အခန်း ၁၄၆၆

အခန်း ( ၁၄၆၆ ) အထူး အင်မော်တယ်ကျောက်တွင်း။

"ကျွင်းသခင်လေး၊ ချင်းရီရဲ့ မျက်နှာပေါ်က အမှတ်အသားတွေကို အခု ဖယ်ရှားပေးနိုင်မလား"

ကျိချင်းရီက မေးလိုက်သည်။

သူမ မပြောခဲ့လျှင် ကျွင်းရှောင်ယောက်ကိုယ်တိုင် မေ့လုနီးပါး ဖြစ်လိမ့်မည်။

ထိုစဉ်က၊ နယ်စပ်မှ လေ့ကျင့်ခန်းတွင် သူက တိုင်းတပါး၏ ကစဉ့်ကလျားခန္ဓာအဖြစ် ရှိခဲ့သည်။ ဤအခွင့်အရေးကို အသုံးချပြီး ကျိချင်းရီကို သင်ခန်းစာတစ်ခု ပေးခဲ့ခြင်းပင်။

"ဒါက ကျုပ် မင်းအတွက် ချန်ထားခဲ့တဲ့ အမှတ်အသားလို့ ယူဆလို့ရတယ်။ ဒါကို ဖျက်ပေးရမယ်ဆိုရင် ကျုပ်အတွက် ဘာအကျိုးရှိမှာလဲ"

ကျွင်းရှောင်ယောက်က ပြော၏။

"ကွေ့ရှအပျက်အယွင်းရဲ့ နက်နဲရာမှာ ပိုအဆင့်မြင့်တဲ့ အင်မော်တယ်ကျောက်တွင်းရှိတယ်၊ အဲဒီတည်နေရာကို ချင်းရီက ပြောပြနိုင်ပါတယ်"

"သူတို့ထဲမှာ ပထမအဆင့် အင်မော်တယ်သွေးကြောတွေထက် သာလွန်တဲ့ ထိပ်တန်းအဆင့် အင်မော်တယ်သွေးကြောတွေတောင် ရှိနိုင်တယ်"

"ပါရမီရှင်တွေ အများကြီးပဲ အဲဒီကို သွားနေကြပြီလေ၊ ကျွင်းသခင်လေး မြန်မြန်မသွားရင် နောက်ကျသွားလိမ့်မယ်"

"ထိပ်တန်းအဆင့် အင်မော်တယ်သွေးကြောလား"

ကျွင်းရှောင်ယောက်က စိတ်ဝင်စားသွားမိသည်။

"ပထမတန်းစား အင်မော်တယ်သွေးကြောတစ်ခုက မိုင်တစ်ထောင်ရှည်ပြီး ထိပ်တန်း အင်မော်တယ်သွေးကြောကတော့ မိုင်တစ်သောင်းကျော်ရှည်ပါတယ်။ အဲဒါက အင်မော်တယ်ဓာတ်စွမ်းအင်တွေကို ပိုပြီး ထုတ်ယူနိုင်တယ်"

"ဒီသတင်းက ကျွင်းသခင်လေးအပေါ် ကျွန်မရဲ့ ကျေးဇူးတင်လက်ဆောင်လို့ မှတ်ယူပါ"

ကျိချင်းရီက အပြုံးဖြင့် ပြောလိုက်သည်။

"အိုး၊ ကျေးဇူးတင်ပါတယ်"

ကျိချင်းရီက ဤမျှကြိုးစားနေပေရာ ကျွင်းရှောင်ယောက်က သူ့ကို နောက်ထပ် ခက်ခဲအောင် မလုပ်နိုင်တော့ပေ။

သူက လက်ကိုမြှောက်ပြီး ကျိချင်းရီ၏ ပါးပြင်ကို ပွတ်သပ်လိုက်သည်။

သူ့မျက်နှာပေါ်မှ အမှတ်အသားလည်း ချက်ချင်း ပျောက်ကွယ်သွား၏။

ကျိချင်းရီလည်း သူမ၏ အပြစ်အနာအဆာကင်းသော မျက်နှာလေးကို ပြန်လည်ရရှိခဲ့လေသည်။

ထို့နောက် အဖြူရောင်ပုဝါစ အသစ်တစ်ထည်ကို ထုတ်ယူကာ မျက်နှာပေါ် အုပ်လိုက်သည်။

သူမ၏ ထူးကဲစွာ လှပသော မျက်နှာလေးကို ဖုံးကွယ်ထားလိုက်၏။

"ဒီလောက်တောင်လှပပေမဲ့ မြင်ဖူးသူနည်းနေတယ်။ နှမြောစရာပဲ"

ကျွင်းရှောင်ယောက်က စုတ်သတ်လိုက်သည်။

ကျိချင်းရီ၏ မျက်လုံးများက အရောင်လက်သွား၏။

"ဒါက ပိုကောင်းတယ် မဟုတ်လား။ ဒါက ကျွင်းသခင်လေး တစ်ယောက်တည်းသာ ခံစားနိုင်တဲ့ မြင်ကွင်းပဲ"

သူ့စကားလမ်းကြောင်းက ရှေ့ဆက်ရလျှင် တစ်မျိုးဖြစ်နိုင်သည်။

ကျွင်းရှောင်ယောက်က ချက်ချင်း အကြောင်းရာပြောင်းလိုက်သည်။

"မင်းကော ထိပ်တန်းအင်မော်တယ်ကျောက်တွင်းကို အတူမသွားဘူးလား"

ကျိချင်းရီက ခေါင်းကို အနည်းငယ်ခါယမ်းလိုက်၏။

"ချင်းရီ မသွားပါဘူး။ ကျွင်းသခင်လေးနဲ့အတူ ကျွန်မ ပေါ်လာမယ်ဆိုရင် ကူချမ်မြဲ့ရဲ့ သေဆုံးမှုနဲ့ပတ်သက်ပြီး ကျွန်မအပေါ် သံသယတွေ ချက်ချင်း ဝင်လာလိမ့်မယ်"

ကျိချင်းရီက အလွန်ဉာဏ်ထက်သူ ဖြစ်သည်။

"မင်းက တကယ်ကို ပါးနပ်ပါပေတယ်၊ ဒါပေမဲ့ ဒီအတွက် နောက်ဆုံးမှာတော့ ကျုပ်က အပြစ်တင်ခံရလိမ့်မယ်"

ကျွင်းရှောင်ယောက်က ပြောလိုက်၏။

ကူချမ်မြဲ့၏ သေဆုံးမှုကို သူ့ကြောင့်လို့ မှတ်ယူကြမည်မှာ သေချာသည်။

သို့သော်လည်း ကျွင်းရှောင်ယောက်က စိတ်ထဲမထားခဲ့ပေ။ သူ့တွင် အကြွေးများလွန်းသောကြောင့် အကြွေးတစ်ခု ထပ်တိုးလျှင်ပင် ဂရုမစိုက်တော့ပါ။

"ဒီအတွက်က ရှင့်ကိုပဲ ဒုက္ခပေးရမှာပါ၊ ပြီးတော့ အဲဒီသက်ရှည်ခြင်းနတ်ဘုရားမက..."

ကျိချင်းရီက အဝေးမှ သက်ရှည်ခြင်းနတ်ဘုရားမကို လှမ်းကြည့်လိုက်သည်။

သူက အရာအားလုံးကို မျက်မြင်တွေ့ခဲ့ရသည် မဟုတ်လော။

"စိတ်မပူပါနဲ့၊ သူက ကွေ့ရှအပျက်အယွင်းကနေ ထွက်သွားနိုင်မှာ မဟုတ်ဘူး"

ကျွင်းရှောင်ယောက်က ပြုံးလိုက်သည်။

သူ့အသံက တည်ငြိမ်သော်လည်း ထူးဆန်းသော အေးစက်ခြင်း အရိပ်အယောင်တစ်ခု ရှိ၏။

ကျိချင်းရီက ကျွင်းရှောင်ယောက်ကို လေးလေးနက်နက် ကြည့်လိုက်သည်။

။ကျွင်းသခင်လေးရဲ့ ရန်သူဖြစ်ရတာ တကယ်ကို စိတ်ဆင်းရဲစရာပဲ။ အနာဂတ်မှာ ကျွန်မက ကျွင်းသခင်လေးနဲ့ ပူးပေါင်းဆောင်ရွက်ဖို့ အခွင့်အလမ်းတွေ ရှိလာဦးမယ်လို့ မျှော်လင့်ပါတယ်"

ကျိချင်းရီက နှုတ်ဆက်ပြီး ထွက်ခွာရန် ပြင်ဆင်လိုက်သည်။

တစ်ဖက်ကိုလှည့်ကာ တိုက်ရိုက် ထွက်ခွာသွား‌၏။

တွန့်ဆုတ်ခြင်း၊ တွယ်တာခြင်းမျိုး လုံးဝ မရှိပါ။

'တကယ်ကို စိတ်ဝင်စားစရာကောင်းတဲ့ အမျိုးသမီးပဲ။ မင်းတစ်ယောက်တည်း ဘယ်လောက်ထိ လုပ်နိုင်မလဲဆိုတာ ငါသိချင်မိတယ်'

ကျွင်းရှောင်ယောက်က ခေါင်းကို အနည်းငယ်ခါယမ်းလိုက်သည်။

ထို့နောက် သူသည်လည်း ကျိချင်းရီ ပြောပြခဲ့သည့် ထိပ်တန်း အင်မော်တယ်ကျောက်တွင်းသို့ ဦးတည်ရန် ပြင်ဆင်လိုက်၏။

ထိပ်တန်းအဆင့် အင်မော်တယ်သွေးကြောတစ်ခုက အင်မော်တယ်ဓာတ်စွမ်းအင်များကို အများအပြား ထုတ်ပေးနိုင်သင့်သည်။

ကျွင်းရှောင်ယောက်က သူ့လက်ကိုမြှောက်လိုက်ပြီး နိယာမသံကြိုးဖြင့် သက်ရှည်ခြင်းနတ်ဘုရားမကို ဆွဲခေါ်လိုက်သည်။

ဤအခိုက်တွင်၊ သက်ရှည်ခြင်းနတ်ဘုရားမ၏ မျက်နှာက ကြောက်ရွံ့မှုတို့ ပြည့်နှက်နေပေသည်။ သူက အော်ဟစ်လိုက်သည်။

"အင်မော်တယ်နတ်ဆိုးကောင်းကင်ဂူရဲ့ မိန်းကလေးကလည်း တကယ်ကို နင့်လူတွေထဲက တစ်ယောက်ပဲ။ နင့်ရဲ့အကြံအစည်က နက်နဲလွန်းတယ်"

သက်ရှည်ခြင်းနတ်ဘုရားမသည် ဤရလဒ်ကို ဘယ်သောအခါမှ မမျှော်လင့်ခဲ့ပါ။

အစပိုင်းမှာ၊ ကျွင်းရှောင်ယောက်က ထောင်ချောက်ထဲကျသွားကြောင်း မြင်ရသောအခါ...

ကျွင်းရှောင်ယောက်တော့ ပြဿနာတက်ပြီဟု တွေးရင်း သူ ကျေနပ်ခဲ့သည်။

သက်ရှည်ခြင်းဧကရာဇ်၏သားတော်ပင် မလှုပ်ရှားရဘဲ ကိစ္စပြတ်သွားနိုင်သေးသည်။

သို့ရာတွင်၊ ဤကဲ့သို့သော အပြောင်းအလဲမျိုး ဖြစ်လာမည်ဟု မည်သူထင်ထားခဲ့မည်နည်း။

သက်ရှည်ခြင်းနတ်ဘုရားမက ကျွင်းရှောင်ယောက်ကို လုံးဝ မမြင်နိုင်ခဲ့ပေ။

"အံ့သြနေတာလား။ နောက်ထပ်လာလိမ့်ဦးမယ်"

ကျွင်းရှောင်ယောက်က ပြောလိုက်၏။

လူတစ်ယောက်အတွက် အဆိုးရွားဆုံး ထိုးနှက်ချက်က သူတို့ကို မျှော်လင့်ချက်ပေးပြီး ကိုယ့်လက်နှင့် ထိုမျှော်လင့်ချက်ကို ဖျက်ဆီးပစ်ခြင်းပင်။

သက်ရှည်ခြင်းနတ်ဘုရားမအတွက်တော့ ယခုအချိန်တွင် တစ်ခုတည်းသော မျှော်လင့်ချက်မှာ သက်ရှည်ခြင်းဧကရာဇ်၏သားတော် ဖြစ်သည်။

"မဟုတ်ဘူး... နင့်မှာ ဘယ်လောက်ပဲ အကြံအစည်တွေ၊ လှည့်ကွက်တွေ ရှိရှိ... သက်ရှည်ခြင်းဧကရာဇ်ရဲ့သားတော်က ကိုင်တွယ်နိုင်တယ်။ သူက ကောင်းကင်ကိုးပါးရဲ့ နံပါတ်တစ် လူငယ်ပါရမီရှင်ပဲ"

သက်ရှည်ခြင်းနတ်ဘုရားမက သူမ၏ ယုံကြည်ချက်ကို ဆုပ်ကိုင်ထားသေးသည်။

"ပထမလား"

ကျွင်းရှောင်ယောက်က ပြုံးလိုက်သည်။

"ငါနဲ့အတူဆိုရင် ဒီဘွဲ့ကို သူခံယူနိုင်မှာ မဟုတ်ဘူး"

ထို့နောက်၊ ကျွင်းရှောင်ယောက်က နိယာမကြိုးဖြင့် သက်ရှည်ခြင်းနတ်ဘုရားမကို ဆွဲခေါ်ကာ‌ ကွေ့ရှအပျက်အယွင်း၏ နက်နဲရာသို့ ဆက်လက်လျှောက်လှမ်းသွားတော့သည်။

..........

ယခုအချိန်တွင်၊ ကွေ့ရှအပျက်အယွင်းသို့ ဝင်ရောက်ခဲ့သော ပါရမီရှင်များ တစ်ဝက်ကျော်မှာ ဖယ်ရှားခံခဲ့ရပြီးဖြစ်သည်။

အများစုက ထူးဆန်းသော အခြေအနေ အမျိုးမျိုးတွင် သေဆုံးခဲ့ကြ၏။

ကျန်ရှိနေသော ပါရမီရှင်များ အများစုမှာ တားမြစ်နယ်မြေအမျိုးမျိုးမှ ထိပ်တန်း ပါရမီရှင်များ ဖြစ်ကြသည်။

တစ်ချိန်တည်းမှာပင် ထူးခြားသော သတင်းတစ်ခုက ပျံ့နှံ့သွားခဲ့သည်။

၎င်းက မိုင်ပေါင်းသိန်းချီ ကျယ်ဝန်းသော ကျောက်တွင်းကြီး တစ်တွင်း ဖြစ်၏။

၎င်းတွင် ပထမတန်းစား အင်မော်တယ်သွေးကြောထက် ပို၍ အဆင့်မြင့်သော ထိပ်တန်း အင်မော်တယ်သွေးကြောတစ်ခု ရှိနိုင်သည်။

ထိပ်တန်းအဆင့် အင်မော်တယ်သွေးကြောတွင် သန့်စင်နိုင်သော အင်မော်တယ်ဓာတ်စွမ်းအင်က ပထမတန်းစား အင်မော်တယ်သွေးကြောထက် အဆများစွာ သာလွန်ပေသည်။

ထို့ကြောင့် ကျန်ရှိနေသော ပါရမီရှင်များအားလုံးက ထိုထိပ်တန်း အင်မော်တယ်ကျောက်တွင်းဆီသို့ စုဝေးလာကြသည်။

ထိုအချိန်တွင် ပြင်းထန်သော တိုက်ပွဲတစ်ခု ဖြစ်လာနိုင်ခြေ ရှိပေသည်။

ကျွင်းရှောင်ယောက်လည်း ရှေ့ကိုဆက်ခဲ့သည်။

တစ်ခါတလေလည်း ကောင်းကင်ကိုးပါး၏ ပါရမီရှင် လူငယ်လေးများနှင့် တွေ့ဆုံရ၏။

ထိုအခါမျိုးတွင်၊ သူက စိတ်ရင်းမှန်ဖြင့် နှုတ်ဆက်ခြင်း၊ ဂရုစိုက်ခြင်းများ ပြုတတ်သည်။

ကောင်းကိုးပါးမှ ပါရမီရှင်များလည်း နောက်ဆုံးတွင် ဝမ်းသာစိတ်ဖြင့် မျက်ရည်များ စီးကျလာကာ ၎င်းတို့၏ အင်မော်တယ်သွေးကြောများကို ကျွင်းရှောင်ယောက်ထံ ပေးအပ်ခဲ့ကြသည်။

ကျွင်းရှောင်ယောက်က အဝေးသို့ ရောက်သွားပြီးနောက်...

ထိုအခါမှသာ သူတို့က ဝမ်းနည်းပူဆွေးစ ပြုလာကြတော့သည်။

"ချီးတဲ့မှပဲ၊ ကျွင်းမိသားစုရဲ့ နတ်ဘုရားသားတော်က ဘယ်လိုမကောင်းမိစ္ဆာလဲ။ ကြက်သွန်မြိတ်တွေ လှီးဖြတ်ရင်တောင် အမြစ်ကိုချန်ထားဖို့လိုတယ်။ ဒီလူဆိုးကတော့ ငါတို့အတွက် နည်းနည်းမှ မချန်ထားခဲ့ဘူး"

တစ်ဖက်မှာတော့၊ ကျွင်းရှောင်ယောက်က သူ့ကိုပေးအပ်လိုက်သော လက်ဆောင်ပစ္စည်းများကို စစ်ဆေးပြီး ကျေနပ်စွာ ပြုံးလိုက်သည်။

"တကယ်ကို၊ ဒါက အမြန်ဆုံးနည်းလမ်းပဲ"

"ဟမ့်၊ ကျွင်းမိသားစုရဲ့ နတ်ဘုရားသားတော်ဖြစ်ပြီး နည်းနည်းမှ အရှက်မရှိဘူး"

သူ့နောက်ကွယ်တွင် သက်ရှည်ခြင်းနတ်ဘုရားမက အေးစက်စက်ဖြင့် ပြောလိုက်၏။

ကျွင်းရှောင်ယောက်ကတော့ စိတ်ထဲမထားပေ။ သေဆုံးရန် ကံကြမ္မာရှိသော လူတစ်ယောက်ကို ဒေါသထွက်နေစရာ မလိုပါ။

"မင်းဘာသိလဲ။ ငါက ကိုယ်ကျင့်တရားနဲ့ လူတွေကို အနိုင်ယူနေတာ။ သူတို့ရဲ့ မျက်နှာပေါ်က ဝမ်းသာလို့ကျတဲ့ မျက်ရည်တွေကို မင်းမမြင်ဘူးလား"

ကျွင်းရှောင်ယောက်က လေးလေးနက်နက် ပြောလိုက်၏။

သက်ရှည်ခြင်းနတ်ဘုရားမ ဘာပြောရမည်မှန်း မသိတော့ပေ။

ဤနတ်ဘုရားသားတော်က ပုံမှန်အားဖြင့် တည်ငြိမ်ပြီး လျစ်လျူရှုထားတတ်သည်။

သို့ရာတွင်၊ သူက ဟာသလည်း ပြောတတ်သေးသည်။

ထိုအချိန်တွင်၊ သူတို့ရှေ့နားမှ နောက်ထပ် ပုံရိပ်သုံးခု ပေါ်လာသည်။

ကျွင်းရှောင်ယောက်၏ မျက်လုံးများက အနည်းငယ် တောက်ပသွား၏။

"ငါ ဒီနေရာမှာ အသိမိတ်ဆွေဟောင်းနဲ့ ပြန်ဆုံလိမ့်မယ်လို့ မမျှော်လင့်ထားဘူး"

ဟုတ်သည်။

ထိုပုဂ္ဂိုလ်သုံးဦးက ပြန်လည်ဝင်စားခြင်းပင်လယ်၏ သခင်လေးသုံးဦးမှတပါး အခြားမဟုတ်ပါ။

ရွှမ်မီ၊ ရွှမ်လီ၊ ရွှမ်မော့။

ကွေ့ရှအပျက်အယွင်းသို့ ဝင်ရောက်သောအခါ လူတိုင်းက ကျပန်းဆင်းသက်ကြရသည်။

သို့သော်လည်း ညီအစ်ကိုသုံးယောက်၏ ထူးခြားသော အမှတ်အသားကြောင့် မကြာမီ ပြန်ဆုံခဲ့ပေသည်။

"အစ်ကိုကြီး၊ ကျုပ်တို့သာ အဲဒီ အထူးအင်မော်တယ်ကျောက်တွင်းမှာ ထိပ်တန်းအဆင့် အင်မော်တယ်သွေးကြောတစ်ခုကို ရှာတွေ့နိုင်ရင်... ကျုပ်တို ညီအစ်ကိုသုံးယောက် ကျင့်ကြံဖို့ လုံလောက်တဲ့ အင်မော်တယ်ဓာတ်စွမ်းအင်တွေကို သန့်စင်နိုင်လိမ့်မယ်"

"ဟုတ်တယ်၊ ကျုပ်တို့က အင်မော်တယ်သွေးကြောတွေ အတော်များများ စုဆောင်းထားပေမဲ့ ထိပ်တန်းအဆင့် အင်မော်တယ်သွေးကြောလောက်တော့ မကောင်းသေးဘူး"

ရွှမ်လီနှင့် ရွှမ်မော့တို့က ပြောဆိုလိုက်ကြသည်။

"သေချာတာပေါ့"

ရွှမ်မီက အနည်းငယ် ခေါင်းညိတ်လိုက်၏။

ထိုအချိန်တွင်၊ ရုတ်တရက် အသံတစ်သံ ထွက်ပေါ်လာသည်။

"မိတ်ဆွေတို့... မတွေ့ရတာ ကြာပြီ၊ ကျုပ်က ခင်ဗျားတို့ကို တကယ်သတိရနေတာ"

ထိုအသံကို ကြားရပြီးနောက် ညီအစ်ကိုသုံးယောက်က ဆတ်ခနဲ တုန်သွားသည်။ သူတို့၏ ကျောရိုးတစ်လျှောက် အေးစိမ့်သွားသလို ခံစားလိုက်ကြရ၏။

"မင်းမလာခဲ့နဲ့"

"ပြေး"

ညီအစ်ကိုသုံးယောက်က တွန့်ဆုတ်ခြင်းမရှိဘဲ သုတ်ခြေတင်ကာ ပြေးကြတော့သည်။

မည်သူက ထင်ထားခဲ့မည်နည်း။

ပြန်လည်ဝင်စားခြင်းပင်လယ်၏ သခင်လေးသုံးဦးက ကောင်းကင်ကိုးပါးတွင် အလွန် ကျော်ကြားသည်။

သို့သော်လည်း ကျွင်းရှောင်ယောက်၏အသံကို ကြားလိုက်ရချိန်မှာတော့ နောက်ကို လှည့်ပင်မကြည့်ဘဲ ထွက်ပြေးကြ၏။

ယင်းက ကျွင်းရှောင်ယောက်ကို ဆွံ့အသွားစေသည်။

သူက သက်ရှည်ခြင်းနတ်ဘုရားမကို လှည့်ကြည့်လိုက်ပြီး သံသယဖြင့် မေးလိုက်သည်။

"ငါက နတ်ဆိုးလား။ ငါက အဲဒီလောက်တောင် ကြောက်စရာကောင်းတာလား"

ဤစကားကိုကြားသောအခါ မျက်နှာတွင် အညစ်အကြေးနှင့် သွေးပုပ်များ ပေရေနေသော သက်ရှည်ခြင်းနတ်ဘုရားမက ငိုချင်သော်လည်း မျက်ရည်မထွက်လာပေ။

'နင်... သောက်ကျိုးနည်းပဲ၊ နင့်ကိုယ်နင် မိစ္ဆာတစ်ကောင်ဆိုတာ မသိဘူးလား။ နင့်ရဲ့နှလုံးသားထဲမှာ ကိုယ်ကျင့်တရားဆိုတာရော ရှိရဲ့လား'

သက်ရှည်ခြင်းနတ်ဘုရားမက အသံကျယ်ကျယ်ဖြင့် ဆဲဆိုချင်စိတ်ကို မနည်းအောင့်ထားရသည်။ သူ့တစ်သက်တာမှာ ကျွင်းရှောင်ယောက်လောက် ကောက်ကျစ်သော မိစ္ဆာမျိုးကို တစ်ခါမှ မကြုံဖူးခဲ့ပေ။