အခန်း ၁၂၀၉

အခန်း ( ၁၂၀၉ ) ကောင်းကင် အနက်ရောင်သွေးနှင့် ပေါင်းစည်းခြင်း။

အဓိပဓိနယ်ပယ်ခုနစ်ခုတွင် ခြေလှမ်းတိုင်းက ကောင်းကင်ဘုံသို့ တက်လှမ်းရသကဲ့သို့ ခက်ခဲလာသည်။

ထို့ကြောင့်၊ အဓိပဓိနယ်ပယ်သို့ ရောက်လာပြီးနောက် နောက်တစ်ဆင့်ကို ဖြတ်ကျော်ရန်မှာ အလွန်ခက်ခဲ၏။

တချို့သော ထိပ်သီး ပါရမီရှင်များပင်လျှင် တူညီသောနယ်ပယ်တွင်သာ လေးစားမှုခံရနိုင်သည်။

သူ့ထက်အဆင့်မြင့်သော ပညာရှင်တစ်ယောက်နှင့် ရင်ဆိုင်ရပါက အနည်းငယ် စွမ်းအားကင်းမဲ့သလို ဖြစ်လိမ့်မည်။

သို့ရာတွင်၊ ကျွင်းရှောင်ယောက်ကတော့ မတူပေ။

သူ့အတွက်တော့ အဆင့်တူသူများက ပြိုင်ဘက်များအဖြစ် သတ်မှတ်ရန်ပင် မရတော့ပါ။

သူ့ထက် အဆင့်တစ်ဆင့် မြင့်မားသည့် မဟာကောင်းကင်အဓိပဓိပင်လျှင် လက်သီးတစ်ချက်ဖြင့် သွေးအန်ပြီး နောက်ပြန်ဆုတ်သွားခဲ့ရသည်။

သို့သော်...

ယခု လှုပ်ရှားတော့မည်သူက အဆင့်တူ ကောင်းကင်အဓိပဓိငယ်မဟုတ်၊ တစ်ဆင့်ပိုမြင့်သည့် မဟာကောင်းကင်အဓိပဓိလည်း မဟုတ်။

ထိုအစား ဆန်းကျယ်ကောင်းကင်အဓိပဓိဖြစ်နေချေပြီ။

"ဆန်းကျယ်"ဟူသော စကားလုံးဖြင့် အစပျိုးနိုင်ခြင်းက ဤအဆင့်ရှိ အကျော်အမော်မှာ မဟာကောင်းကင်အဓိပဓိများပင် နှိုင်းယှဉ်မရနိုင်ကြောင်း သက်သေပြရန် လုံလောက်သည်။

သတ်ဖြတ်ခြင်းနတ်ဘုရားသုံးပါး၏ တန်ခိုးကြီးသော တာအိုသခင်များကို ကျွင်းရှောင်ယောက်၏ ရှေးဟောင်းရတနာများက ယာယီ တားဆီးထားခဲ့သည်။

ကောင်းကင်အဓိပဓိငယ်နှင့် မဟာကောင်းကင်အဓိပဓိများကလည်း ကျွင်းရှောင်ယောက်ကို မည်သို့မျှ မယှဉ်နိုင်ပေ။

ထို့ကြောင့် ဆန်းကျယ်ကောင်းကင်အဓိပဓိကသာ လှုပ်ရှားနိုင်သည်။

"တရားစီရင်ရေးဓား"

ဆန်းကျယ်ကောင်းကင်အဓိပဓိက သူ့လက်တစ်ဖက်ကို မြှောက်လိုက်သည်။ အဆုံးမဲ့ နိယာမစွမ်းအားက စုစည်းလာပြီး ကောင်းကင်နှင့်မြေပြင်ကို ဖြတ်တောက်နိုင်သည့် ဓားတစ်လက်အဖြစ်သို့ ပြောင်းလဲသွား၏။

ကြမ်းတမ်းပြီး ပြင်းထန်သော အတက်အကျများက အရပ်ရပ်ကို ဖြာထွက်လာတော့သည်။

ရှန်းထျန်း၏ ဆန်းကျယ်ကောင်းကင်အဓိပဓိအပြင် ယိုပြည်ထောင်နှင့် သွေးမျှော်စင်တို့မှ ဆန်းကျယ်ကောင်းကင်အဓိပဓိတို့ကလည်း လှုပ်ရှားခဲ့ကြသည်။

ယိုပြည်ထောင်မှ ဆန်းကျယ်ကောင်းကင်အဓိပဓိက ရာနှင့်ချီသော အလံများဖြင့် သတ်ဖြတ်ခြင်းအစီရင်တစ်ခုကို ဖွဲ့စည်းလိုက်သည်။ ထိုအစီရင်က အလွန်အစွမ်းထက်ပြီး တော်ရုံ ဆန်းကျယ်ကောင်းကင်အဓိပဓိများကို အလွယ်တကူ သတ်နိုင်စွမ်းရှိ၏။

သွေးမျှော်စင်၏ အကျော်အမော်မူကား သွေးစွန်းနေသော ဓားမြှောင်တစ်လက်ကို ကိုင်ဆောင်ထားသည်။ ၎င်းက အဆိပ်သုတ်လိမ်းထားဟန်ဖြင့် အစိမ်းရောင်ဖျော့ဖျော့ လင်းလက်နေပေသည်။

ဆန်းကျယ်ကောင်းကင်အဓိပဓိအဆင့် ပညာရှင်များ၏ ဝိုင်းရံခြင်းကို ရင်ဆိုင်နေရချိန်တွင်...

ကျွင်းရှောင်ယောက်ကဲ့သို့ သန်မာသူတစ်ဦးပင်လျှင် သတိထားပြီး ရင်ဆိုင်ရသည်။

ကျွင်းရှောင်ယောက်က သူ၏ လက်နက်နှစ်ခုကို ထုတ်ဖော်လိုက်သည်။

အရာအားလုံး၏မိခင်ချီ ဒယ်စောက်အိုးက သူ့ဦးခေါင်းထက်တွင် လွင့်မျောနေသည်။

ဒယ်စောက်အိုးက လည်ပတ်လာသည်နှင့်အမျှ အရာအားလုံး၏မိခင်ချီကြိုးမျှင်များလည်း ထွက်ပေါ်လာကြ၏။

တစ်ဖက်တွင်၊ တာ့လော့ဓားသန္ဓေက တောက်ပနေပြီး ဓားကိုယ်ထည်က စကြဝဠာတစ်ခုလုံးကို ထင်ဟပ်နေပုံရသည်။

ပုံမှန်အားဖြင့် ကျွင်းရှောင်ယောက်သည် ဤလက်နက်နှစ်ခုကို အသုံးပြုလေ့မရှိပေ။

ယခုမူ၊ ကျွင်းရှောင်ယောက်က အရာအားလုံး၏မိခင်ချီ ဒယ်စောက်အိုးနှင့် တာ့လော့ဓားသန္ဓေ နှစ်ခုစလုံးကို ထုတ်ယူလိုက်ပြီ ဖြစ်သည်။ ဤသည်က ကျွင်းရှောင်ယောက်ကို မည်မျှ သတိထားနေကြောင်း တွေ့မြင်နိုင်ပေသည်။

"ဝုန်း"

ကျွင်းရှောင်ယောက်က ဆန်းကျယ်ကောင်းကင်အဓိပဓိများကို ထိပ်တိုက် ရင်ဆိုင်လိုက်သည်။

တရားစီရင်ရေးဓားက ကျွင်းရှောင်ယောက်ဆီသို့ ဦးစွာ ကျရောက်လာသည်။

ကျွင်းရှောင်ယောက်က အရာအားလုံး၏မိခင်ချီ ဒယ်စောက်အိုးဖြင့် ခုခံကာကွယ်လိုက်သည်။

ကျယ်လောင်သော ပေါက်ကွဲသံတစ်ချက် ထွက်ပေါ်လာ၏။ သို့သော်လည်း အရာအားလုံး၏မိခင်ချီ ဒယ်စောက်အိုးက ထိခိုက်သွားခြင်းမျိုး မရှိခဲ့ပေ။

"ဟမ်၊ ဒါက ဘယ်လိုလက်နက်မျိုးလဲ၊ အရာအားလုံးရဲ့မိခင်ချီကို အခြေခံပြီး ထုလုပ်ထားတယ်။ ဒါက ဧကရာဇ်လက်နက်နဲ့ မဝေးတော့ဘူး"

ရှန်းထျန်းမှ ဆန်းကျယ်ကောင်းကင်အဓိပဓိက အရာအားလုံး၏မိခင်ချီ ဒယ်စောက်အိုးကို လောဘမျက်လုံးတို့ဖြင့် ကြည့်လိုက်သည်။

တစ်ဖက်တွင် ယိုပြည်ထောင်နှင့် သွေးမျှော်စင်မှ ဆန်းကျယ်ကောင်းကင်အဓိပဓိနှစ်ပါး၏ တိုက်ခိုက်မှုကို ကျွင်းရှောင်ယောက်က တာ့လော့ဓားသန္ဓေဖြင့် ခုတ်ထစ်ပြီး ခုခံလိုက်၏။ ရှည်လျားသော ဓားအလင်းက ကောင်းကင်ယံကို ဖြတ်သန်းသွားတော့သည်။

အားကောင်းသော အပျက်အစီးလှိုင်းများ ဖြာထွက်လာပြီး ကျွင်းရှောင်ယောက်မှာ ဖိအားကြီးစွာ ခံစားလိုက်ရသည်။

သို့ရာတွင်၊ ကျွင်းရှောင်ယောက်က စုတ်ပြဲနေသော ချပ်ဝတ်တန်ဆာကို ၀တ်ဆင်ထားသည်။ ၎င်းက အလွန် အစွမ်းထက်သော ခံစစ်စွမ်းအားရှိသည့် ရှေးဟောင်းရတနာတစ်ခု ဖြစ်၏။

မဟုတ်ပါက ကျွင်းမိသားစု၏ ဘိုးဘေးများသည် ကျွင်းရှောင်ယောက်ကို အကာအကွယ် ရတနာအဖြစ် ပေးအပ်ခဲ့မည် မဟုတ်ပေ။

"ဒါက ဘယ်လိုဖြစ်နိုင်မှာလဲ။ ကျွင်းရှောင်ယောက်က ဆန်းကျယ်ကောင်းကင်အဓိပဓိတွေရဲ့ တိုက်ခိုက်မှုတစ်ကျော့ကို တကယ် ခုခံခဲ့တယ်"

သတ်ဖြတ်ခြင်းနတ်ဘုရားသုံးပါးမှ အခြား လူသတ်သမားများ အံ့ဩသွားကြသည်။

မိမိထက် အဆင့်တစ်ခုမြင့်မားသူကို စိန်ခေါ်ခြင်းက ထူးကဲနေပြီ ဖြစ်သည်။

အဆင့်နှစ်ခုကျော်ပြီး ဆန်းကျယ်ကောင်းကင်အဓိပဓိကို ရင်ဆိုင်ခြင်းက တရားလွန်သွားပြီ မဟုတ်လော။

အခြားသူများက မည်မျှ အားကောင်းနေပါစေ၊ စည်းမျဥ်းစည်းကမ်းများကို လိုက်နာရသည်။

ကျွင်းရှောင်ယောက်ကတော့ သိုင်းကျင့်ဝတ်များကို လုံးဝ မလိုက်နာပေ။

"ဒါက အဲဒီအကာအကွယ် ချပ်ဝတ်တန်ဆာကြောင့်ပဲ ဖြစ်ရမယ်။ အဲဒါက စွမ်းအား အများစုကို ပိတ်ဆို့ထားခဲ့လို့ပဲ"

"ဒါပေမဲ့ ဒီလိုဆိုရင်တောင် ကြောက်စရာကောင်းနေသေးတယ်။ ရှေးဟောင်းလက်နက်တွေနဲ့ ကာကွယ်ထားရင်တောင်မှ ဆန်းကျယ်ကောင်းကင်အဓိပဓိကို တိုက်ခိုက်နိုင်မှာ မဟုတ်ဘူးမို့လား"

ယခုမှ၊ သတ်ဖြတ်ခြင်းနတ်ဘုရားသုံးပါးမှ လူများ နားလည်သွားကြသည်။

ကျွင်းရှောင်ယောက်က တကယ်ကို ဒဏ္ဍာရီတစ်ခုပင်။

"ကောင်လေး၊ မာနမကြီးစမ်းနဲ့။ ငါတို့ ဆန်းကျယ်ကောင်းကင်အဓိပဓိတွေရှေ့မှာ မင်းက ပုရွက်ဆိတ်တစ်ကောင်ပဲ"

ရှန်းထျန်းမှ ဆန်းကျယ်ကောင်းကင်အဓိပဓိက မကျေမနပ်ဖြင့် ကြည့်ကာ ပြောလိုက်သည်။

ကျွင်းရှောင်ယောက်က သူတို့ထက် နှစ်ဆင့်နိမ့်သော်လည်း သူတို့၏တိုက်ခိုက်မှုကို တကယ် တားဆီးနိုင်ခဲ့သည်။

သူတို့၏ မျက်နှာများကို ထားစရာနေရာမရှိတော့ပေ။

"သတ်ဖြတ်ခြင်း ဓားတစ်သိန်း"

ရှန်းထျန်း၏ ဆန်းကျယ်ကောင်းကင်အဓိပဓိက ငေါက်ငမ်းပြီး သူ၏ အစွမ်းထက် သတ်ဖြတ်ခြင်းနည်းလမ်းကို စတင်လိုက်သည်။

သူ့နောက်မှ အတောင်များက တုန်ခါလာသည်။ နိယာမဖြင့် ဖွဲ့စည်းထားသော ငှက်မွှေးများက ကျဆင်းသွား၏။

ကြောက်မက်ဖွယ်ကောင်းသော ဓားတစ်သိန်းအဖြစ် ပြောင်းလဲကာ ကျွင်းရှောင်ယောက်ဆီသို့ ဖြတ်သန်းသွားတော့သည်။

တစ်ချိန်တည်းမှာပင်၊ ယိုပြည်ထောင်နှင့် သွေးမျှော်စင်တို့မှ ဆန်းကျယ်ကောင်းကင်အဓိပဓိများကလည်း ၎င်းတို့၏ သတ်ဖြတ်ခြင်းနည်းလမ်းများကို စတင်ခဲ့ကြသည်။

ကျွင်းရှောင်ယောက်ကဲ့သို့ အဆီကြွယ်ဝသော သားကောင်အတွက် ပြိုင်ဆိုင်လိုကြပေသည်။

"မင်းတို့က ဆန်းကျယ်ကောင်းကင်အဓိပဓိဆိုရင်တောင် ဘာဖြစ်လဲ။ ငါ နတ်ဘုရားသားတော်က အနိုင်ကျင့်ရတာ လွယ်ကူတယ်လို့ မင်းတို့ တကယ်ထင်နေကြတာလား"

ကျွင်းရှောင်ယောက်၏ မျက်လုံးများက စူးရှလာသည်။ သူ၏ အရှိန်အဝါများက ကောင်းကင်ကို တုန်ခါစေခဲ့၏။

အခြေအနေက အဆိုးဘက်တွင် ရှိနေသော်လည်း ကျွင်းရှောင်ယောက်ကတော့ နောက်မတွန့်ပေ။

ဒါက ကျွင်းရှောင်ယောက်၏ အရိုးထဲမှာ အမြစ်တွယ်နေသော မာန်မာန ဖြစ်သည်။

ကျွင်းရှောင်ယောက်၏ ခန္ဓာကိုယ်တွင် အနှိုင်းမဲ့သွေးက တစ်ဖန် ဆူပွက်လာပြန်သည်။ သူ့စွမ်းရည်များက အဆများစွာ တိုးတက်လာပြန်၏။

သူ့နောက်တွင် ကစဉ့်ကလျားစွမ်းအင်များ တိုးလာပြီး နတ်ဆိုးနှင့် နတ်ဘုရားများက ကမ္ဘာကို ဖန်တီးနေပုံရသည်။

ကစဉ့်ကလျားခန္ဓာ၏ သဘာဝရူပါရုံ၊ ကစဉ့်ကလျားကောင်းကင်ကိုဖွင့်ခြင်း။

တစ်ချိန်တည်းမှာပင် မေယုကမ္ဘာသုံးထောင်၏ စွမ်းအားက သူ့ခန္ဓာကိုယ်မှ ပေါက်ကွဲထွက်လာ၏။

ကျွင်းရှောင်ယောက်က တာ့လော့ဓားသန္ဓေဖြင့် မဟာနတ်ဘုရားသိုင်းကြီးငါးခု၏ ပေါင်းစပ်မှုစွမ်းရည် သတ်ဖြတ်ခြင်းဓားကို အသုံးပြုလိုက်တော့သည်။

"သတ်"

"ဝုန်း"

အားကောင်းသော အတက်အကျများ ဖြာထွက်လာခဲ့သည်။

ထိုသို့သော အတက်အကျများက အလွန်အားကောင်းပြီး ကြယ်ကောင်းကင်၏ နက်နဲရာမှ ဧကရာဇ်တစ်ပိုင်းအဆင့် အကျော်အမော်များထက် များစွာ အားမနည်းပေ။

ကျယ်လောင်သော ပေါက်ကွဲသံနှင့်အတူ...

သတ်ဖြတ်ခြင်းနတ်ဘုရားသုံးပါးမှ ဆန်းကျယ်ကောင်းကင်အဓိပဓိသုံးပါးစလုံး ခြေလှမ်းအနည်းငယ် နောက်ဆုတ်သွားခဲ့ကြရသည်။

ကျွင်းရှောင်ယောက်၏ ခန္ဓာကိုယ်လည်း တုန်ခါပြီး ချီနှင့်သွေးများ ဆူပွက်သွားပေသည်။

သူ့ခန္ဓာကိုယ်ထဲမှ မေယုကမ္ဘာများလည်း တစ်ချိန်တည်းမှာ ကွဲအက်သွားကြသည်။

သူ့ကိုယ်ပေါ်ရှိ စုတ်ပြဲနေသော ချပ်ဝတ်တန်ဆာမှာလည်း အက်ကွဲကြောင်းများ ပိုများလာပြီး ပျက်စီးရန် နီးကပ်နေပြီ။

ရှန်းထျန်းမှ ဆန်းကျယ်ကောင်းကင်အဓိပဓိက ချပ်ဝတ်တန်ဆာပေါ်ရှိ အက်ကွဲကြောင်းများကို မြင်လိုက်ရသောအခါ၊ သူ့မျက်လုံးများ အနည်းငယ် ကျဉ်းမြောင်းသွားသည်။

"ကျွင်းရှောင်ယောက်၊ မင်းက တကယ်ကို မျှော်လင့်ထားတာထက် ကျော်လွန်နေတာပဲ။ မင်းက ငါတို့ရဲ့ တိုက်ခိုက်မှုတွေကို တကယ် ခုခံနိုင်တယ်"

"ဒါပေမဲ့ မင်း ဘယ်လောက်ထိ ခုခံနိုင်မှာလဲ"

"မင်း ငါတို့ရဲ့ တိုက်ခိုက်မှုတွေကို တွန်းလှန်နိုင်ရင်တောင် ဒီနေ့ မင်း အသက်ရှင်နိုင်ပါ့မလား"

ရှန်းထျန်းမှ ဆန်းကျယ်ကောင်းကင်အဓိပဓိက အေးတိအေးစက်ဖြင့် ပြောလိုက်၏။

အထက်ကောင်းကင်တွင်လည်း ဘုရင်ဖုဖုန်းက အခြေအနေမကောင်း ဖြစ်နေသည်။ သူ့ကို ဧကရာဇ်တစ်ပိုင်းအဆင့် အကျော်အမော်သုံးဦးက ပြင်းပြင်းထန်ထန် တိုက်ခိုက်နေသောကြောင့် မရှူနိုင်မကယ်နိုင် ဖြစ်နေပေသည်။

သတ်ဖြတ်ခြင်းနတ်ဘုရားသုံးပါးမှ ပျက်စီးခြင်းတာအိုသခင်နှင့် နတ်ဖန်ဆင်းခြင်း အဓိပဓိကဲ့သို့ အကျော်အမော်များလည်း ရှိကြသည်။

ဆန်းကျယ်ကောင်းကင်အဓိပဓိများကလည်း မာနထောင်လွှားစွာဖြင့် ကြည့်နေကြ၏။

ဤအခြေအနေက မည်သူ့အတွက်မဆို နောက်ဆုံးလမ်းဆုံးဟု ဆိုနိုင်သည်။

ကျွင်းရှောင်ယောက်က ရုတ်တရက် ပြုံးလိုက်သည်။

သူ့လက်တစ်ဖက်ကို ဖြည်းညင်းစွာ မြှောက်လိုက်၏။ သူ့လက်ထဲမှာတော့ အနက်ရောင်သွေးတစ်စက်က ငြိမ်သက်စွာ မျောလွင့်နေပေသည်။

ကောင်းကင် အနက်ရောင်သွေး။

"နတ်ဘုရားတွေတောင် ငါ့ကို ဒူးထောက်စေလို့ မရဘူး"

"မြေပြင်ကလည်း ငါ့ကို ဦးညွတ်စေဖို့ မဖြစ်နိုင်ဘူး"

"မင်းတို့ဆိုရင် ပြောစရာတောင် မလိုဘူး"

စကားသံအဆုံးတွင်၊ ကျွင်းရှောင်ယောက်က ကောင်းကင် အနက်ရောင်သွေးကို သူ့ခန္ဓာကိုယ်ထဲသို့ တိုက်ရိုက် စုပ်ယူလိုက်သည်။

ထိုအခိုက်တွင် အမှောင်စွမ်းအားလှိုင်းတစ်ခုက ရုတ်တရက် ပေါက်ကွဲသွား၏။

မရဏမင်း ဆင်းသက်လာခဲ့ပြီ။