အခန်း ၁၂၀၆

အခန်း ( ၁၂၀၆ ) သတ်ဖြတ်ခြင်းနတ်ဘုရားသုံးပါး၏ ပါရမီရှင်များ။

ယခုအခြေအနေသည် ကျွင်းရှောင်ယောက်အတွက် ကြီးမားသော အကျပ်အတည်းတစ်ခု ဖြစ်သည်။

ဤအပြင်အဆင်မျိုးသည် ကျွင်းရှောင်ယောက်ကို မဆိုထားဘိ။

ဧကရာဇ်တစ်ပိုင်းကို လုပ်ကြံရန်ပင် လုံလောက်ပေသည်။

ကျွင်းရှောင်ယောက်ကို ဒုတိယကပ်ဘေး ဧကရာဇ်တစ်ပိုင်းအဆင့် ဘုရင်ဖုဖုန်းက ကာကွယ်ထားလျှင်ပင် အသုံးမဝင်ပေ။

စင်စစ်တွင်၊ သတ်ဖြတ်ခြင်းနတ်ဘုရားသုံးပါးက ကျွင်းရှောင်ယောက်နှင့်အတူ ဧကရာဇ်တစ်ပိုင်း အကျော်အမော်ဖြစ်သော လော့ရှန်းလင်လည်း လိုက်လာမည်ဟု မျှော်လင့်ခဲ့ကြသည်။

ထို့ကြောင့် ပို၍ ပြင်ဆင်ထားကြခြင်း ဖြစ်၏။

သို့သော်လည်း ယခုတော့ လော့ရှန်းလင်က မလိုက်လာသောကြောင့် သူတို့အတွက် ပိုအဆင်ပြေသွားပြီ။

သတ်ဖြတ်ခြင်းနတ်ဘုရားသုံးပါးက ကျွင်းရှောင်ယောက်ကို အခိုင်အမာ ပစ်မှတ်ထားခဲ့ကြသည်။

သူတို့က သဘာဝအတိုင်း ပေါ့ပေါ့တန်တန် သဘောထားမည် မဟုတ်ပေ။

ရန်သူကို လျှော့တွက်ခြင်းကဲ့သို့ ဤအမှားမျိုးက လုပ်ကြံသတ်ဖြတ်သူများ ဘယ်သောအခါမှ မပြုလုပ်သင့်သည့် အခြေခံ အမှားမျိုး ဖြစ်သည်။

ထို့ပြင်၊ ဤလုပ်ကြံသတ်ဖြတ်မှုက သတ်ဖြတ်ခြင်းနတ်ဘုရားသုံးပါး၏ အနာဂတ်နှင့် ကံကြမ္မာကို ဆုံးဖြတ်နိုင်သည် မဟုတ်လော။

ထို့ကြောင့် ဧကရာဇ်တစ်ပိုင်းအဆင့် လုပ်ကြံသတ်ဖြတ်သူများပင် ရောက်လာခဲ့ကြခြင်း ဖြစ်သည်။

ဤကဲ့သို့သော လုပ်ကြံမှုမျိုးနှင့် ရင်ဆိုင်ရလျှင် မည်သူမဆို သွေးပျက်နေမည်ကို ကြောက်ရသည်။

သို့သော်လည်း ကျွင်းရှောင်ယောက်က အလွန်တည်ငြိမ်နေပုံရပေသည်။

သူက ခပ်တိုးတိုး ရယ်မောပြီး မေးလိုက်သည်။

"မင်းတို့ ဘာလုပ်နေတာလဲဆိုတာ သိရဲ့လား"

"သိတယ်"

သတ်ဖြတ်ခြင်းနတ်ဘုရားသုံးပါးမှ လူများက အလျင်လိုခြင်းမရှိဘဲ ပြောလိုက်၏။

တားမြစ်ချက်နှင့် ရွှမ်ထျန်းအစီရင်တို့ကြောင့် ဤနေရာက ပြင်ပလောကနှင့် သီးခြားဖြစ်တည်နေသည်။

ဧကရာဇ်တစ်ပိုင်းဖြစ်လျှင်ပင် ၎င်းကို အချိန်တိုအတွင်း ဖြတ်ရန် ခက်ခဲလိမ့်မည်။

"ဒါဆို မင်းတို့ အောင်မြင်ခဲ့ရင်တောင် အကျိုးဆက်က မင်းတို့မခံနိုင်ဘူးဆိုတာ သိထားသင့်တယ်"

ကျွင်းရှောင်ယောက်က ပြောလိုက်၏။

သတ်ဖြတ်ခြင်းနတ်ဘုရားသုံးပါးမှ လူများက တိတ်ဆိတ်နေသည်။

အခြားသူများက ဤစကားပြောလျှင် လှောင်ပြောင်မိလိမ့်မည်။

အင်မော်တယ်နယ်မြေကြီးတွင် သူတို့ မထိဝံ့သူက အနည်းငယ်သာ ရှိသည်။

သို့သော်၊ ကျွင်းရှောင်ယောက်က ထိုသို့ပြောလာချိန်မှာတော့ သူတို့ တကယ် ငြင်းလို့မရပေ။

ကျွင်းရှောင်ယောက်က ကောင်းကင်ကိုးခုအင်မော်တယ်နယ်မြေကြီး၏ အထွတ်အမြတ် တည်ရှိမှုများထဲမှ တစ်ဦး ဖြစ်သည်။

အင်မော်တယ်နယ်မြေကြီးရှိ အသက်အကြီးဆုံးနှင့် သြဇာအရှိဆုံး မိသားစုတစ်ခုက သူ့ကို ကျောထောက်နောက်ခံပြုထား၏။

သူတို့နောက်ကွယ်မှ အလုပ်ရှင်၏ အနေအထားများကြောင့်မဟုတ်လျှင် ဤတာဝန်ကို လက်ခံဝံ့မည် မဟုတ်ပေ။

"ဒီအတွက်တော့ နတ်ဘုရားသားတော် စိတ်ပူစရာမလိုပါဘူး။ ဘာဖြစ်လို့လဲဆိုတော့ မင်းက သေရတော့မှာပဲ"

ရှန်းထျန်းမှ အကျော်အမော်က အေးစက်စက် ပြောလိုက်သည်။

"ငါ့အသက်ကို ဝယ်ချင်တဲ့သူက မင်းကို ယုံကြည်မှုတွေ အများကြီးပေးခဲ့ပုံရတယ်"

ကျွင်းရှောင်ယောက်က ပြုံးလိုက်သည်။

"လှည့်ကွက်သုံးဖို့ စဉ်းစားနေစရာမလိုပါဘူး။ အလုပ်ရှင်ရဲ့ အချက်အလက်ကို နည်းနည်းလေးတောင် မထုတ်ဖော်တာက လူသတ်သမားတစ်ဦးရဲ့ အခြေခံအကျဆုံး အချက်ပဲ"

ယိုပြည်ထောင်မှ လုပ်ကြံသတ်ဖြတ်သူတစ်ဦးက လှောင်ပြောင်လိုက်၏။

ကျွင်းရှောင်ယောက်က ခေါင်းယမ်းပြီး သက်ပြင်းချလိုက်သည်။

"တကယ်တော့ မင်းတို့ ငါ့ကို မပြောရင် ငါ ခန့်မှန်းလို့ ရပါတယ်"

တားမြစ်မိသားစုများကို ဤမျှ ကြိုးစားနေမည်ဟု သူ မမျှော်လင့်ထားပေ။

သို့သော်လည်း သူ့အတွက်တော့ အဆင်ပြေသည်။

သို့ပေသော်ငြား၊ ကျွင်းရှောင်ယောက်သည် တားမြစ်မိသားစုသက်သက်ဖြင့် သတ်ဖြတ်ခြင်းနတ်ဘုရားသုံးပါး၏ အလိုကို ဖြည့်စည်းနိုင်မည်ဟုတော့ မယုံပေ။

‌

နောက်ဆုံးတွင်၊ သူ့ကို လုပ်ကြံသတ်ဖြတ်ခြင်းမှာ အန္တရာယ်အလွန်ကြီးမားသည်။

စျေးကြီးကြီးမပေးဘဲ သတ်ဖြတ်ခြင်းနတ်ဘုရားသုံးပါးကို မည်သို့ ဆွဲဆောင်နိုင်မည်နည်း။

ထို့ကြောင့် အခြားသော အင်အားစုများလည်း ပါဝင်သင့်သည်။

တိဟောက်ထျန်း။

ကျွင်းရှောင်ယောက်က တိဟောက်ထျန်းအကြောင်းကို တွေးမိသည်။

စင်စစ်တွင်၊ သူက ဉာဏ်ရည်မြင့်မားသော လူအနည်းစုထဲမှ တစ်ဦး ဖြစ်သည်။ သူ့တွင် ပြန်လည်မွေးဖွားလာသူဟူသော ရွှေလက်ချောင်းလည်း ရှိသေးသည်။

သူက ကျွင်းရှောင်ယောက်ကို အမြန်ဆုံး ဖယ်ရှားချင်နေနိုင်သည်။ သို့သော်လည်း အတင်းအကြပ် အင်အားသုံးပါးက ကျွင်းမိသားစုနှင့် အင်မော်တယ်ခုံရုံးတွင် မည်သူ့အတွက်မျှ အကျိုးမရှိပေ။

ထို့ပြင်၊ ပြန်လည်မွေးဖွားလာသူတစ်ဦးအနေဖြင့် တိဟောက်ထျန်းက အခွင့်အလမ်းများစွာကို သိသင့်သည်။

ဤအခွင့်အလမ်းများကိုလည်း သတ်ဖြတ်ခြင်းနတ်ဘုရားသုံးပါးနှင့် ဆက်သွယ်မှုပြုလုပ်ရန် ညှိနှိုင်းခြင်းချစ်ပ်များအဖြစ် အသုံးပြုနိုင်ပေသည်။

ထို့ပြင် ကျွင်းရှောင်ယောက်က စန်းမျိုးနွယ်ကိုလည်း စဉ်းစားခဲ့သည်။

သူသည် ရွှီထျန်းလောကတွင် ကျိုးထျန်းတာအိုသားတော်၏ အခွင့်အရေးကို လုယူခဲ့သည်။

ယခင် စန်းမျိုးနွယ်မှ လူများ၏ ‌မာနထောင်လွှားသော စိတ်နေသဘောထားအရ ဒါကို သည်းခံနေမည် မဟုတ်ပေ။

စန်းမျိုးနွယ်၏ နောက်ခံက သူ့ကိုဝန်းရံသတ်ဖြတ်ရန်အတွက် ဤအစီအစဉ်တွင် ပါဝင်ရန် လုံလောက်သည်။

အခြားရှေးဟောင်းတော်ဝင်မိသားစု၊ မြင့်မြတ်ဝိညာဉ်မျိုးရိုး စသည်တို့ ပါဝင်ပတ်သက်မှုရှိမရှိကိုတော့ ကျွင်းရှောင်ယောက်က မသေချာတော့ပါ။

သို့သော်လည်း ဤအင်အားစုများက အလွန်ရှုပ်ထွေးသောကြောင့် ဤအစီအစဉ်တွင် အချိန်တိုအတွင်း ပါဝင်ရန် မဖြစ်နိုင်ပေ။

နောက်ဆုံးတွင် အမှောင်ကမ္ဘာတစ်ခုသာ ကျန်သည်။ သူတို့က ရှေးဟောင်းမြင့်မြတ်ခန္ဓာကျိန်စာတွင် ပါဝင်ပုံရသော်လည်း ယခုအချိန်ထိ ကိုယ်ထင်ပြခြင်း မရှိသေးပေ။

တစ်ခုတည်းသော ပြဿနာရှိသူမှာ ‌အမှောင်ကမ္ဘာမှ ခွဲထွက်သွားသည့် မျိုးရိုးဟု ကောလာဟလ ထွက်ပေါ်လျက်ရှိသော အမှောင်ဘုရင်မျိုးရိုး ဖြစ်သည်။

သို့သော်လည်း အမှောင်ကမ္ဘာက သူ့ကို ဤမျှစောစီးစွာ ပစ်မှတ်ထားလိမ့်မည်ဟု မထင်ထားပေ။

"နောက်ကွယ်က အဓိကလူ‌ဟာ ကောင်းကင်ကိုးခုအထက် တားမြစ်မိသားစု၊ အင်မော်တယ်ခုံရုံးနဲ့ စန်းမျိုးနွယ်ပဲ။ ငါ့ရဲ့ ခန့်မှန်းချက်က မှန်သလားဆိုတာ သိချင်မိပါတယ်"

ကျွင်းရှောင်ယောက်က သူ့လက်နှစ်ဖက်ကို နောက်သို့ယှက်ပြီး သတ်ဖြတ်ခြင်းနတ်ဘုရားသုံးပါးကို ကြည့်လိုက်သည်။

သတ်ဖြတ်ခြင်းနတ်ဘုရားသုံးပါး၏ လူများက အမူအရာမပြောင်းပေ။ ဒါက လူသတ်သမားများ၏ စတိုင်တစ်မျိုး ဖြစ်သည်။

သို့သော်လည်း သူတို့၏စိတ်ထဲတွင် အံ့သြသွား၏။

"အပိုတွေပြောနေစရာ မလိုဘူး၊ ဒီနေ့က မင်း သေရမဲ့နေ့ပဲ"

သတ်ဖြတ်ခြင်းနတ်ဘုရားသုံးခုမှ လူများက သတ်ဖြတ်ချင်စိတ်အပြည့်ဖြင့် ပြောလိုက်သည်။

ထိုအချိန်တွင် လူငယ်တစ်ဦးနှင့် မိန်းကလေးတစ်ဦးက ရှေ့သို့တိုးလာခဲ့ကြသည်။

သူတို့နှစ်ဦးစလုံး၏ နောက်ကျောတွင် အတောင်လေးခုရှိ၏။ သွေးပင်လယ်ကဲ့သို့ သွေးအငွေ့အသက်များလည်း ထွက်ပေါ်နေသေးသည်။ ၎င်းတို့၏လက်တွင် အသက်သွေးများစွာ စွန်းထင်းနေကြောင်း ထင်ရှားသည်။

"အရှင်၊ ကျွန်ုပ်တို့ကို လှုပ်ရှားခွင့်ပြုပါ။ ကျွင်းရှောင်ယောက်က ကျွန်ုပ်တို့ရဲ့ အကောင်းဆုံး ဓားသွေးကျောက်ပဲ"

လူငယ်နှင့် မိန်းကလေးက ပြောလိုက်ကြသည်။

သူတို့နှစ်ဦးက အလွန်ဆင်တူသည်။ ၎င်းတို့က ကျဉ်းမြောင်းသော မျက်လုံးများ၊ အေးစက်စက် အငွေ့အသက်ဖြင့် နဂါးနှင့်ဖီးနစ် အမြွှာများ ဖြစ်ချေသည်။

"ဒါက ရှန်းထျန်းရဲ့ လူသတ်သမား နှစ်ယောက်ပဲ"

"သူတို့ဟာ မတူကွဲပြားတဲ့ တာအိုခန္ဓာနဲ့ စိတ်တူကိုယ်တူရှိတဲ့ နဂါးနဲ့ဖီးနစ် အမြွှာတွေပဲ။ သူတို့ရဲ့ လုပ်ကြံသတ်ဖြတ်မှုသမိုင်းမှာ တစ်ခါမှ အမှားအယွင်းမရှိဖူးဘူး"

ယိုပြည်ထောင်နှင့် သွေးမျှော်စင်ဘက်မှ အသံများ ထွက်ပေါ်လာသည်။

ဤအမြွှာလူသတ်သမားနှစ်ဦးက လူသတ်သမားအသိုင်းအဝန်းတွင် အလွန်ကျော်ကြားသော ပါရမီရှင်များဖြစ်ကြောင်း ထင်ရှားလှပေသည်။

ယခုအချိန်တွင် သူတို့က ကျွင်းရှောင်ယောက်ကို ဓားသွေးကျောက်အဖြစ် အမှန်တကယ် အသုံးပြုလိုနေသည်။

"မလိုဘူး။ ကျွင်းရှောင်ယောက်က ကောင်းကင်အဓိပဓိငယ်ပဲဖြစ်ပေမဲ့... တစ်ချိန်က သူဟာ မဟာကောင်းကင်အဓိပဓိကို လက်သီးတစ်ချက်နဲ့ သတ်ခဲ့ဖူးတယ်"

ရှန်းထျန်းမှ လူတစ်ဦးက ပြောလိုက်သည်။

ထိုစဉ်၊ ဧကရာဇ်တစ်ပိုင်း အရှိန်အဝါများ ရုတ်တရက် ပေါက်ကွဲထွက်လာသည်။

အလင်းတန်းတစ်ခုက ကျွင်းရှောင်ယောက်ထံသို့ တိုးဝင်လာ၏။

"အတင့်ရဲလိုက်တာ"

ဘုရင်ဖုဖုန်းက အော်ဟစ်ပြီး တိုက်ခိုက်လိုက်သည်။ သူ၏ သေဆုံးခြင်းနှင့် ရှင်သန်ခြင်းက ကျွင်းရှောင်ယောက်နှင့် ဆက်စပ်နေ၏။

ကျွင်းရှောင်ယောက် သေဆုံးသွားပါက သူ အသက်ရှင်ရန် မျှော်လင့်ချက်မရှိပေ။

သို့သော်လည်း အခြားဦးတည်ချက်တစ်ခုမှ နောက်ထပ် နိယာမလက်ကြီးတစ်ဖက် ကျရောက်လာပြီး ဘုရင်ဖုဖုန်းနှင့် တိုက်မိသွားသည်။

ကျယ်လောင်သော ပေါက်ကွဲသံနှင့်အတူ ဟင်းလင်းပြင်က ပေါက်ကွဲသွား၏။

ဘုရင်ဖုဖုန်း၏ သွေးများဆူပွက်လာကာ ခြေလှမ်းရာနှင့်ချီ ဆုတ်ခွာသွားရတော့သည်။

"စတုတ္ထကပ်ဘေး ဧကရာဇ်တစ်ပိုင်း..."

ဘုရင်ဖုဖုန်း မျက်နှာပျက်သွားသည်။

ထိုအချိန်တွင်၊ ကျွင်းရှောင်ယောက်၏ ခန္ဓာကိုယ်ပေါ်မှာ တောက်ပသော ကြိုးများ ပေါ်လာသည်။

အလင်းတန်းက ကြိုးများအဖြစ် ပြောင်းသွားခြင်း ဖြစ်၏။

၎င်းကို အထူးသတ္ထုတစ်မျိုးဖြင့် ပြုလုပ်ထားပြီး နိယာမများကိုစုပ်ယူကာ နယ်ပယ်များကို ကန့်သတ်နိုင်စွမ်း ရှိသည်။

"ဒါက တားမြစ်ဝိညာဉ်လော့ခ်ပဲ။ အခု မင်းတို့လေ့ကျင့်ဖို့ အခွင့်အရေးပေးမယ်"

ရှန်းထျန်းမှ အကျော်အမော်က ပြောလိုက်သည်။

တားမြစ်ဝိညာဉ်လော့ခ်က လူတစ်ဦး၏ စွမ်းရည်နှင့် နယ်ပယ်ကို ကန့်သတ်နိုင်ပေသည်။

ကျွင်းရှောင်ယောက်၏ ခွန်အားက သူ့မျိုးဆက်တူများထက် များစွာသာလွန်သည်။ သူ့အပေါ် ကန့်သတ်ချက်များမရှိပါက ရလဒ်နှင့်ပတ်သက်၍ သံသယဖြစ်စရာ မရှိပေ။

ရှန်းထျန်းမှ အမြွှာ လူသတ်သမားနှစ်ယောက်က အနည်းငယ် မပျော်မရွှင် ဖြစ်သွားကြသည်။

သူတို့က ကျွင်းရှောင်ယောက်ကို အရှိအတိုင်း စိန်ခေါ်ချင်ကြခြင်းပင် မဟုတ်လော။

"ပြီးတော့ ငါ"

အေးစက်ပြီး အက်ရှရှ အသံတစ်ခု ထွက်ပေါ်လာသည်။

ယိုပြည်ထောင်မှ အမျိုးသားတစ်ဦးက ရှေ့သို့ တိုးလာခဲ့၏။ သူက သူ့မျက်နှာပေါ်ရှိ အဖြူရောင်မျက်နှာဖုံးကိုချွတ်ကာ စက္ကူလူသားကဲ့သို့ မျက်နှာမျိုးကို ပေါ်လွင်လာစေသည်။

"ဒါက သေမင်း ရေခဲမျက်နှာပဲ။ သူက ယိုပြည်ထောင်ရဲ့ မျိုးဆက်သစ်လူငယ်တွေထဲမှာ ငရဲအဆင့် မစ်ရှင်ဆယ်ခုကို ဆက်တိုက်ပြီးမြောက်ခဲ့တဲ့ တစ်ဦးတည်းသော လူသတ်သမားလို့ ပြောကြတယ်"

အဖြူရောင်မျက်နှာဖုံးကို ချွတ်လိုက်သည်နှင့် အခြား သတ်ဖြတ်ခြင်းနတ်ဘုရားနှစ်ပါးမှ လူများ အနည်းငယ် တုန်လှုပ်သွားကြသည်။

ကျွင်းရှောင်ယောက်နှင့် လေ့ကျင့်လိုသူများက တကယ်ကို သာမန်မဟုတ်ပေ။

ဤတွင်၊ သွေးမျှော်စင်ကလည်း သဘာဝအတိုင်း တုံ့ဆိုင်းနေမည် မဟုတ်ပါ။

သွေးရောင်အဝတ်အစားများ ဝတ်ဆင်ထားသော အမျိုးသားတစ်ဦးက ရှေ့သို့တိုးလာသည်။ သူ့နောက်ဘက်တွင် သွေးစွန်းနေသော နတ်ဆိုးလက်စွပ်ကွင်းတစ်ခု ရှိ၏။ ၎င်းမှ မရေမတွက်နိုင်သော သက်ရှိများ၏ ဒေါသတကြီး အော်ဟစ်ညည်းညူသံများလည်း ထွက်ပေါ်နေပုံရသည်။

၎င်းက မရေမတွက်နိုင်သော သက်ရှိများကို သတ်ဖြတ်ပြီးမှ ဖြစ်ပေါ်လာနိုင်သော အပြစ်သားနှင့် လူတစ်ယောက်၏စွမ်းအားကို ကိုယ်စားပြုသော သင်္ကေတတစ်ခုပင်။

"သွေးမျှော်စင်ရဲ့ အသန်မာဆုံး မျိုးဆက်လည်း ထွက်ပေါ်လာခဲ့ပြီ"

သတ်ဖြတ်ခြင်းနတ်ဘုရားသုံးပါး၏ ထိပ်တန်း ပါရမီရှင်များက အချင်းချင်း ယှဉ်ပြိုင်ရန် ထွက်ပေါ်လာခဲ့ကြသည်။

"အဆုံးမှာ ကျွင်းရှောင်ယောက်ကို ဘယ်သူက သတ်နိုင်မလဲဆိုတာ ပြိုင်ကြရအောင်"

အမြွှာလူသတ်သမားတစ်ဦးက ပြောလိုက်သည်။

"ကောင်းပြီ၊ ကျွင်းရှောင်ယောက်က ငါ့ရဲ့လက်မှာ ကျဆုံးသူတွေထဲ အဖိုးတန်ဆုံး သားကောင်ဖြစ်လာလိမ့်မယ်"

သေမင်း ရေခဲမျက်နှာက ခပ်တိုးတိုး ပြော၏။

"ကျွင်းရှောင်ယောက်လိုမျိုးလူကို သတ်နိုင်တာက ဒဏ္ဍာရီတစ်ခုပါပဲ၊ လူသတ်သမားလောကရဲ့ သမိုင်းမှာတောင် မှတ်တမ်းတင်ခံရလောက်အောင်ပဲ"

သွေးမျှော်စင်မှ ဆင်းသက်လာသူက အသက်မဲ့စွာ ပြုံးလိုက်လေသည်။