အခန်း ၁၂၃၁

အခန်း ( ၁၂၃၁ ) ဓားတစ်လက်က ကောင်းကင်ကို တုန်ခါစေသည်။

ဒါက ဘယ်လောက်တောင် ဩဇာကြီးလိုက်သလဲ။

လူကိုယ်တိုင် မပေါ်လာသေးသော်လည်း သူ၏ဓားကို အသုံးပြု၍ သရုပ်ပြသည်။

ကျွင်းရှောင်ယောက်ကို ပစ်မှတ်ထားခဲ့သူအားလုံးကို သတ်လိုက်၏။

သူ့နောက်ကွယ်မှ ကြိုးကိုင်သူများကိုပင် အလွတ်မပေးပေ။

ဤသည်က ကျွင်းမိသားစုထက် ပိုကြီးစိုးပြီး ပြတ်သားသည်။

ဒါက ဝတ်စုံဖြူဝတ် နတ်ဘုရားဘုရင် ကျွင်းဝူဟွေ့ပင်။

သူကိုယ်တိုင် မရောက်လာခဲ့လျှင်ပင် ကောင်းကင်ကိုးခု အင်မော်တယ်နယ်မြေကြီး တစ်ခုလုံးကို လှုပ်ခတ်စေနိုင်ဆဲ ဖြစ်သည်။

ထိုသတင်းများကို ကြားရသောအခါ တိဟောက်ထျန်း၏ မျက်ခုံးများလှုပ်သွားပြီး သူ့မျက်နှာက အလွန်အေးစက်သွားသည်။

"ကျွင်းဝူဟွေ့၊ သူက ငါ့ကို အင်မော်တယ်သတ်ဓားနဲ့ တကယ် တိုက်ခိုက်ဝံ့သလား"

သို့သော်လည်း သူ စကားမဆုံးမီတွင် သတင်းရောက်လာသည်။

အင်မော်တယ်ဓားတစ်စင်းက အဆုံးမဲ့ ကြယ်ကောင်းကင်ကိုဖြတ်၍ ဟွင်းထျန်းအင်မော်တယ်နယ်မြေကြီးသို့‌ ရောက်ရှိလာ၏။ အားကောင်းသော ဓားအရှိန်အဝါက ကောင်းကင်ကို အဆက်မပြတ် တုန်ခါစေသည်။

"ရပ်လိုက်"

ကျယ်လောင်သော အသံတစ်ခု ထွက်ပေါ်လာသည်။ ၎င်းက အင်မော်တယ်ခုံရုံးမှ ဧကရာဇ်အဆင့် အကျော်အမော် ဖြစ်၏။ သူက ဧရာမ လက်ဝါးကြီးတစ်ဖက်ကို ထုတ်ဖော်ကာ ဓားကို တားဆီးလိုက်တော့သည်။

ကျယ်လောင်သော ပေါက်ကွဲသံက နေရာအနှံ့ ပျံ့နှံ့သွားသည်။

မရေမတွက်နိုင်သော အင်အားစုများက ဟွင်းထျန်းအင်မော်တယ်နယ်မြေကြီးကို အာရုံစိုက်ပြီး စောင့်ကြည့်လိုက်၏။

ကျွင်းမိသားစု၏ တပ်မဟာကြီးက ဟွင်းထျန်းအင်မော်တယ်နယ်မြေကြီးမှ ဆုတ်ခွာသွားပြီးချိန်တွင်...

ကျွင်းဝူဟွေ့၏ဓားက ရောက်ရှိလာမည်ဟု မည်သူကထင်မှတ်ခဲ့မည်နည်း။

မြင့်မားသော ‌ကြယ်ကောင်းကင်တွင် တတိယဘိုးဘေး ထိုက်ဟွမ်းဧကရာဇ်က ခေါင်းကိုခါယမ်းကာ ခါးသက်သက်ဖြင့် ပြုံးလိုက်သည်။

"ဒီဧကရာဇ်ကို လွှမ်းမိုးချုပ်ကိုင်မှုမှာ ပြိုင်ဘက်မရှိဘူးလို့ ပြောကြတယ်၊ ဒါပေမဲ့ တကယ်တော့ သူက ဒီအငယ်လေး ဝူဟွေ့လောက်တောင် မဟုတ်ပါဘူး"

သူသည် ကျွင်းမိသားစု၏ တတိယဘိုးဘေးဖြစ်သောကြောင့် သူ့လုပ်ရပ်တိုင်းတွင် ကျွင်းမိသားစုတစ်ခုလုံးကို ထည့်သွင်းစဉ်းစားရမည် ဖြစ်သည်။

သူကိုယ်တိုင်လှုပ်ရှားပြီး သတ်ဖြတ်ခြင်းနတ်ဘုရားကို ဖျက်ဆီးခဲ့ခြင်းက ကျွင်းရှောင်ယောက်ကို အလွန်တန်ဖိုးထားကြောင်း ပြသနေ၏။

သို့သော်လည်း ကျွင်းမိသားစုကို ဦးဆောင်ပြီး အင်မော်တယ်ခုံရုံးနှင့် စစ်ပွဲစတင်ရန်မှာ သူ့အတွက် မလွယ်သေးပေ။

သို့ရာတွင်၊ ကျွင်းဝူဟွေ့ကတော့ မတူပါ။

အဖေတစ်ယောက်အနေဖြင့် သူ့သား အနိုင်ကျင့်ခံရတာကို သိရသောအခါ သေချာပေါက် လက်စားချေပေးမည် ဖြစ်သည်။

ကိုယ့်မိသားစုကိုပင် မကာကွယ်နိုင်လျှင် အင်မော်တယ်နယ်မြေကြီးမှ သက်ရှိသတ္တဝါအားလုံးကို မည်သို့ကာကွယ်နိုင်မည်နည်း။

ဒါက ကျွင်းဝူဟွေ့၏ ယုံကြည်မှုပင်။

"ငါက အသက်ကြီးပြီ။ မျိုးဆက်သစ်တွေလောက်တောင် ငါ ပြတ်ပြတ်သားသား မရှိတော့ဘူး"

ရှန်းယွီဧကရာဇ်လည်း ခေါင်းယမ်းပြီး သက်ပြင်းချလိုက်သည်။

ဟွင်းထျန်းအင်မော်တယ်နယ်မြေကြီးတွင်...

အင်မော်တယ်အလင်းများဖြင့် ဓားတစ်ချောင်းက လေထဲတွင် ဆိုင်းငံ့နေကာ ကောင်းကင်နှင့်မြေပြင်ကို တုန်ခါသွားစေသည်။

လက်နက်တစ်ခုသာဖြစ်သော်လည်း ၎င်းက စစ်မှန်သော အမြင့်ဆုံး သတ်ဖြတ်ခြင်းလက်နက် ဖြစ်၏။

အင်မော်တယ်လက်နက်တစ်ခုအနေဖြင့် သူ့တွင် လက်နက်ဝိညာဉ်ရှိသည်။

၎င်း၏ ကိုယ်ပိုင်စွမ်းအားက ဧကရာဇ်ကြီးများထက် အားမနည်းပေ။

ယခုအချိန်တွင် အင်မော်တယ်သတ်ဓားက ဟွင်းထျန်းအင်မော်တယ်နယ်မြေကြီးအထက်တွင် ဆိုင်းငံ့ထားသည်။

"အလို၊ ဒီကိစ္စတွေရဲ့ နောက်ကွယ်မှာ အင်မော်တယ်ခုံရုံး ရှိနေတာလား"

ဤမြင်ကွင်းက လူအများကို အံ့အားသင့်စေသည်။

မမျှော်လင့်ဘဲ၊ အင်မော်တယ်ခုံရုံးက ကျွင်းရှောင်ယောက်ကို ပစ်မှတ်ထားခဲ့၏။

သို့သော်လည်း ကျွင်းရှောင်ယောက်၏ မကောင်းဆိုးဝါး အရည်အချင်းနှင့် ကြောက်စရာကောင်းသော ကျင့်ကြံမှုအရှိန်ကို တွေးမိသောအခါ...

အင်မော်တယ်ခုံရုံးက ဤလျှို့ဝှက်အန္တရာယ်ကို ဖယ်ရှားလိုသည်မှာ သဘာဝကျပုံရသည်။

အင်မော်တယ်ခုံရုံးမှ သက်ပြင်းချသံတစ်ချက် ကြားလိုက်ရသည်။

ထို့နောက် အလင်းတန်းများစွာ ပေါ်လာ၏။

၎င်းတို့ထဲတွင် ထိပ်တန်း ဆေးဝါးနှင့် ဆေးပင် အမျိုးမျိုး ရှိသည်။

သို့သော်လည်း အင်မော်တယ်သတ်ဓားက လျစ်လျူရှုထားဆဲပင်။

ထို့နောက်တွင် ကစဉ့်ကလျားစွမ်းအင်များ ပြည့်နှက်နေသော သလင်းကျောက်တုံးကြီးတစ်တုံး ထပ်မံ ပေါ်လာသည်။

"အဲဒါက... ကစဉ့်ကလျားကျောက်ပဲ"

အကျော်အမော်များစွာ၏ မျက်လုံးများ နီရဲသွားသည်။

ဒါက ထိပ်တန်းရတနာတစ်ခု ဖြစ်၏။ ကျင့်ကြံမှု သို့မဟုတ် လက်နက်များ ပြုလုပ်ရာတွင် အသုံးပြုသည်ဖြစ်စေ... ထိပ်တန်း ပစ္စည်းကောင်းတစ်ခု ဖြစ်သည်။

သို့သော်၊ အင်မော်တယ်သတ်ဓားက မပြောင်းလဲသေးပါ။

ထို့နောက် အင်မော်တယ်ခုံရုံးက ရတနာများစွာနှင့် အသက်သစ်သီးများကိုပင် ထုတ်ယူခဲ့သည်။

ဤအရာက အသက်ရေထက် မနိမ့်ကျသော ထိပ်တန်းကုသရေး ပစ္စည်းတစ်မျိုးပင်။

သို့တိုင်၊ အင်မော်တယ်သတ်ဓားက ငြိမ်သက်နေဆဲ ဖြစ်သည်။

"မင်းက ဘာလိုချင်လို့လဲ၊ ဒါက ငါ့အင်မော်တယ်ခုံရုံးရဲ့ လိုက်လျောမှုတစ်ခု ဖြစ်နေပြီ။"

အင်မော်တယ်ခုံရုံးမှ ဧကရာဇ်၏ အသံက အေးစက်လာသည်။

ထို့နောက်တွင် ရုတ်တရက် သဘောပေါက်သွား၏။

သူက သက်ပြင်းတစ်ချက်ချလိုက်လေသည်။

"ဟောက်ထျန်း၊ တောင်းပန်လိုက်ပါ၊ ဒီတစ်ခါတော့ မင်း တကယ်ကို မဆင်မခြင် ဖြစ်ခဲ့တယ်"

ရွှေရောင်နန်းတော်ထဲတွင်...

တိဟောက်ထျန်းက ကိုယ်တိုင် ထွက်လာသည်။

ကြယ်ကောင်းကင်တွင် ရပ်တန့်နေသော အင်မော်တယ်သတ်ဓားကိုကြည့်ရင်း သူ့မျက်နှာက အေးစက်နေ၏။

သူက ဖြည်းဖြည်းချင်း လက်ယှက်ကာ ပြောလိုက်သည်။

"ဒီတစ်ခါမှာ ဟောက်ထျန်းမှားသွားတယ်၊ တောင်းပန်ပါတယ်"

"ကျွင်းသခင်လေး မကြာခင် ပြန်ကောင်းလာမယ်လို့လည်း မျှော်လင့်ပါတယ်"

တိဟောက်ထျန်းက ပြောပြီးသည်နှင့် လှည့်ထွက်သွားရန် ဟန်ပြင်လိုက်သည်။

ထိုစဉ်၊ အင်မော်တယ်သတ်ဓား၏ အရှိန်အဝါက ရုတ်တရက် ကျရောက်လာသည်။

တိဟောက်ထျန်းက ဒူးတစ်ဖက်ထောက်လိုက်ရ၏။

သူ ဒူးထောက်နေသော ဦးတည်ရာက ပျက်စီးခြင်းကောင်းကင် အင်မော်တယ်နယ်မြေကြီးပင်။

တစ်နည်းအားဖြင့် တိဟောက်ထျန်းက ကျွင်းရှောင်ယောက်၏ရှေ့တွင် ဒူးထောက်လိုက်ရသည်။

"တော်လောက်ပြီ"

အင်မော်တယ်ခုံရုံး၏ ဧကရာဇ်က မကျေမနပ်ဖြင့်ပြောကာ တားဆီးရန် အရှိန်အဝါများကို ထုတ်လွှတ်လိုက်သည်။

တိဟောက်ထျန်းလည်း ချက်ချင်း ထရပ်လိုက်လေသည်။

ဤအခိုက်တွင် သူက အံကိုတင်းတင်းကြိတ်ထားသည်။

လက်သီးကို ကျစ်ကျစ်ပါအောင် ဆုပ်ထား၏။

နောက်ဆုံးတွင် သူက အသက်ပြင်းပြင်းရှူကာ စကားတစ်ခွန်းမှ မပြောဘဲ ရွှေနန်းတော်သို့ ပြန်သွားတော့သည်။

နန်းတော်သို့ ပြန်ရောက်လာပြီးနောက်၊ တိဟောက်ထျန်းက ပတ်ဝန်းကျင်ကို တံဆိပ်ခတ်လိုက်သည်။ ထို့နောက်တွင် သူ့မျက်နှာက ချက်ချင်း တင်းမာခက်ထန်သွား၏။

"ချီးပဲ၊ ကျွင်းဝူဟွေ့"

"မင်းကများ ဘုရင်ဖြစ်ဖို့ မွေးဖွားလာပြီး ဒီကမ္ဘာကြီးကို အုပ်စိုးဖို့ ရည်မှန်းထားတဲ့ ငါ တိဟောက်ထျန်းကို ဒူးထောက်ခိုင်းဝံ့တယ်"

"ကျွင်းဝူဟွေ့၊ ကျွင်းရှောင်ယောက်နဲ့ ကျွင်းမိသားစု၊ ငါ တိဟောက်ထျန်းက မင်းတို့ကို ဘယ်တော့မှ လူပြန်မဖြစ်စေရဘူး"

တိဟောက်ထျန်းက ဒေါသတကြီး ကြိမ်းမောင်းလိုက်သည်။ သူ၏ ရွှေရောင်ဆံပင်များကလည်း ရိုင်းစိုင်းစွာ လှုပ်ရှားနေပြီး တည်ငြိမ်မှုတို့ လုံးဝ ပျောက်ကွယ်သွားပေသည်။

နတ်ဆိုးဧကရီလေးကဲ့သို့ လျှို့ဝှက်ဆန်းကြယ်သော‌ နောက်ခံရှိသူကို ရင်ဆိုင်ရသည့်အခါတွင်ပင်၊ သူက နှိမ့်ချမှုမရှိခဲ့ပေ။ သူမကို စိတ်ကျေနပ်စေရန် ကြိုးစားရန်လည်း ရည်ရွယ်ချက် မရှိပါ။

သူက အင်မော်တယ်ခုံရုံး၏ ရှေးဧကရာဇ်ငယ် ဖြစ်သည်။ ပြန်လည်မွေးဖွားခြင်း၏ အမှတ်တရများလည်း ရှိ၏။ မူလက သူသည် ဤကမ္ဘာကြီးတွင် အရာအားလုံးကို စိုးမိုးထားသင့်သည်။

ယခုတော့ ဒူးထောက်လိုက်ရပြီ။

တိဟောက်ထျန်းအတွက် ဒါက သေခြင်းတရားထက် ပို၍ နာကျင်စေသည်။

ဒါက ဖျောက်ဖျက်လို့ မရနိုင်သော အရှက်တရား ဖြစ်၏။

သူက အနာဂတ်တွင် ဧကရာဇ်ဖြစ်လာလျှင်ပင် ဤအရှက်တရားကို ဖျောက်ဖျက်နိုင်တော့မည် မဟုတ်ပေ။

ရွှေရောင်နတ်ဘုရားစွမ်းအင်များ တုန်ခါသွားပြီး နိယာမစွမ်းအားများက ရွှေရောင်နန်းတော်တစ်ခုလုံး ပြည့်နှက်သွားသည်။

အဆုံးတွင်၊ တိဟောက်ထျန်းက အသက်ပြင်းပြင်းရှူကာ သူ့ကိုယ်သူ ထိန်းချုပ်လိုက်လေသည်။

"ငါ တိဟောက်ထျန်း ကောင်းကင်ကို တိုင်တည်ပြီး ကျိန်ဆိုတယ်"

"ကျွင်းဝူဟွေ့နဲ့ ကျွင်းရှောင်ယောက်... တစ်နေ့ကျရင် ငါ့ရှေ့မှာ ဒူးထောက်ရစေမယ်"

............

နောက်ဆုံးတွင် အင်မော်တယ်သတ်ဓားက ဟွင်းထျန်းအင်မော်တယ်နယ်မြေကြီးမှ ထွက်ခွာသွားခဲ့သည်။

အင်မော်တယ်ခုံရုံးမှ လျော်ကြေးပေးသော အရင်းအမြစ်များကိုတော့ ကျွင်းမိသားစုမှ သဘာဝအတိုင်း လက်ခံပြီး ကျွင်းရှောင်ယောက်ထံသို့ လွှဲပြောင်းပေးလိမ့်မည်။

"ဒီတစ်ခေါက်မှာ နောက်ကွယ်က ကြိုးကိုင်သူတွေက ထင်ရှားနေပြီ။ ဒါက ကောင်းကင်ကိုးပါးအထက် တားမြစ်မိသားစု၊ စန်းမျိုးနွယ်နဲ့ အင်မော်တယ်ခုံရုံးရဲ့ တိဟောက်ထျန်းပဲ"

အင်မော်တယ်သတ်ဓား၏ လှုပ်ရှားမှုက ပူးပေါင်းကြံစည်မှုကြီးတစ်ခုလုံး၏ အခြေနေအမှန်ကို လူတိုင်း နားလည်စေခဲ့သည်။

အင်မော်တယ်သတ်ဓားက ပြန်သွားတော့မည်ဟု လူတိုင်းက ထင်နေချိန်တွင်...

အံ့သြစရာကောင်းသော မြင်ကွင်းတစ်ခု ပေါ်လာပြန်သည်။

အင်မော်တယ်သတ်ဓားက ကောင်းကင်တံတားရေဝဲအတွင်းသို့ အမှန်တကယ် ဆင်းသက်သွား၏။

ကောင်းကင်ကိုးခုအထက်သို့ ဦးတည်သည်။

အင်မော်တယ်နယ်မြေကြီးတစ်ခုလုံး ခဏမျှ တိတ်ဆိတ်သွားခဲ့သည်။

ဒါက တကယ်ကို အံ့ဩစရာကောင်း၏။

ကောင်းကင်ကိုးခုအထက်က တားမြစ်နယ်မြေများ၏ နေရာ ဖြစ်သည်။

အင်မော်တယ်သတ်ဓားက အင်မော်တယ်အလင်းရောင်များဖြင့်‌ တောက်ပနေသည်။

"ဟမ့်၊ ဒါက ကောင်းကင်ကိုးပါးအထက်ကွ။ မင်း မောက်မာချင်တိုင်း မောက်မာလို့ရတဲ့ နေရာမဟုတ်ဘူး"

တားမြစ်နယ်မြေ ဆယ်ခုအနက် မြင့်မြတ်ဝိညာဉ်အပျက်အယွင်းမှ အေးစက်စက် အသံက ရုတ်တရက် ထွက်ပေါ်လာသည်။

အဆုံးမဲ့ နိယာမအလင်းတို့ဖြင့် လက်ကြီးတစ်ဖက်က အင်မော်တယ်သတ်ဓားကို ဖမ်းကိုင်လိုက်၏။

သူက အင်မော်တယ်သတ်ဓားကို ဖမ်းယူလိုခြင်း ဖြစ်သည်။

အင်မော်တယ်သတ်ဓားက တုန်ခါသွားသည်။

ထို့နောက် မှုန်ဝါးဝါး လူရိပ်တစ်ခု ပေါ်လာ၏။ ၎င်းက အင်မော်တယ်သတ်ဓား၏ ဓားဝိညာဉ်ပင်။

အင်မော်တယ်သတ်ဓား၏ ဓားဝိညာဉ်က လက်ညှိုးတစ်ချက်ညွှန်လိုက်သောအခါ မီတာထောင်ချီမြင့်မားသော ဓားအလင်းတစ်ခုပေါ်လာပြီး ဧရာမလက်ကြီးကို တိုက်ရိုက်ဖြတ်တောက်ပစ်လိုက်သည်။

ထို့နောက် အင်မော်တယ်သတ်ဓား၏ ဓားဝိညာဉ်က အင်မော်တယ်သတ်ဓားကို အသက်သွင်းလိုက်၏။

ဓားသုံးချက် ခုတ်ပစ်လိုက်သည်။

ဓားတစ်ချက်က ကျိမိသားစုဆီသို့ ကျရောက်သွားသည်။

ဓားတစ်ချက်က ကျင်းမိသားစုသို့ ကျရောက်သွားသည်။

နောက်ဆုံးဓားတစ်ချက်က ကျင်းမိသားစုဆီသို့ ကျရောက်သွား၏။

"ဝုန်း"

ကျယ်လောင်သော ပေါက်ကွဲသံ သုံးခုကြားရပြီး တားမြစ်မိသားစု သုံးခုစလုံး ဆုံးရှုံးမှုများစွာ ခံစားလိုက်ရတော့သည်။ အော်သံများစွာကို ကြားခဲ့ရပြီး မရေမတွက်နိုင်သော အသေအပျောက်များ ရှိခဲ့သည်။

တားမြစ်မိသားစုများတွင် အေးစက်စက် အငွေ့အသက်များဖြင့် ဧကရာဇ်တစ်ပိုင်းများ ပေါ်လာကြသည်။

သို့သော် သူတို့က ကြောက်ရွံ့နေပြီး အင်မော်တယ်သတ်ဓားကို အလွယ်တကူ မလှုပ်ရှားဝံ့ခဲ့ပေ။

"ဒီတစ်ခါက တကယ်ကို သူတို့ရဲ့အမှားပါပဲ၊ ဒါပေမဲ့ လုံလောက်ပြီ"

ရှန်းလင်မှ အသံတစ်ခု ထွက်ပေါ်လာသည်။

ကောင်းကင်ကိုးပါးအထက်တွင် ဆိုင်းငံ့ထားသော အင်မော်တယ်သတ်ဓားက ဓားအလင်းများ ဖြာထွက်နေ၏။ ၎င်းက စစ်မှန်သော အင်မော်တယ်တစ်ပါး ရောက်နေသကဲ့သို့ပင်။

ထိုသတင်းက အင်မော်တယ်နယ်မြေကြီးမှ လူတိုင်းကို တုန်လှုပ်သွားစေသည်။

အင်မော်တယ်နယ်မြေကြီးမှ အကျော်အမော်အားလုံး အံ့အားသင့်ပြီး ဘာပြောရမည်မှန်း မသိကြတော့ပေ။

"နတ်ဘုရားဘုရင်က စွမ်းအားကြီးလိုက်တာ၊ ဓားတစ်ချောင်းနဲ့ ကောင်းကင်ကိုးခုအထက်ကို စိုးမိုးနိုင်ခဲ့တယ်"

"ဟင်း၊ ငါ့မှာသာ ဒီလောက်‌ထက်မြက်တဲ့ အဖေရှိရင် ငါအိပ်မက်ကနေ နိုးထလာရင်တောင် ရယ်မောနေလိမ့်မယ်"

"နိုးထတော့ကိုယ့်လူ၊ သူတို့ သားအဖနှစ်ယောက်စလုံးက မကောင်းဆိုးရွားတွေချည်းပဲ။ အိပ်မက်ဆိုရင်တောင် ဖြစ်နိုင်တာကိုပဲ မက်"

အံ့ဩတုန်လှုပ်စွာဖြင့် ဆွေးနွေးပြောဆိုသံများ ထွက်ပေါ်လာခဲ့သည်။

သို့သော်၊ ဝတ်စုံဖြူဝတ် နတ်ဘုရားဘုရင်၏ နာမည်က ကောင်းကင်ကိုးခု အင်မော်တယ်နယ်မြေကြီးသို့ တစ်ဖန်ပျံ့နှံ့သွားသည်ကို သံသယဖြစ်စရာမရှိပါ။

အင်မော်တယ်ဓားတစ်လက်ဖြင့် ကောင်းကင်ကို လှုပ်ခါစေသည်။

ဤသည်က ဝတ်စုံဖြူဝတ် နတ်ဘုရားဘုရင်၏ ဒဏ္ဍာရီပင်။