အခန်း ၁၂၁၁

အခန်း ( ၁၂၁၁ ) သတ္တမ သတ်ဖြတ်ခြင်း အစီရင်။

သတ်ဖြတ်ခြင်းနတ်ဘုရားသုံးပါးပင်လျှင် ဤအခြေအနေကို ကြိုမတွေးမိခဲ့ဖူးပေ။

မျိုးဆက်သစ် ကျွင်းရှောင်ယောက်နှင့် ဆက်ဆံခြင်းက အမှန်တကယ်ပင် ဤမျှကြီးမားသောတန်ကြေးကို ပေးဆောင်ခဲ့ရသည်။

ကောင်းကင်အဓိပဓိငယ်နှင့် မဟာကောင်းကင်အဓိပဓိများက အသေအပျောက်များစွာ ရှိခဲ့သည်။

ဆန်းကျယ်ကောင်းကင်အဓိပဓိများပင် ကျဆုံးခဲ့ရသေးသည်။

လူသတ်သမား မျိုးဆက်သစ်လူငယ်များဆိုလျှင် အများကြီး ကျဆုံးသွားကြသည်။

ဤအခိုက်တွင် ကျွင်းရှောင်ယောက်က အလွန်ကြောက်စရာကောင်းပြီး ကမ္ဘာကြီးကို ဖျက်ဆီးပစ်မည့် ဆံပင်ဖြူနတ်ဆိုးသခင်ကဲ့သို့ပင်။

ကျွင်းရှောင်ယောက်၏ အင်အားကို သူတို့က အများကြီး ပိုတွက်ထားခဲ့သည်။

သို့တိုင်၊ ကျွင်းရှောင်ယောက်က သူတို့၏ စိတ်ကူးကို ချိုးဖျက်ခဲ့သေးသည်။

ကောင်းကင်အဓိပဓိငယ်တစ်ပါးက ကောင်းကင်ဘုံကို အံတုပြီး ဆန်းကျယ်ကောင်းကင်အဓိပဓိများကို သတ်ခဲ့သည်။

မည်သူက ထင်ထားခဲ့မည်နည်း။

"ဒီနေ့ မင်းကို ဘယ်သူမှ မကယ်နိုင်တော့ဘူး"

သတ်ဖြတ်ခြင်းနတ်ဘုရားသုံးပါးမှ အကျော်အမော်များက ကြိမ်းမောင်းပြီး လှုပ်ရှားလိုက်ကြသည်။

ကောင်းကင်ကို မှောက်လှန်တော့မည်ကဲ့သို့ နိယာမလက်ကြီးများ ပေါ်လာကြ၏။

ကျွင်းရှောင်ယောက်က တာ့လော့ဓားသန္ဓေကိုကိုင်ထားရင်း မော့ကြည့်လိုက်သည်။

ယခုအချိန်တွင် သူ၏ စွမ်းဆောင်ရည်က အံ့မခန်းဖြစ်နေပြီ။

ကောင်းကင်အဓိပဓိငယ်တစ်ပါးက တန်ပြန်တိုက်ခိုက်ပြီး ဆန်းကျယ်ကောင်းကင်အဓိပဓိများကို သတ်ပစ်လိုက်သည်။ အင်မော်တယ်နယ်မြေကြီး၏ အတိတ်နှင့် ပစ္စုပ္ပန်ကိုကြည့်လျှင်ပင် လူများစွာကို ရှာမတွေ့နိုင်ပေ။

ယခုဆိုလျှင် ပျက်စီးခြင်းတာအိုသခင်များပင်လျှင် သူ့ကို တိုက်ခိုက်လာနေပြီ ဖြစ်သည်။

ကျွင်းရှောင်ယောက်က ကောင်းကင်ကို အံတုလျှင်ပင်၊ ပျက်စီးခြင်းတာအိုသခင်ကို တိုက်ခိုက်ရန် မဖြစ်နိုင်ပေ။

တကယ်တော့ ဆန်းကျယ်ကောင်းကင်အဓိပဓိကို တိုက်ခိုက်ရာတွင် ကျွင်းရှောင်ယောက်က သူ၏ ဝှက်ဖဲအချို့ကို အသုံးပြုထားပြီး ဖြစ်သည်။

ဟုတ်ပေသည်၊ ယင်းက အစိတ်အပိုင်းတစ်ခုထက် မပိုပေ။

ကျွင်းရှောင်ယောက်က သူ့ရဲ့ တကယ့်ဝှက်ဖဲများကို ဘယ်တော့မှ ထုတ်မပြပါ။

လျှို့ဝှက်ပြီး နက်နဲစွာ ဖုံးကွယ်ထားမှသာလျှင် ‌အားလုံးကို အောင်နိုင်မည် ဖြစ်သည်။

သတ်ဖြတ်ခြင်းနတ်ဘုရားသုံးပါးမှ အကျော်အမော်များ၏ ဝိုင်းရံခြင်းကို ရင်ဆိုင်ရသောအခါ...

ကျွင်းရှောင်ယောက်က သူ့လက်ကိုမြှောက်ပြီး ကျွင်းဝူဟွေ့၏ အဆောင်လက်ဖွဲ့ကို ထုတ်ယူလိုက်သည်။

အဆောင်လက်ဖွဲ့ပေါ်မှ 'ဂုဏ်သိက္ခာရှိတဲ့ ယောင်္ကျားတစ်ယောက်အတွက် ဘဝမှာ‌ နောင်တရစရာ မရှိဘူး'ဟူသော စာလုံးများကလည်း ထာဝရ တောက်ပနေ၏။

ထို့နောက် အချိန်နှင့်နေရာကို ဖြတ်ကျော်ပြီး ကောင်းကင်ကို လွှမ်းခြုံထားသကဲ့သို့ အဖြူရောင်ဝတ်စုံဝတ် လူရိပ်တစ်ခုက ဝေဝါးဝါး ထွက်ပေါ်လာတော့သည်။

"နောက်ဆုံးတော့ လာပြီပေါ့"

ပျက်စီးခြင်းတာအိုသခင်နှင့် သတ်ဖြတ်ခြင်းနတ်ဘုရားသုံးပါး၏ လူသတ်သမားများအားလုံး လေးနက်သွားကြသည်။

သူတို့က ကျွင်းရှောင်ယောက်ကို လုပ်ကြံသတ်ဖြတ်ဝံ့သောကြောင့် သဘာဝအတိုင်း အပြည့်အဝ ပြင်ဆင်ထား၏။

နောက်ဆုံးတွင်၊ တားမြစ်မိသားစုသုံးစု၏ ရှေ့ဆောင်များသည် ယခင်က ဤလှည့်ကွက်ကြောင့် သေဆုံးခဲ့ကြသည်။

ဝတ်စုံဖြူဝတ် နတ်ဘုရားဘုရင်ထံမှ အားကောင်းသော အရှိန်အဝါများ ထွက်ပေါ်လာသည်။

ဧကရာဇ်တစ်ပိုင်းတောင်မှ ထိုအရှိန်အဝါကို လျစ်လျူမရှုနိုင်ပေ။

သတ်ဖြတ်ခြင်းနတ်ဘုရားသုံးပါးမှ ပျက်စီးခြင်းတာအိုသခင်နှင့် နတ်ဖန်ဆင်းခြင်းအဓိပဓိများက လျင်မြန်စွာ ဆုတ်သွားကြသည်။

ကျွင်းဝူဟွေ့၏ အဆောင်လက်ဖွဲ့ကို ကိုင်တွယ်ရန်က သူတို့အတွက် မလွယ်ကူမှန်း သိပေသည်။

သို့သော်လည်း ကျွင်းဝူဟွေ့၏ အဆောင်လက်ဖွဲ့က မည်မျှ အစွမ်းထက်မှန်း သိနေသောကြောင့်၊ ၎င်းတို့က ကိုင်တွယ်ဖြေရှင်းရန် နည်းလမ်းကို သဘာဝအတိုင်း တွေးဆခဲ့ကြသည်။

"ဟမ့်၊ အဆောင်လက်ဖွဲ့တစ်ခုက မင်းကို ကာကွယ်ထားနိုင်မယ်လို့ တကယ်ထင်နေတာလား"

ကြယ်ကောင်းကင်တွင်၊ ဘုရင်ဖုဖုန်းကို ဝိုင်းရန် တိုက်ခိုက်နေသော ရှန်းထျန်း၏ ဧကရာဇ်တစ်ပိုင်း ကောင်းကင်တမန်က မိုးခြိမ်းသံကဲ့သို့ ကျယ်လောင်စွာ နှာခေါင်းရှုံ့ပြီး ပြောလိုက်သည်။

သူလက်ကို မြှောက်လိုက်သောအခါ နိယာမများက ရောယှက်လာသည်။ ထို့နောက်တွင် ရှေးအမှတ်အသားများဖြင့် ကြောက်မက်ဖွယ်ကောင်းသော သတ်ဖြတ်ခြင်း အစီရင်အဖြစ်သို့ ပြောင်းလဲသွား၏။

"အဲဒါက... ရှေးဟောင်းသတ်ဖြတ်ခြင်းအစီရင်ပဲ"

ကျွင်းရှောင်ယောက်၏ မျက်လုံးများက ကျဉ်းမြောင်းသွားသည်။

အတောင်ကိုးခုရှိသော‌ ကောင်းကင်တမန်၏ အစီရင်ကို ကျွင်းရှောင်ယောက် သိ၏။

အကြောင်းမူ၊ ကျွင်းမိသားစုက ပျက်စီးခြင်းကောင်းကင် အင်မော်တယ်နယ်မြေကြီးရှိ အင်မော်တယ်စစ်ပွဲတွင် တတိယ ရှေးဟောင်းသတ်ဖြတ်ခြင်း အစီရင်ကို ယခင်ကအသုံးပြုခဲ့ဖူးသောကြောင့် ဖြစ်သည်။

ပျက်စီးခြင်းနယ်စပ်တွင် လေ့ကျင့်စဉ်ကလည်း တော်ဝင်မိသားစုမှ ပါရမီရှင်အုပ်စုတစ်စုက သူ့ကိုဝန်းရံပြီး သတ်ရန်အတွက် မပြည့်စုံသော နဝမမြောက် ရှေးဟောင်း သတ်ဖြတ်ခြင်းအစီရင်တစ်ခုကို အတူတကွ ပူးပေါင်းတည်ဆောက်ခဲ့ဖူးပေသည်။

ယခုအချိန်တွင် ရှန်းထျန်း၏ အတောင်ကိုးခုရှိသော ကောင်းကင်တမန် ထုတ်ဖော်လိုက်သည်က တတိယ ရှေးဟောင်းသတ်ဖြတ်ခြင်းအစီရင် တစ်စိတ်တစ်ပိုင်း ဖြစ်သည်။

ရှေးခေတ်က သတ္တမမြောက် အစွမ်းထက်ဆုံး သတ်ဖြတ်ခြင်းအစီရင်။

သတ်ဖြတ်ခြင်းနတ်ဘုရားသုံးပါးက ရှေးဟောင်းသတ်ဖြတ်ခြင်းအစီရင်တစ်ခုကို ပိုင်ဆိုင်ထားခြင်းမှာ ကျိုးကြောင်းဆီလျော်သည်။

သို့ရာတွင်၊ ဒါက ပြီးပြည့်စုံသော ရှေးဟောင်းသတ်ဖြတ်ခြင်းအစီရင် မဟုတ်ပေ။

သို့သော်လည်း ဧကရာဇ်တစ်ပိုင်း၏လက်မှ ပေါ်လာသောအခါတွင် ၎င်း၏စွမ်းအားက ပျက်စီးခြင်းနယ်စပ်မှ ပါရမီရှင်များ၏ နဝမမြောက် သတ်ဖြတ်ခြင်းအစီရင်ထက် ပြောမပြနိုင်လောက်အောင် သာလွန်သည်။

"ဝုန်း"

သန်းနှင့်ချီသော မိုးကြိုးများက တပြိုင်နက်တည်း ပေါက်ကွဲသွားသကဲ့သို့ပင်။ အလွန်ကြောက်စရာကောင်းသော သွေးကပ်ကြီးတစ်ခုက ကမ္ဘာမြေပေါ်ကို ဆင်းသက်လာသကဲ့သို့ ထင်ရသည်။

ဤရှေးဟောင်းသတ်ဖြတ်ခြင်းအစီရင်က ကျွင်းဝူဟွေ့၏ အဆောင်လက်ဖွဲ့ကို ဖိနှိပ်ရန်ပင်။

၎င်းက လုံးလုံးလျားလျား နှိမ်နှင်းနိုင်သည်ဟု မဆိုသော်လည်း အနည်းဆုံးတော့ အချိန်အနည်းငယ် နှောင့်နှေးစေနိုင်သည်။

"မင်းတို့က ငါ့ကို ကိုင်တွယ်ဖို့ အသေအကြေ ကြိုးစားခဲ့ပုံရတယ်"

ဒါကိုမြင်တော့ ကျွင်းရှောင်ယောက်က အေးစက်စက် ပြုံးလိုက်သည်။

သတ်ဖြတ်ခြင်းနတ်ဘုရားသုံးပါးက တကယ်ကို အပြည့်အဝ ပြင်ဆင်ထား၏။

"ဒါပေါ့၊ မင်းက ကျွင်းရှောင်ယောက်ပဲ။ မင်းနဲ့ ဆက်ဆံတဲ့အခါမှာ ငါတို့က သဘာဝအတိုင်း ပေါ့လျော့နေမှာ မဟုတ်ဘူး"

ရှန်းထျန်းမှ ပျက်စီးခြင်းတာအိုသခင်တစ်ပါးက အေးစက်စက် ပြောလိုက်သည်။

ရိုးရိုးသားသားပြောရလျှင် ယခုအချိန်အထိ တိုက်ပွဲအပြီးမှာ ကျွင်းရှောင်ယောက် သူတို့ တကယ်လေးစားမိသည်။

သူ့မျိုးဆက်ထဲမှ တခြားသူသာ ဤအခြေအနေမျိုး ကြုံလာရလျှင် သွေးပျက်နေနိုင်သည်။

သို့သော်လည်း ကျွင်းရှောင်ယောက်ကတော့ တည်တည်ငြိမ်ငြိမ်နှင့် ရင်ဆိုင်နေဆဲပင်။

ဤစရိုက်မျိုးက သာမန်လူများ ယှဉ်လို့မရနိုင်ပေ။

"ဒါပေမဲ့ မင်းဘယ်လောက်ပဲ အရည်အချင်းရှိပါစေ၊ အဆုံးမှာတော့ လွတ်မြောက်နိုင်မှာ မဟုတ်ဘူး။ အားလုံးပြီးပြီ"

ပျက်စီးခြင်းတာအိုသခင်တစ်ပါးက နိယာမလက်ကြီးတစ်ဖက်ဖြင့် ကျွင်းရှောင်ယောက်ကို ဖိနှိပ်လိုက်သည်။ ၎င်းကို ရှေးဦးကစဉ့်ကလျားစွမ်းအင်များက ရစ်သိုင်းနေ၏။

၎င်းက ကစဉ့်ကလျားခန္ဓာ၏ ကစဉ့်ကလျားစွမ်းအားနှင့် အနည်းငယ်ဆင်တူသည်။

သို့ရာတွင် ကစဉ့်ကလျားခန္ဓာ၏ ကစဉ့်ကလျားစွမ်းအားက မွေးရာပါဖြစ်ပြီး ၎င်း၏ကိုယ်ပိုင်စွမ်းအားမှ ဆင်းသက်လာသည်။

ပျက်စီးခြင်းတာအိုသခင်၏ ကစဉ့်ကလျားစွမ်းအားကတော့ ကစဉ့်ကလျားကို နားလည်ပြီးမှ ရရှိလာခြင်း ဖြစ်၏။

ထို့ကြောင့် ပျက်စီးခြင်းတာအိုသခင်က အဓိပဓိနယ်ပယ် ခုနစ်ခုတွင် အမြင့်မားဆုံး တည်ရှိမှုတစ်ခု ဖြစ်နေခြင်း ဖြစ်ပါသည်။

၎င်းတို့က ရှေးဦးပျက်စီးခြင်း ကစဉ့်ကလျားအတွင်းမှ နိယာမအမျိုးမျိုးကို နားလည်သဘောပေါက်နေကြပြီ။

သို့သော်လည်း ဧကရာဇ်တစ်ပိုင်းများက ပို၍ ကြီးကျယ်သော မဟာတာအို၏ အစိတ်အပိုင်းအချို့ကို နားလည်ထားပြီးပြီ ဖြစ်သည်။

သူတို့က ကပ်ဘေးကိုးခုကို ဖြတ်ကျော်ပြီးနောက် စစ်မှန်သော လမ်းစဉ်တစ်ခုလုံးကို ထိန်းချုပ်နိုင်သွားလိမ့်မည်။

မည်သို့ဆိုစေ၊ ပျက်စီးခြင်းတာအိုသခင်က အဓိပဓိနယ်ပယ် ခုနစ်ခု၏ အထွတ်အထိပ်ဖြစ်သောကြောင့် ၎င်း၏ စွမ်းအားက ယခင် ဆန်းကျယ်ကောင်းကင်အဓိပဓိများ နှိုင်းယှဉ်၍မရနိုင်ပါ။

ကျွင်းရှောင်ယောက်က ဤလက်ဝါးကြီးကို ပိတ်ဆို့ချင်လျှင် ကြီးမားသော တန်ကြေးကို ပေးရမည် ဖြစ်သည်။

ပျက်စီးခြင်းတာအိုသခင်၏ လက်ဝါးကြီးက ကျွင်းရှောင်ယောက်ကို ချေမှုန်းတော့မည်။

ထိုစဉ်၊ ငိုသံပါဖြင့် အော်ဟစ်လိုက်သော ကလေးတစ်ယောက်၏ အသံက စူးစူးဝါးဝါး ထွက်ပေါ်လာသည်။

"အဖေ့ကို မတရားမလုပ်ကြနဲ့"

ကျွင်းရှောင်ယောက်၏ ရှေ့တွင် ပုံရိပ်လေးတစ်ခု ပေါ်လာ၏။

ရှောင်ချမ်ရွယ် ဖြစ်သည်။

သူမက လက်နှစ်ဖက်ကို ဆန့်တန်းကာ ကျွင်းရှောင်ယောက်၏ရှေ့တွင် အခိုင်အမာ ရပ်လိုက်သည်။

သူမ၏ မျက်လုံးလေးများမှာတော့ မျက်ရည်များ စီးကျပြီး နီရဲနေပြီ။

ကျွင်းရှောင်ယောက် တစ်ယောက်တည်းကို ရန်သူများစွာက ဝိုင်းရံတိုက်ခိုက်နေခြင်းမှာ သူမ၏ရင်ကို နာကျင်စေသည်။ ကျွင်းရှောင်ယောက် တစ်ခုခုဖြစ်သွားမှာကို ကြောက်မိ၏။

"ဟမ့်"

ရှန်းထျန်း၏ ပျက်စီးခြင်းတာအိုသခင်က အေးစက်စက်ဖြင့် နှာခေါင်းရှုံ့လိုက်သည်။ သူက နောက်မဆုတ်ဘဲ လက်ဝါးကြီးဖြင့် ဆက်လက် ဖိနှိပ်လိုက်၏။

တိဟောက်ထျန်းက ကျစ်ယန်ထျန်းကျွင်းမှတဆင့် သတ်ဖြတ်ခြင်းနတ်ဘုရားသုံးပါးကို အသိပေးခဲ့ဖူးသည်။

ဤကလေးမလေးကို ကျွင်းရှောင်ယောက်က ရွှီထျန်းလောကမှ ခေါ်ယူလာခဲ့ခြင်း ဖြစ်သည်။ ၎င်းက အခွင့်အရေးတစ်မျိုးမျိုး ဖြစ်လိမ့်မည်။

ထိုကလေးမလေးမှာ နောက်ခံအကြောင်းတစ်ခုခုလည်း ရှိနိုင်သည်။

သို့သော်လည်း သတ်ဖြတ်ခြင်းနတ်ဘုရားသုံးပါးမှ လူများက သိပ်ပြီး ဂရုမစိုက်ကြပေ။

သူမတွင် နောက်ခံကောင်းတစ်ခုခု ရှိနေလျှင်ပင် ဘာဖြစ်သေးသနည်း။ သူတို့ဘက်တွင် ဧကရာဇ်တစ်ပိုင်းသုံးဦး ရှိနေသဖြင့် ဘာမျှ ပြဿနာမရှိပေ။

ပျက်စီးခြင်းတာအိုသခင်၏ လက်ကြီးက ဆက်လက် ဖိနှိပ်လိုက်သည်။

ရှောင်ချမ်ရွယ်နှင့် ကျွင်းရှောင်ယောက်တို့ကို အတူတကွ မြှုပ်နှံလို၏။

"ဝုန်း"

ဧရာမလက်ဝါးကြီးက အာကာသကို အပြည့်အဝဖုံးအုပ်ထားပြီး ကျွင်းရှောင်ယောက်နှင့် ရှောင်ချမ်ရွယ်တို့ကို ဖမ်းဆုပ်လိုက်တော့သည်။

"ပြီးသွားပြီ"

မြင်ကွင်းကိုမြင်တော့ သတ်ဖြတ်ခြင်းနတ်ဘုရားသုံးပါးမှ ကျန်လူသတ်သမားများလည်း တိတ်တဆိတ် သက်ပြင်းချလိုက်ကြသည်။

ရိုးရိုးသားသားပြောရလျှင် အခြေအနေက ဤမျှ ပြင်းထန်ခဲ့မည်ဟု အမှန်တကယ်ပင် မမျှော်လင့်ထားပေ။

ကျွင်းရှောင်ယောက်က သူ့နာမည်ဂုဏ်သတင်းနှင့် တကယ်ကို ထိုက်တန်သည်။

သို့သော် ထိုအချိန်တွင်...

ရှန်းထျန်းမှ ပျက်စီးခြင်းတာအိုသခင်က တစ်ခုခု လွဲမှားနေသည်ကို ရုတ်တရက် သတိပြုလိုက်မိသည်။

သူ ထုတ်ဖော်ထားသော နိယာမလက်ဝါးကြီးက အက်ကြောင်းများပေါ်လာပြီး ပြိုကျလာသည်ကို တွေ့လိုက်ရ၏။

အဆုံးတွင် ကျယ်လောင်သော ပေါက်ကွဲသံတစ်ခု ထွက်ပေါ်လာတော့သည်။

အဆုံးမဲ့ စူးရှ‌ပြီး တောက်ပသော အလင်းများက ကောင်းကင်ယံတွင် ဖြာထွက်သွားသည်။

စကြဝဠာတွင်းရှိ အရာအားလုံးကို ပြန်ဝင်စားခြင်းသို့ ဆွဲငင်သွားတော့မည့်အလား၊ ကြောက်မက်ဖွယ်ကောင်းသော ရေဝဲတစ်ခု ထွက်ပေါ်လာ၏။

ပြန်လည်ဝင်စားခြင်းရေဝဲ၏ အဆုံးမှာတော့ ယိမ်းနွဲ့နေသော ငွေရောင်ဆံပင်နှင့် မျက်လုံးမှိတ်ထားသော နတ်သမီးလေးတစ်ပါးလို ပုံရိပ်သေး‌သေးလေးတစ်ခုကို တွေ့လိုက်ရတော့သည်။

"ဒါက ဘယ်လိုဖြစ်နိုင်မှာလဲ"

ရှန်းထျန်း၏ ပျက်စီးခြင်းတာအိုသခင်က မယုံကြည်နိုင်စွာ အော်ဟစ်လိုက်သည်။