အခန်း ၆၉၆

အခန်း(၆၉၆)

အနီရောင် ချောက်ကြီးထဲက ရှာဖွေတွေ့ရှိမှုအကြောင်း သိလိုက်ရပြီးတဲ့နောက် မိုက်ကယ်က ချက်ချင်းပဲ ခရီးထွက်ချင်နေခဲ့တယ်။ သူ အချိန်နှောင်းသွားပြီး နတ်ဘုရားပန်းပဲဖို အစိတ်အပိုင်းတွေ အကုန်လုံး အခြားသူတွေလက်ထဲ ရောက်သွားမှာကို မလိုလားဘူးလေ။

ဖတ်ချ်က ဒီသတင်းကို အဲလ်ရစ်ဆီကနေ ရခဲ့တာဆိုတော့ အဓိကအင်အားစုကြီးတွေကလည်း ဒီအစိတ်အပိုင်းတွေကို ရချင်နေကြဖို့ အများကြီး ဖြစ်နိုင်ခြေရှိနေတယ်ဆိုတဲ့ သဘောပဲ။

ဒါပေမဲ့ အရင်ဆုံးအနေနဲ့ သူက တော်ဝင်သွေးပါတဲ့ ဒီဗန်ပိုင်ယာတွေအကြောင်း ပိုသိရအောင် ဂီလာမိုနဲ့ တခြားသူတွေဆီကို သွားတွေ့ခဲ့တယ်။

သူက နယ်မြေရဲ့ အလယ်ဗဟိုမှာရှိတဲ့ ဆောက်လက်စ အဆောက်အအုံတစ်ခုရဲ့ အရှေ့ဘက်လှေကားထစ်တွေဆီကို နေရာရွှေ့ပြောင်းသွားခဲ့တယ်။

ချက်ချင်းပဲ ဂီလာမိုနဲ့ အခြားဗန်ပိုင်ယာနှစ်ယောက်သုံးယောက်လောက်က ရီနေးတား အင်ဂျင်နီယာတွေနဲ့ စကားပြောနေပြီး အကြံဉာဏ်တွေ ပေးနေပုံရတာကို သူ မြင်လိုက်ရတယ်။

"အိုင်းရွန်းမေဒင်က မူလဗန်ပိုင်ယာကို သွေးတွေ ပေးသနားနေတဲ့ ပုံကို ဘုရားကျောင်းရဲ့ အပေါ်ဘက်မှာ ဆေးခြယ်ထားရင် ကောင်းမယ်လို့ ထင်တယ်... မင်းတို့ရော ဘယ်လိုထင်လဲ" လို့ ဂီလာမိုက အင်ဂျင်နီယာတွေဆီ ပုံကြမ်းတစ်ခုကို ပြသရင်း ပြောလိုက်တယ်။

အိုင်းရွန်းမေဒင် ဘာသာတရားက ရီနေးတားနိုင်ငံထဲမှာတောင် သိပ်ပြီး လူသိမများလှဘူး။ ဒါကြောင့်မို့ သူတို့ ဆောက်ထားတဲ့ ဘုရားကျောင်းက လူနှစ်ဆယ်လောက်သာ အများဆုံး ဝင်ဆံ့နိုင်တဲ့ အသေးစားလေး ဖြစ်နေတာပေါ့။

ဒါပေမဲ့ အခုတော့ ဒီဘုရားကျောင်းကို ယုံကြည်သူ ရာပေါင်းများစွာ တစ်ပြိုင်နက်တည်း ဝင်ဆံ့နိုင်မယ့် ဧရာမအဆောက်အအုံကြီးတစ်ခုအဖြစ် တိုးချဲ့ဖို့ အကြီးအကျယ် ပြုပြင်မွမ်းမံနေကြပြီ။

ဒီလို တိုးချဲ့ပြုပြင်မှုတွေအားလုံးရဲ့ ဦးဆောင်သူတွေက တခြားသူတွေမဟုတ်ဘဲ ဂီလာမိုနဲ့ အခြားဗန်ပိုင်ယာတွေပဲ ဖြစ်တယ်။

အိုင်းရွန်းမေဒင်ဟာ သူတို့ရှာဖွေနေတဲ့ ဂိုင်ယာကိုးကွယ်ရာအရှင်မ ဖြစ်တယ်ဆိုတာ သိသွားပြီးတဲ့နောက် ဗန်ပိုင်ယာတွေက သူတို့ရဲ့ အချိန်တွေအားလုံးကို သတ္တုဝတ်စုံဆင်မြန်းထားတဲ့ ဒီအမျိုးသမီးကို ကိုးကွယ်ရင်းနဲ့သာ ကုန်ဆုံးစေခဲ့ကြတယ်။ သူတို့က ဖတ်ချ်နဲ့ တခြားတရားဟောဆရာတွေ ပြောတဲ့ စကားတွေကို အမှန်တရားအဖြစ် မှတ်ယူထားကြတာလေ။

"အာ... ရွေးချယ်ခံရသူ ရောက်လာပါပြီ" မိုက်ကယ် ရောက်လာတာကို မြင်တော့ ဂီလာမိုက ဦးညွှတ်အရိုအသေပေးရင်း ချီးကျူးလိုက်တယ်။

"ဘာကိုလဲ"

"ဟုတ်ပါတယ်... ရွေးချယ်ခံရသူပါပဲ။ မင်းကိုသာ ကိုယ်တိုင်ကိုယ်ကျ မရွေးချယ်ခဲ့ဘူးဆိုရင် အိုင်းရွန်းမေဒင်က နှစ်ပေါင်းထောင်ချီကြာပြီးတဲ့နောက်မှာ မင်းဆီ ကိုယ်ထင်ပြခဲ့မှာ မဟုတ်ဘူး။ တစ်နေ့နေ့ မင်းနဲ့ ဗန်ပိုင်ယာတွေ ဆုံတွေ့မယ်ဆိုတာကို သူမ သိနေခဲ့ပြီး သူမ ပြန်လည်ရှင်သန်လာဖို့အတွက် ဒါတွေအားလုံးကို စီစဉ်ခဲ့တာပဲ ဖြစ်ရမယ်... ဟာဇား"

"ဟာဇား" အခြားဗန်ပိုင်ယာတွေကလည်း သူ့ကို အတုခိုးပြီး အော်လိုက်ကြတယ်။

သူ့ရဲ့ စွမ်းရည်ကို နှိုးဆွလိုက်တဲ့အချိန်မှာ အိုင်းရွန်းမေဒင် ဘာလို့ ပေါ်လာရတာလဲဆိုတာကို မိုက်ကယ် အခုထိ နားမလည်သေးဘူး။ သူရခဲ့တဲ့ နတ်ဘုရားပန်းပဲဖို အစိတ်အပိုင်းထဲမှာ သူမရဲ့ အသိစိတ် တစ်စိတ်တစ်ပိုင်း တိုက်ဆိုင်စွာ ကျန်ရစ်နေခဲ့တာ ဖြစ်နိုင်သလို၊ ဒါမှမဟုတ် သူတို့ပြောသလို သူက ဝင်စားသူတစ်ယောက်ဖြစ်နေတဲ့ ထူးခြားချက်ကြောင့် နတ်ဘုရားမက သူ့ကို ရွေးချယ်ခဲ့တာလည်း ဖြစ်နိုင်တယ်။

ဘယ်လိုပဲဖြစ်ဖြစ် မူလဗန်ပိုင်ယာတွေ ကမ္ဘာမြေပေါ်ကနေ မပျောက်ကွယ်သွားခင် ချန်ထားခဲ့တယ်ဆိုတဲ့ မှတ်တမ်းတွေဆီကနေ ဒီအကြောင်းကို သူ ပိုပြီး သိလာနိုင်ကောင်းပါရဲ့။

ပြီးတော့ ဂီလာမိုနဲ့ အခြားသူတွေက ဂိုင်ယာနဲ့ပတ်သက်တဲ့ သူတို့ရဲ့ ယုံကြည်မှုအတိုင်း အိုင်းရွန်းမေဒင် ဘုရားကျောင်းသစ်ကို အလှဆင်နေကြတာကို ကြည့်ရင် သူတို့က ဒီမှတ်တမ်းနဲ့ တော်တော်လေး ရင်းနှီးကျွမ်းဝင်နေပုံရတယ်။

"ဒါနဲ့ မင်းတို့က ဒီအကြောင်းတွေအားလုံးကို ဘယ်ကနေ သိလာတာလဲ" ခမ်းနားတဲ့ တိုင်လုံးကြီးတစ်ခုကို လက်ချောင်းတွေနဲ့ ပွတ်သပ်ကြည့်ရင်း သူက မေးလိုက်တယ်။ ဒီအလှဆင်ထားတဲ့တိုင်က စကျင်ကျောက်ကို ထွင်းထုပြီး ဗန်ပိုင်ယာမျိုးနွယ် ပထမဆုံး ဖန်တီးခံရတဲ့ မြင်ကွင်းကို ပုံဖော်ပြသထားတာဖြစ်တယ်။

"ဂိုင်ယာနဲ့ ဗန်ပိုင်ယာမျိုးနွယ်ရဲ့ သမိုင်းကြောင်းကို ငါတို့ ငယ်ငယ်လေးကတည်းက သင်ကြားပေးခံရတာပါ" လို့ ဂီလာမိုက ပြောလိုက်တယ်။ "ကမ္ဘာပေါ်မှာ သူမကို ရှာဖွေတဲ့အခါ ချက်ချင်း မှတ်မိနိုင်အောင် ဂိုင်ယာနဲ့ ရင်းနှီးနေစေဖို့ ငါတို့ကို သင်ကြားပေးထားတယ်"

မိုက်ကယ်တစ်ယောက် တိုင်လုံးကြီးကို စိတ်ဝင်တစား ကြည့်နေတာကို ဗန်ပိုင်ယာတစ်ယောက်က သတိပြုမိသွားပြီး "အဲဒါက မူလဗန်ပိုင်ယာကနေ သေမင်းလက်က ကယ်တင်ပြီး ပြောင်းလဲပေးခဲ့တဲ့ ပထမဆုံး လူအနည်းငယ်ရဲ့ ပုံတွေလေ... သူတို့က ဗန်ပိုင်ယာမျိုးနွယ်ရဲ့ အစပဲ" လို့ ရှင်းပြလိုက်တယ်။

ဗန်ပိုင်ယာတွေမှာ နှစ်တစ်ထောင်နီးပါးအထိ နေရတဲ့ အလွန်ရှည်လျားတဲ့ သက်တမ်းရှိတယ်ဆိုတာကို မိုက်ကယ် သတိရသွားတယ်။ ဗန်ပိုင်ယာမျိုးနွယ်ရဲ့ အစပြုမှုကို မျက်မြင်ကိုယ်တွေ့ ကြုံခဲ့ရတဲ့ ဒါမှမဟုတ် အဲဒီအစပြုမှုမှာ ကိုယ်တိုင် ပါဝင်ခဲ့တဲ့ ဗန်ပိုင်ယာအချို့ အခုအချိန်အထိ သက်ရှိထင်ရှား ရှိနေနိုင်သေးတာပဲ။

"မင်းတို့ တော်ဝင်သွေးတွေအကြောင်း သိလား" လို့ သူက ဒဲ့ပဲ မေးလိုက်တယ်။

ဂီလာမိုက ချက်ချင်း စိတ်ဝင်စားသွားတယ်။ "သိတာပေါ့... ပထမဆုံး ဗန်ပိုင်ယာအနည်းငယ်ကနေ တိုက်ရိုက်ဆင်းသက်လာတဲ့ ဗန်ပိုင်ယာတွေကို မူလဗန်ပိုင်ယာနဲ့ ပတ်သက်ဆက်နွှယ်မှု ရှိနေတာကြောင့် တော်ဝင်သွေးတွေလို့ ခေါ်ကြတယ်"

"သူတို့က ငါတို့ရဲ့ မွေးရပ်မြေမှာဆိုရင် မင်းသား၊ မင်းသမီးတွေနဲ့ တန်းတူပဲ။ ဘာပဲဖြစ်ဖြစ် သူတို့က မူလဗန်ပိုင်ယာရဲ့ စွမ်းအားတွေကို ကောင်းချီးအဖြစ် ရရှိထားတုန်းပဲလေ။ သူတို့က ငါတို့လို သာမန်ဗန်ပိုင်ယာတွေထက် ပိုသန်မာတယ်၊ ပိုမြန်ဆန်တယ်၊ ပြီးတော့ ပိုပြီးလည်း ပါရမီထူးချွန်ကြတယ်"

တော်ဝင်သွေးတွေအကြောင်း ပြောလိုက်ချိန်မှာ ဗန်ပိုင်ယာတွေရဲ့ မျက်နှာပေါ်မှာ ပေါ်လာတဲ့ ထင်ရှားလှတဲ့ လေးစားမှု အရိပ်အယောင်ကို မိုက်ကယ် သတိပြုမိလိုက်တယ်။

"မင်းတို့က သူတို့ကို အတော်လေး အထင်ကြီးပုံရတယ်" လို့ သူက ဂီလာမိုကို ပြောလိုက်တယ်။

"သူတို့က ဒီလို လေးစားခံရဖို့ ထိုက်တန်ပါတယ်" လို့ ဂီလာမိုက ပြန်ဖြေတယ်။ "သူတို့ကို တော်ဝင်သွေးတွေလို့ ခေါ်ပေမဲ့ တကယ်တမ်းကျ သူတို့က ငါတို့ကို အလုပ်အကျွေးပြုတဲ့သူတွေပါ။ သူတို့က မူလဗန်ပိုင်ယာရဲ့ စွမ်းအားအပြင် မေတ္တာတရားနဲ့ဆိုင်တဲ့ သွန်သင်ချက်တွေကိုပါ အမွေဆက်ခံထားကြတာလေ။ သူတို့က 'မြင့်မြတ်သူတို့ရဲ့ တာဝန်' ဆိုတဲ့ ဆိုရိုးစကားကို လိုက်နာကြတယ်"

ဒါကို ကြားရတဲ့အတွက် မိုက်ကယ် ဝမ်းသာသွားတယ်။ ကမ္ဘာပေါ်က ပျူရစ်ဗန်ပိုင်ယာ တိုင်းအတွက် သူတို့ရဲ့ ယုတ်မာမှုတွေကို အကောင်းဆုံး တန်ပြန်ပေးမယ့် တော်ဝင်သွေးတစ်ယောက် အမြဲရှိနေတာပဲ။

"သူတို့ မကြာသေးခင်ကမှ မက်ထရိုပိုလစ်ကို ရောက်လာကြတယ်လို့ ငါ ကြားထားတယ်" လို့ သူက ဗန်ပိုင်ယာတွေကို ပြောလိုက်တယ်။

ဒါကို ကြားတော့ ဂီလာမိုက လုံးဝ အံ့ဩမသွားခဲ့ဘူး။ "သူတို့ ပျူရစ်တွေအကြောင်း ကြားပြီး ရှင်းလင်းပစ်ဖို့ သွားခဲ့တာ ဖြစ်ရမယ်။ အဲဒီကောင်တွေ ဂိုင်ယာရဲ့ နာမည်ကို မဖျက်ဆီးနိုင်အောင် တားဆီးဖို့က သူတို့ရဲ့ ဘဝပေးတာဝန်လေ။ ဘာတွေဖြစ်ခဲ့တာလဲဆိုတာကို သူတို့ သိချင်နေမှာ အသေအချာပဲ"

အဲဒါကြောင့်များ သူတို့က အဲလ်ရစ်ဆီ သွားခဲ့ကြတာ ဖြစ်မယ်။

"အိုင်းရွန်းမေဒင်အကြောင်း သူတို့ကို အမြန်ဆုံး အသိပေးရမယ်" လို့ ဂီလာမိုက ကြေညာလိုက်တယ်။ "ငါတို့ရဲ့ ဂိုင်ယာနတ်ဘုရားမကို ရှာတွေ့ပြီဆိုတာ သူတို့ သိခွင့်ရှိတယ်"

"သူတို့ကို ငါ လိုက်ရှာပေးရမလား"

ဂီလာမိုက ခေါင်းယမ်းလိုက်တယ်။ "မလိုပါဘူး... သူတို့ဘာသာ ငါတို့ကို ရှာတွေ့လိမ့်မယ်။ အဖြေရှာဖို့အတွက် သူတို့က မက်ထရိုပိုလစ် တစ်မြို့လုံးကို အနှံ့ရှာဖွေကြလိမ့်မယ်"

"ကောင်းပြီလေ... ငါတော့ အနီရောင် ချောက်ကြီးဆီ သွားတော့မယ်။ ဗန်ပိုင်ယာတွေ ဘယ်ကို ထွက်သွားကြလဲဆိုတာကို သိလားလို့ အဲလ်ရစ်ကို သွားမေးကြည့်လိုက်ဦးမယ်" လို့ သူက ဂီလာမိုကို ပြောလိုက်တယ်။

"အနီရောင် ချောက်ကြီး ဟုတ်လား... အဲဒါက ဘာကြီးလဲ" လို့ ဂီလာမိုက မေးတယ်။

မိုက်ကယ်က နတ်ဘုရားပန်းပဲဖို အစိတ်အပိုင်းတွေ ရှာတွေ့ထားတဲ့အကြောင်းနဲ့ မက်ထရိုပိုလစ် တစ်မြို့လုံးနီးပါး ဒီရှာဖွေရေးခရီးစဉ်မှာ ပါဝင်ကြမယ့်အကြောင်း ရှင်းပြလိုက်တယ်။

"အဲဒါပဲ မိုက်ကယ်... သူတို့လည်း အဲဒီကို ရောက်နေလိမ့်မယ်" လို့ ဂီလာမိုက အခိုင်အမာ ပြောလိုက်တယ်။

"မင်းက ဘယ်လိုသိတာလဲ"

"ဒီတိုင်း ခံစားမိလို့ပါ။ အနီရောင် ချောက်ကြီးဆီ ငါလည်း မင်းနဲ့အတူ လိုက်ခဲ့ပြီး သူတို့နဲ့ သွားတွေ့မယ်"

* * * * * * * *

နာရီအနည်းငယ်ကြာပြီးနောက် မိုက်ကယ်က သူ့ရဲ့ ဒရုန်းကို ထုတ်လိုက်ပြီး ဒရုန်းရဲ့ ရေဂီယိုထဲကို ဝင်ရောက်သွားခဲ့တယ်။ ထိန်းချုပ်ရေးခန်းပေါ် ခြေချလိုက်တာနဲ့ သူက အထဲကနေပြီး ဒရုန်းကို အနီရောင် ချောက်ကြီးဆီ ဦးတည်မောင်းနှင်လိုက်တော့တယ်။

မြို့စားကတော် ပေးထားတဲ့ မြေပုံကျေးဇူးကြောင့် ဘယ်ကိုသွားရမလဲဆိုတာကို သူ အတိအကျ သိနေခဲ့တယ်။

နာရီအနည်းငယ်ကြာ မောင်းနှင်ပြီးနောက်မှာတော့ ပတ်ပတ်လည်မှာ မီးခိုးရောင် ချောက်ကမ်းပါး အနက်ကြီးတွေပဲရှိတဲ့ ကွင်းစ်နယ်မြေရဲ့ အစိတ်အပိုင်းတစ်ခုကို သူ နောက်ဆုံးတော့ ရောက်ရှိသွားခဲ့တယ်။ သူ့ရဲ့ ဒရုန်းအမြင်အာရုံနဲ့တောင် ဒီချောက်ကမ်းပါးတွေရဲ့ အောက်ခြေအနက်ကို မမြင်နိုင်တာမို့ သာမန်လူတွေ ဖြတ်သန်းသွားလာဖို့က တော်တော်လေး အန္တရာယ်များလှတယ်။

ပတ်ဝန်းကျင်မှာ ချောက်ကမ်းပါးတွေ အများကြီး ရှိနေပေမဲ့ ရတနာတွေ ရှိနေတယ်ဆိုတဲ့ နေရာကိုတော့ သူ မြန်မြန်ဆန်ဆန်ပဲ ရှာတွေ့သွားခဲ့တယ်။

ခပ်လှမ်းလှမ်းဆီမှာ အခုထက်ထိ သူမြင်ဖူးသမျှထဲ အကျယ်ဆုံးနဲ့ အနက်ဆုံး ချောက်ကမ်းပါးကြီးတစ်ခုကို သူ မြင်လိုက်ရတယ်။ ဒါတင်မကသေးဘဲ ချောက်ကမ်းပါးကြီးက သွေးလိုနီရဲနေပြီး သဘာဝက ဖန်တီးထားတဲ့ ဒီနေရာကို စူးစမ်းရှာဖွေရင်း လူ့အသက်ပေါင်း ဘယ်လောက်တောင် စတေးခဲ့ရပြီလဲဆိုတာကို ပြသနေသလိုပဲ။

အနီရောင် ချောက်ကြီးက ကမ္ဘာ့ကျောက်လွှာချပ်ကြီးနှစ်ခုကို ထက်ပိုင်းဖြတ်ပြီး အတင်းအကျပ် ဆွဲဖြဲထားသလိုမျိုး ဖြစ်နေပြီး လူတွေကို လျှို့ဝှက်ဆန်းကြဲမှုတွေနဲ့ သွေးဆောင်ကာ ကမ္ဘာ့အူတိုင်အထိ နက်ရှိုင်းစွာ ငုံ့ကြည့်ခွင့်ပေးထားတဲ့ပုံ ပေါက်နေတယ်။

သူ့ရဲ့ စွမ်းရည်အမြင်အာရုံကို အသုံးပြုလိုက်တဲ့အခါ အဝေးတစ်နေရာကနေ လိမ္မော်ရောင်အလင်းတန်း အများအပြား စုဝေးနေတာကို သူ မြင်တွေ့လိုက်ရတယ်။

အဲဒါက မက်ဂ်နက်တစ်တွေ စုဝေးနေတာပဲ။

* * * * * * * *