အခန်း ၄၀၂

အခန်း (၄၀၂) နတ်စွမ်းရည် အလိုအလျောက် ပေါ်ထွက်လာခြင်း... သွေးသားချီစွမ်းအင်မှ ဓမ္မရုပ်တုအဖြစ် ပြောင်းလဲခြင်း

အချိန်ကိုက်ပင် နဂါးဟိန်းသံကြီး ပဲ့တင်ထပ်သွားလေသည်။

လေဟာနယ်ထက်တွင် တင်ပျဉ်ခွေထိုင်နေသော သုံးလက်မအရွယ် ယွမ်ယင်းလေးသည် ယခုအခါ ပြောင်းလဲမှုများ စတင်လာခဲ့လေပြီ။

တောက်ပလွန်းလှသော နတ်ဘုရားအလင်းတန်းများက ကောင်းကင်ယံသို့ တိုက်ရိုက် ထိုးဖောက်သွားပြီး ပြင်းထန်လှသော အရှိန်အဝါများက အရပ်လေးမျက်နှာသို့ လွှမ်းခြုံသွားလေသည်။ ကျန်းချဲ့၏ ရုပ်ခန္ဓာကိုယ်အတွင်းမှ အလင်းတန်းနှစ်ခုက ယှက်နွယ်ရစ်ပတ်လျက် ထွက်ပေါ်လာလေသည်။ တစ်ခုက အလွန်တရာ အေးစက်လှပြီး နောက်တစ်ခုက အလွန်တရာ ပူပြင်းလှပေသည်။

ယင်နှင့် ယန် ချီစွမ်းအင် နှစ်ခုစလုံး ကျန်းချဲ့၏ ယွမ်ယင်းအတွင်းသို့ တိုက်ရိုက် တိုးဝင်သွားလေသည်။ မျက်စိတစ်မှိတ်အတွင်းမှာပင် အလင်းတန်းများက ပိုမို တောက်ပလာပြီး မျက်စိဖြင့် မြင်နိုင်သော အရှိန်အဟုန်ဖြင့် ကြီးထွားလာကာ သုံးလက်မ ကန့်သတ်ချက်ကို ကျော်လွန်သွားလေသည်။ လေးလက်မခန့်သို့ ရောက်ရှိသွားမှသာ ရပ်တန့်သွားလေတော့သည်။

ယွမ်ယင်း အဆင့်တွင် နယ်ပယ်သုံးခု ခွဲခြားထားလေသည်။ သုံးလက်မမှာ ရှန်ရှန်းအဆင့် အစောပိုင်းဖြစ်ပြီး ခြောက်လက်မမှာ ရှန်ရှန်းအဆင့် အလယ်ပိုင်း ဖြစ်ကာ ကိုးလက်မမှာတော့ ရှန်ရှန်းအဆင့် နှောင်းပိုင်း ဖြစ်လေသည်။

သုံးလက်မမှာ ကန့်သတ်ချက် တစ်ခုဖြစ်ပြီး လေးလက်မသို့ ရောက်ရှိသွားသူများမှာ ထိုကန့်သတ်ချက်ကို ချိုးဖျက်နိုင်ခဲ့ပြီ ဖြစ်လေသည်။

ရှန်ရှန်းအဆင့် အလယ်ပိုင်း... ဓမ္မရုပ်တုအဆင့်။

ဤအချိန်တွင် အောင်မြင်စွာ တက်လှမ်းနိုင်ခဲ့လေပြီ။

ရှည်လျားလှသော အော်ဟစ်သံကြီး တစ်ချက်က အရပ်လေးမျက်နှာသို့ လွှမ်းခြုံသွားပြီး လိမ့်တက်နေသော ပင်လယ်လှိုင်းတံပိုးများ ပျောက်ကွယ်သွားကာ ကောင်းကင်လေပြင်းများလည်း အကုန်လုံး ငြိမ်သက်သွားလေသည်။ လေးလက်မအရွယ် ယွမ်ယင်းမှာ အလင်းတန်းတစ်ခုအဖြစ် ပြောင်းလဲသွားပြီး ကျန်းချဲ့၏ ဝိညာဉ်စင်မြင့်အတွင်းသို့ တိုက်ရိုက် ဝင်ရောက်သွားလေသည်။ မျက်စိတစ်မှိတ်အတွင်းမှာပင် ကျန်းချဲ့ တစ်ကိုယ်လုံးမှ အရှိန်အဝါများ အဆင့်ဆင့် မြင့်တက်လာလေသည်။

နဂါးအရှိန်အဝါနှင့် ရောယှက်နေသော ကြောက်မက်ဖွယ်ကောင်းသည့် ဖိအားကြီး ရုတ်တရက် ပေါက်ကွဲထွက်ပေါ်လာလေသည်။ မျက်လုံးများကို ဖွင့်လိုက်ချိန်တွင် ကျန်းချဲ့၏ မျက်ဝန်းသူငယ်အိမ်များမှာ အနက်ရောင် တွင်းနက်ကြီးတစ်ခုအလား အရာအားလုံးကို ဝါးမြိုပစ်တော့မည့်ဟန် ရှိနေလေသည်။

လေပူတစ်ချက်ကို မှုတ်ထုတ်လိုက်ပြီးနောက် ကျန်းချဲ့သည် အဆင့်တက်ခြင်း ပြီးဆုံးသွားပြီဟု ထင်မှတ်ကာ ကျင့်စဉ်အဆင့်ကို တည်ငြိမ်စေရန် ပြင်ဆင်လိုက်လေသည်။ သို့သော် ရုတ်တရက် တစ်စုံတစ်ခုကို အာရုံခံမိလိုက်သည့်အလား ခေါင်းမော့ကာ လေဟာနယ်ထက်သို့ ကြည့်လိုက်လေသည်။

ခုလေးတင် ကောင်းကင်လေပြင်းများ ကွဲလွင့်သွားပြီး ငြိမ်းချမ်းသွားသော ကောင်းကင်နှင့် မြေကြီးသည် ရုတ်တရက် ကောင်းကင်နှင့် မြေကြီး၏ မူလစွမ်းအင်များကို စတင် စုစည်းလာလေသည်။ မျက်စိဖြင့် မြင်နိုင်သော မူလစွမ်းအင်များက အရပ်လေးမျက်နှာမှ စုရုံးလာပြီး သူကိုယ်တိုင်မှာလည်း မုန်တိုင်း၏ ဗဟိုချက်အဖြစ် တစ်ဖန် ပြန်လည် ရောက်ရှိသွားခဲ့လေပြီ။

ရုတ်တရက် ဖြစ်ပေါ်လာသော ပြောင်းလဲမှုကြောင့် ကျန်းချဲ့ တစ်ယောက်တည်း အံ့အားသင့်သွားရုံသာမက အဝေးမှနေ၍ အစောင့်အရှောက်အဖြစ် နေပေးနေကြသော ကျောက်ရှန်းကျစ် နှင့် ချီရွှယ်မိစ္ဆာသခင် တို့ နှစ်ယောက်မှာလည်း အလွန်အမင်း အံ့အားသင့်သွားကြလေသည်။

သူတို့သည် ကျန်းချဲ့ ဤမျှလောက် အချိန်တိုလေးအတွင်း အဆင့်တက်နိုင်ခဲ့မှု အပေါ် လုံလောက်စွာ အံ့အားသင့်နေခဲ့ကြပြီ ဖြစ်လေသည်။ အထူးသဖြင့် ကျောက်ရှန်းကျစ် မှာ ကျန်းချဲ့ အဆင့်တက် အောင်မြင်သွားသည့် တုန်လှုပ်မှုမှပင် အသိမဝင်သေးမီ ဘေးပတ်ဝန်းကျင်ရှိ ကောင်းကင်လေပြင်းများ ကွဲလွင့်သွားပြီးနောက် အဆုံးအစမရှိသော ကောင်းကင်နှင့် မြေကြီး၏ မူလစွမ်းအင်များ ရုတ်တရက် လိမ့်တက်လာသည်ကို တွေ့လိုက်ရလေသည်။ ချက်ချင်းပင် မျက်မှောင်တင်းတင်းကြုတ်သွားပြီး အရှေ့ဘက်ရှိ ကျန်းချဲ့ကို အလွန်အမင်း စိုးရိမ်တကြီး စောင့်ကြည့်နေလေသည်။

'ဒါက ဘာကြီးလဲ...'

ကျောက်ရှန်းကျစ် က ခေါင်းလှည့်ကာ ဘေးနားရှိ ချီရွှယ်မိစ္ဆာသခင် ကို ကြည့်လိုက်လေသည်။ သူမ အဖြေတစ်ခုကို သိချင်နေမိလေသည်။

သို့သော် ရလဒ်အနေဖြင့် ချီရွှယ်မိစ္ဆာသခင် ၏ အမူအရာမှာ သူမထက်ပင် ပို၍ အံ့အားသင့်နေပုံရပြီး ထိုနေရာတွင်ပင် ကြက်သေသေနေသည်ကို တွေ့လိုက်ရလေသည်။

"မဖြစ်နိုင်တာ... ဒီကောင်လေး... သူ... ဟာ..."

ချီရွှယ်မိစ္ဆာသခင် မျက်လုံးများ ပြူးကျယ်သွားလေသည်။ မူလက တည်ငြိမ်နေသော သူ၏ ရင်ထဲတွင် လှိုင်းလုံးကြီးများ ထပ်မံ ရိုက်ခတ်လာပြီး ဖြစ်နိုင်ခြေ တစ်ခုကို တိတ်တဆိတ် ခန့်မှန်းမိလိုက်လေသည်။ ၎င်းမှာ ကျန်းချဲ့ နောက်ထပ် တစ်ကြိမ် အဆင့်တက်တော့မည် ဆိုခြင်း ပင်ဖြစ်သည်။

သို့သော် ဤကဲ့သို့သော မြင်ကွင်းမျိုးမှာ ယွမ်ယင်း ကျင့်ကြံမှု အဆင့်တက်သည့် ပုံစံမျိုး လုံးဝ မဟုတ်ဘဲ ရုပ်ခန္ဓာကိုယ် နယ်ပယ် အဆင့်တက်သည့် ပုံစံနှင့် ပို၍ တူညီနေလေသည်။

သို့သော် ခေတ္တခဏမျှတော့ သူလည်း အပြည့်အဝ အတည်မပြုရဲချေ။ မည်သို့ပင်ဆိုစေ ရုပ်ခန္ဓာကိုယ် နတ်စွမ်းရည်အဆင့် ဆိုသည်မှာ သိုင်းပညာရှင်များ အတွက်တော့ အလွန် ကြီးမားလှသော တံခါးပေါက်ကြီး တစ်ခု ဖြစ်လေသည်။ ယခုခေတ် လူငယ်သိုင်းပညာရှင်များ အကြားတွင် မြောက်ပိုင်းလူရိုင်း မင်းသားလေး ဇာကူမု တစ်ယောက်တည်းသာ ဤအဆင့်သို့ တက်လှမ်းနိုင်ခဲ့သည်ကို သူ မျက်မြင်ကိုယ်တွေ့ မြင်ဖူးခဲ့လေသည်။ အခြား မည်သူ့ကိုမျှ သူ မတွေ့ဖူးခဲ့ချေ။

သေချာသည်ကတော့ ဤသည်မှာ လူငယ်မျိုးဆက်များကိုသာ ရည်ညွှန်းခြင်း ဖြစ်လေသည်။ အကယ်၍ သိုင်းလောက တစ်ခုလုံးရှိ ရုပ်ခန္ဓာကိုယ် နတ်စွမ်းရည်အဆင့် အစွမ်းထက်သူများကို ရေတွက်မည် ဆိုပါက အနည်းအကျဉ်းတော့ ရှာတွေ့နိုင်ဆဲ ပင်ဖြစ်သည်။ ချင်းပြည်နယ်မှ ကျောက်ယွမ်မင် ကဲ့သို့သော သူမျိုး ပင်ဖြစ်သည်။ သူသည် အဝေးအနီး ကျော်ကြားလှသော နတ်စွမ်းရည်အဆင့် မဟာသိုင်းသခင် တစ်ပါး ဖြစ်ပြီး ဝိညာဉ် ကျင့်ကြံမှုတွင်လည်း ထူးချွန်ပြောင်မြောက်သူ ဖြစ်လေသည်။ ထို့ကြောင့်သာ နတ်လက်သီးတစ်စုံဖြင့် ချင်းပြည်နယ်ကို ဖိနှိပ်သူ ဟူသော နာမည်ကောင်းကို ရရှိထားခဲ့ခြင်း ပင်ဖြစ်သည်။

သို့သော် ကျန်းချဲ့ ကတော့...

ကျန်းချဲ့၏ ရုပ်ခန္ဓာကိုယ်မှာ အလွန်တရာ ထူးခြားပြီး နတ်စွမ်းရည်အဆင့် သို့ တက်လှမ်းရန် အကန့်အသတ်သို့ ရောက်ရှိနေပြီ ဖြစ်ကြောင်းကို သူ လက်မခံဘဲ မနေနိုင်သော်ငြား တစ်ဆက်တည်း အဆင့်တက်ခြင်း မျိုးကိုတော့ သူ အနည်းငယ် လက်မခံရဲသေးချေ။

"ဘာဖြစ်လို့လဲ... တာအိုမိတ်ဆွေချီရွှယ်... ရှန်းကျစ် ကို ရှင်းပြပေးလို့ ရမလား..."

ကျောက်ရှန်းကျစ် က အလျင်အမြန် မေးမြန်းလိုက်လေသည်။ ယခုအချိန်တွင် ကျန်းချဲ့၏ အခြေအနေ တစ်ခုခု မှားယွင်းနေမည်ကို သူမ အလွန် စိုးရိမ်နေမိလေသည်။

"ကျုပ် လည်း မသိဘူး... အရင်စောင့်ကြည့်... အရင်စောင့်ကြည့်ကြတာပေါ့..."

ချီရွှယ်မိစ္ဆာသခင် က ခေါင်းရမ်းလိုက်ပြီး သူ၏ အကြည့်များက အရှေ့ဘက်ရှိ ပုံရိပ်ကိုသာ စူးစိုက်ကြည့်နေလေသည်။ နောက်ဆုံးအချိန် မရောက်မချင်း ဤကိစ္စကို သူ အတည်မပြုရဲချေ။

"ဂါး..."

"ဂါး..."

"ဂါး..."

လေဟာနယ် အတွင်းရှိ ကောင်းကင်နှင့် မြေကြီး၏ မူလစွမ်းအင်များ စုစည်းလာသည်နှင့်အမျှ ကျန်းချဲ့၏ ရုပ်ခန္ဓာကိုယ် မှာလည်း ယခုအခါ လျှို့ဝှက်ဆန်းကြယ်သော ပြောင်းလဲမှုများ ဖြစ်ပေါ်လာခဲ့လေသည်။ သူ၏ သွေးသားချီစွမ်းအင်များမှာ ဆူပွက်နေသည့်အလား အဆက်မပြတ် ကြမ်းတမ်းလာပြီး သွေးကြောစိမ်းများလည်း ထောင်တက်လာလေသည်။

အတွင်းကလီစာများ ထဲတွင်လည်း နဂါးဟိန်းသံများ အဆက်မပြတ် ထွက်ပေါ်နေလေသည်။ ရူးသွပ်ကြမ်းတမ်းလှသော ရိုက်ခတ်မှုများကြောင့် ဤအခိုက်အတန့်တွင် သူ့ကိုယ်သူပင် ဘာဖြစ်နေမှန်း နားမလည်နိုင်အောင် ဖြစ်နေရလေသည်။

သို့သော် ဤအခိုက်အတန့် မှာပင်။ ရုတ်တရက်။

အလွန်တရာ လျှို့ဝှက်ဆန်းကြယ်သော စွမ်းအားကြီး တစ်ခုက သူ၏ ရုပ်ခန္ဓာကိုယ် အတွင်းမှ စတင် စိမ့်ထွက်လာပြီး သူ၏ ကိုယ်ခန္ဓာ အတွင်းသို့ ပျော်ဝင်သွားလေသည်။ သွေးတစ်စက်ချင်းစီတိုင်းက ယခုအခါ ကွဲထွက်သွားပြီး ပြန်လည် ပေါင်းစပ် နေကြလေသည်။

အရိုးထဲထိ စိမ့်ဝင်သွားသော နာကျင်မှုကြောင့် ကျန်းချဲ့ပင်လျှင် မျက်မှောင်ကို တင်းတင်း ကြုတ်ထားလိုက်ရလေသည်။ ဝတ်ရုံအောက်ရှိ လက်သီးနှစ်ဖက်ကို အတင်းအဓမ္မ ဆုပ်ထားပြီး သူ၏ ရုပ်ခန္ဓာကိုယ်က လျှို့ဝှက်ဆန်းကြယ်သော ပြောင်းလဲမှု တစ်ခုခုကို ပြုလုပ်နေသည့်အလား ပင်ဖြစ်သည်။ နဂါးပုံစံ နတ်ဘုရား အမှတ်အသားများက အရေပြား ပေါ်တွင် အလိုအလျောက် ပေါ်ထွက်လာလေသည်။

သူ၏ ခန္ဓာကိုယ် အတွင်း၌ စွမ်းအားတစ်ခု လှုပ်ရှားရုန်းကန် နေကြောင်းကိုသာ သူ ခံစားနေရလေသည်။

ဘေးပတ်ဝန်းကျင် တွင်။

ကြောက်မက်ဖွယ်ကောင်းသော မူလစွမ်းအင် လေဝဲဂယက် ကြီးက အပြည့်အဝ ဖန်တီးပြီးစီးသွားခဲ့လေပြီ။ အရွယ်အစားမှာ ပေရာချီ ကြီးမားပြီး လေဆင်နှာမောင်း တစ်ခုအလား အထက် ကောင်းကင်နှင့် အောက် မြေကြီးကို ဆက်စပ်ထားကာ လေပြင်းမုန်တိုင်းများကို ဖြစ်ပေါ်စေပြီး အလွန်တရာ ကြောက်မက်ဖွယ်ကောင်းသော အရှိန်အဝါကို ထုတ်လွှတ်နေလေသည်။

မည်သူ တစ်ဦးတစ်ယောက်၏ ဆွဲငင်မှုမျှ မပါဝင်သလို မည်သည့် တွန့်ဆုတ်မှု လည်း မရှိချေ။ "ဂျိန်း" ဟူသော မိုးကြိုး ပေါက်ကွဲသံ တစ်ချက် နှင့်အတူ။ ရူးသွပ်ကြမ်းတမ်းလှသော ကောင်းကင်နှင့် မြေကြီး၏ မူလစွမ်းအင်များက ကျန်းချဲ့ကို တိုက်ရိုက် လွှမ်းခြုံသွားလေသည်။ အဆုံးအစမရှိသော မူလစွမ်းအင်များက သူ၏ ကိုယ်ခန္ဓာကို ဆေးကြောပေးပြီး သွေးမျိုးဆက်ကို သန့်စင်ပေးနေလေသည်။ နဂါးဟိန်းသံများ၏ ပဲ့တင်ထပ်မှု အောက်တွင် ပြိုင်ဘက်ကင်း မိစ္ဆာသားရဲကြီး တစ်ကောင် လောကသို့ ထွက်ပေါ်လာတော့မည့်အလား ပင်ဖြစ်သည်။

အချိန် မည်မျှ ကြာမြင့်သွားသည် မသိချေ။

သွေးလူသား တစ်ယောက်အဖြစ် ပြောင်းလဲသွားသော ကျန်းချဲ့သည် မျက်လုံးများကို ရုတ်တရက် ဖွင့်လိုက်လေသည်။ မျက်စိကျိန်းစပ်ဖွယ် ကောင်းသော ရွှေရောင် အလင်းတန်းများက ကောင်းကင်နှင့် မြေကြီးကို ရှင်းလင်း ပစ်လိုက်လေသည်။ လက်ကို မြှောက်ကာ လက်သီးတစ်ချက် ထိုးချလိုက်ပြီး သူ၏ မျက်စိရှေ့တွင် စုစည်းနေသော ကောင်းကင်နှင့် မြေကြီး၏ မူလစွမ်းအင်များကို တိုက်ရိုက် ရိုက်ခွဲ ပစ်လိုက်လေသည်။

သူကတော့ လေဟာနယ်ထက်တွင် တောင်လို မတ်မတ် ရပ်တည်နေပြီး တစ်ကိုယ်လုံးမှ ရွှေရောင် အလင်းတန်းများ ဖြာထွက်နေလေသည်။ နတ်ဘုရား တစ်ပါးအလား ပင်ဖြစ်သည်။

'ဒါက ရုပ်ခန္ဓာကိုယ် နတ်စွမ်းရည်အဆင့် ဆိုတာများလား...'

ကျန်းချဲ့ က ခေါင်းငုံ့ကာ မိမိ၏ အခြေအနေကို စစ်ဆေးကြည့်ရင်း ရင်ထဲတွင် ဤ မေးခွန်း ပေါ်ထွက်လာခဲ့လေသည်။ အကယ်၍ အစပိုင်းတွင် သူ အနည်းငယ် နားမလည်နိုင် ဖြစ်ခဲ့လျှင်တောင်မှ ကောင်းကင်နှင့် မြေကြီး၏ မူလစွမ်းအင်များက တစ်ကိုယ်လုံးကို ဆေးကြောပေးပြီးနောက်တွင်တော့ သူ၏ လက်ရှိ အခြေအနေ ထူးခြားမှုကို ကောင်းစွာ သတိပြုမိသွားခဲ့လေပြီ။

ဝိညာဉ်စင်မြင့် အတွင်းရှိ ယွမ်ယင်း ကို မဆိုထားနှင့် ရုပ်ခန္ဓာကိုယ် အတွင်း၌ ပင်လျှင် အလွန်တရာ အစွမ်းထက်သော အားအင် တစ်ခု ကိန်းအောင်းနေသည့်အလား ပင်ဖြစ်သည်။ ယွမ်ယင်း လောက် မစွမ်းနိုင်သော်ငြား လုံးဝ အားနည်းနေခြင်း မရှိချေ။ ရုပ်ခန္ဓာကိုယ်၏ ပြောင်းလဲမှုများနှင့် ပေါင်းစပ် တွေးတော ကြည့်မည်ဆိုလျှင် သူ အလိုအလျောက်ပင် ရုပ်ခန္ဓာကိုယ် နတ်စွမ်းရည်အဆင့် ကို တွေးတောမိလိုက်ခြင်း ပင်ဖြစ်သည်။

သို့သော် သူ ယဇ်ပူဇော်ချိန်တွင် ဤ ပစ်မှတ်ကို မသတ်မှတ်ခဲ့မိသလို ပင်...

အတွေးနက်နေစဉ် ကျန်းချဲ့သည် ယခင် ယဇ်ပူဇော်ခဲ့သော ပစ်မှတ်များကို ပြန်လည် စဉ်းစားကြည့်လိုက်လေသည်။ အထွတ်အမြတ် အစစ်အမှန် နဂါးကျင့်စဉ် အဆင့်သေး ဟူသော ပစ်မှတ်ကို ရုတ်တရက် သတိရသွားလေသည်။

'ငါ ဖန်တီးထားတဲ့ အထွတ်အမြတ် အစစ်အမှန် နဂါးကျင့်စဉ်က ယွမ်ယင်းအဆင့် အတွက် သက်သက် မဟုတ်ဘဲ ရုပ်ခန္ဓာကိုယ်အဆင့် ကိုပါ လွှမ်းခြုံထားတာ များလား... စစ်မှန်တဲ့ နဂါးကျင့်စဉ် အဆင့်သေး ဆိုတာက ငါ့ရဲ့ ရုပ်ခန္ဓာကိုယ်ပါ တိုက်ရိုက် အဆင့်တက် သွားတာကို ဆိုလိုတာ များလား...'

ကျန်းချဲ့ အနေဖြင့် ဤအချက်က ဖြစ်နိုင်ခြေ အများဆုံးဟု ထင်မြင်မိလေသည်။

မည်သို့ပင်ဆိုစေ သူ၏ အထွတ်အမြတ် အစစ်အမှန် နဂါးကျင့်စဉ် မှာ ယခင် ကျင့်ကြံမှုများနှင့် မတူညီဘဲ စစ်မှန်သော နဂါးလျှို့ဝှက်နယ်မြေ အတွင်းမှ မိတ္တူကူးယူခဲ့သော စစ်မှန်သော နဂါးကျမ်းစာ ကို အခြေခံထားခြင်း ဖြစ်လေသည်။ စစ်မှန်သော နဂါးကျမ်းစာ မှာ မိစ္ဆာမျိုးနွယ်စု ထံမှ ဆင်းသက်လာခြင်း ဖြစ်လေသည်။

မိစ္ဆာမျိုးနွယ်စု သည် ရုပ်ခန္ဓာကိုယ် စွမ်းအားကို အဓိက အားထားကြလေသည်။ ဤတစ်ကြိမ် ယဇ်ပူဇော်မှုက မည်သည့်အတွက်ကြောင့် ဤမျှလောက် ခက်ခဲပြီး လူ့လောကတွင် ရှာဖွေရခက်ခဲလှသော စစ်မှန်သော နဂါးရတနာဆေး ကဲ့သို့သော ကောင်းကင်နှင့် မြေကြီး၏ ဝိညာဉ်ရတနာ ကို လိုအပ်ရသနည်း ဆိုသည်မှာ အံ့ဩစရာတော့ မဟုတ်ပေ။ အမှန်တကယ်တော့ အရာအားလုံးက အထွတ်အမြတ် အစစ်အမှန် နဂါးကျင့်စဉ် အလွန်တရာ ကြောက်မက်ဖွယ် ကောင်းလွန်းသောကြောင့် ပင်ဖြစ်သည်။

လေပူတစ်ချက်ကို မှုတ်ထုတ်လိုက်ပြီးနောက် ကျန်းချဲ့၏ ရင်ထဲတွင် စိတ်လှုပ်ရှား ပျော်ရွှင်မှုများ ပေါ်ထွက်လာခဲ့လေသည်။

နတ်စွမ်းရည်အဆင့် သို့ တက်လှမ်းနိုင်ခဲ့ခြင်းမှာ ဤတစ်ကြိမ် ခရီးစဉ်၏ မျှော်လင့်မထားသော အံ့အားသင့်ဖွယ် ဆုလာဘ် တစ်ခု ပင်ဖြစ်သည်။ တစ်ချိန်တည်းမှာပင် သူ၏ အားနည်းချက်ကိုလည်း အပြည့်အဝ ဖြည့်ဆည်းပေးနိုင်ခဲ့လေပြီ။

သိုင်းနှင့် မှော် နှစ်မျိုးစလုံးကို ကျင့်ကြံခြင်းပေတကား။ ဤသည်မှသာ အစစ်အမှန် ဓမ္မရုပ်တု အဆင့် ပင်ဖြစ်သည်။ နတ်စွမ်းရည်... ဓမ္မရုပ်တု...

'ဒါဆို ငါ့ရဲ့ နတ်စွမ်းရည်က ဘာဖြစ်မလဲ...'

ရုပ်ခန္ဓာကိုယ် နတ်စွမ်းရည်အဆင့် ၏ အစစ်အမှန် အမည်မှာ နတ်စွမ်းရည် အလိုအလျောက် ပေါ်ထွက်ခြင်းအဆင့် ပင်ဖြစ်သည်။

နာမည်နှင့် လိုက်ဖက်စွာပင် နတ်စွမ်းရည်အဆင့် သို့ တက်လှမ်းနိုင်ပါက ရုပ်ခန္ဓာကိုယ်မှ ဆင်းသက်လာသော နတ်စွမ်းရည် တစ်ခု အလိုအလျောက် ပေါ်ထွက်လာမည် ဖြစ်လေသည်။ တစ်ချိန်တည်းမှာပင် ၎င်းသည် ရုပ်ခန္ဓာကိုယ် မဟာသိုင်းသခင် တစ်ပါး၏ အစွမ်းထက်ဆုံးသော နည်းလမ်း တစ်ခုလည်း ဖြစ်လေသည်။

ယခင်က မြောက်ပိုင်းလူရိုင်း မင်းသားလေး ဇာကူမု ၏ ပြတ်တောက်သွားသော အင်္ဂါအစိတ်အပိုင်းများ ပြန်လည် ရှင်သန်လာနိုင်စွမ်း က သာမန် မဟာသိုင်းသခင် များကို မျှော်လင့်ချက် ကင်းမဲ့သွားစေရန် လုံလောက်လှပေသည်။ အကယ်၍ သူ၏ ယင်ယန် မိစ္ဆာမီးတောက် များက အဆင့်များစွာ မြင့်တက်ထားပြီး တစ်ဖက်လူ၏ ပြန်လည် ကုစားနိုင်စွမ်းကို အထူး တားဆီးနိုင်ခြင်း မရှိခဲ့ပါက... တစ်ဖက်လူကို အနိုင်ယူရန် အတွက် အခြားသော နည်းလမ်းများစွာကို အသုံးပြုရဦးမည် ဖြစ်လေသည်။

ဤအချက်ကို တွေးမိသောအခါ ကျန်းချဲ့ သည် ဘယ်ဘက် လက်မောင်းကို တိုက်ရိုက် ဆန့်ထုတ်လိုက်လေသည်။ ထို့နောက် ထိပ်တန်း နတ်လက်နက် နှင့် ညီမျှသော ထူးခြားရတနာ ဟွမ်ကူနတ်လှံတံ ကို ထုတ်ယူကာ လက်မောင်း အပေါ်သို့ တိုက်ရိုက် လှီးဖြတ်လိုက်လေသည်။ မပျက်စီးနိုင်သော ရွှေကိုယ်ထည် ကို မသုံးထားသဖြင့် ကျန်းချဲ့၏ ရုပ်ခန္ဓာကိုယ် အပေါ်တွင် ဓားဒဏ်ရာ တစ်ခု ချက်ချင်း ပေါ်လာပြီး သွေးများ ပန်းထွက်လာလေသည်။

သွေးများ စီးကျနေသည့် အရှိန်မှာ အလွန်တရာ နှေးကွေးပြီး တဖြည်းဖြည်း ကုစားနေသော်ငြား... ကျန်းချဲ့ အနေဖြင့် သူ၏ နတ်စွမ်းရည် မှာ ဇာကူမု ကဲ့သို့ ပြတ်တောက်သွားသော အင်္ဂါအစိတ်အပိုင်းများ ပြန်လည် ရှင်သန်လာနိုင်စွမ်း မျိုး မဟုတ်ကြောင်းကို အပြတ်အသတ် ပြောနိုင်လေသည်။

ထို့နောက် ကျန်းချဲ့ သည် အလွန်အမင်း စိတ်ဝင်စားနေသည့်အလား တဖြည်းဖြည်း စမ်းသပ် ရှာဖွေ နေလေတော့သည်။

အမွှေးတိုင်တစ်တိုင်စာ အချိန်ခန့် ကြာပြီးနောက်...

ကျန်းချဲ့၏ တစ်ကိုယ်လုံးရှိ လျှို့ဝှက်အပေါက်များ အားလုံး ပွင့်ဟသွားပြီး သွေးသားချီစွမ်းအင်များက ရုပ်ခန္ဓာကိုယ် အတွင်းမှ တိုက်ရိုက် စီးထွက်လာလေသည်။ သူ၏ ခန္ဓာကိုယ် အတွင်းမှ သွေးသားချီစွမ်းအင်များ လွင့်စင် ထွက်ပေါ်သွားသည် နှင့် တစ်ချိန်တည်းမှာပင် အတွင်းကလီစာများ မှာလည်း ခပ်ဖွဖွ တုန်ခါနေလေသည်။ သွေးထုတ်လုပ်သည့် အရှိန်အဟုန်မှာ အလွန်တရာ လျင်မြန်လှပြီး မျက်စိတစ်မှိတ် အတွင်းမှာပင် ဆုံးရှုံးသွားမှု များကို ပြန်လည် ဖြည့်ဆည်း ပေးလိုက်လေသည်။

သွေးသားချီစွမ်းအင်များ သည် ဆွဲငင်မှု အောက်တွင် ပေတစ်ရာကျော် အရွယ်အစားရှိပြီး ကျန်းချဲ့ နှင့် ကိုးဆယ်ရာခိုင်နှုန်းခန့် တူညီသော ပုံရိပ်ယောင် ကြီး တစ်ခု အဖြစ်သို့ စုစည်းသွားလေသည်။ သို့သော် အဆီအနှစ် သွေးများ စီးထွက်သွားသည် နှင့်အမျှ ထို ပေတစ်ရာကျော် အရွယ် ပုံရိပ်ကြီး မှာလည်း တဖြည်းဖြည်း ပီပြင် လာခဲ့လေသည်။

ကြောက်မက်ဖွယ်ကောင်းသော ဖိအားကြီး တစ်ခုက ဘေးပတ်ဝန်းကျင် သို့ စတင် လွင့်စင် ထွက်ပေါ်သွားလေသည်။

ကျန်းချဲ့ ဤ မြင်ကွင်းကို ကြည့်ရင်း မိမိ၏ ရုပ်ခန္ဓာကိုယ် နတ်စွမ်းရည် က ဘာလဲ ဆိုသည်ကို ချက်ချင်း သဘောပေါက် သွားလေသည်။

သွေးသားချီစွမ်းအင် မှ နတ်ဘုရား အဖြစ် ပြောင်းလဲခြင်း ပေတကား။

တိတိကျကျ ပြောရမည် ဆိုလျှင် သွေးသားချီစွမ်းအင် မှ ဓမ္မရုပ်တု အဖြစ် ပြောင်းလဲခြင်း ပင်ဖြစ်သည်။ အလွန် အစွမ်းထက်သော ရုပ်ခန္ဓာကိုယ် ဓမ္မရုပ်တု တစ်ခု အဖြစ်သို့ တိုက်ရိုက် စုစည်း ဖန်တီးလိုက်ခြင်း ပင်ဖြစ်သည်။

ကျန်းချဲ့ မျက်မှောင် တင်းတင်း ကြုတ်ထားပြီး လက်ရှိ အခြေအနေကို စဉ်းစား တွေးတော နေလေသည်။

'ဒီလိုဆိုမှတော့ ငါက ဓမ္မရုပ်တု နှစ်ခုကို ပိုင်ဆိုင်ထားတာ မဟုတ်ဘူးလား... အစစ်အမှန် နဂါး ဓမ္မရုပ်တု တစ်ခုနဲ့ သွေးသားချီစွမ်းအင် ဓမ္မရုပ်တု တစ်ခု...'

ဤသည်မှာ သူ့ အတွက်တော့ သေချာပေါက် ပြိုင်ဘက်ကင်း လှသော နည်းလမ်း တစ်ခု တိုးလာခြင်း ပင်ဖြစ်သည်။ လိုအပ်သော အချိန်တွင် ရန်သူကို အလွန် ကြီးမားသော အံ့အားသင့်မှု ကြီး တစ်ခု ပေးစွမ်း နိုင်မည် ဖြစ်လေသည်။

ကျန်းချဲ့၏ အတွေးများ အလွန် လျင်မြန်စွာ ဖြတ်ပြေးသွားလေသည်။ လေဟာနယ် ထက်တွင် အရှိန်အဝါ များကို ထုတ်လွှတ် နေသော သွေးသားချီစွမ်းအင် ဓမ္မရုပ်တု နတ်စွမ်းရည် ကို ကြည့်ရင်း ရုတ်တရက် အတွေးတစ်ခု ထပ်မံ ပေါ်ထွက် လာခဲ့လေသည်။

'ဓမ္မရုပ်တုတွေ အချင်းချင်း ပေါင်းစပ်လို့ ရနိုင်မလား... တကယ်လို့ အဲ့ဒီလိုသာဆိုရင် ငါ့ရဲ့ စွမ်းအားတွေ ထပ်ပြီး တိုးလာနိုင်မလား...'

ကျန်းချဲ့ သည် အမြဲတမ်း လက်တွေ့ လုပ်ဆောင် တတ်သူ တစ်ယောက် ဖြစ်လေသည်။ တွေးမိသည် နှင့် ချက်ချင်း စမ်းသပ် ကြည့်မည် ဖြစ်လေသည်။ ယခင် က နည်းလမ်း များစွာ ကဲ့သို့ပင် အမှန်တကယ်တော့ ထိုအရာများ အားလုံးမှာ သူ တဖြည်းဖြည်းချင်း စမ်းသပ် ရှာဖွေ ဖန်တီး ခဲ့သော သတ်ဖြတ်ခြင်း နည်းလမ်းများ ပင်ဖြစ်လေသည်။

အတွေး ပေါ်လာသည် နှင့် ကျန်းချဲ့ သည် အစစ်အမှန် နဂါး ဓမ္မရုပ်တု ကို တိုက်ရိုက် ခေါ်ယူ လိုက်လေသည်။ ဘေးပတ်ဝန်းကျင် ရှိ ကောင်းကင်နှင့် မြေကြီး၏ မူလစွမ်းအင်များ လျင်မြန်စွာ စုစည်း သွားပြီး အနက်ရောင် အစစ်အမှန် နဂါးကြီး တစ်ကောင် အစစ်အမှန် ရုပ်သွင် ပေါ်ထွက် လာကာ ကျန်းချဲ့၏ ဘယ်ဘက် ဘေးတွင် ရစ်ပတ် နေလေသည်။

သူက စိတ်ဆန္ဒ ကို လမ်းပြ အဖြစ် အသုံးပြု ကာ ဓမ္မရုပ်တု နှစ်ခု ကို အတင်းအဓမ္မ ဆွဲငင် လိုက်လေသည်။ နှစ်ခု ၏ အကွာအဝေး မှာ တဖြည်းဖြည်း နီးကပ် လာခဲ့လေသည်။

ဖြည်းညင်းစွာ ပင် ကျန်းချဲ့၏ သွေးသားချီစွမ်းအင် ဓမ္မရုပ်တု နှင့် အစစ်အမှန် နဂါး ဓမ္မရုပ်တု တို့ စတင် ပေါင်းစပ် သွားလေသည်။ ထို သွေးသားချီစွမ်းအင် ဓမ္မရုပ်တု အပေါ်တွင် ယခင် က ကျန်းချဲ့ နဂါး အသွင်ပြောင်း ခဲ့သည့် အတိုင်း ပြောင်းလဲမှု များပင် ပေါ်ထွက် လာခဲ့လေသည်။

ကောင်းကင် ကို ထောက်ထား ပြီး မြေကြီး ကို နင်းထားသည့် အလား ပင်ဖြစ်သည်။ လက်နှစ်ဖက် မှာ နဂါးလက်သည်း များ အဖြစ် ပြောင်းလဲ သွားပြီး ခေါင်းပေါ်တွင် လည်း နဂါးချို များ ပေါက်ရောက် လာလေသည်။

အကြေးခွံ များ တစ်ချပ်ပြီး တစ်ချပ် အစစ်အမှန် ရုပ်သွင် အပေါ်တွင် ပေါ်ထွက် လာပြီး အလွန်တရာ ကြောက်မက်ဖွယ် ကောင်းလှသော အရှိန်အဝါ ကြီး တစ်ခု မျက်စိတစ်မှိတ် အတွင်းမှာပင် လိမ့်တက် ထွက်ပေါ် လာလေသည်။ အဆုံးအစမရှိသော ပင်လယ်ရေ များ ဆူပွက် လာပြီး ပေတစ်ရာကျော် မြင့်မားသော လှိုင်းလုံးကြီး များ အဖြစ် မြင့်တက် လာကာ အစစ်အမှန် ရုပ်သွင် ၏ တစ်ဖက် တစ်ချက်စီ တွင် စုစည်း သွားလေသည်။

လူ ပုံစံ နှင့် သားရဲ ပုံစံ ပေါင်းစပ်ခြင်း... ဓမ္မရုပ်တု နှင့် မူလ ရုပ်သွင် ပေါင်းစပ်ခြင်း ပေတကား။

ဓမ္မရုပ်တု နှစ်ခု ပေါင်းစပ် သွားမှု ကြောင့် ဖြစ်ပေါ်လာသော ဖိအားကြီး မှာ ယခင်က ထက် အဆပေါင်း များစွာ သာလွန် နေသော်ငြား... ဤ အခိုက်အတန့် တွင် ကျန်းချဲ့ သည် လည်း စိတ်ကူး ၍ ပင် မရနိုင် လောက်အောင် ကြီးမားလှသော ဖိအား ကြီး ကို ခံစား လိုက်ရလေသည်။ သွေးကြောစိမ်း များ အဆက်မပြတ် ထောင်တက် လာလေသည်။ လည်ချောင်း အတွင်း တွင် လှုပ်ရှား သွားပြီး ယွမ်ယင်း မှာလည်း တောက်ပသော အလင်းတန်း များ ဖြာထွက် လာလေသည်။

"ဖူး..."

ကျန်းချဲ့ ၏ ပါးစပ်မှ သွေးတစ်လုတ် ပန်းထွက် လာပြီး အရှိန်အဝါ များ လျင်မြန်စွာ စတင် ကျဆင်း သွားလေသည်။ လေဟာနယ် ထက်ရှိ ထို ကြောက်မက်ဖွယ်ကောင်းသော ဓမ္မရုပ်တု ကြီး မှာလည်း မျက်စိတစ်မှိတ် အတွင်းမှာပင် ပြိုကျ ပျက်စီး သွားပြီး ကြောက်မက်ဖွယ်ကောင်းသော ပေါက်ကွဲသံ ကြီး က လေဟာနယ် ကို အက်ကွဲ သွားစေလေသည်။ အလွန်တရာ ထိတ်လန့်ဖွယ် ကောင်းလှသော ရိုက်ခတ်မှု လှိုင်းလုံး ကြီး တစ်ခု မျက်စိတစ်မှိတ် အတွင်းမှာပင် ပေါက်ကွဲ ထွက်ပေါ် လာလေသည်။

ရုတ်တရက် ကျန်းချဲ့ ၏ အောက်ဘက် ရှိ ထို ကျွန်းငယ် လေး မှာ အပြင်းအထန် ရိုက်ခတ် ခြင်းကို ခံလိုက် ရသည့် အလား အက်ကွဲ ပျက်စီး သွားပြီး ဖြည်းညင်းစွာ ရေအောက် သို့ နစ်မြုပ် သွားလေသည်။

တစ်ချိန်တည်း မှာပင် အဝေးမှ ကြည့်ရှု နေကြသော ချီရွှယ်မိစ္ဆာသခင် နှင့် ကျောက်ရှန်းကျစ် တို့ တစ်ပြိုင်နက်တည်း ကျန်းချဲ့ ဆီသို့ အပြေးအလွှား ရောက်ရှိ လာကြလေသည်။ ချီရွှယ်မိစ္ဆာသခင် က ကျန်းချဲ့ ကို တွဲဖက် ထူမ ပေးရန် ရည်ရွယ် ထားသော်ငြား ကျောက်ရှန်းကျစ် က တစ်လှမ်း မြန်သွား ပြီး ကျန်းချဲ့ ကို သူမ ၏ ရင်ခွင် ထဲသို့ တိုက်ရိုက် ပွေ့ဖက် ထားလိုက်လေသည်။

လေးလံ ပြည့်ဖြိုး နေသော ရင်သား များက ကျန်းချဲ့ ၏ မျက်နှာ အပေါ်သို့ ဖုံးလွှမ်း သွားလေသည်။

"မင်းက ဘာ အခြေအနေကြီးလဲ..."

ချီရွှယ်မိစ္ဆာသခင် က တင်ပျဉ်ခွေ ထိုင်နေသော ကျန်းချဲ့ ကို ကြည့်ရင်း အလွန်အမင်း အံ့အားသင့် သံသယ ဖြစ်နေသော မျက်နှာထား ဖြင့် မေးလိုက်လေသည်။

ကျန်းချဲ့ ၏ ဘေးပတ်ဝန်းကျင် ရှိ ကောင်းကင်နှင့် မြေကြီး၏ မူလစွမ်းအင်များ ပျောက်ကွယ် သွားပြီးနောက် ကျန်းချဲ့ အဆင့်တက် သွားသည်မှာ အမှန်တကယ် ပင် ရုပ်ခန္ဓာကိုယ် နတ်စွမ်းရည် အဆင့် ဖြစ်ကြောင်း သူ သိလိုက်ရလေသည်။ မူလ က အနီးသို့ သွားရောက် ကာ ဂုဏ်ပြု စကား ဆိုရန် ရည်ရွယ် ထားခဲ့သော်ငြား သူတို့ မလှုပ်ရှား ရသေးမီ မှာပင်... ကျန်းချဲ့ က တစ်စုံ တစ်ခု ကို စမ်းသပ် နေပုံ ရသည်ကို တွေ့လိုက် ရလေသည်။ မနှောင့်ယှက် လိုသဖြင့် သူ နှင့် ကျောက်ရှန်းကျစ် တို့ နှစ်ယောက် စလုံး လုံးဝ မလှုပ်ရှား ခဲ့ကြချေ။

သို့သော် အချိန် အနည်းငယ် ကြာပြီးနောက် ကျန်းချဲ့ ၏ နောက်ကွယ် တွင် သွေးသားချီစွမ်းအင် များ ကောင်းကင် သို့ ထိုးတက် နေသော ဓမ္မရုပ်တု တစ်ခု စုစည်း ပေါ်ထွက် လာခဲ့လေသည်။ ထုတ်လွှတ် နေသော အရှိန်အဝါ များမှာ ပုံမှန် ဓမ္မရုပ်တု များ နှင့် အနည်းငယ်မျှ ကွာခြား ခြင်း မရှိသဖြင့် အလွန်အမင်း အံ့အားသင့် သံသယ ဖြစ်နေစဉ် မှာပင်... အခြား အစစ်အမှန် နဂါး ဓမ္မရုပ်တု တစ်ခု ထပ်မံ ပေါ်ထွက် လာသဖြင့် သူတို့ နှစ်ယောက် ကို ပို၍ပင် ခေါင်းရှုပ် သွားစေခဲ့လေသည်။

၎င်း ၏ နောက်တွင်တော့ ဓမ္မရုပ်တု နှစ်ခု က အံ့အားသင့်ဖွယ် ပေါင်းစပ် သွားကြပြီး ထုတ်လွှတ် လာသော အရှိန်အဝါ များက ချီရွှယ်မိစ္ဆာသခင် ကိုပင် အလွန်တရာ အံ့အားသင့်ဖွယ် ကောင်းသော အန္တရာယ် ကို ခံစား လိုက်ရစေလေသည်။ ကျောက်ရှန်းကျစ် ပင်လျှင် ထို နောက်ဆုံး ဓမ္မရုပ်တု မှာ သူမ ကို အန္တရာယ် ပေးနိုင်စွမ်း ရှိကြောင်း ခန့်မှန်း အကဲဖြတ် ခဲ့လေသည်။ သူတို့ နှစ်ယောက် အလွန်အမင်း အံ့အားသင့် နေချိန် တွင် ဓမ္မရုပ်တု ကြီး ပြိုကျ ပျက်စီး သွားပြီး ကျန်းချဲ့ မှာလည်း အပြင်းအထန် ရိုက်ခတ် ခြင်းကို ခံလိုက် ရသည့် အလား ပင်ဖြစ်သည်။

ထို့ကြောင့်သာ အလျင်အမြန် ပင် ရှေ့သို့ တိုးလာ ကာ ကျန်းချဲ့ ၏ အနီးသို့ ချဉ်းကပ် လာခဲ့ကြခြင်း ပင်ဖြစ်သည်။ သို့သော် သူ၏ သိချင်စိတ် များကိုတော့ ဆက်လက်၍ မအောင့်အည်း ထားနိုင်တော့ချေ။

'ကျန်းချဲ့ဆီမှာ ဘယ်လိုလုပ်ပြီး ဓမ္မရုပ်တု နှစ်ခု ရှိနေရတာလဲ... ဓမ္မရုပ်တု နှစ်ခုကကော ဘယ်လိုလုပ်ပြီး ရုတ်တရက်ကြီး ပေါင်းစပ်သွားရတာလဲ...'

သူ တကယ်ကို နားမလည် နိုင်အောင် ဖြစ်နေရလေသည်။

လေပူတစ်ချက်ကို မှုတ်ထုတ်လိုက်ပြီးနောက်...

ကုသရေး မှော်ဆေးလုံး တစ်လုံး ကို ချေဖျက် စုပ်ယူ လိုက်ပြီးနောက် ကျန်းချဲ့ သည် အနည်းငယ် ပြဇာတ် ဆန်လွန်း နေသည် ဟု ခံစား လိုက်ရလေသည်။ ယခင် က ချင်းထျန်းမိစ္ဆာဂိုဏ်း ၏ ဓမ္မမင်းကြီး နှစ်ပါး ကို ရင်ဆိုင် ခဲ့စဉ် တုန်းက သူ လုံးဝ ဒဏ်ရာ မရခဲ့သော်ငြား အဆင့်တက် သည့် အချိန် တွင်တော့ အပြင်းအထန် ဒဏ်ရာ ရရှိသွားခဲ့ရလေသည်။

တကယ်ကို... သူ့ကို အလွန်အမင်း ထူးဆန်း လွန်းသည် ဟု ခံစား လိုက်ရစေလေသည်။

ချီရွှယ်မိစ္ဆာသခင် ၏ စကားကို ကြားပြီးနောက် ကျန်းချဲ့ ခေတ္တခဏ မျှ တွေးတော နေပြီး ရှင်းပြ လိုက်လေသည်။

"ဒုတိယ ဓမ္မရုပ်တုက ကျုပ်ရဲ့ ရုပ်ခန္ဓာကိုယ် ကနေ ပေါ်ထွက်လာတဲ့ နတ်စွမ်းရည်ပဲ... ပေါင်းစပ်တာကတော့ ကျုပ် စမ်းသပ်ကြည့်ချင်လို့ လုပ်ကြည့်တာပါ..."

ချီရွှယ်မိစ္ဆာသခင် အတွေးနက် သွားပြီး ကျန်းချဲ့ ကို တစ်ချက် ကြည့်ကာ ပြောလိုက်လေသည်။

"ဓမ္မရုပ်တုတွေ ပေါင်းစပ်တာက အရမ်းကို အန္တရာယ် များလွန်းတယ်... ဒါပေမဲ့ မင်းမှာ ဓမ္မရုပ်တု နှစ်ခု ရှိနေတာကိုတော့ ကျုပ်လည်း ပထမဆုံး အကြိမ် ကြားဖူးတာပဲ... ပေါင်းစပ်ပြီးသွားတဲ့ အချိန်က အရှိန်အဝါတွေက အရမ်း အစွမ်းထက်တယ်... ရှန်ရှန်းအဆင့် နှောင်းပိုင်း မဟာသိုင်းသခင်ကြီး တွေနဲ့ သေချာပေါက် ယှဉ်နိုင်တယ်... နှမြောစရာ ကောင်းတာက ဓမ္မရုပ်တုကြီးက ခံနိုင်ရည် မရှိတော့တာပဲ..."

သူ က ဤ ကိစ္စ အပေါ် အနည်းငယ် နှမြော တသ ဖြစ်နေလေသည်။

ကျန်းချဲ့ ကတော့ ခေါင်းရမ်း လိုက်လေသည်။

"ဓမ္မရုပ်တုကြီးက ခံနိုင်ရည် မရှိတာ မဟုတ်ဘူး... ကျုပ်ကိုယ်တိုင် ခံနိုင်ရည် မရှိတော့တာပါ..."

အကယ်၍ သူ သာ ခံနိုင်ရည် ရှိမည် ဆိုပါက သေချာပေါက် အလွန် အစွမ်းထက်သော လျှို့ဝှက် ဖဲချပ် တစ်ချပ် ထပ်မံ တိုးလာခြင်း နှင့် အတူတူ ပင်ဖြစ်သည်။

'ဒါပေမဲ့ ဓမ္မရုပ်တု နှစ်ခု ပေါင်းစပ်ထားတဲ့ နတ်စွမ်းရည်ကို ဘယ်လို နာမည်ပေးရမလဲ...'

ကျန်းချဲ့ ခေတ္တခဏ မျှ တွေးတော နေပြီး ရုတ်တရက် အတွေး တစ်ခု ပေါ်ထွက် လာခဲ့လေသည်။

'ကောင်းကင်နဲ့မြေကြီး ဓမ္မရုပ်တု...'

"နောက်ဆုံးက ဓမ္မရုပ်တုကြီးက တကယ်ကို သာမန် မဟုတ်ဘူး... တကယ်လို့ မင်းသာ အချိန် အကြာကြီး ထိန်းသိမ်း ထားနိုင်မယ် ဆိုရင်... ငါတောင် မင်းရဲ့ ပြိုင်ဘက် ဖြစ်လာမှာ မဟုတ်တော့ဘူး ထင်တယ်..."

ကျောက်ရှန်းကျစ် ကလည်း ရုတ်တရက် ဝင်ရောက် ထောက်ခံ လိုက်လေသည်။ ဤသည်မှာ သူမ က နှစ်သိမ့် ပေးနေခြင်း မဟုတ်ဘဲ အမှန်တကယ် လက်တွေ့ကျသော အတွေးအမြင် ပင်ဖြစ်သည်။

ကျန်းချဲ့ ခေါင်းညိတ် လိုက်ပြီး ဤ နည်းလမ်း အပေါ် တဖြည်းဖြည်း စိတ်ဝင်စား လာခဲ့လေသည်။

ကျောက်ရှန်းကျစ် ၏ စွမ်းအား များမှာ သံသယ ဝင်စရာ မလိုအောင် အစွမ်းထက် လှပေသည်။ ဓားတာအို မဟာသိုင်းသခင်... တိုက်ခိုက်မှု တွင် ပြိုင်ဘက်ကင်း ပြီး မဟာသိုင်းသခင် များ အကြားတွင် အစွမ်းထက် သူ တစ်ယောက် ဟု သေချာပေါက် ခေါ်ဆို နိုင်လေသည်။ ဝိညာဉ်သခင် အဆင့်သို့ ယခုမှ ခြေချခါစ ဆိုသော ရိုးရှင်းသည့် စံနှုန်း ဖြင့် သူမ ၏ တိုက်ခိုက်မှု စွမ်းအား ကို ဆုံးဖြတ် ၍ လုံးဝ မရနိုင်ချေ။

အကယ်၍ သူ ၏ ဤ နည်းလမ်း ကိုသာ အောင်မြင်စွာ ကျင့်ကြံ နိုင်ခဲ့မည် ဆိုပါက... သိုင်းသူတော်စင် အောက်တွင် ပြိုင်ဘက်ကင်း သည်ဟု ပြောဆိုခြင်းက အနည်းငယ် မာနထောင်လွှား လွန်းရာ ကျသော်ငြား... ပြည်နယ် တစ်ခုလုံး တွင် လွတ်လပ်စွာ လမ်းလျှောက် နိုင်ရန် အတွက်တော့ သေချာပေါက် ပြဿနာ မရှိနိုင်တော့ချေ။