အခန်း ၁၄၇၀

အခန်း ( ၁၄၇၀ ) ကမ္ဘာနှစ်ခုမှ နံပါတ်တစ် ပါရမီရှင်နှစ်ဦး၏ တိုက်ပွဲ။

ဒါက ရှားပါးပြီး ထူးခြားသော တိုက်ပွဲတစ်ခုဆိုတာ သံသယဖြစ်စရာ မလိုပါ။

သူတို့ထဲမှ တစ်ယောက်က ကောင်းကင်ကိုးပါးတွင် နံပါတ်တစ် ပါရမီရှင် ဖြစ်သည်။

ကျန်တစ်ယောက်မှာတော့ အင်မော်တယ်နယ်မြေကြီးမှ နံပါတ်တစ် ပါရမီရှင် ဖြစ်၏။

ဒါက နယ်ပယ်နှစ်ခုမှ နံပါတ်တစ်ကျွမ်းကျင်သူများကြားက တိုက်ပွဲတစ်ခုဖြစ်ကာ တွေ့မြင်ရခဲသည်။

ဒါကို ပြင်ပကမ္ဘာသို့ ထုတ်ဖော်ပြသမည်ဆိုလျှင် ကြီးမားသော လှုပ်ခတ်မှုများကို ဖြစ်ပေါ်စေပြီး လူအများ၏ အာရုံစိုက်မှုကို ဆွဲဆောင်နိုင်လိမ့်မည်။

သို့သော်လည်း ယခုတော့ အထူးအင်မော်တယ်ကျောက်တွင်း၏ ပတ်ဝန်းကျင်မှ ပါရမီရှင်များသာ ကံကောင်းစွာ မြင်တွေ့ခွင့်ရသည်။

ထို့ပြင် တောက်ဝမ်နှင့် ရဲ့ကူချန်လည်း ရှိသေးသည်။

တောက်ဝမ်၏ စွမ်းအားက အထူးပြောစရာမလိုပါ။ သူက ကောင်းကင်နဂါးနှင့် ဖီးနစ်းစာရင်းတွင် ဒုတိယ ဖြစ်သည်။

သူက သက်ရှည်ခြင်းဧကရာဇ်၏သားတော်ကို စိန်ခေါ်ရန် အရည်အချင်းပြည့်မီသူ အနည်းစုထဲမှ တစ်ဦးလည်း ဖြစ်၏။

ဓားသင်္ချိုင်း၏ ဆက်ခံသူအနေဖြင့် ရဲ့ကူချန်ကလည်း သာမန်မဟုတ်ပေ။

သူက တုကူးဓားနတ်ဘုရားနှင့် တစ်စုံတစ်ရာ ဆက်စပ်မှုရှိနိုင်သည်ဟူသော ကောလာဟလများပင် ပျံ့နှံ့နေခဲ့သည်။

သူတို့လေးဦးကြားမှ ဤတိုက်ပွဲက အခြေခံအားဖြင့် လူငယ်မျိုးဆက်၏ အထွတ်အထိပ်တိုက်ပွဲကို ကိုယ်စားပြုသည်ဟု ဆိုနိုင်ပေသည်။

"မဟုတ်ဘူး၊ ဧကရာဇ်သားတော်က နင့်ကို သေချာပေါက်သတ်လိမ့်မယ်..."

သက်ရှည်ခြင်းနတ်ဘုရားမက တစ်ယောက်တည်း ပြောနေသလို တီးတိုး ပြောလိုက်သည်။

သူ၏ တစ်ခုတည်းသော မျှော်လင့်ချက်က သူ့ရှေ့မှာပဲ ရှိနေပြီ။

"ဝုန်း"

ကောင်းကင်ယံတွင်၊ ခွန်ပန်က ပင်လယ်ကို ဖြတ်ကျော်ပြီး ကောင်းကင်ယံသို့ ထိုးဖောက်ရန် သူ၏တောင်ပံများကို ဖြန့်ကျက်လိုက်သည်။

မိုးနှင့်မြေကို တုန်ဟီးစေသော နဂါးတစ်ကောင်၏ ဟိန်းဟောက်သံလည်း ရှိ၏။

အပြင်လူများ၏အမြင်တွင် သူတို့က ရှေးဟောင်းခွန်ပန်နှင့် အစစ်အမှန်နဂါးတို့ တိုက်ခိုက်နေသလိုပင်။

ထိုအတက်အကျများက ကြောက်စရာကောင်းလွန်းသည်။

နိယာမစွမ်းအားကလည်း အဆုံးမရှိသော သမုဒ္ဒရာရေပြင်ကဲ့သို့ မြင့်တက်နေ၏။

ဒါက လူငယ်နှစ်ယောက်ကြားမှ တိုက်ပွဲတစ်ခုဟု မြင်ယောင်ကြည့်ရန် ခက်ခဲသည်။

သူတို့ထံမှ နောက်ဆက်တွဲ တိုက်ခိုက်မှုလှိုင်းများသည်ပင် သာမန်လူများအတွက် ဒဏ်ရာရစေနိုင်သေးသည်။

သက်ရှည်ခြင်းဧကရာဇ်၏သားတော်က အစစ်အမှန်နဂါး၏ သဘာဝစွမ်းရည်ကို ပြီးပြည့်စုံသော အခြေအနေသို့ အမှန်တကယ် လေ့ကျင့်ထားခဲ့သည်။

သူ၏ လှုပ်ရှားမှုတိုင်းက ရှေးဦးနဂါးတစ်ကောင် တိုက်ခိုက်နေသလိုပင်။

နဂါးလက်သည်း ကုပ်ဖြဲခြင်း၊ အစစ်အမှန်နဂါး၏ ဟိန်းသံ၊ နဂါးအမြီးရိုက်ချက်...

အစစ်အမှန်နဂါးတို့၏ တိုက်ခိုက်မှုနည်းလမ်း အမျိုးမျိုးကို သက်ရှည်ခြင်းဧကရာဇ်၏သားတော်က ထုတ်ဖော်ပြသခဲ့သည်။

ဟုတ်သည်၊ ကျွင်းရှောင်ယောက်က နောက်မဆုတ်ပေ။

သူက ခွန်ပန် သဘာဝ နတ်ဘုရားစွမ်းရည်ကို ပိုင်ဆိုင်ထားသည်။

မိုးကြိုးဧကရာဇ်၏ မဟာနတ်ဘုရားစွမ်းရည်ကဲ့သို့ ထူးကဲသော နတ်ဘုရားစွမ်းရည်များလည်း ရှိသေးသည်။

ကျွင်းရှောင်ယောက်၏ လှုပ်ရှားမှုတိုင်းတွင် ယင်နှင့်ယန်ကို ပုံဖော်ထားသော ခွန်ပန်ပုံရိပ်များ ပေါ်လာတတ်သည်။

မိုးကြိုးထစ်ချုံးသံနှင့်အတူ ပတ်ဝန်းကျင် လေဟာနယ်ကို တုန်ခါစေသော မိုးကြိုးပင်လယ်ကြီး ဖြစ်ပေါ်လာရ၏။

သန့်စင်သော ခွန်အား၏ ပြယုဂ်ဖြစ်သော နတ်ဆိုးနတ်ဘုရားပုရွက်ဆိတ်၏ သဘာဝစွမ်းရည်လည်း ရှိသေးသည်။

ခရမ်းရွှေရောင် ပုရွက်ဆိတ်တစ်ကောင်၏ ပုံရိပ်နှင့်အတူ ကောင်းကင်က တုန်ခါရသည်။

အစစ်အမှန်နဂါး၏ မဟာနတ်ဘုရားစွမ်းရည်က အမှန်တကယ် အစွမ်းထက်ပြီး အထင်ကြီးစရာကောင်းသည်။

သို့သော်လည်း ကျွင်းရှောင်ယောက်က တူညီသော အဆင့်ရှိ နတ်ဘုရားစွမ်းရည် သုံးခုကို တပြိုင်နက်တည်း ထုတ်ပြသခဲ့၏။ အားလုံးကလည်း ပြီးပြည့်စုံသောအဆင့်သို့ ရောက်ရှိနေကြပြီ။

"ဝုန်း... ဝုန်း..."

အသက်ရှူချိန် အနည်းငယ်အတွင်းမှာပင် သူတို့နှစ်ယောက်က တိုက်ခိုက်မှုများစွာ ထိပ်တိုက်ရင်ဆိုင်ခဲ့ကြသည်။

နောက်ဆုံးတွင်၊ သက်ရှည်ခြင်းဧကရာဇ်သားတော်က ခြေလှမ်းအနည်းငယ် နောက်သို့ဆုတ်သွားရပြီး သူ့မျက်လုံးများတွင် လေးနက်သော အရိပ်အယောင်တစ်ခု ပေါ်လာတော့သည်။

"ဘာ၊ သက်ရှည်ခြင်းဧကရာဇ်သားတော်က တကယ်ကြီး အားနည်းချက်ရှိနေတာလား"

ဤမြင်ကွင်းကို မြင်လိုက်ရပြီးနောက်၊ အထူးအင်မော်တယ်ကျောက်တွင်း၏ ပတ်ဝန်းကျင်ရှိ လူတိုင်း မယုံနိုင်လောက်အောင် ဖြစ်သွားကြသည်။

ရှေးယခင်က သက်ရှည်ခြင်းဧကရာဇ်၏သားတော်မှာ လှုပ်ရှားခဲသည်။

အကြောင်းမှာ၊ မည်သူမျှ သူ့ကို စိန်ခေါ်ရဲခြင်း မရှိသောကြောင့်ပင်။

ရံဖန်ရံခါမှ စိန်ခေါ်သူတချို့ ထွက်ပေါ်လာတတ်သည်။

သို့သော်လည်း သူတို့အားလုံးက သက်ရှည်ခြင်းဧကရာဇ်သားတော် ဖိနှိပ်ခြင်းကို ခံခဲ့ရ၏။

ထို့ကြောင့် ကောင်းကင်ကိုးပါး၏ ကျင့်ကြံသူများအမြင်တွင် သက်ရှည်ခြင်းဧကရာဇ်သားတော်က မည်သူ့ကိုမဆို တစ်ချက်တည်းဖြင့် အနိုင်ယူနိုင်သည်။

ယခုတော့ တိုက်ခိုက်မှု ရာနှင့်ချီပြီး ရင်ဆိုင်ခဲ့ရသည့်အပြင် ခြေလှမ်းအနည်းငယ်ပင် နောက်ဆုတ်သွားခဲ့ရသေးသည်။

"ကျွင်းရှောင်ယောက်၊ မင်းက နည်းလမ်းတွေအများကြီးကို သင်ယူတတ်မြောက်ထားတာပဲ။ မင်းကို ထူးချွန်တဲ့ ပါရမီရှင်လို့ အမှန်ခေါ်ထိုက်တယ်"

သက်ရှည်ခြင်းဧကရာဇ်၏သားတော်က လေးနက်စွာ ပြောလိုက်သည်။

အစပိုင်းတွင်၊ ကောင်းကင်ကိုးပါးမှ ကျင့်ကြံသူတစ်ဦးအနေဖြင့် သာလွန်မြင့်မြတ်ခြင်းတို့ကို သူ ခံစားမိနေဆဲ ဖြစ်သည်။

သို့သော်လည်း ယခုတော့ ကျွင်းရှောင်ယောက်ကို ပြိုင်ဘက်တစ်ယောက်အဖြစ် သူ မှတ်ယူလာခဲ့ပြီ။

"ဒါက သွေးပူလေ့ကျင့်ခန်းလေးပါပဲ"

ကျွင်းရှောင်ယောက်က တည်ငြိမ်စွာ ပြောလိုက်သည်။

သူ့ကို ရင်ဆိုင်တိုက်ခိုက်နိုင်သူက များများ မရှိပေ။

ယခုမူ၊ တစ်ဦးနှင့် ထိပ်တိုက်တွေ့နေရပြီဖြစ်ရာ ဤအခွင့်အရေးကို အသုံးချပြီး လေ့ကျင့်လိုခဲ့သည်။

"ငါ ဧကရာဇ်သားတော်ကလည်း သွေးပူအောင် ဆော့ကစားနေရုံပဲကွ"

သက်ရှည်ခြင်းဧကရာဇ်သားတော်က အေးစက်စက် ပြောလိုက်၏။

သူတို့ သက်ရှည်ကျွန်း၏ အထူးစွမ်းရည်က အစစ်အမှန်နဂါး၏ သဘာဝစွမ်းရည် မဟုတ်ပါ။

ဒါက သက်ရှည်ခြင်း အင်မော်တယ်ကျမ်း ဖြစ်သည်။

၎င်းက အလွန်ရှားပါးသော အင်မော်တယ်ကျမ်းဖြစ်ပြီး အပြည့်အဝ အောင်မြင်ပါက ထာဝရအသက်ကိုပင် ပေးစွမ်းနိုင်သည်ဟု ကောလဟာလများ ရှိ၏။

သက်ရှည်ကျွန်းမှာ ဤကျမ်း၏အမည်ကို ပေးထားခြင်း ဖြစ်သည်။

ဤနည်းလမ်းဖြင့် သက်ရှည်ကျွန်းက ကောင်းကင်ကိုးပါးရှိ ရှေးအကျဆုံး တားမြစ်နယ်မြေများထဲမှ တစ်ခု ဖြစ်လာနိုင်ခဲ့ခြင်းပင်။

ဒဏ္ဍာရီများအရ သက်ရှည်ကျွန်း၏ အမည်မဖော်ရသော ပုဂ္ဂိုလ်က သက်ရှည်ခြင်း အင်မော်တယ်ကျမ်းကို ပြီးပြည့်စုံလုနီးပါးအခြေအနေအထိ လေ့ကျင့်ပြီးခဲ့ပြီဟု ဆိုသည်။

"အခု ငါ့ သက်ရှည်ကျွန်းရဲ့ လျှို့ဝှက်နည်းလမ်း အစစ်အမှန်ကို မင်းအမြင်ကျယ်စေဖို့ ပြသပေးမယ်"

သက်ရှည်ခြင်းဧကရာဇ်၏သားတော်က အားကောင်းသော အရှိန်အဝါတို့ကို ထုတ်လွှတ်လိုက်သည်။ သူ့ခန္ဓာကိုယ်တွင် မရေမတွက်နိုင်သော ရွန်းများ ပေါ်လာကြ၏။

တာအို အမှတ်အသားများနှင့် သက်ရှည်ခြင်းဧကရာဇ်၏သားတော်ထံမှ ထူးကဲသာလွန်သော အရှိန်အဝါတစ်ခု ထွက်ပေါ်လာတော့သည်။

ကျွင်းရှောင်ယောက်သည် ဤမတိုင်မီက သက်ရှည်ခြင်းနတ်ဘုရားမမှတဆင့် ဤနည်းလမ်းကို တွေ့မြင်ခဲ့ရသည်။

သို့သော်လည်း သက်ရှည်ခြင်းနတ်ဘုရားမ၏ သက်ရှည်ခြင်းအင်မော်တယ်ကျမ်းအပေါ် နားလည်မှုက သက်ရှည်ခြင်းဧကရာဇ်သားတော်နှင့် တူညီသောအဆင့်တွင် လုံးဝ မရှိပါ။

ရွှေရောင်မီးခွက်က သက်ရှည်ခြင်းဧကရာဇ်သားတော်၏ လက်ထဲမှ လွင့်မျောသွားလာသည်။

သူက လက်တစ်ဖက်နှင့် တံဆိပ်တော်တစ်ခုကို ပြုလုပ်လိုက်၏။

သူ့လက်ထဲမှာ နေနှင့်လကို ကိုင်ထားသလိုပင်။

ဤအခိုက်တွင်၊ သက်ရှည်ခြင်းဧကရာဇ်၏သားတော်က နေနှင့်လ၏ နတ်ဘုရားဘုရင်တစ်ပါးကဲ့သို့ ယင်နှင့်ယန်ကို ထိန်းချုပ်ပြီး စကြဝဠာကို ပြောင်းလဲစေသည်။

"နေနဲ့လ ထာဝရရှင်သန်ခြင်းရဲ့ တံဆိပ်တော်"

ဒါက သက်ရှည်ခြင်းအင်မော်တယ်ကျမ်း၏ အဆုံးစွန်နည်းလမ်းပင်။ ယင်နှင့်ယန်ကို ခြယ်လှယ်၊ နေနှင့်လကို ထိန်းချုပ်၊ စကြာဝဠာကို ပြောင်းလဲစေပြီး မိုးနှင့်မြေကို တုန်လှုပ်စေသည်။

ဤနည်းလမ်းကို အသက်သွင်းလိုက်သည်နှင့် အထူးအင်မော်တယ်ကျောက်တွင်းတစ်ခုလုံး တုန်ခါစပြုလာသည်။

ဤနေရာရှိ မိုးနှင့်မြေ၏ အထူးစည်းများကြောင့်မဟုတ်လျှင် မြေပြင်တစ်ခုလုံး ပြိုကျသွားလိမ့်မည်။

"ကြောက်စရာကောင်းလိုက်တာ၊ ဒါက သက်ရှည်ခြင်းဧကရာဇ်သားတော်ရဲ့ စစ်မှန်တဲ့ စွမ်းအားလား။ ကောင်းကင်ကိုးပါးမှာ လူဘယ်လောက်များများက ဒီတိုက်ခိုက်မှုကို ခံနိုင်ရည်ရှိပါ့မလဲ"

ပါရမီရှင်လေးဦး၏ တိုက်ပွဲတွင် ကြားညှပ်မိမည်ကို စိုးရိမ်သောကြောင့် လူအများက အလျင်အမြန် ဆုတ်ခွာသွားကြသည်။

"ဧကရာဇ်သားတော်က တကယ်ကို ပြိုင်ဘက်ကင်းပဲ"

သက်ရှည်ခြင်းဧကရာဇ်သားတော်၏ ကြီးစိုးသော အရှိန်အဝါတို့ကို မြင်သောအခါ သက်ရှည်ခြင်းနတ်ဘုရားမ၏ မျက်လုံးများက မျှော်လင့်ချက်များဖြင့် ပြန်လည်ပြည့်နှက်လာခဲ့သည်။

"သက်ရှည်ခြင်း အင်မော်တယ်ကျမ်းက တကယ်ကို အံ့သြစရာကောင်းပါပေတယ်"

ကျွင်းရှောင်ယောက်က အနည်းငယ် ခေါင်းညိတ်လိုက်မိသည်။

သက်ရှည်ခြင်း အင်မော်တယ်ကျမ်းက ကမ္ဘာပေါ်တွင် ရှားပါးသော အမွေအနှစ်တစ်ခုပင်။

၎င်းကို ရယူနိုင်ပါက အကြီးမားဆုံး အမွေအနှစ်တစ်ခုဖြစ်လာမည် ဖြစ်သည်။

အရေးကြီးဆုံးအချက်က၊ ဤအင်မော်တယ်ကျမ်းဟာ သက်ရှည်ကျွန်း၏ လျှို့ဝှက်ဆန်းကြယ်သော ပထမဆုံး ယဇ်ဆရာသခင် လေ့ကျင့်ခဲ့သော နည်းလမ်းပင်။

အကယ်၍၊ ဤကျမ်းစာကို ရရှိခဲ့လျှင် ၎င်းကို တန်ပြန်နိုင်မည့် နည်းလမ်းများကိုပင် လေ့လာနိုင်ပေလိမ့်မည်။

ကျွင်းရှောင်ယောက်လည်း တစ်ဖက်လူ၏ သက်ရှည်ခြင်း အင်မော်တယ်ကျမ်း လှုပ်ရှားမှုကို ချက်ချင်း အာရုံစိုက်လိုက်သည်။

တစ်ချိန်တည်းမှာပင်၊ သူက လှုပ်ရှားမှုပြုခဲ့၏။

သူ၏လက်နှစ်ဖက်ဖြင့် ရှင်သန်ခြင်းနှင့် သေဆုံးခြင်းကို ထိန်းချုပ်ထားကာ ကောင်းကင်ဘုံကို ခြယ်လှယ်သည်။

ရှင်သန်ခြင်းနှင့် သေဆုံးခြင်းက သူ့လက်ထဲတွင် ရှိ၏။

၎င်းက ကောင်းကင်အားလုံး၏ သေခြင်းရှင်ခြင်းဘီးမှတပါး အခြားမဟုတ်ပေ။

ဤနည်းလမ်းကလည်း လွှမ်းမိုးနိုင်စွမ်းကြီးမားပြီး နတ်ဘုရားတစ်ပါးကဲ့သို့ သက်ရှိအားလုံး၏ ရှင်သန်မှုနှင့် သေဆုံးမှုကို ထိန်းချုပ်နိုင်စေသည်။

သက်ရှည်ခြင်းဧကရာဇ်သားတော်က နေနှင့်လကို အုပ်စိုးသော အရှင်သခင်တစ်ပါးကဲ့သို့ ရှေ့ကိုတိုးလာပြီး ကြောက်မက်ဖွယ်ကောင်းသော တိုက်ခိုက်မှုတို့ကို ထုတ်ဖော်လိုက်သည်။

ကျွင်းရှောင်ယောက်ကလည်း နတ်ဘုရားတစ်ပါးကဲ့သို့ သက်ရှိများ၏ သေခြင်းရှင်ခြင်းကို ထိန်းချုပ်ထား၏။

နေနှင့်လ၏ အမှတ်အသားများက သေခြင်းရှင်ခြင်းစက်ဝန်းအပေါ်တွင် ထင်ဟပ်နေသည်။

သူတို့နှစ်ဦးက ရှေးဧကရာဇ်နှစ်ပါးကဲ့သို့ ပြင်းထန်စွာ ထိပ်တိုက်ရင်ဆိုင်လိုက်တော့သည်။

ထိုမှထွက်ပေါ်လာသော တိုက်ခိုက်မှုအားလှိုင်းများက ဂြိုလ်တစ်လုံး ပေါက်ကွဲသကဲ့သို့ပင် ဖြစ်သည်။ လူတိုင်းက တောက်ပသော နိယာမအလင်းများကြားတွင် နစ်မြုပ်သွားကြ၏။

သို့သော်လည်း ကောင်းကင်ကိုးပါး၏ ကျင့်ကြံသူများက မျက်လုံးများကို အတင်းဖြဲကာ တိုက်ပွဲကို စောင့်ကြည့်နေကြသည်။

စူးရှလွန်းသော အလင်းရောင်များကြောင့် မျက်လုံးများ ကျိန်းစပ်နေသည့်တိုင် တိုက်ပွဲရလဒ်ကို သိလိုစိတ်ဖြင့် စောင့်ကြည့်နေကြသေးသည်။