အခန်း ၁၃၉၄

အခန်း ( ၁၃၉၄ ) ဟွင်းယွမ်ရွှေခွက်အတွင်းမှ ကမ္ဘာ။

"ကျွင်းမိသားစုရဲ့ နတ်ဘုရားသားတော်က စကားပြောကောင်းတယ်လို့တော့ ကျုပ်ကြားဖူးပါတယ်"

"သူက အများအားဖြင့် တိတ်ဆိတ်ပြီး ခပ်ခွာခွာနေတတ်ပေမဲ့ သူတကယ်လှုပ်ရှားတဲ့အခါ လူတွေကို ဒေါသထွက်လွန်းလို့ သွေးအန်စေနိုင်တယ်"

"အခုတော့ ကျုပ် အမြင်ကျယ်ခဲ့ပါပြီ"

ပတ်ဝန်းကျင်မှ ကျင့်ကြံသူများက အဘွားအိုကို စာနာစိတ်ဖြင့် ကြည့်လိုက်ကြသည်။

ဂုဏ်သိက္ခာရှိသော ပျက်စီးခြင်းတာအိုသခင်တစ်ပါးက ဒေါသထွက်လွန်းသဖြင့် သတိလစ်မေ့မျောရသည်မှာ မယုံနိုင်စရာပင်။

သို့သော်လည်း ၎င်းက ကျွင်းရှောင်ယောက်သာ ဖြစ်သည်။

အင်မော်တယ်နယ်မြေကြီး၏ အခြားပါရမီရှင်များဖြစ်လျှင် ယုံကြည်မှုသိပ်မရှိဘဲ နှိမ့်ချနေကြရလိမ့်မည်။

ကျွင်းရှောင်ယောက်ကတော့ နှိမ့်ချခြင်း၏ အဓိပ္ပာယ်ကို မသိပါ။

ဤအဖြစ်အပျက်ပြီးနောက်၊ ချုံးရှောင်းမျိုးရိုးမှလူများကကျွင်းရှောင်ယောက်ကို ယခုအချိန်တွင် ဘာမှလုပ်မနိုင်ကြောင်း သိလာခဲ့ကြသည်။

ထို့ကြောင့် သူ့ကို ပြဿနာမရှာကြတော့ပေ။

ကျွင်းရှောင်ယောက်ကလည်း လျိုချုံးယန်၏ ခန္ဓာကိုယ်ရှိ တားမြစ်ချက်များကို ဖယ်ရှားခဲ့သည်။

ဟွင်းယွမ်ရွှေခွက်ကို ရယူရန် သူမ၏ အကြံအစည်ကို ကျွင်းရှောင်ယောက်မှ ဖျက်ဆီးခဲ့သောကြောင့် စိတ်ထဲတွင် မကျေနပ်မိသော်လည်း...

အမျိုးသမီးတစ်ယောက်အနေဖြင့် ကျွင်းရှောင်ယောက်ကဲ့သို့ ထူးချွန်သူတစ်ဦးကို စိတ်မဝင်စားရန် ခက်ခဲသည်ဟု ဆိုရမည်။

"ကျွင်းသခင်လေး၊ ရှင် အချိန်ရမယ်ဆိုရင် ချုံးယန်နဲ့ တာအိုအကြောင်း ဆွေးနွေးဖို့ လာနိုင်ပါတယ်။ ချုံးယန်က ရှင့်ကို စိတ်ကျေနပ်မှုအပြည့်နဲ့ ထွက်ခွာရစေမယ်လို့ အာမခံတယ်"

လျိုချုံးယန်က ဆွဲဆောင်မှုရှိသော လေသံဖြင့် ပြောလိုက်သည်။

သူ့အတွက် ယောက်ျားတစ်ယောက်ကို ဤကဲ့သို့ ဖိတ်ခေါ်ခြင်းမှာ ဒါပထမဆုံးပင်။

ယခင်က ရှုံးဝမ်ကဲ့သို့သော သူမ၏ လိုက်စားသူအချို့ပင် ထိုကဲ့သို့ ဆက်ဆံမှုမျိုးကို တစ်ခါမျှ မခံယူခဲ့ကြရပါ။

"ဝမ်းနည်းပါတယ်၊ ကျုပ်က မိန်းကလေးလျိုရဲ့ အရည်အချင်းကို သိမြင်ရဖို့ မရှိဘူး"

ကျွင်းရှောင်ယောက်က ပေါ့ပေါ့ပါးပါး ပြောလိုက်သည်။

လျိုချုံးယန်သည် လွန်စွာ ဆွဲဆောင်မှုရှိပြီး ထိပ်တန်းမိန်းမလှစာရင်းတွင် ပါဝင်သော်လည်း...

ကျွင်းရှောင်ယောက်က သမာဓိ အလွန်အားကောင်းသည်။

တစ်ဖက်တွင်၊ ကျန်းလော့လီက နှုတ်ခမ်းကိုတွန့်ကွေးပြီး ကျေနပ်စွာ ပြုံးလိုက်လေသည်။

"ကိုကိုရှောင်ယောက်က သစ္စာရှိတဲ့သူပဲ၊ နောက်ပြီး တွေ့ကရာမိန်းမတွေက ကိုကိုရှောင်ယောက်ကို သွေးဆောင်ဖို့ အရည်အချင်းမပြည့်မီဘူး"

ကျန်းလော့လီက ပြောလိုက်သည်။

"ဟင်းဟင်း...၊ ယောက်ျားတွေ အကုန်လုံးက အတူတူပါပဲ"

လျိုချုံးယန်က အားမလိုအားမရဖြင့် ကျွင်းရှောင်ယောက်ကို လေးလေးနက်နက် ကြည့်လိုက်သည်။

သူသည် ကျွင်းရှောင်ယောက်နှင့် အမှန်တကယ်ပင် ဆက်သွယ်ချင်၏။

ဤလူငယ်က သူ၏ လိုက်စားသူများထက် များစွာ ပိုအစွမ်းထက်သည်။

သူ၏နောက်ခံက တားမြစ်နယ်မြေမဟုတ်သော်လည်း အခြားတားမြစ်နယ်မြေများကို သတိထားစေရန် လုံလောက်ပေသည်။

ဤသို့ဖြင့် ရှန်းလင်၏ ဘိုးဘွားမြေ အခွင့်အလမ်းမှာ ပြီးဆုံးသွားခဲ့သည်။

အနယ်နယ်အရပ်ရပ်မှ ကျင့်ကြံသူများလည်း ပြန်ကုန်ကြ၏။

ကျွင်းရှောင်ယောက်နှင့် ပတ်သက်သော သတင်းများက ကောင်းကင်ကိုးပါး တစ်ခုလုံးသို့ ပျံ့နှံ့သွားတော့မည်မှာ မြေကြီးလက်ခတ်မလွဲပင်။

ယခင်က ကျွင်းရှောင်ယောက်၏ ကျော်ကြားမှုသည် အင်မော်တယ်နယ်မြေကြီးရှိ သူ၏လုပ်ဆောင်မှုများနှင့် အင်မော်တယ်သတ်ဓားမှ ပေါက်ဖွားလာခြင်း ဖြစ်သည်။

ယခုမူ၊ ကျွင်းရှောင်ယောက်က သူ၏ကိုယ်ပိုင်ခွန်အားကို အားကိုးခြင်းဖြင့် ကောင်းကင်ကိုးပါးတွင် နာမည်တစ်လုံးကို တည်ဆောက်ခဲ့ပြီ။

ဤကဲ့သို့သော မုန်တိုင်းမျိုးကို ကောင်းကင်ကိုးပါးရှိ မည်သည့်ပါရမီရှင်မျှ မယှဉ်နိုင်တော့ဟု ဆိုနိုင်သည်။

ဤအဖြစ်အပျက်ပြီးနောက်တွင် ကျွင်းရှောင်ယောက်ကို စိန်ခေါ်ပြီး ကောင်းကင်ကိုးပါး၏ အရှက်ရမှုအတွက် လက်စားချေမည့် ကောင်းကင်ကိုးပါးမှ ပါရမီရှင်များ ပိုမိုရှိလာမည်မှာ သေချာသည်။

သို့သော်လည်း ကျွင်းရှောင်ယောက်ကတော့ ဒါတွေကို ဂရုမစိုက်ပေ။

ကျွင်းရှောင်ယောက်က ‌ရှန်းလင်တွင် ယာယီတည်းခိုနေထိုင်ခဲ့သည်။

အကြောင်းမှာ၊ ကျွင်းရှောင်ယောက်က ကျန်းလော့လီကို ဟွင်းယွမ်ရွှေခွက် ရရှိနိုင်အောင် ကူညီပေးခဲ့သောကြောင့်ပင်။

ထို့ကြောင့် ပိရှောင်းမျိုးရိုးက ကျွင်းရှောင်ယောက်ကို နောက်တစ်ကြိမ် ဟန့်တားရန် မကြိုးစားတော့ပါ။

ယခုအချိန်တွင်၊ ကျွင်းရှောင်ယောက်က ကျန်းလော့လီ၏ အခန်းထဲတွင် ရှိနေသည်။

သူက အဆင့်တက်ရန် စီစဉ်ထား၏။

ဤအခိုက်မှာ သူက ကျန်းလော့လီနှင့်အတူ ဟွင်းယွမ်ရွှေခွက်ကို လေ့လာနေသည်။

"ကိုကိုရှောင်ယောက်၊ ပိရှောင်းမျိုးရိုးက ဟွင်းယွမ်ရွှေခွက်ကို ကျွန်မအတွက် ရည်ရွယ်ထားပေမဲ့ အဲဒါကို အင်မော်တယ်နယ်မြေကြီးဆီ ယူဆောင်သွားခွင့်ပြုမှာ မဟုတ်ဘူး"

ကျန်းလော့လီက ဝမ်းနည်းမှု အရိပ်အယောင်တို့ဖြင့် ပြောလိုက်သည်။

သို့သော်လည်း တွေးကြည့်လျှင် ဒါကပုံမှန်ပင်။

နောက်ဆုံးတွင်၊ ဤဟွင်းယွမ်ရွှေခွက်က ရှန်းလင်၏ အရေးကြီးသော အစိတ်အပိုင်းတစ်ခု ဖြစ်သည်။

ကျန်းလော့လီက ဟွင်းယွမ်ရွှေခွက်၏ ပိုင်ရှင်ဖြစ်သော်လည်း...

ရှန်းလင်သည် ဟွင်းယွမ်ရွှေခွက်ကို အင်မော်တယ်နယ်မြေကြီးသို့ ယူဆောင်သွားခွင့်ပြုမည် မဟုတ်ပါ။

ဟွင်းယွမ်ရွှေခွက်က ကောင်းကင်ကိုးပါး၌သာ ရှိနိုင်သည်။

"ဒါက ပုံမှန်ပါပဲ၊ နောက်ဆုံးမှာတော့ ဒါက အင်အားစုကြီးတစ်ခုအတွက် အခြေခံအုတ်မြစ်လို့ ဆိုနိုင်တယ်"

ကျွင်းရှောင်ယောက်က ပြောဆိုရင်း ကျန်းလော့လီ၏လက်ထဲမှ ဟွင်းယွမ်ရွှေခွက်ကို ကြည့်လိုက်သည်။

ဟွင်းယွမ်ရွှေခွက်က လေးထောင့်ပုံစံဖြစ်ပြီး လက်တစ်ဖဝါးအရွယ်အစားမျှသာ ဖြစ်သည်။

သို့သော်လည်း တကယ်တမ်းတွင် ၎င်းက အရွယ်အစားကို အလိုရှိသည့်အတိုင်း ပြောင်းလဲနိုင်ပြီး တောင်ကြီးတစ်လုံး သို့မဟုတ် ဂြိုလ်တစ်လုံး အရွယ်အစားအထိ ကြီးထွားနိုင်ပေသည်။

ဟွင်းယွမ်ရွှေခွက်အတွင်းမှာတော့ အလွန်ကျယ်ဝန်းသော နေရာလွတ်တစ်ခု ရှိသည်။

၎င်းက အားကောင်းသော သိုလှောင်ခြင်းမှော်ရတနာတစ်မျိုးလည်း ဖြစ်၏။

ဟွင်းယွမ်ရွှေခွက်ဟု အမည်ရှိသည့်အတိုင်း အတွင်းပိုင်းနေရာလွတ်က ရှေးဦးကစဉ့်ကလျားလောကတစ်ခုလုံးကိုပင် ထားရှိနိုင်ပုံရသည်။

ထို့ပြင် ဟွင်းယွမ်ရွှေခွက်၏ လျှို့ဝှက်ဆန်းကြယ်မှုက အဆုံးမရှိဖြစ်ပြီး ကမ္ဘာပေါ်ရှိ ရတနာအားလုံးကို ထိန်းထားနိုင်သည်။

၎င်းက အရာခပ်သိမ်းကို မျိုချနိုင်သည့် အလွန်အားကောင်းသော စုပ်ယူအားလည်း ရှိသေးသည်။ ထိုအထဲသို့ စုပ်ယူခံလိုက်ရလျှင် မည်သူမျှ လွတ်မြောက်နိုင်မည် မဟုတ်ပါ။

ကျွင်းရှောင်ယောက်ပင်လျှင် ဤအင်မော်တယ်လက်နက်၏ စွမ်းအားကြောင့် သက်ပြင်းချလိုက်မိသည်။

ယခုအချိန်တွင်၊ ကျန်းလော့လီ၏ ခွန်အားဖြင့် ဟွင်းယွမ်ရွှေခွက်၏စွမ်းအား တစ်သောင်းပုံ တစ်ပုံကိုပင် ထုတ်နိုင်ဦးမည် မဟုတ်ပါ။

သို့သော်လည်း ရှေးဦးဝိညာဉ်ကမ္ဘာ စသည်တို့ကို လေ့ကျင့်ရန် ၎င်းကို အသုံးပြုနိုင်သည်။

"စကားမစပ် လော့လီ... မင်းပြောခဲ့တဲ့ ဟွင်းယွမ်ရွှေခွက်အတွင်းက တစ်ခုခုဆိုတာက ဘာလဲ"

ကျွင်းရှောင်ယောက်က မေးလိုက်သည်။

တကယ်တော့ သူ့စိတ်ထဲမှာ မှန်းဆထားပြီးပြီ။ သူက အတည်ပြုချင်တာ ဖြစ်သည်။

ထိုစကားကိုကြားတော့ ကျန်းလော့လီက ခပ်တိုးတိုးရယ်မောပြီး စွမ်းအင်များကို စုစည်းလိုက်သည်။

ရုတ်တရက်၊ ဟွင်းယွမ်ရွှေခွက်က တုန်ခါသွားပြီး တောင်များ၊ မြစ်များ၏ အကွေ့အကောက်များ အပါအဝင် မြင်ကွင်းအမျိုးမျိုးတို့ ထင်ဟပ်လာပုံရ၏။

၎င်းက ဟွင်းယွမ်ရွှေခွက်အတွင်းရှိ ကမ္ဘာဖြစ်သည်။

သို့သော်... ကျွင်းရှောင်ယောက်က ပိုထူးခြားသော အရာတစ်ခုကို သတိပြုလိုက်မိသည်။

ဟွင်းယွမ်ကမ္ဘာ၏ အနက်ရှိုင်းဆုံးအပိုင်းရှိ ချိုင့်ဝှမ်းတစ်ခုအတွင်းတွင်...

အင်မော်တယ် အငွေ့အသက်က ပြည့်နှက်နေပြီး လျှို့ဝှက်ဆန်းကြယ်၍ ထူးဆန်းအံ့သြဖွယ်ကောင်းသည့် သားရဲများအဖြစ်သို့ စုစည်းနေပုံရပေသည်။

"ကိုကိုရှောင်ယောက် ကြည့်ကြည့်ပါ၊ ညီမ ပြောတာက အဲဒါပဲ။ အဲဒါက လူတွေကို အဆင့်မြှင့်တင်ပေးနိုင်တဲ့ အရာတစ်ခုပဲ"

ကျန်းလော့လီက ပြောလိုက်သည်။

သူက ဤအကြောင်းကို ကျွင်းရှောင်ယောက် တစ်ယောက်တည်းကိုသာ ပြောပြခြင်း ဖြစ်သည်။

ပိရှောင်းမျိုးရိုးမှ လူများသည်ပင် မသိပေ။

အစားကောင်းရှိလျှင် အရင်းနှီးဆုံးသူကိုသာ ကျွေးနိုင်မည်။

ကျွင်းရှောင်ယောက်က မျှော်လင့်ထားသည့်အတိုင်း မှန်နေသဖြင့် အနည်းငယ်ပြုံးလိုက်သည်။

သူက ကျန်းလော့လီ၏ခေါင်းကို ပွတ်သပ်ပြီး ပြောလိုက်၏။

"ဒါကို အင်မော်တယ်ရတနာလို့ခေါ်တယ်"

"အယ်၊ ကိုကိုရှောင်ယောက်က ဒါကို သိနေတာလား"

ကျန်းလော့လီက အံ့သြသွားသည်။

မူလက သူသည် ကျွင်းရှောင်ယောက်ရှေ့တွင် အနည်းငယ် ဟိတ်ဟန်ထုတ်ချင်သော်လည်း ကျွင်းရှောင်ယောက်က ချက်ချင်း သိမြင်သွားပုံရသည်။

ကျွင်းရှောင်ယောက်က လက်ဝါးဖြန့်လိုက်သောအခါ လျှို့ဝှက်ဆန်းကြယ်ပြီး အားကောင်းသော စွမ်းအင်တစ်ခုက သူ့လက်ဝါးထဲတွင် ပေါ်လာတော့သည်။

၎င်းကလည်း အင်မော်တယ်ရတနာ ဖြစ်သည်။

"ကိုကိုရှောင်ယောက်က အဲဒါကို ရရှိပြီးသားပဲ"

ကျန်းလော့လီက ရုတ်တရက် စိတ်ဓာတ်ကျသွားသည်။

မူလက သူသည် ကျွင်းရှောင်ယောက်ထံမှ မျက်နှာသာကို ရယူရန် တွေးခဲ့မိသေးသည်။

နောက်ဆုံးမှာတော့ ကျွင်းရှောင်ယောက်ကို ကူညီခွင့်ရရန်မှာ မလွယ်ကူပေ။

သို့သော်လည်း ယခုအခါ ကျွင်းရှောင်ယောက်က ပိုင်ဆိုင်ထားပြီးဖြစ်ကြောင်း သိလိုက်ရသည်။

ကျန်းလော့လီက စိတ်အားငယ်သွားတာကို မြင်သောအခါ ကျွင်းရှောင်ယောက်က သူမ၏ ပါးဖောင်းဖောင်းလေးကို ခပ်ဖွဖွဆွဲပြီး ပြောလိုက်သည်။

"ကိုယ့်မှာ အင်မော်တယ်ရတနာရှိတယ်ဆိုပေမဲ့ ပမာဏက သိပ်မများဘူးလေ။ ကိုယ် အဆင့်တက်တော့မယ်။ မင်းက တကယ်ကြီးမားတဲ့ ကောင်းကျိုးဆောင်ပေးလိုက်တာပါ"

ကျွင်းရှောင်ယောက်၏ ချီးမွမ်းသံကိုကြားမှ ကျန်းလော့လီ၏ မျက်နှာလေးမှာ ကြည်လင်လာသည်။ သူ့ပါးပြင်ပေါ်တွင် ချစ်စဖွယ် ပါးချိုင့်လေးနှစ်ခု ပေါ်လာသည်အထိ ပြုံးလိုက်လေသည်။

ကျွင်းရှောင်ယောက် ခန့်မှန်းတာက မှန်သည်။

ယခင်က အင်မော်တယ်ဂူသို့ ဝင်ရောက်သောအခါ အင်မော်တယ်ရတနာ၏ အငွေ့အသက်ကို ယောင်ဝါးဝါး ခံစားခဲ့ရပေသည်။

သို့ရာတွင်၊ ဒါက ဟွင်းယွမ်ရွှေခွက်အတွင်း၌ရှိမည်ဟု မမျှော်လင့်ထားပေ။

သို့သော်လည်း ရှန်းလင်မှ ပိုင်ဆိုင်သော အင်မော်တယ်လက်နက်တစ်ခုတွင် အင်မော်တယ်ရတနာများ စုစည်းမိနေသည်မှာ ကျိုးကြောင်းဆီလျော်မှုရှိသည်။

ထို့ပြင် ဟွင်းယွမ်ရွှေခွက်အတွင်း၌ အင်မော်တယ်ရတနာ အများအပြား ရှိနေခြင်းက ကျွင်းရှောင်ယောက်ကို ဝမ်းမြောက်စေ‌ခဲ့ပေသည်။

ဒါက ရေကန်ငယ်တစ်ခုနှင့်တူပြီး ယောက်လင်တောင်ရှိ အင်မော်တယ်ရတနာများထက် ဆယ်ဆကျော် ပိုများသည်။

ထို့ပြင် ရွှေရောင်နှစ်များ သစ်သီးနှစ်လုံးလည်း ရှိသေးသည်။

ဤတစ်ကြိမ်တွင် ကျွင်းရှောင်ယောက်၏ အဆင့်တက်ခြင်းက သာမန်မဖြစ်နိုင်တော့မည်မှာ သေချာသည်။