အခန်း ၁၄၈၇

အခန်း ( ၁၄၈၇ ) အရှိန်အဝါကြီးသော နတ်ဆိုးဧကရီလေး။

​ကောင်းကင်နှင့် မြေပြင်ကြားဝယ် အနီရောင်ဝတ်စုံနှင့် လှပသော အမျိုးသမီးတစ်ဦး၏ ပုံရိပ်တစ်ခု ထွက်ပေါ်လာသည်။

သူက ဆွဲဆောင်မှုရှိသော ခန္ဓာကိုယ်အချိုးအစားနှင့် ကောက်ကြောင်းတို့ကို ပိုင်ဆိုင်ထား၏။

ပုံမှန်အားဖြင့် ထိုကဲ့သို့ ပါးလွှာသော ဝတ်စုံနီကို ဝတ်ဆင်ပါက အမျိုးသမီးတစ်ဦးအတွက် အမြင်မတင့်တယ် ဖြစ်နေနိုင်သော်လည်း...

ယခု နတ်ဆိုးဧကရီလေး၏ ကိုယ်ပေါ်တွင်မူ ဆွဲဆောင်မှုအပြည့်ဖြင့် အံ့သြဖွယ်ကောင်းလောက်အောင်ပင် လိုက်ဖက်နေတော့သည်။

သူ၏ အနက်ရောင်ပိုးသားကဲ့သို့ ဆံနွယ်များမှာ ပြန့်ကျဲနေပြီး ဖြူဝင်းနုနယ်သော ပါးပြင်လေးများမှာလည်း ထိတွေ့ချင်စရာကောင်းလှသည်။

သူ့နှုတ်ခမ်းပါးထက်မှ မှည့်ကလေးကြောင့်လည်း သူမ၏ ဆွဲဆောင်မှုကို အထွတ်အထိပ်သို့ ရောက်ရှိစေခဲ့လေသည်။

​ကျွင်းရှောင်ယောက် ယခင်က ဆုံတွေ့ခဲ့ဖူးသော အမျိုးသမီးများအနက် ကျန်းစန်းယီမှာ နှင်းပွင့်ကဲ့သို့ စင်ကြယ်ပြီး နူးညံ့သိမ်မွေ့သူ ဖြစ်သည်။

လင်ယွမ်နှင့် ယွမ်ချယ်တို့မှာမူ မြင့်မြတ်ကြီးစိုးပြီး လောက၏ ဂုဏ်ကျက်သရေနှင့် ပြည့်စုံသူများ ဖြစ်ကြ၏။

နတ်ဆိုးဧကရီလေးမူကား အလွန်အမင်း လှပသော်လည်း ရိုင်းစိုင်းခြင်း မရှိဘဲ အရည်ရွှမ်းသော မက်မွန်သီးတစ်လုံးကဲ့သို့ ဆွတ်ခူးစားသုံးချင်စရာ ကောင်းလှသည်။

​ယခုအချိန်တွင်၊ နတ်ဆိုးဧကရီလေး၏ ရုတ်တရက် ထွက်ပေါ်လာမှုက လူတချို့ကို ကြောင်တောင်တောင် ဖြစ်သွားစေခဲ့သည်။

သူမ ပြောလိုက်သော စကားကို ပြန်လည် စဉ်းစားမိသောအခါ လူတိုင်း၏ မျက်ဝန်းများ၌ အံ့သြရိပ်များ ယှက်သန်းသွားတော့၏။

"သက်ရှည်ကျွန်းလို တားမြစ်နယ်မြေတွေကို ပေါ်ပေါ်ထင်ထင် ဆန့်ကျင်ရဲတဲ့ ဒီအမျိုးသမီးက ဘယ်သူလဲ"

​နတ်ဆိုးဧကရီလေးက ကောင်းကင်ကိုးပါး အင်မော်တယ်နယ်မြေကြီး၌သာ အမြဲနေထိုင်ခဲ့သူဖြစ်သဖြင့် ကောင်းကင်ကိုးပါးရှိ လူအနည်းငယ်သာ သူမ၏အကြောင်းကို သိကြသည်။

သို့သော်လည်းလည်း သက်ရှည်ကျွန်းမှ ဧကရာဇ်တစ်ပိုင်းမှာမူ နတ်ဆိုးဧကရီလေးကို မြင်လိုက်သည်နှင့် သူ့မျက်ဝန်း၌ အံ့သြရိပ်များ ထင်ဟပ်သွားတော့သည်။

'သူက ဘာဖြစ်လို့ ကျွင်းမိသားစုရဲ့ နတ်ဘုရားသား‌တော်ကို ကူညီချင်ရတာလဲ'

​သက်ရှည်ကျွန်းမှ ဧကရာဇ်တစ်ပိုင်းက နတ်ဆိုးဧကရီလေး၏ မူလအစကို သိရှိပုံရသဖြင့် သံသယဖြစ်နေမိသည်။

သို့သော်လည်း လူတိုင်းကတော့ သိရှိကြခြင်း မရှိပါ။

ဧကရာဇ်ကြွေလွင့်တောင်မှ တစ်နှစ်ပတ်လုံး တံခါးပိတ်ကျင့်ကြံနေသော ဧကရာဇ်တစ်ပိုင်း အဘိုးအိုမှာ နတ်ဆိုးဧကရီလေး၏ မူလအစကို ဘာမျှ မသိရှိချေ။

​နတ်ဆိုးဧကရီလေးက သူတို့ကို ဆန့်ကျင်နေသည်ကို မြင်သောအခါ သူ့မျက်နှာမှာ အေးစက်သွားပြီး ခြိမ်းခြောက်လိုက်သည်။

"မိန်းမတစ်ယောက်က ငါတို့လို တားမြစ်နယ်မြေတွေကို ဆန့်ကျင်ပြီး ကျွင်းမိသားစုက ကောင်လေးကို ကာကွယ်ချင်တယ်လား။ မင်းပါ ဒီထဲမှာ အသက်ပျောက်သွားမှာကို မကြောက်ဘူးလား"

​ဧကရာဇ်ကြွေလွင့်တောင်မှ အဘိုးအိုက နတ်ဆိုးဧကရီလေး၏ အရှိန်အဝါမှာ အားမနည်းဘဲ ဧကရာဇ်တစ်ပိုင်း အဆင့်တွင် ရှိနေသည်ကို ခံစားမိသည်။

သို့သော်လည်း သူတို့ဘက်၌ ဧကရာဇ်တစ်ပိုင်း ငါးဦး၊ ခြောက်ဦးခန့် ရှိနေသဖြင့် သူက ကြောက်ရွံ့ခြင်း မဖြစ်မိပေ။

သို့သော် သူ၏ စကားဆုံးသည်နှင့်...

​နတ်ဆိုးဧကရီလေး၏ လှပသော မျက်နှာထက်၌ သူမ၏ ဆွဲဆောင်မှုရှိသော ပုံရိပ်နှင့် ဆန့်ကျင်ဘက်ဖြစ်သော အေးစက်မှုများ ယှက်သန်းသွားသည်။

"အဘိုးကြီး... နင် နောက်တစ်ခါ ပြောရဲရင် ပြောကြည့်လိုက်စမ်း။ ငါ နင့်လျှာကို ဖြတ်ပြီး ခွေးကျွေးပစ်မယ်"

ထိုစကားတစ်ခွန်းကြောင့် ပတ်ဝန်းကျင်တစ်ခုလုံး တုန်လှုပ်သွားရသည်။

"ဟင်... ဒီအမျိုးသမီးက ဘယ်ကနေလာလို့ ဒီလောက်တောင် အရှိန်အဝါပြနေရတာလဲ"

"သူ့ရဲ့ အရှိန်အဝါကတော့ တကယ်ကို ပြင်းထန်တယ်။ ဧကရာဇ်တစ်ပိုင်းအဆင့်နဲ့ တားမြစ်နယ်မြေကို ရင်ဆိုင်ရဲတယ်ဆိုတော့ သူက ဘာလားပဲ"

​နတ်ဆိုးဧကရီလေး၏ သဘောထားမှာ လူတိုင်းအတွက် မယုံကြည်နိုင်စရာပင် ဖြစ်သည်။

သူ့တွင် ဤမျှမာနကြီးရန် မည်သို့သော ယုံကြည်ချက်မျိုး ရှိနေသနည်း။

"နတ်ဆိုးဧကရီ အရှင်မ"

ရန်ယုမန်လည်း ထိုနေရာ၌ ရှိနေပြီး စိုးရိမ်ပူပန်သွားမိသည်။

နတ်ဆိုးဧကရီလေးမှာ ကောင်းကင်ကိုးပါး အင်မော်တယ်နယ်မြေကြီးရှိ နတ်ဆိုးဘုရားနန်းတော်၏ အရှင်သခင်ဖြစ်သော်လည်း...

ဤနေရာမှာ ကောင်းကင်ကိုးပါး ဖြစ်သဖြင့် စိုးရိမ်စိတ်ဝင်နေခြင်း ဖြစ်သည်။

​ကျွင်းရှောင်ယောက်တစ်ဦးသာ အေးဆေးတည်ငြိမ်စွာ ရှိနေပေသည်။

အကြောင်းမှာ၊ နတ်ဆိုးဧကရီလေးက ကောင်းကင်ကိုးပါး မှ လာသူဖြစ်ပြီး ထူးခြားသော နောက်ခံရှိကြောင်း သူမကိုယ်တိုင် သူ့အား ပြောပြဖူးသောကြောင့်ပင်။

ထို့ပြင် ပြန်လည်မွေးဖွားလာသူဖြစ်သည့် တိဟောက်ထျန်းပင်လျှင် အစပိုင်းက နတ်ဆိုးဧကရီလေးထံသို့ သွားရောက်ကာ ပူးပေါင်းရန် ကြိုးစားခဲ့ဖူးသည်။

ဤသည်မှာ နတ်ဆိုးဧကရီလေး၌ ပူးပေါင်းထိုက်သော တန်ဖိုးနှင့် အစွမ်းထက်သော နောက်ခံရှိကြောင်း သက်သေပင်။

​"နင်... နင်... မိန်းမယုတ်"

ဧကရာဇ်ကြွေလွင့်တောင်မှ အဘိုးအိုမှာ ဒေါသထွက်လွန်းသဖြင့် မျက်နှာတစ်ခုလုံး နီမြန်းကာ လည်ပင်းကြောများပင် ထောင်ထလာသည်။

ဂုဏ်သိက္ခာရှိသော တားမြစ်နယ်မြေမှ ဧကရာဇ်တစ်ပိုင်းတစ်ဦးအနေဖြင့် ဤကဲ့သို့ အရှက်ခွဲခံရခြင်းမှာ ပထမဆုံးအကြိမ်ပင်ပင်။

​"အားလုံးပဲ... ဝိုင်းပြီးတော့ ဒီမိန်းမယုတ်ကို နှိမ်နင်းကြရအောင်"

သူက အခြားသော ဧကရာဇ်တစ်ပိုင်းများကို စည်းရုံးကာ နတ်ဆိုးဧကရီလေးကို ဝိုင်းတိုက်ရန် ပြင်ဆင်လိုက်သည်။

သို့သော်...

အခြားသော ဧကရာဇ်တစ်ပိုင်းများက တစ်ညီတစ်ညွတ်တည်း နောက်သို့ ခြေလှမ်းတစ်လှမ်းစီ ဆုတ်သွားကြ၏။

ဧကရာဇ်ကြွေလွင့်တောင်မှ အဘိုးအိုတစ်ဦးသာ တပ်မှူးမရှိသော စစ်သည်တစ်ဦးကဲ့သို့ တစ်ယောက်တည်း ယောင်ချာချာ ကျန်ရစ်ခဲ့တော့သည်။

​"ခင်ဗျားတို့... ခင်ဗျားတို့ ဒါ ဘာသဘောလဲ"

အဘိုးအိုမှာ ကြောင်တောင်တောင် ဖြစ်သွားသည်။

တားမြစ်နယ်မြေသားများအနေဖြင့် အတူတူ လက်တွဲလုပ်ဆောင်ကြမည်ဟု ကတိပေးထားကြသည် မဟုတ်ပါလား။

"သူ့ရဲ့ မူလအစကို ခင်ဗျား တကယ်ပဲ မသိတာလား"

သားရဲဂူမှ ဧကရာဇ်တစ်ပိုင်းတစ်ဦးက တိတ်ဆိတ်စွာ ပြောလိုက်သည်။

"သူက ဘယ်သူမို့လို့လဲ"

အဘိုးအိုက နားမလည်သေးပါ။

​"ခင်ဗျားက တံခါးပိတ်ကျင့်ကြံတာ အရမ်းကြာပြီထင်တယ်။ သူက အိပ်မက်ဧကရာဇ်ရဲ့ ဘေးနားက လူပဲ"

အင်မော်တယ်နတ်ဆိုးကောင်းကင်ဂူမှ ဧကရာဇ်တစ်ပိုင်းက လေးနက်သော အသံဖြင့် ဆိုလိုက်သည်။

"အိပ်မက်ဧကရာဇ်... အိပ်မက်ဧကရာဇ်"

"အိပ်မက်ကမ္ဘာက အဲဒီလူပေါ့..."

​ဧကရာဇ်ကြွေလွင့်တောင်မှ အဘိုးအိုမှာ စကားလုံးများကို ရေရွတ်ရင်း သူ၏ မျက်လုံးများ ပြူးကျယ်သွားတော့သည်။

သူက စကြဝဠာထဲရှိသော လေအားလုံးကို ရှူသွင်းလိုက်သကဲ့သို့ အသက်ကိုပြင်းပြင်းရှူလိုက်မိသည်။

သူ အမှန်တကယ်ပင် ထိတ်လန့်သွားခဲ့ချေပြီ။

​ထိုပုဂ္ဂိုလ်မှာ ကောင်းကင်ကိုးပါး၏ နံပါတ်တစ် အကြမ်းဆုံးပုဂ္ဂိုလ်...

ဒဏ္ဍာရီလာ ပုဂ္ဂိုလ်ကြီးပင် ဖြစ်သည်။

သူ့ရှေ့မှ အမျိုးသမီးမှာ ထိုပုဂ္ဂိုလ်ကြီးနှင့် ပတ်သက်နေသူဖြစ်ကြောင်း သိလိုက်ရသောအခါ အဘိုးအိုမှာ လွန်စွာ တုန်လှုပ်သွားရတော့သည်။

ကံကောင်းထောက်မစွာဖြင့်၊ သူက တိုက်ခိုက်ခြင်း မပြုမိသေးချေ။

သို့မဟုတ်ပါက အကျိုးဆက်မှာ မတွေးဝံ့စရာပင်။

ထိုပုဂ္ဂိုလ်ကြီးမှာ မည်သည့် တားမြစ်နယ်မြေကိုမျှ ဂရုစိုက်သူ မဟုတ်ပါ။

​အဘိုးအို၏ မျက်နှာထက်မှ အံ့သြတုန်လှုပ်မှုများကို မြင်လိုက်ရသောအခါ နတ်ဆိုးဧကရီလေး၏ မျက်နှာထက်၌ လှောင်ပြုံးတစ်ခု ပေါ်လာသည်။

"ဘာဖြစ်တာလဲ အဘိုးကြီး... လာလေ တိုက်ကြမယ်လေ"

ဧကရာဇ်ကြွေလွင့်တောင်မှ အဘိုးအို၏ မျက်နှာမှာ ဘီလူး သံပုရာသီးကို စားမိသလို ရှုံ့တွနေသည်။

သူက နောက်ကိုဆုတ်ပြီး ပြောလိုက်သည်။

"ကျုပ် အရင်က ဘာမှ မသိခဲ့လို့ပါ။ မသိတဲ့သူက အပြစ်မရှိဘူးလို့ ဆိုကြတယ် မဟုတ်လား..."

​အဘိုးအို၏ သဘောထားကို မြင်လိုက်ရသောအခါ ကောင်းကင်ကိုးပါးရှိ ကျင့်ကြံသူအားလုံး ကြောင်အသွားကြရသည်။

ဧကရာဇ်ကြွေလွင့်တောင်မှ ဧကရာဇ်တစ်ပိုင်းက တကယ်ပဲ အလျှော့ပေးလိုက်တာလား။

အခြေအနေကို နားမလည်သူများ ရှိနေသော်လည်း အချို့မှာမူ အခြေအနေကို ရိပ်မိလိုက်ကြပြီး သက်ပြင်းချမိကြတော့သည်။

"သူက အမှန်တကယ် ထိုပုဂ္ဂိုလ်ကြီးနဲ့ ပတ်သက်နေတာကိုး... ဒါကြောင့်ပဲ..."

​ကျန့်ချီလည်း သဘောပေါက်သွားပြီးနောက် ခါးသီးစွာ ပြုံးမိလိုက်သည်။

အကယ်၍ ကျွင်းရှောင်ယောက်၌ ထိုပုဂ္ဂိုလ်ကြီး၏ နောက်ခံရှိနေပါက သူတို့၏အကူအညီကို အဘယ်မှာ လိုအပ်ပါတော့မည်နည်း။

ဓားသင်္ချိုင်း တစ်ခုလုံး၏ ခြိမ်းခြောက်နိုင်စွမ်းပင်လျှင် ထိုပုဂ္ဂိုလ်ကြီးကို မမီနိုင်ချေ။

​အခြားတစ်ဖက်တွင်၊ ခွန်းလွန်းတောင်ကုန်းမှ ခွန်းရွှီကျစ်လည်း အခြေအနေကို နားလည်သွားပြီး ကျွင်းရှောင်ယောက်ကို ကြည့်ကာ ပြုံးလိုက်သည်။

"ညီနောင်ကျွင်း... ခင်ဗျားက ကောင်းကင်ကိုးပါးမှာ ဒီလို နောက်ခံမျိုး ရှိနေတာ တကယ်ကို အံ့သြဖို့ ကောင်းတယ်"

​"နောက်ခံလား"

သို့သော်လည်း ကျွင်းရှောင်ယောက် ကိုယ်တိုင်ကမူ အနည်းငယ် သံသယဖြစ်နေမိသည်။

သူ့တွင် ဘယ်အချိန်က နောက်ခံကောင်းကောင်း ရှိသွားရသနည်း။

သို့မဟုတ်ပါက နတ်ဆိုးဧကရီလေး၏ နောက်ကွယ်မှ ပုဂ္ဂိုလ်ကြီးမှာ အခြားသော တားမြစ်နယ်မြေများကို ကြောက်ရွံ့စေရန် လုံလောက်နေခြင်းပင်လော။

​"အခု... ဒီအရှင်မက ကျွင်းရှောင်ယောက်ကို ကာကွယ်ပေးချင်တာကို ဘယ်သူ ဆန့်ကျင်ချင်သေးလဲ"

နတ်ဆိုးဧကရီလေးက မေးလိုက်သည်။

"ဒါက အဲဒီပုဂ္ဂိုလ်ရဲ့ ဆန္ဒလား။ ပြီးတော့ သူက ကျွင်းရှောင်ယောက်နဲ့ ဘာဆိုင်လို့လဲ"

သက်ရှည်ကျွန်းမှ ဧကရာဇ်တစ်ပိုင်းက လေးနက်သော အသံဖြင့် မေးလိုက်သည်။

"ဒါက ရှင်နဲ့ မဆိုင်ပါဘူး"

နတ်ဆိုးဧကရီလေးက ပျင်းရိပျင်းတွဲ ပြန်ပြောလိုက်၏။

"ဒါဆိုရင်... မင်းက ကျုပ်တို့ရဲ့ တားမြစ်နယ်မြေတွေကို ဆန့်ကျင်ရပ်တည်မှာ သေချာပြီလား"

သက်ရှည်ကျွန်းမှ ဧကရာဇ်တစ်ပိုင်းက ထပ်မေးလိုက်သည်။

"ဟုတ်တယ်ဆိုရင် ဘာဖြစ်လဲ"

နတ်ဆိုးဧကရီလေးက ဂရုမစိုက်ဟန်ဖြင့် ပြန်ပြောလိုက်၏။

​"ကောင်းပြီ... ကျုပ် နားလည်ပြီ"

သက်ရှည်ကျွန်းမှ ဧကရာဇ်တစ်ပိုင်းမှာ ဘာမျှ ဆက်မပြောတော့ဘဲ နတ်ဆိုးဧကရီလေးကို တစ်ချက် စူးစိုက်ကြည့်လိုက်သည်။

ထို့နောက် ကျွင်းရှောင်ယောက်ကို တစ်ဖန်ကြည့်က ပြောလိုက်၏။

"ကျွင်းမိသားစုက ကောင်လေး... ဒါက အဆုံးသတ် မဟုတ်ဘူး။ အခုမှ အစပဲ ရှိသေးတယ်။ သွေးကြွေးကို သွေးနဲ့ပဲ ပြန်ဆပ်ရလိမ့်မယ်"

စကားဆုံးသည်နှင့် သက်ရှည်ကျွန်းမှ ဧကရာဇ်တစ်ပိုင်းမှာ တိုက်ရိုက်ပင် ထွက်ခွာသွားတော့သည်။

"ဒါ..."

ဧကရာဇ်ကြွေလွင့်တောင်မှ အဘိုးအို၏ မျက်နှာတွင် မကျေနပ်မှုများ ရှိနေသော်လည်း နတ်ဆိုးဧကရီလေး၏ နောက်ကွယ်မှ ပုဂ္ဂိုလ်ကြီးကို တွေးမိသောအခါ သူ၏ မကျေနပ်မှုများကို မျိုသိပ်လိုက်ရတော့သည်။

အခြားသော ဧကရာဇ်တစ်ပိုင်းများလည်း ကျွင်းရှောင်ယောက်ကို အေးစက်စွာ တစ်ချက်ကြည့်ပြီးနောက် ထွက်ခွာသွားကြသည်။

​ကျွင်းရှောင်ယောက်ကမူ ဂရုမစိုက်ချေ။

သူ့အနေဖြင့် ဤတားမြစ်နယ်မြေများ၏ အငြိုးအတေးကို ခံလိုက်ရပြီဖြစ်ကြောင်း သူ သဘာဝအတိုင်း သိရှိသည်။

သုတ်သင်ရှင်းလင်းမှုကြီး တကယ်ရောက်လာသည့်အခါ သူတို့က သူ့ကို အလွတ်ပေးကြလိမ့်မည် မဟုတ်ပေ။

သို့သော်လည်း ကျွင်းရှောင်ယောက်က ဂရုမစိုက်ပါ။

အကယ်၍ ယခုအချိန်၌ နတ်ဘုရားဓမ္မခန္ဓာကို ထုတ်မသုံးနိုင်ခြင်းကြောင့်သာ မဟုတ်ပါက...

ဤဧကရာဇ်တစ်ပိုင်းများကို သတ်ဖြတ်ရန်မှာ ယင်ကောင်တစ်ကောင်ကို သတ်ရသကဲ့သို့ပင် လွယ်ကူမည် ဖြစ်သည်။

​တားမြစ်နယ်မြေများမှ ဧကရာဇ်တစ်ပိုင်းများ ထွက်ခွာသွားကြသောအခါ ပတ်ဝန်းကျင်ရှိ အခြေအနေ တင်းမာမှုများမှာလည်း ပေါ့ပါးသွားရတော့သည်။

လူပေါင်းများစွာ၏ အကြည့်များက ထိုအလှဘုရင်မကြီးဆီသို့ စူးစိုက်သွားကြသည်။

သို့ရာတွင်၊ နတ်ဆိုးဧကရီလေးက ထိုအကြည့်များကို ဂရုမစိုက်ဘဲ ကျွင်းရှောင်ယောက်ကိုသာ ပြုံးလျက် ကြည့်နေလေသည်။

​"နတ်ဆိုးဧကရီ အရှင်မ..."

ရန်ယုမန်က နှုတ်ဆက်လိုက်သည်။

နတ်ဆိုးဧကရီလေးက ခေါင်းညိတ်ပြပြီး ကျွင်းရှောင်ယောက်ဘက်သို့ လှည့်ပြောလိုက်၏။

"ရှောင်ယောက် မောင်လေး... တို့ပြန်တွေ့ကြပြန်ပြီနော်"

"မောင်လေး..."

ရန်ယုမန် က တီးတိုးရေရွတ်ရင်း သူတို့နှစ်ဦးကို သံသယဖြင့် ကြည့်လိုက်မိသည်။

သူတို့နှစ်ဦးက ဘယ်အချိန်မှာ ဆုံခဲ့ကြသနည်း။

"လာပါ... မမက မောင်လေးကို နေရာတစ်ခု ခေါ်သွားချင်တယ်"

နတ်ဆိုးဧကရီလေးက ကျွင်းရှောင်ယောက်ကို ညွှန်ပြကာ ဆိုလိုက်သည်။

​ကျွင်းရှောင်ယောက်မှာလည်း နတ်ဆိုးဧကရီလေးကို မေးစရာ ရှိနေသဖြင့် သူမနှင့်အတူ လိုက်ပါသွားရန် ဆုံးဖြတ်လိုက်လေသည်။

ရန်ယုမန်က တုံ့ဆိုင်းနေသော်လည်း နတ်ဆိုးဧကရီလေးက ပြုံးလျက် ပြောလိုက်သည်။

"ယုမန်... နင်လည်း လိုက်ခဲ့လေ။ ငါ နင့်အတွက် ဆရာတစ်ယောက် ရှာပေးမယ်လို့ ပြောခဲ့တယ် မဟုတ်လား။ အဲဒီလူက တကယ်ကို အံ့သြစရာကောင်းတဲ့ ပုဂ္ဂိုလ်ကြီးပဲ"

ရန်ယုမန်လည်း ခေါင်းညိတ်ပြကာ သူတို့နောက်သို့ လိုက်ပါသွားတော့သည်။