အခန်း ၁၄၆၉

အခန်း ( ၁၄၆၉ ) ပါရမီရှင် လေးဦး၏ တိုက်ပွဲကွင်းပြင်။

ဤမြင်ကွင်းကြောင့် လူငယ်လေးတိုင်း တုန်လှုပ်သွားကြသည်။

သက်ရှည်ခြင်းနတ်ဘုရားမက လူတိုင်း၏ နှလုံးသားထဲမှ နတ်ဘုရားမတစ်ပါး ဖြစ်သည်။

သူသည် အလွန်လှပသော်လည်း ရေခဲကဲ့သို့ မိန်းမလှတစ်ဦးမဟုတ်ဘဲ ဖြူစင်ကာ အပြစ်ကင်းစင်ပြီး ချဉ်းကပ်ရလွယ်ကူသူပင်။

သို့ရာတွင်၊ ယခုတော့ သူ့မျက်နှာက သွေးနှင့် အညစ်အကြေးများ ပြည့်နှက်နေသည်။ ဆံပင်များမှာလည်း ဖွာလံကျဲလျက် ဖရိုဖရဲ ဖြစ်၏။

အရေးကြီးအချက်ဆုံးက၊ သူ့လည်ပင်းမှာ သံကြိုးနှင့်ချည်ထားတာကြောင့် ခွေးတစ်ကောင်ကဲ့သို့ဖြစ်ပြီး သနားစရာကောင်းလှသည်။

သူက သူတို့ရဲ့ အိပ်မက်ထဲက နတ်ဘုရားမကော ဟုတ်ရဲ့လား။

ဤခံစားချက်က အလှအပစစ်ထုတ်ခြင်း ကိရိယာတစ်ခုဖြင့် အရုပ်ဆိုးသော အဖြစ်မှန်ကို ဖော်ထုတ်လိုက်သလိုပင်။

ဤအချိန်တွင်၊ သက်ရှည်ခြင်းနတ်ဘုရားမကလည်း ထုံကျဉ်နေပြီ ဖြစ်သည်။

သူက သူ့ပတ်ဝန်းကျင်မှ အကြည့်များစွာကို လျစ်လျူရှုထားလိုက်၏။

ယခုအခါ သူ့မျက်လုံးထဲမှာ လူတစ်ယောက်သာ ရှိတော့သည်။

၎င်းက သူမ၏ တစ်ခုတည်းသော မျှော်လင့်ချက် ဖြစ်သည်။

"ဧကရာဇ်သားတော်"

သက်ရှည်ခြင်းနတ်ဘုရားမက ဆို့နင့်ကြေကွဲသော အသံဖြင့် အော်ဟစ်လိုက်သည်။

"ကျွင်းရှောင်ယောက်၊ မင်း..."

ပုံမှန်အားဖြင့် တည်ငြိမ်အေးချမ်းသော သက်ရှည်ခြင်းဧကရာဇ်၏သားတော်လည်း ယခုအချိန်တွင် ဒေါသပေါက်ကွဲသွား၏။

မည်သို့ပင်ဖြစ်စေ၊ သက်ရှည်ခြင်းနတ်ဘုရားမက သက်ရှည်ကျွန်း၏ ပါရမီရှင်တစ်ယောက် ဖြစ်သည်။

သူမက အနာဂတ်မှာ သူ့ဇနီးဖြစ်လာရန် ကံပါသူတစ်ဦးပင်။

သို့သော်လည်း ယခုတော့ သူမ၏ အခြေအနေမှာ ဆိုးရွားလွန်းလှသည်။

"သက်ရှည်ခြင်းဧကရာဇ်သားတော်၊ မင်းဘာတွေးနေလဲဆိုတာ ငါသိပါတယ်။ ဒါပေမဲ့ စိတ်မပူပါနဲ့၊ ငါ့ရဲ့စံနှုန်းတွေက အဲဒီလောက်မနိမ့်ဘူး"

"ငါ သူ့ကိုစားဖို့ စိတ်မဝင်စားဘူး"

ကျွင်းရှောင်ယောက်က ခေါင်းကို အနည်းငယ်ခါယမ်းလိုက်သည်။

သူက သက်ရှည်ခြင်းနတ်ဘုရားမကဲ့သို့ လှည့်စားတတ်သော အမျိုးသမီးကို စိတ်မဝင်စားပါ။

"မင်း..."

ဒါကိုကြားသောအခါ သက်ရှည်ခြင်းဧကရာဇ်၏သားတော်က စိတ်မအေးသည့်အပြင် ပို၍ ဒေါသထွက်လာခဲ့သည်။

တစ်ဖက်လူ အထင်မြင်သေးစွာ နှိမ့်ချနေသော အမျိုးသမီးက သူ့ဇနီးလောင်းပင် မဟုတ်လော။

"ဧကရာဇ်အရှင်၊ သူ့ကိုသတ်ရမယ်"

သက်ရှည်ခြင်းနတ်ဘုရားမက သနားစဖွယ် ငိုကြွေးရင်း အော်ပြောလိုက်သည်။

"သွားပါပြီ၊ ငါ့မျက်စိတွေ..."

ပတ်ဝန်းကျင်မှ လူငယ်များလည်း သူတို့၏နှလုံးသား အက်ကွဲသွားသလို ခံစားလိုက်ရသည်။

ဒါက ကောင်းကင်ကိုးပါးမှာ အလှဆုံးအမျိုးသမီးရဲ့ တကယ့်မျက်နှာလား။

"တော်လောက်ပြီ၊ ရှက်စရာကောင်းလွန်းတယ်"

သက်ရှည်ခြင်းဧကရာဇ်သားတော်၏ မျက်ခုံးများက အနည်းငယ် လှုပ်သွားသည်။

သက်ရှည်ခြင်းနတ်ဘုရားမက သူကိုယ်တိုင်နှင့် သက်ရှည်ကျွန်းတို့ အရှက်ရစေသည်။

"ဧကရာဇ်အရှင်..."

သက်ရှည်ခြင်းနတ်ဘုရားမက အံ့အားသင့်သွားသည်။

ဤအခိုက်တွင်၊ သက်ရှည်ခြင်းဧကရာဇ်၏သားတော်က တစ်မျိုးပြောင်းနေသလို ခံစားလိုက်ရ၏။

"ကျွင်းရှောင်ယောက်၊ မင်းမှာ ကျွင်းမိသားစုရဲ့ ကျောထောက်နောက်ခံရှိရင်တောင် သက်ရှည်ကျွန်းရဲ့ အမျက်ဒေါသကို မခံနိုင်ဘူး"

သက်ရှည်ခြင်းဧကရာဇ်၏သားတော်က အေးစက်စွာ ပြောသည်။

"အပိုစကားတွေ တော်လောက်ပြီ၊ အခု ကောင်းကင်ကိုးပါးမှာ နံပါတ်တစ်ဆိုတဲ့ မင်းရဲ့ အရည်အချင်းက ဘယ်လိုလဲဆိုတာ ကြည့်ရအောင်"

ကျွင်းရှောင်ယောက်က အပိုစကားများ ပြောဆိုရင်း ငြင်းခုန်နေရန် စိတ်မဝင်စားပါ။

သူ ကောင်းကင်ကိုးပါးသို့ ရောက်ရှိလာရခြင်း ရည်ရွယ်ချက်က ထူးချွန်ထက်မြက်သော လူငယ်

သူ့ရဲ့ ကောင်းကင်ဘုံကိုးခုကို အနာဂတ် ပြဿနာများကို ဖယ်ရှားပြီး ခုခံသူအားလုံးကို နှိမ်နင်းရန် ဖြစ်သည်။

သက်ရှည်ခြင်းဧကရာဇ်၏သားတော်ကို အနိုင်ယူပြီးပါက သူဟာ ကောင်းကင်ကိုးပါး၏ လူငယ်မျိုးဆက်တစ်ခုလုံးကို ဖယ်ရှားလိုက်ပြီဟု ဆိုရမည်။

"ဝုန်း"

နောက်ထပ်စကားတစ်လုံးမှ မပြောကြတော့ပါ။

သက်ရှည်ခြင်းဧကရာဇ်၏သားတော်က ဦးစွာ လှုပ်ရှားလိုက်သည်။

သူသာ သက်ရှည်ခြင်းနတ်ဘုရားမကို မကယ်တင်လျှင် ပို၍ မျက်နှာပျက်ရလိမ့်မည်။

ထို့ပြင်၊ သက်ရှည်ခြင်းဧကရာဇ်၏သားတော်မှာ ထူးခြားသော အတွေးတစ်ခု ရှိသည်။

သူက ကျွင်းရှောင်ယောက်ကို အနိုင်ယူပြီး သူ၏ ကံကြမ္မာကို ခိုးယူရလိမ့်မည်။

ကံကြမ္မာဆိုသည်မှာ အဘယ်နည်း။

၎င်းသည် မမြင်နိုင်၊ မထိတွေ့နိုင်သော်လည်း လူတစ်ဦး၏ အနာဂတ်လမ်းကြောင်းကို လွှမ်းမိုးနိုင်သည်။

ဥပမာအားဖြင့် သက်ရှည်ခြင်းဧကရာဇ်၏သားတော်က ယခုအခါ ကောင်းကင်ကိုးပါးရှိ လူငယ်မျိုးဆက်များထဲတွင် နံပါတ်တစ်ဖြစ်ပြီး နံပါတ်တစ်ဖြစ်ခြင်း၏ ကံကောင်းခြင်းများ ရှိသည်။

ကျင့်ခြင်းဖြစ်စေ၊ ရတနာများ ရယူခြင်းဖြစ်စေ... အရာအားလုံး အဆင်ပြေချောမွေ့မှုရှိ၏။

သူသာ ကျွင်းရှောင်ယောက်ကို အနိုင်ယူနိုင်လျှင်၊ ကျွင်းရှောင်ယောက်၏ ကံကောင်းခြင်းများကိုလည်း ယူသွားနိုင်သည်။

ဒါဟာ သူ့အတွက် ကြီးမားသော ကောင်းကျိုးသက်ရောက်မှုများ ရှိလိမ့်မည်။

ထို့ကြောင့် ရည်ရွယ်ချက်က မည်သို့ပင်ရှိစေကာမူ...

သက်ရှည်ခြင်းဧကရာဇ်၏သားတော်၏ လက်ရှိအတွေးမှာ ကျွင်းရှောင်ယောက်ကို ဖိနှိပ်ဖယ်ရှားရန် ဖြစ်သည်။

ဟုတ်သည်၊ သူ့ကို ဖိနှိပ်ပြီး သတ်ပစ်နိုင်လျှင် ပိုကောင်းလိမ့်မည်။

သို့သော်လည်း ကျွင်းမိသားစုကို ဒေါသထွက်စေမှာမည် ဖြစ်သည်။

သို့ရာတွင်၊ သူက သူတို့သက်ရှည်ကျွန်း၏ ပထမဆုံး ယဇ်ဆရာသခင်က သူတို့ကို မုန်တိုင်းအားလုံးမှ ကာကွယ်ပေးထားမည်ဟု ယုံကြည်ခဲ့ပေသည်။

သက်ရှည်ခြင်းဧကရာဇ်၏သားတော်က လက်တစ်ဖက်တွင် ရွှေရောင်မီးခွက်ကို ကိုင်ထားပြီး ကျန်လက်တစ်ဖက်ဖြင့် ကျွင်းရှောင်ယောက် ဖိနှိပ်ရန် သူ့လက်ဖဝါးကို မြှောက်လိုက်သည်။

သူ၏ လက်ချောင်းငါးချောင်းပေါ်တွင် အလင်းရောင်ငါးမျိုးက တလက်လက် တောက်ပ‌နေ၏။

ဓာတ်ကြီးငါးပါးဖြစ်သော သတ္တု၊ သစ်သား၊ ရေ၊ မီးနှင့် မြေတို့သည် သူ၏လက်ချောင်းများနှင့် လက်ဖဝါးပေါ်တွင် စီးဆင်းလာတော့သည်။

ဤလှုပ်ရှားမှု တစ်ခုတည်းက သက်ရှည်ခြင်းဧကရာဇ်သားတော်၏ ကျင့်ကြံမှုဟာ အမှန်တကယ် ပြီးပြည့်စုံပြီး သာမန်ပါရမီရှင်များ မရောက်ရှိနိုင်သော အခြေအနေတစ်ခုသို့ ရောက်ရှိနေပြီဖြစ်ကြောင်း ထင်ရှားသည်။

၎င်းက ကျင့်ကြံမှုအခြေခံသက်သက်မဟုတ်ဘဲ နိယာမကို နားလည်ခြင်းလည်း ပါဝင်ပေသည်။

သက်ရှည်ခြင်းဧကရာဇ်၏သားတော်၏ စွမ်းရည်များအရ ဧကရာဇ်တစ်ပါးဖြစ်လာခြင်းသည် အထူးခက်ခဲသော အရာမဟုတ်ဟု ဆိုနိုင်သည်။

ဒါကိုမြင်တော့ ကျွင်းရှောင်ယောက်က သူ့လက်ချောင်းကို ဓားတစ်ချောင်းကဲ့သို့ ညွှန်ပြလိုက်သည်။

တောက်ပသော ဓားအလင်းက ဓာတ်ကြီးငါးပါး၏ စွမ်းအားကို ချက်ချင်း ဆုတ်ဖြဲလိုက်၏။

သက်ရှည်ခြင်းဧကရာဇ်၏သားတော်က သူ၏ကျင့်ကြံမှုအခြေခံကို ထုတ်ဖော်ပြီး ကောင်းကင်တိုင်များကဲ့သို့ လက်ချောင်းငါးချောင်းဖြင့် ဖိချလိုက်သည်။

တစ်ချိန်တည်းမှာပင်၊ ဓာတ်ကြီးငါးပါး၏ စွမ်းအားက တဟုန်ထိုး မြင့်တက်လာပြီး ကပ်ဘေးဒုက္ခ၏ အလင်းရောင်က နေရာတိုင်းတွင် ထွန်းလင်းလာတော့သည်။

ဓားကြီးငါးပါး ကောင်းကင်အပြစ်ပေးခြင်း တိုက်ကွက်။

ဤနည်းလမ်းတစ်ခုတည်းက ကောင်းကင်နဂါးနှင့် ဖီးနစ်စာရင်း၏ ထိပ်ဆုံးငါးယောက်အောက်မှ ပါရမီရှင်အားလုံးကို ပြင်းထန်စွာ ထိခိုက်ဒဏ်ရာရစေနိုင်သည်ဟု ဆိုနိုင်သည်။

"ဒါက ကောင်းကင်ကိုးပါးမှာ နံပါတ်တစ်ရဲ့ အစွမ်းလား"

ခွန်းရွှီကျစ်က လေးနက်စွာ ကြည့်လိုက်သည်။

သူက နဂါးနှင့်ဖီးနစ်စာရင်းမှာ ဆဋ္ဌမဖြစ်သော်လည်း ဤတိုက်ခိုက်မှုကို ရင်ဆိုင်ရလျှင် ဒဏ်ရာရသွားလိမ့်မည်။

"ဒီလို အကဲစမ်းပြီး တိုက်ခိုက်နေစရာ မလိုပါဘူး။ မင်းရဲ့ တကယ့်စွမ်းရည်ကို ထုတ်လိုက်"

ဤလှုပ်ရှားမှုက တော်ရုံပါရမီရှင်များကို ပြင်းထန်စွာ ထိခိုက်ဒဏ်ရာရစေရန် လုံလောက်သည်။

သို့သော်လည်း ကျွင်းရှောင်ယောက်ကတော့ အမူအရာ လုံးဝ မပြောင်းပေ။

သက်ရှည်ခြင်းဧကရာဇ်၏သားတော်က သူ့ခွန်အားကို အကဲစမ်းကြည့်ချင်နေသည်။

သို့ရာတွင်... ကံမကောင်းစွာဖြင့် ကျွင်းရှောင်ယောက်ကိုယ်တိုင်ပင် သူ၏ အကန့်အသတ်က ဘယ်မှာရှိမှန်း မသိပါ။

ကျွင်းရှောင်‌ယောက်က ရိုးရှင်းသော်လည်း ကောင်းကင်ကို ခွဲထုတ်နိုင်ပုံရသည့် စွမ်းအားမျိုးဖြင့် လက်သီးတစ်ချက် ထုတ်ဖော်လိုက်သည်။

ဒါက နတ်ဆိုးနတ်ဘုရားပုရွက်ဆိတ်မျိုးနွယ်၏ နတ်ဘုရားစွမ်းရည်ဖြစ်ပြီး လက်သီးတစ်ချက်ဖြင့် ကောင်းကင်ကိုဖွင့်၍ ဟင်းလင်းပြင်ကို စက္ကူတစ်ရွက်ပမာ တုန်လှုပ်စေနိုင်သည်။

ကံကောင်းထောက်မစွာဖြင့် ဤဒီနေရာက အထူးစည်းမျဉ်းများနှင့် ကွေ့ရှအပျက်အယွင်း ဖြစ်သည်။ မဟုတ်လျှင်၊ ကျွင်းရှောင်ယောက်၏ လက်သီးချက်ကြောင့် ဟင်းလင်းပြင်မှာ အပေါက်ကြီးတစ်ခု ဖြစ်ပေါ်လာလိမ့်မည်။

ဓာတ်ကြီးငါးပါး ကောင်းကင်အပြစ်ပေးခြင်းတိုက်ကွက်က လက်သီးတစ်ချက်ဖြင့် ကျိုးပျက်သွားခဲ့သည်။

သို့သော်လည်း သက်ရှည်ခြင်းဧကရာဇ်၏သားတော်က အံ့ဩခြင်းတော့ မဖြစ်မိသေးပါ။ ဒါက သူ၏ မျှော်လင့်ချက်အတွင်း၌သာ ရှိသည်။

ကျွင်းရှောင်ယောက်သာ ဟန်ဆောင်နေသူဖြစ်လျှင် ဤအဆင့်ထိ ရောက်လာနိုင်မည် မဟုတ်ပါ။

သက်ရှည်ခြင်းဧကရာဇ်၏သားတော်က အနည်းငယ် လေးနက်လာသည်။

သူက နောက်တစ်ဖက် လက်လှမ်းလိုက်ရာ နဂါးဟိန်းသံတစ်ခုက ပဲ့တင်ထပ်သွား၏။

ရွှေရောင်တောက်ပနေသော နဂါးလက်သည်းတစ်ချောင်းက ပေါ်လာပြီး ကျွင်းရှောင်ယောက်ကို ဆွဲယူရန် လှမ်းလိုက်တော့သည်။

နဂါးလက်သည်း ဆုပ်ကိုင်ခြင်း။

"အလို၊ အစစ်အမှန်နဂါးရဲ့ သဘာဝစွမ်းရည်လား"

ကျွင်းရှောင်ယောက်က နောက်ဆုံးတွင် အနည်းငယ် ပိုဂရုစိုက်လာသည်။

အစစ်အမှန်နဂါး၏ သဘာဝစွမ်းရည်က နတ်ဖီးနစ်၏ သဘာဝစွမ်းရည်၊ ခွန်ပန်၏ သဘာဝစွမ်းရည်၊ မိုးကြိုးဧကရာဇ်ကြီး သဘာဝစွမ်းရည်နှင့် နတ်ဆိုးနတ်ဘုရားပုရွက်ဆိတ်၏ သဘာဝစွမ်းရည်တို့နှင့် အတူတူပင်။

ဤအရာအားလုံးက ကမ္ဘာပေါ်တွင် အစွမ်းထက်ဆုံးသော နတ်ဘုရားသားရဲနည်းစနစ်များဖြစ်ပြီး အကန့်အသတ်မဲ့ စွမ်းအားကို ပိုင်ဆိုင်ထားကြသည်။

အစစ်အမှန်နဂါး သဘာဝ နတ်ဘုရားစွမ်းရည်က ရှားပါးသော်လည်း သက်ရှည်ခြင်းဧကရာဇ်၏သားတော်က ၎င်းကို တတ်မြောက်နေသည့်အပြင် မြင့်မားသော အဆင့်တစ်ခုသို့ပင် လေ့ကျင့်ထားပြီးပြီ။

ကျွင်းရှောင်ယောက်လည်း အနည်းငယ်ပို၍ လေးနက်လာပြီး အကြွင်းမဲ့ခွန်ပန်အမြန်နှုန်းဖြင့် ခြေလှမ်းလိုက်သည်။

သူက ပင်လယ်ရေမျက်နှာပြင်ထက်သို့ ပျံတက်လာသော ခွန်ပန်တစ်ကောင်ကဲ့သို့ နဂါးလက်သည်းကို ရှောင်တိမ်း၍ သက်ရှည်ခြင်းဧကရာဇ်၏သားတော်ထံ လျင်မြန်စွာ ဖြတ်သန်းသွား၏။

သက်ရှည်ခြင်းဧကရာဇ်၏သားတော်က အစစ်အမှန်နဂါးနည်းစနစ်ကို အသက်သွင်းလိုက်သည်။ သူ့ခန္ဓာကိုယ်တစ်ခုလုံးကို လက်သည်းငါးချောင်းပါ ရွှေရောင်နဂါးတစ်ကောင်က ဝန်းရံထားပြီး ဧကရာဇ်တစ်ပါးကဲ့သို့ ဖြစ်၏။

ဤအခိုက်တွင်၊ ကျွင်းရှောင်ယောက်နှင့် သက်ရှည်ခြင်းဧကရာဇ်သားတော်တို့က ခွန်ပန်နှင့် အစစ်အမှန်နဂါးတို့ တိုက်ခိုက်နေကြသလိုပင်။

တစ်ချိန်တည်းမှာပင်၊ တောက်ဝမ်ကလည်း လှုပ်ရှားမှုတစ်ခု ပြုလုပ်ခဲ့သည်။

သူက ကျွင်းရှောင်ယောက်ကို ဆန့်ကျင်တိုက်ခိုက်လိုသည်။

သို့သော်လည်း သူအလိုရှိတိုင်း ဖြစ်ခွင့်မရပေ။

ဓားအလင်းတစ်ခုက သူ့ကို ပိတ်ဆို့ထားခဲ့သည်။

"မင်းက သေချင်နေတယ်ဆိုရင် မင်းရဲ့ဆန္ဒကို ငါဖြည့်ဆည်းပေးမယ်"

တောက်ဝမ်က ကြုံးမောင်းလိုက်၏။ မိုးနှင့်မြေကို ဝါးမျိုတော့မည့် တောက်ထျဲသားရဲကြီးတစ်ကောင်ကဲ့သို့ ရက်စက်ကြမ်းကြုတ်သော အငွေ့အသက်များလည်း ထွက်ပေါ်လာတော့သည်။

"မင်း တိိရစ္ဆာန်ကောင်... မင်းကများ ငါ့ကို ကြောက်ရွံ့စေနိုင်မယ်လို့ ထင်လို့လား"

ရဲ့ကူချန်က သုံးပေရှည်သော သစ်သားဓားကို ကိုင်ဆောင်ထားသည်။ သူ့ထံမှ ဓားအရှိန်အဝါက ပြင်းထန်လွန်းပြီး ဓားနတ်ဘုရားတစ်ပါး ကမ္ဘာပေါ်တွင် ပြန်လည်ပေါ်လာသကဲ့သို့ ဖြစ်၏။

ကျွင်းရှောင်ယောက်နှင့် သက်ရှည်ခြင်းဧကရာဇ်၏သားတော်...

တောက်ဝမ်နှင့် ရဲ့ကူချန်...

မိုင်ပေါင်း သိန်းချီကျယ်ဝန်းသော အထူးအင်မော်တယ်ကျောက်တွင်းတစ်ခုလုံးက ချက်ချင်းပင် ပါရမီရှင်လေးဦးအတွက် ယှဉ်ပြိုင်ရာ တိုက်ပွဲကွင်းပြင်အဖြစ်သို့ ပြောင်းလဲသွားတော့သည်။