အခန်း ၁၂၃၈

အခန်း ( ၁၂၃၈ ) လူသတ်ဘုရင် အညံ့ခံလိုက်ပြီ။

ရောက်လာသူမှာ သွေးရောင် ဆံပင်ရှည်များနှင့် လူကြီးတစ်ဦး ဖြစ်သည်။

သူ့ပတ်ပတ်လည်မှာတော့ သွေးလက်စွပ်ကွင်းတစ်ခု ရှိ၏။

သူက အရှိန်အဝါများကို တမင်ထုတ်လွှတ်ထားခြင်းမရှိသော်လည်း ပတ်ဝန်းကျင် လေထုကို တုန်ခါစေသည်။

ဤလူရိပ်ကတော့ သွေးမျှော်စင်၏သခင်၊ လူသတ်သမားများ၏ ဧကရာဇ်၊ ကုန်းရှန့်ဧကရာဇ်ဟု အမည်ရှိသော လူသတ်ဘုရင်သည်ပင်။

ဒါက ကျွင်းမိသားစု၏ ဘိုးဘွားမြေဖြစ်ပြီး ကျွင်းရှောင်ယောက်၏ ခွင့်ပြုချက်ကြောင့်သာ ရောက်လာနိုင်ခဲ့ခြင်း ဖြစ်သည်။

သတ်ဖြတ်ခြင်းနတ်ဘုရားသုံးပါးနှင့် စစ်ပွဲက ပြီးဆုံးသွားပြီ။

လူသတ်ဘုရင်က ကျွင်းဧကရာဇ်ခုံရုံးနှင့်အတူ ပျက်စီးခြင်းကောင်းကင် အင်မော်တယ်နယ်မြေကြီးသို့ လိုက်ပါလာခဲ့သည်။

ကျွင်းမိသားစုပင်လျှင် ဧကရာဇ်တစ်ပါးကို လျစ်လျူမရှုနိုင်ပေ။

သို့သော်လည်း သူ့ကို အနီရောင်လီလီပန်းလေးများ၏ မိခင်က ဖိနှိပ်ထားခဲ့သည်။ သူ၏ လှုပ်ရှားမှုတိုင်းကို ထိန်းချုပ်ထားသော အမှတ်အသားတစ်ခုလည်း သူ့ခန္ဓာကိုယ်ထဲတွင် ရှိ၏။

သူ အနည်းငယ်မျှ လှုပ်ရှားဝံ့သည်နှင့် ချက်ချင်း သေလိမ့်မည်။

ထို့ကြောင့် သူဟာ ကျွင်းရှောင်ယောက်၏ အမိန့်ကို အကြွင်းမဲ့ နာခံရနိုင်သည်။

ယခင်က သူဟာ ခေါင်းကိုးလုံး ခြင်္သေ့ကြောင့် ရူးသွပ်လုနီးဖြစ်ခဲ့ရပေသည်။

ယခုအခါမှာတော့ လူသတ်ဘုရင်ဟူသော သူ၏ ဂုဏ်သိက္ခာအချို့ကို ပြန်လည်ရရှိနေခဲ့ပြီ ဖြစ်သည်။

ဤအခိုက်တွင်၊ ကျွင်းရှောင်ယောက်ကို မြင်လိုက်ရပြီးနောက် လူသတ်ဘုရင်၏ မျက်လုံးများက အံ့အားသင့်မှုတို့ ပေါ်လာခဲ့သည်။

"ဧကရာဇ်တစ်ပိုင်းသုံးပါးက မင်းကို ဝိုင်းဝန်းဖိနှိပ်ခဲ့ပြီး နောက်ဆုံးမှာ ကိုယ့်ကိုယ်ကို ဖောက်ခွဲသွားခဲ့တယ်။ ဒါကြောင့် မင်းလည်း ဒဏ်ရာအပြင်းအထန်ရသွားပြီလို့ ကောလဟာလတွေတောင် ထွက်ပေါ်နေခဲ့တာပဲ။ အခုတော့ မင်းက လူတိုင်းကို လှည့်စားခဲ့ပုံရတယ်"

လူသတ်ဘုရင်၏ စူးရှသော မျက်လုံးအကြည့်က ကျွင်းရှောင်ယောက်၏နံဘေးတွင် အိပ်စက်နေသော ရှောင်ချမ်ရွယ်အပေါ်သို့ ကျရောက်လာသည်။

သူ့မျက်လုံးအိမ်များက ရုတ်တရက် ကျဉ်းမြောင်းသွားသည်။ အနည်းငယ် ခြောက်ခြားစရာကောင်းသော အငွေ့အသက်ကို သူ သတိပြုမိလိုက်၏။

"မဆန်းတော့ပါဘူး"

လူသတ်ဘုရင်က ခပ်တိုးတိုးရေရွတ်လိုက်လေသည်။

ကျွင်းရှောင်ယောက်က လူသတ်ဘုရင်ကို ကြည့်လိုက်သည်။ သူက တည်ငြိမ်စွာ ပြောလိုက်၏။

"ကျုပ်ရဲ့ ခေါင်းကိုးလုံးခြင်္သေ့က ခင်ဗျားကို ရူးသွပ်လုနီး ဖြစ်စေခဲ့တယ်လို့ ကြားတယ်"

ထိုစကားကိုကြားတော့ လူသတ်ဘုရင်၏ မျက်ခုံးများ အနည်းငယ်လှုပ်သွားသည်။

ရေပုပ်ကန်ဧကရာဇ်ဟူသောအမည်ကို ထပ်မံကြားရတော့မည်သု သူ ခံစားလိုက်မိ၏။

"ဟမ့်၊ မင်း ငါ့ကို အရှက်ခွဲချင်ရင်တော့ မေ့လိုက်ပါ"

"ဒီဧကရာဇ်က မင်းကို တကယ် ထိခိုက်စေနိုင်မယ်လို့ မထင်ဘူး"

"ဒါပေမဲ့ ငါ့ရဲ့ လက်ကျန်နေ့ရက်တွေကို အရှက်တရားတွေနဲ့ ဖြတ်သန်းရမယ်ဆိုရင် ငါ မင်းနဲ့အတူ အသေပဲခံလိုက်မယ်"

လူသတ်ဘုရင်က ရှင်သန်လိုစိတ်ပြင်းပြသည်။

သို့သော်လည်း သူ့ထက် များစွာ အဆင့်နိမ့်သော လူငယ်တစ်ဦးထံတွင် အရှက်တရားတို့ဖြင့် မနေလိုပေ။

"ဟားဟားဟား၊ ခင်ဗျားက အတွေးလွန်နေပြန်ပါရော"

ကျွင်းရှောင်ယောက်က ပေါ့ပေါ့ပါးပါး ရယ်မောလိုက်သည်။

"အမှန်အတိုင်းပြောရရင် လူသတ်ဘုရင်လို အကျော်အမော်တွေကို ကျုပ် လေးစားပါတယ်။ ရှင်သန်တာထက် အသေခံဖို့ စိတ်ပိုင်းဖြတ်နိုင်သူတွေပေါ့"

"ဒါပေမဲ့ ရှင်သန်နေသူတွေကိုပဲ ဧကရာဇ်ကြီးလို့ ခေါ်နိုင်တယ်။ သေလွန်သူတွေကတော့ မပြောပလောက်‌တဲ့ ဂုဏ်သတင်းကလွဲပြီး ဘာမှမရှိတော့ဘူး"

"အခြေအနေနဲ့ လိုက်လျောညီထွေ နေနိုင်မှပဲ ကိုယ့်ရဲ့ စစ်မှန်တဲ့ အရည်‌အသွေးကို ပြသနိုင်မှာပေါ့"

ကျွင်းရှောင်ယောက်၏ စကားများက လူသတ်ဘုရင်၏ အမူအရာကို အနည်းငယ် ပြောင်းလဲသွားစေသည်။

ကျွင်းရှောင်ယောက်က သူ့ကို နာခံမှုရှိစေရန် အရှက်ခွဲပြီး ဖိနှိပ်မည်ဟု သူ ထင်ထားခဲ့သည် မဟုတ်လော။

မထင်မှတ်ဘဲ၊ ကျွင်းရှောင်ယောက်က ထိုရည်ရွယ်ချက်မျိုး ရှိပုံမရပေ။

"ဒီလိုမျိုး စကား တစ်ခွန်း၊ နှစ်ခွန်းလောက် ပြောရုံနဲ့ ငါက မင်းရဲ့ကျွန်ဖြစ်ပြီး စိတ်ရင်းမှန်နဲ့ မင်းရဲ့အနောက်ကို လိုက်ပါမယ်လို့ ထင်နေတာလား"

လူသတ်ဘုရင်က ပြောလိုက်သည်။

"လက်ရှိ ခင်ဗျားရဲ့အမြင်မှာ ကျုပ်က ပါရမီနဲ့ အင်အားနည်းနည်းရှိတဲ့ အငယ်တစ်ယောက် ဖြစ်နိုင်ပါတယ်"

"ဒါပေမဲ့ ကျုပ်ကိုယုံ... အနှေးနဲ့အမြန် ကျုပ်က ဒီကမ္ဘာမှာ တာအိုကို သက်သေပြနိုင်သူတစ်ဦး ဖြစ်လာလိမ့်မယ်"

"မဝေးတော့တဲ့အနာဂတ်မှာ ကျုပ်နောက်ကိုလိုက်ခြင်းက ခင်ဗျားအတွက် ဂုဏ်ယူစရာတစ်ခု ဖြစ်လာလိမ့်မယ်"

ကျွင်းရှောင်ယောက်က အေးဆေးတည်ငြိမ်စွာ ပြောလိုက်သည်။ သူ၏ ယုံကြည်မှုရှိသော အမူအရာက လူသတ်ဘုရင်ကို လေးလေးနက်နက် ကြည့်စေခဲ့ပေသည်။

"ကျုပ်မှာ ကျွင်းဧကရာဇ်ခုံရုံးအတွက် ဌာနခြောက်ခုကို တည်ထောင်ဖို့ အစီအစဉ်ရှိတယ်"

“သူတို့ထဲက တစ်ခုကို အမှောင်ရိပ်လို့ခေါ်ပြီး လုပ်ကြံသတ်ဖြတ်မှုမှာ အထူးပြုတဲ့ အမှောင်ရိပ်ထဲက ဓားမြှောင်ပဲ”

"ခင်ဗျား ပါဝင်မယ်ဆိုရင် ခင်ဗျားက အမှောင်ရိပ်ဌာနရဲ့ ခေါင်းဆောင်ဖြစ်လာလိမ့်မယ်"

ကျွင်းရှောင်ယောက်၏ စကားကြောင့် လူသတ်ဘုရင်၏ အမူအရာ ပြောင်းလဲသွားသည်။

သူက အေးစက်စက်ပြုံးပြီး ပြောလိုက်၏။

"ငါက သွေးမျှော်စင်ရဲ့ အရှင်သခင်မဖြစ်ရတော့ အခု အမှောင်ရိပ်ရဲ့ ခေါင်းဆောင် ဖြစ်ရမယ်ပေါ့"

ကျွင်းရှောင်ယောက်က ခေါင်းခါယမ်းပြီး ပြုံးလိုက်သည်။

"ကျွင်းဧကရာဇ်က သွေးမျှော်စင်ထက် အဆအများကြီး ပိုအားကောင်းမယ်လို့ ကျုပ် အာမခံနိုင်တယ်။ ပြီးတော့... အင်မော်တယ်ခုံရုံးကိုတောင် အစားထိုးနိုင်လိမ့်မယ်"

ကျွင်းရှောင်ယောက်၏ စကားကြောင့် လူသတ်ဘုရင် အံ့အားသင့်သွားခဲ့သည်။

အင်မော်တယ်ခုံရုံးက အင်မော်တယ်ခုံရုံးကို အစားထိုးနိုင်မည်လော။

လူသတ်ဘုရင်က ရယ်စရာဟုထင်မိသော်လည်း သူ မရယ်နိုင်ပေ။

အကြောင်းမူ၊ ယခုအအချိန်တွင် ကျွင်းရှောင်ယောက်၏ အမူအရာနှင့် ဟိတ်ဟန်က သက်ရှိသတ္တဝါအားလုံးကို ဦးညွတ်စေနိုင်သော အရှင်သခင်တစ်ဦးကဲ့သို့ ဖြစ်နေသောကြောင့်ပင်။

ဘာရယ်ကြောင့်မှန်းမသိ၊ လူသတ်ဘုရင်မှာ ချေပရန် စကားတစ်ခွန်းမျှ မပြောနိုင်တော့ပါ။

ကျွင်းရှောင်ယောက်ကပင် ဆက်ပြောသည်။

"သူရဲကောင်းတွေကို ဘယ်ကလာသလဲ မမေးဘူး၊ လူသတ်ဘုရင်၊ ခင်ဗျား ရွေးချယ်ပါ"

"ခင်ဗျား သဘောမတူရင်တောင် အတင်းအကျပ်ခိုင်းမှာမဟုတ်ဘူး။ ခင်ဗျား တိုက်ရိုက်ထွက်သွားနိုင်တယ်၊ ဒါပေမဲ့ ခင်ဗျားရဲ့ကိုယ်ခန္ဓာထဲက ပျက်စီးခြင်းအမှတ်အသားကြောင့် လက်စားချေဖို့ စိတ်ကူးနိုင်မယ်မထင်နဲ့"

"ခင်ဗျား သဘောတူရင်တော့ ကျွင်းဧကရာဇ်ခုံရုံးရဲ့ အဓိကအဖွဲ့ဝင်တစ်ဦးဖြစ်လာပြီး ခင်ဗျားနဲ့ ထိုက်တန်တဲ့ ဂုဏ်သိက္ခာနဲ့ ဆက်ဆံမှုကို ရရှိလိမ့်မယ်။ ခင်ဗျားကို ကျွန်တစ်ဦးလို ဘယ်သူမှ မဆက်ဆံစေရဘူး"

ကျွင်းရှောင်ယောက်၏ လေသံက ခိုင်မာသည်။

သူက မရိုးသားသူများကို မလိုချင်ပေ။

တစ်ဖက်လူက ဧကရာဇ်ကြီးဖြစ်လျှင်ပင် ဘာဖြစ်သေးသနည်း။

မရိုးဖြောင့်သော စိတ်ထားဖြင့် ကျွင်းဧကရာဇ်ခုံရုံးကို ဝင်ရောက်ခဲ့ပါက နောင်အနာဂတ်တွင် ပြဿနာများသာ ဖြစ်လာနိုင်သည်။

ထိုစကားကိုကြားသောအခါ လူသတ်ဘုရင်က ပထမ တိတ်ဆိတ်သွားသည်။ ထို့နောက် ကောင်းကင်ကို မော့ကြည့်ပြီး ရယ်မောလိုက်၏။

"ဟားဟားဟား၊ သူရဲကောင်းတစ်ယောက်ကို ဘယ်ကလာသလဲ မမေးဘူး။ သူရဲကောင်းတစ်ယောက်ကို ဘယ်ကလာသလဲလို့ မမေးဘူး"

"ငါ ကုန်းရှန့်ဟာ တိုးတက်လာဖို့ ကြိုးစားပေမဲ့ မိသားစုတစ်ခုလုံး အသတ်ခံခဲ့ရတာပဲလေ။ အဲဒီအတွက် ငါကိုယ်တိုင် ရေပုပ်ကန်ထဲမှာ ပုန်းအောင်းခဲ့ရပြီး တခြားသူတွေရဲ့ လှောင်ပြောင်မှုတွေနဲ့ ဖိနှိပ်ခံခဲ့ရတယ်"

"နောက်ဆုံးမှာတော့ ငါ့ရဲ့ တာအိုကို သက်သေပြနိုင်ပြီး အားလုံးကို သတ်ပစ်နိုင်ခဲ့တယ်"

"နောက်ခံဆိုတာက ဘာလဲ၊ အားလုံးက အပေါ်ယံအရာတွေပဲ။ သူရဲကောင်းတွေကို ဘယ်ကလာသလဲ မမေးဘူး။ ဒီစကားကို ငါသဘောကျတယ်"

"ကျွင်းရှောင်ယောက်၊ မင်းက တကယ်စိတ်ဝင်စားစရာကောင်းတဲ့သူပဲ။ ငါ မင်းနဲ့ကစားဖို့ စိတ်ထဲမရှိဘူး"

လူသတ်ဘုရင်က သူ၏ ဇစ်မြစ်နှင့် ကြေကွဲဖွယ်အတိတ်ကို ဘယ်တော့မှ မမေ့ခဲ့ပေ။

ထို့ကြောင့်၊ ကုန်းရှန့် သို့မဟုတ် ရေပုပ်ကန်ဧကရာဇ်အကြောင်း တစ်စုံတစ်ယောက်က ပြောဆိုလိုလာတိုင်း ဒေါသပေါက်ကွဲသွားတတ်သည်။

ယခုတော့ ကျွင်းရှောင်ယောက်၏ စကားများက သူ့နှလုံးသားထဲမှ ကြိုးထုံးကို လုံးလုံးလျားလျား ပြတ်တောက်သွားစေခဲ့သည်။

အတိတ်က အတိတ်သာ ဖြစ်လိမ့်မည်။ အနာဂတ်ကသာ အရာအားလုံးကို ဆုံးဖြတ်ပေးနိုင်သည်။

"ဒါက သဘောတူညီချက်ပဲ"

ကျွင်းရှောင်ယောက်က ပြောလိုက်သည်။

"ဒါဟာ သဘောတူညီချက်ပဲ"

လူသတ်သမားဘုရင်က ရယ်မောလိုက်၏။

ယခုအချိန်မှာတော့ လူသတ်ဘုရင်ကို လုံးဝ အောင်နိုင်သွားပြီ။

လူသတ်ဘုရင် ထွက်သွားတာကိုမြင်တော့ ကျွင်းရှောင်ယောက်က ကျေနပ်စွာ ပြုံးလိုက်သည်။

လူများ၏ နှလုံးသားကို ထိန်းချုပ်ခြင်းနှင့် ပတ်သက်လာလျှင် ကျွင်းရှောင်ယောက်က အလွန်ထူးချွန်သူပင် မဟုတ်လော။

"နောက်တဆင့်‌ကတော့ မေ့ပျောက်ခြင်းမြေပဲ၊ အဆုံးမဲ့ဧကရာဇ်ရဲ့ ပျက်စီးခြင်းလို့ခေါ်တဲ့ သဲလွန်စတွေက ဘာတွေလဲ"

............

လအနည်းငယ်ခန့် ကြာသွားသည်။

ယနေ့၊ ဟွင်းထျန်းအင်မော်တယ်နယ်မြေကြီးတွင်...

ယင်ဟော်နတ်ဆိုးကြယ်က သွေးကဲ့သို့ တောက်ပသော အလင်းရောင်များ ရုတ်တရက် ပေါ်လာသည်။

ပြင်းထန်သော သွေးအလင်းများက ‌ကြယ်ကောင်းကင်ကို နီစွေးသွားစေခဲ့၏။

ကမ္ဘာသစ်တစ်ခု ပွင့်သွားသကဲ့သို့ပင်။

မှုန်ဝါးနေသော ကမ္ဘာကြီးက သွေးအလင်းရောင်ကြောင့် ရုတ်တရက် လင်းလက်သွားခဲ့ရပြီ ဖြစ်သည်။

"ပေါ်လာပြီ၊ မေ့ပျောက်ခြင်းမြေရဲ့တံခါး ဖွင့်တော့မယ်"

"ဒါက အင်မော်တယ်နယ်မြေကြီးရဲ့ အံ့ဖွယ်ခုနစ်ပါးထဲက တစ်ခုပဲ။ ဒါက ဘယ်လောက်တောင် အံ့ဖွယ်ကောင်းမလဲဆိုတာ ငါတကယ်သိချင်တယ်"

ကျင့်ကြံသူများစွာတို့ လှုပ်လှုပ်ရှားရှား ဖြစ်သွားခဲ့ကြသည်။

သို့သော်လည်း လူများစွာက ဟွင်းထျန်းအင်မော်တယ်နယ်မြေကြီး၏ နယ်မြေပြင်ပမှသာ ကြည့်နိုင်ကြပေသည်။

ရုတ်တရက် ကျယ်လောင်သော ခေါင်းလောင်းသံ ထွက်ပေါ်လာသည်။

ယင်းက အင်မော်တယ်ခုံရုံး၏ အင်မော်တယ်ခေါင်းလောင်းသံပင်။

ယင်းမှာ အင်မော်တယ်မျိုးရိုးကြီး ကိုးခု၏ ဆက်ခံသူများက စုရုံးပြီး မေ့ပျောက်ခြင်းမြေ အတွေ့အကြုံကို စတင်တော့မည့် အဓိပ္ပာယ်ပင် ဖြစ်သည်။

ထိုအထဲတွင် ရှေးခေတ် အင်မော်တယ်ခုံရုံး၏ အပျက်အယွင်းများလည်း ရှိ၏။

အင်မော်တယ်မျိုးရိုးကြီးကိုးခု၏ ဆက်ခံသူများနှင့် ၎င်းတို့၏ အပေါင်းအပါများက ပြင်းထန်သော တိုက်ပွဲတစ်ခုကို စတင်ပေတော့မည်။