အခန်း ၁၃၆၄

အခန်း ( ၁၃၆၄ ) ဝမ့်မန်ကို လက်ဝါးတစ်ချက်တည်းဖြင့် သုတ်သင်ခြင်း။

ဤစကားများကို သူပြောပြီးသည်နှင့်တပြိုင်နက် လူအားလုံး၏ အမူအရာများ ပြောင်းလဲသွားကြသည်။

ဝမ့်မန်က ဝမ့်ယန်ကဲ့သို့ မသန်မာသော်လည်း နာမည်ကျော်ကြားသူတစ်ဦး ဖြစ်နေဆဲပင်။

သူက ဧကရာဇ်ကြွေလွင့်တောင်၏ လူသိများသော ပါရမီရှင်တစ်ဦး ဖြစ်သည်။

တားမြစ်နယ်မြေရှိ လူတစ်ဦးအနေဖြင့် သူသွားလေရာရာ၌ ပရိသတ်အပေါင်း၏ အာရုံစိုက်မှုကို ဆွဲဆောင်နိုင်ပေသည်။

သို့သော်လည်း ယခုအချိန်တွင် သူက အမှန်တကယ်ပင် မထီမဲ့မြင်ပြုခြင်း ခံနေရသည်။

"အတင့်ရဲလိုက်တာ၊ သခင်လေးဝမ့်မန်က ဧကရာဇ်ကြွေလွင့်တောင်ကနေ ဆင်းသက်လာတဲ့အပြင် သခင်လေးဝမ့်ယန်ရဲ့ မျိုးရိုးကဆိုတာ သိရဲ့လား"

လုချင်းက ဝင်ရောက်အော်ငေါက်လိုက်သည်။

ကျွင်းရှောင်ယောက်က ဘာမျှမပြောဘဲ လုချင်းကို တစ်ချက်လှည့်ကြည့်၏။

"ဝုန်း"

လုချင်းလည်း ကြောက်စရာကောင်းသော ဖိအားတစ်ခုကို ရုတ်တရက် ခံစားလိုက်ရတော့သည်။

ထိုခံစားချက်သည် နတ်ဘုရား၏ စောင့်ကြည့်ခြင်းခံနေရသည့် ပုရွက်ဆိတ်တစ်ကောင်ကဲ့သို့ပင် ဖြစ်သည်။

လုချင်း၏ မျက်နှာက သွေးဆုတ်ဖြူရော်သွားသည်။ ရေခဲဂူထဲ ပြုတ်ကျသွားသကဲ့သို့ ကျောရိုးထဲထိ အေးစက်မှုကို ခံစားလိုက်ရပေသည်။

“နင်... နင်..."

လုချင်းက တစ်ခုခုကို ပြောလိုသော်လည်း အသံမထွက်နိုင်တော့ပေ။

လုချင်းသည် ထိပ်တန်းပါရမီရှင် မဟုတ်သော်လည်း တားမြစ်မိသားစု၏ ပါရမီရှင်တစ်ဦးအဖြစ် ရှိနေဆဲဖြစ်သည်။

သို့တိုင်၊ အကြည့်တစ်ချက်ဖြင့် ဤမျှတုန်လှုပ်စေခြင်းက မည်သို့သောအဓိပ္ပာယ်ဖြစ်သနည်း။

သို့သော်လည်း ကျွင်းရှောင်ယောက်က လုချင်းကို တစ်ချက်သာကြည့်ပြီး အကြည့်လွှဲလိုက်သည်။

သူ့မျက်လုံးထဲတွင် ဤလူများက ပုရွက်ဆိတ်များကဲ့သို့ဖြစ်ပြီး အာရုံစိုက်ရန် မထိုက်တန်ပေ။

"ဧကရာဇ်ကြွေလွင့်တောင်၊ ဝမ့်ယန်ရဲ့ မျိုးရိုးက လူ"

ကျွင်းရှောင်ယောက်၏ လေသံက အေးစက်၍ ရယ်လိုခြင်းများ ပြည့်နေသည်။

အထက်ကောင်းကင်ကိုးပါးသို့ သူရောက်လာသည်မှာ မကြာသေးသော်လည်း ဧကရာဇ်ကြွေလွင့်တောင်မှ ပါရမီရှင်တစ်ဦးကို တွေ့နေရပြီ။

ရန်သူများအတွက် လမ်းက အမှန်တကယ် ကျဉ်းမြောင်းသည်။

ဝမ့်မန်သာ သူ၏ဇာစ်မြစ်နှင့် သူက မည်သူမည်ဝါဖြစ်ကြောင်း မဖော်ပြပါက ကျွင်းရှောင်ယောက်သည် ဤပုရွက်ဆိတ်အုပ်စုကို လက်ပါရန် အလွန်ပျင်းနေပေမည်။

သို့သော်၊ ယခုအခါမှာတော့...

"အမှန်ပဲ၊ မင်းက ငါတို့ရဲ့မူလကို သိပြီဆိုရင် ငါ့ဧကရာဇ်ကြွေလွင့်တောင်ရဲ့ သားကောင်ကို ခိုးယူဖို့ ကြိုးစားနေမိပြီဆိုတာ မင်းသိသင့်တယ်"

"မင်းက ဘယ်တားမြစ်နယ်မြေကပဲလာလာ ငါဂရုမစိုက်ဘူး၊ ငါ့ဧကရာဇ်ကြွေလွင့်တောင်ကို မျက်နှာသာပေးရမယ်"

ဝမ့်မန်က ပြောလိုက်သည်။

သို့ရာတွင်၊ ယင်းက မည်သို့သော ကပ်ဘေးမျိုးကို ယူဆောင်လာမည်ဖြစ်မှန်း သူ မသိခဲ့ပေ။

"ဧကရာဇ်ကြွေလွင့်တောင်က တကယ်ကို ကြီးစိုးတာပဲ"

ကျွင်းရှောင်ယောက်က အပြောင်းအလဲမရှိသော အမူအရာဖြင့် ပြောလိုက်သည်။

ဝမ့်မန်၏ နှုတ်ခမ်းများက တွန့်ကွေးသွားသည်။ အေးစက်မှုနှင့် ဂုဏ်ယူဝံ့ကြွားမှု အရိပ်အယောင်တို့ ပေါ်လာ၏။

ခွန်အားရှိမှသာလျှင် ကြီးစိုးရန် အရည်အချင်းပြည့်မီနိုင်မည် ဖြစ်သည်။

တစ်ဖက်မှာတော့ ယောက်အာနှင့် အခြားသူများက စိုးရိမ်ပူပန်သွားပုံရသည်။

တားမြစ်နယ်မြေတစ်ခုက မည်မျှကြောက်စရာကောင်းကြောင်း သူတို့ သဘာဝအတိုင်း သိ၏။

ကျွင်းမိသားစုမှ ဤလူငယ်လေးက ဒါကို ကိုင်တွယ်ဖြေရှင်းနိုင်ပါ့မလား။

ကျွင်းရှောင်ယောက်က ခွန်းတုံ့မပြန်တော့ပေ။ ရိုးရှင်းသော လက်ဝါးတစ်ချက်ဖြင့်သာ ဖြေကြားပေးလိုက်သည်။

ဝမ့်မန်ကို မဆိုထားဘိ... ဝမ့်ယန်ပင်လျှင် သူ့မျက်လုံးထဲမှာ ထိုမျှသာ။

ဝမ့်မန် အံ့ဩသွားသည်။

သူ၏ အထောက်အထားကို ထုတ်ဖော်ပြီးသည့်တိုင် လျှို့ဝှက်ဆန်းကြယ်သော ဤလူငယ်က ကြောက်ရွံ့ခြင်း သို့မဟုတ် တုန်လှုပ်ချောက်ချားခြင်း မရှိခဲ့ပေ။

"အတင့်ရဲလိုက်တာ"

ဝမ့်မန်က ဧကရာဇ်ကြွေလွင့်တောင်၏ အထူးနည်းလမ်းကို အသက်သွင်းလိုက်သည်။ သူ့ထံမှ အကန့်အသတ်မဲ့သော ရောင်ဝါတစ်ခု ထွက်ပေါ်လာ၏။

သူက ဖျက်ဆီးခြင်း၏ အင်အားကို သယ်ဆောင်ထားသော တံ‌ဆိပ်တော်တစ်ခုကို ဖန်တီးလိုက်ခြင်း ဖြစ်သည်။

၎င်းက ဧကရာဇ်ကြွေလွင့်တောင်၏ အထူးနည်းလမ်းဖြစ်သော 'ဧကရာဇ်ကြွေလွင့် တံဆိပ်တော်'ပင်။

ခဏချင်းမှာပင် ပတ်ဝန်းကျင်ရှိ မိုးနှင့်မြေက ဧကရာဇ်တစ်ပါး ကျဆုံးခြင်း၏ နိမိတ်ပုံရိပ်များကဲ့သို့ သွေးများလွှမ်းခြုံကာ ငိုကြွေးသံများ ပဲ့တင်ထပ်လာခဲ့ရသည်။

"တားမြစ်နယ်မြေတစ်ခုရဲ့ သခင်လေးတစ်ပါးက မျှော်လင့်ထားတဲ့အတိုင်းပဲ"

လုချင်း၏ လှပသော မျက်လုံးများက လင်းလက်တောက်ပလာသည်။

ဝမ့်မန်က အလွန်သန်မာသည်။

သို့ဆိုလျှင်၊ ဝမ့်မန်ထက် များစွာ ပိုသန်မာသော ဝမ့်ယန်က မည်မျှ စွမ်းအားကြီးမည်နည်း။

သို့သော်လည်း ကျွင်းရှောင်ယောက်၏ မျက်လုံးများက အစမှဆုံးထိ မပြောင်းလဲခဲ့ပေ။

သူ၏ လက်ဝါးက ရုတ်တရက် ပြောင်းလဲသွားပြီး တံဆိပ်တော်တစ်ခု ပေါ်လာခဲ့သည်။

အဆုံးမဲ့ နိယာမ စွမ်းအားက ရောယှက်လျက် ဧရာမ ခေါင်းလောင်းကြီးတစ်လုံး၏ မှုန်ဝါးဝါး အသွင်သဏ္ဍာန်အဖြစ် ပေါ်လာသည်။ ၎င်းက မိုးနှင့်မြေကိုပင် ဖိနှိပ်ထားနိုင်ပုံရ၏။

သို့သော်လည်း ထို့ထက်ပို၍ အံ့ဩစရာကောင်းသောအရာက ရှိသေးသည်။

ကျွင်းရှောင်ယောက်က တံဆိပ်တော်ကို ထုတ်ဖော်လိုက်သည်နှင့် တပြိုင်နက်...

အဆုံးမဲ့ချောက်နက် တစ်ခုလုံးကို ဝန်းရံထားသည့် အဆုံးမဲ့သတ်ဖြတ်ခြင်း အစီရင်က စွမ်းအားတစ်မျိုးမျိုးဖြင့် စတင်လည်ပတ်လာတော့သည်။

ရုတ်တရက်၊ ခေါင်းလောင်း၏ တုန်ခါမှုစွမ်းအားက ရှေးဟောင်းတောင်ကြီး တစ်လုံးကဲ့သို့ ဝမ့်မန်ကို ဖိချလိုက်သည်။

ဝမ့်မန်၏ မျက်လုံးများက မထင်မှတ်မှု အရိပ်အယောင်တို့ ပေါ်လာပြီး သူ့ခန္ဓာကိုယ်မှာလည်း တုန်ခါသွားတော့သည်။

ဒါက ကျွင်းရှောင်ယောက်၏ ခွန်အားကြောင့်သာမကပေ။

ကျွင်းရှောင်ယောက်၏ အငွေ့အသက်ကြောင့်လည်း ပါသည်။

"မင်းက အထက်ကောင်းကင်ကိုးပါက မဟုတ်ဘူး၊ အဲဒီ အငွေ့အသက်က..."

ဝမ့်မန်က အလွန်တုန်လှုပ်သွားသည်။

ဒီလူက ဘယ်သူလဲ။ သူ့ရဲ့ တိုက်ခိုက်မှုက အဆုံးမဲ့သတ်ခြင်းအစီရင်နဲ့ အမှန်တကယ် ပဲ့တင်ထပ်နိုင်တယ်။

ယခင်က ကျွင်းရှောင်ယောက်ဟာ သူ၏ အငွေ့အသက်များကို မထုတ်ပြခဲ့ပေ။

ယခုတော့ သူ လှုပ်ရှားလိုက်ပြီးနောက် ထူကျန့်၊ ကျင်းယု၊ လုချင်းနှင့် အခြားသူများက သူသည် ‌ကောင်းကင်ကိုးပါးမှမဟုတ်ကြောင်း ချက်ချင်း သဘောပေါက်သွားခဲ့သည်။

ထို့ထက် တားမြစ်နယ်မြေတစ်ခု၏ ပါရမီရှင်တစ်ဦးဖြစ်ရန်မှာ ပို၍ပင် မဖြစ်နိုင်တော့ပေ။

သို့သော်လည်း ယခုအချိန်မှာတော့ သူတို့ အံ့ဩရန်ပင် အချိန်မရှိတော့ပါ။

ကျွင်းရှောင်ယောက်က အဆုံးမဲ့တံဆိပ်တော်ကို တိုက်ရိုက် ထုတ်ဖော်လိုက်ခြင်း ဖြစ်သည်။

ကျွင်းရှောင်ယောက်၏ အဆုံးမဲ့တံဆိပ်တော်ရှေ့တွင် ဝမ့်မန်၏ ဧကရာဇ်ကြွေလွင့်တံဆိပ်တော်က ခဏချင်း ပြိုကျသွားသည်။

ဒါက ဤနတ်ဘုရားစွမ်းရည်မှာ အစွမ်းမထက်ခြင်းကြောင့် မဟုတ်ပေ။ ဝမ့်မန်က ကျွင်းရှောင်ယောက်အတွက် အားနည်းလွန်းခြင်းသာ ဖြစ်သည်။

အကယ်၍ ဝမ့်ယန်က ဤလှုပ်ရှားမှုကို အသုံးပြုခဲ့လျှင် ၎င်း၏ စွမ်းအားက ဆယ်ဆ ပိုမိုအားကောင်းလာပေမည်။

"ဝုန်း"

ပုံရိပ်ယောင်ခေါင်းလောင်းကြီးကလည်း ဝမ့်မန်ကို ဖိချလိုက်သည်။

ရလဒ်ကတော့ စိုးထိတ်စရာ လုံးဝ မရှိတော့ပါ။

ဝမ့်မန်၏ ခန္ဓာကိုယ်က ပေါက်ကွဲသွားပြီး သူ၏ ရှေးဦးဝိညာဉ်လည်း တိုက်ရိုက် ပျက်စီသွားခဲ့သည်။

တားမြစ်နယ်မြေရှိ ပါရမီရှင်တစ်ဦး ကျဆုံးသွားပြီ။

ထူကျန့်၊ ကျင်းယု၊ ကျိမင်ဖုန်း၊ လုချင်းနှင့် တားမြစ်မိသားစုများ၏ အခြားပါရမီရှင်များအားလုံး ကြက်သေသေသွားကြသည်။

တားမြစ်နယ်မြေရဲ့ လူတစ်ယောက်ကို တကယ် သတ်ဝံ့သူရှိတာလား။

ထို့ပြင် သူက အထက်ကောင်းကင်ကိုးပါးမှ မဟုတ်ပါ။

ကောင်းကင်ကိုးပါးမှ မဟုတ်ပါက အခြေခံအားဖြင့် အင်မော်တယ်နယ်မြေကြီးမှ ဆင်းသက်လာခြင်း ဖြစ်သည်။

အင်မော်တယ်နယ်မြေကြီးမှ ကျင့်ကြံသူက ကောင်းကင်ကိုးပါးရှိ အသက်တားမြစ်နယ်မြေမှ ပါရမီရှင်တစ်ဦးကို သတ်ဝံ့သည်။

ဒါက သေမင်း၏နားရွက်ကို တံတွေးဆွတ်ခြင်းပင်။

"မင်းကဘယ်သူလဲ။ မင်း ဧကရာဇ်ကြွေလွင့်တောင်ရဲ့သခင်လေးကို ဘယ်လိုတောင် သတ်ဝံ့တာလဲ"

ကျိမင်ဖုန်း၏ မျက်လုံးအိမ်များ တုန်လှုပ်သွားကြသည်။

သူတို့က သံပြားကို ကန်မိပြီ။

"မင်း ဘယ်သူပဲဖြစ်ဖြစ် တားမြစ်နယ်မြေက သခင်လေးကိုသတ်ရင် ဘယ်သူမှ မင်းကိုမကယ်နိုင်ဘူး"

ကျင်းယုကလည်း တုန်လှုပ်သော လေသံဖြင့် ပြောလိုက်သည်။

သူတို့က မတုံးပေ။

လျှို့ဝှက်ဆန်းကြယ်သော ဤလူက ဝမ့်မန်ကိုပင် သတ်နိုင်တာကြောင့် သူတို့ကို သဘာဝအတိုင်း အလွယ်တကူ သတ်နိုင်သည်။

ထို့ပြင်၊ ယခုလေးတင် ကျွင်းရှောင်ယောက်၏ တိုက်ခိုက်မှုက အဆုံးမဲ့သတ်ဖြတ်ခြင်းအစီရင်ကို လှုပ်ရှားစေခဲ့သည် မဟုတ်လော။

ဒါက သူတို့ကို ပိုလို့တောင် ထိတ်လန့်စေသည်။

ဤလူငယ်က မည်သူနည်း။

ထိုစဉ်...

အလှမ်းဝေးသောအရပ်မှ လေထဲတွင် အနက်ရောင် စစ်သင်္ဘောတစ်စင်းက ပေါ်လာသည်။

သင်္ဘောပေါ်မှာလည်း လူငယ်တစ်ယောက်က မတ်တပ်ရပ်လျက် လိုက်ပါလာ၏။

သူ၏ မျက်ခုံးနှစ်ခုကြားမှာတော့ ရှေးဟောင်းသားရဲပုံစံအချို့နှင့် ဆင်တူသည့် အမှတ်အသားတစ်ခု ရှိနေသည်။

"စိတ်ဝင်စားစရာပဲ၊ တကယ်ကို စိတ်ဝင်စားဖို့ကောင်းတယ်။ အရင်က သက်ရှိဆေးတွေကို လိုက်ရှာပြီး နတ်သမီး လျိုချုံးယန်ကို ပေးချင်ခဲ့တာ..."

“ဒါပေမယ့် ဒီလိုမျိုး စိတ်ဝင်စားစရာကောင်းတဲ့ မြင်ကွင်းကို မြင်ရမယ်လို့ မမျှော်လင့်ထားဘူး"

စစ်သင်္ဘောကုန်းပတ်ပေါ်တွင် ရပ်နေသော လူငယ်က စူးရှသော မျက်လုံးများဖြင့် ကျွင်းရှောင်ယောက်ကို ကြည့်လိုက်သည်။

တစ်ဖက်မှာတော့ ကျင်းယု၊ ကျိမင်ဖုန်း၊ လုချင်းနှင့် အခြားသူများက ဤလူငယ်လေးကို တွေ့လိုက်သောအခါ အံ့အားသင့်သွား၏။

ထို့နောက် ထူမိသားစု၏ ပါရမီရှင် ထူကျန့်က ဆောလျင်စွာ ဦးညွတ်ပြီး ပြောလိုက်သည်။

"ဘုရင်ငယ် ရှားဘုရင်ပဲ၊ ခင်ဗျားကိုယ်တိုင် ကြွရောက်လာမယ်လို့ မမျှော်လင့်ထားဘူး"

ထူမိသားစု၏ နောက်ကွယ်မှ အင်အားစုက အသက်တားမြစ်နယ်မြေ ဆယ်ခုထဲမှ နာမည်ဆိုးဖြင့်ကျော်ကြားသော ရှေးဟောင်းတားမြစ်နယ်မြေ ဖြစ်သည်။

သားရဲဂူက ရှေးကျပြီး ရက်စက်ကြမ်းကြုတ်သော သားရဲများ၏ ရှေးဟောင်းအမွေအနှစ်နယ်မြေတစ်ခု ဖြစ်ပေသည်။

သွေးသန့်စင်သည့် ရှေးဟောင်းသားရဲများကို အင်မော်တယ်နယ်မြေကြီးတွင် တွေ့ရခဲရသည့် အကြောင်းရင်းမှာ...

သူတို့က အထက်ကောင်းကင်ကိုးပါးတွင် ကိုယ်ပိုင် တားမြစ်နယ်မြေတစ်ခုကို ထူထောင်ပြီး နေထိုင်ခဲ့သောကြောင့် ဖြစ်သည်။

ထိုတားမြစ်နယ်မြေက 'သားရဲဂူ'ပင်။

မျက်မှောက်ခေတ်၏ သားရဲဂူတွင် အထူးချွန်ဆုံး ပါရမီရှင်လေးဦး ရှိသည်။ ၎င်းတို့ကို သားရဲဂူ၏ ဘုရင်လေးပါးဟု ခေါ်ဆိုကြပေသည်။

သူတို့ရှေ့မှ ‌လူငယ်ကတော့ ဘုရင်ငယ်လေးပါးအနက် ရှားဘုရင် ဖြစ်သည်။