အခန်း ၁၅၁၆

အခန်း ( ၁၅၁၆ ) အင်မော်တယ်တံခါး ဆင်းသက်လာခြင်း။

အင်မော်တယ်တံခါး ဆင်းသက်လာချေပြီ။

အမှောင်ထု ကပ်ဘေးလှိုင်းကြီး စတင်တော့မည်။

ဤတုန်လှုပ်ဖွယ်သတင်းက ကောင်းကင်ကိုးပါး အင်မော်တယ်နယ်မြေ တစ်ခုလုံးသို့ ချက်ချင်းဆိုသလို ပျံ့နှံ့သွားခဲ့သည်။

အချို့သော အင်မော်တယ်အင်အားစုများနှင့် အဆင့်မြင့် ပုဂ္ဂိုလ်ကြီးများက ဤအကြောင်းကို ကြိုတင်သိရှိထားကြပြီးပြီ။

သို့သော်လည်း အင်မော်တယ်တံခါးက ဤမျှမြန်မြန်ဆန်ဆန် ဆင်းသက်လာလိမ့်မည်ဟုတော့ သူတို့ မထင်မှတ်ထားခဲ့ကြချေ။

သာမန်ကျင့်ကြံသူ အများစုအတွက်မူ အရာအားလုံးဖြစ်ပျက်ပြီးမှသာ သိရှိကြရသည်မှာ သဘာဝပင် ဖြစ်သည်။

စင်စစ်တွင်၊ အတိတ်က ကပ်ဘေးများတွင်လည်း အောက်ခြေကျင့်ကြံသူများသည် ကိစ္စက ထိပ်ဝသို့ ရောက်ရှိမှသာ အမှန်တရားကို သိရှိကြရမြဲပင်။

သို့သော်လည်း တကယ်တမ်းမှာတော့ စောစောသိသည်ဖြစ်စေ၊ နောက်ကျမှသိသည်ဖြစ်စေ ထူးခြားမှု သိပ်မရှိပါ။

ထွက်ပြေးမည်ဆိုလျှင်ပင် မည်သည့်နေရာသို့ ပြေးကြရမည်နည်း။

နယ်ခြားကိုဖြတ်ကျော်ပြီး တိုင်းတစ်ပါးသို့ သွားရန်မှာ မဖြစ်နိုင်ချေ။

ကမ္ဘာ့အတားအဆီးများကို ဖြတ်ကျော်ပြီး အဆုံးမဲ့ပင်လယ်သို့ သွားရန်မှာလည်း မဖြစ်နိုင်ပါ။

၎င်းမှာ သေမင်းကို သွားရှာသည်နှင့် မခြားနားပေ။

ဤကဲ့သို့သော အခြေအနေမျိုးတွင်...

သာမန်ကျင့်ကြံသူများကို မဆိုထားဘိ၊ ထာဝရရပ်တည်လာခဲ့သော အင်မော်တယ်အင်အားစုများပင်လျှင် အလွယ်တကူ သုတ်သင်ဖယ်ရှားခံရနိုင်သည်။

၎င်းတို့နှင့် နှိုင်းယှဉ်ပါက သာမန်သတ္တဝါများနှင့် ကျင့်ကြံသူများမှာ ပုရွက်ဆိတ်ထက်ပင် သိမ်ငယ်သော ဖုန်မှုန့်များထက် မပိုတော့ပေ။

"ဘာလို့လဲ... ငါတို့ကို ဘာဖြစ်လို့ ဒီလို ကပ်ဘေးတွေနဲ့ ကြုံတွေ့စေရတာလဲ"

"ဒီလိုရွှေခေတ်ထဲမှာ ငါ မသေချင်သေးဘူး၊ ဒီခမ်းနားတဲ့ခေတ်ကြီးကို မျက်မြင်တွေ့ချင်သေးတယ်"

ကျင့်ကြံသူများစွာမှာ စိတ်ပျက်အားငယ်စွာဖြင့် အော်ဟစ်လိုက်ကြသည်။

ပါရမီရှင်အချို့မှာလည်း အချိန်မှားယွင်းစွာ မွေးဖွားလာခဲ့မိသည့်အတွက် ကောင်းကင်ယံကို ကြည့်ပြီး ဟောက်လိုက်မိကြ၏။

အထူးကဲဆုံး ရွှေခေတ်တွင် အဆိုးရွားဆုံးသော ကပ်ဘေးနှင့် ကြုံတွေ့ရခြင်းမှာ... သူတို့အတွက် ရင်နာစရာပင်။

သို့သော်လည်း ကြောက်လန့်တုန်လှုပ်နေသော အောက်ခြေကျင့်ကြံသူများနှင့် နှိုင်းယှဉ်ပါက အချို့သော အင်မော်တယ်အင်အားစုများမှာ ကြိုတင်ပြင်ဆင်နေကြပြီ ဖြစ်သည်။

အချို့ အင်အားစုများက အင်မော်တယ်ခုံရုံး၊ ရှေးနဂါးမျိုးနွယ်နှင့် ကျွင်းမိသားစုကဲ့သို့ ထိခိုက်မှုမရှိနိုင်သည့် အုပ်စိုးရှင် အင်အားစုများ၏ အကူအညီကို ရယူရန် ရွေးချယ်ကြသည်။

အချို့သော အင်မော်တယ် အင်အားစုများမှာမူ ဝေးလံသော ကြယ်စက်ဝိုင်းများဆီသို့ ထွက်ပြေးတိမ်းရှောင်ရန် ပြင်ဆင်ကြ၏။

သို့သော်လည်း နောက်ဆုံးရလဒ်က မည်သို့ဖြစ်လာမည်မှာ ကံကြမ္မာအတိုင်းသာ ဖြစ်လိမ့်မည်။

မည်သို့ပင်ဆိုစေ၊ သမိုင်းတစ်လျှောက် အဆိုးရွားဆုံးသော ကပ်ဘေးလှိုင်းကြီးတွင် ကောင်းကင်ကိုးပါး အင်မော်တယ်နယ်မြေကြီး၌ အမှန်တကယ် ဘေးကင်းလုံခြုံသောနေရာဟူ၍ မရှိပါ။

မိနစ်ပိုင်းအတွင်းမှာပင် အင်မော်တယ်နယ်မြေတစ်ခုလုံး ဖရိုဖရဲ ဖြစ်သွားခဲ့သည်။

ပျက်စီးခြင်းကောင်းကင် အင်မော်တယ်နယ်မြေဘက်တွင်လည်း ရောက်ရှိနေသော ဧည့်သည်တော်များက လှုပ်လှုပ်ရှားရှား ဖြစ်လာကြပြီ။

ကျွင်းရှောင်ယောက်၏ စေ့စပ်ပွဲ ပြီးဆုံးတော့မည့်အချိန်တွင် ဤမျှကြီးမားသော အဖြစ်အပျက်ကြီး ပေါ်ပေါက်လာလိမ့်မည်ဟု မည်သူမျှ မထင်ထားခဲ့ကြချေ။

"နတ်ဘုရားသားတော်... ကျုပ် အရင်ပြန်ပါရစေ"

"ကျုပ်လည်း ပြန်ပြီးတော့ ပြင်ဆင်မှုတွေ လုပ်ရဦးမယ်"

အင်အားစုအသီးသီးမှ ခေါင်းဆောင်များက ကျွင်းရှောင်ယောက်ကို နှုတ်ဆက်ကာ အလျင်အမြန် ထွက်ခွာသွားကြသည်။

ရှေးဟောင်း ရဲ့မိသားစု၊ ကျိမိသားစု၊ ချင်မိသားစုနှင့် အခြားသော မိသားစုကြီးများသည်လည်း ပြင်ဆင်ရန် ထွက်ခွာကုန်၏။

ကျွင်းမိသားစုနှင့် ရင်းနှီးသော ရဲ့မိသားစုကဲ့သို့ အင်အားစုများမှာမူ သဘာဝအတိုင်း ကျွင်းမိသားစုနှင့် မဟာမိတ်ဖွဲ့ကြမည် ဖြစ်သည်။

"ရှောင်ယောက်... အားလုံးပဲ... ကျုပ်တို့လည်း ကျန်းမိသားစုဆီ ပြန်ပြီး ပြင်ဆင်လိုက်ပါဦးမယ်"

ကျန်းမိသားစုမှ ကျန်းဟန်က ကျွင်းရှောင်ယောက်နှင့် အခြားသူများကို ပြောလိုက်သည်။

ကျန်းမိသားစုက ကျွင်းမိသားစုနှင့် အမြဲတမ်း အတူတကွ ရှိနေခဲ့သဖြင့် သဘာဝအတိုင်း မဟာမိတ်ဖွဲ့ကြမည် ဖြစ်သည်။

ထိုစဉ် လုဖူးကွေ့နှင့် မော့ယန်ယုတို့လည်း စိုးရိမ်တကြီးဖြင့် ကျွင်းရှောင်ယောက်ထံ ရောက်ရှိလာကြသည်။

"အစ်ကိုကျွင်း... ကျွန်တော်တို့ မိသားစုခေါင်းဆောင်က ကျွင်းမိသားစု၊ ကျွင်းဧကရာဇ်ခုံရုံးတို့နဲ့ အပြည့်အဝ မဟာမိတ်ဖွဲ့ချင်တယ်လို့ ပြောလိုက်ပါတယ်"

လုဖူးကွေ့က ဆိုသည်။

"ကျွန်မတို့ မော့မိသားစုကလည်း ထပ်တူပါပဲ"

မော့ယန်းယုကလည်း ပြောလိုက်၏။

"အင်း... ပြဿနာမရှိပါဘူး၊ မင်းတို့ရဲ့ အမျိုးအနွယ်တွေကို စတင်ရွှေ့ပြောင်းဖို့ စီစဉ်လိုက်ပါ"

"ဒါက အင်မော်တယ်တံခါး ဆင်းသက်လာတဲ့ နိမိတ်ပဲ ရှိသေးတယ်၊ အမှန်တကယ် ရောက်ရှိလာဖို့က အချိန်အနည်းငယ် လိုပါသေးတယ်"

ကျွင်းရှောင်ယောက်က ပြောလိုက်သည်။

"ကောင်းပါပြီ"

လုဖူးကွေ့နှင့် မော့ယန်းယုတို့လည်း အလျင်အမြန် ထွက်ခွာသွားကြတော့သည်။

လုမိသားစုနှင့် မော့မိသားစုမှာ ရှေးဟောင်းမိသားစုများ ဖြစ်ကြသော်လည်း တိုက်ခိုက်ရေးဘက်တွင် အားမသန်ကြချေ။

ထို့ပြင်၊ ဤတစ်ကြိမ်က သမိုင်းတစ်လျှောက် အဆိုးရွားဆုံးသော ကပ်ဘေးလှိုင်းကြီး ဖြစ်လာနိုင်သည်။

ရှေးဟောင်းမိသားစုကြီးများပင် ရှင်သန်ရန် ခဲယဉ်းပေလိမ့်မည်။

ထို့ကြောင့် ဤတစ်ကြိမ်တွင် သူတို့က ကျွင်းမိသားစုနှင့် ကျွင်းဧကရာဇ်ခုံရုံးကို အပြည့်အဝ မှီခိုရန် ဆုံးဖြတ်လိုက်ကြခြင်း ဖြစ်သည်။

ကျွင်းရှောင်ယောက်ကမူ ဤမြင်ကွင်းကို မြင်ရသဖြင့် ကျေနပ်မိလေသည်။

ဤကပ်ဘေးကြီးအပြီးတွင် အင်မော်တယ်နယ်မြေတစ်ခုလုံး၏ အင်အားဖွဲ့စည်းပုံကို ပြန်လည်ပြင်ဆင်ရမည်ဖြစ်ကြောင်း သူ သိသည်။

အင်အားစုများစွာက ပြာအဖြစ်သို့ ပြောင်းလဲသွားပြီး သမိုင်းရေစီးကြောင်းထဲတွင် လုံးဝ ပျောက်ကွယ်သွားကြပေလိမ့်မည်။

ကျန်ရှိနေသော အင်အားစုများမှာမူ မဟာမိတ်ဖွဲ့ခြင်းနှင့် အင်အားစုဖွဲ့စည်းခြင်းများ ပြုလုပ်ကြမည် ဖြစ်သည်။

ကျွင်းမိသားစုကတော့ သဘာဝကျစွာပင် ရှေးဟောင်းမိသားစုများ မဟာမိတ်အဖွဲ့၏ ခေါင်းဆောင် ဖြစ်လာပေလိမ့်မည်။

ယခုအချိန်မှာတော့ အခြေအနေမှာ အလွန်ပင် အရေးကြီးနေပြီဖြစ်သဖြင့် ဧည့်သည်တော်အများစုက နယ်မြေဖြတ်ကျော် အစီရင်များမှတစ်ဆင့် မိမိတို့၏ မျိုးနွယ်များဆီသို့ အလျင်အမြန် ပြန်သွားကြပြီ ဖြစ်သည်။

ပျက်စီးခြင်းကောင်းကင် အင်မော်တယ်နယ်မြေရှိ ကျန်ရှိသော ဒေသခံအင်အားစုများနှင့် ကျင့်ကြံသူအများစုမှာမူ ကျွင်းမိသားစု၏ အနီးအနားတွင်သာ နေထိုင်ရန် ရွေးချယ်ကြ၏။

နောက်ဆုံးမှာတော့ ဤကဲ့သို့သော ကပ်ဘေးမျိုးတွင် ကျွင်းမိသားစုက စိတ်အချရဆုံး အင်အားစု ဖြစ်သည်။

အတိတ်က ကပ်ဘေးများတွင်လည်း ကျွင်းမိသားစုက ပင်လယ်လှိုင်းဒဏ်ကို ကြံ့ကြံ့ခံနိုင်သည့် ကျောက်ဆောင်ကြီးကဲ့သို့ မလှုပ်မယှက် ရှိခဲ့သည်။

ကောင်းကင်ကိုးပါး တားမြစ်နယ်မြေများပင် ကျွင်းမိသားစုကို မရန်စဝံ့ကြချေ။

ဤတစ်ကြိမ်တွင်လည်း ကျွင်းမိသားစုက သူတို့ကို ဤဘေးဒုက္ခမှ ကယ်တင်လိမ့်မည်ဟု ကျင့်ကြံသူအများ ယုံကြည်နေကြသည်။

ကျွင်းမိသားစုအနီးတွင် ခိုလှုံလိုသော ကျင့်ကြံသူများကို...

ကျွင်းမိသားစုကလည်း တားဆီးခြင်း မပြုခဲ့ချေ။

အတိတ်တွင်၊ ကျွင်းမိသားစုက အမှောင်ထု ကပ်ဘေးများကို တားဆီးရန် ပျင်းရိခဲ့ကြပြီး ထိုကိစ္စများကို စိတ်မဝင်စားခဲ့ကြချေ။

နောက်ဆုံးတွင်၊ ကျွင်းမိသားစုထဲမှ လူတိုင်းက ကျွင်းဝူဟွေ့ကဲ့သို့ သတ္တဝါအားလုံးအပေါ် စာနာစိတ် မရှိကြပါ။

လူဆိုသည်မှာ အမြဲတမ်း အတ္တရှိတတ်သည်။

ကျွင်းဝူဟွေ့နှင့် အဆုံးမဲ့ဧကရာဇ်ကဲ့သို့သော ပုဂ္ဂိုလ်များမှာ အလွန်ပင် ရှားပါးလှပေသည်။

သို့သော်လည်း ကျွင်းမိသားစုဆီသို့ ထွက်ပြေးလာသော ကျင့်ကြံသူများကိုမူ ကျွင်းမိသားစုက မနှင်ထုတ်ဘဲ အကာအကွယ် ပေးခဲ့သည်။

တစ်ဖက်တွင်၊ ကျွင်းရှောင်ယောက်သည်လည်း အားလပ်မနေချေ။

သူက ပထမဦးစွာ ယွမ်ချယ်၏ ခန္ဓာကိုယ်ထဲမှ အပြစ်စွမ်းအားများကို ဖယ်ရှားပေးရန် ကူညီရမည် ဖြစ်သည်။

၎င်းမှာ ကျွင်းရှောင်ယောက် ကတိပေးထားသော ကိစ္စဖြစ်သဖြင့် မဖြစ်မနေ လုပ်ဆောင်ပေးရလိမ့်မည်။

ဤတစ်ကြိမ်တွင် ယွမ်ချယ်သည်လည်း အခြေအနေများ အရေးကြီးကြောင်း သိသဖြင့် အလေးအနက် ပူးပေါင်းဆောင်ရွက်ခဲ့ပြီး ကျွင်းရှောင်ယောက်ကို နောက်ပြောင်ခြင်း မပြုခဲ့ချေ။

မကြာမီမှာပင် ကျွင်းရှောင်ယောက်က ယွမ်ချယ်၏ ခန္ဓာကိုယ်ထဲမှ အပြစ်စွမ်းအင်အားလုံးကို အပြည့်အဝ စုပ်ယူကာ ချေဖျက်ပေးလိုက်သည်။

သူ၏ လက်ရှိစွမ်းရည်အရ ထိုစွမ်းအားများကို ချေဖျက်ရန်မှာ လွယ်ကူလှသည်။

ထို့နောက်၊ ထိုစွမ်းအင်အားလုံးကို နတ်ဘုရားဓမ္မခန္ဓာသို့ လွှဲပြောင်းပေးအပ်ခဲ့၏။

လက်ရှိတွင် နတ်ဘုရားဓမ္မခန္ဓာမှာ သူ၏ အတွင်းစကြဝဠာထဲတွင် မရှိသော်လည်း သူနှင့် ချိတ်ဆက်မှုရှိပေသည်။

"ရှောင်ယောက်... ကျေးဇူးအများကြီး တင်ပါတယ်"

ယွမ်ချယ်က ကျေးဇူးတင်စကား ဆိုလိုက်သည်။

အပြစ်စွမ်းအားများ ကင်းစင်သွားပြီးနောက် ယွမ်ချယ်၏ အရှိန်အဝါက တဟုန်ထိုး ထိုးတက်သွားခဲ့သည်။

ကျွင်းရှောင်ယောက်ပင် အနည်းငယ် အံ့အားသင့်သွားရ၏။

ယခုအခါ ယွမ်ချယ်၏ စွမ်းအားက တိဟောက်ထျန်းနှင့် ကစဉ့်ကလျားခန္ဓာတို့ထက် မနိမ့်ကျတော့ချေ။

ဧကရာဇ်၏ သွေးမျိုးဆက်မှာ အမှန်တကယ် ကြောက်စရာကောင်းလွန်းလှသဖြင့် သူ သက်ပြင်းချလိုက်မိသည်။

"ဒါက ကျုပ် ကတိပေးထားတဲ့အတိုင်း လုပ်ပေးလိုက်ရုံပါ"

ကျွင်းရှောင်ယောက်က လက်ဝေ့ယမ်းပြလိုက်သည်။

"ရှောင်ယောက်... ကျွန်မ အင်မော်တယ်ခုံရုံးကို အရင်ပြန်ဦးမယ်။ နောင်အခါကျရင် ရှင့်ကို သေချာပေါက် ကူညီပေးမယ်"

ယွမ်ချယ်က လေးလေးနက်နက် ပြောလိုက်၏။

"ဒါက ကျွင်းမိသားစုရဲ့ ကံကောင်းခြင်းပါပဲ"

ကျွင်းရှောင်ယောက်က ပြုံးလျက် ပြောသည်။

ထို့နောက်တွင်၊ ယွမ်ချယ်က သလင်းရထားလုံးပေါ်သို့ တက်လိုက်ပြီး တံခါးဝမှတစ်ဆင့် ထွက်ခွာသွား၏။

မထွက်ခွာမီ သူက ပြောခဲ့သေးသည်။

"တကယ်လို့ ရှင်သာ ကျွန်မရဲ့ ခင်ပွန်းဖြစ်ဖို့ သဘောတူမယ်ဆိုရင် ကျွန်မတို့မှာရှိတဲ့ ကျားအဆောင်နှစ်ခုကို ပေါင်းစည်းလို့ ရမှာနော်"

ထိုစကားကိုကြားမှ ကျွင်းရှောင်ယောက်လည်း သူမေ့နေသည်ကို သတိရသွားသည်။

သူနှင့် ယွမ်ချယ်တွင် ရှေးဟောင်းအင်မော်တယ်ခုံရုံး၏ ကျားအဆောင်တစ်ဝက်စီ ရှိသည်။

၎င်းက တစ်ကြိမ်သုံးပစ္စည်း မဟုတ်ချေ။

ယွမ်ချယ်၏ကိစ္စ ပြီးသွားသောအခါ ကျွင်းရှောင်ယောက်က ဝူဟူနှင့် အခြားသူများကို ခေါ်လိုက်သည်။

"အားလုံးပဲ ရွှမ်ထျန်း အင်မော်တယ်နယ်မြေကြီးကို အရင်ပြန်ကြပါ။ ခုံရုံးကို တည်ငြိမ်အောင် ထိန်းချုပ်ထားပြီး ဘယ်သူ့ကိုမှ မငြိမ်မသက် မဖြစ်စေနဲ့"

"ဒါ့အပြင် နယ်မြေဖြတ်ကျော် တည်နေရာရွှေ့ပြောင်းခြင်း အစီရင်ကိုလည်း အမြဲဖွင့်ထားပါ။ တကယ်လို့ ကပ်ဘေးလှိုင်းကြီး ကျရောက်လာရင် ခုံရုံးကလူတွေကို ကျွင်းမိသားစုဆီ အမြန်ပြောင်းရွှေ့နိုင်စေရမယ်"

ဝူဟူက ခေါင်းညိတ်လိုက်သည်။

"စိတ်မပူပါနဲ့၊ ငါတို့ရှိတယ်။ လူသတ်ဘုရင်နဲ့ ချီယိုမျိုးနွယ်က ဧကရာဇ်ကြီးလည်း ရှိသေးတယ်"

"အချိန်တိုအတွင်းမှာတော့ ဧကရာဇ်ခုံရုံးမှာ ဘာပြဿနာမှ ရှိမှာမဟုတ်ပါဘူး"

ယခုအခါ ကျွင်းဧကရာဇ်ခုံရုံးက အနိုင်ကျင့်ရလွယ်သော အဆင့်မျိုးမဟုတ်တော့ဘဲ ဧကရာဇ်အဆင့် ပုဂ္ဂိုလ်ကြီးများ ရှိနေပြီ ဖြစ်သည်။

"ကောင်းတယ်... အဲဒီလိုဆိုရင် အကောင်းဆုံးပဲ"

ကျွင်းရှောင်ယောက် ခေါင်းညိတ်လိုက်သည်။

ထို့နောက် ဝူဟူနှင့် အခြားသော ကျွင်းဧကရာဇ်ခုံရုံးမှ အဆင့်မြင့်အရာရှိများက ခုံရုံးကို စီမံရန် ပြန်သွားကြ၏။

အရာအားလုံးကို စီစဉ်ပြီးနောက် ကျွင်းရှောင်ယောက်တွင် ယာယီအားဖြင့် လုပ်စရာ မရှိတော့ချေ။

အင်မော်တယ်တံခါး ဆင်းသက်လာခြင်းကို သူ မတားဆီးနိုင်ပါ။

အင်မော်တယ်နယ်မြေကြီးရှိ သတ္တဝါအားလုံးကိုလည်း သူ မကာကွယ်နိုင်ပေ။

သူ လုပ်ဆောင်နိုင်သည်မှာ သူ့ပတ်ဝန်းကျင်ရှိ အရာများကို ကာကွယ်ရန်သာ ဖြစ်သည်။

မိသားစု၊ အင်အားစု၊ ဆွေမျိုးများနှင့် သူငယ်ချင်းများ...

ထို့နောက်တွင် သူ၏ ဘေးနားရှိ လူများပင် ဖြစ်သည်။

ကျွင်းရှောင်ယောက်က မင်္ဂလာ ဝတ်စုံနီများကို ဝတ်ဆင်ထားသော ကျန်းစန်းယီနှင့် ကျန်းလော့လီတို့ကို ပွေ့ဖက်လိုက်သည်။

"ကိုကိုရှောင်ယောက်... ဒီလှိုင်းတွေကို ကျော်ဖြတ်ပြီးသွားရင် ကျွန်မတို့သုံးယောက် အကြာကြီး အတူတူ နေကြရအောင်နော်"

ကျန်းလော့လီက အပြစ်ကင်းစင်သော မျက်ဝန်းတို့ဖြင့် ဆိုသည်။

သူ့အမြင်တွင် ကျွင်းမိသားစုနှင့် ကျန်းမိသားစု ရှိနေသရွေ့ ဤပြဿနာမှာ ဘာမှမဟုတ်ပေ။

ကျန်းစန်းယီ၏ မျက်နှာမှာမူ အမူအရာ အနည်းငယ် ပြောင်းသွားသည်။

သို့သော်လည်း ချက်ချင်း ပြုံးလျက် ပြောလိုက်လေသည်။

"ကောင်းတာပေါ့ကွယ်"

ကျွင်းရှောင်ယောက်က ကျန်းစန်းယီ၏ ထိုအမူအရာလေးကို သတိမထားမိလိုက်ချေ။

သူက မိန်းကလေးနှစ်ဦးကို ဖက်ထားရင်း အဆုံးမဲ့ဟင်းလင်းပြင်ကို ဖြတ်ကျော်လျက် ကောင်းကင်ကိုးပါး၏ အဆုံးသတ်ရှိ ကွေ့ရှအပျက်အယွင်းနယ်မြေဆီသို့ ကြည့်လိုက်သည်။

"ဝုန်း"

နားကွဲမတတ် ကျယ်လောင်သော အသံနှင့်အတူ ဟင်းလင်းပြင် ကွဲအက်သွားသံက ကွေ့ရှအပျက်အယွင်းမှတစ်ဆင့် အထက်ကောင်းကင်ကိုးပါးနှင့် အင်မော်တယ်နယ်မြေကြီး တစ်ခုလုံးသို့ ပျံ့နှံ့သွားသည်။

ဤအခိုက်အတန့်တွင် ကောင်းကင်ကိုးပါးရှိ တားမြစ်နယ်မြေ ဆယ်ခုနှင့် အင်မော်တယ်နယ်မြေကြီးရှိ သတ္တဝါအားလုံးမှာ မှောင်မိုက်နေသော ထိုနေရာဆီသို့ မော့ကြည့်လိုက်ကြသည်။

အတိုင်းအဆမရှိ ကျယ်ပြောပြီး ပေပေါင်း သောင်းချီမြင့်မား‌၍ အင်မော်တယ် အငွေ့အသက်များ ဝန်းရံထားသည့် ကြေးတံခါးကြီးတစ်ခုက ကွဲအက်နေသော ဟင်းလင်းပြင်ထဲမှ ဖြည်းညှင်းစွာ ထွက်ပေါ်လာ၏။

အင်မော်တယ်တံခါး ဆင်းသက်လာချေပြီ။