အခန်း ၁၃၁၈

အခန်း ( ၁၃၁၈ ) တိဟောက်ထျန်း၏ တကယ့်အစီအစဉ်။

ပုလော့ရွယ်က နာမည်နှင့်လိုက်ဖက်သည်။ သူ၏ အသားအရေက နှင်းသားကဲ့သို့ ဖြူစင်ပြီး ကြည်လင်လေသည်။ သူ၏ ရုပ်ရည်ကလည်း လှပသည်။

သူ့ကို ယွမ်ချယ်၊ လင်ယွမ်၊ ကျန်းစန်းယီတို့နှင့် မနှိုင်းယှဉ်နိုင်သော်လည်း...

များစွာ နိမ့်ကျမှုမရှိပေ။

"နတ်ဘုရားသားတော်က လော့ရွယ် ရောက်ရှိလာတာကို မအံ့သြဘူးထင်တယ်"

ကျွင်းရှောင်ယောက်က အံ့ဩပုံမရကြောင်း မြင်ရသောအခါ ပုလော့ရွယ်က ယောင်ယောင်လေး ပြုံးလိုက်သည်။

ကျွင်းရှောင်ယောက်က မတုံ့ပြန်ပေ။

ဒါကို သူမျှော်လင့်ထားပြီး ဖြစ်သည်။

တိဟောက်ထျန်းကို သူက အပြတ်အသတ် အနိုင်ယူပြီးနောက်၊ ဤအမျိုးသမီးသာ ရည်ရွယ်ချက်တချို့ရှိနေလျှင် သူ့ကို ဆက်သွယ်လာသင့်သည်။

"မင်း ငါ့ရှေ့မှာ ပေါ်လာဝံ့တယ်၊ ငါ မင်းကို သတ်လိုက်မှာကို မကြောက်ဘူးလား"

ကျွင်းရှောင်ယောက်က ခေါင်းကို အနည်းငယ် စောင်းငဲ့ပြီး ပြောလိုက်သည်။

"နတ်ဘုရားသားတော်က အမျိုးသမီးတွေအပေါ်မှာ ညှာတာမှုမရှိဘူးလား"

ပုလော့ရွယ်က သနားစဖွယ် အမူအရာလေးဖြင့် ပြော၏။

"အပိုတွေမလုပ်နဲ့၊ ငါ့မျက်လုံးထဲမှာ အရင်းမြစ်မဟုတ်သလို ကျောက်စိမ်းလည်းမဟုတ်ဘူး"

ကျွင်းရှောင်ယောက်က ပြောလိုက်သည်။

သူက အကြံအစည်နည်းနည်းရှိသော မိန်းမတစ်ယောက်သာ ဖြစ်သည်။

သူ့အနေအထားက ကျိချင်းရီကိုပင် မမီပေ။

ပုလော့ရွယ်၏ လှပသော မျက်နှာပေါ်တွင် တင်းမာမှုအရိပ်အမြွက်တစ်ခု ထွက်ပေါ်လာသည်။

မည်သည့်အမျိုးသမီးမျှ ဤကဲ့သို့ လှောင်ပြောင်ခြင်းကို ခံလိုမည် မဟုတ်ပါ။

"နတ်ဘုရားသားတော်၊ လော့ရွယ်က ဘာကြောင့် ရှင့်ကိုလာတွေ့ဖို့အတွက် စွန့်စားဖို့ ဆန္ဒရှိတယ်ဆိုတာ မသိချင်ဘူးလား"

ပုလော့ရွယ်က သူ့စိတ်ကို ထိန်းချုပ်ပြီး ပြောလိုက်သည်။

"ဒါက တိဟောက်ထျန်းရဲ့ ကျရှုံးမှုကို မြင်ရပြီးနောက် အရှုံးသမားတစ်ယောက်ဘက်ကို လောင်းကြေးမထပ်နိုင်ဘူးလို့ ခံစားနေရတာထက် ဘာမှမပိုပါဘူး"

"ဟုတ်တယ် မဟုတ်လား"

ကျွင်းရှောင်ယောက်က တည်ငြိမ်စွာ ပြောလိုက်၏။

ပုလော့ရွယ်၏ မျက်နှာက အေးခဲသွားပြီးနောက် ဝန်ခံလိုက်ရသည်။

"နတ်ဘုရားသားတော်က တကယ်ကို နတ်ဘုရားတွေလို ထိုးထွင်းသိမြင်မှုနဲ့ ဉာဏ်ပညာမျိုး ရှိတယ်"

မမှားပေ။

ဤသည်မှာ ပုလော့ရွယ် တွေးသည့်အတိုင်းပင် ဖြစ်သည်။

ယခင်ကတော့ တိဟောကိထျန်းသည် သူမ၏ တစ်သက်တာ လိုက်စားမှုနှင့် ထိုက်တန်သူဟု ယုံကြည်ခဲ့သည်။

တိဟောက်ထျန်းက ကြီးကျယ်ခမ်းနားသော အောင်မြင်မှုများကို ရရှိပြီး အင်မော်တယ်နယ်မြေကြီးကို လွှမ်းမိုးထားသူ ဖြစ်လာနိုင်သည်ဟုလည်း သူမက ယုံကြည်ခဲ့ပေသည်။

ယခုမူ၊ တိဟောက်ထျန်းက ကျွင်းရှောင်ယောက်ထံတွင် ရုပ်ပျက်ဆင်းပျက် ရှုံးနိမ့်နေကြောင်း တွေ့လိုက်ရသည်။

ဗျူဟာအရပဲဖြစ်ဖြစ်၊ အင်အားပဲဖြစ်ဖြစ်...

ကျွင်းရှောင်ယောက်က အပြတ်အသတ် အနိုင်ယူခဲ့ပြီ။

ပုလော့ရွယ်၏ နှလုံးသားက တုန်လှုပ်သွားသည်။

ဤအတိုင်းဆက်နေလျှင်...

တစ်နေ့မှာ တိဟောက်ထျန်း တကယ်ကျဆုံးခဲ့ပါက မည်သို့ဖြစ်မည်နည်း။

သူလည်း ကံဆိုးမိုးမှောင်ကျရမည် မဟုတ်လော။

ပုလော့ရွယ်က တိဟောက်ထျန်း သေဆုံးချိန်တွင် သူလည်း အသက်ရှင်နိုင်မည်ဟု မထင်ပေ။

ထို့ကြောင့် ပုလော့ရွယ်က သူ့ဘာသာသူ ထွက်လမ်းကို ချန်ထားခဲ့ရသည်။

ဤအတွက် အကောင်းဆုံးရွေးချယ်မှုက ကျွင်းရှောင်ယောက်ပင်။

"နတ်ဘုရားသားတော်၊ လော့ရွယ်က ဒီရွှေခေတ်မှာ လော့ရွယ်မွေးဖွားလာခဲ့ရင် ဘယ်လိုဖြစ်မယ်ဆိုတာကို တွေးတောနေမိတယ်"

"ဖြစ်ကောင်းဖြစ်နိုင်တာက ကျွန်မက နတ်ဘုရားသားတော်နောက်ကို လိုက်မိပါလိမ့်မယ်"

ပုလော့ရွယ်က ရိုးရိုးသားသား ပြောလိုက်သည်။

ကျွင်းရှောင်ယောက်၏ နှုတ်ခမ်းထောင့်စွန်းများက အနည်းငယ် တွန့်ကွေးသွားလေသည်။

သူက ကစားပွဲကြည့်နေသကဲ့သို့ ဖြစ်သည်။

ဤတစ်ကြိမ်တွင် သူ တိဟောက်ထျန်းကို အနိုင်ယူသွားတဲ့အတွက် ပုလော့ရွယ်၏ နှလုံးသား တုန်လှုပ်သွားခဲ့သည်။

သို့‌ရာတွင်၊ သူ ရှုံးနိမ့်ခဲ့လျှင်တော့ ပုလော့ရွယ်က ယခုကဲ့သို့လုပ်မည် မဟုတ်ပေ။

ဤကဲ့သို့ အကြံအစည်များတတ်သော မိန်းမမျိုးက စိတ်ရှုပ်စရာကောင်းသည်။

ထို့ပြင်၊ ကျွင်းရှောင်ယောက်က တပတ်ရစ်ပစ္စည်းများကို မကြိုက်ပေ။

ပုလော့ရွယ်နှင့် တိဟောက်ထျန်းတို့တွင် ရုပ်ပိုင်းဆိုင်ရာ ဆက်ဆံရေး မရှိကြသော်လည်း...

တိဟောက်ထျန်း၏ နောက်လိုက်ဖြစ်ဖူးသူတစ်ယောက်ကို သူ စိတ်မဝင်စားပါ။

သို့သော်လည်း ပုလော့ရွယ်က အသုံးပြုရန် တန်ဖိုးရှိသည်။

သူ့ကို ကိရိယာတစ်ခုအနေဖြင့် အသုံးပြုပါက အဆင်ပြေလိမ့်မည်။

ပုလော့ရွယ်ကလည်း ဤအချက်ကို သိနေသောကြောင့် ကျွင်းရှောင်ယောက်၏ရှေ့တွင် ပေါ်လာဝံ့ခြင်း ဖြစ်သည်။

သူက အကြံအစည်များသော်လည်း ဤလိမ္မာပါးနပ်မှုလေးများ ရှိသည်။ မဟုတ်ပါက သူ့ကို ဉာဏ်ပညာရှင်ဟု ခေါ်ဆိုထိုက်မည် မဟုတ်ပေ။

"ကောင်းပြီ၊ အပိုစကားတွေ ရပ်လိုက်ပါ။ မင်းက လွတ်လမ်းရှာဖို့ ငါ့ဆီကိုလာခဲ့တယ်"

"ဒါပေမဲ့ ဒီလောကကြီးမှာ အလကားရတဲ့ နေ့လည်စာမရှိဘူး၊ မင်းက ငါ့ကို ဘာယူလာပေးနိုင်မလဲ"

ကျွင်းရှောင်ယောက်က ပြောလိုက်သည်။

"နတ်ဘုရားသားတော်၊ လော့ရွယ်က တိဟောက်ထျန်းရဲ့ တကယ့်အကြံအစည်ကို ပြောပြနိုင်ပါတယ်"

ပုလော့ရွယ်က ပြောသည်။

"အိုး"

ကျွင်းရှောင်ယောက်က မျက်ခုံးပင့်လိုက်၏။

ယွမ်ချယ်ကို အနိုင်ယူပြီး အင်မော်တယ်ခုံရုံးကို ပေါင်းစည်းရန် တိဟောက်ထျန်း၏ အကြံအစည်ကို ကျွင်းရှောင်ယောက်က လုံးဝ ဖျက်ဆီးပစ်ခဲ့ပြီး ဖြစ်သည်။

သူ့မှာ တခြား အစီအစဉ်ရှိသေးတာလား။

"ဆက်ပါဦး"

ကျွင်းရှောင်ယောက်က ပြောလိုက်သည်။

ပုလော့ရွယ်က ပြုံးလိုက်၏။

"ဒါပေမဲ့ နတ်ဘုရားသားတော်က လော့ရွယ်အတွက် လမ်းချန်ပေးရမယ်လို့ အရင်ကတိပေးရမယ်"

"ဒါက အသေးအမွှားကိစ္စပါပဲ၊ ဒါပေမဲ့ မင်းငါ့ကိုလှည့်စားဝံ့ရင် အကျိုးဆက်ကို မင်းသိတယ်"

ကျွင်းရှောင်ယောက်က လျစ်လျူရှုစွာ ပြောလိုက်သည်။

ကျိချင်းရီက အကြံအစည် အလွန်မြင့်မားသူ ဖြစ်သည်။ သို့တိုင်၊ သူက ဆိုးသွမ်းသော ညီမလေးတစ်ယောက်သာ ဖြစ်နိုင်သေးသည်။

ပုလော့ရွယ်၏ အတွေးလေးများက ပြောရန်ပင် မထိုက်တန်ပေ။

"တိဟောက်ထျန်းဟာ တစ်ချိန်က ကျွန်မကို ရှေးဟောင်းပစ္စည်းတစ်ခုရဲ့ အပိုင်းအစတွေကို လျှို့ဝှက်ရှာဖွေဖို့ ညွှန်ကြားခဲ့တယ်။ သူကိုယ်တိုင်လည်း အပိုင်းအစတစ်ခုကို ပိုင်ဆိုင်ထားပါတယ်"

"ဒါပေမဲ့ တိဟောက်ထျန်းက ဒီကိစ္စကို အရမ်းလျှို့ဝှက်ထားတယ်၊ အဲဒါကို ရှာဖို့ ကျွန်မကို အမိန့်ပေးခဲ့ပေမဲ့ အဲဒီရှေးဟောင်းပစ္စည်းက ဘာလဲဆိုတာနဲ့ သူ့ရဲ့လုပ်ဆောင်ချက်က ဘာလဲဆိုတာကို မပြောခဲ့ဘူး"

ပုလော့ရွယ်၏ စကားများက ကျွင်းရှောင်ယောက်ကို နက်နဲစွာ တွေးတောမိစေသည်။

ရှေးဟောင်းပစ္စည်း အပိုင်းအစလား။

ဤလုပ်ရိုးလုပ်စဉ်က အဘယ်ကြောင့် ဤမျှရင်းနှီးပုံပေါ်သနည်း။

ကျွင်းရှောင်ယောက်၏ နားလည်မှုအရ၊ ပြန်လည်မွေးဖွားလာသူအများစုသည် ရှေးဟောင်းပစ္စည်းတစ်မျိုးမျိုး သို့မဟုတ် ရွှေရောင်လက်ချောင်းများကြောင့် အတိတ်သို့ ပြန်လည်မွေးဖွားခဲ့ကြခြင်း ဖြစ်သည်။

တစ်နည်းဆိုရသော်၊ တိဟောက်ထျန်းကို လက်ရှိအချိန်သို့ ပြန်လည်မွေးဖွားနိုင်စေသည်က ထိုရှေးဟောင်းပစ္စည်း၏ အစိတ်အပိုင်း ဖြစ်သင့်သည်။

ထိုသို့သော စွမ်းအားဖြင့် ရှေးဟောင်းပစ္စည်းက ထူးထူးခြားခြား မူလဇာစ်မြစ်ရှိသည်မှာ ထင်ရှားပေသည်။

ထို့ပြင် လုပ်ရိုးလုပ်စဉ်အတိုင်းဆိုပါက ပစ္စည်းဟာ မပြည့်စုံလေလေ၊ ပို၍ အားကောင်းလေလေ ဖြစ်သည်။

တိဟောက်ထျန်းက ရှေးဟောင်းပစ္စည်း၏ အပိုင်းအစများကို စုဆောင်းလိုသောကြောင့် သူ့တွင် ပိုမိုလေးနက်သော ရည်ရွယ်ချက်ရှိရမည်။

"မင်းငါ့ကို လိမ်နေတာတော့ မဟုတ်ဘူး မဟုတ်လား"

ကျွင်းရှောင်ယောက်က ပုလော့ရွယ်ကို ကြည့်လိုက်သည်။

"နတ်ဘုရားသားတော်က နတ်ဘုရားနဲ့မိစ္ဆာတွေထက် သာလွန်ပါတယ်။ လော့ရွယ်က ဘယ်လိုလုပ်ပြီး လှည့်ဖြားဝံ့မှာလဲ"

ပုလော့ရွယ်က ပြောလိုက်သည်။

ကျွင်းရှောင်ယောက်လည်း ညင်သာစွာ ခေါင်းညိတ်လိုက်လေသည်။

ဒါက သူ့စိတ်ထဲမှ လုပ်ရိုးလုပ်စဉ်နှင့် လိုက်လျောညီထွေ ဖြစ်သည်။

"ဒါဆိုရင် မင်းက တိဟောက်ထျန်းအနားမှာ ဆက်နေပါ။ ဒီနေ့ ဖြစ်ပျက်ခဲ့သမျှ အရာအားလုံးကလည်း ဘယ်တုန်းကမှ ဖြစ်မလာဘူးလို့ မှတ်ထားလိုက်"

"ဒါပေမဲ့ ရှေးဟောင်းပစ္စည်းရဲ့ အပိုင်းအစကို တွေ့ရင်တော့ ငါ့ကို အရင်ကြည့်ခွင့်ပြုပါ"

ကျွင်းရှောင်ယောက်က ပြောလိုက်သည်။

"လော့ရွယ် နားလည်ပါပြီ"

ပုလော့ရွယ်က အနည်းငယ် ခေါင်းညိတ်လိုက်၏။

ကျွင်းရှောင်ယောက်ကို တစ်ဖန် အရိုအသေပြုပြီးနောက် ပုလော့ရွယ်က ကြိုးကြာငှက်ကိုစီးကာ ထွက်ခွာသွားတော့သည်။

ပုလော့ရွယ် ပြန်ထွက်သွားတာကိုကြည့်ရင်း ကျွင်းရှောင်ယောက်က ပြုံးလိုက်သည်။

ပုလော့ရွယ်က တိဟောက်ထျန်း၏ဘေးတွင် သူချထားသော စစ်တုရင်ရုပ်တစ်ခုပင်။

သူ့ကို တိဟောက်ထျန်းက ရှာဖွေတွေ့ရှိပြီး သတ်ခဲ့လျှင်ပင် ကျွင်းရှောင်ယောက်က လုံးဝ ဂရုမစိုက်ပါ။

"ရွှေလက်ချောင်း အပိုင်းအစတွေကို ရှာနေတာလား။ ဒါက တကယ့် လုပ်ရိုးလုပ်စဉ်ဟောင်းအတိုင်းပဲ"

"ဒါပေမဲ့ တိဟောက်ထျန်း၊ မင်းက ဒါနဲ့ လှည့်စားချင်ရင် မဖြစ်နိုင်ဘူး"

"ဘာကြောင့်လဲဆိုတော့ ငါက မင်းရှေ့ကနေ အမြဲလျှောက်နေမှာဖြစ်လို့ပဲ"

ကျွင်းရှောင်ယောက်က ရယ်မောလိုက်သည်။ သူက တိဟောက်ထျန်း၏ နောက်ထပ်အစီအစဉ်အတွက် စိတ်မပူတော့ပေ။

ထို့နောက်တွင်၊ သူက နောက်တစ်ဆင့်အတွက် ပြင်ဆင်ရန် ပျက်စီးခြင်းကောင်းကင် အင်မော်တယ်နယ်မြေကြီးသို့ ပြန်သွားခဲ့သည်။

ဤတွင်၊ သူ ပထမဆုံးလုပ်ရမှာက ကျွင်းဧကရာဇ်ခုံရုံးကို လုံးလုံးလျားလျား ပေါင်းစည်းရန်ပင်။

အကြောင်းမှာ၊ ကျွင်းဧကရာဇ်ခုံရုံးက ဖရိုဖရဲဖြစ်နေသေးပြီး ရှုပ်ထွေးနေသောကြောင့် ဖြစ်သည်။

အမျိုးမျိုးသော အင်အားစုများ ပါ၀င်လာပြီဖြစ်သဖြင့် ရှုပ်ထွေးလွန်းပြီး စည်းမဲ့ကမ်းမဲ့ ဖြစ်စေသည်။

သို့သော်လည်း ဤအတွက် ကျွင်းရှောင်ယောက်မှာ အစီအစဉ်ရှိနေပြီ။

ကျွင်းဧကရာဇ်ခုံရုံး၏ တည်ရှိမှုကို ကောင်းကင်ကိုးခု အင်မော်တယ်နယ်မြေ တစ်ခုလုံးအား ကြေငြာရန် ခမ်းနားသော ပွဲကြီးတစ်ခု ကျင်းပလိုခဲ့သည်။

ထိုပွဲတွင် ကျွင်းဧကရာဇ်ခုံရုံး၏ ဌာနခြောက်ခုကိုလည်း အပြည့်အဝ တည်ထောင်လိမ့်မည်။

ကျွင်းဧကရာဇ်ခုံရုံး၏ ပွဲတော်ကြီးက နောင်အခါ ကောင်းကင်ကိုးခု အင်မော်တယ်နယ်မြေကြီးတွင် ဖမ်းစားနိုင်ဆုံးသော ပွဲဖြစ်လာမည်မှာ သေချာသည်။