အခန်း ၁၃၀၄

အခန်း ( ၁၃၀၄ ) နင် ငါ့ကိုလက်ထပ်ရင် အနာဂတ်မှာ နင်က အင်မော်တယ်ခုံရုံးရဲ့ အရှင်သခင် ဖြစ်လာလိမ့်မယ်။

"မဟုတ်ဘူး...မဖြစ်နိုင်ဘူး၊ နင်ကယွီလန်ပဲ... ငါ ဘယ်တော့မှမမှားနိုင်ဘူး"

ယွမ်ချယ်က ကျွင်းရှောင်ယောက်ကို ကြည့်လိုက်သည်။

သူမ၏ မျက်လုံးထဲမှာလည်း ချစ်ခြင်းမေတ္တာအရိပ်အယောင်များ ရှိနေသေးသည်။

ဤကဲ့သို့ ထူးထူးကဲကဲ ချောမောပြီး လွတ်လပ်၍ လျစ်လျူရှုထားတတ်သော စိတ်နေစိတ်ထားမျိုးဟာ လုံးဝ အတုယူလို့မရပေ။

"ငါက ကျွင်းရှောင်ယောက်ပါ၊ ငါ့မျိုးရိုးက ယွီမဟုတ်ဘူး"

"ကျွင်းရှောင်ယောက်လား"

ယွမ်ချယ်၏ မျက်လုံးများတွင် စိတ်ရှုပ်ထွေးမှုအရိပ်အမြွက်တစ်ခု ပေါ်လာသည်။

ကျွင်းမိသားစုအကြောင်း သူမ သိပေသည်။

နောက်ဆုံးတွင်၊ ရှေးခေတ်အင်မော်တယ်ခုံရုံးမှာတောင် ကျွင်းမိသားစုက အကြွင်းမဲ့ လွှမ်းမိုးထားနိုင်သော အင်အားစုကြီးတစ်ခု ဖြစ်သည်။

သို့သော်လည်း ထိုခေတ်တွင် ရှေးခေတ်အင်မော်တယ်ခုံရုံးနှင့် ကျွင်းမိသားစုက သင့်မြတ်မှုရှိခဲ့သည်။

သူမ၏ဖခင် တုန်ဟွဧကရာဇ်ပင်လျှင် ကျွင်းမိသားစုမှ မဟာပုဂ္ဂိုလ်တစ်ဦးနှင့် တာအိုတရား ဆွေးနွေးဖူးပေသည်။

"ဒါပေမဲ့ နင်ဆိုတာ သိသာနေတာပဲ..."

ယွမ်ချယ်က အနည်းငယ် စိတ်ရှုပ်ထွေးနေဆဲ ဖြစ်သည်။

ဒါက အိပ်မက်နှင့် လက်တွေ့ကြားမှ ကွာခြားချက်ကို သူမ မပြောနိုင်လို့ မဟုတ်ပေ။

သို့သော်လည်း ယွမ်ချယ်သည် ကလေးဘဝကတည်းက ချုံးဟွားနန်းတော်တွင် ပိတ်လှောင်ခံခဲ့ရသည်။

အခြေခံအားဖြင့် သူသည် ဆန့်ကျင်ဘက်လိင်နှင့် မည်သည့်အခါမျှ အဆက်အသွယ်မရှိဟု ဆိုနိုင်ပေသည်။

အိပ်မက်ရေစီးကြောင်းတွင် အချိန်ကာလသည် သူမတစ်ယောက်ယောက်ကို အမှန်တကယ် ချစ်မိသွားသည့် တစ်ခုတည်းသောအချိန် ဖြစ်သည်။

ထို့ကြောင့် ဤပထမဆုံးခံစားမှုက သူမအတွက် အလွန်လေးနက်ပြီး အဖိုးတန်ပေသည်။

နောက်ဆုံးတွင်၊ နှစ်ကာလများ မည်မျှပင် ရှည်ကြားခဲ့ပြီး အပြောင်းအလဲများ ရှိခဲ့သည်ဖြစ်စေ... အချစ်ဦးကိုတော့ သတိရနိုင်ဆဲပင် မဟုတ်ပါလော။

"မင်းသမီးယွမ်ချယ်၊ မင်းက အိပ်မက်ရေစီးကြောင်းရဲ့ သက်ရောက်မှုကို ခံနေရတယ်။ အဲဒါတွေက တကယ်တော့ အိပ်မက်တွေသက်သက်ပါပဲ"

တိဟောက်ထျန်းက ဝင်ပြောလိုက်သည်။

"ပါးစပ်ပိတ်ထား"

ယွမ်ချယ်က ရုတ်တရက် အော်လိုက်၏။

ဒေါသကြောင့် မျက်မှောင်ကြုတ်လိုက်သည့်တိုင် သူမက အလွန်လှပနေသေးသည်။

တိဟောက်ထျန်းက တိတ်ဆိတ်သွားသည်။

သူ၏အဆင့်အတန်းဖြင့် ဤကဲ့သို့ အော်ငေါက်ခံရတာ ဒါပထမဆုံးအကြိမ်ပင်။

ထိုသူက ယွမ်ချယ်မဟုတ်လျှင် တိဟောက်ထျန်းသည် ချက်ချင်း ထရိုက်လိုက်ပြီးပြီ ဖြစ်သည်။

သူ့အတွက်ကတော့ အမျိုးသမီးများဟာ ဩဇာအာဏာနှင့် မယှဉ်သာပေ။

သို့သော်လည်း သူက အကြီးမြတ်ဆုံးအာဏာကို ရရှိချင်လျှင် ယွမ်ချယ်ကို အောင်နိုင်ရမည် ဖြစ်သည်။

ဒါက တကယ်ကို ကမောက်ကမဟု ဆိုရမည်။

"ဒါက အိပ်မက်ရေစီးကြောင်းရဲ့ အကြောင်းရင်းတစ်ခု ဖြစ်ပုံရတယ်..."

မေ့ပျောက်ခြင်းမြေမှ ထွက်လာကြသော ပါရမီရှင်အများစုက အခြေအနေကို သဘောပေါက်သွားကြသည်။

ယခင်ကတော့ သူတို့လည်း စိတ်ရှုပ်ခဲ့သေးသည်။ ကျွင်းရှောင်ယောက်နှင့် မင်းသမီးယွမ်ချယ်က တူညီသောခေတ်မှ မဟုတ်ဘဲ တစ်ခါမျှပင် မတွေ့ဖူးပါ။ သူတို့က မည်ကဲ့သို့ ပတ်သက်ဆက်နွယ်မှုများ ရှိမည်နည်း။

ယခုတော့ ရှင်းသွားပြီ ဖြစ်သည်။

"သူတို့က အိပ်မက်ထဲမှာ ဖော်မပြနိုင်တဲ့ အရာတချို့ကို လုပ်ခဲ့တာများ ဖြစ်နိုင်မလား"

လုဖူးကွေ့က ခပ်ညစ်ညစ် ပြုံးလိုက်သည်။

"သခင်က နင့်လို ညစ်ပတ်မယ်လို့ ထင်လို့လား"

မော့ယန်းယုက လှောင်ပြောင်လိုက်၏။

တစ်ဖက်တွင်၊ ယွမ်ချယ်က ကျွင်းရှောင်ယောက်ကို စိုက်ကြည့်နေသေးသည်။

"ဒါက အိပ်မက်ပဲဖြစ်ရင်တောင် နင့်ရဲ့ဆန္ဒပဲ မဟုတ်လား"

ယွမ်ချယ်က အလွန်ထက်မြက်ပြီး ဤအရာကို ချက်ချင်း တွေးတောမိသွားသည်။

ကျွင်းရှောင်ယောက်လည်း တိတ်ဆိတ်သွားသည်။

သူက တိဟောက်ထျန်း၏အစီအစဉ်ကို ဖျက်ဆီးရန်အတွက် သူမကို ပရောပရည်လုပ်ခဲ့တာဟု ပြောလို့မရပေ။

ထိုသို့ပြောလျှင် မည်သူမျှ လက်ခံနိုင်မှာ မဟုတ်ပါ။

ကျွင်းရှောင်ယောက်က ယွမ်ချယ်ကို မကြောက်သော်လည်း အကြောင်းမဲ့ ပြဿနာကြီးများကို မဖြစ်စေလိုပါချေ။

"ဟုတ်ပါတယ်"

ကျွင်းရှောင်ယောက်က ဝန်ခံလိုက်သည်။

"မျှော်လင့်ထားတဲ့အတိုင်းပါပဲ...၊ ဒါက ယွီရှောင်ယောက်ပဲဖြစ်ဖြစ်... ကျွင်းရှောင်ယောက်ပဲဖြစ်ဖြစ် နင်ဖြစ်နေရင် လုံလောက်ပါပြီ"

ယွမ်ချယ်၏ တောက်ပသော မျက်လုံးများတွင် ခံစားချက်များ ရှိနေသည်။

ကျွင်းရှောင်ယောက်က သူမ၏ အိပ်မက်ထဲတွင် သူမကို တောင့်တနေစေရန် လုံလောက်သည်။

ဤကမ္ဘာပေါ်တွင် ကျွင်းရှောင်ယောက်က သူထင်ထားတာထက် ပိုထူးချွန်မှုရှိ၏။

ထို့ပြင် ကျွင်းမိသားစု၏ နတ်ဘုရားသားတော် အဆင့်အတန်းက သူမနှင့် ပြီးပြည့်စုံစွာ လိုက်ဖက်သည်ဟု မဆိုလိုပါသလော။

"အိပ်မက်ထဲမှာ မင်းသမီးနဲ့တွေ့ခွင့်ရတာက ကံကြမ္မာတစ်မျိုးလို့ ဆိုနိုင်ပါတယ်။ နောက်ဆုံးမှာတော့ မင်းသမီးက အင်မတန်ထူးချွန်တဲ့သူတစ်ယောက်ပဲလေ"

ကျွင်းရှောင်ယောက်က ပြောလိုက်သည်။ သို့သော်လည်း သူ့အမူအရာက တည်ငြိမ်ပြီး အပြောင်းအလဲသိပ်မရှိပေ။

ရောက်ရှိလာကြသော ကျင့်ကြံသူများ အားလုံး အံ့သြသွားကြသည်။

လက်ရှိ ကျွင်းရှောင်ယောက်က တိဟောက်ထျန်းကို အနိုင်ယူခဲ့သော ကျွင်းရှောင်ယောက်နှင့် အတော်လေး ကွဲပြားပေသည်။

လုဖူးကွေ့ဆိုလျှင် မှတ်စုစာအုပ်ငယ်ကို ထုတ်ယူကာ ချက်ချင်း မှတ်တမ်းတင်လိုက်သည်။

"ငါတကယ်ကို သင်ခန်းစာတစ်ခုရပါပြီ၊ နောင်မှာ ဒီလိုနည်းနဲ့ မိန်းကလေးတွေကို ပေါင်းသင်းရမယ်..."

"ယွီလန်၊ မဟုတ်ဘူး... ရှောင်ယောက်၊ ဒါက ကံကြမ္မာတစ်မျိုးလို့ နင် ဝန်ခံလိုက်တာလား"

"ဒါက အိပ်မက်မဟုတ်သလို အနည်းဆုံးတော့ နင်နဲ့ငါရဲ့ အိမ်ထောင်‌ရေးက သတ်မှတ်လိုက်ပြီးပြီလား"

ယွမ်ချယ်က ခပ်တိုးတိုးလေး ပြောလိုက်သည်။

"ဒီလိုဆိုရင် ဘာဖြစ်မလဲ"

ကျွင်းရှောင်ယောက်က မေးလိုက်၏။

နောက်အခိုက်အတန့်တွင် ယွမ်ချယ်၏ စကားများကြောင့် လူတိုင်း မျက်လုံးပြူးသွားကြတော့သည်။

"ရှောင်ယောက်၊ နင် ငါ့ကိုလက်ထပ်ရင် နင်က နောင်အနာဂတ်မှာ အင်မော်တယ်ခုံရုံးရဲ့သခင် ဖြစ်လာလိမ့်မယ်"

တိတ်ဆိတ်သည်။

အပ်ကျသံကိုပင် ကြားရလောက်အောင် တိတ်ဆိတ်သွား၏။

မရေမတွက်နိုင်သော ကျင့်ကြံသူများက ယခုအချိန်တွင် အာစေးထည့်ခံရသလို ဘာအသံမျှ မထွက်လာကြတော့ပေ။

သူတို့ ဘာကိုကြားလိုက်ရတာလဲ။

ရှေးခေတ်အင်မော်တယ်ခုံရုံး၏ အမွန်မြတ်ဆုံး၊ ဧကရာဇ်မင်း၏သွေးမျိုးဆက်နှင့် နောက်ဆုံးမင်းသမီး...

ထိုမင်းသမီးက ကျွင်းရှောင်ယောက်ကို လက်ထပ်ခွင့်ပြုရန် ပြောနေသည်။

ဤသည်မှာ ကောင်းကင်မှ ပြုတ်ကျလာသော မုန့်တုံးကြီး ဖြစ်သည်။

မဟုတ်သေး၊ ၎င်းက မုန့်တုံးတစ်ခုမျှသာ မဟုတ်တော့ပါ။

အဆီတရွှဲရွှဲနှင့် အသင့်စားသုံးနိုင်ပြီဖြစ်သော အသားတုံးကြီး ဖြစ်သည်။

"ငါလွမ်း"

ထိုအချိန်တွင် လူငယ် ကျင့်ကြံသူတစ်ဦးက မနေနိုင်တော့ဘဲ ကျိန်ဆဲလိုက်မိသည်။

တစ်လှမ်းတည်းဖြင့် ကောင်းကင်ဘုံသို့ တက်လှမ်းနိုင်သော လှေကားက ရှေ့တွင် ရှိနေသော်လည်း မတက်လှမ်းနိုင်ပေ။

ဒါက လူတိုင်းကို ငါ့ကို မနာလိုဖြစ်စေသည်။

ထိုအမျိုးသားကျင့်ကြံသူများကို မဆိုထားဘိ...

အမျိုးသမီးများပင် လိင်ပြောင်းချင်စိတ် ဖြစ်လာမိလေသည်။

နောက်ဆုံးတွင်၊ ယွမ်ချယ်နှင့် လက်ထပ်ခြင်းက အလွန်အရေးကြီးသည်။

ယွမ်ချယ်၏ အဆင့်အတန်းဖြင့် သူ့အမျိုးသားက မည်မျှပင် နိမ့်ကျနေပါစေ... ကောင်းကင်သို့ ထိုးတက်နိုင်စေရန် ကူညီနိုင်လိမ့်မည်။

ထိုသူက အင်မော်တယ်ခုံရုံး၏အရှင်သခင် ဖြစ်မလာလျှင်ပင်၊ အနည်းဆုံးတော့ အနာဂတ်တွင် သူ၏အဆင့်အတန်းက မည်သည့်အခါမျှ နိမ့်ကျတော့မည် မဟုတ်ပါ။

"ဒါက ဘယ်လိုဖြစ်ရတာလဲ..."

တိဟောက်ထျန်းက နေရာတွင် အေးခဲသွားသည်။

သူ၏ နက်နဲသော အကြံအစည်၊ တွက်ချက်မှုတို့ဖြင့်ပင် ယခုအခါ စိတ်အေးအေးမထားနိုင်တော့ပါ။

သူက ကူတိကျစ်ကိုပင်သတ်ပြီး ဖူရှီမြင့်မြတ်ခန္ဓာ၏ မူလရင်းမြစ်ကို ယွမ်ချယ်ထံသို့အပ်နှင်းရန် အချိန်အတော်ကြာ စီစဉ်ခဲ့သည်။

မူလက ယွမ်ချယ်နှင့် လက်ထပ်ရမည့်သူဟု သူဖြစ်သင့်၏။

ယခုတော့ သူ့အစီအစဥ်နှင့် ဆန့်ကျင်ဘက်ဖြစ်ပြီး ကျွင်းရှောင်ယောက်က တကယ် အောင်မြင်ခဲ့ပြီ။

"အဟွတ်... အဟွတ်..."

သူ့စိတ်ခံစားချက်များက အလွန်လှိုင်းထလာသောကြောင့် တိဟောက်ထျန်းမှာ သွေးအန်လုနီးဖြစ်ခဲ့ရသည်။ သူ၏ အတွင်းဒဏ်ရာများကိုလည်း မနည်းဖိနှိပ်လိုက်ရလေသည်။

သူ၏ အစီအစဉ်က လုံးဝ ကျရှုံးခဲ့ပြီ ဖြစ်သည်။

ဒါက တိဟောက်ထျန်းအတွက် သေစေလောက်သော ထိုးနှက်ချက်တစ်ခုပင်။

"အရှင်မင်းသမီး၊ ဒါက မဖြစ်သင့်ဘူး"

မဟာနေမင်းသူတော်စင်သားတော်နှင့် အခြား သူတော်စင်သားတော်များ၏ အမူအရာများလည်း ပြောင်းလဲသွားသည်။

ကျွင်းရှောင်ယောက်က သူတို့၏ သူတော်စင်သားတော်တစ်ဦးကို သတ်ဖြတ်ခဲ့ဖူးသည် မဟုတ်လော။

အင်မော်တယ်ခုံရုံးမှ လူများဆိုလျှင် ပို၍ လှုပ်လှုပ်ရှားရှား ဖြစ်ကုန်သည်။

အင်မော်တယ်ခုံရုံးက မည်သူ့ကိုမဆို ကြိုဆိုနိုင်သော်လည်း ကျွင်းရှောင်ယောက်ကိုတော့ သဘောမကျပေ။

ကျွင်းရှောင်ယောက်က အလွန်ထူးချွန်ပြီး ကျွင်းမိသားစု၊ ကျန်းမိသားစုနှင့် ကျွင်းဧကရာဇ်ခုံရုံးကဲ့သို့ အင်အားစုကြီးများ၏ အထောက်အပံ့ရှိသည်။

အကယ်၍ သူသာ ယွမ်ချယ်ကို လက်ထပ်နိုင်လျှင်...

အနာဂတ်မှာ အင်မော်တယ်ခုံရုံးကို မည်သူက တာဝန်ခံရဦးမည်နည်း။

အင်မော်တယ်ခုံရုံး၏ မျိုးရိုးနာမည်ကို 'ကျွင်း'အဖြစ် ပြောင်းလဲရတော့မှာလား။

ယွမ်ချယ်၏ ပေါ့ပေါ့ပါးပါး စကားလုံးများက ကောင်းကင်ကိုးခု အင်မော်တယ်နယ်မြေကြီး ခုလုံးတွင် လှိုင်းလုံးကြီးများ ဖြစ်ပေါ်စေသည်ဟု ဆိုနိုင်သည်။

လင်ယွမ်ကတော့ အားလုံး၏ တုန်လှုပ်ချောက်ချားမှုများ၊ ရုတ်ရုတ်သဲသဲဖြစ်ခြင်းနှင့် သတိပေးချက်များကို လုံးဝ လျစ်လျူရှုခဲ့သည်။

သူမ၏ ကြည်လင်ပြတ်သားသော မျက်လုံးအစုံက ကျွင်းရှောင်ယောက်ကို စိုက်ကြည့်နေဆဲပင်။

ကျွင်းရှောင်ယောက်ကသာ သဘောတူလျှင် တစ်ကမ္ဘာလုံးကို ရန်ဘက်ပြုရလျှင်ပင် ဘာဖြစ်သေးသနည်း။