အခန်း ၁၃၉၀

အခန်း ( ၁၃၉၀ ) ပါရမီရှင်သုံးယောက်နှင့် တိုက်ပွဲ။

"တကယ်လို့ အာဒိကပ္ပတာအိုခန္ဓာ ပေါ်လာရင်လည်း မင်းကို အလွယ်တကူ ဖိနှိပ်နိုင်မှာ သေချာပါတယ်"

ဝမ့်ယန်က အေးစက်စွာ ပြောလိုက်သည်။

သူ့လက်ဝါးများ လှုပ်ရှားလာသည်နှင့်အမျှ ခရမ်းရောင်စွမ်းအင်များကလည်း ပိုအားကောင်းလာ၏။

၎င်းက တွင်းနက်ကြီးမှ ထွက်ပေါ်လာသော လက်တံများကို ပိတ်ဆို့ဟန့်တားလိုက်တော့သည်။

"အာဒိကပ္ပတာအိုခန္ဓာဆိုရင်လည်း ငါ့ကို နည်းနည်းလောက်ပိုပြီး လေးနက်စေရုံပဲရှိလိမ့်မယ်"

ကျွင်းရှောင်ယောက်က အေးဆေးတည်ငြိမ်စွာ ပြောလိုက်သည်။

သူ၏ ကစဉ့်ကလျားခန္ဓာက ကစဉ့်ကလျား မိုးပြာရောင်ကြာပန်းဖြစ်သော်လည်း...

၎င်းနှင့် စစ်မှန်သော ကစဉ့်ကလျားခန္ဓာကြားတွင် ကွာခြားမှုမရှိပေ။

ကစဉ့်ကလျားနတ်ခန္ဓာက အာဒိကပ္ပတာအိုခန္ဓာနှင့် အဆင့်တူသော ထိပ်တန်း တာအိုခန္ဓာတစ်ခု ဖြစ်သည်။

ထို့ပြင်၊ သူ၏ မြင့်မြတ်ခန္ဓာတာအိုသန္ဓေကိုလည်း လျှော့တွက်မရပေ။

အကယ်၍ စစ်မှန်သော မြင့်မြတ်ခန္ဓာတာအိုသန္ဓေအဖြစ် ပြောင်းလဲသွားပါက၊ အာဒိကပ္ပတာအိုခန္ဓာ၊ ကစဉ့်ကလျားနတ်ခန္ဓာနှင့် ထာဝရအင်မော်တယ်ခန္ဓာတို့ထက် အားနည်းမည်မဟုတ်ပါ။

"မင်းက တော်တော်မောက်မာတာပဲ၊ ဒီလိုဆိုမှတော့ မင်းကို အာဒိကပ္ပခရမ်းရောင်ချီရဲ့ စွမ်းအားကို ငါ ခံစားခွင့်ပေးလိုက်မယ်"

ဝမ့်ယန်က အေးစက်စွာ ပြောလိုက်သည်။ ခရမ်းရောင်မီးတောက်များက ခရမ်းရောင်အလင်းကဲ့သို့ စူးရှစွာ တောက်ပနေ၏။

"ခရမ်းရောင်ချီက အရှေ့ဘက် မိုင်သုံးထောင်မှ လာတယ်"

ဝမ့်ယန်က အာဒိကပ္ပ ခရမ်းရောင်ချီ၏ စွမ်းအားကို လှုံ့ဆော်လိုက်သည်။

အားကောင်းသော ခရမ်းရောင်စွမ်းအင်က မြင့်တက်လာပြီး ခရမ်းရောင်နဂါးကြီးအဖြစ် ပြောင်းလဲသွားသည်။

နဂါးကြီး၏ ကိုယ်ထည်က တောင်လုံးတမျှ ကြီးမား၏။

ခရမ်းရောင် အ‌ကြေးခွံများကလည်း ကျစ်လျစ်ပြီး သက်ရှိနဂါးတစ်ကောင်ကဲ့သို့ အသေးစိတ်လှသည်။

ခရမ်းရောင် နဂါးကြီးက ဟိန်းဟောက်လိုက်သောအခါ အင်မော်တယ်ဂူတစ်ခုလုံး တုန်ခါသွားတော့သည်။

"ဒါက အာဒိကပ္ပခရမ်းရောင်ချီရဲ့ စွမ်းအားလား"

ဝမ့်ယန်၏ လှုပ်ရှားမှုကို မြင်သောအခါ ယွင်ထျန်းမေ၊ လျိုချုံးယန်၊ ရှုံးဝမ်နှင့် အခြားသူများအားလုံး တုန်လှုပ်သွားကြသည်။

ဝမ့်ယန်က အမှန်တကယ်ပင်‌ ကောင်းကင်ကိုးပါး၏ ထိပ်တန်းပါရမီရှင်တစ်ဦး ဖြစ်ထိုက်သည်။

ဤလှုပ်ရှားမှုတစ်ခုတည်းက ကောင်းကင်နဂါးနှင့် ဖီးနစ်စာရင်းရှိ ပါရမီရှင်များစွာကို ဖိနှိပ်ရန် လုံလောက်ပေသည်။

"ဝမ့်ယန်သာ ဒီအဆင့်စာရင်းကို အလေးအနက်ထားရင် သူ့အဆင့်က မနိမ့်ကျမှာ သေချာတယ်"

လျိုချုံးယန်က ရေရွတ်လိုက်သည်။

"ကျွင်းသခင်လေး..."

ယွင်ထျန်းမေက စိုးရိမ်ပူပန်လာ၏။

သူက ကျွင်းရှောင်ယောက်၏ခွန်အားကို ယုံကြည်သော်လည်း စိုးရိမ်ပူပန်မှုကို ဖယ်ရှားမရနိုင်ပေ။

ယွင်ထျန်းမေက သူကိုယ်တိုင် သတိမပြုမိခင်မှာ...

ကျွင်းရှောင်ယောက်ကို ဂရုစိုက်မိနေပြီ ဖြစ်သည်။

"မဆိုးပါဘူး"

"ဒါပေမဲ့ မင်းရဲ့ လက်ရှိအခြေအနေနဲ့ ငါ့ကို ရင်ဆိုင်နိုင်မယ်လို့ထင်ရင် နည်းနည်းနုံအနေသေးတယ်"

ကျွင်းရှောင်ယောက်က အရာအားလုံးကို ဖောက်မြင်နေရဟန်ဖြင့် လှောင်ပြောင်လိုက်သည်။

"ဟမ်"

ဝမ့်ယန်က မျက်မှောင်ကြုတ်လိုက်၏။

ကျွင်းရှောင်ယောက်က အဲဒါကို မြင်လိုက်ရတာလား။

ကျွင်းရှောင်ယောက်က သူ့လက်ကိုမြှောက်လိုက်သောအခါ ခေါင်းလောင်းကြီးတစ်ခုလုံး ပေါ်လာသည်။ ၎င်းကို နိယာမစွမ်းအားဖြင့် ဖန်တီးထားခြင်းဖြစ်ပြီး အရာအားလုံးကို ဖြိုခွင်းနိုင်ပုံရ၏။

"အဆုံးမဲ့တံဆိပ်တော်"

ဝမ့်ယန်၏ မျက်လုံးများက အရောင်ပြောင်းသွားသည်။

အဆုံးမဲ့ဧကရာဇ်က ကောင်းကင်ကိုးပါးအပေါ် လေးနက်သော သြဇာလွှမ်းမိုးမှုရှိသည်ဟု ဆိုနိုင်သည်။

ပြန်လည်ဝင်စားခြင်းပင်လယ်၏ အကျော်အမော်ကြီးတစ်ဦးပင်လျှင် အဆုံးမဲ့ဧကရာဇ်ကြောင့် ပြင်းထန်စွာ ဒဏ်ရာရခဲ့ပြီး ထိုအချိန်ကတည်းက အိပ်စက်နေခဲ့သည်။

ယခုတော့ ကျွင်းရှောင်ယောက်က အဆုံးမဲ့ဧကရာဇ်၏ ဆက်ခံသူ အထောက်အထားဖြင့် ကောင်းကင်ကိုးပါးသို့ ရောက်ရှိလာပြီ။

ဒါက ကောင်းကင်ကိုးပါးမှ အားလုံးကို စိန်ခေါ်လိုက်ခြင်း ဖြစ်သည်။

"ဝုန်း"

ကျွင်းရှောင်ယောက်က အဆုံးမဲ့တံဆိပ်တော်ကို ဖန်တီးပြီး ဧရာမခေါင်းလောင်းကြီးဖြင့် နဂါးကြီးဆီသို့ ဖိနှိပ်လိုက်သည်။

ခရမ်းရောင်နဂါးကြီးက ဟိန်းဟောက်လိုက်သည်။ ခရမ်းရောင် တိမ်တိုက်များကလည်း မြင့်တက်လာပြီး စွမ်းအားက ပိုကြီးလာ၏။

သို့သော်လည်း ဧရာမခေါင်းလောင်းကြီးကြောင့် ပြင်းထန်စွာ ဖိအားပေးခံနေရဆဲပင်။

ကျွင်းရှောင်ယောက်က အဆုံးမဲ့ မဟာဧကရာဇ်၏အလိုတော် ပြန်ပေါ်လာသကဲ့သို့ ကောင်းကင်ကိုးပါး၏ ပါရမီရှင်များကို ဖိနှိပ်ချင်နေသည်။

တစ်ဖက်တွင်၊ ဟွမ်နျဲ့တောက်နှင့် ကျောက်ဧကရာဇ်လေးတို့ကလည်း တစ်ခုတည်းသောတွင်းနက်မှ ထွက်ပေါ်လာသော လက်တံများကို ဖြတ်ကျော်ခဲ့ကြသည်။

အင်မော်တယ်မီးလျှံက ဟွမ်နျဲ့တောက်၏ ခန္ဓာကိုယ်တစ်ခုလုံးတွင် လောင်ကျွမ်းသွား၏။ ဖီးနစ်တောင်ပံများက ကောင်းကင်နှင့်မြေပြင်ကို ခွဲထွက်နိုင်ပုံရသည့် ကောင်းကင်ဓားကဲ့သို့ ခုတ်ထစ်လာတော့သည်။

"အင်မော်တယ်ဖီးနစ်ခုတ်ချက်"

ဤသည်မှာ ဟွမ်နျဲ့တောက်၏ အဆုံးစွန်နည်းလမ်းတစ်ခု ဖြစ်သည်။ အနက်ရောင် အင်မော်တယ်မီးလျှံဖြင့် ဖုံးအုပ်ထားသော ဖီးနစ်တောင်ပံများက ကောင်းကင်ဓားများကဲ့သို့ဖြစ်ပြီး အဆုံးမရှိလောင်ကျွမ်းနိုင်သော စွမ်းအားကို သယ်ဆောင်ထား၏။

ကျောက်ဧကရာဇ်လေးကလည်း သူ့လက်ကိုမြှောက်လိုက်သောအခါ မီးခိုးရောင် လှံပုဆိန်တစ်လက် ပေါ်လာတော့သည်။

၎င်းက ကျောက်ဧကရာဇ်လှံပုဆိန်ဖြစ်ပြီး သူ့ဖခင် ကျောက်ဧကရာဇ်ကို အတုယူ၍ ဖန်တီးထားသော လက်နက် ဖြစ်သည်။

ကျောက်ဧကရာဇ်လေးက လှံပုဆိန်ကိုမြှောက်ပြီး အကြွင်းမဲ့အင်အားမျိုးဖြင့် ကျွင်းရှောင်ယောက်ထံ ခုတ်ချလိုက်တော့သည်။

ဒါကိုမြင်တော့ ကျွင်းရှောင်ယောက်က သူ့လက်နှစ်ချောင်းဖြင့် လေထဲတွင် ဒေါင်လိုက်နှင့် အလျားလိုက် မျဉ်းနှစ်ကြောင်းကို ဆွဲလိုက်သည်။

အဆုံးမရှိခြင်းနှင့် လျှို့ဝှက်နက်နဲသော အက်ကြောင်းကြီးတစ်ခု ဖြစ်ပေါ်လာ၏။

၎င်းက လွမ်ကုမဟာဧကရာဇ်၏ လွမ်ထျန်းလျှို့ဝှက်ကျင့်စဉ်ပင်။

"လွမ်ထျန်းလျှို့ဝှက်ကျင့်စဉ်"

ကျောက်ဧကရာဇ်လေး၏ မျက်လုံးများတွင် အေးစက်သော အလင်းရောင်တစ်ခု လင်းလက်လာသည်။

ပြန်လည်ဝင်စားခြင်းပင်လယ်၏ မဟာပုဂ္ဂိုလ်ကြီးကို အဆုံးမဲ့မဟာဧကရာဇ်က ပြင်းထန်စွာ ထိခိုက်စေခဲ့သကဲ့သို့..

လွမ်ကုမဟာဧကရာဇ်သည်လည်း မြင့်မြတ်ဝိညာဉ်အပျက်အယွင်းနှင့် ရန်ငြိုးရှိဖူးသည်။

လွမ်ကုဧကရာဇ်က မြင့်မြတ်ဝိညာဉ်အပျက်အယွင်း၏ မဟာမြင့်မြတ်ဝိညာဉ် တစ်ပါးထက်မနည်း သတ်ဖြတ်ခဲ့ပေသည်။

ထို့ပြင်၊ ကျောက်ဧကရာဇ်က မြင့်မြတ်ဝိညာဉ်အပျက်အယွင်းနှင့် ခွဲခြား၍မရသော ဆက်ဆံရေးရှိသည်။

ကျောက်ဧကရာဇ်လေးကလည်း သူ့ကိုယ်သူ မြင့်မြတ်ဝိညာဉ်အပျက်အယွင်း၏ ပါရမီရှင်တစ်ဦးအဖြစ် မှတ်ယူထားပြီး အင်မော်တယ်နယ်မြေကြီးမှ ပါရမီရှင်ဟု မယူဆပါ။

ထို့ကြောင့်၊ ကျွင်းရှောင်ယောက်က လွမ်ထျန်းလျှို့ဝှက်ကျင့်စဉ်ကို အသုံးပြုခြင်းသည် ကျောက်ဧကရာဇ်လေးကို အမျက်ဒေါသကို ဖြစ်ပေါ်စေခဲ့ကြောင်း ထင်ရှားသည်။

"ဒီအမွေအနှစ်က ကမ္ဘာပေါ်ကနေ ထာဝရပျောက်ကွယ်သွားရမယ်"

ကျောက်ဧကရာဇ်လေးက ဟိန်းဟောက်ပြီး လှံပုဆိန်ဖြင့် ပြင်းထန်စွာ ခုတ်ချလိုက်သည်။

"ဟမ့်၊ မင်းလိုပုရွက်ဆိတ်တစ်ကောင်က ရှေးဟောင်းအမွေကို ဖျက်ဆီးချင်တာလား"

"မင်းကို မပြောနဲ့၊ မင်းအဖေ ကျောက်ဧကရာဇ်တောင်မှ အရည်အချင်းမရှိသေးဘူး"

ကျွင်းရှောင်ယောက်က အေးစက်စွာ ပြောလိုက်သည်။

ကျောက်ဧကရာဇ်သည် တစ်ချိန်က မြင့်မြတ်ဝိညာဉ်အပျက်အယွင်း၏ မဟာပုဂ္ဂိုလ်တစ်ဦးဖြစ်နိုင်ကြောင်း နောက်ဆုံးတွင် သူ နားလည်ခဲ့သည်။

ရှေးယခင်က၊ သူသည် အင်မော်တယ်နယ်မြေကြီးသို့သွားကာ မြင့်မြတ်ဝိညာဉ်ကျွန်းကို တိတ်တဆိတ် တည်ထောင်ခဲ့ခြင်းပင် ဖြစ်နိုင်သေးသည်။

"ဝုန်း"

ဤတိုက်မိမှုနှင့်အတူ ကြယ်ကောင်းကင်က ကွဲထွက်သွားပုံရသည်။

ကျောက်ဧကရာဇ်လေးက နောက်သို့ဆုတ်သွားရပြီး သူ့ခန္ဓာကိုယ်မျက်နှာပြင်တွင် အက်ကြောင်းအချို့ ပေါ်လာပြန်၏။

သို့သော်လည်း သူ့ခန္ဓာကိုယ်ပေါ်ရှိ စုတ်ပြဲနေသော ကျောက်ချပ်ဝတ်တန်ဆာက အလင်းရောင်ဖျော့ဖျော့ လင်းလက်ပြီး ဒဏ်ရာများမှ ပြန်လည်ကောင်းမွန်လာစေရန် ကူညီပေးခဲ့သည်။

'ဒီလူက သူ့သားကို တကယ်ချစ်တာပဲ...'

ကျွင်းရှောင်ယောက်၏ မျက်လုံးများက အလင်းရောင်လက်သွားပြီး စုတ်ပြဲနေသော ကျောက်ချပ်ဝတ်၏ မူလအစကို မြင်လိုက်ရသည်။

ဒါက ကျောက်ဧကရာဇ်နှင့် ဆက်စပ်မှုရှိရမည်။

"ဒါက မင်းတို့ရဲ့ ခွန်အားအကုန်ပဲဆိုရင် ပျင်းစရာကောင်းလွန်းတယ်။ ဒါကို အဆုံးသတ်ဖို့အချိန်တန်ပြီ"

ကျွင်းရှောင်ယောက်က ပြောလိုက်သည်။

"ကျွင်းရှောင်ယောက်၊ မင်း မောက်မာလွန်းတယ်"

"ခရမ်းရောင် ကောင်းကင်ဘီးစကြာ"

ဝမ့်ယန်၏ မျက်ခုံးနှစ်ခုကြားတွင် ခရမ်းရောင် နတ်အလင်းတစ်ခုက လင်းလက်လာသည်။ အဆုံးမဲ့ လျှို့ဝှက်ဆန်းကြယ်သော စွမ်းအားများက ခရမ်းရောင်စွမ်းအင်အဖြစ်သို့ ပြောင်းလဲသွား၏။

ထို့နောက်တွင်၊ ခရမ်းရောင်ဘီးစကြာတစ်ခုက ကောင်းကင်ကို နှစ်ခြမ်းခွဲသွားနိုင်သကဲ့သို့ အုံ့ဆိုင်းနေသည့် ခရမ်းရောင်စွမ်းအင်များထဲမှ ပြေးထွက်လာတော့သည်။

တစ်ချိန်တည်းမှာပင်၊ ကျောက်ဧကရာဇ်ငယ်လေးက စုတ်ပြဲနေသော ကျောက်ချပ်ဝတ်တန်ဆာ၏ စွမ်းအားဖြင့် ကျောက်လှံပုဆိန်ကို အားဖြည့်၍ ကျွင်းရှောင်ယောက်ကိုထပ်မံခုတ်ချလိုက်သည်။

ဟွမ်နျဲ့တောက်ကမူ၊ သံရှည်ဆွဲကာ အော်ဟစ်ရင်း အင်မော်တယ်မီးလျှံကို အစွမ်းကုန် လောင်ကျွမ်းလိုက်၏။

ဤအခိုက်တွင် သူက အင်မော်တယ်ဖီးနစ်အဖြစ် ပြောင်းလဲသွားပုံရသည်။

၎င်းက ထိပ်သီး နတ်ဘုရားစွမ်းများဖြစ်သော ခွန်ပန်မဟာနတ်ဘုရားစွမ်းရည်၊ မိုးကြိုးဧကရာဇ်၏ မဟာနတ်ဘုရားစွမ်းရည် စသည်တို့နှင့် တန်းတူဖြစ်သည့် နတ်ဖီးနစ်၏ မဟာနတ်ဘုရားစွမ်းရည် ဖြစ်သည်။

ပါရမီရှင်သုံးဦးက ယခုအချိန်တွင် ၎င်းတို့၏ အဆုံးစွန်သော စွမ်းရည်အားလုံးကို အသုံးပြုနေပြီ။ ၎င်းတို့၏ စွမ်းအားက အလွန်ကြောက်စရာကောင်းသောကြောင့် ပတ်ဝန်းကျင် လေဟာနယ်မှာ ဖရိုဖရဲ ဖြစ်လာခဲ့ရသည်။

သို့သော်လည်း ကျွင်းရှောင်ယောက်၏ အမူအရာက မပြောင်းလဲဘဲ တည်ငြိမ်နေဆဲ ဖြစ်သည်။

ကောင်းကင်ထောက်တိုင်က သူ့ရှေ့တွင် ပြိုကျသွားလျှင်ပင် သူ့အမူအရာက ပြောင်းမည်မဟုတ်ပါ။

သူ၏ခန္ဓာကိုယ်ထဲတွင် အနှိုင်းမဲ့အရိုးမှ ဆင့်ကဲပြောင်းလဲထားသော အနှိုင်းမဲ့နတ်ဘုရားသွေးက ပွက်ပွက်ဆူလာသည်။

"ဝုန်း"

ကျွင်းရှောင်ယောက်၏ ခန္ဓာကိုယ်မှ နတ်မီးတောက်များ ထွက်ပေါ်လာ၏။

အနှိုင်းမဲ့သွေး၏ စွမ်းရည်က ပိုင်ရှင်၏ စွမ်းရည်များကို အဘက်ဘက်မှ တိုးတက်စေနိုင်သည်။

သူ၏ ခွန်အားက ရုတ်တရက် အဆများစွာ တိုးတက်လာတော့သည်။

တစ်ချိန်တည်းမှာပင် မြင့်မြတ်ခန္ဓာ၏ ရူပါရုံဖြစ်သော ယင်ယန် သေခြင်းရှင်ခြင်းပန်းချီကားက အတားအဆီးတစ်ခုသဖွယ် ပေါ်လာပြီး ပါရမီရှင်သုံးဦး၏ တိုက်ခိုက်ခြင်းများကို ခေတ္တပိတ်ဆို့ထားလိုက်သည်။

ထို့နောက်၊ ကျွင်းရှောင်ယောက်က လေထဲကို လက်သီးတစ်ချက် ထိုးနှက်လိုက်၏။ အဆုံးမဲ့ နက်ရှိုင်းသော ဟင်းလင်းပြင်အက်ကြောင်းများက ပျံ့နှံ့သွားတော့သည်။

လွမ်ထျန်းလျှို့ဝှက်ကျင့်စဉ်၊ ထာဝရပြည်နှင်ခြင်း။

အက်ကြောင်းကြီးက ဟွမ်နျဲ့တောက်မှ အသွင်ပြောင်းထားသော အင်မော်တယ်ဖီးနစ်ကို ချက်ချင်း လွှမ်းခြုံသွားကာ ဟင်းလင်းပြင်ချောက်နက်ထဲသို့ ဆွဲခေါ်သွားသည်။

သူက ကြောက်လန့်တကြားအော်ဟစ်ရင်း ဖီးနစ်တောင်ပံများကို အစွမ်းကုန်ခတ်ကာ လွတ်မြောက်ရန် ကြိုးစား၏။ သို့သော်လည်း နားမလည်နိုင်သော ဆွဲငင်အားတစ်ခုဖြင့် ဆွဲငင်ခြင်းခံရကာ နောက်ဆုံးတွင် ဟင်းလင်းပြင်ချောက်နက်၏ နက်ရှိုင်းရာသို့ မျောပါသွားတော့သည်။

အင်မော်တယ်ရှေးဧကရာဇ်၏ သားတော်မှာ မသိနိုင်သော အပျက်အစီးတစ်နေရာသို့ ပို့လွှတ်ခံလိုက်ရပြီ ဖြစ်သည်။