အခန်း ၁၅၂၆

အခန်း ( ၁၅၂၆ ) ဧကရာဇ်သုံးပါး ထပ်မံပေါ်လာခြင်း။

အင်မော်တယ်နယ်မြေရှိ သက်ရှိအပေါင်းတို့အတွက် ရှေးဟောင်းမြင့်မြတ်ခန္ဓာဆိုသည်မှာ မျှော်လင့်ချက်၏ ပြယုဂ်တစ်ခု ဖြစ်သည်။

ရှေးဟောင်း ခေတ်များမှာလည်း ကြီးမားသော ကပ်ဘေးလှိုင်းများ ဖြစ်ပွားခဲ့ဖူးသည်။

ထိုအခါမျိုးတွင် မြင့်မြတ်ခန္ဓာမျိုးနွယ်စု၏ သန်မာသော အကျော်အမော်များက အမြဲတမ်း ရှေ့သို့ထွက်ကာ တားဆီးပေးခဲ့ကြပေသည်။

တစ်ချိန်က ကြီးမားသော အောင်မြင်မှုမြင့်မြတ်ခန္ဓာ တစ်ဦးသည် ကပ်ဘေးများကို ငြိမ်းချမ်းစေခဲ့ပြီး သာမန်လူသားများကို ကာကွယ်ပေးခဲ့သဖြင့် သက်ရှိအပေါင်း၏ အရိုအသေပေးခြင်းကို ခံခဲ့ရသည်။

မြင့်မြတ်ခန္ဓာများက ကပ်ဘေးများကို ငြိမ်သက်စေခြင်းအား သူတို့၏ တာဝန်နှင့် သဘာဝအရ ပေးအပ်ထားသော ဝတ္တရားအဖြစ် မှတ်ယူထားကြသည်ဟု ဆိုနိုင်သည်။

သို့သော်လည်း ခေတ်သစ်ကာလသို့ ရောက်ရှိလာသည့်အခါ ကောင်းကင်ဘုံ၏ အချုပ်အနှောင်များ...

မြင့်မြတ်ခန္ဓာအပေါ် ကျရောက်သော ကျိန်စာများနှင့် အခြားသော အကြောင်းရင်းများကြောင့် မြင့်မြတ်ခန္ဓာမျိုးရိုးမှာ တဖြည်းဖြည်း ဆုတ်ယုတ်လာခဲ့သည်။

တစ်ချိန်က စည်ကားခဲ့သော ပျက်စီးခြင်းရှေးဟောင်းနန်းတော်မှာလည်း အလွန်အမင်း ပျက်စီးယိုယွင်းလာခဲ့ပြီး အသျှင်ခန္ဓာမျိုးရိုး၏ အနိုင်ကျင့်ခြင်းကိုပင် ခံခဲ့ရပေသည်။

စစ်မှန်သော မဟာအောင်မြင်မှုမြင့်မြတ်ခန္ဓာကို မဆိုထားဘိ...

ကျင့်ကြံမှုအဆင့် အနည်းငယ် မြင့်မားသော မြင့်မြတ်ခန္ဓာပင်လျှင် ပေါ်လာခဲလှသည်။

ထို့ကြောင့် မြင့်မြတ်ခန္ဓာမျိုးရိုးက ကပ်ဘေးကို ငြိမ်သက်စေနိုင်သော စွမ်းအား မရှိတော့ချေ။

ကပ်ဘေးများ စတင်တိုင်းတွင် ကြောက်ရွံ့နေသော လူအများမှာ မြင့်မြတ်ခန္ဓာ ပေါ်ထွက်လာရန် အမြဲတမ်း ဆုတောင်းလေ့ ရှိကြသည်။

ယခုတော့ ငရဲမှ မိစ္ဆာကဲ့သို့ သတ်ဖြတ်မှုများ ပြုလုပ်နေသော အသျှင်ခန္ဓာကို တားဆီးရန် မြင့်မြတ်ခန္ဓာက နောက်တစ်ကြိမ် ပေါ်ထွက်လာခဲ့ပြီ။

ယင်းကြောင့် သတ္တဝါများစွာမှာ ဝမ်းသာအားရ ကြိုဆိုနေကြသော်လည်း...

စိုးရိမ်ပူပန်နေသော ကျင့်ကြံသူအချို့လည်း ရှိနေသည်။

နောက်ဆုံးတွင်၊ ဝူဟူက မဟာအောင်မြင်မှုမြင့်မြတ်ခန္ဓာ မဟုတ်သေးသလို အပြည့်အဝလည်း မကြီးထွားသေးချေ။

ခေတ်အဆက်ဆက်မှ မဟာအောင်မြင်မှုမြင့်မြတ်ခန္ဓာများနှင့် နှိုင်းယှဉ်လျှင် ကြီးမားသော ကွာဟချက်တစ်ခု ရှိနေဆဲ ဖြစ်သည်။

ခေတ်သမိုင်းတစ်လျှောက်တွင် အပြင်းထန်ဆုံးသော ကပ်ဘေးကို ငြိမ်သက်စေရန် လူတစ်ယောက်တည်းအပေါ် အားကိုးခြင်းမှာ လက်တွေ့မကျသော စိတ်ကူးယဉ်မှုတစ်ခုသာ ဖြစ်လိမ့်မည်။

သို့သော်လည်း မြင့်မြတ်ခန္ဓာတစ်ဦးက ရှေ့ထွက်တိုက်ခိုက်ပေးခြင်းမှာပင် တန်ဖိုးဖြတ်မရနိုင်သော အရာဖြစ်သည်။

အကြောင်းမှာ ထိုကဲ့သို့သောသူမျိုးမှာ ရွှေထက် ရှားပါးလှသောကြောင့်ပင်။

ဝူဟူက အသျှင်ဘိုးဘေးကို ရှာဖွေနေချိန်တွင်...

အင်မော်တယ်နယ်မြေအတွင်း၌ လှောင်ပြောင်သံတစ်ခု ထွက်ပေါ်လာသည်။

"အိုး... မြင့်မြတ်ခန္ဓာမျိုးနွယ်က တကယ်ပဲ ရှေ့ထွက်လာတာလား"

"ဒါနဲ့... ဒီခေတ်မှာ မြင့်မြတ်ခန္ဓာ နှစ်ယောက်ရှိတာ မဟုတ်ဘူးလား။ သူအပြင် ကျွင်းရှောင်ယောက်လည်း ရှိသေးတယ်လေ"

"သူ ဘယ်မှာလဲ၊ ဘာဖြစ်လို့ ပေါ်မလာတာလဲ။ လိပ်လိုမျိုး အခွံထဲမှာပဲ ပုန်းအောင်းနေပြီလား"

ဤအသံကို ကြားရသည့်အခါ အားလုံး လှုပ်လှုပ်ရှားရှား ဖြစ်သွားကြသည်။

"ဘယ်သူလဲ...၊ ဘယ်သူက ဒီလောက်အောက်တန်းကျတဲ့ စကားတွေကို ပြောရဲတာလဲ"

"သူတစ်ပါးကို ကယ်တင်တယ်ဆိုတာ စေတနာအရ လုပ်ရတာပါ... ‌ဒါက တာဝန်ဝတ္တရား မဟုတ်ဘူး။ ဘယ်သူက လာပြီး လှောင်နေတာလဲ"

ကျင့်ကြံသူအချို့က ဒေါသတကြီး အော်ဟစ်ကာ ထိုသူမှာ မည်သူဖြစ်ကြောင်း သိရန် ကြိုးစားကြသည်။

"ဘာလဲ... ငါပြောတာ မှားလို့လား"

"ကျွင်းရှောင်ယောက်ဟာ အစတုန်းက ပြင်ပအားအင်တွေကို သုံးပြီး တိုင်းတပါးကို တားဆီးပေးခဲ့တဲ့အတွက် အင်မော်တယ်နယ်မြေက သက်ရှိအပေါင်းရဲ့ ကိုးကွယ်မှုကို ခံခဲ့ရတယ်"

"ဒါပေမဲ့ အခု ဘာဖြစ်လို့ သူက ပုန်းနေရတာလဲ။ သူ့ကို ထွက်လာခိုင်းလိုက်စမ်းပါ... ဒီကပ်ဘေးကို သူ တားရဲမလားဆိုတာ ကြည့်ရသေးတာပေါ့"

လှောင်ပြောင်သော အသံမှာ နောက်တစ်ကြိမ် ထွက်ပေါ်လာပြန်သည်။

"ဘယ်သူလဲကွ"

ကျင့်ကြံသူများစွာမှာ အသံရှင်ကို လိုက်လံရှာဖွေကြ၏။

နောက်ဆုံးတွင် ပြောနေသူမှာ မည်သူဖြစ်ကြောင်း သူတို့ သိရှိသွားကြသည်။

၎င်းမှာ ရွှေအနက်ရောင်ဝတ်စုံကို ဝတ်ဆင်ထားပြီး ကျောတွင် ဖီးနစ်တောင်ပံများ ပါရှိသော လူငယ်တစ်ဦး ဖြစ်သည်။

ထိုသူမှာ ဟွမ်နျဲ့တောက်ပင်။

"ဟင်... ဒါက ဖီးနစ်နတ်ဆိုးရှေးဟောင်းဂူရဲ့ ခေါင်းဆောင်လေး ဟွမ်နျဲ့တောက် မဟုတ်လား"

"ဒါ ဘယ်လိုဖြစ်နိုင်မှာလဲ၊ သူက ကောင်းကင်ကိုးပါးမှာ ကျွင်းမိသားစုရဲ့ နတ်ဘုရားသားတော်လက်ချက်နဲ့ သေသွားပြီဆိုတဲ့ သတင်း ထွက်ထားတာ မဟုတ်ဘူးလား"

"ဘာတွေ ဖြစ်နေတာလဲ"

ကျင့်ကြံသူများစွာမှာ မယုံကြည်နိုင် ဖြစ်နေကြသည်။

အစပိုင်းတွင် ပြဿနာရှာရန် ကြိုးစားခဲ့သော ကျင့်ကြံသူများမှာလည်း ထိုသူ့အမည်ကို ကြားသည်နှင့် မလှုပ်ရဲတော့ချေ။

ဟွမ်နျဲ့တောက်မှာ ဖီးနစ်နတ်ဆိုးရှေးဟောင်းဂူ၏ ခေါင်းဆောင်ငယ်လေး ဖြစ်ခြင်း၊ မဖြစ်ခြင်းကို မဆိုထားဘိ...

သူ၏ ဖခင်ဖြစ်သူ အင်မော်တယ်ရှေးဧကရာဇ်ဆိုသည့် အမည်တစ်ခုတည်းနှင့်ပင် လူအပေါင်းကို တုန်လှုပ်စေရန် လုံလောက်သည်။

ရွှမ်ထျန်း အင်မော်တယ်နယ်မြေ၊ ကျွင်းဧကရာဇ်ခုံရုံးဘက်တွင်မူ...

ဤသတင်းကို ကြားလိုက်ရသည့်အခါ ကျွင်းဧကရာဇ်ခုံရုံးမှ အဆင့်မြင့်အရာရှိများက ဒေါသတကြီး ဖြစ်သွားကြသည်။

ကျွင်းရှောင်ယောက်သည် အင်မော်တယ်နယ်မြေအတွက် လုံလောက်သော ပေးဆပ်မှုများကို ပြုလုပ်ခဲ့ပြီးပြီ။

တားမြစ်နယ်မြေမှ ဧကရာဇ်များစွာ ရောက်ရှိနေချိန်တွင် ၎င်းတို့ကို တားဆီးရန်အတွက် ကျွင်းရှောင်ယောက်ကဲ့သို့သော ဆန်းကျယ်ကောင်းကင်အဓိပတိအဆင့်ရှိသူကို ထပ်မံ၍ ရှေ့ထွက်ခိုင်းရဦးမည်လော။

၎င်းမှာ နတ်ဆိုးများပင်လျှင် မလုပ်နိုင်သော အရာဖြစ်သည်။

ဟွမ်နျဲတောက်၏ စကားက ကိုယ်ကျင့်တရားဖြင့် ဖိအားပေးခြင်းဖြစ်ပြီး ကျွင်းရှောင်ယောက်ကို ရှေ့တန်းသို့ တမင်တွန်းပို့နေခြင်းဖြစ်ကြောင်း လူတိုင်း သိကြ၏။

အကယ်၍ ကျွင်းရှောင်ယောက်သာ ရှေ့ထွက်မလာပါက သူ၏ ဂုဏ်သတင်းမှာ ကျိန်းသေ ထိခိုက်ပေလိမ့်မည်။

အကယ်၍ ရှေ့ထွက်လာပါကလည်း ကောင်းကင်ကိုးပါး တားမြစ်နယ်မြေ၏ ပစ်မှတ်ထားခြင်းကို ခံရမည်မှာ သေချာသည်။

"ဟွမ်နျဲတောက်က မသေသေးဘူးပဲ။ အင်မော်တယ်ရှေးဧကရာဇ်က သူ့ကို ကယ်တင်ခဲ့ပုံရတယ်"

ကျွင်းရှောင်ယောက်က တိုးတိုးလေး ရေရွတ်လိုက်သည်။

အစပိုင်းတွင် သူက ဟွမ်နျဲ့တောက်ကို ဟင်းလင်းပြင်ချောက်နက်ကြီးအတွင်းသို့ လွမ်ထျန်းလျှို့ဝှက်ကျင့်စဉ်၏ ထာဝရပြည်နှင်ခြင်းဖြင့် ပို့ဆောင်ခဲ့သည်။

သာမန်အားဖြင့်ဆိုလျှင်၊ ဟွမ်နျဲ့တောက်မှာ သေရန်သာရှိပြီး အသက်ရှင်ရန် လမ်းမရှိချေ။

သူ၏ ကိုယ်ပိုင်ခွန်အားနှင့် ထိုကဲ့သို့သော အလွှာများစွာရှိသည့် ဟင်းလင်းပြင်ချောက်နက်မှ လွတ်မြောက်ရန် မဖြစ်နိုင်ပါ။

တစ်ခုတည်းသော ဖြစ်နိုင်ခြေမှာ၊ သူ၏ဖခင် အင်မော်တယ်ရှေးဧကရာဇ်က လှုပ်ရှားပြီး သူ့ကို ကယ်တင်ခဲ့ခြင်းပင် ဖြစ်သည်။

"အဲဒီ ဟွမ်နျဲ့တောက်က တကယ်ကို သေသင့်တဲ့ကောင်ပဲ၊ သခင်... ကျွန်တော့်ကို ခွင့်ပြုပါ၊ သူ့ကို သွားသတ်ပါရစေ"

ကျွင်းရှောင်ယောက်၏ နောက်လိုက်ဖြစ်သူ ရီယုက မနေနိုင်ဘဲ ပြောလိုက်သည်။

"သခင်... ကျွန်မတို့လည်း သူ့ကို သတ်နိုင်ပါတယ်"

စူးဟုန်ယီနှင့် ရွယ်ယွဲ့တို့ မိန်းကလေး နှစ်ဦးကလည်း ထရပ်လိုက်ကြ၏။

ကျန်ရှိသော နောက်လိုက်များနှင့် ကျွင်းဧကရာဇ်ခုံရုံး၏ စစ်အင်အား တစ်ခုလုံးမှာလည်း သတ်ဖြတ်လိုသော စိတ်ဆန္ဒများ ပြည့်နှက်နေတော့သည်။

သူတို့က သူတို့၏ ခေါင်းဆောင်ကြီး စော်ကားခွင့် မပြုနိုင်ကြချေ။

ကျွင်းရှောင်ယောက်ကမူ ဂရုမစိုက်ဘဲ လက်ဝှေ့ယမ်းကာ ပြောလိုက်သည်။

"ဟွမ်နျဲတောက်ဆိုတာက အရေးမပါတဲ့ လူပြက်တစ်ယောက်ပါပဲ"

"ဒါပေမဲ့ အခုလိုအချိန်မှာ သူ ထွက်လာတယ်ဆိုတော့... ကျုပ်ထင်တာက..."

ကျွင်းရှောင်ယောက်က ပြောလိုက်သော်လည်း သူ့ရင်ထဲတွင် ခန့်မှန်းချက်တစ်ခု ရှိနေပြီ ဖြစ်သည်။

မျှော်လင့်ထားသည့်အတိုင်းပင်...

ဟွမ်နျဲ့တောက် ပေါ်ထွက်လာပြီးနောက်တွင် ထိတ်လန့်ဖွယ် သတင်းတစ်ခု ထပ်မံ ထွက်ပေါ်လာခဲ့သည်။

အင်မော်တယ်ရှေးဧကရာဇ် ပေါ်လာပြီ။

၎င်းမှာ နှစ်ပေါင်းများစွာကတည်းက ကျော်ကြားခဲ့ပြီး အလွန်တရာ အစွမ်းထက်သော ရှေးဟောင်းဧကရာဇ်တစ်ပါး ဖြစ်သည်။

သူသည် အင်မော်တယ်မီးတောက်များကို ထိန်းချုပ်နိုင်စွမ်း ရှိ၏။

သို့သော်လည်း အင်မော်တယ်ရှေးဧကရာဇ် ပေါ်လာခြင်းမှာ အင်မော်တယ်နယ်မြေရှိ သတ္တဝါများအတွက် မျှော်လင့်ချက်ကို ဆောင်ယူလာခြင်းမျိုးတော့ မဟုတ်ချေ။

ဆန့်ကျင်ဘက်အားဖြင့်၊ ပိုမိုနက်ရှိုင်းသော မျှော်လင့်ချက်ကင်းမဲ့မှုကိုသာ ဆောင်ယူလာခဲ့သည်။

အကြောင်းမှာ အင်မော်တယ်ရှေးဧကရာဇ်သည်လည်း အသျှင်ဘိုးဘေးကဲ့သို့ပင် အင်မော်တယ်နယ်မြေကြီးကို သွေးစွန်းသော သုတ်သင်မှုတွင် စတင်ပါဝင်လာသောကြောင့်ပင်။

၎င်းမှာ အမှန်တကယ်ပင် မျှော်လင့်ချက်ကင်းမဲ့စရာ ဖြစ်သည်။

ဟွမ်နျဲ့တောက်သည်လည်း သူ၏ မျက်နှာဖုံးကို လုံးဝ ခွာချလိုက်ပြီ။

သူက ဟားတိုက်ရယ်မောလိုက်ပြီး ပြောလိုက်သည်။

"ကျွင်းရှောင်ယောက်... မင်းက အရမ်းရူးသွပ်တဲ့ကောင် မဟုတ်လား။ လာလေ... မင်းမှာ ဒီကမ္ဘာပျက်မယ့် ကပ်ဘေးကြီးကို တားဆီးနိုင်တဲ့ စွမ်းအား ရှိ၊ မရှိ ကြည့်ရအောင်"

ဟွမ်နျဲ့တောက်က မာနထောင်လွှားစွာ ရယ်မောနေသည်။

သူက အင်မော်တယ်နယ်မြေမှ သတ္တဝါများ၏ ဆဲဆိုမှုကို လုံးဝ ဂရုမစိုက်ချေ။

ဤသွေးစွန်းသော သုတ်သင်မှုက သူ့ဖခင်၏ ခွန်အားကို တိုးတက်စေနိုင်သရွေ့ သူ ဘာကိုမှ ဂရုမစိုက်ပါ။

အဆိုးဆုံးဖြစ်လာလျှင်ပင်၊ သူက အင်မော်တယ်ရှေးဧကရာဇ်နှင့်အတူ ကောင်းကင်ကိုးပါးသို့ လုံးဝ ပူးပေါင်းသွားရုံသာ ရှိသည်။

အင်မော်တယ်ရှေးဧကရာဇ်က သားရဲဂူနှင့် ဆက်ဆံရေးအချို့ ရှိပေသည်။

သို့သော် အင်မော်တယ်ရှေးဧကရာဇ်က တစ်ဦးတည်းသောသူ မဟုတ်ချေ။

အခြားတစ်ဖက်တွင် နဂါးဟိန်းသံတစ်ခု ထွက်ပေါ်လာသည်။

စကြာဝဠာကို တုန်ခါစေသော နဂါးကြီးတစ်ကောင်၏ ပုံရိပ် ပေါ်ထွက်လာသည်။

၎င်းက နဂါးဘုရင်နန်းတော်မှ နဂါးဧကရာဇ်ပင်။

သူသည်လည်း ဤခေတ်၏ အမှောင်ထု ကပ်ဘေးလှိုင်းတွင် ပါဝင်ရန် ဆုံးဖြတ်လိုက်ပြီ ဖြစ်သည်။

နဂါးဧကရာဇ်နှင့် အင်မော်တယ်ရှေးဧကရာဇ်...

ဤရှေးဟောင်းဧကရာဇ်ကြီး နှစ်ပါး ပေါ်ထွက်လာခြင်းမှာ အင်မော်တယ်နယ်မြေကြီးအတွက် ပိုမိုနက်ရှိုင်းသော မျှော်လင့်ချက်ကင်းမဲ့မှုကိုသာ ဆောင်ယူလာခဲ့ပေသည်။

ရှေးဟောင်း နဂါးဧကရာဇ် လုံထန်၏သားတော် လုံရွှမ်ယီလည်း ပေါ်လာခဲ့သည်။

သူသည်လည်း မေ့ပျောက်ခြင်းတိုင်းပြည်တွင် ကျွင်းရှောင်ယောက်နှင့် ပဋိပက္ခ ဖြစ်ခဲ့ဖူးသူပင်။

ယခုအခါ သူက ဟွမ်နျဲ့တောက်နှင့် ပူးပေါင်းလိုက်ပြီ ဖြစ်သည်။

ဤသတင်းကို ကြားရသည့်အခါ အင်မော်တယ်နယ်မြေမှ ကျင့်ကြံသူများစွာမှာ ပို၍ပင် စိတ်ဓာတ်ကျဆင်းလာတော့သည်။

"ရှေးဟောင်းတော်ဝင်မျိုးနွယ်တွေက အင်မော်တယ်နယ်မြေကြီးကို တစ်ပြုံ‌လိုက်ကြီး သစ္စာဖောက်တော့မှာလား"

ဧကရာဇ်တစ်ပိုင်းတစ်ဦးက မနေနိုင်ဘဲ ညည်းတွားလိုက်မိသည်။

သို့သော်လည်း အင်မော်တယ်ရှေးဧကရာဇ်နှင့် နဂါးဧကရာဇ်တို့ ပေါ်လာပြီးနောက်တွင် ကျန်ရှိနေသော ရှေးဟောင်းတော်ဝင်မျိုးနွယ်စုများမှာမူ သိသိသာသာ လှုပ်ရှားခြင်း မရှိကြသေးချေ။

ရှေးဟောင်းတော်ဝင်မျိုးနွယ်များက တစ်စိတ်တစ်ဝမ်းတည်းဟု ဆိုကြသော်လည်း အမှန်တကယ်တွင် သူတို့က တစ်သားတည်း မဟုတ်ကြချေ။

၎င်းမှာ ကွဲပြားနေသော အင်မော်တယ်ခုံရုံးနှင့် ဆင်တူသည်။

နဂါးဘုရင်နန်းတော်နှင့် ဖီးနစ်နတ်ဆိုးရှေးဟောင်းဂူတို့က အမှောင်ကပ်ဘေးတွင် ပါဝင်ရန် ရွေးချယ်လိုက်ခြင်းမှာ...

အခြားသော ရှေးဟောင်းတော်ဝင်မျိုးနွယ်စုများကပါ အတူတူပါဝင်မည်ဟု မဆိုလိုချေ။

သူတို့က လောလောဆယ် စောင့်ကြည့်နေကြဆဲ ဖြစ်သည်။

ဤကပ်ဘေးတွင် ခန့်မှန်းရခက်သော အပြောင်းအလဲများစွာ ရှိနိုင်ပေသည်။

နဂါးဧကရာဇ်နှင့် အင်မော်တယ်ရှေးဧကရာဇ်တို့က သွေးစွန်းသော သုတ်သင်မှုကို စတင်လိုက်ချိန်မှာပင်...

"ဝုန်း"

ကောင်းကင်ကိုးပါး၏ အထက်တွင် ပေါက်ကွဲသံတစ်ခု ထပ်မံ ထွက်ပေါ်လာပြန်သည်။

ကြောက်မက်ဖွယ်ကောင်းသော အရှိန်အဝါတစ်ခုနှင့်အတူ ပုံရိပ်များ ထွက်ပေါ်လာ၏။

ထိုအရှိန်အဝါမှာ မြင့်မြတ်ဝိညာဉ်အပျက်အယွင်းမှ လာခြင်း ဖြစ်သည်။

ကျောက်သားချပ်ဝတ်တန်ဆာကို ဝတ်ဆင်ထားသည့် အလွန်တရာ ခန့်ညားထည်ဝါသော ပုံရိပ်ကြီးတစ်ခု ပေါ်လာခဲ့သည်။

သူက သွေးစွန်းနေသော လှံပုဆိန်တစ်စင်းကို ကိုင်ဆောင်လျက် ကောင်းကင်ယံသို့ ပျံတက်လာခဲ့၏။

ကြောက်မက်ဖွယ်ကောင်းသော ဖိအားနှင့် သတ်ဖြတ်လိုသော စိတ်ဆန္ဒများက ကျွင်းမိသားစုနှင့် ကျွင်းဧကရာဇ်ခုံရုံးဆီသို့ ဦးတည်ကာ ကျဆင်းလာသည်။

ထိုသူမှာ အခြားမဟုတ်...

ကျောက်ဧကရာဇ်ပင် ဖြစ်တော့သည်။