အခန်း ၁၅၁၂

အခန်း ( ၁၅၁၂ ) ကစဉ့်ကလျား မူလရင်းမြစ်တစ်ဝက်ကို ဝါးမျိုခြင်း။

ရောက်ရှိနေသူအားလုံး ဆွံ့အသွားကြရသည်။

မျက်စိတစ်မှိတ်အတွင်းမှာပင်၊ ကစဉ့်ကလျားခန္ဓာ ဖေးထျန်းက ရှုံးနိမ့်သွားလိမ့်မည်ဟု မည်သူမျှ မထင်မှတ်ထားခဲ့ကြချေ။

ကျွင်းရှောင်ယောက်၏ ကစဉ့်ကလျားခန္ဓာက အလွန်ပင်အရှိန်အဝါကြီးသော ပုံစံဖြင့် ဖေးထျန်း၏ ကစဉ့်ကလျားခန္ဓာကို ဖိနှိပ်ထားသည်။

သို့သော် လူတိုင်းကို ပို၍ပင် တုန်လှုပ်သွားစေသည်မှာ ကျွင်းရှောင်ယောက်၏ နောက်ထပ် လုပ်ရပ်ပင်။

ကျွင်းရှောင်ယောက်၏ လက်ဖဝါးအတွင်း၌ သေးငယ်သော တွင်းနက်တစ်ခု ပေါ်ထွက်လာပြီး ဖေးထျန်း၏ ရင်ဝကို ရိုက်ချလိုက်သည်။

၎င်းက ဖေးထျန်းကို သတ်ရန် မဟုတ်ပေ။

ထိုအစား...

"ကျွင်းရှောင်ယောက်... မင်း ငါ့ရဲ့ ကစဉ့်ကလျားမူလရင်းမြစ်ကို ထုတ်ယူရဲတယ်လား"

ဖေးထျန်းက ဒေါသတကြီးဖြင့် တုန်လှုပ်စွာ အော်ဟစ်လိုက်သည်။

ကစဉ့်ကလျားခန္ဓာ၏ အဓိကအနှစ်သာရမှာ ကစဉ့်ကလျားမူလရင်းမြစ်ပင်။

၎င်းမှာ မွေးရာပါ ကစဉ့်ကလျားခန္ဓာပိုင်ရှင်များတွင်သာ ရှိတတ်သော အလွန်အဖိုးတန်ပြီး ရှားပါးလှသည့် စွမ်းအင်တစ်ခု ဖြစ်သည်။

ထို့ပြင် အရေးကြီးဆုံးအရာလည်း ဖြစ်၏။

ယခင်က ရွှေကျီးကန်းဒသမမင်းသားသည် ကစဉ့်ကလျားခန္ဓာကို ကြိုးစားတည်ဆောက်ခဲ့သော်လည်း သူ့ခန္ဓာကိုယ်အတွင်း၌ မူလရင်းမြစ် အနည်းငယ်မျှသာ ထုတ်လုပ်နိုင်ခဲ့သဖြင့် အလွန်အားနည်းနေခဲ့ရပေသည်။

သို့သော်လည်း ယခု ဖေးထျန်းမှာမူ စစ်မှန်သော မွေးရာပါ ကစဉ့်ကလျားခန္ဓာ ဖြစ်သဖြင့် သူ၏ မူလရင်းမြစ်မှာ အလွန်ပင် ပြင်းထန်အားကောင်းသည်။

ထိုမူလရင်းမြစ်သာ မရှိလျှင် ဤခန္ဓာက ကမ္ဘာကြီးကို စိုးမိုးနိုင်စွမ်း ရှိတော့မည် မဟုတ်ချေ။

စင်စစ်တွင်၊ ကျွင်းရှောင်ယောက်၏ ကစဉ့်ကလျားခန္ဓာအတွင်း၌လည်း အဇူရာဧကရာဇ်ထံမှ ရရှိထားသော မူလရင်းမြစ်များစွာ ရှိနှင့်နေပြီးသား ဖြစ်သည်။

သို့သော်လည်း ငွေကြေး ပေါများလွန်းသဖြင့် မျက်ရည်ကျမည့်သူ မည်သူရှိမည်နည်း။

ကျွင်းရှောင်ယောက်က သူ့လက်ဝါးကို မြှောက်လိုက်ပြီး တွင်းနက်ကို အသက်သွင်းလိုက်သည်။

ထို့နောက် ဖေးထျန်း၏ ရင်ဘတ်အတွင်းမှ ကစဉ့်ကလျားမူလရင်းမြစ် အစုအဝေးကြီးတစ်ခုကို တိုက်ရိုက်ပင် ဆွဲထုတ်ယူလိုက်တော့သည်။

"ရပ်လိုက်စမ်း"

"မင်း အတင့်ရဲလှချေလား"

ကျန်ရှိသော အခြားကောင်းကင်သားတော်ခုနစ်ပါးက ဤမြင်ကွင်းကို မြင်သောအခါ မျက်နှာပျက်သွားကြသည်။

သူတို့က မအောင့်နိုင်တော့ဘဲ ကျွင်းရှောင်ယောက်အား တစ်ပြိုင်နက်တည်း တိုက်ခိုက်လိုက်ကြ၏။

"ထွက်သွားကြစမ်း"

ကျွင်းရှောင်ယောက်က သူ၏ အခြားလက်တစ်ဖက်ကို ဝေ့ယမ်းလိုက်ရာ နိယာမစွမ်းအားများက မုန်တိုင်းတိုက်ခတ်သကဲ့သို့ ရိုက်ခတ်လာပြီး ထိုကောင်းကင်သားတော်ခုနစ်ပါးကို တားဆီးထားလိုက်တော့သည်။

ထိုအခိုက်အတန့်မှာပင် သူက ဖေးထျန်း၏ ခန္ဓာကိုယ်အတွင်းမှ မူလရင်းမြစ် အမြောက်အမြားကို ထပ်မံ စုပ်ယူလိုက်ပြန်သည်။

"ကျွင်းရှောင်ယောက်"

ဖေးထျန်း၏ မျက်လုံးများက နီရဲသွားသည်။

သူသည် ဒေါသတကြီးဖြင့် သူ့တစ်ကိုယ်လုံးရှိ စွမ်းအားများကို အစွမ်းကုန် ပေါက်ကွဲစေလျက် ရုန်းထွက်လိုက်၏။

ကျွင်းရှောင်ယောက်က ထိုအခါမှပင် နောက်သို့ ဆုတ်ခွာသွားတော့သည်။

သို့သော်လည်း သူ၏လက်ထဲတွင်မူ ဖေးထျန်းပိုင်ဆိုင်သော ကစဉ့်ကလျား မူလရင်းမြစ် စုစုပေါင်း၏ တစ်ဝက်နီးပါး ရောက်ရှိနေပြီ ဖြစ်သည်။

၎င်းက တစ်ဝက်မျှသာဖြစ်၍ နည်းပါးသည်ဟု မဆိုသင့်ပေ။

ကစဉ့်ကလျားခန္ဓာ နှစ်ခု တိုက်ခိုက်ချိန်တွင် အကယ်၍ တစ်ဦးက အခြားတစ်ဦး၏ မူလရင်းမြစ် တစ်ဝက်ကို ရရှိသွားခဲ့လျှင် မည်သို့ဖြစ်မည်နည်း။

အကယ်၍ အခြားသော ကစဉ့်ကလျားခန္ဓာပိုင်ရှင်က ကစဥ့်ကလျား မူလရင်းမြစ်အသစ်ကို ရှာမတွေ့နိုင်လျှင် တစ်ဖက်လူ၏ ထာဝရ ဖိနှိပ်ခံထားရတော့မည် ဖြစ်သည်။

သို့သော်လည်း ကစဉ့်ကလျားမူလရင်းမြစ်မှာ အလွန်ပင် ရှားပါးလှပေသည်။

ဤလောကတွင် ရှာဖွေရန် အလွန်ခက်ခဲ၏။

အလွန့်အလွန် ကံကောင်းလှမှသာလျှင် ရှာတွေ့နိုင်ပြီး သာမန်အားဖြင့် လုံးဝ မဖြစ်နိုင်ချေ။

ဖေးထျန်းအတွက် သူ၏ မူလရင်းမြစ် တစ်ဝက် ဆုံးရှုံးလိုက်ရခြင်းမှာ အရှုံးကြီး ရှုံးသွားခဲ့ရခြင်း ဖြစ်သည်။

၎င်းမှာ သူ၏ ကျင့်ကြံမှုလမ်းစဉ်အတွက် ကြီးမားသော အဟန့်အတား ဖြစ်၏။

သူသည် ကျွင်းရှောင်ယောက်၏ စေ့စပ်ပွဲသို့ လာရောက် ရန်စခဲ့သော်လည်း...

ကျွင်းရှောင်ယောက်ကို အရှက်ခွဲနိုင်ခြင်း မရှိဘဲ သူကိုယ်တိုင်သာ အရှက်ရခဲ့သည်။

ထို့ထက် သူ၏ မူလရင်းမြစ် တစ်ဝက်ကိုပင် ဆုံးရှုံးလိုက်ရချေပြီ။

သူ့အဖြစ်မှာ မြွေပါလည်းဆုံး သားလည်းဆုံး ဖြစ်သည်။

"ကျွင်းရှောင်ယောက်... ငါ့ရဲ့ ကစဉ့်ကလျားမူလရင်းမြစ်တွေကို ပြန်ပေးစမ်း"

ဖေးထျန်း၏ မျက်လုံးများမှာ သွေးချင်းချင်း နီမြန်းနေပြီး ရူးသွပ်မတတ် ဖြစ်နေရသည်။

အကယ်၍ ဤမူလရင်းမြစ် တစ်ဝက်ကို ဆုံးရှုံးလိုက်ရလျှင် သူ၏ ကျင့်ကြံမှုလမ်းစဉ်အတွက် ကြီးမားသော သက်ရောက်မှု ရှိလိမ့်မည်။

ယခင် ခေတ်အဆက်ဆက်တွင် ကစဉ့်ကလျားခန္ဓာပိုင်ရှင်တိုင်းမှာ ကမ္ဘာကြီးကို စိုးမိုးနိုင်ခဲ့ကြသည်။

သို့သော်လည်း ယခုခေတ်တွင်မူ သူ၏ ကစဉ့်ကလျားခန္ဓာက ချောက်နက်ထဲသို့ ပြုတ်ကျသွားရတော့မည့်အလား ဖြစ်နေပြီ။

သို့ရာတွင်၊ ကျွင်းရှောင်ယောက်က နှုတ်ခမ်းတွန့်ရုံ ပြုံးလိုက်ပြီးနောက် ရေဝဲတွင်းနက်မှတဆင့် ထိုမူလရင်းမြစ် တစ်ဝက်ကို သူ၏ခန္ဓာကိုယ်အတွင်းသို့ တိုက်ရိုက်ပင် သန့်စင်ပေါင်းစပ်လိုက်တော့သည်။

ရုတ်တရက်...

ကျွင်းရှောင်ယောက်၏ ကစဉ့်ကလျားခန္ဓာ အရှိန်အဝါမှာ တစ်ဟုန်ထိုး မြင့်တက်သွားသည်။

သူ၏ ခန္ဓာကိုယ်ပတ်လည်တွင် ကစဉ့်ကလျားနိယာမများ စီးဆင်းလာ၏။

ယခုအခါ၊ ကျွင်းရှောင်ယောက်၏ ကစဉ့်ကလျားခန္ဓာက ယခင်ခေတ်အဆက်ဆက်မှ ကစဉ့်ကလျားခန္ဓာများထက်ပင် ပိုမို သန်မာသွားချေပြီ။

"ကျွင်းရှောင်ယောက်... မင်း လွန်လွန်းသွားပြီ"

"အားလုံး အတူတူ တိုက်ခိုက်ကြ၊ ဒီလို ပုံမှန်မဟုတ်တဲ့လူကို ဝိုင်းဝန်း ဖိနှိပ်ပစ်ရမယ်"

ကျန်ရှိသော အခြားကောင်းကင်သားတော် ခုနစ်ဦးမှာလည်း တုန်လှုပ်သွားကြပြီး တစ်ပြိုင်နက် တိုက်ခိုက်ရန် ပြင်ဆင်လိုက်ကြသည်။

ဖေးထျန်း တစ်ဦးတည်းက ကျွင်းရှောင်ယောက်ကို မနှိမ်နင်းနိုင်သောကြောင့် သူတို့ ရှစ်ဦးလုံး အတူတူ တိုက်ခိုက်ရန် ဆုံးဖြတ်လိုက်ခြင်းပင်။

သူတို့ မျက်နှာပျက်ရမည်ကိုမူ...

ယခုအချိန်တွင် ဂရုမစိုက်နိုင်တော့ပါ။

"တိုက်ခိုက်ကြ"

"ဝုန်း"

ဖေးထျန်း အပါအဝင် ကောင်းကင်သားတော်ရှစ်ပါးက တစ်ပြိုင်နက်တည်း တိုက်ခိုက်လိုက်ကြသည်။

သူတို့က ဝိုင်းဝန်းတိုက်ခိုက်ရုံမျှသာ မဟုတ်ချေ။

သူတို့ ရှစ်ဦး၏ ဦးခေါင်းအထက်တွင် ကောင်းကင်တာအို သရဖူ တစ်ခုစီ ပေါ်ထွက်လာကြသည်။

၎င်းတို့မှာ ဖရိုဖရဲ အလင်းရောင်များဖြင့် အလွန်ထူးခြားပြီး ကောင်းကင်၏ လျှို့ဝှက်စွမ်းအားများလည်း စီးဆင်းနေ၏။

အံ့အားသင့်စရာ အကောင်းဆုံးမှာ...

သူတို့ရှစ်ဦး၏ ကောင်းကင်တာအို သရဖူများမှ စွမ်းအားများက တစ်နေရာတည်းတွင် စုစည်းသွားကြခြင်း ဖြစ်သည်။

ထို့နောက်တွင် ဝေဝါးဝါးဖြစ်သော်လည်း အလွန်ပင် အရှိန်အဝါကြီးသော ပုံရိပ်ကြီးတစ်ခု ပေါ်ထွက်လာတော့သည်။

၎င်းမှာ စွမ်းအားကြီးလွန်းသဖြင့် လူတို့ကို တုန်လှုပ်စေခဲ့သည်။

"အဲဒါ ဘာကြီးလဲ"

"ကောင်းကင်ရဲ့အသွင်လား"

ရောက်ရှိနေသော ဧည့်သည်တော်များမှာ ထိုအခိုက်အတန့်တွင် တုန်လှုပ်သွားကြသည်။

ကောင်းကင်သားတော်ရှစ်ပါးက သူတို့၏ သရဖူများကို ပေါင်းစပ်လျက် ထိုကဲ့သို့ ထူးခြားပြီး ကြောက်မက်ဖွယ်ကောင်းသော ပုံရိပ်ကြီးအဖြစ် ပြောင်းလဲလိုက်ခြင်း ဖြစ်၏။

"ဟမ်... ဒါက အဲဒီလူ ဖြစ်နိုင်မလား"

ကျွင်းမိသားစု၏ ဘိုးဘေးများမှာ တစ်ဦးကိုတစ်ဦး ကြည့်ပြီး မျက်မှောင်ကြုတ်လိုက်ကြသည်။

သူတို့က စန်းမျိုးနွယ်စုမှ အလွန်ရှေးကျသော ပုဂ္ဂိုလ်ကြီးတစ်ဦးကို သတိရသွားကြခြင်း ဖြစ်၏။

"ရှောင်ယောက်ကို ကျုပ်တို့ သွားကူရမလား"

ကျွင်းမော့ရှောင်က မေးလိုက်သည်။

လူရှစ်ဦးက ကျွင်းရှောင်ယောက်၏ ကိုယ်ပွားတစ်ခုကို အတူတကွ ဝိုင်းတိုက်ခိုက်ခြင်းမှာ အလွန် အရှက်မရှိသော လုပ်ရပ်ပင်။

"မလိုပါဘူး... ရှောင်ယောက်ရဲ့ အစွမ်းနဲ့ဆိုရင် ငါတို့က ဒီတိုင်း ကြည့်နေရုံပဲ"

ကျွင်းလုံခန်းက ပြုံးလိုက်၏။

ကျွင်းရှောင်ယောက်က မည်သည့်အခါမျှ စိတ်ပျက်စေသူ မဟုတ်ကြောင်း သူ ယုံကြည်ထားသည်။

ကျွင်းရှောင်ယောက်ကမူ ဤမြင်ကွင်းကို မြင်ရသော်လည်း တည်ငြိမ်နေဆဲပင်။

ယခုအချိန်တွင် ကောင်းကင်သားတော်ရှစ်ပါးက ကောင်းကင်တာအို သရဖူ၏ စွမ်းအားကို အစွမ်းကုန် ထုတ်သုံးနေပြီး အလွန်ပင် ကြောက်မက်ဖွယ် ကောင်းသည်။

နတ်ဖန်ဆင်းခြင်းအဓိပတိများပင်လျှင် ဤတိုက်ကွက်ကြောင့် ပြင်းထန်စွာ ဒဏ်ရာရနိုင်ပြီး အသက်ပင် ဆုံးရှုံးရလိမ့်မည်။

သို့သော်လည်း ကျွင်းရှောင်ယောက်၏ ကစဉ့်ကလျားခန္ဓာအတွက်မူ ဤသည်မှာ ပြဿနာ မဟုတ်ချေ။

သူက ဖေးထျန်း၏ မူလရင်းမြစ် တစ်ဝက်ကို စုပ်ယူထားပြီးဖြစ်ကြောင်း သိထားကြရမည် ဖြစ်သည်။

သူ၏ ပါရမီနှင့် စွမ်းရည်အားလုံးမှာ ယခင်ကထက် ပိုမို သန်မာနေပြီ။

ကျွင်းရှောင်ယောက်၏ ကစဉ့်ကလျားခန္ဓာက သမိုင်းတစ်လျှောက်တွင် အသန်မာဆုံးသော ကစဉ့်ကလျားခန္ဓာ ဖြစ်လာရန် အခွင့်အလမ်း အလွန်များနေပြီဟု ဆိုနိုင်သည်။

အကယ်၍ နောင်အချိန်တွင် ဖေးထျန်းကို အပြည့်အဝ သန့်စင်ပြီး ဝါးမြိုခွင့် ရခဲ့ပါက အကောင်းဆုံး ဖြစ်လိမ့်မည်။

သို့သော်လည်း ယခုအချိန်မှာတော့ ၎င်းမှာ မဖြစ်နိုင်သေးကြောင်း သူ သိသည်။

ဖေးထျန်း၏ မူလရင်းမြစ် တစ်ဝက်ကို ရရှိခဲ့ခြင်းမှာပင် အမြတ်ကြီးတစ်ခု ဖြစ်နေပြီ။

နောင်တွင် ဖေးထျန်းကို "ကြက်သွန်မြိတ်" တစ်ခုလို ပျိုးထောင်ထားပြီးမှ ပြန်လည် ရိတ်သိမ်းရန် သူ စိတ်ကူးထားသည်။

ထိုအခါမှ သူ့ခန္ဓာကိုယ်မှာ အပြည့်အဝ အသွင်ပြောင်းလဲပြီး သမိုင်းတစ်လျှောက် အသန်မာဆုံး ဖြစ်လာပေလိမ့်မည်။

ဤအခိုက်တွင်၊ ကျွင်းရှောင်ယောက်က သူ၏ ကစဉ့်ကလျား ရူပါရုံများကို အသက်သွင်းလိုက်သည်။

ကစဉ့်ကလျား ကောင်းကင်ကိုဖွင့်ခြင်း နှင့် ဝိညာဉ်တစ်သောင်း...

ရူပါရုံ နှစ်ခုလုံးကို တစ်ပြိုင်နက်တည်း ထုတ်ဖော်လိုက်၏။

ထို့နောက် ကျွင်းရှောင်ယောက်က သူ၏ လက်ဝဲလက်ကို မြှောက်လိုက်ရာ နတ်ဘုရားအလင်းတန်းများ ထွက်ပေါ်လာသည်။

သူက လက်ယာလက်ကို မြှောက်လိုက်ပြန်ရာ အဆုံးမဲ့သော အပြစ်တရားစွမ်းအားများ ပေါ်ထွက်လာ၏။

ကမ္ဘာဦးကျမ်း - နတ်ဘုရား၏အလင်း။

ကမ္ဘာဦးကျမ်း - နတ်ဘုရား၏ပြစ်ဒဏ်။

သူကိုယ်တိုင် ဖန်တီးထားသော စွမ်းရည်နှစ်ခုက သူ၏ ရူပါရုံနှစ်ခုနှင့်အတူ ပေါင်းစပ်လျက် ထွက်ပေါ်လာတော့သည်။

ကမ္ဘာကြီးက ကပြောင်းကပြန်ဖြစ်သွားပုံရသည်။

အလွန် ကြောက်မက်ဖွယ်ကောင်းသော ဖျက်ဆီးခြင်း စွမ်းအင်များ ပြည့်နှက်နေ၏။

ကျွင်းရှောင်ယောက်၏ ကစဉ့်ကလျားခန္ဓာက ရှေးဟောင်း ကစဉ့်ကလျားနတ်ဘုရားတစ်ပါးကဲ့သို့ ဖြစ်နေပြီး သူ၏ လက်ဖဝါးအတွင်း၌ အလင်းနှင့် အမှောင်... ရှင်သန်ခြင်းနှင့် သေဆုံးခြင်းတို့ကို ချုပ်ကိုင်ထားသည်။

သက်ရှိအားလုံးက သူ၏ စီရင်မှုကို ခံယူရတော့မည်ကဲ့သို့ပင်။

ထိုစွမ်းရည်နှစ်ရပ်က အနှိုင်းမဲ့သော ဖျက်ဆီးခြင်း အလင်းတန်းကြီးတစ်ခုအဖြစ် ပြောင်းလဲသွားပြီး ကောင်းကင်သားတော်ရှစ်ပါးနှင့် ထိပ်တိုက် တွေ့ဆုံသွားကြသည်။

သို့သော်...

အများမျှော်လင့်ထားသကဲ့သို့ နားကွဲမတတ် ပေါက်ကွဲသံကြီးများ ထွက်မလာခဲ့ချေ။

တောက်ပသော အလင်းတန်းများသာ ထွက်ပေါ်လာပြီး တိုက်ပွဲ၏ အလယ်ဗဟိုတွင် အချင်းချင်း ဝါးမြိုဖျက်ဆီးရန် ကြိုးစားလိုက်ကြသည်။

ဤမြင်ကွင်းက လူတိုင်းကို အမူအရာအမျိုးမျိုး ပြောင်းသွားစေခဲ့သည်။

ယခင်က ကျွင်းမိသားစု၏ သူရဲကောင်းသုံးဦး ပူးပေါင်း၍ ကောင်းကင်သားတော်ခုနစ်ပါးကို တိုက်ခိုက်ခဲ့ကြရကြောင်း အားလုံး အမှတ်ရကြလိမ့်မည်။

သို့သော်လည်း ယခုမူ ကျွင်းရှောင်ယောက်က သူ၏ ကိုယ်ပွားတစ်ခုတည်းဖြင့် ကောင်းကင်သားတော်ရှစ်ပါး၏ နောက်ဆုံးတိုက်ကွက်ကို ရင်ဆိုင်နေခြင်း ဖြစ်သည်။

ဒါက တကယ်ကို တုန်လှုပ်စရာပင်။

ကျွင်းရှောင်ယောက်က မျိုးဆက်သစ်လူငယ်များ၏ အကန့်အသတ်ကို ကျော်လွန်သွားပြီး ကျွင်းလုံခန်းကဲ့သို့သော ပါရမီရှင်များနှင့်ပင် တစ်တန်းတည်း မဟုတ်တော့ကြောင်း ထင်ရှားသည်။

ကျွင်းရှောင်ယောက်၏ စွမ်းအားမှာ မည်သည့်နေရာတွင် အဆုံးသတ်မည်ကို မည်သူမျှ မသိနိုင်တော့ချေ။

"ဝုန်း"

နောက်ဆုံးတွင် ထိုတိုက်ကွက်များမှာ အချင်းချင်း ဖျက်ဆီးသွားကြသည်။

ထို့နောက်၊ သွေးများ အန်ထွက်သံနှင့်အတူ ကောင်းကင်သားတော်ရှစ်ပါးလုံးမှာ နောက်သို့ လွင့်စင်သွားကြ၏။

သူတို့ရှစ်ဦးစလုံး သွေးများအန်ကာ အရိုးများ ကျိုးကြေလျက် ပြင်းထန်စွာ ဒဏ်ရာရသွားကြတော့သည်။

ကျွင်းရှောင်ယောက်ကမူ သူ၏ လက်နှစ်ဖက်ကို နောက်သို့ယှက်လျက် အေးဆေးတည်ငြိမ်သော အမူအရာဖြင့် ဆိုလိုက်သည်။

"ကစဉ့်ကလျားခန္ဓာက ဒီကမ္ဘာမှာ တစ်ခုတည်း မဟုတ်ဘူး"

"ဒါပေမဲ့... ငါ ကျွင်းရှောင်ယောက်ရဲ့ ကစဉ့်ကလျားခန္ဓာက ဒီလောကမှာ အသန်မာဆုံး ဖြစ်လိမ့်မယ်"