီးနစ်ငှက်များ အားလုံး ထွက်ပေါ် လာ၏။ ကောင်းကင်မိုးကြိုးကြွက်၊ ထိုက်ရွှီ နှင့် ပင်လယ်လွှမ်းမိုး ရွှမ်လိပ်တို့၏ ပုံရိပ်များ ပင်လျှင် စုယွီ၏ နောက်ကျော ဘက်တွင် ထွက်ပေါ် လာခဲ့ကြ၏။

ထို့အပြင် စုယွီက အင်မော်တယ် ဖြစ်တည်ခြင်း ကျင့်စဉ်အား ဖော်ဆောင် လိုက်သည့် အခိုက်အတန့် တွင် အံ့မခန်း စွမ်းအား တစ်ခု ကောင်းကင်နှင့် မြေကြီး တစ်ခွင်လုံးအား လွှမ်းမိုးသွားတော့သည်။

ပြီးပြည့်စုံသော ဓာတ်ကြီးငါးပါး တာအိုနယ်ပယ် ၏ စွမ်းအားက အင်မော်တယ် တာအိုနယ်ပယ် တစ်ခု အဖြစ်သို့ ပြောင်းလဲသွားခဲ့ပုံ ရသည်။

ထို ငါးရောင်ခြယ် ဝိညာဉ် အလင်းတန်း နယ်ပယ် အတွင်း၌... အင်မော်တယ် တစ်ပါးပါး ဝင်ရောက် လာခဲ့မည် ဆိုလျှင်ပင် အသွင်ကူးပြောင်း ခံရမည့်နှယ် ဖြစ်၏။