အခန်း ၁၄၇၆

အခန်း ( ၁၄၇၆ ) ပဉ္စမမြောက် ယဇ်ဆရာသခင်ကို ကိုယ်တိုင်ဖန်တီးခြင်း။

ဤအတွက် တုန်လှုပ်မှုများက မြင်ယောင်ကြည့်ရန် ခက်ခဲသည်။

ရွှေရောင် နတ်ဘုရားဓမ္မခန္ဓာတွင် ကောင်းကင်ဘုံနှင့် စကြဝဠာတစ်ခုလုံးကို ဖိနှိပ်နိုင်သည့် စွမ်းအားတစ်ခု ရှိ၏။

သူ့ပတ်ဝန်းကျင်တွင် အဆုံးမဲ့ စွမ်းအင်များနှင့် အငွေ့အသက်တို့က လည်ပတ်နေကာ သူ့မျက်နှာကို အနည်းငယ် မှုန်ဝါးစေသည်။

သို့သော်လည်း ၎င်းက ကျွင်းရှောင်ယောက်နှင့် ဆင်တူကြောင်း ဝေဝါးဝါး မြင်နိုင်သေးသည်။

မရေမတွက်နိုင်သော သတ္တဝါများက သူ့ခြေရင်းတွင် ဝတ်ပြုနေကြသည်။

နတ်ဘုရားများကလည်း သူ့ပတ်ဝန်းကျင်၌ ဂါထာမန္တာန်များကို ရွတ်ဖတ်နေကြ၏။

နတ်ဘုရားဓမ္မခန္ဓာ ပေါ်လာသည်နှင့် တပြိုင်နက်၊ နေရာတစ်ခုလုံးရှိ တုန်ခါမှုများမှာ ပိုမိုပြင်းထန်လာတော့သည်။

ဒါက ကွေ့ရှအပျက်အယွင်းကို သက်ရောက်မှုရှိခဲ့ပုံရသည်။

နောက်ဆုံးတွင်၊ နတ်ဘုရားဓမ္မခန္ဓာက အလွန်စွမ်းအားကြီးပြီး ကျွင်းရှောင်ယောက်၏ နယ်ပယ်ကန့်သတ်ချက်ထက် အဆများစွာ သာလွန်သည်။

ထိုအချိန်က နတ်ဘုရားဓမ္မခန္ဓာသည် ကြေးခေါင်းတလားကို ဦးခေါင်းထက်တွင် ဆိုင်းငံ့စေပြီး အင်မော်တယ်သတ်ဓားဖြင့် အန္တိမကပ်ဘေးကြီးကို တိုက်ခိုက်ခဲ့သည်။

ယင်းက အလွန် တုန်လှုပ်ဖွယ်ကောင်းသော မြင်ကွင်းမျိုး ဖြစ်၏။

ယခုမူကား နတ်ဘုရားဓမ္မခန္ဓာမှာ ဤလောကတွင် ပြန်ပေါ်လာခဲ့ပြီ။

ယုံကြည်မှုစွမ်းအားများ အ‌မြောက်အမြား ရရှိလာခြင်းကြောင့်လားမသိ...

နတ်ဘုရားဓမ္မခန္ဓာမှ ဖြာထွက်နေသော အရှိန်အဝါများက ယခင်ကထက် များစွာပို၍ နက်နဲလာကာ ခန့်မှန်းမရနိုင်တော့ပေ။

"ဒါ...ဒါ...ဒါက..."

သက်ရှည်ခြင်းနတ်ဘုရားမ လွန်စွာတုန်လှုပ်သွားသည်။

ဖိအားအနည်းငယ်ဖြင့်ပင် သူသည် မြေပေါ်သို့ ပစ်လဲကျသွား၏။

သူ့အရိုးများပင် ကျိုးကြေလုနီးပါး ဖြစ်နေတော့သည်။

"ဒါက နင့်ရဲ့ တကယ့် လျှို့ဝှက်ချက်ပဲ..."

သက်ရှည်ခြင်းနတ်ဘုရားမ၏ မျက်နှာထက်တွင် သွေးပျက်ခြောက်ခြားခြင်း၊ စိတ်ပျက်အားငယ်ခြင်း အရိပ်အယောင်တို့ ပေါ်လာခဲ့သည်။

သူက လောကစည်းမျဉ်းများကို လုံးဝ မလိုက်နာပေ။

သက်ရှည်ခြင်းဧကရာဇ်၏သားတော်ကို မဆိုထားဘိ...

သက်ရှည်ခြင်းဧကရာဇ်၏သားတော် အယောက်တစ်သောင်းကို ပေါင်းလိုက်လျှင်ပင် ဤနတ်ဘုရားဓမ္မခန္ဓာနှင့် ယှဉ်နိုင်စရာ မရှိပါ။

သက်ရှည်ခြင်းနတ်ဘုရားမ၏ မျက်ဝန်းအိမ်မှ မျက်ရည်များ စီးကျလာသည်။

သူမ ကြောက်လွန်းသဖြင့် ငိုခဲ့ပြီ။

တစ်ချိန်တည်းမှာပင် သူ နားလည်သွားခဲ့သည်။

ကျွင်းရှောင်ယောက်က ကောင်းကင်ကိုးပါးမှာ အဘယ်ကြောင့် ဤမျှမောက်မာဝံ့သနည်း။

သူက တားမြစ်နယ်မြေများ၏ ပါရမီရှင်များကိုပင် သတ်ဝံ့သည်။

ဒါက ကျွင်းမိသားစု၏ ကျောထောက်နောက်ခံပေးထားခြင်းကြောင့်သာ မကပေ။

သူကိုယ်တိုင်က ယုံကြည်မှုရှိသည်။

ဤနတ်ဘုရားဓမ္မခန္ဓာက သူ့ယုံကြည်မှု၏ အရင်းအမြစ်ပင်။

ကျွင်းမိသားစု၏ ဒေါသကို လျစ်လျူရှုပြီး ရူးသွပ်စွာ တိုက်ခိုက်လိုသူတစ်ဦး ရှိလာလျှင်ပင် ကျွင်းရှောင်ယောက်က ပြန်လည်တိုက်ခိုက်ရန် ယုံကြည်မှုအပြည့်ရှိသည်။

"ငါက ဒီနတ်ဘုရားဓမ္မခန္ဓာကိုသုံးပြီး သက်ရှည်ခြင်းဧကရာဇ်သားတော်ကို တိုက်ခိုက်မယ်လို့ မင်းထင်နေတာလား။ မင်း အတွေးလွန်နေတာပဲ"

"သူက... မထိုက်တန်ဘူး"

ကျွင်းရှောင်ယောက်က ခေါင်းကို အနည်းငယ်ခါယမ်းလိုက်သည်။

အန္တိမကပ်ဘေးကြီးကို တိုက်ခိုက်ခြင်းမှလွဲ၍ သူသည် သူ၏ နတ်ဘုရားဓ္မခန္ဓာကို ဘယ်သောအခါမှ အသုံးမပြုခဲ့ပါ။

ပထမအချက်က နတ်ဘုရားဓမ္မခန္ဓာကို အသုံးပြုရန် ယုံကြည်မှုစွမ်းအား အများအပြား လိုအပ်သောကြောင့် ဖြစ်သည်။

ကျွင်းရှောင်ယောက်က ကံကြမ္မာနတ်ဘုရားဂိုဏ်းကို လျှို့ဝှက်စွာ တည်ထောင်ခဲ့လျှင်ပင် ဤကဲ့သို့သော သုံးစွဲမှုကို မခံနိုင်ပါ။

ဒုတိယအနေဖြင့် ကျွင်းရှောင်ယောက်က နတ်ဘုရားဓမ္မခန္ဓာကို မှီခိုအားထားလိုခြင်း မရှိပေ။

နောင်အနာဂတ်တွင်၊ ကျွင်းရှောင်ယောက်၏ နယ်ပယ်က လုံလောက်အောင် အားကောင်းလာလျှင် ၎င်းကိုသန့်စင်ပြီး သူ့အတွက် မွေးရာပါ ယုံကြည်ခြင်းခန္ဓာအဖြစ် ပြောင်းလဲစေနိုင်သည်။

အချုပ်ဆိုရလျှင်၊ မဖြစ်မနေမဟုတ်ပါက ကျွင်းရှောင်ယောက်သည် နတ်ဘုရားဓမ္မခန္ဓာကို အသုံးပြုမည် မဟုတ်ပါ။

"ဒါဆို... နင်က ဘာလုပ်ချင်လို့လဲ"

သက်ရှည်ခြင်းနတ်ဘုရားမက မသိစိတ်မှ မေးလိုက်သည်။

ထို့နောက်တွင်၊ သူက ကျွင်းရှောင်ယောက်၏ လက်ထဲမှ ယဇ်ဆရာသခင်အမိန့်တော်ကို ကြည့်လိုက်၏။

သူက တွန့်ဆုတ်စွာ ပြောလိုက်သည်။

"ဒါ... ဒါက တကယ်တော့ မဟုတ်ဘူးမို့လား"

"မင်းဘယ်လိုထင်လဲ"

ကျွင်းရှောင်ယောက်၏ မျက်နှာပေါ်တွင် အပြုံးတစ်ခု ပေါ်လာသည်။

သက်ရှည်ခြင်းနတ်ဘုရားမ၏ စိတ်ထဲတွင် မိုးကြိုးမုန်တိုင်းများ တိုက်ခတ်သွားပုံရသည်။

လွန်စွာ တုန်လှုပ်သွား၏။

ကျွင်းရှောင်ယောက်က ပဉ္စမမြောက် ယဇ်ဆရာသခင်လား။

ယင်းက မည်သို့ဖြစ်နိုင်မည်နည်း။

ကောင်းကင်ကိုးပါးမှ လူတစ်ဦးက ယဇ်ဆရာသခင်တစ်ပါး မည်သို့ဖြစ်နိုင်ပါမည်နည်း။

သက်ရှည်ခြင်းနတ်ဘုရားမက ငြင်းဆိုချင်သော်လည်း ရုတ်တရက် တစ်စုံတစ်ခုကို သတိရသွားသည်။

ယဇ်ဆရာသခင်အမိန့်ကို ရှေးခေတ်ကတည်းက ဘယ်သောအခါမှ တုပနိုင်ခြင်း မရှိခဲ့ပါ။

၎င်းက ကြီးမားသော အကြောင်းအကျိုးသက်ရောက်မှုများရှိသောကြောင့် ၎င်းကို အတုအယောင်လုပ်ခြင်းမှာ သေမင်းနားရွက်ကို တံတွေးဆွတ်လိုက်ခြင်း ဖြစ်သည်။

အရေးကြီးဆုံးအချက်က၊ ယဇ်ဆရာသခင်အမိန့်တော်ကို အထူးပစ္စည်းတစ်မျိုးဖြင့် ပြုလုပ်ထားတာဖြစ်ပြီး မည်သူမျှ တုပပြုလုပ်ရန် မဖြစ်နိုင်ပေ။

ဤအခိုက်တွင် သက်ရှည်ခြင်းနတ်ဘုရားမ၏ နှလုံးသားက လှိုင်းလုံးကြီးများဖြင့် ပြည့်နှက်နေသည်။

အင်မော်တယ်နယ်မြေကြီးမှ ကျင့်ကြံသူ... ကျွင်းမိသားစု၏ နတ်ဘုရားသားတော်...

သူက ယဇ်ဆရာသခင်အမိန့်တော်ကို အမှန်တကယ် လက်ခံရရှိထားခဲ့ပြီ။

ဒါက မည်သို့သောအဓိပ္ပာယ် ဖြစ်သနည်း။

ယဇ်ဆရာသခင်များထဲတွင် သစ္စာဖောက်တစ်ဦး ရှိလိမ့်မည်။

ကျွင်းရှောင်ယောက်က အခြားယဇ်ဆရာသခင်များကဲ့သို့ အင်မော်တယ်နယ်မြေကြီးကို ရှင်းလင်းမည့်သူ မဖြစ်နိုင်ပေ။

ဒါက အလွန်ကြီးမားသော အဖြစ်အပျက်တစ်ခု ဖြစ်သည်။

ဤတစ်ကြိမ် သုတ်သင်ရှင်းလင်းမှုက အထူးဆန်းဆုံး ဖြစ်လာလိမ့်မည်။

ယဇ်ဆရာသခင်ငါးပါးက တစ်ပြိုင်နက်တည်း ပေါ်လာကြမည် ဖြစ်သော်လည်း...

ကျွင်းရှောင်ယောက်က ပဉ္စမမြောက် ယဇ်ဆရာသခင် ဖြစ်လာခြင်းမှာ အဆုံးမရှိ အကျိုးဆက်များကို ဖြစ်ပေါ်စေမည် ဖြစ်သည်။

ယခုတော့ သက်ရှည်ခြင်းနတ်ဘုရားမက ကျွင်းရှောင်ယောက်၏ ရည်ရွယ်ချက်ကို နားလည်သွားပြီ။

သူက နတ်ဘုရားဓမ္မခန္ဓာဖြင့် ပဉ္စမမြောက် ယဇ်ဆရာသခင် ဖြစ်ချင်သည်။

သက်ရှည်ခြင်းနတ်ဘုရားမသည် ကျွင်းရှောင်ယောက်၏ အကြံအစည်နှင့် တွက်ချက်မှုများက ဤမျှနက်ရှိုင်းခြင်းကို မယုံနိုင်ပါ။

ထို့ပြင်၊ သူက ယဇ်ဆရာသခင်အမိန့်တော်ကို မည်သို့ရရှိခဲ့သနည်း။

သက်ရှည်ခြင်းနတ်ဘုရားမ လုံးဝ မင်သက်သွားသည်။

ယခုအချိန်တွင်၊ သူ၏ တစ်ခုတည်းသောအတွေးက ဤနေရာမှ ထွက်သွားပြီး သက်ရှည်ခြင်းဧကရာဇ်သားတော်နှင့် ကောင်းကင်ကိုးပါးမှ သတ္တဝါအားလုံးကို ဤအမှန်တရား ပြောပြပေးရန်ပင်။

သို့သော်လည်း ကျွင်းရှောင်ယောက်၏ လက်ထဲမှ လွတ်မြောက်ရန် အခွင့်အလမ်း လုံးဝ မရှိခဲ့ပါ။

သက်ရှည်ခြင်းနတ်ဘုရားမကလည်း ဒါကိုသိသည်။

ကျွင်းရှောင်ယောက်က သူမကို ဒါတွေအားလုံး မြင်ခွင့်ပေးထားခြင်းမှာ၊ သူမ လွတ်မြောက်ရန် အခွင့်အလမ်းမရှိကြောင်း ထင်ရှားသည်။

သူမကို ဤသွေးနီရောင်လွင်ပြင်မှာ ထာဝရမြှုပ်နှံထားလိမ့်မည်။

အင်မော်တယ်နယ်မြေကြီး၏ မရေမတွက်နိုင်သော အသက်များနှင့်အတူ သူ့ကို မြှုပ်နှံလိမ့်မည်။

"မဟုတ်ဘူး..."

သက်ရှည်ခြင်းနတ်ဘုရားမက စိတ်ပျက်လက်ပျက်ဖြင့် အော်ဟစ်လိုက်သည်။

ကျွင်းရှောင်ယောက်က စိတ်အစဥ်ပြိုလဲသွားသော သက်ရှည်ခြင်းနတ်ဘုရားမကို လျစ်လျူရှုလိုက်၏။

ဤအခိုက်တွင်၊ သူက ယုံကြည်ခြင်းနတ်ဘုရားဓမ္မခန္ဓာကို ကြည့်လိုက်သည်။

ဒါက တစ်ခုခုလွဲနေသလို သူ ခံစားရ၏။

နောက်ဆုံးတွင် ကျွင်းရှောင်ယောက်က ထူးခြားမှုကို နားလည်သွားသည်။

"ဒါက ယဇ်ဆရာသခင်တွေရဲ့ အငွေ့အသက်နဲ့ မတူညီသေးဘူး"

သက်ရှည်ခြင်းနတ်ဘုရားမ ခန့်မှန်းထားသည့်အတိုင်း...

ကျွင်းရှောင်ယောက်က နတ်ဘုရားဓမ္မခန္ဓာကို ပဉ္စမမြောက် ယဇ်ဆရာသခင်အဖြစ် ပြုလုပ်ရန် ရည်ရွယ်ထားခဲ့သည်။

အဆုံးတွင်၊ သူ၏ကိုယ်ပိုင်အင်အားဖြင့် ယဇ်ဆရာသခင်အဖြစ် ဟန်ဆောင်ရန် မဖြစ်နိုင်ပေ။

နတ်ဘုရားဓမ္မခန္ဓာဖြင့်သာ အရည်အချင်းပြည့်မီသည်။

ထို့ထက် အရေးကြီးတာက ကျွင်းရှောင်ယောက်ဟာ ဗလာနယ်ကံကြမ္မာ ဖြစ်သည်။

ထို့ကြောင့် နတ်ဘုရားဓမ္မခန္ဓာကိုယ်ကို အခြားသူများက စောင့်ကြည့်၍မရပါ။

ယဇ်ဆရာသခင်များပင်လျှင် သူ၏ အချက်အလက်များကို မစူးစမ်းနိုင်ပေ။

သူတို့ တွေ့ရှိနိုင်သမျှ အရာအားလုံးက ဗလာနတ္ထိသာ ဖြစ်သည်။

ဒါက နတ်ဘုရားဓမ္မခန္ဓာကို ပို၍ လျှို့ဝှက်ဆန်းကြယ်စေလိမ့်မည်။

သို့သော်လည်း ယခုအချိန်တွင် အရေးကြီးဆုံးက နတ်ဘုရားဓမ္မခန္ဓာကို ဖုံးကွယ်ရန် ဖြစ်သည်။

ဤအတွက် ကောင်းကင်၏ အနက်ရောင်သွေးကို စဉ်းစားခဲ့သော်လည်း ချက်ချင်း ငြင်းပယ်ခဲ့၏။

ကျွင်းရှောင်ယောက်က ၎င်းကို အန္တိမကပ်ဘေးကြီးကိုတိုက်ခိုက်ရာတွင် အသုံးပြုခဲ့ပြီး လူအများစု မြင်တွေ့ခဲ့ဖူးသည်။

ကျွင်းရှောင်ယောက်က ဆက်လက်စဉ်းစားနေလေသည်။

ရုတ်တရက်၊ တစ်စုံတစ်ခုကို တွေးမိသွားသည့်အလား သူ့မျက်လုံးများ တောက်ပသွားသည်။

ဒါက မင်းသမီးယွမ်ချယ်ထံမှ စုပ်ယူထားသော မဟာအပြစ်စွမ်းအားပင်။

မင်းသမီးယွမ်ချယ်သည် ခေတ်အဆက်ဆက်မှ ကောင်းကင်ဘုံခုံရုံး၏ အပြစ်များကို ခံယူထားရပြီး ကြီးမားသော အပြစ်များဖြင့် မွေးဖွားလာခဲ့သူ ဖြစ်သည်။

နောက်ပိုင်းမှာတော့ ကျွင်းရှောင်ယောက်က ယွမ်ချယ်၏ အပြစ်စွမ်းအားများကို ဖြေရှင်းရန် ကူညီပေးခဲ့ကာ ထိုအပြစ်စွမ်းအားတချို့ကိုလည်း စုပ်ယူခဲ့ပေသည်။

ဤအပြစ်သားစွမ်းအားကို နတ်ဘုရားဓမ္မခန္ဓာထဲသို့ ပေါင်းစပ်လိုက်ပါက ၎င်း၏သဘောသဘာဝကို လုံးဝပြောင်းလဲစေနိုင်မည် ဖြစ်သည်။

ဤနည်းဖြင့် ကျွင်းရှောင်ယောက်၏ နတ်ဘုရားဓမ္မခန္ဓာဟု မည်သူမျှ မသိနိုင်တော့ပါ။

ထို့ပြင်၊ အပြစ်စွမ်းအားက ယွမ်ချယ်တစ်ဦးတည်း ပိုင်ဆိုင်ထားသောအရာ မဟုတ်ပေ။

ရှေးဟောင်းနတ်ဆိုးများနှင့် မြေအောက်မ္ဘာရှိ ပုဂ္ဂိုလ်တချို့မှာလည်း အပြစ်စွမ်းအားများ ရှိသည်။

ထို့ပြင်၊ အခြား ယဇ်ဆရာသခင်လေးပါးက အင်မော်တယ်နယ်မြေကြီးမှ သတ္တဝါများစွာကို သတ်ဖြတ်ခဲ့၏။

၎င်းတို့ကိုလည်း ကြီးမားသော အပြစ်သား အငွေ့အသက်များက ဖုံးလွှမ်းနေလိမ့်မည်။

ဒါက တကယ်ကို ဖုံးကွယ်ရန် အကောင်းဆုံးနည်းလမ်းပင်။

ကျွင်းရှောင်ယောက်၏ ဗလာနယ်ကံကြမ္မာ တာအိုခန္ဓာနှင့် ပေါင်းစပ်လိုက်လျှင် အပြစ်စွမ်းအားများ ပြည့်နှက်နေသော လျှို့ဝှက်ဆန်းကြယ်ပြီး အစွမ်းထက်သည့် ပဉ္စမမြောက် ယဇ်ဆရာသခင်အဖြစ် ပေါ်ထွက်လာမည် ဖြစ်သည်။

"ငါက အရမ်းတော်တဲ့ ပါရမီရှင်ပဲ"

ကျွင်းရှောင်ယောက်က ကိုယ့်ကိုယ်ကိုယ် အထင်ကြီးသွားမိသည်။

သူ၏လက်ဖြင့် ယဇ်ဆရာသခင်တစ်ပါးကို ကိုယ်တိုင် ဖန်တီးတော့မည်။

"ဝုန်း..."

တွန့်ဆုတ်ခြင်းမရှိဘဲ၊ ကျွင်းရှောင်ယောက်က အပြစ်စွမ်းအားများကို ရွှေရောင် တောက်ပနေသော နတ်ဘုရားဓမ္မခန္ဓာကိုယ်ထဲသို့ ပေါင်းစပ်လိုက်သည်။

ရုတ်တရက်၊ ရွှေရောင်ခန္ဓာကိုယ်ကြီးကို အပြစ်စွမ်းအား အလွှာများက ရစ်ပတ်လာ၏။

နောက်ဆုံးတွင်... အနီနှင့်အနက် အပြစ်စွမ်းအားများက နတ်ဘုရားဓမ္မခန္ဓာ၏ ဦးခေါင်းအနောက်ဘက်တွင် အပြစ်သား နတ်ဆိုးလက်စွပ်ကွင်းများအဖြစ် ပြောင်းလဲသွားသည်။

နတ်ဘုရားဓမ္မခန္ဓာ၏ ဦးခေါင်းနောက်တွင် အပြစ်သား နတ်ဆိုးလက်စွပ်တစ်ရာကျော် ပေါ်လာခဲ့၏။

၎င်း၏ အရှိန်အဝါသည်လည်း အပြစ်သား နတ်ဆိုးစွမ်းအင်များဖြင့် ဖုံးလွှမ်းနေပြီး သူ့မျက်နှာကို အစစ်အမှန်နှင့် အတုအယောင် မခွဲနိုင်တော့ပေ။

လျှို့ဝှက်ဆန်းကြယ်ပြီး တန်ခိုးကြီးမားကာ ခန့်မှန်းမရနိုင်သော ပဉ္စမမြောက် ယဇ်ဆရာသခင်တစ်ပါးက နောက်ဆုံးတွင် ဤလောက၌ ပေါ်လာခဲ့ပြီ ဖြစ်သည်။

ဤအရာအားလုံးကို မျက်မြင်တွေ့ရှိခဲ့သော သက်ရှည်ခြင်းနတ်ဘုရားမလည်း နောက်ဆုံးတွင် မျက်လုံးများ မှိတ်ကျသွားကာ မြေပြင်ပေါ်သို့ လဲကျသွားသည်။

ငယ်စဉ်ကတည်းက သူမ နတ်ဘုရားတစ်ပါးလို ရိုသေလေးစားခဲ့ရသော ယဇ်ဆရာသခင်တစ်ပါးကို ကျွင်းရှောင်ယောက်က ကိုယ်တိုင်ဖန်တီးပြလိုက်၏။

ယင်းက သက်ရှည်ခြင်းနတ်ဘုရား၏ ယုံကြည်မှုကို လုံးဝ ပြိုလဲသွားစေခဲ့တော့သည်။