အခန်း ၁၃၃၄

အခန်း ( ၁၃၃၄ ) ကောင်းကင်ကိုးပါးအထက်သို့ သွားရဦးမည်။

နတ်သမီးယွင်ထျန်းမေ၏ လေးနက်သော အမူအရာကိုမြင်တော့ ကျွင်းရှောင်ယောက်က တစ်ချက် ပြုံးလိုက်သည်။

"ဒါက အရမ်းအရေးကြီးတဲ့ နောက်ခံနဲ့ လူတစ်ယောက်ဖြစ်ပုံရတယ်"

နတ်သမီး ယွင်ထျန်းမေက အနည်းငယ်ခေါင်းညိတ်လိုက်၏။

"မှန်ပါတယ်၊ ကျန်းလော့လီကို လက်ထပ်စေချင်တဲ့သူက တားမြစ်နယ်မြေ ဆယ်ခုထဲက တစ်ခုဖြစ်တဲ့ ဧကရာဇ်ကြွေလွင့်တောင်ရဲ့ သခင်လေး ဝမ့်ယန်ပဲ"

"‌ဧကရာဇ်ကြွေလွင့်တောင်လား"

ကျွင်းရှောင်ယောက်က ခပ်တိုးတိုး ရေရွတ်လိုက်သည်။ သူ့မျက်လုံးများမှာလည်း ထူးခြားသော အရိပ်ယောင်တစ်ခု ပေါ်လာလေသည်။

ဧကရာဇ်ကြွေလွင့်တောင်ကို သူကြားဖူးသည်။

၎င်းက လျှို့ဝှက်ဆန်းကြယ်သောနောက်ခံနှင့် ထူးကဲသောခွန်အား ရှိ၏။

ဧကရာဇ်ကြွေလွင့်ဟူသောအမည်က သာမန်အင်အားစုများ မခံယူဝံ့သော အမည်မျိုး ဖြစ်သည်။

"ဧကရာဇ်ကြွေလွင့်တောင်က ခေတ်ရဲ့မငြိမ်သက်မှုတွေမှာ ပါဝင်ခဲ့တဲ့ အဓိကအင်အားစုလေးခုထဲက တစ်ခုဖြစ်ပုံရတယ်"

ကျွင်းရှောင်ယောက်က ပြောလိုက်သည်။

နတ်သမီး ယွင်ထျန်းမေက ခဏမျှ တိတ်ဆိတ်နေပြီးနောက် ခေါင်းညိတ်လိုက်၏။

တားမြစ်နယ်မြေဆယ်ခုလုံးက ခေတ်၏ မငြိမ်မသက်မှုများတွင် မပါဝင်ခဲ့ပေ။

သို့သော်လည်း တချို့ကတော့ အတော်လေးတက်ကြွသည်။

ဧကရာဇ်ကြွေလွင့်တောင်က ၎င်းတို့ထဲမှ တစ်ခုပင်။

"ဧကရာဇ်ကြွေလွင့်တောင်ရဲ့ သခင်လေးဖြစ်တဲ့ ဝမ့်ယန်ကလည်း အတော်အစွမ်းထက်တယ်ထင်ပါ့"

"ဟုတ်ပါတယ်၊ သူက ကောင်းကင်ကိုးပါး နဂါးနဲ့ဖီးနစ်စာရင်းရဲ့ ထိပ်ဆုံးမှာ ပါဝင်တယ်"

"ကောင်းကင်ကိုးပါး နဂါးနဲ့ဖီးနစ်စာရင်းလား"

ကျွင်းရှောင်ယောက်က ရေရွတ်လိုက်သည်။

"ကောင်းကင်ကိုးပါး နဂါးနဲ့ဖီးနစ်စာရင်းက မဟာဧကရာဇ်ဖြစ်လာဖို့ အလားအလာရှိတဲ့ ကောင်းကင်ကိုးပါးအထက်က ပါရမီရှင်တွေကို မှတ်တမ်းတင်ထားပြီး စုစုပေါင်း နေရာတစ်ရာ ရှိတယ်"

"အဆင့်သတ်မှတ်ချက်က မြင့်မားလေလေ၊ အဲဒီလူရဲ့ အင်အားကလည်း ပိုပြီးတော့ အားကောင်းလေလေပဲ"

"ဝမ့်ယန်က လက်ရှိမှာ ထိပ်တန်းတစ်ဆယ်အတွင်း စာရင်းဝင်တယ်။ ဒါပေမဲ့ သူက သူ့ခွန်အားကို ဖုံးကွယ်ထားပုံရပြီး ထိပ်ဆုံးနေရာအတွက် ယှဉ်ပြိုင်ဖို့လည်း စိတ်ကူးရှိပုံမရဘူး"

“မဟုတ်ရင် သူက ထိပ်တန်းဆယ်ယောက်မှာ ရပ်တန့်နေမှာ မဟုတ်ဘူးလေ"

နတ်သမီး ယွင်ထျန်းမေက ရှင်းပြလိုက်သည်။

ကောင်းကင်ကိုးပါးအထက် တားမြစ်နယ်မြေတွင် အထူး နယ်မြေများရှိကြောင်း သိထားကြရမည် ဖြစ်သည်။

ထို့ကြောင့် မွေးဖွားလာသော ပါရမီရှင်များနှင့် သူရဲကောင်းများက အလွန်အစွမ်းထက်ကြပေသည်။

သူတို့က ကောင်းကင်ကိုးပါး အင်မော်တယ်နယ်မြေကြီးမှ ပါရမီရှင်များထက် အပြည့်အဝ သာလွန်လုနီးပါး ဖြစ်သည်။

ထိုအခြေအနေမျိုးတွင်၊ ဧကရာဇ်ကြွေလွင့်တောင်၏ သခင်လေးဖြစ်သော ဝမ့်ယန်က ထိပ်တန်းဆယ်ဦးစာရင်းတွင် ပါဝင်နိုင်သည်။

ပိုကြောက်စရာကောင်းတာက ဝမ့်ယန်ဟာ ဤစာရင်းအတွက် ယှဉ်ပြိုင်ရန် စိတ်ကူးမရှိခြင်းပင်။

မဟုတ်လျှင် သူ့အဆင့်က ပိုမြင့်သွားနိုင်သည်။

ထိုလူမျိုးသာ အင်မော်တယ်နယ်မြေကြီးကို ရောက်လာပါက တိဟောက်ထျန်းကဲ့သို့ လူအနည်းငယ်ကသာ ယှဉ်ပြိုင်နိုင်လိမ့်မည်။

သို့သော်လည်း ကျွင်းရှောင်ယောက်က လျစ်လျူရှုစွာ ပြောလိုက်သည်။

"ဒါပဲလား"

"ဟင်... ရှင် ဘာပြောချင်တာလဲ"

နတ်သမီး ယွင်ထျန်းမေက အံ့အားသင့်သွား၏။

"ဒီလောက်လေးနဲ့ လော့လီရဲ့ အာရုံကို ဖမ်းစားဝံ့တယ်။ သူ့ကို ကောင်းကင်ကိုးပါး နဂါးနဲ့ဖီးနစ်စာရင်းရဲ့ နံပါတ်တစ်လို့ ထင်ခဲ့တာ"

"ဒီလိုဆိုရင်တော့ ကျုပ်က တိုက်ခိုက်လိုစိတ် နည်းနည်းရှိလိမ့်မယ်"

ကျွင်းရှောင်ယောက် ပျင်းရိစွာပြောသည်။

နတ်သမီး ယွင်ထျန်းမေက အံ့ဩသွားပြီး ကြောင်တက်တက်ဖြင့် ထိုနေရာတွင် ရပ်နေလိုက်လေသည်။

ခဏကြာမှ သတိပြန်ဝင်လာခဲ့သည်။

အမှန်ပင်၊ သူ့ရှေ့တွင် ရပ်နေသူက တိဟောက်ထျန်းကို ကိုယ်ပွားတစ်ခုတည်းဖြင့် အလွယ်တကူ အနိုင်ယူနိုင်သူ ဖြစ်သည်။

တိဟောက်ထျန်းကို ကောင်းကင်ကိုးပါးအထက်တွင် ထားရှိပါက ထိပ်တန်းဆယ်ယောက်စာရင်း ဝင်နိုင်လိမ့်မည်။

အင်မော်တယ်နယ်မြေကြီးမှ မျိုးဆက်သစ် နံပါတ်တစ်ဖြစ်သော ကျွင်းရှောင်ယောက်ဆိုလျှင် အထူး ပြောနေရန် မလိုတော့ပါ။

"ဒါက ငန်းအသားကို စားချင်တဲ့ ဖားတစ်ကောင်လိုပဲ"

ကျွင်းရှောင်ယောက်က ခေါင်းယမ်းပြီး သက်ပြင်းချလိုက်သည်။

နတ်သမီး ယွင်ထျန်းမေမှာ ပို၍ ဆွံ့အသွား၏။

ဧကရာဇ်ကြွေလွင့်တောင်မှ သခင်လေး ဝမ့်ယန်ကို ဖားတစ်ကောင်နှင့် မည်သို့နှိုင်းယှဉ်ဝံ့သနည်း။

ဤစကားက ကောင်းကင်ကိုးပါးအထက်ကို ပျံ့သွားမည်ဆိုလျှင် ဘယ်လောက်ထိ တုန်လှုပ်သွားစေမလဲ မပြောတတ်ပေ။

"ဟင်း၊ ဒီလိုဆိုရင် ဒါက ခင်ဗျားရဲ့အပြစ်မဟုတ်ပါဘူး။ ဒီအိမ်ထောင်ရေးဖြစ်မြောက်အောင် ကြိုးစားနေတဲ့ ပိရှောင်းမျိုးရိုးပဲ"

"ဒါပေမယ့် မေးစရာရှိသေးတယ်။ ခင်ဗျားက မျိုးရိုးကို အားနည်းနေပြီလို့ ပြောတယ်နော်"

"ဒါပေမဲ့ ပိရှောင်းမျိုးရိုးက မျိုးရိုးသုံးဆက်ထဲမှာ အားအနည်းဆုံးဖြစ်ပြီး ရှေးနတ်သမီးက ကျဆုံးသွားပေမဲ့ သူတို့ကို‌ ထောက်ပံ့ဖို့ မဟာပုဂ္ဂိုလ်တွေ ရှိသင့်တယ်မဟုတ်လား"

"သူတို့က ပိရှောင်းမျိုးရိုး ဖိနှိပ်ခံနေရတာကို ဒီအတိုင်းပဲ ကြည့်နေကြတာလား"

ကျွင်းရှောင်ယောက်က မေးလိုက်သည်။

နောက်ဆုံးတွင်၊ ရှန်းလင်က မျိုးရိုးသုံးခု ခွဲထားလျှင်ပင် အသက်တားမြစ်နယ်မြေတစ်ခု ဖြစ်နေသေးသည်။

မျိုးရိုးတိုင်းတွင် မယှဉ်သာသော အခြေခံအုတ်မြစ်များ ရှိရမည်။

နတ်သမီး ယွင်ထျန်းမေက အနည်းငယ် ခေါင်းညိတ်လိုက်သည်။

"မှန်ပါတယ်။ ကျွန်မရဲ့ ရှန်းလင်မှာ

သွေးကြောသုံးချောင်းထဲမှာ မြင့်မြတ်တဲ့ သတ္တဝါတွေ အိပ်နေတာ ရှိတယ်"

"ဒါပေမယ့် သူတို့လို တည်ရှိမှုတွေက ကြီးမားတဲ့ အပြောင်းအလဲတွေဖြစ်မှ နိုးထလာကြလိမ့်မယ်။ ဥပမာ ရှန်းလင်ရဲ့ ပျက်စီးမဲ့အခြေ‌အနေ ဒါမှမဟုတ် ဓလေ့ထုံးတမ်းတွေ ပြုလုပ်ကြချိန်မျိုး‌ပေါ့"

"မဟုတ်ရင်၊ သူတို့က အခြေခံအားဖြင့် အချိန်တော်တော်များများမှာ အိပ်စက်နေကြလိမ့်မယ်"

ကျွင်းရှောင်ယောက်၏ မျက်လုံးက အရောင်တစ်ချက်လက်သွားသည်။

စကားတစ်ခွန်းကို သူကြားလိုက်ရ၏။

"ဓလေ့ထုံးတမ်းဆိုတာက ဘာကိုဆိုလိုတာလဲ"

နတ်သမီး ယွင်ထျန်းမေက ခေါင်းကိုခါယမ်းလိုက်သည်။

"စိတ်မကောင်းပါဘူး၊ ဒီအကြောင်းကိုတော့ ကျွန်မလည်း သိပ်ပြီးမသိဘူး"

ကျွင်းရှောင်ယောက်က ခေါင်းညိတ်လိုက်သည်။ နတ်သမီးယွင်ထျန်းမေက ထိုအကြောင်းကို ထပ်မပြောချင်ကြောင်း သူသိ၏။

သို့သော်လည်း သူက ၎င်းကို တိတ်တဆိတ် မှတ်သားထားလိုက်လေသည်။

"ကောင်းပါပြီ၊ ကျုပ်နားလည်ပြီ"

ကျွင်းရှောင်ယောက်က ခေါင်းညိတ်လိုက်သည်။

သူ့မိန်းမကို လာရှုပ်ရန် ကြိုးစားဝံ့၏။

ကျွင်းရှောင်ယောက်၏ နှလုံးသားထဲမှာ ဝမ့်ယန်ကို သေဒဏ်ပေးထားပြီးပြီ။

တစ်ဖက်လူက ဧကရာဇ်ကြွေလွင့်တောင်၏ သခင်လေးဖြစ်လျှင်ပင် ဘာဖြစ်သေးသနည်း။

ကျွင်းရှောင်ယောက်၏ မျက်လုံးထဲမှာတော့ ဤမျှသာ ဖြစ်သည်။

ကျွင်းရှောင်ယောက်က အများအားဖြင့် အားလုံးကို လျစ်လျူရှုနေတတ်သည်။

သို့သော်လည်း သူ့မိသားစု၊ သူငယ်ချင်းနှင့် သူချစ်ရသူ...

ထိုသူများကို စော်ကားဝံ့လျှင်တော့ သူ၏ အမျက်ဒေါသကို ခံရမည်။

"ဒါဆိုရင် ကျွင်းသခင်လေး..."

နတ်သမီး ယွင်ထျန်းမေက တစ်ခုခုကို တွေးမိဟန်ဖြင့် အသက်ပြင်းပြင်းရှူလိုက်သည်။

"အပြောထက် လက်တွေ့က ပိုတိကျပါတယ်"

"တစ်ကြိမ်မှာတော့ ကောင်းကင်ကိုးပါးအထက်ကို ကိုယ်တိုင် လာကြည့်ရလိမ့်မယ်"

ကျွင်းရှောင်ယောက်က တည်ငြိမ်စွာ ပြောလိုက်သည်။

သို့သော်လည်း နတ်သမီး ယွင်ထျန်းမေ၏ နားထဲတွင် ကျယ်လောင်စွာ မြည်ဟီးသွားသလို ခံစားလိုက်ရ၏။

အကယ်၍၊ ကျွင်းရှောင်ယောက်က ကောင်းကင်ကိုးပါးအထက်သို့ တက်မည်ဆိုလျှင် လှုပ်ခတ်မှုများ မည်မျှဖြစ်စေမည်နည်း။

နောက်ဆုံးတွင်၊ တစ်ချိန်က အင်မော်တယ်သတ်ဓားသည် ကောင်းကင်ကိုးပါးအထက် တားမြစ်နယ်မြေ တစ်ခုလုံးကို လှုပ်ရှားစေခဲ့သည်။

ကောင်းကင်ကိုးပါးအထက်ရှိ သက်ရှိသတ္တဝါအားလုံးကို အင်မော်တယ်နယ်မြေကြီးရှိ ကျွင်းမိသားစုတွင် ကျွင်းရှောင်ယောက်ကဲ့သို့ ဘီလူးတစ်ကောင်ရှိနေကြောင်း သိစေသည်။

ထို့ပြင် သားကို အထူးကာကွယ်ပေးတတ်သော အဖေတစ်ယောက် ရှိ၏။

ယခုအချိန်အထိ၊ တားမြစ်နယ်မြေမှ သခင်လေးများနှင့် ဧကရာဇ်၏သားတော်များက ကျွင်းရှောင်ယောက်ကို တွေ့ဆုံလိုသည်ဟု ပြောဆိုနေကြဆဲ ဖြစ်သည်။

ဥပမာအားဖြင့် မြင့်မြတ်ဝိညာဉ်အပျက်အယွင်းများရှိ ပါရမီရှင်များက ကျွင်းရှောင်ယောက်ကို နှိမ်နင်းလိုသည်ဟု ပြောကြသည်။

လူအချို့ဆိုလျှင် ကျွင်းရှောင်ယောက်ကို ဖိနှိပ်ရန် အင်မော်တယ်နယ်မြေကြီးသို့ လူကိုယ်တိုင်ဆင်းရန် ကြံစည်ခဲ့ကြသေးသည်။

ထို့ကြောင့် ကျွင်းရှောင်ယောက်က ကောင်းကင်ကိုးပါးအထက်သို့ လာရောက်မည်ဆိုလျှင်...

ဤခရီးစဉ်က စိတ်လှုပ်ရှားစရာကောင်းမည်မှာ သေချာသည်။

ကြီးမားသော ပွတ်တိုက်မှုများနှင့် ပြင်းထန်သော တိုက်ပွဲများ မည်မျှဖြစ်လာမည်ကိုလည်း‌ ‌တွေးကြည့်ရန်ပင် မလွယ်ပေ။

"ဘာလဲ၊ ကျုပ်က ကောင်းကင်ကိုးပါးအထက်ကိုသွားပြီး ကောင်းကင်ကိုးပါး တားမြစ်နယ်မြေကို ဒုက္ခပေးမှာ ကြောက်လို့လား"

နတ်သမီး ယွင်ထျန်းမေ၏ အတွေးများကို မြင်နေဟန်ဖြင့် ကျွင်းရှောင်ယောက်က နောက်ပြောင်လိုက်သည်။

"အဲဒီလို မဟုတ်ပါဘူး"

နတ်သမီး ယွင်ထျန်းမေက ပြောလိုက်၏။

"စိတ်မပူပါနဲ့၊ ငါ့ခြေထောက်အောက်က ပုရွက်ဆိတ်တွေကို နှိပ်စက်ဖို့ စိတ်မဝင်စားဘူး"

ကျွင်းရှောင်ယောက်က လျစ်လျူရှုစွာ ပြောလိုက်သည်။

"ရှောင်ယောက်၊ အစ်မ မင်းနဲ့လိုက်ခဲ့မယ်"

ကျန်းစန်းယီက ပြောလိုက်သည်။

"မလိုပါဘူး၊ အစ်မလည်း လေ့ကျင့်ဖို့ လိုသေးတယ်။ နောက်ပြီးတော့ ကျွန်တော်ကို စိတ်ချပါ၊ လော့လီကို ထိခိုက်စေခွင့်ပြုမှာ မဟုတ်ဘူး"

ကျွင်းရှောင်ယောက်က ပြောလိုက်၏။

သူတစ်ယောက်တည်း ကောင်းကင်ကိုးပါးအထက်ကို သွားရောက်လျှင်ပင် ပြဿနာမရှိပေ။

နောက်ဆုံးတွင်၊ အင်မော်တယ်သတ်ဓားက သူတို့ကို သတိပေးခဲ့သည်။

အနည်းဆုံးတော့ တားမြစ်နယ်မြေရှိ မဟာပုဂ္ဂိုလ်ကြီးများက သူ့ကို တိုက်ရိုက်တိုက်ခိုက်ခြင်းပြုမည် မဟုတ်ပေ။

သို့သော်လည်း ကျန်းစန်းယီကို ခေါ်သွားမည်ဆိုလျှင် အနည်းငယ် ပြဿနာရှိနိုင်သည်။

ကျန်းစန်းယီလည်း ထိုအကြောင်းကို တွေးမိဟန်ဖြင့် အများကြီး မပြောတော့ပါ။

သူက ကျွင်းရှောင်ယောက်၏ လက်တစ်ဖက်ကို ဆုပ်ကိုင်ပြီး ပြောလိုက်သည်။

"ရှောင်ယောက်၊ လော့လီကို စိတ်မပျက်ပါစေနဲ့"

"စိတ်မပူပါနဲ့"

ကျွင်းရှောင်ယောက်က ပြုံးပြီး ပြောလိုက်၏။

သူ့အမျိုးသမီးက ကြုံသလို စိတ်ကူးယဉ်နိုင်သောအရာ မဟုတ်ပေ။